Read Kodava ಲೂಕ 14 Bible Online

ಲೂಕ 14 - Kodava bible

ಲೂಕ 14

¹ಒರ್ ಸಬ್ಬತ್ ದಿವಸತ್‍ಲ್, ಯೇಸು, ಫರಿಸಾಯಂಗಡ ಮುಕ್ಯಸ್ತ ಒಬ್ಬಂಡ ಮನೆಕ್ ಉಂಬಕ್ ಪೋಯಿತ್ಂಜತ್. ಯೇಸು ಎಂತ ಮಾಡ್‌ವಾಂದ್ ಜನ ಎಲ್ಲಾರು ಅಂವೊಂಡ ಮೇಲೆ ಕಣ್ಣೆಡುಕತೆ ನೋಟಿಯಂಡ್ ಇಂಜತ್.

²ಅಕ್ಕ ಅಲ್ಲಿಕ್ ಕೈಕಾಲ್ ಊದ್‍ನ ರೋಗತ್‍ಲ್ ಇಂಜ ಒರ್ ಮನುಷ್ಯ ಯೇಸುರ ಪಕ್ಕ ಬಂದಿತ್ಂಜತ್.

³ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಳ ಪಿಂಞ ಫರಿಸಾಯಳ ಯೇಸು ನೋಟುವಂಜಿ: ಸಬ್ಬತ್ ದಿವಸತ್‍ಲ್ ವಾಸಿ ಮಾಡ್‍ವದ್ ನ್ಯಾಯಪ್ರಮಾಣತ್‍ರ ಪ್ರಕಾರ ನ್ಯಾಯಾನ ಇಲ್ಲೆಯಾಂದ್ ಕ್‍ೕಟತ್.

⁴ಅದ್ಂಗ್ ಅಯಿಂಗ ಒರ್ ತಕ್ಕು ಪರ್‍ಂದ್‍ತ್‌ಲ್ಲೆ. ಅಕ್ಕ ಯೇಸು ಆ ಸೌಕ್ಯ ಇಲ್ಲತಂವೊನ ಮುಟ್ಟಿತ್ ವಾಸಿ ಮಾಡಿತ್ ಅಯಿಚತ್.

⁵ಇಂಞು ಅಯಿಂಗಳ ನೋಟಿತ್: ನಿಂಗಡ ಕುಂಞಿ ಅಥವ ಒರ್ ಎತ್ತ್ ಸಬ್ಬತ್ ದಿವಸತ್‍ಲ್ ಕಣತೆರೆಕ್ ಬುದ್ದ್ ಪೋನಕ, ನಿಂಗ ಅದ್‍ನ ಕಣತೆರೆಯಿಂಜ ಕೊಡಿಕ್ ಸಬ್ಬತ್ ದಿವಸತ್‍ಲೇ ಎಡ್‌ತ ಬಪ್ಪಿರಲ್ಲಾಂದ್ ಎಣ್ಣ್‌ಚಿ.

⁶ಈ ತಕ್ಕ್‌ಕ್ ಉತ್ತರ ಕೊಡ್‍ಪಕ್ ಅಯಿಂಗಕ್ ಕಯಿಂಜಿತ್‌ಲ್ಲೆ.

⁷ಉಂಬಕ್ ಬಂದ ಜನ ಮುಕ್ಯಪಟ್ಟ ಜಾಗತ್‍ಲ್ ಅಳ್‌ಪಕ್ ಪೆಚಾಡುವನ ಯೇಸು ನೋಟ್‌ಚಿ. ಆನಗುಂಡ್ ಅಯಿಂಗಕ್ ಯೇಸು ಒರ್ ಕಥೇರ ರೂಪತ್‍ನ ಎಣ್ಣ್‌ಚಿ.

⁸ನಿಂಗಳ ಒಬ್ಬ ಮಂಗಲತ್‍ರ ಗದ್ದಾಳಕ್ ಕಾಕಿತುಂಡೇಂಗಿ, ನಿಂಗ ಮುಕ್ಯಪಟ್ಟ ಕುರ್ಚಿಲ್ ಅಳ್‌ಕತಿ. ನಿಂಗಕಿಂಜ ಬಲ್ಯಂವೊ ಬಂದಿತ್‌ಪ್ಪ,

⁹ಅಕ್ಕ ನಿಂಗಳ ಕಾಕ್‍ನಂವೊ ಬಂದಿತ್ ನೀನ್ ಅಳ್‌ತ ಕುರ್ಚಿನ ಇಂವೊಂಗ್ ಬುಟ್ಟ್‌ ಕೊಡ್‍ೕಂದ್ ಎಣ್ಣುವಕ, ನಿಂಗ ಞಾಣಪಟ್ಟಂಡ್ ಕಮ್ಮಿಯಾನ ಜಾಗಕ್ ಪೋಯಿತ್ ಅಳ್‍ಕಂಡು.

¹⁰ನಿಂಗಳ ಒಬ್ಬ ಮಂಗಲತ್‍ರ ಗದ್ದಾಳಕ್ ಕಾಕಿತುಂಡೇಂಗಿ, ಅಲ್ಲಿಕ್ ಪೋಯಿತ್ ಕಡೆ ಕುರ್ಚಿಲ್ ಅಳೆರಿ, ಅಕ್ಕ ಕಾಕ್‍ನಂವೊ, ನಿಂಗಡ ಪಕ್ಕ ಬಂದಿತ್, ಸ್ನೇಹಿತ, ನಲ್ಲ ಜಾಗತ್‍ಲ್ ಅಳ್‌ಪಕ್ ಬಾರೀಂದ್ ಎಣ್ಣುವ. ಇನ್ನನೆ ಮಾಡ್‍ಚೇಂಗಿ, ಎಲ್ಲಾ ಜನಡ ಮಿಂಞತ್‍ಲ್ ನೀಕ್ ದುಂಬ ಮರ್ಯಾದೆ ಕ್‍ಟ್ಟುವ.

¹¹ನಿಂಗ, ನಿಂಗಳ ಬೋರೆಯಿಂಗಕಿಂಜ ಬಲ್ಯದಾಯಿತ್ ಇರಂಡೂಂದ್ ನೋಟ್‍ಚೇಂಗಿ ನಿಂಗ ಅಡಿಕ್ ಬಪ್ಪಿರ, ಆಚೇಂಗಿ ನಿಂಗ ಬಗ್ಗಿತ್ ನಡ್ಂದತೇಂಗಿ ನಿಂಗಳ ದೇವ ಮಿಂಞಕ್ ಕೊಂಡ್ ಬಪ್ಪ.

¹²ಯೇಸು ಅಂವೊನ ಉಂಬಕ್ ಕಾಕ್‌ನಂವೊಂಡ ಪಕ್ಕ: ನೀನ್ ನೀಡ ಮನೆಕ್ ಗದ್ದಾಳಕ್ ಕಾಕ್‍ವಕ ನೀಡ ಸ್ನೇಹಿತಂಗಳ, ನೀಡ ಅಣ್ಣತಮ್ಮಣಂಗಳ, ನೀಡ ಬೆಂದ್‌ಕಯಿಂಗಳ, ಐಶ್ವರ್ಯವಂತ ನೆರೆಮನೆಕಾರಳ ದಾರ್‌ನು ಕಾಕತೆ; ನೀನ್ ಕಾಕ್‍ಚೇಂಗಿ, ನಿನ್ನ ಸಹ ಅಯಿಂಗ ಕಾಕುವ ಅದ್ ನೀನ್ ಮಾಡ್‍ನಾಂಗೆಲ್ಲಾ ಅಯಿಂಗ ಪುನಃ ನೀಕ್ ಮಾಡ್‍ನನೆಕೆ ಆಪ.

¹³ನೀನ್ ನೀಡ ಮನೆಕ್ ಉಂಬಕ್ ಕಾಕ್‌ವಕಾಪಕ ಗರೀಬಳ, ಕುಂಟಂಗಳ, ಕುರ್‌ಡಂಗಳ, ಊನಕಾರಂಗಳ ಕಾಕ್,

¹⁴ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ನಿನ್ನ ಕಾಕಿತ್ ನೀಕ್ ಬದ್‍ಲ್ ತಪ್ಪಕಯ್ಯುಲೆ. ಅಕ್ಕ ನಿನ್ನ ದೇವ ಆಶೀರ್ವಾದ ಮಾಡ್‌ವ ಪಿಂಞ ನೀತಿವಂತಯಿಂಗ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪ ಕಾಲತ್‍ಲ್ ನೀಕ್ ಬದ್‍ಲ್ ಕ್‍ಟ್ಟ್‌ವ.

¹⁵ಯೇಸು ಇನ್ನನೆ ಎಣ್ಣ್‌ನ ಪಿಂಞ, ಉಂಬಕ್ ಅಳ್‌ತಿತ್ಂಜ ಒರ್ ಮನುಷ್ಯ, ದೇವಡ ರಾಜ್ಯತ್‍ಲ್ ಉಂಬಂವೊ ಆಶೀರ್ವಾದ ಪಡ್ಂದವೋಂದ್ ಎಣ್ಣ್‌ಚಿ.

¹⁶ಅಯಿಂಗಕ್ ಯೇಸು: ಒಮ್ಮ ಒರ್ ಮನುಷ್ಯ, ಬಲ್ಯ ಅಡಿಗೆ ಮಾಡಿತ್ ದುಂಬ ಜನಳ ಉಂಬಕ್ ಬರಂಡೂಂದ್ ಕಾಕ್‍ಚಿ.

¹⁷ಅಡಿಗೆ ಎಲ್ಲಾ ತಯಾರಾಚಿ, ಉಂಬಕ್ ಬಾರೀಂದ್ ಅಂವೊ ಕಾಕ್‍ನಯಿಂಗಕ್ ಎಣ್ಣ್‌ವಕ್ ತಾಂಡ ಆಳ್‌ನ ಅಯಿಚತ್.

¹⁸ಆಚೇಂಗಿ ಎಲ್ಲಾರು ಬಪ್ಪಕಯ್ಯತಗುಂಡ್ ಕಾರಣ ಕೊಡ್‍ಪಕ್ ಸುರು ಮಾಡ್‍ಚಿ. ಒಬ್ಬ: ನಾನ್ ಇಕ್ಕಾಯಿತ್ ಒರ್ ಬೇಲ್‍ನ ಎಡ್‌ತಿಯೆ, ಅದ್‍ನ ನಾನ್ ನೋಟ್‍ವಕ್ ಪೋಂಡು, ನನ್ನ ಮನ್ನಿಚಿಡ್‍ೕಂದ್ ಎಣ್ಣ್‌ಚಿ.

¹⁹ಇಂಞೊಬ್ಬ: ನಾನ್ ಅಂಜ್ ಜೊತೆ ಎತ್ತ್‌ನ ಎಡ್‌ತಿಯೆ ಅದ್‍ನ ಪರೀಕ್ಷೆ ಮಾಡ್‌ವಕ್ ಪೋಯಂಡುಳ್ಳ ನನ್ನ ಮನ್ನಿಚಿಡ್‍ೕಂದ್ ಎಣ್ಣ್‌ಚಿ.

²⁰ಇಂಞೊಬ್ಬ: ನಾನ್ ಇಕ್ಕಾಯಿತ್ ಮಂಗಲ ಕಯಿಚಿಯೆ ಅದ್ಂಗಾಯಿತ್ ಬಪ್ಪಕಯ್ಯುಲೆ, ನನ್ನ ಮನ್ನಿಚಿಡ್‍ೕಂದ್ ಎಣ್ಣ್‌ಚಿ.

²¹ಆ ಆಳ್ ಬಂದಿತ್ ಇದ್‍ನೆಲ್ಲ ತಾಂಡ ಎಜಮಾನಂಗ್ ವಿವರಿಚಿಟ್ಟತ್. ಅಕ್ಕ ಆ ಮನೆರ ಎಜಮಾನಂಗ್ ದುಂಬ ಚೆಡಿ ಬಂದಿತ್, ಆ ಆಳ್‍ಕ್, ನೀನ್ ಪಟ್ಟಣತ್‍ರ ಎಲ್ಲಾ ಬೀದಿಕ್, ಓಣಿಕ್ ಎಚ್ಚಕ್ ಬೆರಿಯ ಕಯ್ಯುವ ಅಚ್ಚಕ್ ಬೆರಿಯ ಪೋಯಿತ್, ಗರೀಬಳ, ಕುಂಟಂಗಳ, ಕುರ್‌ಡಂಗಳ, ಊನ ಉಳ್ಳಯಿಂಗಳ ಕಾಕಿಯಂಡ್ ಬಾಂದ್ ಎಣ್ಣ್‌ಚಿ.

²²ಆ ಆಳ್ ಎಜಮಾನ ಎಣ್ಣ್‌ನನೆಕೆ ಮಾಡಿತ್: ಎಜಮಾನನೇ, ನೀನ್ ಎಣ್ಣ್‌ನನೆಕೆ ನಾನ್ ಮಾಡಿಯೆ, ಆಚೇಂಗಿ ಇಂಞು ಜಾಗ ಉಂಡಲ್ಲಾಂದ್ ಎಣ್ಣ್‌ಚಿ.

²³ಅದ್ಂಗ್ ಎಜಮಾನ: ನೀನ್ ಊರ್‌ರ ಬೇಲಿರ ಪೊರಮೆಯು, ಬೋರೆ ಬೋರೆ ಬಟ್ಟೇಕು, ಬೇಲ್‍ಕು ಪೋಯಿತ್ ಕಂಡಿತವಾಯಿತ್ ಬಪ್ಪಕ್ ಎಣ್ಣ್, ಅಕ್ಕ ನಾಡ ಮನೆ ದುಂಬಿರುವಾಂದ್ ಎಣ್ಣ್‌ಚಿ.

²⁴ನಾನ್ ನಿಂಗಕ್ ಎಣ್ಣ್‌ವಿ, ನಾನ್ ಆದ್ಯವಾಯಿತ್ ಕಾಕ್‍ನ ಜನತ್‍ಲ್ ಒಬ್ಬನು ನಾಡ ಗದ್ದಾಳಕ್ ಮಾಡ್‍ನ ಅಡಿಗೆರ ರಸ ನೋಟ್‌ಲೇಂದ್ ಎಣ್ಣ್‌ಚಿ.

²⁵ಒರ್ ದಿವಸ ದುಂಬ ಜನ ಯೇಸುರ ಕೂಡೆ ಪೋಯಂಡ್ ಇಪ್ಪಕ, ಅಯಿಂಗಳ ನೋಟಿತ್: ದಾರ್ ತಾಂಡ ಅಪ್ಪವ್ವನ, ಅಣ್ಣತಮ್ಮಣಂಗಳ, ಅಕ್ಕತಂಗೆಯಳ, ಅಂವೊಂಡ ಪೊಣ್ಣ್‌ನ, ಅಂವೊಂಡ ಮಕ್ಕಳ ಪಿಂಞ ತಾಂಡ ಜೀವತ್‍ನ ನಾಕಿಂಜ ದುಂಬ ಪ್ರೀತಿ ಮಾಡ್‌ವ ಅಯಿಂಗ ನಾಡ ಶಿಷ್ಯಂಗಳಾಯಿತ್‌ಪ್ಪಕ್ ಕಯ್ಯುಲೆ.

²⁷ದಾರ್ ಒಬ್ಬ ತಾಂಡ ಶಿಲುಬೇನ[35] ಪೊರ್‍ತಂಡ್ ನಾಡ ಬಯ್ಯ ಬಪ್ಪ್‌ಲೆಯೋ ಅಯಿಂಗ ನಾಡ ಶಿಷ್ಯಂಗಳಾಯಿತ್‌ಪ್ಪಕ್ ಕಯ್ಯುಲೇಂದ್ ಎಣ್ಣ್‌ಚಿ.

²⁸ನಿಂಗಡಲ್ಲಿ ಒಬ್ಬ ಒರ್ ಗೋಪುರ ಕೆಟ್ಟ್‌ವಕ್ ಗೇನ ಮಾಡ್‍ಚೇಂಗಿ, ಅಂವೊ ಅಳ್‌ತಿತ್ ಅದ್‍ನ ಕೆಟ್ಟ್‌ವಕ್ ಎಚ್ಚಕ್ ಆಪಾಂದ್ ಲೆಕ್ಕ ಮಾಡಿತ್ ಅದ್ ಮದಿಯಾಂದ್ ನೋಟ್‌ಲೆಯಾ?

²⁹ಅಂವೊ ಅನ್ನನೆ ಮಾಡತ ಪೋನಕ ಗೋಪುರ ಕೆಟ್ಟ್‌ವಕ್ ಅಡಿಪಾಯಿ ಇಟ್ಟ ಪಿಂಞ ಆ ಕೆಲಸ ಪೂರ್ತಿ ಆಕತಪೋನಕ ಅದ್‍ನ ನೋಟುವ ಎಲ್ಲಾರು ಈ ಮನುಷ್ಯ ಕೆಟ್ಟ್‌ವಕ್ ಸುರು ಮಾಡ್‍ಚಿ, ಆಚೇಂಗಿ ಅದ್‍ನ ಪೂರ್ತಿ ಮಾಡ್‌ವಕ್ ಕಯಿಂಜಿತ್ತಿಲ್ಲೇಂದ್ ಅಂವೊನ ಹಿಯಾಳ್‌ಚಿಡುವ.

³¹ಅನ್ನನೆ, ಒರ್ ರಾಜ ಬೋರೆ ಒಬ್ಬ ರಾಜಂಡ ಕೂಡೆ ಯುದ್ದ ಮಾಡ್‌ವಕ್ ಪೋಪಾಂಗ್ ಮಿಂಞ ನಾಡ ಮೇಲೆ ಇರ್‌ವದ್ ಆಯಿರ ಸೈನಿಕಂಗಳ ಕಾಕಿಯಂಡ್ ಬಂದಂಡುಳ್ಳಂವೊಂಡ ಕೂಡೆ ತಾಂಡ ಪಕ್ಕ ಉಳ್ಳ ಪತ್ತ್ ಆಯಿರ ಸೈನಿಕಂಗಳಗುಂಡ್ ನಾಕ್ ಅಯಿಂಗಳ ಗೆಲ್ಲುವಕ್ ಕಯ್ಯುವಾಂದ್ ಅಂವೊ ಆಲೋಚನೆ ಮಾಡತಿಪ್ಪ?

³²ಅಯಿಂಗಳ ಗೆಲ್ಲುವಕ್ ಕಯ್ಯುಲೇಂದ್ ಗೊತ್ತಾಚೇಂಗಿ, ಆ ರಾಜ ಇಂಞು ದೂರತ್‍ಲ್ ಉಳ್ಳ ಸಮಯತ್‍ಲೆ, ದೂತಂಗಳ ಅಯಿಚಿತ್ ಸಮಾದಾನ ಮಾಡ್‌ವಕ್ ಪ್ರಯತ್ನ ಪಡುವ.

³³ಅನ್ನನೆ ನಿಂಗಡದ್‍ೕಂದ್ ಉಳ್ಳದ್‍ನ ಎಲ್ಲಾ ಬುಟ್ಟ್ ಕೊಡ್‍ಕತೆ ಪೋನಕ ನಾಡ ಶಿಷ್ಯಂಗಳಾಯಿತ್‌ಪ್ಪಕ್ ಕಯ್ಯುಲೆ.

³⁴ಉಪ್ಪ್ ನಲ್ಲದ್, ಆಚೇಂಗಿ ಉಪ್ಪ್‌ರ ಸತ್ವ ಪೋಚೇಂಗಿ, ಪುನಃ ನಿಂಗಕ್ ಉಪ್ಪ್‌ನ ಎನ್ನನೆ ಸತ್ವ ಮಾಡ್‌ವಕಯ್ಯು?[36]

³⁵ಅದ್ ಬೂಮಿಕು ನಲ್ಲದಿಲ್ಲೆ, ಗೊಬ್ಬರಕು ನಲ್ಲದಿಲ್ಲೆ. ಅದ್‍ನ ಜನ ಪೊರಮೆ ಚಾಡಿರ್‍ವ. ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ.