Read Kodava ಲೂಕ 16 Bible Online

ಲೂಕ 16 - Kodava bible

ಲೂಕ 16

¹ಯೇಸು ಅಂವೊಂಡ ಶಿಷ್ಯಂಗಕ್ ಇಂಞೊರ್ ಕಥೇರ ರೂಪತ್‍ನ ಎಣ್ಣ್‌ಚಿ. ಒರ್ ಬಲ್ಯ ಮನುಷ್ಯಂಗ್ ಅಂವೊಂಡ ಆಳುವಡ ಕಣಕ್ ಒಳ್‍ದ್‍ವ ಅದಿಕಾರಿ ಇಂಜತ್. ಆ ಅದಿಕಾರಿ ಎಜಮಾನಂಡ ಆಸ್ತಿನ ಪಾಳ್ ಮಾಡಿಯಂಡ್ ಉಂಡ್‍ೕಂದ್ ದಾರೋ ಎಜಮಾನಂಗ್ ಎಣ್ಣಿ ಕೊಡ್‍ತತ್.

²ಎಜಮಾನ ಅಂವೊನ ಕಾಕುವಂಜಿ, ಇದೆಂತ್, ನೀಡ ವಿಷಯತ್‍ನ ನಾನ್ ಕ್‍ೕಟಂಡುಳ್ಳದ್? ನೀಡ ಲೆಕ್ಕತ್‍ನ ನಾಡ ಪಕ್ಕ ಒಪ್ಪ್‌ಚಿಡ್, ನೀನ್ ಇಂಞು ಮಿಂಞಕ್ ನಾಡ ಆಸ್ತಿರ ಲೆಕ್ಕತ್‍ನ ನೋಟ್‌ವಕ್ಕಾಗಾಂದ್ ಎಣ್ಣ್‌ಚಿ.

³ಆ ಅದಿಕಾರಿ: ನಾನ್ ಇಂಞು ಮಿಂಞಕ್ ಎಂತ ಮಾಡಡ್. ನನ್ನ ಈ ಕೆಲಸತ್ಂಜ ಎಡ್‌ತ್‌ರ್‌ವ. ನಾಕ್ ಕುಂಡ್ ಕಳ್‌ಪ್‌ಕ್ ಬಲ ಇಲ್ಲೆ, ಬೋಡ್‍ವಕ್ ನಾಕ್ ಞಾಣ ಆಪ.

⁴ಈ ಕೆಲಸ ಪೋನ ಪಿಂಞ ನನ್ನ ಜನ ಅಯಿಂಗಡ ಮನೆರ ಒಳ್‍ಕ್ ಸ್ವೀಕಾರ ಮಾಡ್‌ವಕ್ ಎಂತ ಮಾಡಂಡೂಂದ್ ನಾಕ್ ಗೊತ್ತಾಚೀಂದ್ ತಾನೆ ಗೇನ ಮಾಡಿಯಂಡ್,

⁵ತಾಂಡ ಎಜಮಾನಂಡ ಪಕ್ಕ ಸಾಲ ಎಡ್‌ತಯಿಂಗಳೆಲ್ಲಾ ಒಬ್ಬೊಬ್ಬನಾಯಿತ್ ಕಾಕುವಂಜಿ, ಆದ್ಯತವನ ನೋಟಿತ್: ನೀನ್ ನಾಡ ಎಜಮಾನಂಗ್ ಎಚ್ಚಕ್ ಸಾಲ ಕೊಡ್‍ಕಂಡೂಂದ್ ಕ್‍ೕಟತ್.

⁶ಅಂವೊ: ನೂರ್ ಅಂಡೆ ಆಲಿವ್ ಎಣ್ಣೆ ಕೊಡ್‍ಕಂಡೂಂದ್ ಎಣ್ಣ್‌ಚಿ. ಅಕ್ಕ ಆ ಅದಿಕಾರಿ: ಇದಾ ನೀಡ ಲೆಕ್ಕ ಇಲ್ಲಿ ಉಂಡ್, ನೀನ್ ಇಲ್ಲಿ ಅಳ್‌ತಿತ್ ಅದ್‍ನ ಐಂಬದ್‍ೕಂದ್ ಒಳ್‌ದ್‍ೕಂದ್ ಎಣ್ಣ್‌ಚಿ.

⁷ಪಿಂಞ ದಂಡನೆಯಂವೊನ ಕಾಕುವಂಜಿ: ನೀನ್ ನಾಡ ಎಜಮಾನಂಗ್ ಎಚ್ಚಕ್ ಸಾಲ ಕೊಡ್‍ಕಂಡೂಂದ್ ಕ್‍ೕಟತ್. ಅದ್ಂಗ್ ಅಂವೊ: ನಾನ್ ಆಯಿರ ಚೀಲ ಗೋದಿ ಕೊಡ್‍ಕಂಡೂಂದ್ ಎಣ್ಣ್‌ಚಿ. ಅಕ್ಕ: ಇದಾ, ನೀಡ ಲೆಕ್ಕ ಇಲ್ಲಿ ಉಂಡ್, ಅಳ್‌ತಿತ್ ಅದ್‍ನ ಎಟ್ಟ್‌ನೂರ್‍ೕಂದ್ ಒಳ್‌ದ್‍ೕಂದ್ ಎಣ್ಣ್‌ಚಿ.

⁸ಅನ್ಯಾಯ ಮಾಡ್‌ವ ಈ ಅದಿಕಾರಿರ ಎಜಮಾನ ಇದ್‍ನೆಲ್ಲಾ ಕ್‍ೕಪಂಜಿ, ಅಂವೊಂಡ ಬುದ್ದಿನ ಕಂಡಿತ್, ಬೋರೆ ಬಟ್ಟೆಯಿಲ್ಲತೆ ಅಂವೊನ ಹೊಗಳ್‍ಚಿ. ಮಿಂಞತ್‍ರ ಬದ್‍ಕ್‍ಕ್ ಬೋಂಡಿಯಾನದ್‍ನ ಉಳಿಕೆ ಮಾಡಿತ್ ಬೆಪ್ಪಕ್, ಬೊಳ್‍ಚತ್‍ರ ಮಕ್ಕಕಿಂಜ, ಈ ಲೋಕತ್‍ನ ಮಾತ್ರ ಗೇನಮಡಿಯಂಡುಳ್ಳ ಮಕ್ಕ ಬಾರಿ ಬುದ್ದಿವಂತಯಿಂಗಳಾಯಿತುಂಡ್.

⁹ಆನಗುಂಡ್ ನಾನ್ ನಿಂಗಕ್ ಎಣ್ಣ್‌ವಿ: ಈ ಲೋಕತ್‍ಲ್ ಉಳ್ಳ ಪಾಳಾಯಿ ಪೋಪ ನಿಂಗಡ ದುಡ್ಡ್ ಪಿಂಞ ಐಶ್ವರ್ಯತ್‍ರ ಮೂಲಕ ಬೋರೆಯಿಂಗಕ್ ಪ್ರಯೋಜನ ಆಪನೆಕೆ ಮಾಡಿತ್, ಸ್ನೇಹಿತಂಗಳ ಕೂಟಿಯೊಳಿ. ಈ ಲೋಕತ್‍ರ ಆಸ್ತಿ ನಿಂಗಳ ಬುಟ್ಟಿತ್ ಪೋಪಕ, ಅಯಿಂಗ ನಿಂಗಳ ನಿತ್ಯ ವಾಸ ಮಾಡ್‍ವಕ್ಕುಳ್ಳ ಜಾಗತ್‍ಲ್ ಸ್ವೀಕಾರ ಮಾಡ್‌ವ.

¹⁰ಚೆರಿಯ ಚೆರಿಯ ವಿಷಯತ್‍ಲ್ ನಂಬಿಕಸ್ತನಾಯಿತುಳ್ಳಂವೊ ಬಲ್ಯ ಬಲ್ಯ ವಿಷಯತ್‍ಲು ನಂಬಿಕಸ್ತನಾಯಿತಿಪ್ಪ. ಚೆರಿಯ ವಿಷಯತ್‍ಲ್ ನಂಬಿಕಸ್ತನಾಯಿತ್ ಇಲ್ಲತಂವೊ ಬಲ್ಯ ವಿಷಯತ್‍ಲು ನಂಬಿಕಸ್ತನಾಯಿತ್ ಇಪ್ಪುಲೆ.

¹¹ಇನ್ನನೆ ಇಪ್ಪಕಾಪಕ, ಈ ಲೋಕತ್‍ರ ಆಸ್ತಿಲ್ ನಂಬಿಕಸ್ತನಾಯಿತ್ ಇರತೆಪೋನಕ ನೇರಾನ ಆಸ್ತಿರ ವಿಷಯತ್‍ಲ್ ನಿಂಗಳ ದಾರ್ ನಂಬುವ?

¹²ಇಂಞೊಬ್ಬಂಡ ಆಸ್ತಿರ ವಿಷಯತ್‍ಲ್ ನಂಬಿಕೆ ಕಾಟತೆ ಪೋನಕ, ನಿಂಗಕ್ ಸ್ವಂತವಾಯಿತ್ ಉಳ್ಳದ್‍ನ ನಿಂಗಕ್ ದಾರ್ ತಪ್ಪಾ?

¹³ಏದ್ ಒರ್ ಆಳು ದಂಡ್ ಎಜಮಾನಂಗ್ ಸೇವೆ ಮಾಡ್‌ವಕ್ ಕಯ್ಯುಲೆ. ಅಂವೊ ಒಬ್ಬನ ಕುಶಿಪಡ್‌ತ್‌ವ, ಇಂಞೊಬ್ಬನ ದ್ವೇಶ ಮಾಡ್‌ವ. ಅಲ್ಲತೆ ಒಬ್ಬನ ಪ್ರೀತಿ ಮಾಡಿಯಂಡ್ ಇಂಞೊಬ್ಬನ ದೂರ್‌ವ. ನಿಂಗ ದೇವನ ಪಿಂಞ ಪಣತ್‍ನ ಒಕ್ಕಚೆ ಸೇವೆ ಮಾಡ್‌ವಕ್ ಕಯ್ಯುಲೆ.

¹⁴ಅಲ್ಲಿ ಚೆನ್ನ ಫರಿಸಾಯಂಗ ಇಂಜತ್. ಫರಿಸಾಯಂಗಕ್ ಪಣತ್‍ರ ಆಸೆ ದುಂಬ ಇಂಜತ್. ಯೇಸು ಈ ತರ ತಕ್ಕ್ ಪರಿಯುವಾನ ಕ್‍ೕಟಿತ್, ಅಂವೊಂಡ ವಿಷಯ ಎಣ್ಣಿತ್ ಕೆಣಕಿಯಂಡಿಂಜತ್.

¹⁵ಆಚೇಂಗಿ ಯೇಸು ಅಯಿಂಗಕ್, ನಿಂಗ ಎಕ್ಕಾಲು ಬೋರೆಯಿಂಗಡ ಮಿಂಞತ್ ನಲ್ಲಯಿಂಗಳಾಯಿತ್ ಕಾಂಬ್‍ಚಿಟ್ಟಂಡುಂಡ್, ಆಚೇಂಗಿ ದೇವಕ್ ನಿಂಗಡ ಹೃದಯತ್‍ನ ಗೊತ್ತುಂಡ್. ಮನುಷ್ಯಂಗ ಎಂತಾಂಗ್ ದುಂಬ ಬೆಲೆ ಉಂಡ್‍ೕಂದ್ ಗೇನ ಮಾಡ್‌ವ, ಅದ್ ದೇವಡ ಮಿಂಞತ್‍ಲ್ ಅಸಹ್ಯವಾಯಿತ್‌ಪ್ಪಾಂದ್ ಯೇಸು ಎಣ್ಣ್‌ಚಿ.

¹⁶ನ್ಯಾಯಪ್ರಮಾಣ ಪಿಂಞ ಪ್ರವಾದಿಯಂಗಡ ಪುಸ್ತಕತ್‍ಲ್ ಎಣ್ಣ್‌ನನೆಕೆ ಜನ ನಡ್‍ಕಂಡೂಂದ್ ಆಜ್ಞೆ ಮಾಡಿತ್ಂಜತ್. ಯೋಹಾನಂಡ ಸಮಯಕತ್ತನೆ ಇನ್ನನೆ ಆಯಂಡಿಂಜತ್. ಆಚೇಂಗಿ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಸಮಯತ್ಂಜ ದೇವಡ ರಾಜ್ಯತ್‍ರ ನಲ್ಲ ಸುದ್ದಿ ಪ್ರಚಾರ ಆಯಂಡುಂಡ್. ದುಂಬ ಜನ ದೇವಡ ರಾಜ್ಯತ್‍ರ ಒಳ್‍ಕ್ ಪೋಪಕ್ ಪ್ರಯತ್ನಪಟ್ಟಂಡುಂಡ್.

¹⁷ಆಚೇಂಗಿ, ನ್ಯಾಯಪ್ರಮಾಣತ್‍ರ ಪಿಂಞ ಪ್ರವಾದಿಯಂಗಡ ಪುಸ್ತಕತ್‍ಲ್ ಉಳ್ಳ ಒರ್ ಒಳ್‍ತ್‍ಲ್‌ ಚೆನ್ನಂಗು ಅದ್ಂಡ ಅದಿಕಾರತ್‍ನ ಕಳೆಂದ್‌ತ್ತ್‌ಲ್ಲೆ. ನ್ಯಾಯಪ್ರಮಾಣತ್‍ರ ಒರ್ ಚೆರಿಯ ಅಂಷ ಪಾಳಾಯಿಪೋಪಕಿಂಜ ಬಾನವು ಬೂಮಿಯು ಪಾಳಾಯಿಪೋಪದ್ ದುಂಬ ಸುಲಬವಾಯಿತ್‌ಪ್ಪ.

¹⁸ತಾಂಡ ಪೊಣ್ಣ್‌ನ ಬುಟ್ಟಿತ್ ಬೋರೆ ಪೊಣ್ಣಾಳ್‍ನ ಮಂಗಲ ಕಯಿಚತೇಂಗಿ, ಅಂವೊ ವ್ಯಬಿಚಾರ ಮಾಡ್‍ನನೆಕೆ, ಪಿಂಞ ವಡಿಯನ ಬುಟ್ಟಿತುಳ್ಳವಳ ಮಂಗಲ ಕಯಿಪಂವೊನು ವ್ಯಬಿಚಾರ ಮಾಡ್‍ನನೆಕೆ.

¹⁹ಇಂಞು ಯೇಸು ಎಣ್ಣ್‌ಚಿ: ದುಂಬ ಐಶ್ವರ್ಯ ಉಳ್ಳ ಒರ್ ಮನುಷ್ಯ ಇಂಜತ್. ಅಂವೊ ಎಕ್ಕಾಲು ನಲ್ಲ ಬೆಲೆ ಬಾಳುವ ಬಟ್ಟೆ ಇಟ್ಟಂಡ್, ಎಕ್ಕಾಲು ಐಶ್ವರ್ಯವಂತನಾಯಿತ್ ಬದ್‍ಕಿಯಂಡಿಂಜತ್.

²⁰ಅಲ್ಲಿ ಲಾಜರ ಎಣ್ಣುವ ಒರ್ ಬಿಕ್ಷೆಕಾರ ಆ ಐಶ್ವರ್ಯವಂತಂವೊಂಡ ಮನೆರ ಪಡಿರ ಮಿಂಞ ಅಳ್‍ತಂಡಿಂಜತ್.

²¹ಅಂವೊ, ಐಶ್ವರ್ಯವಂತಂವೊ ಉಂಬಕಾಪಕ, ಅಂವೊಂಡ ಮೇಜಿರ ಅಡಿಕ್ ಬೂವ ಒಟ್ಟಿ ತುಂಡ್‍ನ ತಿಂದಿತ್ ಅಂವೊಂಡ ಕೆಲತ್‍ನ ದುಂಬುಚಿಡ್‌ವಕ್ ಕುಶಿ ಪಟ್ಟಂಡಿಂಜತ್. ಅಂವೊಂಡ ಮೇಲ್‌ಲ್ ದುಂಬ ಪುಣ್ಣ್ ಇಂಜತ್. ನಾಯಿಯ ಅಕ್ಕಕ್ಕ ಬಂದಿತ್ ಅದ್‍ನ ನಕ್ಕ್‌ವಯಿಂಜತ್.

²²ಇನ್ನನೆ ಇಪ್ಪಕ ಬಿಕ್ಷೆಕಾರ ಚತ್ತ್ ಪೋಚಿ. ಅಂವೊನ ದೇವದೂತಂಗ ಎಡ್‍ತಂಡ್ ಪೋಯಿತ್ ಅಬ್ರಹಾಮಂಡ ಪಕ್ಕ ಅಳ್‍ಪ್‍ಚಿಟ್ಟತ್. ಪಿಂಞ ಆ ಐಶ್ವರ್ಯವಂತಂವೊನು ಚತ್ತ್ ಪೋಚಿ, ಅಂವೊನ ಪೂತತ್.

²³ಅಂವೊ ನರಕಕ್ ಪೋಯಿತ್ ದುಂಬ ವೇದನೆ ಅನುಬವಿಚಿಟ್ಟಂಡಿಂಜತ್. ಅಂವೊ ದೂರತ್ಂಜ ನೋಟುವಕ, ಅಬ್ರಹಾಮ ಪಿಂಞ ಅಂವೊಂಡ ಕೂಡೆ ಲಾಜರ ಇಪ್ಪದ್‍ನ ಕಂಡತ್.

²⁴ಅಕ್ಕ ಐಶ್ವರ್ಯವಂತಂವೊ: ಅಪ್ಪನಾನ ಅಬ್ರಹಾಮನೇ, ನಾಕ್ ಕನಿಕರ ಕಾಟ್! ಲಾಜರನ ಇಲ್ಲಿ ಅಯಿಚಿತ್, ಅಂವೊ ಅಂವೊಂಡ ತುದಿ ಬೆರತ್‌ನ ನೀರ್‌ಲ್ ಮುಕ್ಕಿತ್ ನಾಡ ನಾವ್‌ನ ತಣಿಚಿಡಡ್, ಈ ಉರಿಲ್ ನಾನ್ ಕಷ್ಟಪಟ್ಟಂಡ್ ಉಳ್ಳ್‌ಂದ್ ಕೂತ್ ಕೊಡ್‍ತತ್.

²⁵ಅಕ್ಕ ಅಬ್ರಹಾಮ: ಮೋಂವೊನೇ, ನೀಕ್ ಬೋಂಡಿಯಾನ ಸುಕತ್‌ನ ನೀಡ ಜೀವಮಾನತ್‌ಲೆ ಅನುಬವಿಚಿಟ್ಟಿತ್ತುಳ್ಳಿಯ. ಅಕ್ಕ ಲಾಜರ ಕಷ್ಟಪಟ್ಟಂಡಿಂಜದ್‍ನ ನೀಕ್ ಗೇನ ಇಲ್ಲೆಯಾ? ಇಕ್ಕ ಲಾಜರಂಗ್ ಸುಕ, ನೀಕ್ ಕಷ್ಟ.

²⁶ಇಂಞು, ಇಲ್ಲಿಂಜ ಅಲ್ಲಿಕ್, ಅಲ್ಲಿಂಜ ಇಲ್ಲಿಕ್ ದಾರೂ ದಾಟ್‍ವಕ್ ಆಕತನೆಕೆ ಅಗಲವಾನ ಆಳವಾನ ಕುಂಡ್ ಉಂಡ್‍ೕಂದ್ ಎಣ್ಣ್‌ಚಿ.

²⁷ಅದ್ಂಗ್ ಆ ಐಶ್ವರ್ಯವಂತಂವೊ: ಅಬ್ರಹಾಮನೇ, ಲಾಜರನ ನಾಡ ಅಪ್ಪಂಡ ಮನೆಕ್ ಅಯಿ.

²⁸ಅಲ್ಲಿ ನಾಕ್ ಅಂಜ್ ಅಣ್ಣತಮ್ಮಣಂಗ ಉಂಡ್, ಅಯಿಂಗ ಈ ಉರಿವ ಜಾಗಕ್ ಬಕ್ಕತನೆಕೆ ನಡ್‍ಪಕ್ ಅಂವೊ ಎಚ್ಚರ ಮಾಡ್‌ವಕ್ ನಾನ್ ನಿನ್ನ ಬೋಡ್‌ವೀಂದ್ ಎಣ್ಣ್‌ಚಿ.

²⁹ಆಚೇಂಗಿ ಅಬ್ರಹಾಮ ಅಂವೊಂಗ್: ಅಲ್ಲಿ ಮೋಶೆ ಪಿಂಞ ಪ್ರವಾದಿಯಂಗ ಎಚ್ಚರ ಮಾಡಿಯಂಡುಂಡ್. ಅಯಿಂಗಕ್ ಅಯಿಂಗ ಕೆಮಿ ಕೊಡ್‍ಕಡ್‍ೕಂದ್ ಎಣ್ಣ್‌ಚಿ.

³⁰ಆಚೇಂಗಿ ಆ ಐರ್ಶ್ವಯವಂತಂವೊ: ಅನ್ನನೆಯಲ್ಲ ಅಪ್ಪನಾನ ಆಬ್ರಹಾಮನೇ, ಅದ್ಂಡ ಬದ್‍ಲಾಯಿತ್, ಚತ್ತಯಿಂಗ ದಾರೇಂಗಿ ಅಯಿಂಗಡ ಪಕ್ಕ ಪೋನಕ, ಅಯಿಂಗ, ಅಂವೊ ಎಣ್ಣುವ ವಿಷಯ ನೇರ್ಂದ್ ನಂಬಿತ್, ಪಾಪತ್‍ನ ಬುಟ್ಟಿತ್ ಪಶ್ಚಾತಾಪ ಪಟ್ಟಿತ್ ದೇವಡ ಪಕ್ಕ ಬಪ್ಪಾಂದ್ ಎಣ್ಣ್‌ಚಿ.

³¹ಅದ್ಂಗ್ ಅಬ್ರಹಾಮ, ಮೋಶೆ ಪಿಂಞ ಪ್ರವಾದಿಯಂಗ ಎಣ್ಣ್‌ವಾನ ಅಯಿಂಗ ನಂಬತೆಪೋನಕ, ಚತ್ತಂವೊ ಒಬ್ಬ ಎದ್ದಿತ್ ಬಂದಿತ್ ಎಣ್ಣ್‌ವಾನ ಸಹ ಅಯಿಂಗ ಕ್‍ೕಪುಲೇಂದ್ ಎಣ್ಣ್‌ಚಿ.