Read Kodava ಲೂಕ 17 Bible Online

ಲೂಕ 17 - Kodava bible

ಲೂಕ 17

¹ಪಿಂಞ ಯೇಸು ಅಂವೊಂಡ ಶಿಷ್ಯಂಗಳ ನೋಟಿತ್, ಈ ಲೋಕತ್‍ಲ್ ಪಾಪ ಮಾಡ್‌ವಕ್ ಸೋದನೆ ಎಕ್ಕಾಲು ಬಪ್ಪ. ಆಚೇಂಗಿ ಬೋರೆಯಿಂಗಳ ಪಾಪ ಮಾಡ್‌ವನೆಕೆ ನಡ್‍ತ್‍ವ ಜನಕ್ ಅಯ್ಯೋ.

²ನಾಡ ಮೇಲೆ ನಂಬಿಕೆಯುಳ್ಳ ಈ ಚೆರಿಯಯಿಂಗಳ ದಾರ್ ನಾಡ ಮೇಲೆ ನಂಬಿಕೆ ಇಲ್ಲತ್ತನೆಕೆ ಮಾಡ್‌ವ, ಅಯಿಂಗಡ ಬೋಳೆಕ್ ಬಲ್ಯೊರ್ ಬೀಜುವ ಕಲ್ಲ್‌ನ ಕೆಟ್ಟಿತ್ ಸಮುದ್ರತ್‍ಲ್ ಚಾಡ್‌ಚೇಂಗಿ ಅಂವೊಂಗ್ ನಲ್ಲದ್.

³ನಿಂಗ ಈ ವಿಷಯತ್‍ಲ್ ಎಚ್ಚರವಾಯಿತಿರಿ. ನೀಡ ಅಣ್ಣತಮ್ಮಣಂಗ ನೀಕ್ ವಿರೋದವಾಯಿತ್ ತಪ್ಪ್ ಮಾಡ್‍ಚೇಂಗಿ ಅಂವೊನ ಗದರಿಚಿಡ್. ಪಿಂಞ ಅಂವೊ ಪಶ್ಚಾತಾಪ ಪಟ್ಟತೇಂಗಿ, ಅಂವೊನ ಮನ್ನಿಚಿಡ್.

⁴ಅಂವೊ ದಿವಸಕ್ ಏಳ್ ಕುರಿ ತಪ್ಪ್ ಮಾಡಿತ್, ಏಳ್ ಕುರಿಯು ಬಂತ್ ಪಶ್ಚಾತಾಪ ಪಟ್ಟಿತ್ ಮನ್ನಿಪ್ಪ್ ಕ್‍ೕಟತೇಂಗಿ, ಅಂವೊನ ಮನ್ನಿಚಿಡ್.

⁵ಅಕ್ಕ ಅಪೊಸ್ತಲಂಗ: ಒಡೆಯನ ನೋಟಿತ್, ನಂಗಡ ನಂಬಿಕೇನ ಸ್ತಿರಮಾಡ್‍ೕಂದ್ ಕ್‍ೕಟತ್.

⁶ಅದ್ಂಗ್ ಯೇಸು: ನಿಂಗಕ್ ನಾಡ ಮೇಲೆ ಕಡು ಕುರುರಚ್ಚಕ್ ನಂಬಿಕೆ ಉಂಡೇಂಗಿ, ಒರ್ ಅತ್ತಿ ಮರಕ್: ನೀನ್ ಬೇರೋಡೆ ಸಮುದ್ರಕ್ ಬೂಳ್‍ೕಂದ್ ಎಣ್ಣ್‌ಚೇಂಗಿ, ಆ ಮರ ನಿಂಗಡ ತಕ್ಕ್ ಕ್‍ೕಟಿತ್ ಬುದ್ದ್‌ಪೋಪಾಂದ್ ಎಣ್ಣ್‌ಚಿ.

⁷ನಿಂಗಡ ಒರ್ ಆಳ್ ಬೇಲ್‌ಲ್ ಉತ್ತಿತ್, ಅಲ್ಲೇಂಗಿ ಕುರಿನ ಮೇಚಿತ್ ಮನೆಕ್ ಬಂದಕ: ಬಾ, ಬೆರಿಯ ಪೋಯಿತ್ ಉಂಡಿತ್ ಬಾಂದ್ ನಿಂಗ ಎಣ್ಣುವಿರ?

⁸ಇಲ್ಲೆ, ನಿಂಗ ಅನ್ನನೆ ಎಣ್ಣುಲೆ! ಅದ್ಂಡ ಬದ್‍ಲ್, ನೀನ್ ನಾಕ್ ಅಡಿಗೆ ಮಾಡಿತ್, ನಾಕ್ ಉಪಚಾರ ಮಾಡ್, ನಾನ್ ಉಂಡಿತ್ ಕುಡಿಚಿತಾನ ಪಿಂಞ ನೀನ್ ಉಂಡಿತ್ ಕುಡಿಕಲೂಂದ್ ಎಣ್ಣುವಿರಲ್ಲ.

⁹ಅನ್ನನೆ ಮಾಡ್‍ನ ಆಳ್‍ಕ್: ನೀಡಗುಂಡ್ ನಾಕ್ ಉಪಕಾರ ಆಚೀಂದ್ ಎಣ್ಣುಲೆ. ಎನ್ನಂಗೆಣ್ಣ್‌ಚೇಂಗಿ ಆ ಕೆಲಸ ಎಲ್ಲ, ಆಳುವ ಮಾಡ್‍ವಕ್ಕುಳ್ಳ ಕೆಲಸ ತಾನೆ?

¹⁰ಅನ್ನನೆ, ನಿಂಗಳು ನಿಂಗಕ್ ಆಜ್ಞೆ ಮಾಡ್‍ನದ್‍ನೆಲ್ಲ ಬಗ್ಗ್‌ಚಿಟ್ಟ್ ಮಾಡ್‍ಚೇಂಗಿ: ನಂಗ ಒರ್ ಯೋಗ್ಯತೆ ಇಲ್ಲತ ಆಳುವ ಮಾತ್ರ, ಮಾಡ್‍ವಕ್ಕುಳ್ಳ ಕೆಲಸತ್‍ನ ಮಾತ್ರ ಮಾಡಿತುಂಡ್‍ೕಂದ್ ನಂಗ ಎಣ್ಣಂಡು.

¹¹ಯೇಸು ಯೆರೂಸಲೇಮ್‌ಕ್ ಪೋಯಂಡಿಪ್ಪಕ, ಸಮಾರಿಯ ಪ್ರಾಂತ್ಯ ಪಿಂಞ ಗಲಿಲಾಯ ಪ್ರಾಂತ್ಯತ್‍ರ ಗಡಿಕ್ ಬಾತ್.

¹²ಅಂವೊ ಒರ್ ಊರ್‌ಕ್ ಬಪ್ಪಕಾಪಕ ಪತ್ತ್ ಜನ ಕುಷ್ಟರೋಗಿಯ ದೂರತ್‍ಲ್ ನಿಂದಿತ್,

¹³ಯೇಸು ಸ್ವಾಮೀ, ನಂಗಕ್ ಕನಿಕರ ಕಾಟ್, ನಂಗಳ ಚಾಯಿಮಾಡ್‍ೕಂದ್ ಎಣ್ಣ್‌ಚಿ.

¹⁴ಯೇಸು ಅಯಿಂಗಳ ನೋಟಿತ್: ನಿಂಗ ಪೋಯಿತ್, ಯಾಜಕಂಡ ಪಕ್ಕ ನಿಂಗಳ ಕಾಟೀಂದ್ ಯೇಸು ಎಣ್ಣ್‌ಚಿ. ಅಯಿಂಗ ಪೋಯಂಡ್ ಇಪ್ಪಕಲೆ ಅಯಿಂಗ ಶುದ್ದ ಆಯಿತ್ ಚಾಯಾಚಿ.

¹⁵ಅಯಿಂಗಡ ಕೂಟ್‌ಲ್ ಒಬ್ಬ ಅಂವೊ ವಾಸಿ ಆನಾನ ಕಂಡಿತ್ ಯೇಸುರ ಪಕ್ಕ ಓಡಿ ಬಂದಿತ್, ಕೂತ್ ಕೊಡ್‌ತಂಡ್ ಯೇಸುನ ತುದಿಚತ್.

¹⁶ಪಿಂಞ ಯೇಸುರ ಕಾಲ್‌ಕ್ ಅಡ್ಡ ಬುದ್ದಿತ್ ವಾಸಿ ಆನಗುಂಡ್ ವಂದನೆ ಮಾಡ್‍ಚಿ. ಅಂವೊ ಸಮಾರಿಯ ನಾಡ್‍ಕ್ ಕೂಡ್‍ನಂವೊನಾಯಿತ್ಂಜತ್.

¹⁷ಅದ್ಂಗ್ ಯೇಸು, ಪತ್ತ್ ಜನ ವಾಸಿಯಾಯಿತ್ ಶುದ್ದ ಆಚ್ಚಲ್ಲ, ಬಾಕಿ ಒಯಿಂಬದ್ ಜನ ಎಲ್ಲಿ?

¹⁸ಪರದೇಶಿಯಾನ ಇಂವೊ ಒಬ್ಬನೇ ದೇವನ ತುದಿಪಕ್ ಬಂತಲ್ಲಾಂದ್ ಎಣ್ಣಿತ್,

¹⁹ಪಿಂಞ ಯೇಸು, ನೀನ್ ಎದ್ದಿತ್ ಪೋ, ನೀಡ ನಂಬಿಕೆ ನಿನ್ನ ಶುದ್ದಮಾಡ್‌ಚೀಂದ್ ಅಂವೊಂಗ್ ಎಣ್ಣ್‌ಚಿ.

²⁰ಒಮ್ಮ, ಚೆನ್ನ ಫರಿಸಾಯಂಗ ದೇವ ಆಳುವ ಕಾಲ ಎಕ್ಕ ಬಪ್ಪಾಂದ್ ಕ್‍ೕಟತ್? ಅಯಿಂಗಕ್ ಅಂವೊ: ದೇವಡ ರಾಜ್ಯ ಪ್ರತ್ಯಕ್ಷ ಆಯಿತ್ ಬಪ್ಪುಲೆ.

²¹ದಾರೂ, ನೋಟಿ! ದೇವಡ ರಾಜ್ಯ ಅಲ್ಲಿ ಉಂಡ್ ಇಲ್ಲಿ ಉಂಡ್‍ೕಂದ್ ಎಣ್ಣುಲೆ, ಎನ್ನಂಗೆಣ್ಣ್‌ಚೇಂಗಿ ದೇವಡ ರಾಜ್ಯ ನಿಂಗಡಲ್ಲಿಯೇ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.

²²ಯೇಸು ಅಂವೊಂಡ ಶಿಷ್ಯಂಗಕ್: ಮನುಷ್ಯಕುಮಾರಂಡ ದಿನತ್‍ನ ನೋಟ್‍ವಕ್ ನಿಂಗ ದುಂಬ ಪಾರಕಾತಂಡಿಪ್ಪ ಸಮಯ ಬಪ್ಪ, ಆಚೇಂಗಿ ನಿಂಗಕ್ ನೋಟ್‍ವಕ್ ಕಯ್ಯುಲೆ.

²³ಜನ, ನಿಂಗಕ್ ಮನುಷ್ಯಕುಮಾರ ಅಲ್ಲಿ ಉಂಡ್ ಇಲ್ಲಿ ಉಂಡ್‍ೕಂದ್ ಎಣ್ಣುವಾನ ಕ್‍ೕಟಿತ್, ಅದ್ಂಡ ಬಯ್ಯಕ್ ನೋಟ್‍ವಕ್ ಪೋಕತಿ.

²⁴ಮನುಷ್ಯಕುಮಾರ ಬಪ್ಪಕ ಬಾನತ್‍ಲ್, ಒರ್ ಬರೀಂಜ ಇಂಞೊರ್ ಬರಿಕ್ ಮಿನ್ನುವನೆಕೆ ಪ್ರಕಾಶ ಇಪ್ಪ.

²⁵ಆಚೇಂಗಿ ಅದ್ಂಗಿಂಜ ಮಿಂಞ ಈ ಮನುಷ್ಯಕುಮಾರ ದುಂಬ ಕಷ್ಟಪಟ್ಟಿತ್ ಇಕ್ಕತ್‍ರ ಕಾಲತ್‍ರ ಜನಳಗುಂಡ್ ತ್‍ಕ್ಕಾರ ಆಂಡು.

²⁶ನೋಹಂಡ ದಿವಸತ್‍ಲ್ ಎನ್ನನೆ ಇಂಜತೋ ಅನ್ನನೆ ಮನುಷ್ಯಕುಮಾರ ಬಪ್ಪ ಸಮಯತ್‍ಲು ಇಪ್ಪ.

²⁷ನೋಹಂಡ ಕುಟುಂಬಕಾರ ನೋಹಂಡ ಬಲ್ಯ ಕಪ್ಪಲ್‍ರ ಒಳ್‍ಕ್ ಪೋನ ದಿವಸಕತ್ತನೆ, ಜನ ಉಂಡಂಡ್ ಕುಡಿಚಂಡ್, ಮಂಗಲ ಕಯಿಚಂಡ್, ಮಂಗಲ ಮಾಡಿಕೊಡ್‌ತಂಡ್ ಇಂಜತ್. ಅಕ್ಕ ಜಲಪ್ರಳಯ ಬಂದಿತ್ ಎಲ್ಲಾ ಜನಳ ನಾಶ ಮಾಡ್‍ಚಿ.

²⁸ಅದೇ ತರ, ಲೋಟ ಎಣ್ಣ್‌ವಂವೊ ಬದ್‍ಕ್‍ನ ಕಾಲತ್‍ಲ್ ಸಹ ಜನ ತಿಂದಂಡ್, ಕುಡಿಚಂಡ್, ವ್ಯಾಪಾರ ಮಾಡಿಯಂಡ್, ನಟ್ಟಿಯಂಡ್, ಕಟ್ಟಡ ಕೆಟ್ಟಿಯಂಡಿಂಜತ್.

²⁹ಆಚೇಂಗಿ ಲೋಟ ಸೊದೋಮ್ ಊರ್‌ನ ಬುಟ್ಟಿತ್ ಪೋನ ಅದೇ ದಿವಸತ್‍ಲ್ ಬಾನತ್ಂಜ ತಿತ್ತ್ ಪಿಂಞ ಗಂಧಕ, ಸೊದೋಮ್ ಊರ್‌ರ ಮೇಲೆ ಬುದ್ದಿತ್ ಎಲ್ಲಾರ್‌ನ ಕೊಂದ್‍ರ್‌ತ್.

³⁰ಮನುಷ್ಯಕುಮಾರ ಪ್ರತ್ಯಕ್ಷ ಆಪ ದಿವಸತ್‍ಲ್ ಸಹ ಜನ ಇದೇ ತರತ್‍ಲ್ ಬದ್‍ಕಿಯಂಡಿಪ್ಪ.

³¹ಮನುಷ್ಯಕುಮಾರ ಬಪ್ಪ ಆ ದಿವಸತ್‍ಲ್ ಮನೆರ ಕೊಡಿಲ್ ಇಪ್ಪ ಒಬ್ಬ ಮನೆರ ಅಡಿಕ್ ಪೋಯಿತ್ ಅಂವೊಂಡ ಸಾಮಾನ್‌ನ ಎಡ್‍ಪಕ್ ಪೋಪಕ್ಕಾಗ. ಅನ್ನನೆ ಬೇಲ್‌ಲ್ ಉಳ್ಳಂವೊ ಬಯ್ಯಕ್ ಬಪ್ಪಕ್ಕಾಗ.

³²ಲೋಟಂಡ ಪೊಣ್ಣ್‌ಕ್ ಎಂತಾಚೀಂದ್ ಗೇನ ಮಾಡಿಯೊಳಿ!

³³ತಾಂಡ ಜೀವತ್‍ನ ಕಾಪಾಡ್‌ವಕ್ ನೋಟ್‍ವಂವೊ ಅದ್‍ನ ಕಳೆಂದ್‍ರ್‍ವ, ದಾರ್ ತಾಂಡ ಜೀವತ್‍ನ ಇಲ್ಲಿ ಕಳೆಂದ್‍ರ್‍ವ, ಅಂವೊ ಅದ್‍ನ ಕಾಪಾಡ್‌ವ.

³⁴ಮನುಷ್ಯಕುಮಾರ ಬಪ್ಪ ಸಮಯತ್‍ಲ್ ಒರೇ ಮೆತ್ತೆಲ್ ದಂಡ್ ಜನ ವರಿಯಂಡಿಪ್ಪ, ಒಬ್ಬನ ಕೊಂಡ್ ಪೋಯಿರುವ ಇಂಞೊಬ್ಬನ ಬುಟ್ಟ್‌ರ್‌ವ.

³⁵ದಂಡ್ ಪೊಣ್ಣಾಳುವ ಜೋಳತ್‌ನ ಕಲ್ಲ್‌ಲ್ ಕಡ್ಂದಂಡ್ ಇಪ್ಪ. ಒಬ್ಬಳ ಎಡ್‌ತ್‌ರ್‌ವ ಇಂಞೊಬ್ಬಳ ಬುಟ್ಟ್‌ರ್‌ವ.

³⁶ಇನ್ನನೆಲ್ಲ ಎಣ್ಣುವಕಾಪಕ, ಶಿಷ್ಯಂಗ: ಇದೆಲ್ಲ ಎಲ್ಲಿ ಆಪಾಂದ್ ಯೇಸುನ ಕ್‍ೕಟತ್. ಅದ್ಂಗ್ ಯೇಸು: ಚಾವ್ ಎಲ್ಲಿ ಉಂಡೋ ಅಲ್ಲಿ ಅಡ್‍ಪದ್ದ್ ಪಾರಿತ್ ಕೂಡ್‍ವನೆಕೆ ಇದೆಲ್ಲಾ ಕಡೆ ಕಾಲಕ್ ಗುರ್‌ತಾಯಿತ್‌ಪ್ಪಾಂದ್ ಎಣ್ಣ್‌ಚಿ.[37]