Read Kodava ಲೂಕ 18 Bible Online

ಲೂಕ 18 - Kodava bible

ಲೂಕ 18

¹ಯೇಸು ಅಂವೊಂಡ ಶಿಷ್ಯಂಗಕ್, ಅಯಿಂಗ ತಳ್ಂದ್ ಪೋಕತೆ ಎಕ್ಕಾಲು ಪ್ರಾರ್ಥನೆ ಮಾಡಿಯಂಡ್ ಇಕ್ಕಂಡೂಂದ್ ಒರ್ ಕಥೇರ ರೂಪ ಎಣ್ಣಿ ಕೊಡ್‍ತತ್.

²ಒರ್ ಊರ್‌ಲ್ ಒರ್ ನ್ಯಾಯಾದಿಪತಿ ಇಂಜತ್. ಅಂವೊ ದೇವಕು ಬೊತ್ತ್‌ವಕಿಂಜಿಲೆ, ಮನುಷ್ಯಂಗು ಬೆಲೆ ಕೊಡ್‌ಪಕಿಂಜಿಲೆ.

³ಅಲ್ಲಿ ಒರ್ ವಿದವೆ ಇಂಜತ್. ಅವ ಅಂವೊಂಡ ಪಕ್ಕ ಅಕ್ಕಕ್ಕ ಪೋಯಿತ್: ನಾಕು ನಾಡ ವಿರೋದಿಕೂ ತೊಂದರೆ ಉಳ್ಳ ವಿಷಯತ್‍ಲ್ ನಾಕ್ ನ್ಯಾಯ ಕ್‍ಟ್ಟ್‌ವನೆಕೆ ಮಾಡ್‍ೕಂದ್, ಆ ನ್ಯಾಯಾದಿಪತಿನ ಬೋಡ್‍ಚಿ.

⁴ದುಂಬ ದಿವಸ ಅವಡ ತಕ್ಕ್ ಕ್‍ೕಪಕ್ ಅಂವೊಂಗ್ ಮನಸ್ಸ್ ಇಲ್ಲತ್ಂಜತ್. ಆಚೇಂಗಿಯು ಅವ ಎಕ್ಕಾಲು ಅಂವೊಂಡ ಪಕ್ಕ ಕ್‍ೕಟಂಡಿಂಜಗುಂಡ್,

⁵ಕಡೇಕ್ ಅಂವೊ: ನಾನ್ ದೇವಕ್ ಬೊತ್ತ್‌ವಂವೊನಲ್ಲ ಮನುಷ್ಯನ ಲೆಕ್ಕ ಮಾಡ್‌ವಂವೂನೂ ಅಲ್ಲ, ಆಚೇಂಗಿಯು ಈ ವಿದವೆ ನನ್ನ ದುಂಬ ತೊಂದರೆ ಮಾಡಿಯಂಡುಳ್ಳಗುಂಡ್, ಪುನಃ ಅವ ನಾಡ ಪಕ್ಕ ಬಂತ್ ನನ್ನ ತೊಂದರೆ ಮಾಡತನೆಕೆ ನಾನ್ ಅವಡ ವಿಷಯತ್‍ನ ನೋಟಿತ್ ಅವಕ್ ನ್ಯಾಯ ತಪ್ಪೀಂದ್ ಅಂವೊಂಡ ಮನಸ್ಸ್‌ಲ್ ಗೇನ ಮಾಡ್‍ಚಿ.

⁶ಒಡೆಯ ಶಿಷ್ಯಂಗಳ ನೋಟಿತ್: ನ್ಯಾಯ ಇಲ್ಲತ ಆ ನ್ಯಾಯಾದಿಪತಿ ಎಣ್ಣ್‌ನದ್‍ನ ಗೇನ ಮಾಡಿಯೊಳಿ.

⁷ಅನ್ನನೆ, ದೇವ ಗೊತ್ತ್ ಮಾಡ್‍ನಯಿಂಗಡಲ್ಲಿ ಪೋಲ್ ಬಯಿಟ್ ಮೊರೆ ಇಟ್ಟಂಡುಳ್ಳಯಿಂಗಡ ನ್ಯಾಯತ್‍ನ ಕ್‍ೕಟಿತ್ ಅದ್‍ನ ಎಡ್‍ಕತೆ ಇಪ್ಪ?

⁸ಅಯಿಂಗಕ್, ಅಯಿಂಗ ಕ್‍ೕಟ ನ್ಯಾಯತ್‍ನ ಬೆರಿಯ ಕೊಡ್‍ಪಾಂದ್ ನಿಂಗಕ್ ಎಣ್ಣ್‌ವಿ. ಇನ್ನನಾಚೇಂಗಿಯು ಮನುಷ್ಯಕುಮಾರ ಬೂಮಿಕ್ ಬಪ್ಪಕ, ನಂಬಿಕೇನ ಕಾಂಬಕ್ ಕಯ್ಯುವಾಂದ್ ಎಣ್ಣ್‌ಚಿ.

⁹ಇದ್‍ಲ್ಲತೆ, ತಾಂಗಳೇ ನೀತಿವಂತಂಗಾಂದ್ ಗೇನ ಮಾಡಿಯಂಡ್, ಬೋರೆಯಿಂಗಳ ಕಮ್ಮಿ ತರತ್‍ಲ್ ನೋಟ್‌ವಯಿಂಗಕ್ ಯೇಸು ಒರ್ ಕಥೇರ ರೂಪತ್‌ನ ಎಣ್ಣಿ ಕೊಡ್‍ತತ್.

¹⁰ದೇವಡ ಪಕ್ಕ ಪ್ರಾರ್ಥನೆ ಮಾಡ್‌ವಕ್ ದಂಡ್ ಮನುಷ್ಯಂಗ ದೇವಾಲಯಕ್ ಪೋಚಿ. ಒಬ್ಬ ಫರಿಸಾಯ ಇಂಞೊಬ್ಬ ಕಂದಾಯ ಎಡ್‌ಪಂವೊ.

¹¹ಫರಿಸಾಯ ಎದ್ದಿತ್: ದೇವ! ನಾನ್ ದುರಾಸೆ ಉಳ್ಳಂವೊನೆಕೆ, ಮೋಸ ಮಾಡ್‌ವಂವೊನೆಕೆ ಪಿಂಞ ವ್ಯಬಿಚಾರ ಮಾಡ್‌ವಂವೊನೆಕೆ ಇಲ್ಲತಗುಂಡ್ ನಾನ್ ನೀಕ್ ವಂದನೆ ಎಣ್ಣ್‌ವಿ. ಅದಲ್ಲತೆ ಅಲ್ಲಿ ನಿಂದಿತುಳ್ಳ ಕಂದಾಯ ಎಡ್‌ಪಂವೊನೆಕೆ ನಾನ್ ಇಲ್ಲತಗುಂಡ್ ನೀಕ್ ವಂದನೆ ಮಾಡ್‌ವಿ.

¹²ವಾರಕ್ ದಂಡ್ ದಿನ ಪಟ್ಟಣಿ ನಿಪ್ಪಿ. ನಾಡ ಸಂಪಾದನೆರ ಪತ್ತ್ ಪಾಲ್‍ನ ದೇವಕ್ ಕೊಡ್‍ತಂಡುಂಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ.

¹³ಕಂದಾಯ ಎಡ್‌ಪಂವೊ ದೂರತ್‍ಲ್ ನಿಂದಿತ್, ಬಾನತ್‍ನ ಸಹ ನೋಟತೆ, ಎದೆನ ಬಡ್‍ಚಂಡ್: ದೇವ! ನಾನ್ ಪಾಪ ಮಾಡ್‍ನಂವೊ, ನಾಡ ಮೇಲೆ ಕರುಣೆ ಕಾಟ್‍ೕಂದ್ ಪ್ರಾರ್ಥನೆ ಮಾಡ್‍ಚಿ.

¹⁴ಫರಿಸಾಯ ಅಲ್ಲ, ಕಂದಾಯ ಎಡ್‍ಪಂವೊನೇ ದೇವಡಯಿಂಜ ಪಾಪ ಕ್ಷೆಮೆ ಕ್‍ಟ್ಟಿತ್ ನೀತಿವಂತಂವೊನಾಯಿತ್ ಅಂವೊಂಡ ಮನೆಕ್ ಪೋಪಾಂದ್ ನಾನ್ ನಿಂಗಕ್ ಎಣ್ಣ್‌ವಿ. ಎನ್ನಂಗೆಣ್ಣ್‌ಚೇಂಗಿ ನಿಂಗ ನಿಂಗಳ ಬೋರೆಯಿಂಗಕಿಂಜ ಬಲ್ಯದಾಯಿತ್ ಇರಂಡೂಂದ್ ನೋಟ್‍ಚೇಂಗಿ ನಿಂಗ ಅಡಿಕ್ ಬಪ್ಪಿರ, ಆಚೇಂಗಿ ನಿಂಗ ಬಗ್ಗಿತ್ ನಡ್ಂದತೇಂಗಿ ನಿಂಗಳ ದೇವ ಮಿಂಞಕ್ ಕೊಂಡ್ ಬಪ್ಪಾಂದ್ ಎಣ್ಣ್‌ಚಿ.

¹⁵ಚೆನ್ನ ಜನ ಅಯಿಂಗಡ ಚೆರಿಯ ಮಕ್ಕಳ ಯೇಸು ಮುಟ್ಟಂಡೂಂದ್ ಕಾಕಿಯಂಡ್ ಬಾತ್. ಅಕ್ಕ ಅಂವೊಂಡ ಶಿಷ್ಯಂಗ ಅದ್‍ನ ನೋಟಿತ್ ಯೇಸುನ ತೊಂದರೆ ಮಾಡಂಡಾಂದ್ ಅಯಿಂಗಕ್ ಜೋರ್ ಮಾಡ್‍ಚಿ.

¹⁶ಆಚೇಂಗಿ ಯೇಸು ಚೆರಿಯ ಮಕ್ಕಳ ಕಾಕುವಂಜಿ, ಶಿಷ್ಯಂಗಡ ಪಕ್ಕ: ಚೆರಿಯ ಮಕ್ಕ ನಾಡ ಪಕ್ಕ ಬರಡ್ ಅಯಿಂಗಳ ತಡೆ ಮಾಡ್‌ವಕ್ಕಾಗ. ದೇವಡ ರಾಜ್ಯ ಈ ಚೆರಿಯ ಮಕ್ಕಡನೆಕೆ ಉಳ್ಳಯಿಂಗಡದೇ.

¹⁷ದಾರಾಚೇಂಗಿಯು ಚೆರಿಯ ಮಕ್ಕಡನೆಕೆ ದೇವಡ ರಾಜ್ಯತ್‍ನ ಸ್ವೀಕಾರ ಮಾಡತೆ ಪೋಚೇಂಗಿ, ಅದ್ಂಡ ಒಳ್‍ಕ್ ಪೋಪ್‌ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

¹⁸ಒರ್ ಯೆಹೂದ್ಯ ಮುಕ್ಯಸ್ತ ಯೇಸುರ ಪಕ್ಕ: ನಲ್ಲ ಉಪಾದ್ಯನೇ, ನಿತ್ಯ ಜೀವ ಕ್‍ಟ್ಟ್‌ವಕ್ ನಾನ್ ಎಂತ ಮಾಡಂಡೂಂದ್ ಕ್‍ೕಟತ್.

¹⁹ಅದ್ಂಗ್ ಯೇಸು: ನೀ ನನ್ನ ನಲ್ಲಂವೋಂದ್ ಎನ್ನಂಗ್ ಕಾಕ್‌ವಿಯ? ದೇವನ ಬುಟ್ಟಿತ್ ಬೋರೆ ದಾರೂ ನಲ್ಲಂವೊ ಇಲ್ಲೆ.

²⁰ವ್ಯಬಿಚಾರ ಮಾಡ್‌ವಕ್ಕಾಗ, ಕೊಲೆ ಮಾಡ್‌ವಕ್ಕಾಗ, ಕಪ್ಪಕ್ಕಾಗ, ದಾರ್‌ನು ಮುಂಡತೆ ನಿಂದನೆ ಮಾಡ್‌ವಕ್ಕಾಗ, ಅಪ್ಪವ್ವಂಗಕ್ ಮರ್ಯಾದೆ ಕೊಡ್‍ಕಂಡೂಂದ್ ಉಳ್ಳ ನ್ಯಾಯಪ್ರಮಾಣ ನೀಕ್ ಗೊತ್ತುಂಡಲ್ಲಾಂದ್ ಎಣ್ಣ್‌ಚಿ.[38]

²¹ಅದ್ಂಗ್ ಅಂವೊ: ನಾನ್ ಚೆರಿಯ ವಯಸ್ಸಿಂಜಲೆ ಇದ್‍ನೆಲ್ಲ ಮಾಡಿಯಂಡ್ ಬಂದಿಯೇಂದ್ ಎಣ್ಣ್‌ಚಿ.

²²ಯೇಸು ಇದ್‍ನೆಲ್ಲ ಕ್‍ೕಪದು: ಇಂಞು ಒಂದ್ ನೀನ್ ಮಾಡ್‌ವಕುಂಡ್. ನೀಡ ಪಕ್ಕ ಉಳ್ಳದ್‍ನೆಲ್ಲ ಮಾರ್‌ವಂಜಿ ಆ ಪಣತ್‍ನ ಗರೀಬಂಗಕ್ ಕೊಡ್, ಅಕ್ಕ ಪರಲೋಕತ್‍ಲ್ ನೀಕ್ ಐಶ್ವರ್ಯ ದುಂಬಿತ್ ಕ್‍ಟ್ಟುವ, ಪಿಂಞ ನಾಡ ಬಯ್ಯ ಬಾಂದ್ ಯೇಸು ಎಣ್ಣ್‌ಚಿ.

²³ಯೇಸು ಎಣ್ಣ್‌ನದ್‍ನ ಕ್‍ೕಟಿತ್ ಅಂವೊಂಗ್ ದುಂಬ ಬೇಜಾರ್ ಆಚಿ, ಎನ್ನಂಗೆಣ್ಣ್‌ಚೇಂಗಿ ಅಂವೊ ಬಲ್ಯ ಐಶ್ವರ್ಯ ಉಳ್ಳಂವೊನಾಯಿತ್ಂಜತ್.

²⁴ಅಂವೊ ದುಂಬ ದುಃಖ ಆನದ್‍ನ ಯೇಸು ನೋಟಿತ್, ಪಣಕಾರಂಗ ದೇವಡ ರಾಜ್ಯತ್‍ಲ್ ಎತ್ತ್‌ವಕ್ ಎಚ್ಚಕ್ ಕಷ್ಟ ಉಂಡ್.

²⁵ಪಣಕಾರಂಗ ದೇವಡ ರಾಜ್ಯಕ್ ಪೋಪಗಿಂಜ, ಚೂದ್‌ರ ಕಣ್ಣ್‌ಲ್ ಒರ್ ಒಂಟೆ ನುಗ್ಗ್‌ವದ್ ಸುಲಬಾಂದ್ ಎಣ್ಣ್‌ಚಿ.

²⁶ಜನ ಇದ್‍ನ ಕ್‍ೕಟದು: ಅನ್ನನೆ ಆಚೇಂಗಿ ದಾರ್‌ಕ್ ರಕ್ಷಣೆ ಕ್‌ಟ್ಟೂಂದ್ ಕ್‍ೕಟತ್.

²⁷ಅದ್ಂಗ್ ಯೇಸು: ಇದ್ ಮನುಷ್ಯಂಗಕ್ ಕಯ್ಯುಲೆ ಆಚೇಂಗಿ ದೇವಕ್ ಇದ್ ಕಯ್ಯೂಂದ್ ಎಣ್ಣ್‌ಚಿ.

²⁸ಅಕ್ಕ ಪೇತ್ರ ಎಣ್ಣ್‌ಚಿ: ಒಡೆಯ, ನಂಗ, ನಂಗಡದ್ ಎಲ್ಲಾನ ಬುಟ್ಟಿತ್ ನೀಡ ಬಯ್ಯ ಬಂದಂಡುಂಡ್‍ೕಂದ್ ಎಣ್ಣ್‌ಚಿ.

²⁹ಅಕ್ಕ ಯೇಸು ಅಂವೊಂಗ್: ದಾರ್ ಒಬ್ಬ ಅಯಿಂಗಡ ಮನೆಮಠ, ಪೊಣ್ಣ್, ಮಕ್ಕ, ಅಪ್ಪವ್ವ, ಅಣ್ಣತಮ್ಮಣಂಗಳ ದೇವಡ ರಾಜ್ಯಕಾಯಿತ್ ಬುಟ್ಟ್‌ರ್‌ವ ಈ ಲೋಕತ್‍ಲ್ ಅಯಿಂಗ ಕಳೆಂದದ್‍ಕಿಂಜ ದುಂಬ ಕ್‍ಟ್ಟುವ, ಅದಲ್ಲತೆ ಬಪ್ಪಕುಳ್ಳ ರಾಜ್ಯತ್‍ಲ್ ನಿತ್ಯ ಜೀವತ್‍ನ ಸಹ ಕ್‌ಟ್ಟುವಾಂದ್ ನಾನ್ ನಿಂಗಕ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

³⁰

³¹ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಒರ್ ಬರಿಕ್ ಕಾಕುವಂಜಿ: ಕ್‍ೕಳಿ, ನಂಗ ಯೆರೂಸಲೇಮ್‌ಕ್ ಪೋಯಂಡುಂಡ್, ಅಲ್ಲಿ ಪೋಪಕ ಮನುಷ್ಯಕುಮಾರಂಡ ವಿಷಯ ಪ್ರವಾದಿಯಂಗ ಒಳ್‌ದ್‌ನನೆಕೆ ಪೂರ್ತಿಯಾಪ.

³²ಎನ್ನನೆ ಎಣ್ಣ್‌ಚೇಂಗಿ, ಈ ಮನುಷ್ಯಕುಮಾರನ ಪರದೇಶಿಯಂಗಳಾನ ರೋಮ್ ರಾಜ್ಯತ್‍ರ ಜನಡ ಕೈಕ್ ಕೊಡ್‌ಪಂಜಿ, ಅಂವೊನ ಪರಿಹಾಸ ಮಾಡ್‌ವ, ತಿರಸ್ಕಾರ ಮಾಡ್‌ವ ಪಿಂಞ ಅಂವೊಂಡ ಮೇಲೆ ತುಪ್ಪ್‌ವ

³³ಅಂವೊನ ಕೊರಡಿಂಜ ಪೊಯ್ಯುವ ಪಿಂಞ ಕೊಲ್ಲುವ, ಆಚೇಂಗಿ ಮೂಂದ್ ದಿವಸ ಆನ ಪಿಂಞ ಅಂವೊ ಚಾವ್‍ಯಿಂಜ ಜೀವವಾಯಿತ್ ಏವಾಂದ್ ಎಣ್ಣಿ ಕೊಡ್‍ತತ್.

³⁴ಆಚೇಂಗಿ ಶಿಷ್ಯಂಗಕ್ ಯೇಸು ಎಂತ ಎಣ್ಣಿಯಂಡುಂಡ್‍ೕಂದ್ ಗೊತ್ತಾಯಿತ್‌ಲ್ಲೆ. ಅಯಿಂಗಕ್ ಎನ್ನಂಗ್ ಅರ್ಥ ಆಯಿತ್‌ಲ್ಲೇಂದ್ ಎಣ್ಣ್‌ಚೇಂಗಿ, ಈ ತಕ್ಕ್‌ರ ಅರ್ಥ ಅಯಿಂಗಕ್ ಮುಚ್ಚಿತ್ಂಜತ್.

³⁵ಪಿಂಞ ಯೇಸು ಯೆರಿಕೋ ಎಣ್ಣುವಲ್ಲಿಕ್ ಬಪ್ಪಕ, ಅಲ್ಲಿ ಒರ್ ಕುರ್‌ಡ ಬಟ್ಟೇರ ಬರಿಲ್ ಅಳ್‌ತಂಡ್ ಬೋಡಿಯಂಡ್ ಇಂಜತ್.

³⁶ಜನಡ ಗುಂಪ್ ಅಂವೊಂಡ ಪಕ್ಕ ನಡ್‍ಪ ಸದ್ದ್‌ನ ಕ್‍ೕಟಿತ್, ಇಲ್ಲಿ ಎಂತ ಆಯಂಡುಂಡ್‍ೕಂದ್ ಜನಳ ಕ್‍ೕಟತ್.

³⁷ನಜರೇತ್‍ರ ಯೇಸು ಪೋಯಂಡ್ ಉಂಡ್‍ೕಂದ್ ಜನ ಎಣ್ಣ್‌ಚಿ.

³⁸ಅಕ್ಕ ಅಂವೊ: ಯೇಸುವೇ, ದಾವೀದಂಡ ಮೋಂವೊನೇ, ನಾಡ ಮೇಲೆ ಕನಿಕರ ಕಾಟ್ ಎಣ್ಣಿಯಂಡ್ ಕೂತ್ ಕೊಡ್‍ತತ್.

³⁹ಅಲ್ಲಿ, ಅಂವೊಂಡ ಮಿಂಞ ನಡ್ಂದಂಡ್ ಪೋಯಂಡ್ ಇಂಜ ಜನ ಅಂವೊನ ಮುಂಡತೆ ಇರ್‍ೕಂದ್ ಜೋರ್ ಮಾಡಿತ್ ಬಜ್ಜತ್. ಅಂವೊ ಇಂಞು ಜೋರಾಯಿತ್: ದಾವೀದಂಡ ಮೋಂವೊನೇ, ನಾಡ ಮೇಲೆ ಕನಿಕರ ಕಾಟ್‍ೕಂದ್ ಕೂತ್ ಕೊಡ್‍ಪಕ್ ಸರುಮಾಡ್‌ಚಿ.

⁴⁰ಯೇಸು ನಿಪ್ಪಂಜಿ, ಆ ಕುರ್‌ಡನ ನಾಡ ಪಕ್ಕ ಕಾಕಿಯಂಡ್ ಬಾಂದ್ ಆಜ್ಞೆ ಮಾಡ್‍ಚಿ. ಅಂವೊನ ಯೇಸುರ ಪಕ್ಕ ಕಾಕಿಯಂಡ್ ಬಾತ್.

⁴¹ಅಕ್ಕ ಯೇಸು: ನಾನ್ ನೀಕ್ ಎಂತ ಮಾಡಂಡೂಂದ್ ಕ್‍ೕಟತ್. ಅದ್ಂಗ್ ಆ ಕುರ್‌ಡ: ಒಡೆಯನೇ, ನಾಕ್ ಕಣ್ಣ್ ಕಾಂಬನೆಕೆ ಮಾಡ್‍ೕಂದ್ ಎಣ್ಣ್‌ಚಿ.

⁴²ಯೇಸು ಅಂವೊನ ನೋಟಿತ್: ಅಕ್ಕು, ನೀ ನೋಟ್‍ವಿಯ, ನೀಡ ನಂಬಿಕೆ ನಿನ್ನ ಚಾಯಿ ಮಾಡ್‍ಚೀಂದ್ ಎಣ್ಣ್‌ಚಿ.

⁴³ಅಕ್ಕಣೆ ಅಂವೊಂಗ್ ಕಣ್ಣ್ ಕಾಂಬನೆಕೆ ಆಚಿ. ಅಂವೊ ದೇವನ ತುದಿಚಂಡ್ ಯೇಸುರ ಬಯ್ಯ ಪೋಚಿ. ಅಲ್ಲಿ ಉಳ್ಳಯಿಂಗೆಲ್ಲ ಇದ್‍ನ ಕಂಡಿತ್ ದೇವನ ತುದಿಚತ್.