Read Kodava ಲೂಕ 19 Bible Online

ಲೂಕ 19 - Kodava bible

ಲೂಕ 19

¹ಯೇಸು ಯೆರಿಕೋ ಎಣ್ಣುವ ಪಟ್ಟಣತ್‍ರ ಬಟ್ಟೇಲ್ ಪೋಯಂಡಿಂಜತ್.

²ಅಲ್ಲಿ, ಜಕ್ಕಾಯ ಎಣ್ಣುವ ಒಬ್ಬ ಇಂಜತ್. ಅಂವೊ ಕಂದಾಯ ಎಡ್‌ಪಯಿಂಗಡಲ್ಲಿ ಮುಕ್ಯಸ್ತನು ಪಿಂಞ ಐಶ್ವರ್ಯವಂತಂವೊನು ಆಯಿತ್ಂಜತ್.

³ಜಕ್ಕಾಯ ಯೇಸು ದಾರ್‍ೕಂದ್ ನೋಟ್‍ವಕ್ ಆತುರತ್‌ಲ್ ನೋಟಿಯಂಡ್ ಇಂಜತ್. ಆಚೇಂಗಿ ಅಂವೊ ಬಾರಿ ಕುಳ್ಳನಾಯಿತ್ ಇಂಜತ್. ಜನಡ ಗುಂಪ್ ಅಂವೊಂಡ ಮಿಂಞತ್ ಇಂಜಗುಂಡ್ ಯೇಸುನ ಕಾಂಬಕ್ ಕಯ್ಯತೆ, ಯೇಸು ಬಪ್ಪ ಬಟ್ಟೇಕ್ ಮಿಂಞ ಓಡಿ ಪೋಯಿತ್, ಯೇಸುನ ನೋಟ್‍ವಕ್ ಒರ್ ಕಾಡ್ ಅತ್ತಿ ಮರತ್‍ರ ಕೊಡಿಕ್ ಪತ್ತ್‌ಚಿ.

⁴

⁵ಯೇಸು ಆ ಜಾಗಕ್ ಬಪ್ಪಕ, ಕೊಡಿಕ್ ನೋಟುವಂಜಿ, ಜಕ್ಕಾಯ, ಬೆರಿಯ ಅಡಿಕ್ ಬಾ, ನಾನ್ ಇಂದ್ ನೀಡ ಮನೆಕ್ ಬಂದ್ ಒಳಿಯಂಡೂಂದ್ ಎಣ್ಣ್‌ಚಿ.

⁶ಜಕ್ಕಾಯ ಅಡಿಕ್ ಬೆರಿಯ ಬಂದಿತ್ ಯೇಸುನ ಕುಶೀಲ್ ಅಂವೊಂಡ ಮನೆಕ್ ತಕ್ಕಾರ ಮಾಡ್‍ಚಿ.

⁷ಅಲ್ಲಿಯತ್‍ರ ಜನ ಇದ್‍ನ ಕಂಡದು ಪಾಪ ಮಾಡ್‍ನಂವೊಂಡ ಮನೆಕ್ ಬೆಂದ್‌ವಾಯಿತ್ ಪೋಪಲ್ಲಾಂದ್ ಗೊಣಗ್‍ವಕ್ ಸುರು ಮಾಡ್‍ಚಿ.

⁸ಜಕ್ಕಾಯಂಡ ಮನೆಲ್ ಯೇಸು ಇಪ್ಪಕ ಅಂವೊ ಎದ್ದ್ ನಿಪ್ಪಂಜಿ: ಒಡೆಯ, ಇಕ್ಕ ನಾನ್ ನಾಡ ಆಸ್ತಿಲ್ ಪಾದಿನ ಗರೀಬಂಗಕ್ ಕೊಡ್‍ಪಿ, ನಾನ್ ದಾರ್‌ಕೇಂಗಿ ಮೋಸ ಮಾಡಿತುಂಡೇಂಗಿ ಅದ್‍ನ ನಾಲ್ ಪಾಲಾಯಿತ್ ಅಯಿಂಗಕ್ ಕೊಡ್‌ಪೀಂದ್ ಎಣ್ಣ್‌ಚಿ.

⁹ಅದ್ಂಗ್ ಯೇಸು: ಇಂದ್ ನೀಕ್ ಪಿಂಞ ನೀಡ ಮನೆಲ್ ಉಳ್ಳಯಿಂಗಕ್ ರಕ್ಷಣೆ ಕ್‍ಟ್ಟ್‌ಚಿ; ಎನ್ನಂಗೆಣ್ಣ್‌ಚೇಂಗಿ, ಇಂವೊ ಸಹ ಅಬ್ರಹಾಮಂಡ ನೇರಾನ ಕುಮಾರನಾಯಿತುಂಡ್‍ೕಂದ್ ಎಣ್ಣ್‌ಚಿ.

¹⁰ಪಾಳಾಯಿ ಪೋನದ್‍ನ ತ್‍ೕಡ್‍ವಕು ಅದ್‍ನ ಕಾಪಾಡ್‌ವಕು ಮನುಷ್ಯಕುಮಾರ ಬಾತ್‍ೕಂದ್ ಎಣ್ಣ್‌ಚಿ.

¹¹ಜನ ಇದ್‍ನೆಲ್ಲ ಕ್‍ೕಟಂಡ್ ಇಪ್ಪಕ, ಯೇಸು ಯೆರೂಸಲೇಮ್‍ರ ಪಕ್ಕಪಕ್ಕ ಬಾತ್. ಆನಗುಂಡ್, ದೇವಡ ರಾಜ್ಯ ಅಕ್ಕಲೆ ಬಪ್ಪಾಂದ್ ಜನಯೆಲ್ಲ ಗೇನ ಮಾಡಿಯಂಡಿಂಜತ್. ಅಕ್ಕ ಯೇಸು, ಒರ್ ಕಥೇರ ರೂಪತ್‍ನ ಎಣ್ಣಿ ಕೊಡ್‍ತತ್.

¹²ಒಮ್ಮ ಒರ್ ರಾಜಕುಮಾರ, ಅಂವೊನ ರಾಜನಾಯಿತ್ ಮಾಡಿಯಂಡ್ ಪುನಃ ಬಪ್ಪಕಾಯಿತ್ ದೂರ ದೇಶಕ್ ಪೋಚಿ.

¹³ಪೋಪಕ್ ಮಿಂಞ ತಾಂಡ ಪತ್ತ್ ಆಳ್‌ವಳ ಕಾಕುವಂಜಿ ಒಬ್ಬೊಬ್ಬಂಗು ಒರ್ ಪೊನ್ನ್‌ರ ಕಾಸ್‍ನ ಕೊಡ್‌ತಿತ್, ನಾನ್ ವಾಪಸ್ ಬಪ್ಪಕ್ ಮಿಂಞ ಇದ್‍ನಗುಂಡ್ ನಿಂಗ ಎಚ್ಚಕ್ ಸಂಪಾದನೆ ಮಾಡ್‌ವಿರಾಂದ್ ನೋಟ್‌ವೀಂದ್ ಎಣ್ಣ್‌ಚಿ.

¹⁴ಅಂವೊಂಡ ಪಟ್ಟಣತ್‍ಲ್ ಉಳ್ಳ ಜನಕೆಲ್ಲ ಅಂವೊಂಡ ಮೇಲೆ ವಿರೋದ ಇಂಜಗುಂಡ್: ಇಂವೊ ನಂಗಡ ರಾಜನಾಯಿತ್ ಇಪ್ಪಕ್ ನಂಗಕ್ ಕುಶಿಯಿಲ್ಲೇಂದ್ ಎಣ್ಣ್‌ವಕ್ ಅಂವೊಂಡ ಬಯ್ಯತ್ ದೂತಂಗಳ ಅಯಿಚತ್.

¹⁵ಅಂವೊ ರಾಜನಾನ ಪಿಂಞ ಬಯ್ಯ ಬಾತ್. ನಾನ್ ಕೊಡ್‍ತ ದುಡ್ಡ್‌ಲ್ ಅಯಿಂಗ ಎಚ್ಚಕ್ ಸಂಪಾದನೆ ಮಾಡಿತುಂಡ್‍ೕಂದ್ ನೋಟ್‍ವಕಾಯಿತ್, ಅಂವೊ ತಾಂಡ ಎಲ್ಲಾ ಆಳ್‍ವಳ ಅಂವೊಂಡ ಮಿಂಞತ್ ಬಪ್ಪಕ್ ಎಣ್ಣ್‌ಚಿ.

¹⁶ಒರ್ ಆಳ್ ಬಂತ್: ಒಡೆಯ, ನೀಡ ಒರ್ ದುಡ್ಡ್‌ಲ್ ಪತ್ತ್ ದುಡ್ಡ್‌ನ ಸಂಪಾದನೆ ಮಾಡಿಯೇಂದ್ ಎಣ್ಣ್‌ಚಿ.

¹⁷ಅಂವೊಂಡ ಎಜಮಾನ ಅಂವೊನ ನೋಟಿತ್: ನಲ್ಲದ್ ಆಚಿ, ನೀನ್ ನಂಬಿಕೆಯುಳ್ಳ ಆಳ್, ಚೆರಿಯ ವಿಷಯತ್‍ಲ್ ನೀನ್ ನಂಬಿಕಸ್ತನಾಯಿತ್ ಇಂಜಗುಂಡ್, ನಿನ್ನ ಪತ್ತ್ ಪಟ್ಟಣಕ್ ಅದಿಕಾರಿಯಾಯಿತ್ ಮಾಡ್‌ವೀಂದ್ ರಾಜ ಎಣ್ಣ್‌ಚಿ.

¹⁸ಅನ್ನನೆ ದಂಡನೆ ಆಳ್ ಬಂತ್: ಒಡೆಯ! ನೀಡ ಒರ್ ದುಡ್ಡ್‌ಲ್ ನಾನ್ ಅಂಜ್ ದುಡ್ಡ್‌ನ ಸಂಪಾದನೆ ಮಾಡಿಯೇಂದ್ ಎಣ್ಣ್‌ಚಿ.

¹⁹ಅಂವೊಂಗ್: ನಲ್ಲದ್ ಆಚಿ, ನಿನ್ನ ಅಂಜ್ ಪಟ್ಟಣತ್‍ರ ಅದಿಕಾರಿಯಾಯಿತ್ ಮಾಡ್‌ವೀಂದ್ ರಾಜ ಎಣ್ಣ್‌ಚಿ.

²⁰ಇಂಞೊರ್ ಆಳ್ ಬಂತ್: ಒಡೆಯ! ಇದಾ, ನೀಡ ದುಡ್ಡ್. ನಾನ್ ನೀಡ ದುಡ್ಡ್‌ನ ಬದ್ರವಾಯಿತ್ ಕೈವಸ್ತ್ರತ್‌ಲ್ ಕೆಟ್ಟಿತ್ ಬೆಚ್ಚಿತ್ಂಜ್,

²¹ನೀನ್ ಪೆರ್ತ್ ಕಠಿಣ ಮನುಷ್ಯಾಂದ್ ಗೊತ್ತಾಯಿತ್ ನಾಕ್ ದುಂಬ ಪೋಡಿ ಆಚಿ. ನೀಡದಲ್ಲತದ್‍ನ ನೀನ್ ಎಡ್‌ತವಿಯ, ನೀನ್ ಬಿತ್ತತ್‍ದ್‍ನ ಕೊಯ್ಯುವಿಯಾಂದ್ ನಾನ್ ಗೇನ ಮಾಡಿತ್ ಪೋಡಿಲ್ ಅನ್ನನೆ ಬೆಚ್ಚಿಯೇಂದ್ ಎಣ್ಣ್‌ಚಿ.

²²ಅದ್ಂಗ್ ರಾಜ: ನೀನ್ ಒಂದಂಗೂ ಪ್ರಯೋಜನ ಇಲ್ಲತ ಆಳ್, ನಾಡದಲ್ಲತ್‍ದ್‍ನ ನಾನ್ ಎಡ್‍ಪೀಂದು, ನಾನ್ ಬಿತ್ತತ್‍ದ್‍ನ ಕೊಯ್ಯುವೀಂದು ನೀಕ್ ಗೊತ್ತ್ಂಜತಲ್ಲ? ಪಿಂಞ ಎನ್ನಂಗ್ ನೀನ್ ನಾಡ ಪಣತ್‍ನ ಬಡ್ಡಿಕ್ ಕೊಡ್‍ತಿತ್‌ಲ್ಲೆ?

²³ನೀನ್ ಅನ್ನನೆ ಮಾಡಿತ್ಂಜತೇಂಗಿ, ನಾನ್ ಬಯ್ಯಕ್ ಬಪ್ಪಕಾಪಕ, ಅದ್ಂಡಕೂಡೆ ಬಡ್ಡಿಯು, ಕ್‌ಟ್ಟುವಕಿಂಜತಲ್ಲಾಂದ್ ಎಣ್ಣ್‌ಚಿ.

²⁴ಇಂಞು ಅಂವೊ: ಇಂವೊಂಡ ಕೈಯಿಂಜ ದುಡ್ಡ್‌ನ ಎಡ್‍ತಿತ್, ಪತ್ತ್ ದುಡ್ಡ್ ಉಳ್ಳಂವೊಂಗ್ ಕೊಡೀಂದ್ ಅಂವೊಂಡ ಬೋರೆ ಆಳ್‍ವಕ್ ರಾಜ ಎಣ್ಣ್‌ಚಿ.

²⁵ಆಚೇಂಗಿ ಅದ್ಂಗ್ ಅಯಿಂಗ: ಅಂವೊಂಡ ಪಕ್ಕ ಪತ್ತ್ ನಾಣ್ಯ ಉಂಡಲ್ಲಾಂದ್ ಎಣ್ಣ್‌ಚಿ.

²⁶ಅದ್ಂಗ್ ರಾಜ: ಉಳ್ಳದ್‍ನ ಚಾಯಿತೆ ಪ್ರಯೋಜನ ಪಡ್‌ತ್‍ವಯಿಂಗಕ್ ಇಂಞು ಕ್‍ಟ್ಟ್‌ವ, ಆಚೇಂಗಿ, ಪ್ರಯೋಜನ ಪಡ್‍ತತಯಿಂಗಡಿಂಜ ಚೆನ್ನ ಉಳ್ಳದ್‍ನ ಸಹ ಎಡ್‌ತ್‌ರ್‌ವ.

²⁷ಇದ್‍ಲ್ಲತೆ, ನಾನ್ ರಾಜನಾಯಿತ್ ಇಪ್ಪದ್ ಕುಶಿ ಇಲ್ಲೇಂದ್ ಎಣ್ಣ್‌ವ ನಾಡ ಶತ್ರುವಳ ಇಲ್ಲಿ ಕೊಂಡ್‌ಬಾರಿ, ನಾಡ ಎದಿಕೆ ಇಕ್ಕಲೆ ಕೊಲ್ಲೀಂದ್ ಎಣ್ಣ್‌ಚಿ.

²⁸ಇನ್ನನೆ ಯೇಸು ತಕ್ಕ್ ಪರ್ಂದ ಪಿಂಞ, ಶಿಷ್ಯಂಗಕಿಂಜ ಮಿಂಞ ಯೆರೂಸಲೇಮ್‌ಕ್ ಪೋಚಿ.

²⁹ಅಂವೊ ಆಲಿವ್ ಕುಂದ್‌ರ ಪಕ್ಕ ಉಳ್ಳ ಬೇತ್ಫಗೆ ಪಿಂಞ ಬೇಥಾನ್ಯ ಎಣ್ಣುವ ಊರ್‌ರ ಪಕ್ಕ ಬಪ್ಪಕ, ತಾಂಡ ದಂಡ್ ಶಿಷ್ಂಗಳ ನೋಟಿತ್:

³⁰ನಿಂಗಕ್ ಎದ್‍ರ್‌ಲ್ ಉಳ್ಳ ಊರ್‌ಕ್ ಪೋಯಿತ್ ನಿಂಗ ಅಲ್ಲಿ ಎತ್ತ್‌ವಕ, ಅಲ್ಲಿ ದಾರೂ ಸವಾರಿ ಮಾಡತ ಒರ್ ಕತ್ತೆ ಕುಟ್ಟಿ ಕೆಟ್ಟಿತ್ ಉಳ್ಳಾನ ಕಾಂಬಿರ. ಅದ್‍ನ ಉತ್ತಿಯಂಡ್ ಇಲ್ಲಿಕ್ ಆಟಿಯಂಡ್ ಬಾರಿ.

³¹ದಾರಾಚೇಂಗಿ ಎನ್ನಂಗ್, ಎಲ್ಲಿಕ್ ಕೊಂಡ್ ಪೋಪಿರಾಂದ್ ಕ್‍ೕಟಕ, ಒಡೆಯಂಗ್ ಬೋಂಡೂಂದ್ ಎಣ್ಣಿ.

³²ಶಿಷ್ಯಂಗ ಪೋಪಕ, ಯೇಸು ಎಣ್ಣ್‌ನನೆಕೆ ಕಂಡತ್.

³³ಕತ್ತೆ ಕುಟ್ಟಿನ ಉತ್ತ್‌ವಕ, ಅದ್ಂಡ ಎಜಮಾನಂಗ ಎನ್ನಂಗ್ ಕತ್ತೆ ಕುಟ್ಟಿನ ಉತ್ತ್‌ವಿರಾಂದ್ ಕ್‍ೕಟತ್.

³⁴ಅದ್ಂಗ್ ಶಿಷ್ಯಂಗ: ಇದ್ ಒಡೆಯಂಗ್ ಬೋಂಡೂಂದ್ ಎಣ್ಣಿತ್,

³⁵ಯೇಸುರ ಪಕ್ಕ ಕೊಂಡ್ ಬಾತ್. ಕತ್ತೆ ಕುಟ್ಟಿರ ಮೇಲೆ ಅಯಿಂಗಡ ಬಟ್ಟೇನ ಇಟ್ಟಂಡ್ ಯೇಸುನ ಅದ್ಂಡಮೇಲೆ ಅಳ್‍ಪ್‍ಚಿಟ್ಟತ್.

³⁶ಯೇಸು ಕತ್ತೆರ ಮೇಲೆ ಅಳ್‌ತಂಡ್ ಪೋಯಂಡ್ ಇಪ್ಪಕ ಜನ ಎಲ್ಲಾ ಅಯಿಂಗಡ ವಸ್ತ್ರತ್‍ನ ನಡ್‍ಪ ಬಟ್ಟೇಲ್ ಬಿರಿಚತ್.

³⁷ಆಲಿವ್ ಕುಂದ್‌ರ ಅಡಿಲ್ ಉಳ್ಳ ಬಟ್ಟೇರ ಪಕ್ಕ ಬಪ್ಪಕಾಪಕ, ಕೂಡಿತ್ಂಜ ದುಂಬ ಶಿಷ್ಯಂಗ, ಎಂತೆಲ್ಲಾ ಅದ್ಬುತ ಕಾರ್ಯತ್‍ನ ನಂಗ ಕಂಡಿತುಂಡ್‍ೕಂದ್ ಕುಶಿಪಟ್ಟಂಡ್ ದೇವನ ಜೋರಾಯಿತ್ ತುದಿಪಕ್ ಸುರು ಮಾಡ್‍ಚಿ:

³⁸ಒಡೆಯನಾನ ದೇವಡ ಪೆದತ್‍ಲ್ ಬಂದಂಡುಳ್ಳ ರಾಜ ಆಶೀರ್ವಾದ ಪಡ್ಂದಂವೊ, ಪರಲೋಕತ್‍ಲ್ ಸಮಾದಾನ ಇಕ್ಕಡ್, ಪರಲೋಕತ್‍ಲ್ ದೇವಕ್ ಮಹಿಮೆ ಕ್‍ಟ್ಟಡ್‍ೕಂದ್ ತುದಿಚತ್.[39]

³⁹ಜನಡ ಗುಂಪ್‌ಲ್ ಚೆನ್ನ ಫರಿಸಾಯಂಗ ಯೇಸುಕ್: ಉಪಾದ್ಯನೇ, ನೀಡ ಶಿಷ್ಯಂಗಕ್ ಮುಂಡತೆ ಇಪ್ಪಕ್ ಎಣ್ಣ್‍ೕಂದ್ ಎಣ್ಣ್‌ಚಿ.

⁴⁰ಅದ್ಂಗ್ ಯೇಸು: ಅಯಿಂಗ ಮುಂಡತೆ ಇಂಜತೇಂಗಿ ಇಲ್ಲಿ ಉಳ್ಳ ಕಲ್ಲ್ ಸಹ ಕೂತ್ ಕೊಡ್‍ಪಕ್ ಸುರು ಮಾಡ್‌ವಾಂದ್ ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

⁴¹ಪಟ್ಟಣತ್‍ರ ಪಕ್ಕ ಬಪ್ಪಕ, ಯೆರೂಸಲೇಮ್‍ನ ನೋಟ್‌ವಕಾಪಕ, ಅದ್ಂಗಾಯಿತ್ ಯೇಸು ಮೊರಟತ್.

⁴²ನೀಕ್ ಕ್‍ಟ್ಟ್‌ನ ಈ ಕಾಲತ್‍ಲಾಚೇಂಗಿ, ನೀಡ ಸಮಾದಾನ ಎನ್ನನೆ ಕ್‍ಟ್ಟ್‌ವಾಂದ್ ನೀಕ್ ಗೊತ್ತ್‌ಂಜತೇಂಗಿ ಎಚ್ಚಕ್ ನಲ್ಲದಾಯಿತಿಪ್ಪ, ಆಚೇಂಗಿ ಇಕ್ಕ ಅದ್ ನಿಂಗಕ್ ಒಳ್‍ಪ್‍ಚಿಟ್ಟಿತುಂಡ್.

⁴³ಯೆರೂಸಲೇಮೇ, ದೇವ ನಿನ್ನ ಕಾಪಾಡ್‌ವ ದಿನ ನೀಕ್ ಗೊತ್ತಿಲ್ಲತಗುಂಡ್, ನೀಡ ಶತ್ರುವ ನೀಡ ಸುತ್ತ್‌ಲ್ ಗೋಡೆ ಕೆಟ್ಟಿತ್, ನೀಡ ಸುತ್ತ್‌ಲ್ ಯುದ್ದ ಮಾಡ್‌ವ ದಿನ ಬಪ್ಪ. ನೀನ್ ಎಲ್ಲಿಯು ಪೋಕತನೆಕೆ, ಶತ್ರುವ, ನೀಡ ಎಲ್ಲಾ ಬಟ್ಟೇನ ಮುಚ್ಚಿರ್‌ವ.

⁴⁴ನಿನ್ನ ಪೂರ್ತಿ ನಾಶ ಮಾಡ್‌ವ, ನೀಡ ಗೋಡೆರ ಒಳ್‍ಲ್ ನಿನ್ನ, ನೀಡ ಮಕ್ಕಳ ನಾಶ ಮಾಡಿತ್, ಈ ಗೋಡೆರ ಒರ್ ಕಲ್ಲ್‌ರ ಮೇಲೆ ಒರ್ ಕಲ್ಲ್ ಇಲ್ಲತನೆಕೆ ಮಾಡ್‌ವಾಂದ್ ಎಣ್ಣ್‌ಚಿ.

⁴⁵ಪಿಂಞ ಯೇಸು ದೇವಾಲಯತ್‍ರ ಒಳ್‍ಕ್ ಪೋಯಿತ್, ಅಲ್ಲಿ ವ್ಯಾಪಾರ ಮಾಡಿಯಂಡಿಂಜ ಜನಳ ದೌತ್‌ವಕ್ ಸುರು ಮಾಡ್‍ಚಿ.

⁴⁶ಅಂವೊ: ನಾಡ ಮನೆ ಪ್ರಾರ್ಥನೆರ ಮನೆಯಾಯಿತ್ ಇಪ್ಪಾಂದ್ ಒಳ್‌ದಿತುಂಡಲ್ಲಾ, ಆಚೇಂಗಿ ನಿಂಗ ಅದ್‍ನ ಕಳ್ಳಂಗಡ ಗುಹೆರನೆಕೆ ಮಾಡಿರಾಂದ್ ಎಣ್ಣ್‌ಚಿ.[40]

⁴⁷ಇದಾನ ಪಿಂಞ, ಯೇಸು ಎಕ್ಕಾಲು ದೇವಾಲಯತ್‍ಲ್ ಬೋದನೆ ಕೊಡ್‌ತಂಡ್ ಇಂಜತ್. ಮುಕ್ಯ ಯಾಜಕಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಜನಡ ಪೆರಿಯಯಿಂಗ ಎಲ್ಲಾರು ಯೇಸುನ ಕೊಲ್ಲುವಕ್ ನೋಟಿಯಂಡ್ ಇಂಜತೇಂಗಿಯು,

⁴⁸ಜನ ಎಲ್ಲ ಅಂವೊಂಡ ಒರ್ ಬೋದನೆನ ಸಹ ಬುಡತೆ ಚಾಯಿತೆ ಕ್‍ೕಟಂಡ್ ಇಂಜಗುಂಡ್ ಅಯಿಂಗಕ್ ಎನ್ನನೆ ಮಾಡಂಡೂಂದ್ ಗೊತ್ತ್‌ಂಜಿತ್‌ಲ್ಲೆ.