Read Kodava ಲೂಕ 2 Bible Online

ಲೂಕ 2 - Kodava bible

ಲೂಕ 2

¹ಆ ಸಮಯತ್‍ಲ್ ಕೈಸರನಾನ ಔಗುಸ್ತ ರೋಮ್ ದೇಶತ್‍ಲ್ ಜನಸಂಖ್ಯೆ ಕಣಕ್ ಎಡ್‍ಪಕ ಎಲ್ಲಾಡ ಪೆದತ್‍ರ ಲೆಕ್ಕ ಕೊಡ್‍ಪಕ್ ಆಜ್ಞೆ ಮಾಡ್‍ಚಿ.

²ಜನಡ ಕಣಕ್ ಒಳ್‍ದ್‍ವ ಸಮಯತ್, ಸಿರಿಯಾ ದೇಶತ್‍ಲ್ ಕುರೇನ್ಯ ಎಣ್ಣ್‌ವಂವೊ ಅದಿಪತಿಯಾಯಿತ್ಂಜತ್.

³ಎಲ್ಲಾ ಜನಳು ಅಯಿಂಗಡ ಪೆದತ್‍ನ ಪುಸ್ತಕತ್‍ಲ್ ಒಳ್‍ದ್‍ವಕ್ ಅಯಿಂಗಯಿಂಗಡ ಊರ್‌ಕ್ ಪೋಚಿ.

⁴ಯೋಸೇಫ, ದಾವೀದ ರಾಜಂಡ ಸಂತಾನಕಾರನಾಯಿತ್ಂಜಗುಂಡ್, ಗಲಿಲಾಯತ್‍ಲ್ ಉಳ್ಳ ನಜರೇತ್ ಎಣ್ಣುವ ಪಟ್ಟಣತ್ಂಜ ಯೂದಾಯ ನಾಡ್‍ಲ್ ಉಳ್ಳ ದಾವೀದ ಪುಟ್ಟ್‌ನ ಬೇತ್ಲೆಹೇಮ್ ಎಣ್ಣುವ ಪಟ್ಟಣಕ್ ಪೋಚಿ.

⁵ಅಂವೊ ಮಂಗಲ ಕಯಿಪಕ್ ನಿಶ್ಚಿತಾರ್ಥವಾಯಿತ್ಂಜ ಮರಿಯನ ಕೂಟಿಯಂಡ್ ಪೋಚಿ. ಅಕ್ಕ ಅವ ಕೆಲಕರ್ತಿಯಾಯಿತ್ಂಜತ್.

⁶ಅಯಿಂಗ ಬೇತ್ಲೆಹೇಮ್‌ಲ್ ಇಪ್ಪಕ ಅವ ಪೆರುವ ಸಮಯ ಆಚಿ.

⁷ಅವ ಮೊದ ಕ್‍ಣ್ಣ ಕುಂಞಿನ ಪೆತ್ತತ್. ಅಯಿಂಗಕ್ ಚತ್ರತ್‌ಲ್ ಜಾಗ ಇಲ್ಲತ ಕಾರಣ ಅವ ಕುಂಞಿನ ಬಟ್ಟೇಲ್ ಸುತ್ತುವಂಜಿ ಒರ್ ಕೊಟ್ಟ್‌ಲ್ ಇಟ್ಟತ್.

⁸ಅಂದ್ ಬಯಿಟ್ ಚೆನ್ನ ಕೊರಿ ಕಾಪಯಿಂಗ ಬೇತ್ಲೆಹೇಮ್‍ರ ಪಕ್ಕತ್‍ರ ಬೇಲ್‌ಲ್ ಕೊರಿಯಳ ಕಾತಂಡ್ ಇಂಜತ್.

⁹ಅಕ್ಕ ದೇವಡ ಒಡೆಯಂಡ ದೂತಂಗ ಅಯಿಂಗಕ್ ಪ್ರತ್ಯಕ್ಷ ಆಚಿ. ದೇವಡ ಮಹಿಮೆ ಅಯಿಂಗ ಸುತ್ತ್‌ಲ್ ಮಿನ್ನ್‌ಚಿ. ಅಯಿಂಗಕೆಲ್ಲ ದುಂಬ ಪೋಡಿ ಆಚಿ.

¹⁰ದೇವದೂತ ಅಯಿಂಗಳ ನೋಟಿತ್: ನಿಂಗ ಬೊತ್ತತಿ! ಎಲ್ಲಾ ಜನಕ್ ಕುಶಿ ಆಪಂತ ನಲ್ಲ ಸುದ್ದಿನ ನಾನ್ ನಿಂಗಕ್ ಎಡ್‌ತ ಬಂದಿಯೇಂದ್ ಎಣ್ಣ್‌ಚಿ.

¹¹ಇಂದ್ ದೇವ ಗೊತ್ತ್ ಮಾಡಿತ್ ಅಯಿಚ ಒಡೆಯನಾನ ಕ್ರಿಸ್ತ[1] ಎಣ್ಣುವ ರಕ್ಷಕ ನಿಂಗಕಾಯಿತ್ ದಾವೀದಂಡ ಊರ್‌ಲ್ ಪುಟ್ಟಿತುಂಡ್.

¹²ಕುಂಞಿನ ಬಟ್ಟೇಲ್ ಸುತ್ತಿತ್ ಅಲ್ಲಿಯತ್‍ರ ಕೊಟ್ಟ್‌ಲ್ ಬುದ್ದಂಡಿಪ್ಪದ್‌ನ ನಿಂಗ ಕಾಂಬಿರ. ಇದೇ ನಿಂಗಕ್ ಗುರ್‌ತಾಯಿತ್‌ಪ್ಪ.

¹³ಅಕ್ಕಣೆ ಪರಲೋಕತ್‍ರ ದೂತಂಗಡ ಸೈನ್ಯ ಆ ದೂತಂಡ ಕೂಡೆ ಪ್ರತ್ಯಕ್ಷವಾಯಿತ್,

¹⁴ಪರಲೋಕತ್‍ಲ್ ಉಳ್ಳ ದೇವಕ್ ಮಹಿಮೆಯು, ಬೂಲೋಕತ್‍ಲ್ ಶಾಂತಿಯು, ಮನುಷ್ಯಂಗಡ ಮೇಲೆ ಪ್ರೀತಿಯು ಇಕ್ಕಡ್‍ೕಂದ್ ದೇವನ ತುದಿಚಂಡ್ ಪಾಟ್ ಪಾಡ್‌ಚಿ.

¹⁵ಇನ್ನನೆ ಎಣ್ಣಿತ್ ದೇವದೂತಂಗ ಪರಲೋಕಕ್ ಪೋನ ಪಿಂಞ ಕೊರಿ ಕಾಪಯಿಂಗ ಅಯಿಂಗಯಿಂಗಳ ನೋಟಿತ್: ನಂಗ ಬೆತ್ಲೆಹೇಮ್‍ಕ್ ಪೋಯಿತ್ ದೇವ ನಂಗಕ್ ಅರಿಚಿಟ್ಟದ್‍ನ ನೋಟಿತ್ ಬಕ್ಕನಾ ಎಣ್ಣಿಯಂಡ್ ತಕ್ಕ್ ಪರ್ಂದತ್.

¹⁶ಅಯಿಂಗ ಬೆರಿಯ ಪೋಯಿತ್ ಮರಿಯ, ಯೋಸೇಫ ಪಿಂಞ ಕೊಟ್ಟ್‌ಲ್ ಬುದ್ದಡಿಂಜ ಕುಂಞಿನ ಕಂಡತ್.

¹⁷ಕಂಡ ಪಿಂಞ ಈ ಕುಂಞಿರ ವಿಷಯತ್‍ನ ಪಿಂಞ ಅಯಿಂಗಕ್ ಎಣ್ಣ್‌ನ ವಿಷಯತ್‍ನ ಎಲ್ಲಾರ್‌ಕು ಪ್ರಚಾರ ಮಾಡ್‍ಚಿ.

¹⁸ಕೊರಿ ಕಾಪಯಿಂಗ ಎಣ್ಣ್‌ನಾನ ಕ್‍ೕಟಿತ್ ಎಲ್ಲಾರ್‌ಕು ಆಶ್ಚರ್ಯ ಆಚಿ.

¹⁹ಆಚೇಂಗಿ ಮರಿಯ ಇದ್‍ನೆಲ್ಲಾ ತಾಂಡ ಹೃದಯತ್‍ಲ್ ಬೆಚ್ಚಂಡ್, ದುಂಬ ಗೇನ ಮಾಡಿಯಂಡಿಂಜತ್.

²⁰ಅಯಿಂಗಕ್ ಎಣ್ಣ್‌ನ ವಿಷಯತ್‍ನ ಕ್‍ೕಟಿತ್ ಅನ್ನನೆ ನೋಟ್‍ನಗುಂಡ್ ಕೊರಿ ಕಾಪಯಿಂಗ ದೇವನ ಕೊಂಡಾಡಿತ್, ತುದಿಚಂಡ್ ಅಯಿಂಗಯಿಂಗಡ ಜಾಗಕ್ ಪೋಚಿ.

²¹ಕುಂಞಿ ಪುಟ್ಟಿತ್ ಎಟ್ಟನೆ ದಿವಸತ್, ಸುನ್ನತಿರ ಸಮಯ ಬಪ್ಪಕ, ಅಂವೊ ಕೆಲತ್‌ಲ್ ಇಪ್ಪಕಿಂಜ ಮಿಂಞಲೇ ದೇವದೂತ ಎಣ್ಣ್‌ನ ಪ್ರಕಾರ ಅಂವೊಂಗ್ ಯೇಸೂಂದ್ ಪೆದ ಇಟ್ಟತ್.

²²ಮೋಶೇರ ನ್ಯಾಯಪ್ರಮಾಣತ್‍ಲ್ ಒಳ್‌ದ್‌ನನೆಕೆ ಕುಂಞಿ ಪುಟ್ಟ್‌ನ ಪಿಂಞ ಮಾಡ್‌ವ ಅಯಿಂಗಡ ಶುದ್ದ ಮಾಡ್‌ವಕುಳ್ಳ ಸಮಯ ಬಾತ್. ಅದ್ಂಗಾಯಿತ್ ಮರಿಯ ಪಿಂಞ ಯೋಸೇಫ ಕುಂಞಿನ ದೇವಕ್ ಅರ್ಪಣೆಮಾಡ್‌ವಕ್ ದೇವಾಲಯಕ್ ಪೋಚಿ.

²³ಆದ್ಯ ಪುಟ್ಟ್‌ನ ಕ್‍ಣ್ಣ ಕುಂಞಿನ ದೇವಕ್ ಅರ್ಪಣೆ ಮಾಡಂಡು ಎಣ್ಣಿಯಂಡ್ ನ್ಯಾಯಪ್ರಮಾಣತ್‍ಲ್ ಒಳ್‌ದಿತುಳ್ಳನೆಕೆ,[2]

²⁴ನ್ಯಾಯಪ್ರಮಾಣತ್‍ಲ್ ಎಣ್ಣ್‌ನನೆಕೆ ಒರ್ ಜೊತೆ ಪಾರಿವಾಳ ಪಕ್ಷಿನ ಬಲಿ ಕೊಡ್‍ಪಕ್ ಪೋಚಿ.[3]

²⁵ಆ ಸಮಯತ್‍ಲ್ ಯೆರೂಸಲೇಮ್‍ಲ್ ಸಿಮೆಯೋನ ಎಣ್ಣುವ ಒರ್ ಮನುಷ್ಯ ವಾಸ ಮಾಡಿಯಂಡ್ ಇಂಜತ್. ಅಂವೊ ನೀತಿವಂತನು, ದೇವಡ ಬಕ್ತನು ಆಯಿತ್ಂಜತ್. ಅಂವೊ ಇಸ್ರಾಯೇಲ್ ಜನಡ ರಕ್ಷಣೆಕಾಯಿತ್ ಪಾರಕಾತಂಡಿಂಜತ್. ಅಂವೊ ಪವಿತ್ರಾತ್ಮ ದುಂಬಿತ್ಂಜತ್.

²⁶ಒಡೆಯ ವಾಗ್ದಾನ ಮಾಡ್‍ನ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನ ಅಂವೊ ಕಾಂಗತೆ ಚಾವುಲೇಂದ್ ಪವಿತ್ರಾತ್ಮ ಅಂವೊಂಗ್ ಎಣ್ಣಿತ್ಂಜತ್.

²⁷ನ್ಯಾಯಪ್ರಮಾಣತ್‍ಲ್ ಪುಟ್ಟ್‌ನ ಕುಂಞಿಕ್ ಎಂತ ಮಾಡಂಡೂಂದ್ ಒಳ್‍ದಿತುಂಡೋ ಅದ್ಂಡ ಪ್ರಕಾರ ಮಾಡ್‌ವಕಾಯಿತ್ ಯೇಸುರ ಅಪ್ಪವ್ವ ಯೇಸು ಕುಂಞಿನ ದೇವಾಲಯತ್‍ರ ಒಳ್‍ಲ್ ಎಡ್‌ತ ಬಪ್ಪಕ, ಪವಿತ್ರಾತ್ಮಂಡ ಪ್ರೇರಣೆಯಿಂಜ ಸಿಮೆಯೋನ ದೇವಾಲಯತ್‍ರ ಒಳ್‍ಲ್ ಇಂಜತ್.

²⁸ಸಿಮೆಯೋನ ಕುಂಞಿನ ತಾಂಡ ಕೈಯಿಲ್ ಎಡ್‍ತಂಡ್ ದೇವಕ್ ವಂದನೆ ಮಾಡಿತ್, ನೀನ್ ಎಣ್ಣ್‌ನ ತಕ್ಕ್ ಇಕ್ಕ ಸತ್ಯವಾಯಿತ್, ಇಕ್ಕ ನಿಂಗ ನೀಡ ಆಳ್‌ನ ಶಾಂತಿಲ್ ಪೋಪಕ್ ಬುಡ್‍ವಿರ;

²⁹

³⁰ಲೋಕತ್‍ರ ಜನಕ್ ಜ್ಞಾನತ್‍ರ ಬೊಳ್‌ಕಾಯಿತು, ನೀಡ ಮಕ್ಕ ಇಸ್ರಾಯೇಲ್‍ಕ್ ಕೀರ್ತಿಯಾಯಿತು ದೇವ ಎಲ್ಲಾ ಜನಡ ಮಿಂಞತ್‍ಲ್ ತಯಾರ್ ಮಾಡ್‍ನ ನೀಡ ರಕ್ಷಣೆನ ನಾಡ ಕಣ್ಣ್ ಕಂಡತ್.

³¹

³²

³³ಆ ಕುಂಞಿರ ವಿಷಯತ್ ಎಣ್ಣ್‌ನದ್‍ನ ಕಂಡ್ ಅಂವೊಂಡ ಅಪ್ಪವ್ವ ಆಶ್ಚರ್ಯ ಪಟ್ಟತ್. ಪಿಂಞ ಸಿಮೆಯೋನ ಅಯಿಂಗಳ ಆಶೀರ್ವಾದ ಮಾಡಿತ್, ಆ ಕುಂಞಿರ ಅವ್ವ ಮರಿಯಳ ನೋಟಿತ್, ನೋಟ್, ಇಸ್ರಾಯೇಲ್‌ಲ್ ದುಂಬ ಜನ ಬೂವಕು, ಏವಕೂ ದೇವ ಇಂವೊನ ಗೊತ್ತ್ ಮಾಡಿತುಂಡ್, ಇಂವೊ ದೇವಡಯಿಂಜ ಬಂದ ಒರ್ ಗುರ್‌ತಾಯಿತ್‌ಪ್ಪ. ಇಂವೊ, ಜನಕ್ ದೇವಡ ಕೈಯಿಂಜ ಬಂದ ಸತ್ಯ ಎಂತ್‍ೕಂದ್ ಕಾಟ್‍ವ. ಆಚೇಂಗಿ ದುಂಬ ಜನ ಇಂವೊನ ದೇವ ಅಯಿಚತ್‍ೕಂದ್ ನಂಬುಲೆ. ಮರಿಯಳೇ, ನೀಡ ಆತ್ಮತ್‌ನ ಒರ್ ಕತ್ತಿ ಕೆತ್ತಿತ್ ಪೋಪಾಂದ್ ಎಣ್ಣ್‌ಚಿ.

³⁴

³⁵

³⁶ಆಸೇರ ಸಂತಾನತ್‍ರ ಫನುವೇಲ ಎಣ್ಣುವಂವೊಂಡ ಮೋವ ಅನ್ನ ಎಣ್ಣ್‌ವ ಒರ್ ಪ್ರವಾದಿನಿ ಇಂಜತ್, ಅವಕ್ ದುಂಬ ವಯಸಾಯಿತ್ಂಜತ್. ಅವ ಮಂಗಲ ಕಯಿಚಿತ್ ಬರಿ ಏಳ್ ಕಾಲ ವಡಿಯಂಡ ಕೂಡೆ ಬದ್‍ಕ್‍ಚಿ ಪಿಂಞ ಅವಡ ವಡಿಯ ಚತ್ತ್ ಪೋಚಿ.

³⁷ಇಕ್ಕ ಅವಕ್ ಎಂಬತನಾಲ್ ವಯಸಾಯಿತ್ಂಜತ್. ಅವ ಎಲ್ಲಿಯು ಪೋಕತೆ ದೇವಾಲಯತ್‍ಲ್ ವಾಸ ಮಾಡಿಯಂಡ್, ಪೊಲಾಕ ಬೈಟ್ ದೇವನ ಆರಾದನೆ ಮಾಡಿಯಂಡ್, ಪಟ್ಟಣಿ ನಿಂದಂಡ್, ಪ್ರಾರ್ಥನೆ ಮಾಡಿಯಂಡಿಂಜತ್.

³⁸ಅವಳೂ, ಅದೇ ಸಮಯತ್‍ಲ್ ಅಲ್ಲಿ ಬಂದಿತ್ ದೇವಕ್ ವಂದನೆ ಎಣ್ಣಿತ್, ಯೆರೂಸಲೇಮ್‍ನ ಬುಡ್‍ಗಡೆ ಮಾಡ್‌ವ ರಕ್ಷಕಂಗಾಯಿತ್ ಪಾರಕಾತಂಡಿಂಜತ್. ಎಲ್ಲಾ ಜನಕು ಈ ಕುಂಞಿರ ವಿಷಯತ್‍ನ ಅವ ಎಣ್ಣ್‌ಚಿ.

³⁹ನ್ಯಾಯಪ್ರಮಾಣತ್‍ಲ್ ಎಣ್ಣ್‌ನ ಪ್ರಕಾರ ಯೋಸೇಫ ಪಿಂಞ ಮರಿಯ ಎಲ್ಲಾ ಕಾರ್ಯ ಮಾಡ್‌ವಂಜಿ ಗಲಿಲಾಯತ್‍ಲ್ ಉಳ್ಳ ನಜರೇತ್ ಎಣ್ಣ್‌ವ ಅಯಿಂಗಡ ಸ್ವಂತ ಪಟ್ಟಣಕ್ ಪೋಚಿ.

⁴⁰ಆ ಕುಂಞಿ ಬಲ್ಯಂವೊನಾಯಿತ್ ಬೊಳ್ಂದಿತ್, ಪವಿತ್ರಾತ್ಮನಗುಂಡ್ ಜ್ಞಾನತ್‍ಲ್ ದುಂಬಿತ್, ದೇವಡ ಕೃಪೆ ಅಂವೊಂಡ ಮೇಲೆ ಇಂಜತ್.

⁴¹ಪ್ರತಿಕಾಲ ಯೇಸುರ ಅಪ್ಪವ್ವ ಪಸ್ಕ[4] ಎಣ್ಣುವ ನಮ್ಮೆಕ್ ಯೆರೂಸಲೇಮ್‌ಕ್ ಪೋಪಕಿಂಜತ್.

⁴²ಯೇಸುಕ್ ಪನ್ನೆರಂಡ್ ಬೈತ್ ಆಪಕ ಅಯಿಂಗಡ ಪದ್ದತಿರ ಪ್ರಕಾರ ನಮ್ಮೆಕ್ ಯೆರೂಸಲೇಮ್‌ಕ್ ಪೋಚಿ.

⁴³ನಮ್ಮೆ ಕಯಿಂಜದು ಅಂವೊಂಡ ಅಪ್ಪವ್ವ ಮನೆಕ್ ಬಂದಂಡಿಪ್ಪಕ, ಯೇಸು ವಾಪಸ್ ಬರತೆ ಯೆರೂಸಲೇಮ್‍ಲ್ ಇಂಜತ್. ಇದ್ ಅಪ್ಪವ್ವಂಗಕ್ ಗೊತ್ತಾಯಿತ್‌ಲ್ಲೆ.

⁴⁴ಯೇಸು, ಏದೊ ಒರ್ ಗುಂಪ್‌ಲ್ ಇಕ್ಕೂಂದ್ ಗೇನ ಮಾಡಿತ್ ಒರು ದಿನ ಪ್ರಯಾಣ ಆನ ಪಿಂಞ, ಅಯಿಂಗಡ ಬೆಂದ್‌ಕಡ ಸ್ನೇಹಿತಂಗಡ ಪಕ್ಕ ಅಂವೊನ ತ್‍ೕಡ್‌ವಕ್ ಸುರು ಮಾಡ್‍ಚಿ.

⁴⁵ಕುಂಞಿನ ಕಾಂಗತಗುಂಡ್ ತ್‍ೕಡಿಯಂಡೇ ಯೆರೂಸಲೇಮ್‌ಕ್ ಪುನಃ ಪೋಚಿ.

⁴⁶ಮೂಂದ್ ದಿವಸ ಆನ ಪಿಂಞ ಅಂವೊ ದೇವಾಲಯತ್‍ಲ್ ಉಪಾದ್ಯಂಗಡ ಮದ್ಯತ್‍ಲ್ ಅಳ್‌ತಂಡ್ ಅಯಿಂಗ ಎಣ್ಣುವಾನ ಕ್‍ೕಟಂಡ್ ಅಯಿಂಗಕ್ ಪ್ರಶ್ನೆ ಇಟ್ಟಂಡ್ ಅಯಿಂಗಡ ಕೂಡೆ ಇಂಜಾನ ಕಂಡತ್.

⁴⁷ಅಂವೊಂಡ ತಕ್ಕ್ ಕ್‍ೕಟ ಎಲ್ಲಾರ್‌ಕು ಅಂವೊಂಡ ಬುದ್ದಿನ ಪಿಂಞ ಅಂವೊ ಎಣ್ಣ್‌ನ ಉತ್ತರತ್‍ನ ಕ್‍ೕಟಿತ್ ಆಶ್ಚರ್ಯ ಆಚಿ.

⁴⁸ಅಂವೊಂಡ ಅಪ್ಪವ್ವ ಸಹ ಯೇಸುನ ಕಂಡಿತ್ ದುಂಬ ಆಶ್ಚರ್ಯ ಪಟ್ಟತ್. ಯೇಸುರ ಅವ್ವ ಅಂವೊನ ನೋಟಿತ್: ಎನ್ನಂಗ್ ಕುಂಞಿ ನೀನ್ ಇನ್ನನೆ ಮಾಡಿಯ. ನೋಟ್, ನೀಡ ಅಪ್ಪನು ನಾನು ಎಚ್ಚಕ್ ಗಾಬರಿಲ್ ತ್‍ೕಡ್‌ಚೀಂದ್ ಎಣ್ಣ್‌ಚಿ.

⁴⁹ಅದ್ಂಗ್ ಅಂವೊ: ಎನ್ನಂಗಾಯಿತ್ ನಿಂಗ ನನ್ನ ತ್‍ೕಡಿರ! ನಾನ್ ನಾಡ ಅಪ್ಪಂಡ ಮನೆಲ್ ಇರಂಡೂಂದ್ ನಿಂಗಕ್ ಗೊತ್ತ್‌ಲ್ಲೆಯಾಂದ್ ಕ್‍ೕಟ್‍ಚಿ.

⁵⁰ಅಂವೊ ಎಣ್ಣ್‌ನ ತಕ್ಕ್ ಅಯಿಂಗಕ್ ಅರ್ಥ ಆಯಿತಿಲ್ಲೆ.

⁵¹ಪಿಂಞ, ಅಂವೊ ಅಪ್ಪವ್ವಂಗಡ ಕೂಡೆ ನಜರೇತ್‌ಕ್ ಪೋಯಿತ್, ಅಯಿಂಗಕ್ ಬಗ್ಗ್‌ಚಿಟ್ಟಿತ್ ನಡ್ಂದಂಡಿಂಜತ್. ಈ ವಿಷಯತ್‌ನೆಲ್ಲ ಅಂವೊಂಡ ಅವ್ವ ಅವಡ ಹೃದಯತ್‍ಲ್ ಬೆಚ್ಚತ್.

⁵²ಯೇಸು ಜ್ಞಾನತ್‍ಲ್, ತಡೀರ ಬಲತ್‍ಲ್ ಬೊಳ್ಂದಂಡ್ ಬಂದತ್. ಅದಲ್ಲತೆ ದೇವಡ ಪಿಂಞ ಜನಡ ದಯೆ ಅಂವೊಂಗ್ ದುಂಬ ಇಂಜತ್.