Read Kodava ಲೂಕ 20 Bible Online

ಲೂಕ 20 - Kodava bible

ಲೂಕ 20

¹ಒರ್ ದಿವಸ ಯೇಸು ದೇವಾಲಯತ್‍ಲ್ ಜನಕ್ ಬೋದನೆ ಕೊಡ್‌ತಂಡ್, ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡಿಪ್ಪಕ, ಮುಕ್ಯ ಯಾಜಕಂಗಳು, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು ಪಿಂಞ ಪೆರಿಯಯಿಂಗಳು ಕೂಡಿಯಂಡ್ ಯೇಸುರ ಪಕ್ಕ ಬಂದಿತ್:

²ಇದ್‍ನೆಲ್ಲ ನೀನ್ ಏದ್ ಅದಿಕಾರತ್‍ಲ್ ಮಾಡಿಯಂಡುಳ್ಳಿಯಾ? ದಾರ್ ನೀಕ್ ಈ ಅದಿಕಾರತ್‍ನ ಕೊಡ್‌ತತ್‍ೕಂದ್ ಕ್‍ೕಟತ್?

³ಅದ್ಂಗ್ ಯೇಸು: ನಾನ್ ನಿಂಗಕ್ ಒರ್ ಪ್ರಶ್ನೆ ಇಡ್‌ವಿ.

⁴ಯೋಹಾನ ದೀಕ್ಷಾಸ್ನಾನ ಕೊಡ್‍ಪಕ್ ದಾರ್ ಅದಿಕಾರ ಕೊಡ್‍ತತ್? ಪರಲೋಕತ್ಂಜ ಕ್‍ಟ್ಟ್‌ನದಾ? ಅಥವ ಮನುಷ್ಯಡಿಂಜ ಕ್‍ಟ್ಟನದಾಂದ್ ಕ್‍ೕಟತ್.

⁵ಅಕ್ಕ ಅಯಿಂಗ: ನಂಗ ಇಕ್ಕ ಪರಲೋಕತ್ಂಜ ಬಾತ್‍ೕಂದ್ ಎಣ್ಣ್‌ಚೇಂಗಿ ನಿಂಗ ಎನ್ನಂಗ್ ಯೋಹಾನನ ನಂಬುಲೇಂದ್ ಕ್‍ೕಪ,

⁶ಆಚೇಂಗಿ ಇದ್ ಮನುಷ್ಯಂಡಲ್ಲಿಂಜ ಬಾತ್‍ೕಂದ್ ಎಣ್ಣ್‌ಚೇಂಗಿ, ಜನ ಯೋಹಾನನ ಪ್ರವಾದೀಂದ್ ನಂಬಿತ್ಂಜಗುಂಡ್ ನಂಗಳ ಕೊಲ್ಲ್‌ವಕ್ ಕಲ್ಲ್ ಕನಿಪಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

⁷ಆನಗುಂಡ್ ಆ ಅದಿಕಾರ ದಾರ್‍ೕಂಜ ಬಾತ್‍ೕಂದ್ ನಂಗಕ್ ಗೊತ್ತ್‌ಲ್ಲೇಂದ್ ಅಯಿಂಗೆಲ್ಲ ಎಣ್ಣ್‌ಚಿ.

⁸ಅಕ್ಕ ಯೇಸು: ಅನ್ನನಾಚೇಂಗಿ ನಾನು ಇದ್‍ನೆಲ್ಲ ಏದ್ ಅದಿಕಾರತ್‍ಲ್ ಮಾಡಿಯಂಡುಳ್ಳ್‌ಂದ್ ನಿಂಗಕ್ ಎಣ್ಣುಲೇಂದ್ ಎಣ್ಣ್‌ಚಿ.

⁹ಯೇಸು ಒರ್ ಕಥೇರ ರೂಪ ಎಣ್ಣ್‌ಚಿ. ಒರ್ ಮನುಷ್ಯ ದ್ರಾಕ್ಷಿ ತೋಟ ಮಾಡ್‍ಚಿ. ಅದ್‍ನ ನೋಟ್‍ವಕ್ ವಾರಕಾರಂಗಳ ಗೊತ್ತ್ ಮಾಡಿತ್, ಸುಮಾರ್ ದಿವಸ ಮನೆ ಬುಟ್ಟಿತ್ ಪೋಚಿ.

¹⁰ದ್ರಾಕ್ಷಿ ಪಣ್ಣ್‌ ಕೊಯ್ಯುವಕ್ಕ್ ಸಮಯ ಬಾತ್. ಆ ತೋಟತ್‍ರ ಎಜಮಾನ, ಅಂವೊಂಡ ಪಾಲ್‍ಕ್ ಬಂದ ದ್ರಾಕ್ಷಿ ಪಣ್ಣ್‌ನ ಎಡ್‌ತ ಬಪ್ಪಕ್ ಒರ್ ಆಳ್‌ನ ಅಯಿಚತ್. ವಾರಕಾರಂಗ ಆ ಆಳ್‌ನ ಪೊಯ್ಯುವಂಜಿ ಒಂದು ಕೊಡ್‍ಕತೆ ಬಯ್ಯಕ್ ಅಯಿಚತ್.

¹¹ಇಂಞೊರ್ ಆಳ್‌ನ ಅಯಿಚತ್. ಆಚೇಂಗಿ ಆ ವಾರಕಾರಂಗ, ಅಂವೊನ ಸಹ ಪೊಯ್ಯುವಂಜಿ, ಅಂವೊನ ಮೋಸವಾಯಿತ್ ಞಾಣಪಡ್‍ತಿತ್ ಅಂವೊಂಗ್ ಸಹ ಒಂದು ಕೊಡ್‍ಕತೆ ಬಯ್ಯಕ್ ಅಯಿಚತ್.

¹²ಆ ಎಜಮಾನ ಮೂಂದನೆ ಆಳ್‌ನ ಅಯಿಚತ್. ಆ ಆಳ್‌ನ ಸಹ ವಾರಕಾರಂಗ ಗಾಯಮಾಡ್‌ವಂಜಿ ಅಂವೊನ ತೋಟತ್ಂಜ ಪೊರಮೆ ಚಾಡಿರ್‌ತ್.

¹³ಅಕ್ಕ ದ್ರಾಕ್ಷಿ ತೋಟತ್‍ರ ಎಜಮಾನ: ನಾನ್ ಎಂತ ಮಾಡಡ್? ನಾಡ ಕೊದಿರ ಮೋಂವೊನ ಅಯಿಪಿ. ಅಂವೊನ ಅಯಿಚತೇಂಗಿ ಅಂವೊಂಗ್ ಕಂಡಿತವಾಯಿತ್ ಮರ್ಯಾದೆ ಕೊಡ್‍ಪಾಂದ್ ಗೇನ ಮಾಡಿತ್, ಅಂವೊಂಡ ಮೋಂವೊನ ಅಯಿಚತ್.

¹⁴ಆಚೇಂಗಿ ವಾರಕಾರಂಗ ಎಜಮಾನಂಡ ಮೋಂವೊ ಬಪ್ಪದ್‍ನ ಕಂಡದು ಅಯಿಂಗಯಿಂಗಳೇ ತಕ್ಕ್ ಪರ್ಂದಿತ್: ತೋಟತ್‍ರ ಹಕ್ಕ್‌ದಾರ ಆಪಕುಳ್ಳ ನಂಗಡ ಎಜಮಾನಂಡ ಮೋಂವೊ ಬಂದಂಡುಂಡ್, ಬಾರಿ, ನಂಗ ಅಂವೊನ ಕೊಲೆ ಮಾಡ್‍ನ. ಅಕ್ಕ ಈ ಸೊತ್ತ್ ನಂಗಡದಾಪಾಂದ್ ಎಣ್ಣಿಯಂಡ್,

¹⁵ಅಂವೊನ ದ್ರಾಕ್ಷಿ ತೋಟತ್‍ರ ಪೊರಮೆ ಚಾಡ್‍ವಂಜಿ, ಮೋಂವೊನ ಕೊಂದ್‍ರ್‌ತ್. ಅನ್ನನಾಚೇಂಗಿ ವಾರಕಾರಂಗಕ್ ದ್ರಾಕ್ಷಿ ತೋಟತ್‍ರ ಎಜಮಾನ ಎಂತ ಮಾಡ್‌ವ?

¹⁶ಅಂವೊ ಅಯಿಂಗಳ ಕೊಂದ್‍ರ್‍ವಂಜಿ ಬೋರೆ ವಾರಕಾರಂಗಕ್ ತೋಟತ್‍ನ ಕೊಡ್‍ಪಾಂದ್ ಯೇಸು ಎಣ್ಣ್‌ಚಿ. ಜನ ಈ ತಕ್ಕ್‌ನ ಕ್‍ೕಪದು: ಆಚೇಂಗಿ, ಅನ್ನನೆ ಆಕತೆ ಇರಡ್‍ೕಂದ್ ಎಣ್ಣ್‌ಚಿ.

¹⁷ಯೇಸು ಅಯಿಂಗಳ ನೋಟುವಂಜಿ: ಮನೆ ಕೆಟ್ಟ್‌ವಂವೊ ಲಾಯಕಾಯಿತ್‌ಲ್ಲೇಂದ್ ತ್‍ಕ್ಕಾರ ಮಾಡ್‍ನ ಕಲ್ಲೇ ಮುಕ್ಯವಾನ ಮೂಲೆಕಲ್ಲಾಚೀಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳಾಂಗ್ ಅರ್ಥ ಎಂತ?[41]

¹⁸ಆ ಕಲ್ಲ್‌ರ ಮೇಲೆ ಬೂವಯಿಂಗ ತುಂಡ್ ತುಂಡಾಯಿಪೋಪ. ಆ ಕಲ್ಲ್ ದಾಡ ಮೇಲಾಚೇಂಗಿ ಬುದ್ದತೇಂಗಿ ಅಂವೊ ಪೊಡಿ ಪೊಡಿ ಆಯಿಪೋಪ.

¹⁹ಯೇಸು ಎಣ್ಣ್‌ನ ಕಥೇರ ರೂಪತ್‌ಲ್ ಅಯಿಂಗಡ ವಿಷಯತ್‍ನ ಎಣ್ಣ್‌ಚೀಂದ್ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಮುಕ್ಯ ಯಾಜಕಂಗಕ್ ಗೊತ್ತಾಯಿತ್, ಯೇಸುನ ಪುಡಿಪಕ್ ಒರ್ ಸಮಯ ನೋಟಿಯಂಡಿಂಜತ್. ಆಚೇಂಗಿ ಈ ಬಲ್ಯ ಜನಡ ಕೂಟತ್‌ನ ಕಂಡಿತ್ ಅಯಿಂಗಕ್ ಪೋಡಿ ಆಚಿ.

²⁰ರೋಮ್ ರಾಜ್ಯತ್‍ರ ಅದಿಕಾರಿಯಾನ ಅದಿಪತಿಕ್ ಯೇಸುನ ಪುಡ್‍ಚಿ ಕೊಡ್‍ಪಕಾಯಿತ್, ನೀತಿಲ್ ನಡ್‍ಪ ಜನಡನೆಕೆ ನಾಟಕ ಮಾಡ್‌ವ ದಂಡ್ ಗೂಡಚಾರಂಗಳ, ಯೆಹೂದ್ಯಂಗಡ ಅದಿಕಾರಿಯಂಗ ಯೇಸುರ ಪಕ್ಕ ಅಯಿಚತ್. ಯೇಸು ಪರಿಯುವ ತಕ್ಕಿಂಜಿಲೇ ಅಂವೊನ ಪುಡಿಪ ಸಮಯಕಾಯಿತ್ ನೋಟಿಯಂಡ್ ಇಂಜತ್.

²¹ಅಯಿಂಗ ಯೇಸುರ ಪಕ್ಕ ಬಂತ್: ಉಪಾದ್ಯನೇ, ನೀನ್ ಪರಿಯುವ ತಕ್ಕ್ ಪಿಂಞ ಮಾಡ್‌ವ ಬೋದನೆ ಸತ್ಯಾಂದ್ ನಂಗಕ್ ಗೊತ್ತುಂಡ್. ಏದ್ ತರತ್‍ರ ಜನ ಆಯಿತುಂಡೇಂಗಿಯು, ನೀನ್ ಅಯಿಂಗಳ ಒರೇ ತರತ್‍ಲ್ ನೋಟಿತ್ ದೇವಡ ವಿಷಯತ್‍ನ ಸತ್ಯವಾಯಿತ್ ಬೋದನೆ ಮಾಡ್‌ವಿಯ.

²²ಕೈಸರಂಗ್ ಕಂದಾಯ ಕೊಡ್‍ಪದ್ ಸರಿಯಾ ಅಥವ ತಪ್ಪಾಂದ್ ಕ್‍ೕಟತ್.

²³ಆಚೇಂಗಿ ಅಯಿಂಗಡ ಕಪಟ ಕಳಿ ಯೇಸುಕ್ ಗೊತ್ತಾನಗುಂಡ್,

²⁴ಒರ್ ಬೊಳ್ಳಿರ ನಾಣ್ಯತ್‌ನ ನಾಕ್ ಕಾಟಿ. ಇದ್‍ಲ್ ದಾಡ ಮೂಡ್ ಪಿಂಞ ದಾಡ ಪೆದ ಉಂಡ್ ಎಣ್ಣೀಂದ್ ಯೇಸು ಕ್‍ೕಟತ್. ಅದ್ಂಗ್ ಅಯಿಂಗ: ಇದ್‍ಲ್ ಕೈಸರಂಡ ಮೂಡ್ ಪಿಂಞ ಅಂವೊಂಡ ಪೆದ ಉಂಡ್‍ೕಂದ್ ಎಣ್ಣ್‌ಚಿ.

²⁵ಅಕ್ಕ ಅಂವೊ: ಅಕ್ಕುವ, ಅನ್ನನಾಚೇಂಗಿ, ಕೈಸರಂಡದ್‌ನ ಕೈಸರಂಗ್ ಕೊಡಿ, ದೇವಡದ್‌ನ ದೇವಕ್ ಕೊಡೀಂದ್ ಉತ್ತರ ಕೊಡ್‍ತತ್.

²⁶ಆನಗುಂಡ್ ಅಯಿಂಗಕ್ ಯೇಸುನ ಜನಡ ಮಿಂಞತ್‍ಲ್ ಪುಡಿಪಕ್ ಕಯಿಂಜಿತ್‌ಲ್ಲೆ. ಅದ್ಂಗ್ ಬದ್‍ಲ್, ಯೇಸುರ ತಕ್ಕ್ ಕ್‍ೕಪದು ಅಯಿಂಗಕ್ ಆಶ್ಚರ್ಯ ಆಯಿತ್ ಒಂದು ಪರಿವಕ್ ಕಯಿಂಜಿತ್‌ಲ್ಲೆ.

²⁷ಚತ್ತ್ ಪೋನಯಿಂಗ ದಾರೂ ಜೀವವಾಯಿತ್ ಏವುಲೇಂದ್ ವಾದ ಮಾಡ್‌ವ ಸದ್ದುಕಾಯಂಗಡಲ್ಲಿ ಚೆನ್ನ ಜನ ಯೇಸುರ ಪಕ್ಕ ಬಂತ್ ಒರ್ ಪ್ರಶ್ನೆ ಇಟ್ಟತ್.

²⁸ಉಪಾದ್ಯನೇ, ಒರ್ ಮನುಷ್ಯ ಮಕ್ಕ ಇಲ್ಲತೆ ಪೊಣ್ಣ್‌ನ ಬುಟ್ಟಿತ್ ಚತ್ತ್ ಪೋಚೇಂಗಿ, ಚತ್ತ್ ಪೋನಂವೊಂಡ ತಮ್ಮಣ ಅಂವೊಂಡ ಅಣ್ಣಂಡ ಪೊಣ್ಣ್‌ನ ಮಂಗಲ ಕಯಿಕಲು. ಅಕ್ಕ ಅಯಿಂಗಕ್ ಮಕ್ಕ ಆನಕ ಆ ಮಕ್ಕ ಚತ್ತ್ ಪೋನಂವೊಂಡ ಪೆದತ್‍ನ ಎಡ್‍ತವಾಂದ್ ಮೋಶೆ ನಂಗಕ್ ಈ ಕಾನೂನ್‌ನ ಒಳ್‍ದಿ ಬೆಚ್ಚಿತುಂಡ್.[42]

²⁹ಒಮ್ಮ ಏಳ್ ಅಣ್ಣತಮ್ಮಣಂಗ ಇಂಜತ್. ಪೆರಿಯಂವೊಂಗ್ ಮಂಗಲ ಆಚಿ ಅಂವೊಂಗ್ ಮಕ್ಕ ಇಲ್ಲತೆ ಅಂವೊ ಚತ್ತ್ ಪೋಚಿ.

³⁰ದಂಡನೆಯಂವೊ ಅವಳ ಮಂಗಲ ಕಯಿಚತ್ ಅಂವೊಂಗು ಮಕ್ಕ ಆಯಿತ್‌ಲ್ಲೆ, ಅಂವೊ ಸಹ ಚತ್ತ್ ಪೋಚಿ.

³¹ಅನ್ನನೆ ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚಿತ್, ಏಳಾಳು ಮಕ್ಕ ಇಲ್ಲತೆ ಚತ್ತ್ ಪೋಚಿ.

³²ಆಕೀರ್‌ಕ್ ಆ ಪೊಣ್ಣಾಳು ಚತ್ತ್ ಪೋಚಿ.

³³ಅಂದಕ, ಎಲ್ಲಾ ಮನುಷ್ಯಂಗ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪ ಆ ದಿವಸತ್‍ಲ್ ಈ ಪೊಣ್ಣಾಳ್ ಏದ್ ಆಣಾಳ್‌ರ ಪೊಣ್ಣಾಯಿತಿಪ್ಪ? ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚಿತಲ್ಲಾಂದ್ ಎಣ್ಣ್‌ಚಿ.

³⁴ಅದ್ಂಗ್ ಯೇಸು: ಈ ಲೋಕತ್‍ಲ್ ಉಳ್ಳಯಿಂಗ ಮಂಗಲ ಕಯಿಪ.

³⁵ಆಚೇಂಗಿ ಬಪ್ಪಕುಳ್ಳ ಲೋಕತ್‍ಲ್ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪಕ್ ಯೋಗ್ಯತೆ ಉಳ್ಳಯಿಂಗ ಮಂಗಲ ಕಯಿಪದೂ ಇಲ್ಲೆ ಮಂಗಲ ಮಾಡ್‍ಚಿಡ್‌ವದೂ ಇಲ್ಲೆ;

³⁶ಚತ್ತ್ ಪೋಪದು ಇಲ್ಲೆ, ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಚಾವ್‍ಯಿಂಜ ಜೀವವಾಯಿತ್ ಏವ ಮಕ್ಕಳಾಯಿತ್ ದೇವದೂತಂಗಡನೆಕೆ ದೇವಡ ಮಕ್ಕಳಾಯಿತ್‌ಪ್ಪ.

³⁷ಚತ್ತ್ ಪೋನಯಿಂಗ ಜೀವವಾಯಿತ್ ಎದ್ದಿತ್ ಬದ್‍ಕಾವಾಂದ್ ಕತ್ತಿಯಂಡಿಂಜ ಪೊದರ್‌ರ ವಿಷಯತ್‍ನ ಎಣ್ಣುವ ಮೋಶೇರ ಗ್ರಂಥತ್‌ರ ಜಾಗತ್‍ಲ್ ಚಾಯಿತೆ ಎಣ್ಣಿತುಂಡ್. ಎನ್ನನೆ ಎಣ್ಣ್‌ಚೇಂಗಿ, ಅಂವೊ ಒಡೆಯನ, ಅಬ್ರಹಾಮಂಡ ದೇವ, ಇಸಾಕಂಡ ದೇವ, ಯಾಕೋಬಂಡ ದೇವಾಂದ್ ಎಣ್ಣಿತುಂಡ್.[43]

³⁸ಆನಗುಂಡ್, ಅಂವೊ ಚತ್ತಪೋನಯಿಂಗಕ್ ದೇವ ಅಲ್ಲ ಆಚೇಂಗಿ ಜೀವತ್‍ಲ್ ಉಳ್ಳಯಿಂಗಕ್ ದೇವ. ದೇವಕ್ ಎಲ್ಲಾರು ಬದ್‍ಕಿತುಳ್ಳಯಿಂಗಳೇಂದ್ ಎಣ್ಣ್‌ಚಿ.

³⁹ಅದ್‍ನ ಕ್‍ೕಟಿತ್ ನ್ಯಾಯಪ್ರಮಾಣತ್‍ರ ಚೆನ್ನ ಉಪಾದ್ಯಂಗ, ನೀನ್ ಚಾಯಿತೆ ಜವಾಬ್ ಕೊಡ್‍ತಿಯಾಂದ್ ಯೇಸುಕ್ ಎಣ್ಣ್‌ಚಿ.

⁴⁰ಅಲ್ಲಿಂಜಪ್ಪರ ದಾರ್‌ಕು ಯೇಸುನ ಪ್ರಶ್ನೆ ಕ್‍ೕಪಕ್ ದೈರ್ಯ ಇಂಜಿತ್ತ್‌ಲ್ಲೆ.

⁴¹ಪಿಂಞ ಯೇಸು ಅಯಿಂಗಳ ನೋಟಿತ್: ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ, ದಾವೀದಂಡ ಮೋಂವೋಂದ್ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಎಣ್ಣುವದ್ ಎನ್ನನೇಂದ್ ಕ್‍ೕಟತ್?

⁴²ನಾನ್ ನೀಡ ಶತ್ರುವಳ ನೀಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ ನೀನ್ ನಾಡ ಬಲ್‌ತೆ ಬರಿಲ್ ಅಳೆಂದ್, ದೇವ ನಾಡ ಒಡೆಯಂಗ್ ಎಣ್ಣ್‌ಚೀಂದ್ ದಾವೀದ ಪವಿತ್ರಾತ್ಮನಗುಂಡ್ ಎಣ್ಣಿತಲ್ಲ.[44]

⁴³

⁴⁴ದಾವೀದನೇ, ಅಂವೊನ ಒಡೆಯಾಂದ್ ಕಾಕ್‍ವಕ, ಕ್ರಿಸ್ತ, ಅಂವೊಂಡ ಮೋಂವೊನಾಯಿತ್‌ಪ್ಪದ್ ಎನ್ನನೇಂದ್ ಕ್‍ೕಟತ್.

⁴⁵ಎಲ್ಲಾ ಜನಳು ಯೇಸು ತಕ್ಕ್ ಪರಿವಾನ ಕ್‍ೕಟಂಡ್ ಇಪ್ಪಕ, ಯೇಸು ಶಿಷ್ಯಂಗಳ ನೋಟಿತ್:

⁴⁶ಉದ್ದ ಬಟ್ಟೇನ ಇಟ್ಟಂಡ್, ಚತ್ತೆಲ್ ಎಲ್ಲಾರು ಮರ್ಯಾದೆ ಕೊಡ್‌ಕಡ್ ಎಣ್ಣಿಯಂಡ್, ಸಬಾಮಂದಿರತ್‍ಲ್ ಮುಕ್ಯಪಟ್ಟ ಕುರ್ಚಿಲ್ ಅಳ್‌ಪಕ್, ಗದ್ದಾಳತ್‍ಲ್ ಗನಪಟ್ಟ ಜಾಗತ್‍ಲ್ ಇಪ್ಪಕ್ ಕುಶಿಪಟ್ಟಂಡುಂಡ್ ಉಳ್ಳ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ವಿಷಯತ್ ನಿಂಗ ಎಚ್ಚರತ್ ಇರಿ.

⁴⁷ಅಯಿಂಗ ವಿದವೆಯಂಗಡ ಮನೆನ ಚದಿ ಮಾಡಿತ್ ಮುಗ್ಗಿತ್, ಎಲ್ಲಾರು ಕಾಂಬನೆಕೆ ಉದ್ದವಾಯಿತ್ ಪ್ರಾರ್ಥನೆ ಮಾಡ್‌ವ. ಅಯಿಂಗಕ್ ದೇವಡ ಶಿಕ್ಷೆ ದುಂಬ ಕಠಿಣವಾಯಿತ್‌ಪ್ಪಾಂದ್ ಎಣ್ಣ್‌ಚಿ.