Read Kodava ಲೂಕ 21 Bible Online

ಲೂಕ 21 - Kodava bible

ಲೂಕ 21

¹ಯೇಸು ಚೆನ್ನ ಅಪ್ಪರ ನೋಟುವಕ, ಪಣಕಾರಂಗ ದೇವಾಲಯತ್‍ರ ಬಂಡಾರ ಪೊಟ್ಟಿಲ್ ದುಂಬ ದುಡ್ಡ್ ಇಟ್ಟದ್‍ನ ಕಂಡತ್.

²ಅದ್ಂಡ ಪಿಂಞ ಒರ್ ಗರೀಬತಿಯಾನ ವಿದವೆ ದಂಡ್ ತಾಂಬ್ರ ದುಡ್ಡ್‌ನ ಅಲ್ಲಿ ಇಟ್ಟತ್.

³ಯೇಸು ಅಲ್ಲಿ ಉಳ್ಳಯಿಂಗಕ್: ಈ ಗರೀಬತಿಯಾನ ವಿದವೆ ಬೋರೆ ಎಲ್ಲಾಗಿಂಜ ದುಂಬ ಇಟ್ಟತ್‍ೕಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

⁴ಬೋರೆಯಿಂಗೆಲ್ಲಾ ಅಯಿಂಗಡ ದುಂಬ್‍ನ ಐಶ್ವರ್ಯತ್ಂಜ ಕಾಣಿಕೆ ಕೊಡ್‍ತತ್, ಆಚೇಂಗಿ ಈ ವಿದವೆ ತಾಂಡ ಬಡತನತ್‌ಂಜ ಅವಕ್ ಬದ್‍ಕ್‍ವಕ್ ಉಳ್ಳ ಎಲ್ಲಾನ ಇಟ್ಟತ್‍ೕಂದ್ ಎಣ್ಣ್‌ಚಿ.

⁵ಅಂವೊಂಡ ಚೆನ್ನ ಶಿಷ್ಯಂಗ, ಬೆಲೆಯುಳ್ಳ ಕಲ್ಲ್ ಪಿಂಞ ದೇವಕ್ ಅರ್ಪಿಚಿಟ್ಟ ಕಾಣಿಕೆರಗುಂಡ್ ದೇವಾಲಯತ್‍ನ ಚಾಯಿತೆ ಅಲಂಗಾರ ಮಾಡಿತುಳ್ಳದ್‍ನ ನೋಟಿತ್ ಅದ್ಂಡ ವಿಷಯತ್ ತಕ್ಕ್ ಪರ್ಂದತ್.

⁶ಆಚೇಂಗಿ ಯೇಸು ಅಯಿಂಗಕ್, ನಿಂಗ ಕಾಂಬ ಈ ದೇವಾಲಯತ್‍ಲ್, ಒರ್ ಕಲ್ಲ್‌ರ ಮೇಲೆ ಇಂಞೊರ್ ಕಲ್ಲ್ ಇಲ್ಲತನೆಕೆ ಇದ್‍ನೆಲ್ಲ ನಾಶ ಆಯಿಪೋಪ ಕಾಲ ಬಪ್ಪಾಂದ್ ಯೇಸು ಅಯಿಂಗಕ್ ವಿವರಿಚಿಟ್ಟತ್.

⁷ಅದ್ಂಗ್ ಅಯಿಂಗ: ಉಪಾದ್ಯ, ಇದೆಲ್ಲಾ ಎಕ್ಕ ಆಪ? ಅನ್ನನೆ ಬಪ್ಪಕುಳ್ಳ ದಿವಸಕ್ ಗುರ್‌ತ್ ಎಂ‍ತಾಂದ್ ಕ್‍ೕಟತ್.

⁸ಯೇಸು ಅಯಿಂಗಕ್: ನಿಂಗಳ ದಾರೂ ವಂಚನೆ ಮಾಡತನೆಕೆ ಕಾಪಾಡಿಯೊಳಿ, ಎನ್ನಂಗೆಣ್ಣ್‌ಚೇಂಗಿ ದುಂಬ ಜನ ನಾಡ ಪೆದತ್‍ಲ್ ಬಂದಿತ್, ನಾನೇ ಕ್ರಿಸ್ತ, ಕಡೆ ಕಾಲ ಬಾತ್‍ೕಂದ್ ಎಣ್ಣುವ, ಅಯಿಂಗಡ ಬಯ್ಯ ಪೋಕತಿ.

⁹ಯುದ್ದತ್‍ರ ಪಿಂಞ ಕಲಹತ್‍ರ ಸುದ್ದಿನೆಲ್ಲ ಕ್‍ೕಪಂಜಿ ಬೊತ್ತತಿ, ಇದೆಲ್ಲ ಮಿಂಞಲೇ ಆಕಂಡು; ಆಚೇಂಗಿಯು ಅದ್ ಅಂತ್ಯ ಕಾಲವಾಯಿತ್‌ಪ್ಪುಲೆ.

¹⁰ಜನಕ್ ವಿರೋದವಾಯಿತ್ ಜನಳು, ರಾಜ್ಯಕ್ ವಿರೋದವಾಯಿತ್ ರಾಜ್ಯವು ಯುದ್ದ ಮಾಡ್‌ವ;

¹¹ದುಂಬ ಜಾಗತ್‍ಲ್ ಬಲ್ಯ ಬೂಕಂಪ ಆಯಂಡಿಪ್ಪ, ಬರಗಾಲ ಬಪ್ಪ, ಪಬ್ಬ್‌ವ ಕಾಯಿಲ ಬಪ್ಪ, ಬಾನತ್ಂಜ ಬಯಂಕರವಾನ ಘಟನೆ ಪಿಂಞ ಬಲ್ಯ ಗುರ್‍ತ್‍ನ ಕಾಂಬಿರ.

¹²ಇದೆಲ್ಲ ಆಪಕಿಂಜ ಮಿಂಞ, ಈ ಲೋಕತ್‍ರ ಜನ ನನ್ನಗುಂಡ್ ನಿಂಗಳ ಪುಡ್‌ಚಿತ್, ನೊಂಬಲ ಮಾಡಿತ್, ಜೈಲ್‍ಲ್ ಇಟ್ಟಿತ್ ನಿಂಗಳ ತೀರ್ಪ್ ಮಾಡ್‌ವಕಾಯಿತ್ ಸಬಾಮಂದಿರಕ್ ಬಲ್‍ಚಂಡ್ ಪೋಪ. ಅದಲ್ಲತೆ ನಾಡಗುಂಡ್ ಬಲ್ಯ ಅದಿಪತಿಯಂಗಡ ಪಿಂಞ ರಾಜಂಗಡ ಎದಿಕೆ, ಕೊಂಡ್ ಬಂದಿತ್ ನಿಪ್ಪ್‌ಚಿಡುವ.

¹³ಆಚೇಂಗಿಯು, ಇದ್ ನಿಂಗ ಅಯಿಂಗಕ್ ನಾಡ ವಿಷಯ ಎಣ್ಣ್‌ವಕುಳ್ಳ ಸಮಯವಾಯಿತ್‌ಪ್ಪ.

¹⁴ಆನಗುಂಡ್, ಎಂತ ಉತ್ತರ ಕೊಡ್‍ಕಂಡೂಂದ್ ಬೇಜಾರ್ ಮಾಡತೆ ಇಪ್ಪಕ್ ನಿಂಗಡ ಮನಸ್ಸ್‌ನ ತಯಾರ್ ಮಾಡಿಯೊಳಿ.

¹⁵ನಿಂಗಕ್ ವಿರೋದ ಮಾಡ್‌ವ ಒಬ್ಬನು, ನಿಂಗಕ್ ತಿರಿತ್ ತಕ್ಕ್ ಪರಿಯುವಕು, ಎದಿಕೆ ನಿಪ್ಪಕು ಕಯ್ಯತ ತಕ್ಕ್ ಪಿಂಞ ಜ್ಞಾನತ್‍ನ ನಾನ್ ನಿಂಗಕ್ ತಪ್ಪಿ.

¹⁶ನೀಡ ಅಪ್ಪವ್ವಂಗ, ಅಣ್ಣತಮ್ಮಣಂಗ, ನಿಂಗಡ ಬೆಂದ್‌ಕ, ನಿಂಗಡ ಸ್ನೇಹಿತಂಗಳೇ ನಿಂಗಳ ನಿಂಗಕ್ ವಿರೋದವಾಯಿತ್ ಉಳ್ಳಯಿಂಗಡ ಪಕ್ಕ ಒಪ್ಪ್‌ಚಿಡುವ. ನಿಂಗಡಲ್ಲಿ ಚೆನ್ನ ಜನಳ ಸಹ ಕೊಲ್ಲ್‌ಚಿಡುವ.

¹⁷ನಾಡಗುಂಡ್ ಎಲ್ಲಾ ಜನಳು ನಿಂಗಳ ವಿರೋದ ಮಾಡ್‌ವ.

¹⁸ಆಚೇಂಗಿಯು, ನಿಂಗಡ ಮಂಡೆಲುಳ್ಳ ಒರ್ ತಲ್‌ಮಿಯು ನಾಶ ಆಪುಲೆ.

¹⁹ಆಚೇಂಗಿ, ನಿಂಗ ಸ್ತಿರವಾಯಿತ್ ನಿಪ್ಪಕ, ನಿಂಗಡ ಆತ್ಮತ್‌ನ ಕಾಪಾಡ್‍ವಿರ.

²⁰ಯೆರೂಸಲೇಮ್ ಪಟ್ಟಣತ್‍ನ ದುಂಬ ಸೈನ್ಯ ಮೊರೆಬೂವದ್‍ನ ನಿಂಗ ಕಾಂಬಕ, ಅದ್ ಪಳಾಯಿ ಪೋಪ ಕಾಲ ಬೆರಿಯ ಬಾತ್‍ೕಂದ್ ನಿಂಗಕ್ ಗೊತ್ತಿರಡ್.

²¹ಅಕ್ಕ ಯೂದಾಯ ದೇಶತ್‍ಲ್ ಉಳ್ಳಯಿಂಗ ಕುಂದ್‌ರ ಕೊಡಿಕ್ ಓಡಡ್, ಯೆರೂಸಲೇಮ್ ಪಟ್ಟಣತ್‍ಲ್ ಇಪ್ಪಯಿಂಗ ಅಲ್ಲಿಂಜ ಪೊರಮೆ ಪೋಡ್, ಊರ್‌ಲ್ ಉಳ್ಳಯಿಂಗ ಪಟ್ಟಣಕ್ ಪ್ರವೇಶ ಮಾಡತೆ ಇರಡ್.

²²ಎನ್ನಂಗೆಣ್ಣ್‌ಚೇಂಗಿ ದೇವಡ ವಾಕ್ಯತ್‍ಲ್ ಒಳ್‌ದಿತುಳ್ಳದೆಲ್ಲ ಪೂರ್ತಿ ಆಪಕುಳ್ಳ, ದೇವ ಶಿಕ್ಷೆ ತಪ್ಪ ಕಾಲವಾಯಿತಿಪ್ಪ.

²³ಆ ದಿವಸತ್‍ಲ್ ಕೆಲಕರ್ತಿಯಂಗಕೂ, ಕುಂಞಿಕ್ ಪಾಲ್ ಕೊಡ್‍ಪ ಅವ್ವಂಗಕೂ ಅಯ್ಯೋ! ಆ ದಿವಸತ್‍ಲ್ ಈ ಲೋಕತ್‍ಲ್ ಉಳ್ಳ ಜನಕೆಲ್ಲ ಬಲ್ಯ ಕಷ್ಟವು, ಈ ಜನಕ್ ದೇವಡ ಶಿಕ್ಷೆಯು ಆಯಂಡಿಪ್ಪ.

²⁴ಚೆನ್ನ ಜನಳ ಬಾಳ್‍ಕತ್ತಿಯಿಂಜ ಕೊಂದ್‌ರ್‌ವ. ಚೆನ್ನ ಜನಳ ಬೋರೆ ದೇಶಕ್ ಪುಡ್‍ಚಂಡ್ ಪೋಪ. ಯೆಹೂದ್ಯ ಅಲ್ಲತಯಿಂಗಡ ಕಾಲ ಕಡೆ ಅಪಕತ್ತೆನೆ, ಯೆರೂಸಲೇಮ್ ಅನ್ಯ ಜನತ್‍ರ ಅಳುವೆರಗುಂಡ್ ಪಾಳಾಯಿ ಪೋಪ.

²⁵ಇದ್‍ಲ್ಲತೆ ಸೂರ್ಯ ಚಂದ್ರ ನಕ್ಷತ್ರತ್‌ಲ್ ವಿಚಿತ್ರ ಗುರ್‍ತ್‍ನ ಕಾಂಬಕಾಪ. ಗರ್ಜನೆ ಮಾಡಿಯಂಡ್ ಬಪ್ಪ ಸಮುದ್ರತ್‍ರ ತೆರೆ ಪಿಂಞ ಬಿರ್‌ಗಾಳಿಕ್ ಬೂಲೋಕತ್‍ಲ್ ಉಳ್ಳ ದೇಶವೆಲ್ಲ ಬೊತ್ತಿತ್ ಎಂತ ಮಾಡಂಡೂಂದ್ ಗೊತ್ತಾಪುಲೆ.

²⁶ಬೂಲಕತ್‍ಲ್ ನಡ್ಂದಂಡುಳ್ಳ ಕಾರ್ಯತ್‍ನ ಕಂಡಿತ್ ಜನಕ್ ಪೋಡಿಯಾಯಿತ್ ಮಂಡೆ ತಿರಿತ್ ಬೂವ. ಬಾನತ್‍ರ ಪ್ರತಿಯೊರ್ ಶಕ್ತಿಯು ನಡ್‌ಗುವ.

²⁷ಅಕ್ಕ ಮನುಷ್ಯಕುಮಾರ ಮೋಡತ್‍ರ ಮದ್ಯತ್‍ಲ್ ಬಲ್ಯ ಶಕ್ತಿಕೂಡಿಯಂಡ್ ಮಹಿಮೆಲ್ ಬಪ್ಪದ್‍ನ ಅಯಿಂಗೆಲ್ಲಾ ಕಾಂಬ.[45]

²⁸ಇದೆಲ್ಲ ಆಪದ್‍ನ ನಿಂಗ ಕಾಂಬಕ, ಎದ್ದ್ ನಿಂದಿತ್ ಮಂಡೆನ ಕೊಡಿಕ್ ಮಾಡಿತ್ ನಿಲ್ಲಿ, ಎನ್ನಂಗೆಣ್ಣ್‌ಚೇಂಗಿ ನಿಂಗಡ ಬುಡ್‍ಗಡೆ ದಿವಸ ಪಕ್ಕ ಬಾತ್‍ೕಂದ್ ಗೊತ್ತ್ ಮಾಡಿಯೊಳಿ.

²⁹ಇದ್‍ಲ್ಲತೆ ಯೇಸು ಅಯಿಂಗಕ್ ಒರ್ ಕಥೇರ ರೂಪತ್‍ನ ಎಣ್ಣಿ ಕೊಡ್‍ತತ್: ಅತ್ತಿಪಣ್ಣ್ ಮರತ್‍ನ ಪಿಂಞ ಬೋರೆ ಏದ್ ಮರತ್‍ನ ನೋಟಿ.

³⁰ಆ ಮರತ್‍ರ ಎಲ್‌ಕಂಡ ಚಿಗುರುವಕಾಪಕ ಬೇನಿಕಾಲ ಬಪ್ಪಕಾಚೀಂದ್ ಎಣ್ಣುವಿರ.

³¹ಅನ್ನನೆ ಈ ತರತ್‍ರ ಘಟನೆಯೆಲ್ಲ ನಿಂಗ ಕಾಂಬಕಾಪಕ ದೇವಡ ರಾಜ್ಯ ಬಪ್ಪಕಾಚೀಂದ್ ನಿಂಗಕ್ ಗೊತ್ತಾಪ.

³²ಈ ಘಟನೆಯೆಲ್ಲ ಆಪಕ್ ಮಿಂಞ ಈ ಸಂತಾನ ಪಾಳಾಯಿ ಪೋಪುಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

³³ಬಾನ ಬೂಮಿ ಎಲ್ಲಾ ನಾಶ ಆಪ, ಆಚೇಂಗಿ ನಾಡ ತಕ್ಕ್ ನಾಶ ಆಪುಲೆ.

³⁴ನಿಂಗಡ ವಿಷಯತ್‍ಲ್ ಎಚ್ಚರತ್‍ಲ್ ಇರಿ. ನಿಂಗಡ ಸಮಯತ್‍ನೆಲ್ಲ ತಿಂಬಕಾಯಿತ್ ಕುಡಿಪಕಾಯಿತ್ ಪಿಂಞ ಬದ್‍ಕ್‍ರ ವಿಷಯಕಾಯಿತ್ ವ್ಯಸನ ಪಟ್ಟಂಡ್ ಇರತಿ. ಅನ್ನನೆ ಮಾಡಿಯಂಡಿಂಜತೇಂಗಿ, ನಿಂಗ ಗೇನ ಮಾಡತ ಸಮಯತ್‍ಲ್ ಆ ದಿವಸ ಬಂದಿತ್ ನಿಂಗಳ ಪುಡ್‌ಚಿರ್‍ವ.

³⁵ಬೂಲೋಕತ್‍ಲ್ ಉಳ್ಳ ಎಲ್ಲಾ ಜನಡಮೇಲೆ ಇನ್ನನೆ ಬಪ್ಪ.

³⁶ಆನಗುಂಡ್, ಇನ್ನನೆ ನಡ್‍ಪಕುಳ್ಳ ಕಾರ್ಯತ್ಂಜ ನಿಂಗಳ ಕಾಪಾಡ್‌ವಕಾಯಿತ್ ಎಕ್ಕಾಲು ತಯಾರಾಯಿತ್ ಎಲ್ಲಾ ಸಮಯತ್‍ಲ್ ಪ್ರಾರ್ಥನೆ ಮಾಡಿಯಂಡ್ ಇರಂಡು. ಅಕ್ಕ ಮನುಷ್ಯಕುಮಾರಂಡ ಮಿಂಞ ಯೋಗ್ಯತೆ ಉಳ್ಳಯಿಂಗಳಾಯಿತ್ ನಿಪ್ಪಕ್ ಕಯ್ಯು.

³⁷ಯೇಸು ಎಕ್ಕಾಲು ದೇವಾಲಯತ್‍ಲ್ ಬೋದನೆ ಕೊಡ್‌ತಂಡ್, ಬೈಟಾಪಕ ಆಲಿವ್ ಕುಂದ್‌ಕ್ ಪೋಯಿತ್ ದಿನ ಕಯಿಪಯಿಂಜತ್.

³⁸ಪೊಲಾಕಾಪಕಲೆ ದುಂಬ ಜನ ದೇವಾಲಯಕ್ ಪೋಯಿತ್ ಯೇಸುರ ಬೋದನೆನ ಕ್‍ೕಪಕ್ ಬಪ್ಪಯಿಂಜತ್.