Read Kodava ಲೂಕ 22 Bible Online

ಲೂಕ 22 - Kodava bible

ಲೂಕ 22

¹ಪುಳಿಯಿಲ್ಲತ ಒಟ್ಟಿ ತಿಂಬ ಪಸ್ಕ[46] ಎಣ್ಣುವ ನಮ್ಮೆ ಬಪ್ಪಕ್ ಇಂಞು ಚೆನ್ನ ದಿವಸ ಮಾತ್ರ ಇಂಜತ್.

²ಅಕ್ಕ ಮುಕ್ಯ ಯಾಜಕಂಗ, ನ್ಯಾಯಪ್ರಮಾಣನತ್‍ರ ಉಪಾದ್ಯಂಗ ಯೇಸುನ ಪುಡ್‌ಚಿತ್ ಕೊಲ್ಲ್‌ವಕ್ ನೋಟಿಯಂಡ್ ಇಂಜತ್, ಆಚೇಂಗಿಯು ಜನಕ್ ಬೊತ್ತಿಯಂಡಿಂಜತ್.

³ಅಕ್ಕ ಸೈತಾನ, ಯೇಸುರ ಪನ್ನೆರಂಡ್ ಶಿಷ್ಯಂಗಡಲ್ಲಿ ಇಸ್ಕರಿಯೋತ ಎಣ್ಣುವ ಯೂದಂಡ ಮೇಲ್‌ಕ್ ಕೂಡ್‍ಚಿ.

⁴ಅಂವೊ ಮುಕ್ಯ ಯಾಜಕಂಗ ಪಿಂಞ ದೇವಾಲಯತ್‍ರ ಸೇನೆರ ಅದಿಕಾರಿಯಡ ಪಕ್ಕ ಪೋಯಿತ್ ಎನ್ನನೆ ಯೇಸುನ ಕಾಟಿ ಕೊಡುಕಂಡೂಂದ್ ಚರ್ಚೆ ಮಾಡ್‍ಚಿ.

⁵ಅಯಿಂಗ ಕುಶಿಪಟ್ಟಿತ್, ನೀಕ್ ನಂಗ ದುಡ್ಡ್ ತಪ್ಪಾಂದ್ ಎಣ್ಣ್‌ಚಿ.

⁶ಇದ್ಂಗ್ ಇಸ್ಕರಿಯೋತ ಒತ್ತಂಡ್ ಜನಡ ಗುಂಪ್ ಇಲ್ಲತ ಸಮಯತ್‍ಲ್ ಯೇಸುನ ಅಯಿಂಗಕ್ ಕಾಟಿ ಕೊಡ್‍ಪಕುಳ್ಳ ಸಮಯ ನೋಟಿಯಂಡ್ ಇಂಜತ್.

⁷ಕೊರಿಕುಟ್ಟಿನ ಬಲಿ ಕೊಡ್‌ತಿತ್, ಪುಳಿ ಇಲ್ಲತ ಒಟ್ಟಿ ತಿಂಬ ಪಸ್ಕ ನಮ್ಮೆರ ದಿವಸ ಬಾತ್.

⁸ಅಕ್ಕ ಯೇಸು, ಪೇತ್ರ ಪಿಂಞ ಯೋಹಾನನ ಕಾಕುವಂಜಿ: ನಂಗ ತಿಂಬಕಾಯಿತ್ ಪಸ್ಕ ನಮ್ಮೆಕ್ ಉಂಬಕುಳ್ಳದ್‍ನ ತಯಾರ್ ಮಾಡೀಂದ್ ಎಣ್ಣ್‌ಚಿ.

⁹ಅದ್ಂಗ್ ಅಯಿಂಗ: ನಂಗ ಎಲ್ಲಿ ತಯಾರ್ ಮಾಡಂಡೂಂದ್ ನೀಕ್ ಕುಶಿಯುಂಡ್‍ೕಂದ್ ಯೇಸುನ ಕ್‍ೕಟತ್.

¹⁰ಯೇಸು ಅಯಿಂಗಕ್: ನಿಂಗ ಯೆರೂಸಲೇಮ್ ಪಟ್ಟಣಕ್ ಪೋಪಕ ಒರ್ ಮನುಷ್ಯ ಕುಡಿಕೆಲ್ ನೀರ್ ಎಡ್‍ತಂಡ್ ಬಂದಂಡಿಪ್ಪ. ಅಂವೊ ಪೋಪ ಮನೆರ ಒಳ್‍ಕ್ ಅಂವೊಂಡ ಬಯ್ಯಕ್ ಪೋಯಿತ್,

¹¹ಆ ಮನೆರ ಎಜಮಾನನ ನೋಟಿತ್: ನಾನ್ ನಾಡ ಶಿಷ್ಯಂಗಡ ಕೂಡೆ ಪಸ್ಕ ತಿಂಬಕುಳ್ಳ ಜಾಗ ಎಲ್ಲೀಂದ್ ಉಪಾದ್ಯ ಕ್‍ೕಟತ್‍ೕಂದ್ ಎಣ್ಣಿ.

¹²ಅಂವೊ, ನಿಂಗಕ್ ಕೊಡಿಲ್ ಒರ್ ಬಲ್ಯೊರ್ ಎಲ್ಲಾ ಕ್ರಮವಾಯಿತುಳ್ಳ ಕೋಂಬರೆನ ಕಾಟಿತಪ್ಪ; ಅಲ್ಲಿ ನಿಂಗ ತಯಾರ್ ಮಾಡೀಂದ್ ಎಣ್ಣ್‌ಚಿ.

¹³ಅಯಿಂಗ ಪೋಯಿತ್ ಯೇಸು ಎಣ್ಣ್‌ನನೆಕೆ ಎಲ್ಲಾ ಕಾಂಬಂಜಿ ಪಸ್ಕತ್‍ನ ತಯಾರ್ ಮಾಡ್‍ಚಿ.

¹⁴ಆ ಸಮಯ ಬಪ್ಪಕ, ಯೇಸು ಪಿಂಞ ಅಂವೊಂಡ ಪನ್ನೆರಂಡ್ ಅಪೊಸ್ತಲಂಗ ಉಂಬಕ್ ಅಳ್‌ತತ್.

¹⁵ಅಕ್ಕ ಅಂವೊ ಅಯಿಂಗಳ ನೋಟಿತ್: ನಾನ್ ಮರಣತ್‌ರ ಕಷ್ಟ ಅನುಬವಿಚಿಡುವಕ್ ಮಿಂಞ ನಿಂಗಡ ಕೂಡೆ ಈ ಗದ್ದಾಳತ್‍ಲ್ ಉಂಗಂಡೂಂದ್ ದುಂಬ ಕುಶಿಪಟ್ಟಂಡಿಂಜ್.

¹⁶ಈ ಪಸ್ಕತ್‍ರ ಅರ್ಥ ದೇವಡ ರಾಜ್ಯತ್‍ಲ್ ಪೂರ್ತಿ ಆಪಕ್ ಮಿಂಞ, ನಾನ್ ಇದ್‍ನ ಪುನಃ ಉಂಬ್‍ಲೇಂದ್ ಎಣ್ಣ್‌ಚಿ.

¹⁷ಯೇಸು ದ್ರಾಕ್ಷಿರಸತ್‍ರ ಕಪ್ಪ್‌ನ ಎಡ್‌ಪಂಜಿ ದೇವನ ತುದಿಚಿತ್, ಶಿಷ್ಯಂಗಕ್ ಕೊಡ್‌ಪಂಜಿ: ನಿಂಗ ಇದ್‍ನ ಎಡ್‍ತಂಡ್, ನಿಂಗಡಲ್ಲಿ ಪಾಲ್ ಮಾಡಿಯೊಳಿ.

¹⁸ನಾನ್ ದೇವಡ ರಾಜ್ಯತ್‍ಲ್ ಪುದಿಯ ರಸತ್‌ನ ಕುಡಿಪಕತ್ತನೆ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ.

¹⁹ಪಿಂಞ ಯೇಸು ಒಟ್ಟಿನ ಎಡ್‌ಪಂಜಿ ದೇವನ ತುದಿಚಿತ್, ಶಿಷ್ಯಂಗಕ್ ಪೊಳ್‌ಚಿತ್ ಕೊಡ್‌ತಿತ್: ಇದ್ ನಿಂಗಕಾಯಿತ್ ತಪ್ಪ ನಾಡ ತಡಿ, ನನ್ನ ಗೇನ ಮಾಡ್‌ವಕಾಯಿತ್ ಇದ್‍ನ ತಿಂಗಂಡೂಂದ್ ಎಣ್ಣ್‌ಚಿ.

²⁰ಉಂಡಿತ್ ಆನ ಪಿಂಞ, ಅಂವೊ ಅನ್ನನೆ ದ್ರಾಕ್ಷಿರಸತ್‍ರ ಕಪ್ಪ್‌ನ ಎಡ್‍ತಂಡ್: ಇದ್ ನಿಂಗಕಾಯಿತ್ ಬೂಕ್‌ವ ನಾಡ ಚೋರೆನಗುಂಡ್ ಮಾಡ್‍ನ ದೇವಡ ಪುದಿಯ ಒಪ್ಪಂದಾಂದ್[47] ಎಣ್ಣಿತ್ ಅಯಿಂಗಕ್ ಕೊಡ್‍ತತ್.

²¹ಇಕ್ಕ ನೋಟಿ! ನನ್ನ ಕೊಲ್ಲ್‌ವಕ್ ಕಾಟಿ ಕೊಡ್‍ಪಂವೊ ಈ ಕೂಟ್‌ಲ್ ಉಂಡ್.

²²ಮನುಷ್ಯಕುಮಾರ ದೇವ ತೀರ್ಮಾನ ಮಾಡ್‍ನನೆಕೆ ಚತ್ತ್ ಪೋಪ, ಆಚೇಂಗಿ ಅಂವೊನ ಕಾಟಿ ಕೊಡ್‌ಪಂವೊಂಗ್ ಅಯ್ಯೋಂದ್ ಯೇಸು ಎಣ್ಣ್‌ಚಿ.

²³ಇಂತ ಕೆಲಸ ಮಾಡ್‌ವಂವೊ ನಂಗಡ ಕೂಟ್‌ಲ್ ದಾರಾಯಿತಿಕ್ಕೂಂದ್ ಅಯಿಂಗಯಿಂಗಳೇ ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ.

²⁴ಇದ್‍ಲ್ಲತೆ ದಾರ್ ನಂಗಡ ಕೂಟ್‌ಲ್ ಬಲ್ಯಂವೋಂದ್ ಚರ್ಚೆ ಮಾಡ್‌ವಕ್ ಸುರು ಮಾಡ್‍ಚಿ.

²⁵ಯೇಸು ಅಯಿಂಗಳ ನೋಟಿತ್: ಈ ಲೋಕತ್‍ರ ರಾಜಂಗ ಅಯಿಂಗಡ ಜನಡಮೇಲೆ ಅದಿಕಾರ ಮಾಡ್‌ವ; ಅನ್ನನೆ ಆಚೇಂಗಿಯು, ಅಯಿಂಗಳ ಜನಡ ಕೂಟ್‍ಕಾರಾಂದ್ ಕಾಕುವ.

²⁶ನಿಂಗಡಲ್ಲಿ ಅನ್ನನೆ ಇಪ್ಪಕ್ಕಾಗ; ನಿಂಗಡಲ್ಲಿ ಬಲ್ಯಂವೊ ಚೆರಿಯಂವೊನಾಯಿತು, ಅದಿಕಾರ ಉಳ್ಳಂವೊ ಪಣಿಕಾರನಾಯಿತು ಇರಂಡು.

²⁷ದಾರ್ ಬಲ್ಯಂವೊ? ಉಂಬಕ್ ಅಳ್‍ಪಂವೊನಾ ಅಥವ ಸೇವ ಮಾಡ್‍ವಂವೊನಾ? ಉಂಬಕ್ ಅಳ್‍ಪಂವೊ ತಾನೆ! ಅನ್ನನೆ ಇಂಜಿತು ನಾನ್ ನಿಂಗಡ ಮದ್ಯತ್‍ಲ್ ಪಣಿಕಾರನಾಯಿತ್ ಉಂಡಲ್ಲ!

²⁸ನಿಂಗ ಮಾತ್ರ ನಾಡ ಕಷ್ಟತ್‍ಲ್ ನಾಡ ಕೂಡೆ ಎಕ್ಕಾಲು ಇಂಜಯಿಂಗ.

²⁹ಆನಗುಂಡ್, ನಾಡ ಅಪ್ಪ ನಾಕ್ ಒರ್ ರಾಜ್ಯತ್‍ನ ತಂದನೆಕೆ, ನಾನ್ ನಿಂಗಕು ತಪ್ಪಿ.

³⁰ನಾಡ ರಾಜ್ಯತ್‍ಲ್ ನಾಡ ಕೂಡೆ ನಿಂಗ ಉಂಬಿರ, ಕುಡಿಪಿರ. ಇಸ್ರಾಯೇಲ್‍ರ ಪನ್ನೆರಂಡ್ ಕುಲತ್‍ನ ನ್ಯಾಯತೀರ್ಪ್ ಕೊಡ್‍ಪಕ್ ಪನ್ನೆರಂಡ್ ಸಿಂಹಾಸನತ್‍ರ ಮೇಲೆ ಒಬ್ಬೊಬ್ಬನು ಅಳ್‌ಪಿರಾಂದ್ ಅಯಿಂಗಕ್ ಎಣ್ಣ್‌ಚಿ.

³¹ಪಿಂಞ ಅಂವೊ ಸೀಮೋನನ ನೋಟಿತ್: ಸೀಮೋನನೇ, ಒರು ಬೂಮಿಕಾರ, ಗೋದಿನ ತವುಡ್ಂಜ ಬೋರೆ ಮಾಡ್‌ವನೆಕೆ ನಿಂಗಳ ಪರೀಕ್ಷೆ ಮಾಡ್‌ವಕ್ ಸೈತಾನ ಅನುಮತಿ ಕ್‍ೕಟಿಯತ್.

³²ಆಚೇಂಗಿ ನೀಕ್ ನಾಡ ಮೇಲೆ ಉಳ್ಳ ನಂಬಿಕೆ ಪಾಳಾಯಿ ಪೋಕತನೆಕೆ ನಾನ್ ನೀಕಾಯಿತ್ ಪ್ರಾರ್ಥನೆ ಮಾಡಿಯೆ. ನೀನ್ ಪಶ್ಚಾತಾಪ ಪಟ್ಟಿತ್ ಪುನಃ ನಾಡ ಪಕ್ಕ ಬಪ್ಪಕ ನೀಡ ಅಣ್ಣತಮ್ಮಣಂಗಳ ಸ್ತಿರಪಡ್‍ತ್‍ೕಂದ್ ಎಣ್ಣ್‌ಚಿ.

³³ಅದ್ಂಗ್ ಪೇತ್ರ: ಆಚೇಂಗಿ ಒಡೆಯನೇ, ನಾನ್ ನೀಡ ಕೂಡೆ ಜೈಲ್‌ಕ್ ಪೋಪಕು, ಚತ್ತ್ ಪೋಪಕು ತಯಾರಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ.

³⁴ಅದ್ಂಗ್ ಯೇಸು: ಪೇತ್ರ, ನಾನ್ ಒಂದ್ ಎಣ್ಣ್‌ವಿ, ಇಂದ್ ಮಲ್ಲಂಗೋಳಿ ಕೂವಕ್ ಮಿಂಞ, ನಾಡ ವಿಷಯತ್‍ಲ್ ನೀನ್ ಮೂಂದ್ ಕುರಿ ಇಂವೊನ ನಾಕ್ ಗೊತ್ತಿಲ್ಲೇಂದ್ ಎಣ್ಣುವಿಯಾಂದ್ ಎಣ್ಣ್‌ಚಿ.

³⁵ಇಂಞು ಅಂವೊ ಅಯಿಂಗಕ್: ನಿಂಗಳ ನಾನ್ ಪಣ ಚೀಲ, ಸಾಮಾನ್‍ರ ಚೀಲ ಪಿಂಞ ಕಾಲ್‌ಕ್ ಎಕ್ಕಡ ಇಲ್ಲತೆ ಅಯಿಚಿತ್ ಇಪ್ಪಕ, ನಿಂಗಕ್ ಎಂತಾಚೇಂಗಿ ಕಮ್ಮಿಯಾಚಾಂದ್ ಯೇಸು ಕ್‍ೕಟತ್. ಅದ್ಂಗ್: ಒಂದು ಕಮ್ಮಿಯಾಯಿತ್‌ಲ್ಲೇಂದ್ ಅಯಿಂಗ ಎಣ್ಣ್‌ಚಿ.

³⁶ಅದ್ಂಗ್ ಯೇಸು: ಆಚೇಂಗಿ ಇಕ್ಕ, ನಿಂಗಕ್ ಪಣ ಚೀಲ ಇಂಜತೇಂಗಿ ಅದ್‍ನ ಎಡ್‌ತೊಳಿ, ಸಾಮಾನ್‍ರ ಚೀಲತ್‍ನ ಎಡ್‌ತೊಳಿ. ದಾರ್‌ಕ್ ಕತ್ತಿ ಇಲ್ಲೆ ಅಯಿಂಗ ಅಯಿಂಗಡ ಪಕ್ಕ ಉಳ್ಳ ಒರ್ ಕೋಟ್‍ನ ಮಾರಿತ್ ಒರ್ ಕತ್ತಿನ ಎಡ್‌ತೊಳಿ.

³⁷ಎನ್ನಂಗ್ ಎಣ್ಣ್‌ಚೇಂಗಿ, ಅಂವೊ ಕ್ರೂರ ಪಾಪ ಮಾಡ್‍ನ ಕಳ್ಳಂಗಡ ಕೂಟ್‌ಲ್ ಒಬ್ಬನಾಯಿತ್ ಕಾಕ್‍ವಾಂದ್ ಒಳ್‍ದಿತುಳ್ಳ ದೇವಡ ವಾಕ್ಯ ಪೂರ್ತಿ ಆಂಡೂಂದ್ ಎಣ್ಣ್‌ವಿ. ನಾಡ ವಿಷಯವೆಲ್ಲ ಪೂರ್ತಿಯಾಪ ಕಾಲ ಬಾತ್‍ೕಂದ್ ಎಣ್ಣ್‌ಚಿ[48].

³⁸ಅದ್ಂಗ್ ಅಂವೊಂಡ ಶಿಷ್ಯಂಗ: ಒಡೆಯನೇ, ಇಲ್ಲಿ ಇಕ್ಕ ದಂಡ್ ಕತ್ತಿ ಉಂಡ್‍ೕಂದ್ ಎಣ್ಣುವಕ, ಅಂವೊ: ಅದ್ ಮದೀಂದ್ ಯೇಸು ಎಣ್ಣ್‌ಚಿ.

³⁹ಪಿಂಞ ಯೇಸು ಎದ್ದಿತ್, ಅಂವೊ ಎಕ್ಕಾಲು ಮಾಡ್‌ವ ಪದ್ದತಿರ ಪ್ರಕಾರ ಆಲಿವ್ ಕುಂದ್‌ಕ್ ಪೋಚಿ. ಅಂವೊಂಡ ಶಿಷ್ಯಂಗಳು ಬಯ್ಯಕ್ ಪೋಚಿ.

⁴⁰ಅಲ್ಲಿ ಎತ್ತ್‌ವಕ, ಯೇಸು ಅಯಿಂಗಳ ನೋಟಿತ್: ಸೋದನೆಲ್ ಬೂವತನೆಕೆ ಪ್ರಾರ್ಥನೆ ಮಾಡಿಯಂಡಿರೀಂದ್ ಎಣ್ಣ್‌ಚಿ.

⁴¹ಯೇಸು, ಒರ್ ಕಲ್ಲ್ ಎರಿವ ದೂರಕ್ ಅಪ್ಪರ ಪೋಯಿತ್, ಮೊಣಕಾಲ್ ಇಟ್ಟಿತ್:

⁴²ಅಪ್ಪ, ನೀಕ್ ಚಿತ್ತ ಉಂಡೇಂಗಿ ಈ ಕಷ್ಟತ್‍ರ ಪಾತ್ರ ನನ್ನ ಬುಟ್ಟಿತ್ ಪೋಪಕ್ ಮಾಡ್; ಆಚೇಂಗಿಯು ನಾಡ ಚಿತ್ತ ಅಲ್ಲ ನೀಡ ಚಿತ್ತವೇ ಆಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ.

⁴³ಅಕ್ಕ ಒರ್ ದೇವದೂತ ಬಂದಿತ್ ಅಂವೊನ ಬಲಪಡ್‍ತ್‍ಚಿ.

⁴⁴ಅಂವೊ ದುಂಬ ಮನಸ್ಸ್ ಕಷ್ಟಪಟ್ಟಿತ್ ಬೇಜಾರತ್‍ಲ್ ಪ್ರಾರ್ಥನೆ ಮಾಡ್‌ವಕಾಪಕ, ಯೇಸುರ ಬೆವರ್ ಚೋರೆರ ತುಳಿಯಾಯಿತ್ ನೆಲಕ್ ಬುದ್ದಂಡಿಂಜತ್.

⁴⁵ಅಂವೊ ಪ್ರಾರ್ಥನೆ ಮಾಡಿತ್ ಆನ ಪಿಂಞ ಎದ್ದಿತ್, ತಾಂಡ ಶಿಷ್ಯಂಗಡ ಪಕ್ಕ ಬಪ್ಪಕ, ಅಯಿಂಗೆಲ್ಲ ವೇದನೆಲ್ ಚೋತ್ ಪೋಯಿತ್ ವರಿಯಂಡಿಪ್ಪದ್‍ನ ಕಂಡಿತ್:

⁴⁶ನಿಂಗ ಎನ್ನಂಗ್ ವರಿಯಂಡುಳ್ಳಿರ? ಸೋದನೆಲ್ ಬೂವತನೆಕೆ ಎದ್ದಿತ್ ಪ್ರಾರ್ಥನೆ ಮಾಡೀಂದ್ ಎಣ್ಣ್‌ಚಿ.

⁴⁷ಅಂವೊ ತಕ್ಕ್ ಪರ್‌ದಂಡ್ ಇಪ್ಪಕಾಪಕ ಜನಡ ಗುಂಪ್ ಬಾತ್. ಪನ್ನೆರಂಡ್ ಶಿಷ್ಯಂಗಡಲ್ಲಿ ಒಬ್ಬನಾನ ಯೂದ ಆ ಗುಂಪ್‍ರ ಮಿಂಞತ್‍ಲ್ ಇಂಜತ್. ಅಂವೊ ಯೇಸುಕ್ ಮುತ್ತ್‌ಕೊಡ್‌ಪಕ್ ಯೇಸುರ ಪಕ್ಕ ಪೋಚಿ.

⁴⁸ಅಕ್ಕ ಯೇಸು: ಯೂದ, ನೀನ್ ಮುತ್ತ್ ತಂದಿತ್ ಮನುಷ್ಯಕುಮಾರನ ಎನ್ನನೆ ಕಾಟಿ ಕೊಡ್‍ಪಿಯಾಂದ್ ಕ್‍ೕಟತ್.

⁴⁹ಅಂವೊಂಡ ಬಯ್ಯ ನಿಂದಂಡಿಂಜ ಶಿಷ್ಯಂಗಕ್, ಎಂತಾಪಾಂದ್ ಗೊತ್ತಾನಗುಂಡ್: ಕತ್ತಿಲ್ ಪೊಯ್ಯುವದಾಂದ್ ಯೇಸುನ ಕ್‍ೕಟತ್.

⁵⁰ಅನ್ನನೆ ಯೇಸುರ ಕೂಟ್‌ಲ್ ಒಬ್ಬ, ಕತ್ತಿ ಎಡ್‌ಪಂಜಿ ಮಹಾ ಯಜಕಂಡ ಆಳ್‍ರ ಕೆಮಿನ ಕೆತ್ತಿರ್‌ತ್.

⁵¹ಅಕ್ಕ ಯೇಸು: ಇಚ್ಚಕ್‌ ಮದಿ, ನಿಪ್ಪ್‌ಚಿಡೀಂದ್ ಎಣ್ಣಿತ್, ಅಂವೊಂಡ ಕೆಮಿನ ಮುಟ್ಟುವಂಜಿ ಅಂವೊನ ವಾಸಿ ಮಾಡ್‍ಚಿ.

⁵²ಅಲ್ಲಿಂಜ ಯೇಸು ಅಂವೊನ ಪುಡಿಪಕ್ ಬಂದ ಮುಕ್ಯ ಯಾಜಕಂಗಕು, ದೇವಾಲಯತ್‍ರ ಸೇನೆರ ಅದಿಪತಿಯಂಗಕು ಪಿಂಞ ಯೆಹೂದ್ಯಂಗಡ ಬಲ್ಯಯಿಂಗಕು: ಒರ್ ಕಳ್ಳನ ಪುಡಿಪಕ್ ಬಂದನೆಕೆ ಕತ್ತಿ ಪಿಂಞ ಕೋಲ್‍ನ ಎಡ್‍ತಂಡ್ ನನ್ನ ಪುಡಿಪಕ್ ಬಂದಿತುಳ್ಳಿರಲ್ಲ.

⁵³ನಾನ್ ದಿನಾಲು ದೇವಾಲಯತ್‍ಲ್ ಇಂಜಲ್ಲ, ಅಕ್ಕ ನಿಂಗ ನನ್ನ ಪುಡಿಪಕ್ ಕಯಿಂಜಿತ್‌ಲ್ಲೆ; ಆಚೇಂಗಿ, ಇರ್‌ಟ್ ಆಳಿಯಂಡುಳ್ಳಗುಂಡ್, ಇದ್ ನಿಂಗ ಕ್ರಿಯೆ ಮಾಡ್‌ವಕುಳ್ಳ ಕಾಲಾಂದ್ ಯೇಸು ಎಣ್ಣ್‌ಚಿ.

⁵⁴ಅಯಿಂಗ ಯೇಸುನ ಪುಡ್‍ಚಂಡ್ ಮಹಾ ಯಾಜಕಂಡ ಮನೆಕ್ ಕೊಂಡ್ ಪೋಚಿ. ಪೇತ್ರ ದೂರತ್‍ಲ್ ಅಯಿಂಗಡ ಬಯ್ಯತ್ ಪೋಚಿ.

⁵⁵ಚೆನ್ನ ಜನ ಆ ಮುಂದ್ ಕಯ್ಯಾಲೆರ ಮದ್ಯತ್‍ಲ್ ತಿತ್ತ್ ಗುಡ್ಡೆ ಇಟ್ಟಿತ್ಂಜತ್. ಅದ್ಂಡ ಸುತ್ತ್ ಅಳ್‍ತಂಡಿಂಜ ಆ ಜನಡ ಗುಂಪ್‌ಲ್ ಪೋಯಿತ್ ಅಯಿಂಗಡ ಕೂಡೆ ಪೇತ್ರನು ಅಳ್‌ತತ್.

⁵⁶ಅಕ್ಕ ಒರ್ ಪಣಿಕರ್ತಿ ಆ ತಿತ್ತ್ ಗುಡ್ಡೆರ ಗುಂಪ್‌ಲ್ ಪೇತ್ರ ಅಳ್‌ತಂಡಿಪ್ಪಾನ ಕಂಡಿತ್, ಅಂವೊಂಡ ಮೂಡ್‍ನ ಚಾಯಿ ನೋಟ್‌ವಂಜಿ: ಈ ಮನುಷ್ಯ ಯೇಸುರ ಕೂಡೆ ಇಂಜಂವೋಂದ್ ಎಣ್ಣ್‌ಚಿ.

⁵⁷ಅದ್ಂಗ್ ಪೇತ್ರ: ಮೂಡಿ, ನಾಕ್ ಅಂವೊನ ಗೊತ್ತ್‌ಲ್ಲೇಂದ್ ಎಣ್ಣ್‌ಚಿ.

⁵⁸ಚೆನ್ನ ನೇರ ಕಯಿಂಜ ಪಿಂಞ ಇಂಞೊಬ್ಬ ಬಂದಿತ್: ನೀನ್ ಕೂಡೆ ಅಂವೊಂಡ ಕೂಟ್‌ಲ್ ಒಬ್ಬನೇಂದ್ ಎಣ್ಣ್‌ಚಿ. ಅದ್ಂಗ್ ಪೇತ್ರ: ಮನುಷ್ಯನೇ, ನಾನ್ ಅಲ್ಲಾಂದ್ ಎಣ್ಣ್‌ಚಿ.

⁵⁹ಸುಮಾರ್ ಒರ್ ಮಣಿ ನೇರ ಕಯಿಂಜ ಪಿಂಞ, ಇಂಞೊಬ್ಬ ಪೇತ್ರನ ನೋಟಿತ್: ನೇರಾಯಿತ್ ಇಂವೊನು ಅಯಿಂಗಡ ಕೂಟ್‌ಲ್ ಇಂಜತ್, ಎನ್ನಂಗೆಣ್ಣ್‌ಚೇಂಗಿ ಇಂವೊ ಗಲಿಲಾಯಕ್ ಕೂಡ್‍ನಂವೊನೇಂದ್ ಎಣ್ಣ್‌ಚಿ.

⁶⁰ಅಕ್ಕ ಪೇತ್ರ: ಮನುಷ್ಯನೇ, ನೀನ್ ಎಂತ ತಕ್ಕ್ ಪರ್‌ದಂಡುಳ್ಳಿಯಾಂದ್ ನಾಕ್ ಗೊತ್ತಿಲ್ಲೇಂದ್ ಎಣ್ಣುವಕ ಮಲ್ಲಂಗೋಳಿ ಕೂಂದತ್.

⁶¹ಆ ಸಮಯತ್‍ಲ್ ಒಡೆಯ ತಿರ್‌ಗಿತ್ ಪೇತ್ರನ ನೇರೆ ನೋಟ್‌ಚಿ. ಮಲ್ಲಂಗೋಳಿ ಕೂವಕ್ ಮಿಂಞ ನೀನ್ ಮೂಂದ್ ಕುರಿ ನನ್ನ ಗೊತ್ತ್‌ಲ್ಲೇಂದ್ ಎಣ್ಣುವಿಯಾಂದ್ ಒಡೆಯ ಎಣ್ಣ್‌ನದ್ ಅಕ್ಕಲೆ ಗೇನ ಬಾತ್.

⁶²ಪೇತ್ರ ಪೊರಮೆ ಪೋಪಂಜಿ ದುಃಖಿಚಿಟ್ಟಂಡ್ ಮೊರಟತ್.

⁶³ಯೇಸುನ ನೋಟಿಯಂಡಿಂಜ ಸಿಪಾಯಿಯಂಗ ಯೇಸುನ ಪೊಜ್ಜಿತ್, ಹಿಯಾಳ್‌ಚಿಟ್ಟತ್. ಅಂವೊಂಡ ಕಣ್ಣ್‌ನ ಕೆಟ್ಟಿತ್ ಪೊಜ್ಜಿತ್, ದಾರ್ ನಿನ್ನ ಪೊಜ್ಜತ್? ಅದ್‍ನ ನಂಗಕ್ ಪ್ರವಾದನೆಯಾಯಿತ್ ಎಣ್ಣ್‍ೕಂದ್ ಕ್‍ೕಪಕಿಂಜತ್.

⁶⁴

⁶⁵ಅದಲ್ಲತೆ ಇಂಞು ದುಂಬ ದೂಷಣೆ ತಕ್ಕ್ ಪರ್ಂದಂಡ್ ಇಂಜತ್.

⁶⁶ಪೊಲಾಕ ಆಪಕ ಯೆಹೂದ್ಯಂಗಡ ಪೆರಿಯಯಿಂಗಳು, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು, ಮುಕ್ಯ ಯಾಜಕಂಗಳು ಒಕ್ಕಚೆ ಕೂಡಿತ್ ಯೇಸುನ ಅಯಿಂಗಡ ಆಲೋಚನೆ ಸಬೇಕ್ ಕಾಕಿಯಂಡ್ ಪೋಯಿತ್ ನಿಪ್ಪ್‌ಚಿಟ್ಟಿತ್:

⁶⁷ನೀನ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನಾಂದ್[49] ನಂಗಕ್ ಎಣ್ಣ್‍ೕಂದ್ ಎಣ್ಣ್‌ಚಿ. ಅದ್ಂಗ್ ಯೇಸು: ನಾನ್ ನಿಂಗಕ್ ಎಂತ ಎಣ್ಣ್‌ಚೇಂಗಿಯು ನಿಂಗ ನಂಬುಲೆ.

⁶⁸ಇದ್‍ಲ್ಲತೆ, ನಾನ್ ನಿಂಗಳ ಎಂತಾಚೇಂಗಿ ಕ್‍ೕಟತೇಂಗಿಯು ನಿಂಗ ನಾಕ್ ಉತ್ತರ ತಪ್ಪುಲೆ.

⁶⁹ಆಚೇಂಗಿ ಇಕ್ಕಯಿಂಜ ಈ ಮನುಷ್ಯಕುಮಾರ ಸರ್ವಶಕ್ತನಾನ ದೇವಡ ಬಲ್‌ತೆ ಬರಿಲ್ ಅಳ್‌ಪಾಂದ್ ಎಣ್ಣ್‌ಚಿ.[50]

⁷⁰ಅಕ್ಕ: ನೀನ್ ನೇರಾಯಿತು ದೇವಡ ಮೋಂವೊನಾಂದ್ ಕ್‍ೕಟತ್; ಅದ್ಂಗ್ ಅಂವೊ: ನಿಂಗ ಎಣ್ಣ್‌ನನೆಕೇಂದ್ ಎಣ್ಣ್‌ಚಿ.

⁷¹ಅಯಿಂಗ: ನಂಗಕ್ ಇಂಞು ಬೋರೆ ಸಾಕ್ಷಿ ಏದ್ ಬೋಂಡು? ಇಂವೊಂಡ ಬಾಯಿಂಜೆಲೇ ನಂಗೆಲ್ಲ ಕ್‍ೕಟತಲ್ಲಾಂದ್ ಅಯಿಂಗ ಎಣ್ಣ್‌ಚಿ.