Read Kodava ಲೂಕ 23 Bible Online

ಲೂಕ 23 - Kodava bible

ಲೂಕ 23

¹ಪಿಂಞ ಅಲ್ಲಿ ಇಂಜಯಿಂಗೆಲ್ಲ, ಯೇಸುನ ಪಿಲಾತ ಎಣ್ಣುವ ಅದಿಪತಿರ ಪಕ್ಕ ಕಾಕಿಯಂಡ್ ಪೋಚಿ.

²ಅಲ್ಲಿ ಯೇಸುರ ಮೇಲೆ ಕುತ್ತಪರಿವಕ್ ಸುರು ಮಾಡ್‍ಚಿ. ಇಂವೊ, ಕೈಸರಂಗ್ ಕಂದಾಯ ಕೊಡ್‌ಕತಿ, ನಾನೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಎಣ್ಣುವ ಯೆಹೂದ್ಯಂಗಡ ರಾಜಾಂದ್ ಎಣ್ಣಿತ್, ಜನಡ ಮನಸ್ಸ್‌ನ ಕಲಹ ಮಾಡಂಡೂಂದ್ ಪಾಳ್ ಮಾಡಿಯಂಡ್ ಇಂಜದ್‍ನ ನಂಗ ಕಂಡತ್‍ೕಂದ್ ಎಣ್ಣ್‌ಚಿ.

³ಆನಗುಂಡ್ ಪಿಲಾತ: ನೀನ್ ಯೆಹೂದ್ಯಂಗಡ ರಾಜನಾಂದ್ ಕ್‍ೕಟತ್. ಅಂವೊಂಗ್ ಯೇಸು: ನೀನ್ ಎಣ್ಣ್‌ನನೆಕೆ, ಅಕ್ಕೂಂದ್ ಎಣ್ಣ್‌ಚಿ.

⁴ಅಕ್ಕ ಪಿಲಾತ: ಮುಕ್ಯ ಯಾಜಕಂಗಕು ಪಿಂಞ ಜನಡ ಗುಂಪ್‌ಕು, ನಾನ್ ಅಂವೊನ ತೀರ್ಪ್ ಮಾಡ್‌ವಕ್, ಅಂವೊಂಡ ಮೇಲೆ ಒರ್ ತಪ್ಪು ಕಾಂಬ್‍ಲೇಂದ್ ಎಣ್ಣ್‌ಚಿ.

⁵ಆಚೇಂಗಿ ಅಯಿಂಗ ಇಂಞು ಜೋರಾಯಿತ್: ಇಂವೊ ಗಲಿಲಾಯತ್ಂಜ ಇಲ್ಲಿಕತ್ತನೆ ಯೂದಾಯ ಸೀಮೆಯೆಲ್ಲ ಇಂವೊಂಡ ಬೋದನೆಲ್ ಜನಡ ಮನಸ್ಸ್‌ನ ಕಲಹ ಮಾಡ್‌ವಕಾಯಿತ್ ಪಾಳ್ ಮಾಡಿಯಂಡ್ ಉಂಡ್‍ೕಂದ್ ಎಣ್ಣಿಯಂಡಿಂಜತ್.

⁶ಇದ್‍ನ ಕ್‍ೕಟ ಪಿಂಞ ಪಿಲಾತ ಅದಿಪತಿ ಇಂವೊ ಗಲಿಲಾಯತ್‍ರ ಮನುಷ್ಯನಾಂದ್ ಕ್‍ೕಟತ್?

⁷ಯೇಸು, ರಾಜನಾನ ಹೆರೋದ ಆಳಿಯಂಡಿಂಜ ಜಾಗತ್ಂಜ ಬಾತ್‍ೕಂದ್ ಗೊತ್ತಾನ ಪಿಂಞ ಪಿಲಾತ ರಾಜ, ಆ ಸಮಯತ್‍ಲ್ ಯೆರೂಸಲೇಮ್‍ಲ್ ಇಂಜ ಹೆರೋದ ರಾಜಂಡ ಪಕ್ಕ ಯೇಸುನ ಅಯಿಚತ್.

⁸ಹೆರೋದ ಯೇಸುರ ವಿಷಯತ್‍ನ ದುಂಬ ಕ್‍ೕ‍ಟಿತ್ಂಜತ್. ಯೇಸು ಮಾಡ್‍ನ ಅದ್ಬುತ ಕಾರ್ಯತ್‍ನ ನೋಟ್‍ವಕಾಯಿತ್ ದುಂಬ ನಿರಿಕ್ಷೇಲ್ ಇಂಜತ್. ಅಂವೊನ ಕಾಂಗಂಡೂಂಡ್ ದುಂಬ ದಿವಸತ್ಂಜ ಪಾರಕಾತಂಡ್ ಇಂಜತ್. ಅದ್ಂಗ್ ರಾಜನಾನ ಹೆರೋದ ಯೇಸುನ ಕಾಂಬಕ ದುಂಬ ಕುಶಿಪಟ್ಟತ್.

⁹ಹೆರೋದ, ಯೇಸುಕ್ ದುಂಬ ಪ್ರಶ್ನೆ ಇಟ್ಟತ್. ಆಚೇಂಗಿ ಯೇಸು ಒಂದಾಂಗು ಉತ್ತರ ಕೊಡ್‍ತಿತ್‌ಲ್ಲೆ. ಮುಕ್ಯ ಯಾಜಕಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಅಲ್ಲಿ ನಿಂದಂಡ್ ಯೇಸುರ ಮೇಲೆ ಜೋರಾಯಿತ್ ಕುತ್ತ ಪರ್ಂದಂಡಿಂಜತ್.

¹⁰ಕಡೇಕ್ ಹೆರೋದ ಪಿಂಞ ಅಂವೊಂಡ ಸಿಪಾಯಿಯ ಯೇಸುನ ಪರಿಹಾಸ ಮಾಡಿತ್ ಕಮ್ಮಿ ತರತ್‍ಲ್ ನಡ್‍ತ್‍ಚಿ. ಯೇಸುಕ್ ಚಾಯುಳ್ಳ ಮಿನ್ನುವ ಬಟ್ಟೇನ ಇಟ್ಟಿತ್ ಪಿಲಾತಂಡ ಪಕ್ಕ ಅಯಿಚತ್.

¹¹

¹²ವೈರಿಯಾಯಿತ್ಂಜ ಪಿಲಾತ ಪಿಂಞ ಹೆರೋದ, ಆ ದಿವಸತ್ಂಜ ಸ್ನೇಹಿತಂಗಳಾಚಿ.

¹³ಪಿಲಾತ, ಮುಕ್ಯ ಯಾಜಕಂಗಳ, ಅದಿಕಾರಿಯಳ ಪಿಂಞ ಜನಳ ಕಾಕುವಂಜಿ ನಿಂಗ ಇಂವೊನ ನಾಡ ಪಕ್ಕ ಕಾಕಿಯಂಡ್ ಬಂತ್,

¹⁴ಇಂವೊ ಜನಳ ಕಲಹ ಮಾಡಂಡೂಂದ್ ಪಾಳ್ ಬಟ್ಟೇಕ್ ಕಾಕಿಯಂಡ್ ಪೋಯಂಡ್ ಉಂಡ್‍ೕಂದ್ ಎಣ್ಣಿರಲ್ಲ, ಆಚೇಂಗಿ ಇಂವೊಂಗ್ ನಾನ್ ನಿಂಗಡ ಮಿಂಞತ್‍ಲ್ ಪ್ರಶ್ನೆ ಇಟ್ಟಿಯೆ, ಅಂತು ನಿಂಗ ಇಂವೊ ಇಂತದೆಲ್ಲ ಮಾಡ್‍ಚೀಂದ್ ಕುತ್ತಪರ್ಂದನೆಕೆ ನಾನ್ ಇಂವೊಂಡ ಮೇಲೆ ಒರ್ ತಪ್ಪು ಕಂಡ್‌ಪುಡಿಪಕ್ ಕಯಿಂಜಿತ್‌ಲ್ಲೆ.

¹⁵ಹೆರೋದ ಸಹ ಇಂವೊಂಡ ಮೇಲೆ ಒರ್ ತಪ್ಪು ಕಂಡ್‌ಪುಡಿಕತೆ ಪುನಃ ನಾಡ ಪಕ್ಕ ಅಯಿಚತ್. ಕೊಲ್ಲ್‌ವಂತ ಒರ್ ತಪ್ಪು ಈ ಮನುಷ್ಯ ಮಾಡಿತ್‌ಲ್ಲೆ.

¹⁶ಆನಗುಂಡ್ ಅಂವೊನ ಕೊರಡ್‍ಲ್ ಪೊಯ್ಯುವಂಜಿ, ನಾನ್ ಅಂವೊನ ಬುಟ್ಟ್‌ರ್‍ವೀಂದ್ ಎಣ್ಣ್‌ಚಿ.

¹⁷ಪಸ್ಕ ನಮ್ಮೆಲ್ ಜನಳ ಕ್‍ೕಪಂಜಿ ಜೈಲ್‍ಲ್ ಉಳ್ಳ ಒರ್ ಕೈದಿನ ಬುಡ್‌ತ್‌ವದ್ ಪಿಲಾತಂಡ ಪದ್ದತಿಯಾಯಿತ್ಂಜತ್[51].

¹⁸ಆಚೇಂಗಿ ಜನ ಎಲ್ಲಾ: ಯೇಸುನ ಕೊಲ್ಲ್! ಬರಬ್ಬನ ನಂಗಕ್ ತಾಂದ್ ಜೋರಾಯಿತ್ ಕೂತ್ ಕೊಡ್‍ತತ್.

¹⁹ಬರಬ್ಬ ಎಣ್ಣ್‌ವಂವೊ ಯೆರೂಸಲೇಮ್‍ಲ್ ಕಲಹ ಮಾಡಿತ್, ಕಲಹತ್‌ಲ್ ಒಬ್ಬನ ಕೊಲೆ ಮಾಡಿತ್ ಜೈಲ್‍ಲ್ ಇಂಜತ್.

²⁰ಪಿಲಾತಂಗ್ ಯೇಸುನ ಬುಡ್‍ಗಡೆ ಮಾಡಂಡೂಂದ್ ಮನಸ್ಸ್ ಇಂಜಗುಂಡ್, ಇಂಞೊಮ್ಮ ಜನಡ ಪಕ್ಕ ಪೇಚಾಡ್‍ಚಿ,

²¹ಆಚೇಂಗಿ, ಜನಡ ಗುಂಪು, ಅಂವೊನ ಶಿಲುಬೇಕ್[52] ಇಡೀ! ಅಂವೊನ ಶಿಲುಬೇಕ್ ಇಡೀಂದ್ ಪುನಃ ಜೋರಾಯಿತ್ ಕೂತ್ ಕೊಡ್‍ತತ್.

²²ಮೂಂದನೆ ಕುರಿ: ಆಚೇಂಗಿ ಇಂವೊ ಎಂತ ತಪ್ಪ್ ಮಾಡ್‍ಚೀಂದ್ ಪಿಲಾತ ಕ್‍ೕಟತ್? ಇಂವೊನ ಕೊಲ್ಲ್‌ವಂತ ಒರ್ ತಪ್ಪು ನಾನ್ ಇಂವೊಂಡಲ್ಲಿ ಕಂಡಂಡಿಲ್ಲೆ. ಆನಗುಂಡ್ ಅಂವೊನ ಪೊಯ್ಯುವಂಜಿ, ನಾನ್ ಅಂವೊನ ಬುಟ್ಟ್‌ರ್‍ವೀಂದ್ ಎಣ್ಣ್‌ಚಿ.

²³ಮಿಂಞಕಿಂಜ ಜೋರಾಯಿತ್ ಇಂವೊನ ಶಿಲುಬೇಕ್ ಇಡಿ ಎಣ್ಣಿಯಂಡ್ ಜನ ಕೂತ್ ಕೊಡ್‌ತಂಡ್ ಇಂಜತ್. ಅನ್ನನೆ ಅಯಿಂಗ ಜೋರ್ ಮಾಡ್‍ನಗುಂಡ್ ಅಯಿಂಗ ಗೆದ್ದ್‌ರ್‌ತ್.

²⁴ಕಡೇಕ್ ಪಿಲಾತ ಜನ ಕ್‍ೕಟನೆಕೆ ಆಡ್‍ೕಂದ್ ತೀರ್ಪ್ ಮಾಡ್‍ಚಿ.

²⁵ಕಲಹ ಮಾಡಿತ್, ಕಲಹತ್‌ಲ್ ಒಬ್ಬನ ಕೊಲೆ ಮಾಡಿತ್ ಜೈಲ್‍ಲ್ ಇಂಜ ಬರಬ್ಬನ ಅಯಿಂಗಕ್ ಬುಡ್‌ತಿತ್, ಯೇಸುನ ಎಂತ ಮಾಡ್‌ವಕ್ ಕುಶಿ ಉಂಡೋ ಅದ್‍ನ ಮಾಡ್‌ವಕ್ ಅಯಿಂಗಡ ಪಕ್ಕ ಒಪ್ಪ್‌ಚಿಟ್ಟತ್.

²⁶ಯೇಸುನ ಕೊಲ್ಲ್‌ವಕ್ ಕಾಕಿಯಂಡ್ ಪೋಯಂಡ್ ಇಪ್ಪಕ, ಆ ಬಟ್ಟೇಲ್, ಕುರೇನೆ ಊರಿಂಜ ಅಕ್ಕ ಬಂದಂಡಿಂಜ ಸೀಮೋನ ಎಣ್ಣ್‌ವಂವೊನ ಕಂಡತ್. ಸಿಪಾಯಿಯ ಅಂವೊನ ನಿಪ್ಪ್‌ಚಿಟ್ಟಿತ್ ಒತ್ತಾಯ ಮಾಡಿತ್ ಯೇಸುರ ಶಿಲುಬೇನ ಪೊರ್‍ತಂಡ್ ಪೋಪಕ್ ಶಿಲುಬೇನ ಅಂವೊಂಡ ಮೇಲೆ ಬೆಚ್ಚತ್.

²⁷ದುಂಬ ಜನಡ ಗುಂಪ್ ಯೇಸುರ ಬಯ್ಯ ಪೋಯಂಡಿಂಜತ್. ಅಯಿಂಗಡಲ್ಲಿ ದುಂಬ ಪೊಣ್ಣಾಳ್‍ವ ಎದೆ ಬಡ್‍ಚಂಡ್ ಯೇಸುರ ವಿಷಯತ್‍ಲ್ ಗೋಳಾಡಿಯಂಡ್ ಮೊರಟಂಡಿಂಜತ್.

²⁸ಯೇಸು, ಅಯಿಂಗ ಗೋಳಾಡುವಾನ ಕಂಡಿತ್, ಯೆರೂಸಲೇಮ್‍ರ ಪೊಣ್ಣಾಳ್‌ವಳೇ, ನಾಕಾಯಿತ್ ನಿಂಗ ಮೊರಡತಿ! ನಿಂಗಡ ಮಕ್ಕಕಾಯಿತ್ ನಿಂಗಕಾಯಿತ್ ಗೋಳಾಡೀಂದ್ ಎಣ್ಣ್‌ಚಿ.

²⁹ಗೊಡ್ಡಿಯಾಯಿತುಳ್ಳ ಪೊಣ್ಣಾಳುವ ಆಶೀರ್ವಾದ ಮಾಡ್‍ನಂವೋಂದು, ಕುಳುಮೆಕರ್‌ತಿ ಆಕತ ಉಳ್ಳ ಪೊಣ್ಣಾಳುವ ಪಿಂಞ ಮೊಲೆಪಾಲ್ ಕೊಡ್‍ಕತೆ ಉಳ್ಳ ಪೊಣ್ಣಾಳುವ ಆಶೀರ್ವಾದ ಮಾಡ್‌ನಯಿಂಗಾಂದ್ ಎಣ್ಣುವ ದಿವಸ ಬಪ್ಪಾಂದ್ ಯೇಸು ಎಣ್ಣ್‌ಚಿ.

³⁰ಆ ಕಾಲತ್‍ಲ್ ಕುಂದ್‌ಕ್: ನಂಗಡ ಮೇಲೆ ಬೂಳೀಂದು, ನಂಗಳ ಮುಚ್ಚೊಳೀಂದು ಜನ ಎಣ್ಣುವ.[53]

³¹ಮರ ಪಚ್ಚೆ ಆಯಿತಿಪ್ಪಕಲೆ ಇಚ್ಚಕೆಲ್ಲಾ ಆಪಕ, ಮರ ಒಣಂಗಿ ಪೋನ ಪಿಂಞ ಎಂತೆಲ್ಲಾ ಆಕೂಂದ್ ಎಣ್ಣ್‌ಚಿ.[54]

³²ಬೋರೆ ದಂಡ್ ಕ್ರೂರ ಪಾಪ ಮಾಡ್‍ನ ಕಳ್ಳಂಗಳ, ಯೇಸುರ ಕೂಡೆ ಕೊಲ್ಲ್‌ವಕ್ ಕಾಕಿಯಂಡ್ ಪೋಚಿ.

³³ಅದ್ಂಗ್ ಮಂಡೆರ ಓಡ್‍ೕಂದ್ ಅರ್ಥ ಆಪ ಕಪಾಲಸ್ಥಲ ಎಣ್ಣುವ ಜಾಗಕ್ ಬಪ್ಪಕ ಯೇಸುರ ಬಲ್‌ತೆ ಬರಿಲ್ ಒರ್ ಕಳ್ಳನ, ಎಡ್‍ತೆ ಬರಿಲ್ ಒರ್ ಕಳ್ಳನ ಶಿಲುಬೇಕ್ ಇಟ್ಟತ್.

³⁴ಅಕ್ಕ ಯೇಸು: ಅಪ್ಪ, ಈಂಗಳ ಮನ್ನಿಚಿಡ್, ಈಂಗ ಎಂತ ಮಾಡಿಯಂಡುಂಡ್‍ೕಂದ್ ಅಯಿಂಗಕ್ ಗೊತ್ತ್‌ಲ್ಲೇಂದ್ ಎಣ್ಣ್‌ಚಿ. ಸಿಪಾಯಿಯಂಗ ಯೇಸುರ ಬಟ್ಟೇನ ಬಾಗ ಮಾಡಿತ್, ಚೀಟಿ ಇಟ್ಟಿತ್, ಬಟ್ಟೇನ ಎಡ್‍ತಂಡತ್.

³⁵ಜನಡ ಗುಂಪ್ ಯೇಸುನ ನೋಟಿಯಂಡಿಂಜತ್. ಆಚೇಂಗಿ, ಯೆಹೂದ್ಯಂಗಡ ಅದಿಕಾರಿಯಂಗ: ಇಂವೊ ಬೋರೆಯಿಂಗಳ ರಕ್ಷಣೆ ಮಾಡ್‍ಚಿ, ಇಕ್ಕ ಇಂವೊನೇ ದೇವ ಗೊತ್ತ್ ಮಾಡಿತ್ ಅಯಿಚ ನೇರಾನ ಕ್ರಿಸ್ತನಾಯಿತ್ಂಜತೇಂಗಿ ಅಂವೊನ ಅಂವೊನೇ ಕಾಪಾಡಡ್‍ೕಂದ್ ಅಯಿಂಗಯಿಂಗಳೇ ಕೆಣಕಿಯಂಡ್ ತಕ್ಕ್ ಪರ್ಂದತ್.

³⁶ಸಿಪಾಯಿಯ ಯೇಸುರ ಪಕ್ಕ ಬಪ್ಪಂಜಿ ಅಂವೊಂಗ್ ಪುಳಿಯಾಯಿತುಳ್ಳ ದ್ರಾಕ್ಷಿರಸತ್‍ನ ಕೊಡ್‌ತಿತ್,

³⁷ನೀನ್ ಯೆಹೂದ್ಯಂಗಡ ರಾಜನಾಚೇಂಗಿ ನಿನ್ನ ನೀನೇ ಕಾಪಾಡಿಯಾಂದ್ ಎಣ್ಣಿಯಂಡ್ ಪರಿಹಾಸ ಮಾಡ್‍ಚಿ.

³⁸ಇಂವೊ ಯೆಹೂದ್ಯಂಗಡ ರಾಜ ಎಣ್ಣಿಯಂಡ್ ಒಳ್‍ದಿತ್, ಶಿಲುಬೇರ ಮೇಲೆ ಕೆಟ್ಟಿ ಬೆಚ್ಚತ್.

³⁹ಯೇಸುರ ಕೂಡೆ ಶಿಲುಬೇಕ್ ಇಟ್ಟ ಒರ್ ಕಳ್ಳ, ನೀನ್ ನೇರಾನ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನಾಚೇಂಗಿ, ನಿನ್ನ ನೀನ್ ಕಾಪಾಡಿಯಂಡ್, ನಂಗಳ ಸಹ ಕಾಪಾಡ್‍ೕಂದ್ ಕೆಣಕ್‌ಚಿ.

⁴⁰ಇಂಞೊರ್ ಕಳ್ಳ, ಆ ಕಳ್ಳನ ನೋಟಿತ್: ನೀನ್ ಇಕ್ಕಾಚೇಂಗಿಯು ದೇವಕ್ ಬೊತ್ತ್‌ಲೆಯಾ?

⁴¹ನಂಗ ನೇರಾಯಿತು ತಪ್ಪ್ ಮಾಡ್‍ನಯಿಂಗ, ನಂಗ ಮಾಡ್‍ನ ತಪ್ಪ್‌ಕ್ ತಕ್ಕ ಶಿಕ್ಷೆ ಕ್‌ಟ್ಟಿಯಂಡುಂಡ್. ಆಚೇಂಗಿ ಈ ಮನುಷ್ಯ ಒರ್ ತಪ್ಪು ಮಾಡಿತ್‌ಲ್ಲೆ.

⁴²ಪಿಂಞ ಅಂವೊ, ನೀನ್ ರಾಜನಾಯಿತ್ ನೀಡ ರಾಜ್ಯತ್‍ಲ್ ಬಪ್ಪಕ ನನ್ನ ಗೇನ ಮಾಡ್‍ೕಂದ್ ಯೇಸುಕ್ ಎಣ್ಣ್‌ಚಿ.

⁴³ಅದ್ಂಗ್ ಯೇಸು: ಇಂದ್ ನೀನ್ ನಾಡ ಕೂಡೆ ಪರದೈಸಿಲ್[55] ಇಪ್ಪಿಯಾಂದ್ ನಾನ್ ನೀಕ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

⁴⁴ಮಜ್ಜಣ ಆಪಕಾಪಕ ಪನ್ನೆರಂಡ್ ಗಂಟೆಯಿಂಜ ಮೂಂದ್ ಗಂಟೆಕತ್ತನೆ ದೇಶ ಪೂರ್ತಿ ಇರ್‌ಟಾಚಿ.

⁴⁵ದೇವಾಲಯತ್‍ಲ್ ಇಂಜ ಪಡಿರ ಬಟ್ಟೆ ದಂಡ್ ಬಾಗವಾಯಿತ್ ಕೊಡಿಯಿಂಜ ಅಡಿಕತ್ತನೆ ಕೀತಿ ಪೋಚಿ.

⁴⁶ಪಿಂಞ ಯೇಸು: ಅಪ್ಪ, ನಾಡ ಜೀವತ್‍ನ ನೀಡ ಕೈಯಿಕ್ ಒಪ್ಪ್‌ಚಿಡುವೀಂದ್ ಜೋರಾಯಿತ್ ಕೂತ್ ಕೊಡ್‌ಪಂಜಿ ಜೀವತ್‍ನ ಬುಟ್ಟತ್.[56]

⁴⁷ನೂರ್ ಪಡೆಯಾಳಿಯಡ ಅದಿಕಾರಿ, ಯೇಸುಕ್ ಇನ್ನನೆ ಎಲ್ಲಾ ಆನದ್‍ನ ಕಂಡಿತ್, ಈ ಮನುಷ್ಯ ನೇರಾಯಿತು ನೀತಿವಂತನೇ ಎಣ್ಣಿಯಂಡ್ ದೇವನ ತುದಿಚತ್.

⁴⁸ಈ ಘಟನೆಯೆಲ್ಲ ನೋಟ್‍ವಕ್ ಬಂದ ಜನ, ನಡ್ಂದದೆಲ್ಲ ನೋಟಿತ್, ಎದೆ ಬಡ್‍ಚಂಡ್ ಬಯ್ಯಕ್ ಮನೆಕ್ ಪೋಚಿ.

⁴⁹ಯೇಸುನ ಚಾಯಿತೆ ಗೊತ್ತ್ಂಜ ಜನ ಪಿಂಞ ಅಂವೊಂಡ ಕೂಡೆ ಇಂಜ ಗಲಿಲಾಯತ್ಂಜ ಬಂದ ಚೆನ್ನ ಪೊಣ್ಣಾಳುವ ದೂರತ್‍ಲ್ ನಿಂದಂಡ್ ಇದ್‍ನೆಲ್ಲ ನೋಟಿಯಂಡಿಂಜತ್.

⁵⁰ದೇವಡ ರಾಜ್ಯ ಬಪ್ಪಕ್ ಪಾರಕಾತಂಡ್ ಇಂಜ ಯೆಹೂದ್ಯತ್‍ರ ಅರಿಮಥಾಯ ಊರ್‍ಂಜ ಬಂದ ಯೋಸೇಫ ಎಣ್ಣ್‌ವಂವೊ ಇಂಜತ್. ಅಂವೊ ನಲ್ಲಂವೊನು ನೀತಿವಂತಂವೊನು ಆಯಿತ್ಂಜತ್. ಅಂವೊ ಅಲ್ಲಿಯತ್‍ರ ಯೆಹೂದ್ಯ ಕಾನೂನ್‌ರ ಸಬೆರ ಒರ್ ಮರ್ಯಾದೆ ಉಳ್ಳ ಮನುಷ್ಯನಾಯಿತ್ಂಜತ್.

⁵¹ಅಂವೊ ಪೆರಿಯಯಿಂಗಡ ಸಬೇಲ್ ಒರ್ ಸದಸ್ಯನಾಯಿತ್ಂಜಕಲು, ಅಯಿಂಗಡ ಆಲೋಚನೆಕು, ಕೆಲಸಕು ಒತ್ತಂಡಿಲ್ಲೆ.

⁵²ಅಂವೊ ಪಿಲಾತ ರಾಜಂಡ ಪಕ್ಕ ಪೋಯಿತ್ ಚತ್ತ್‌ಪೋನ ಯೇಸುರ ತಡೀನ ಕ್‍ೕಟತ್.

⁵³ಯೇಸುರ ತಡೀನ ಶಿಲುಬೆಯಿಂಜ ಅಡಿಕ್ ಕೊಂಡ್‌ಬಂತ್, ಒರ್ ನಾರ್ಬಟ್ಟೆಲ್ ಸುತ್ತಿತ್, ಮಿಂಞಲೇ ಪಾರೆಕಲ್ಲ್‌ನ ಕೆತ್ತಿತ್ಂಜ ಗೋರಿರ ಒಳ್‍ಕ್ ಚತ್ತ್‌ಪೋನ ಯೇಸುರ ತಡೀನ ಬೆಚ್ಚತ್. ಈ ಗೋರಿ ಇಲ್ಲಿಕತ್ತನೆ ದಾರ್‌ನು ಇಡತೆ ಪುದಿಯ ಗೋರಿಯಾಯಿತ್ಂಜತ್.

⁵⁴ಅಂದ್ ಸಬ್ಬತ್ ದಿವಸಕ್ ತಯಾರ್ ಮಾಡ್‌ವ ನಾಳಾಯಿತ್ಂಜತ್. ಸಬ್ಬತ್ ದಿವಸ ಆಪಕ್ ಚೆನ್ನ ಸಮಯ ಮಾತ್ರ ಇಂಜತ್.

⁵⁵ಯೇಸುರ ಕೂಡೆ ಗಲಿಲಾಯತ್ಂಜ ಬಂದ ಪೊಣ್ಣಾಳುವ ಯೋಸೇಫಂಡ ಕೂಡೆ ಪೋಯಿತ್ ಗೋರಿನ ಪಿಂಞ ಯೇಸುರ ತಡೀನ ಗೋರಿಲ್ ಎನ್ನನೆ ಬೆಚ್ಚತ್‍ೕಂದ್ ನೋಟಿಯಂಡಿಂಜತ್.

⁵⁶ಪಿಂಞ ಅಯಿಂಗ ಯೇಸುರ ತಡೀನ ಪೂಪಕ್ ಮಿಂಞ ಇಡ್‌ವಕಾಯಿತ್ ಪರಿಮಳದ್ರವ್ಯ ಪಿಂಞ ನಲ್ಲ ವಾಸನೆ ಉಳ್ಳ ಸುಗಂದ ತೈಲತ್‌ನ ತಯಾರ್ ಮಾಡಿತ್, ದೇವಡ ಕಾನೂನ್‌ರ ಪ್ರಕಾರ ಸಬ್ಬತ್ ದಿವಸತ್‍ಲ್ ಆರಾಮಾಯಿತಿಪ್ಪಕ್ ಅಯಿಂಗಡ ಮನೆಕ್ ವಾಪಸ್ ಪೋಚಿ.