Read Kodava ಲೂಕ 24 Bible Online

ಲೂಕ 24 - Kodava bible

ಲೂಕ 24

¹ವಾರತ್‍ರ ಆದ್ಯ ದಿವಸ ನಾರಾಚೆ ಪೊಲಾಕ ನೇರತೆ ಸೂರ್ಯ ಉದಿಪಕ್ ಮಿಂಞಲೇ ಆ ಪೊಣ್ಣಾಳ್‍ಂಗ ತಯಾರ್ ಮಾಡ್‍ನ ಸುಗಂದ ವಾಸನೆರ ಮದ್ದ್‌ನ ಎಡ್‍ತಂಡ್ ಗೋರಿಕ್ ಪೋಚಿ.

²ಗೋರಿನ ಮುಚ್ಚಿತ್‌ಂಜ ಬಲ್ಯ ಪಾರೆಕಲ್ಲ್‌ನ ಉರಿಟಿತ್, ತೊರ್‌ಂದ್ ಬಚ್ಚಿತ್ಂಜಾನ ಕಂಡಿತ್,

³ಅಯಿಂಗ ಒಳ್‍ಕ್ ಪೋಚಿ. ಆಚೇಂಗಿ, ಒಡೆಯ ಯೇಸುರ ತಡೀನ ಅಯಿಂಗ ಅಲ್ಲಿ ಕಂಡಿತಿಲ್ಲೆ.

⁴ಅಯಿಂಗ ಆಶ್ಚರ್ಯತ್‍ಲ್ ನಿಂದಿತಿಪ್ಪಕ, ಅಕ್ಕಣೆ ದಂಡ್ ಮನುಷ್ಯಂಗ ಪಳಪಳಾಂದ್ ಮಿನ್ನುವ ಬಟ್ಟೇನ ಇಟ್ಟಂಡ್ ಅಯಿಂಗಕ್ ಪ್ರತ್ಯಕ್ಷ ಆಚಿ.

⁵ಪೋಡಿಲ್ ಆ ಪೊಣ್ಣಾಳ್‍ವ ನೆಲಕ್ ಮಂಡೆ ಬಗ್ಗಿತ್ ನಿಂದಂಡಿಪ್ಪಕ, ಆ ದಂಡಾಳು ಅಯಿಂಗಳ ನೋಟಿತ್: ಜೀವವಾಯಿತ್ ಬದ್‍ಕಿಯಂಡುಳ್ಳಂವೊನ ಎನ್ನಂಗ್ ಚತ್ತಯಿಂಗಡ ಜಾಗತ್‍ಲ್ ತ್‍ೕ‌ಡಿಯೇಂಡುಳ್ಳಿರ?

⁶ಯೇಸು ಇಲ್ಲಿ ಇಲ್ಲೆ. ಅಂವೊ ಚಾವ್‍ಯಿಂಜ ಜೀವವಾಯಿತ್ ಎದ್ದತ್.

⁷ಮನುಷ್ಯಕುಮಾರನ ಶಿಲುಬೇಲ್ ಇಡ್‌ವಕಾಯಿತ್ ಪಾಪಿಯಂಗಡ ಕೈಯಿಕ್ ಒಪ್ಪ್‌ಚಿಡುವ. ಮೂಂದನೆ ದಿವಸ ಅಂವೊ ಚಾವ್‍ಯಿಂಜ ಜೀವವಾಯಿತ್ ಏವಾಂದ್ ಯೇಸು ಗಲಿಲಾಯತ್‍ಲ್ ಇಪ್ಪಕ ಎಣ್ಣ್‌ನದ್ ನಿಂಗಕ್ ಗೇನ ಉಂಡಾಂದ್ ಕ್‍ೕಟತ್.

⁸ಅಕ್ಕ ಆ ಪೊಣ್ಣಾಳುವಕ್ ಯೇಸು ಪರ್ಂದ ತಕ್ಕ ಗೇನ ಬಾತ್.

⁹ಅಯಿಂಗ ಗೋರಿಯಿಂಜ ಬಂದಿತ್ ಅಯಿಂಗ ಕಂಡಾನ ಪನ್ನಂದ್ ಶಿಷ್ಯಂಗಕ್ ಪಿಂಞ ಬೋರೆ ಜನಕ್ ಎಣ್ಣ್‌ಚಿ.

¹⁰ಇದ್‍ನ ಅಪೊಸ್ತಲಂಗಕ್ ಎಣ್ಣ್‌ನಯಿಂಗ ಮಗ್ದಲದ ಮರಿಯ, ಯೋಹಾನಳ, ಯಾಕೋಬಂಡ ಅವ್ವನಾನ ಮರಿಯ ಪಿಂಞ ಇಂಞು ಚೆನ್ನ ಪೊಣ್ಣಾಳುವಯಿಂಗಳೇ.

¹¹ಆಚೇಂಗಿ, ಅಯಿಂಗ ಎಣ್ಣ್‌ನ ತಕ್ಕ್ ಬೋರೆಯಿಂಗಕ್ ಪುಚ್ಚಿ ತಕ್ಕ್‌ರನೆಕೆ ಇಂಜತ್. ಆನಗುಂಡ್ ಈ ಪೊಣ್ಣಾಳುವ ಎಣ್ಣ್‌ವಾನ ಅಯಿಂಗ ದಾರೂ ನಂಬಿತ್‌ಲ್ಲೆ.

¹²ಆಚೇಂಗಿ ಪೇತ್ರ ಚಾಡಿ ಏವಂಜಿ ಗೋರಿಕ್ ಓಡಿ ಪೋಚಿ. ಅಂವೊ ಗೋರಿರ ಒಳ್‍ಕ್ ಬಗ್ಗಿ ನೋಟ್‍ವಕ, ಯೇಸುರ ತಡಿಕ್ ಸುತ್ತ್‌ನ ಬಟ್ಟೆನೆ ಮಾತ್ರ ಕಂಡತ್. ಪಿಂಞ ನಡ್ಂದ ಘಟನೆನ ಗೇನ ಮಾಡಿಯಂಡ್ ಆಶ್ಚರ್ಯತ್‍ಲ್ ಮನೆಕ್ ಪೋಚಿ.

¹³ಅದೇ ದಿವಸ ಯೇಸುರ ದಂಡ್ ಶಿಷ್ಯಂಗ ಯೆರೂಸಲೇಮ್ಂಜ ಸುಮಾರ್ ಏಳ್ ಮೈಲ್ ದೂರತ್‍ಲುಳ್ಳ ಎಮ್ಮಾಹು ಎಣ್ಣುವ ಊರ್‌ಕ್ ಪೋಯಂಡಿಂಜತ್.

¹⁴ಅಕ್ಕ, ನಡ್ಂದ ಎಲ್ಲಾ ಘಟನೆರ ವಿಷಯತ್‍ನ ತಕ್ಕ್ ಪರ್ಂದಂಡ್ ಪೋಯಂಡಿಂಜತ್.

¹⁵ಅಯಿಂಗ ತಕ್ಕ್ ಪರ್‌ದಂಡ್ ಪೋಯಂಡಿಪ್ಪಕ, ಯೇಸುವೇ ಅಯಿಂಗಡ ಪಕ್ಕತ್‍ಲ್ ಬಂತ್ ಅಯಿಂಗಡ ಕೂಡೆ ನಡ್ಂದಂಡಿಂಜತ್.

¹⁶ದಂಡಾಳು ಯೇಸುನ ನೋಟ್‌ಚಿ, ಆಚೇಂಗಿ ಅಯಿಂಗ ಅಂವೊನ ಗೊತ್ತ್‌ಪುಡಿಕತನೆಕೆ ದೇವ ಅಯಿಂಗಡ ಕಣ್ಣ್‌ನ ಮುಚ್ಚಿತ್ಂಜತ್.

¹⁷ಯೇಸು ಅಯಿಂಗಕ್, ನಿಂಗ ನಡ್‍ಪಕ ಎಂತೋ ಆಳವಾಯಿತ್ ಚರ್ಚೆ ಮಾಡಿಯಂಡಿಂಜಿರಲ್ಲ, ಅದ್ ಎಂತ್‍ೕಂದ್ ಕ್‍ೕಟತ್. ಅಯಿಂಗಡ ಮೂಡ್ ಬಾಡಿಚಿಟ್ಟಿತ್ ಅನ್ನನೆ ನಿಂದತ್.

¹⁸ಅಯಿಂಗಡಲ್ಲಿ ಕ್ಲೆಯೊಫ ಎಣ್ಣ್‌ವಂವೊ ಯೇಸುಕ್: ಈ ದಿವಸತ್‍ಲ್ ಯೆರೂಸಲೇಮ್‍ಲ್ ನಡ್ಂದ ಸಂಗತಿನ ಗೊತ್ತಿಲ್ಲತ ಬೋರೆ ಜಾಗತ್‍ರಂವೊ ನೀನ್ ಒಬ್ಬನೇ ಆಯಿತಿಕ್ಕೂಂದ್ ಎಣ್ಣ್‌ಚಿ.

¹⁹ಅಕ್ಕ ಅಂವೊ: ಎಂತ ಸಂಗತಿ ನಡ್ಂದತ್ ಎಣ್ಣಿಯಂಡ್ ಕ್‍ೕಟತ್. ಅದ್ಂಗ್ ಅಯಿಂಗ: ನಜರೇತ್‍ರ ಯೇಸುರ ವಿಷಯಾಂದ್ ಎಣ್ಣ್‌ಚಿ. ಅಂವೊ ದೇವಡ ಪಿಂಞ ಮನುಷ್ಯಂಗಡ ಮಿಂಞತ್‍ಲ್ ಅಂವೊಂಡ ಕ್ರಿಯೇಲು ತಕ್ಕ್‌ಲು ಶಕ್ತಿಯುಳ್ಳ ಪ್ರವಾದೀಂದ್ ಕಾಟಿತ್ಂಜತ್.

²⁰ನಂಗಡ ಮುಕ್ಯ ಯಾಜಕಂಗ ಪಿಂಞ ಅದಿಕಾರಿಯಂಗ ಅಂವೊನ ಕೊಲ್ಲ್‌ವಕ್ ತೀರ್ಪ್ ಮಾಡ್‌ವಕಾಯಿತ್ ಒಪ್ಪ್‌ಚಿಟ್ಟತ್, ಪಿಂಞ ಅಯಿಂಗ ಶಿಲುಬೇಕ್ ಇಟ್ಟತ್.

²¹ಆಚೇಂಗಿ, ನಂಗ ಇಂವೊ ಇಸ್ರಾಯೇಲ್ ಜನಳ ಬುಡ್‍ಗಡೆ ಮಾಡ್‌ವಾಂದ್ ನಂಬಿತ್ಂಜತ್. ಆಚೇಂಗಿ ಇದೆಲ್ಲ ಆಯಿತ್ ಇಂದ್‍ಕ್ ಮೂಂದನೆ ದಿವಸ ಆಚೀಂದ್ ಎಣ್ಣ್‌ಚಿ.

²²ನಂಗಡ ಕೂಟ್‍ಕ್ ಕೂಡ್‍ನ ಚೆನ್ನ ಪೊಣ್ಣಾಳುವ ಇಂದ್ ಪೊಲಾಕ ನೇರತೆ ಅಂವೊಂಡ ಗೋರಿಡ ಪಕ್ಕ ಪೋಯಿತ್ ನೋಟ್‍ವಕ, ಅಲ್ಲಿ ಅಂವೊಂಡ ತಡೀನ ಕಂಡಿತ್‌ಲ್ಲೇಂದ್ ಎಣ್ಣಿತ್ ನಂಗಕ್ ಆಶ್ಚರ್ಯವಾನ ಸುದ್ದಿನ ಕೊಡ್‍ತತ್.

²³ಅಲ್ಲಿ ಅಯಿಂಗ ದೇವದೂತಂಗಳ ಕಂಡಿತ್, ಆ ದೇವದೂತಂಗ ಯೇಸು ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬದ್‍ಕಿಯಂಡುಂಡ್‍ೕಂದ್ ಎಣ್ಣ್‌ಚೀಂದ್ ನಂಗಕ್ ಬಂತ್ ಎಣ್ಣ್‌ಚಿ.

²⁴ನಂಗಡ ಕೂಟ್‍ಕ್ ಕೂಡ್‍ನ ಚೆನ್ನ ಜನ ಪೋಯಿತ್ ಗೋರಿನ ನೋಟುವಕ ಅಯಿಂಗ ಸಹ ಪೊಣ್ಣಾಳ್‍ವ ಎಣ್ಣ್‌ನನೆಕೆ ಯೇಸುನ ಕಂಡಿತ್‌ಲ್ಲೆ.

²⁵ಪಿಂಞ ಯೇಸು ಆ ದಂಡ್ ಶಿಷ್ಯಂಗಳ ನೋಟಿತ್: ನಿಂಗ ಎನ್ನಂಗ್ ನಂಬುಲೆ? ಪ್ರವಾದಿಯಂಗ ಎಣ್ಣ್‌ನಾನೆಲ್ಲ ನಂಬುವಕ್ ಎನ್ನಂಗ್ ಇಚ್ಚಕ್ ಮಂದ ಆಯಿತುಳ್ಳಿರ?

²⁶ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಮಹಿಮೆಪಡ್‍ವಕ್ ಮಿಂಞ ಇನ್ನನೆಲ್ಲ ಕಷ್ಟ ಅನುಬವಿಚಿಡಡೂಂದ್ ನಿಂಗಕ್ ಗೊತ್ತ್‌ಲ್ಲೆಯಾಂದ್ ಪ್ರಶ್ನೆ ಇಟ್ಟತ್.

²⁷ಪಿಂಞ ಯೇಸು ಅಂವೊಂಡ ವಿಷಯತ್‍ನ ಮೋಶೇರ ನ್ಯಾಯಪ್ರಮಾಣತ್ಂಜ ಪ್ರವಾದಿಯಂಗ ಒಳ್‍ದ್‍ನ ಪುಸ್ತಕಕತ್ತನೆ ದೇವಡ ವಾಕ್ಯತ್‍ಲ್ ಎಂತದೆಲ್ಲ ಒಳ್‍ದಿತುಂಡೋ ಅದ್‍ನೆಲ್ಲ ಅಯಿಂಗಕ್ ವಿವರಿಚಿಟ್ಟತ್.

²⁸ಅಕ್ಕ ಅಯಿಂಗ ಪೋಯಂಡುಳ್ಳ ಊರ್ ಪಕ್ಕ ಬಪ್ಪಕ ಯೇಸು ಅಯಿಂಗಕಿಂಜ ಇಂಞು ಮಿಂಞಕ್ ಪೋಪನೆಕೆ ನಡ್ಂದತ್.

²⁹ಅಯಿಂಗ ಯೇಸುಕ್, ಬಯಿಟ್ ಆಯಂಡ್ ಬಂದ್‌ರ್‌ತ್, ಸೂರ್ಯ ಮುಳಿವ ನೇರ ಆಚಿ, ನೀನ್ ನಂಗಡ ಕೂಡೆ ಒಳಿಂಜಿತ್ ಪೋಂದ್ ಬೋಡ್‍ಚಿ. ಯೇಸು ಅಯಿಂಗಡ ಕೂಡೆ ಇಪ್ಪಕ್ ಒಳ್‍ಕ್ ಪೋಚಿ.

³⁰ಯೇಸು ಅಯಿಂಗಡ ಕೂಡೆ ಉಂಬಕ್ ಅಳ್‌ಪಕ, ಒಟ್ಟಿನ ಎಡ್‌ಪಂಜಿ ದೇವಕ್ ವಂದನೆ ಎಣ್ಣಿತ್ ಒಟ್ಟಿನ ಪೊಳಿಪಂಜಿ ಅಯಿಂಗಕ್ ಕೊಡ್‍ತತ್.

³¹ಅಕ್ಕ ಅಯಿಂಗಡ ಕಣ್ಣ್ ತೊರ್ಂದತ್, ಅಂವೊ ಯೇಸೂಂದ್ ಗೊತ್ತಾಚಿ. ಆಚೇಂಗಿ ಅಂವೊ ಅಲ್ಲಿಂಜ ಕಾಂಗತ ಆಯಿಪೋಚಿ.

³²ಅಕ್ಕ ಅಯಿಂಗ ದಂಡಾಳು: ನಂಗಡ ಕೂಡೆ ಯೇಸು ಬಟ್ಟೇಲ್ ತಕ್ಕ್ ಪರಿವಕ, ದೇವಡ ವಾಕ್ಯತ್‍ನ ವಿವರಿಚಿಡುವಕ ನಂಗಡ ಹೃದಯ ತಿತ್ತ್ ಕತ್ತಿಯಂಡಿಂಜನೆಕೆ ಇಂಜತಲ್ಲಾಂದ್ ಎಣ್ಣ್‌ಚಿ.

³³ಅಲ್ಲಿಂಜ ಅಯಿಂಗ ಅಕ್ಕಲೆ ಯೆರೂಸಲೇಮ್‌ಕ್ ಪೋಚಿ. ಅಯಿಂಗ ಅಲ್ಲಿ ಪನ್ನಂದ್ ಶಿಷ್ಯಂಗ ಪಿಂಞ ಅಯಿಂಗಡ ಕೂಡೆ ಇಂಜಯಿಂಗ ಕೂಡಿತ್ ಇಪ್ಪಾನ ಕಂಡತ್.

³⁴ಯೇಸು ನೇರಾಯಿತು ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಸೀಮೋನಂಗ್ ಪ್ರತ್ಯಕ್ಷ ಆಚೀಂದ್ ಪನ್ನಂದ್ ಶಿಷ್ಯಂಗಳು ತಕ್ಕ್ ಪರ್ಂದಂಡಿಂಜಾನ ಕಂಡತ್.

³⁵ಪಿಂಞ ಈ ದಂಡಾಳು, ಬಟ್ಟೇಲ್ ನಡ್‌ದಂಡ್ ಪೋಪಕ ನಡ್ಂದ ಸಂಗತಿನ ಪಿಂಞ ಅಂವೊ ಒಟ್ಟಿ ಪೊಳಿಪಕ ಅಯಿಂಗ ಎನ್ನನೆ ಒಡೆಯನ ಗೊತ್ತ್ ಮಾಡ್‍ಚೀಂದ್ ಎಲ್ಲಾ ಸಂಗತಿನ ಅಯಿಂಗಕ್ ವಿವರಿಚಿಟ್ಟತ್.

³⁶ಈ ದಂಡಾಳು ಇದ್‍ನೆಲ್ಲ ಎಣ್ಣಿಯಂಡಿಪಕಲೆ, ಯೇಸು ಅಲ್ಲಿಕ್ ಬಪ್ಪಂಜಿ ಅಯಿಂಗಡ ಮದ್ಯತ್‍ಲ್ ನಿಂದಂಡ್: ನಿಂಗಕ್ ಸಮಾದಾನಾಂದ್ ಎಣ್ಣ್‌ಚಿ.

³⁷ಅಯಿಂಗಕ್ ಒರ್ ಬೂತತ್‍ನ ಕಂಡನೆಕೆ ಪೋಡಿ ಆಚಿ.

³⁸ನಿಂಗಕ್ ಎನ್ನಂಗ್ ಅಚ್ಚಕ್ ಪೋಡಿ? ನಿಂಗಡ ಮನಸ್ಸ್‌ಲ್ ಅನುಮಾನ ಎನ್ನಂಗ್?

³⁹ಇದ್ ನಾನೇಂದ್ ನಾಡ ಕೈಕಾಲ್‌ನ ನೋಟಿ. ನನ್ನ ಮುಟ್ಟಿತ್ ನೋಟಿ. ಬೂತಕ್ ಮೂಳೆ, ಯರ್ಚಿ ಇಪ್ಪುಲೆ, ಆಚೇಂಗಿ ನಿಂಗ ನೋಟ್‍ವನೆಕೆ ನಾಕ್ ಅದೆಲ್ಲ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.

⁴⁰ಇದ್‍ನ ಎಣ್ಣ್‌ನ ಪಿಂಞ ಯೇಸು ಅಯಿಂಗಕ್ ಅಂವೊಂಡ ಕೈಕಾಲ್‌ನ ಕಾಟ್‍ಚಿ.

⁴¹ಅಯಿಂಗಕ್ ಇಂಞು ನಂಬುವಕ್ ಕಯಿಂಜಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗಕ್ ಕುಶಿಯು ಆಶ್ಚರ್ಯವು ಆಚಿ. ಆನಗುಂಡ್ ಯೇಸು ಅಯಿಂಗಕ್, ನಿಂಗಡ ಪಕ್ಕ ಉಂಬಕ್ ಎಂತಾಚೇಂಗಿ ಉಂಡಾಂದ್ ಕ್‍ೕಟತ್.

⁴²ಅಯಿಂಗ ಬೆಂಜ ಮೀನ್ ತುಂಡ್‍ನ ಅಂವೊಂಗ್ ಕೊಡ್‍ತತ್.

⁴³ಯೇಸು ಅಯಿಂಗಡ ಮಿಂಞತ್‍ಲೇ ಅದ್‍ನ ತಿಂದತ್.

⁴⁴ನಾನ್ ನಿಂಗಡ ಕೂಡೆ ಇಪ್ಪಕಲೆ, ಮೋಶೇರ ನ್ಯಾಯಪ್ರಮಾಣತ್‍ಲ್, ಪ್ರವಾದಿಯಂಗಡ ಪುಸ್ತಕತ್‍ಲ್ ಪಿಂಞ ದೇವಡ ಪಾಟ್‍ಲ್ ಒಳ್‍ದಿತುಳ್ಳ ನಾಡ ವಿಷಯವೆಲ್ಲ ಆಂಡೂಂದ್ ಎಣ್ಣಿಯೆ.

⁴⁵ಪಿಂಞ ದೇವಡ ವಾಕ್ಯ ಅಯಿಂಗಕ್ ಅರ್ಥ ಆಪನೆಕೆ ಅಂವೊ ಅಯಿಂಗಡ ಮನಸ್ಸ್‌ನ ತೊರ್ಂದತ್.

⁴⁶ಯೇಸು ಅಯಿಂಗಕ್: ದೇವ ಗೊತ್ತ್ ಮಾಡಿತ್ ಅಯಿಚ ರಾಜನಾನ ಕ್ರಿಸ್ತ ಕಷ್ಟಪಡಂಡು, ಚತ್ತಿತ್ ಮೂಂದ್ ದಿವಸ ಆನ ಪಿಂಞ ಏವಂಡೂಂದ್ ದೇವಡ ವಾಕ್ಯತ್‍ಲ್ ಉಂಡ್.

⁴⁷ಇಂಞು: ಯೆರೂಸಲೇಮ್ಂಜ ಎಲ್ಲಾ ದೇಶತ್‍ರ ಜನಕ್ ಪಾಪಕ್ಷಮೆ ಕ್‍ಟ್ಟ್‌ವಕ್ ದೇವಡ ಪಕ್ಕ ತಿರಿಗಿತ್ ಬರಂಡೂಂದ್ ನಾಡ ಅದಿಕಾರತ್‍ಲ್ ಪ್ರಚಾರ ಮಾಡೀಂದ್ ಎಣ್ಣಿ ಕೊಡ್‍ತತ್.

⁴⁸ನಿಂಗಳೇ ಇದಂಗೆಲ್ಲ ಸಾಕ್ಷಿ.

⁴⁹ನಾಡ ಅಪ್ಪ ವಾಗ್ದಾನ ಮಾಡ್‍ನ ಪವಿತ್ರ ಆತ್ಮತ್‌ನ ನಾನ್ ನಿಂಗಡ ಮೇಲೆ ಅಯಿಪಿ. ಆಚೇಂಗಿ ನಿಂಗಕ್ ಪರಲೋಕತ್ಂಜ ಶಕ್ತಿ ಕ್‌ಟ್ಟ್‌ವಕತ್ತನೆ ಯೆರೂಸಲೇಮ್ ಪಟ್ಟಣತ್‍ಲ್ ಪಾರಕಾತಂಡ್ ಇರಿ.

⁵⁰ಪಿಂಞ ಯೇಸು ಅಯಿಂಗಳೆಲ್ಲ ಬೇಥಾನ್ಯಕತ್ತನೆ ಕಾಕಿಯಂಡ್ ಪೋಯಿತ್ ತಾಂಡ ಕೈಯಿನ ಕೊಡಿಕ್ ಎಡ್‍ತಿತ್ ಅಯಿಂಗಳ ಆಶೀರ್ವಾದ ಮಾಡ್‍ಚಿ.

⁵¹ಅನ್ನನೆ ಆಶೀರ್ವಾದ ಮಾಡಿಯಂಡ್ ಇಪ್ಪಕ, ಅಂವೊ ಅಯಿಂಗಳ ಬುಟ್ಟಿತ್ ಪೋಚಿ, ಅಂವೊನ ಪರಲೋಕಕ್ ಎಡ್‍ತಂಡ್ ಪೋಚಿ.

⁵²ಅಯಿಂಗ ಯೇಸುನ ಆರಾದನೆ ಮಾಡಿತ್, ದುಂಬ್‍ನ ಕುಶೀಲ್ ಎಲ್ಲಾರು ಯೆರೂಸಲೇಮ್‌ಕ್ ಪೋಚಿ.

⁵³ದೇವಾಲಯತ್‍ಲ್ ದೇವನ ತುದಿಚಂಡ್ ಎಕ್ಕಾಲು ಕೊಂಡಾಡಿಯಂಡಿಂಜತ್.