Read Kodava ಲೂಕ 4 Bible Online

ಲೂಕ 4 - Kodava bible

ಲೂಕ 4

¹ಯೇಸು ಪವಿತ್ರಾತ್ಮತ್‍ಲ್ ದುಂಬ್‍ನಂವೊನಾಯಿತ್ ಯೊರ್ದನಿಂಜ ಬಯ್ಯಕ್ ಬಪ್ಪಕ ದೇವಡ ಆತ್ಮ ಮಣಬೂಮಿಕ್ ಅಂವೊನ ಅಯಿಚತ್.

²ನಾಪದ್ ದಿವಸ ಸೈತಾನ ಅಂವೊನ ಸೋದನೆ ಮಾಡ್‍ಚಿ. ಆ ದಿವಸತ್‍ಲ್ ಅಂವೊ ಒಂದು ತಿಂದಿತ್‌ಲ್ಲೆ. ಆ ದಿವಸವೆಲ್ಲ ಆನ ಪಿಂಞ ಅಂವೊಂಗ್ ಕೆಲ ಪಯಿಚತ್.

³ಅಕ್ಕ ಸೈತಾನ ಯೇಸುನ ನೋಟಿತ್: ನೀನ್ ನೇರಾಯಿತ್ ದೇವಡ ಮೋಂವೊನಾಚೇಂಗಿ ಈ ಕಲ್ಲ್‌ನ ಒಟ್ಟಿ ಆಪಕ್ ಅಪ್ಪಣೆ ಕೊಡ್‍ೕಂದ್ ಎಣ್ಣ್‌ಚಿ.

⁴ಅದ್ಂಗ್ ಅಂವೊ: ಮನುಷ್ಯ ಒಟ್ಟಿಯಿಂಜ ಮಾತ್ರ ಅಲ್ಲ, ದೇವ ಎಣ್ಣ್‌ನ ಓರೋರ್ ತಕ್ಕಿಂಜಲು ಬದ್‌ಕ್‌ವಾಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್‍ೕಂದ್ ಎಣ್ಣ್‌ಚಿ.[8]

⁵ಆ ಸೈತಾನ ಯೇಸುನ ಒರ್ ಕುಂದ್‌ರ ಕೊಡಿಕ್ ಕಾಕಿಯಂಡ್ ಪೋಯಿತ್, ಬೂಲೋಕತ್‌ರ ಎಲ್ಲಾ ರಾಜ್ಯತ್‍ನ ಒರು ಕ್ಷಣತ್‍ಲ್ ಕಾ‌ಟಿಕೊಡ್‌ತಿತ್: ನಾನ್ ನೀಕ್ ಈ ರಾಜ್ಯತ್‍ರ ಎಲ್ಲಾ ಅದಿಕಾರ ಪಿಂಞ ಎಲ್ಲಾ ಮಹಿಮೆನ ತಪ್ಪಿ, ಎನ್ನಂಗೆಣ್ಣ್‌ಚೇಂಗಿ ಇದೆಲ್ಲಾ ನಾಕ್ ಕೊಡ್‌ತಿತುಂಡ್. ನಾಕ್ ದಾರ್‌ಕ್ ಕೊಡ್‍ಪಕ್ ಕುಶಿ ಉಂಡೋ ಅಯಿಂಗಕ್ ನಾನ್ ಕೊಡ್‍ಪಿ.

⁶ನೀನ್ ನನ್ನ ಆರಾದನೆ ಮಾಡ್‍ಚೇಂಗಿ ಇದೆಲ್ಲಾ ನೀಡದಪ್ಪಾಂದ್ ಎಣ್ಣ್‌ಚಿ.

⁷

⁸ಅದ್ಂಗ್ ಯೇಸು: ನಾಡ ಬಯ್ಯಕ್ ಪೋ ಸೈತಾನೇ, ನೀಡ ಒಡೆಯನಾನ ದೇವನ ಮಾತ್ರ ಸೇವೆ ಮಾಡಿತ್, ಅಂವೊ ಒಬ್ಬಂಗೇ ಆರಾದನೆ ಮಾಡಂಡೂಂದ್ ದೇವಡ ವಾಕ್ಯತ್‍ಲ್ ಒಳ್‌ದಿತುಂಡಲ್ಲಾಂದ್ ಎಣ್ಣ್‌ಚಿ.[9]

⁹ಅಕ್ಕ ಸೈತಾನ ಯೇಸುನ ಯೆರೂಸಲೇಮ್ ಪಟ್ಟಣಕ್ ಕಾಕಿಯಂಡ್ ಪೋಯಿತ್ ಎತ್ತರವಾನ ಜಾಗತ್‍ಲ್ ನಿಪ್ಪ್‌ಚಿಟ್ಟಿತ್, ನೀನ್ ನೇರಾಯಿತು ದೇವಡ ಮೋಂವೊನಾಚೇಂಗಿ ಇಲ್ಲಿಂಜ ಅಡಿಕ್ ಪಾರ್,

¹⁰ಎನ್ನಂಗೆಣ್ಣ್‌ಚೇಂಗಿ ನಿನ್ನ ಚಾಯಿತೆ ಕ‌ಪಾಡಂಡೂಂದ್ ನೀಕಾಯಿತ್ ದೇವದೂತಂಗಕ್ ದೇವ ಆಜ್ಞೆ ತಪ್ಪಾಂದೂ,

¹¹ನೀಡ ಕಾಲ್‍ರ ಬೆರ ಕಲ್ಲ್‌ಲ್ ಮುಟ್ಟತನೆಕೆ, ಅಯಿಂಗ ನಿನ್ನ ಕೈಯಿಲ್ ಪೋರ್ಪಾಂದ್ ಒಳ್‌ದಿತುಂಡಲ್ಲಾಂದ್ ಎಣ್ಣ್‌ಚಿ.[10]

¹²ಅದ್ಂಗ್ ಯೇಸು: ನೀಡ ಒಡೆಯನಾನ ದೇವನ ಪರೀಕ್ಷೆಮಾಡತೇಂದ್ ಎಣ್ಣಿತುಂಡಲ್ಲಾಂದ್ ಜವಾಬ್ ಕೊಡ್‍ತತ್.[11]

¹³ಸೈತಾನ ಇನ್ನನೆ ಎಲ್ಲಾ ಪರಿಕ್ಷೆಯು ಮಾಡ್‍ನ ಪಿಂಞ ಯೇಸುನ ಚೆನ್ನ ಕಾಲ ಬುಟ್ಟಿತ್ ಪೋಚಿ.

¹⁴ಪಿಂಞ ಯೇಸು ಪವಿತ್ರಾತ್ಮತ್‍ರ ಶಕ್ತಿಲ್ ಗಲಿಲಾಯಕ್ ಪುನಃ ಪೋಚಿ. ಅಂವೊಂಡ ಸುದ್ದಿ ಸುತ್ತ್‌ಲ್ ಉಳ್ಳ ಎಲ್ಲಾ ಜಾಗಕು ಹರಡ್‍ಚಿ.

¹⁵ಯೇಸು ಅಯಿಂಗಡ ಸಬಾಮಂದಿರತ್‍ಲ್ ಬೋದನೆ ಮಾಡಿಯಂಡಿಂಜತ್. ಎಲ್ಲಾರು ಅಂವೊನ ಹೊಗಳ್‍ಚಿ.

¹⁶ಯೇಸು ಅಂವೊ ಬೊಳ್ಂದ ನಜರೇತ್ ಊರ್‌ಕ್ ಪೋಯಿತ್, ಸಬ್ಬತ್[12] ದಿನ ಬಪ್ಪಕ ಪದ್ದತಿರ ಪ್ರಕಾರ ಸಬಾಮಂದಿರಕ್ ಪೋಚಿ. ಅಲ್ಲಿ ಅಂವೊ ಓದ್‍ವಕ್ ಎದ್ದ್ ನಿಂದತ್.

¹⁷ಅಕ್ಕ ದೇವಡ ವಾಕ್ಯತ್‍ನ ಓದ್‍ವಕ್ ಯೆಶಾಯ ಪ್ರವಾದಿರ ಪುಸ್ತಕತ್‍ನ ಅಂವೊಂಗ್ ಕೊಡ್‍ತತ್.

¹⁸ಅಂವೊ ಅದ್‍ನ ತೊರ್‌ಪಕ: ದೇವಡ ಆತ್ಮ ನಾಡ ಮೇಲೆ ಉಂಡ್; ಗರೀಬಂಗಕ್ ದೇವಡ ನಲ್ಲ ಸುದ್ದಿ ಪ್ರಚಾರ ಮಾಡ್‌ವಕು ನನ್ನ ಗೊತ್ತ್ ಮಾಡಿಯತ್. ದೇವ, ಕೈದಿಯಂಗಕ್ ಬುಡುಗಡೆ ಎಣ್ಣುವಕು, ಕುರ್‌ಡಂಗಕ್ ಕಣ್ಣ್ ಕಾಂಬನೆಕೆ ಮಾಡ್‌ವಕು, ಅಡಿಯಾಳಂಗಳ ಅಯಿಂಗಡ ಕಷ್ಟತ್ಂಜ ಬುಡುಗಡೆ ಮಾಡ್‌ವಕು,[13] ದೇವಡ ದಯೇರ ಕಾಲತ್‍ನ ಪ್ರಚಾರ ಮಾಡ್‌ವಕು ನನ್ನ ಅಯಿಚತ್‍ೕಂದ್ ಪುಸ್ತಕತ್‍ಲ್ ಒಳ್‍ದಿತುಳ್ಳ ಜಾಗತ್‍ನ ಕಂಡ್ ಅದ್‍ನ ಓದ್‌ಚಿ.

¹⁹

²⁰ಯೇಸು ಆ ಪುಸ್ತಕತ್‍ನ ಸುತ್ತಿತ್, ಅಲ್ಲಿ ಸೇವೆ ಮಾಡ್‌ವಂವೊಂಡ ಪಕ್ಕ ಕೊಡ್‍ತ ಪಿಂಞ ಅಳ್‌ತತ್. ಸಬಾಮಂದಿರತ್‍ಲ್ ಉಳ್ಳಯಿಂಗ ಎಲ್ಲಾರು ಅಂವೊನ ನೋಟಿಯಂಡೇ ಇಂಜತ್.

²¹ಅಕ್ಕ, ಯೇಸು ಅಯಿಂಗಡ ಕೂಡೆ ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ; ನಿಂಗ ಕ್‍ೕಟ ಈ ದೇವಡ ವಾಕ್ಯ ಇಂದ್ ಪೂರ್ತಿ ಆಚೀಂದ್ ಎಣ್ಣ್‌ಚಿ.

²²ಅಲ್ಲಿ ಉಳ್ಳ ಜನಯೆಲ್ಲ ಅಂವೊಂಗ್ ನಲ್ಲ ಪೆದ ಕೊಡ್‌ತಿತ್, ಅಂವೊಂಡ ಕರುಣೆಯುಳ್ಳ ತಕ್ಕ್‌ನ ಕ್‍ೕಟಿತ್ ಆಶ್ಚರ್ಯ ಆಯಿತ್: ಇಂವೊ ಯೋಸೇಫಂಡ ಮೋಂವೊನಲ್ಲಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

²³ಯೇಸು ಅಲ್ಲಿ ಉಳ್ಳ ಜನಕ್: ವೈದ್ಯ! ನೀಡ ಕಾಯಿಲೆನ ನೀನೇ ವಾಸಿ ಮಾಡಿಯ ಎಣ್ಣುವ ಈ ಗಾದೆನ ನಾಕ್ ನಿಂಗ ಎಣ್ಣಿತ್, ನಾನ್ ಕಪೆರ್ನೌಮ್‌ಲ್ ಮಾಡ್‌ನಾನ ನಿಂಗ ಕ್‍ೕಟದ್‍ನ ನೀಡ ಸ್ವಂತ ಊರ್‌ಲ್ ಸಹ ಮಾಡ್‍ೕಂದ್ ನಿಂಗ ನಾಕ್ ನೇರಾಯಿತ್ ಎಣ್ಣುವಿರ.

²⁴ಒರ್ ಪ್ರವಾದಿನ ದಾರೂ ಅಂವೊಂಡ ಊರ್‌ಲ್ ಸತ್ಕಾರ ಮಾಡುಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

²⁵ಇದ್‍ಲ್ಲತೆ ಎಲೀಯಂಡ ಕಾಲತ್‍ಲ್ ಮೂಂದರೆ ಕಾಲ ಮಳೆ ಬರತೆ, ದೇಶತ್‍ಲ್ ಬರಗಾಲ ಇಪ್ಪಕ, ಇಸ್ರಾಯೇಲ್‌ಲ್ ಎಚ್ಚಕೋ ವಿದವೆಯಿಂಗ ಇಂಜದ್ ನೇರ್.

²⁶ಆಚೇಂಗಿಯು, ಸೀದೋನ್ ದೇಶತ್‍ಲ್ ಸರೆಪ್ತ ಊರ್‌ಯಿಂಜ ಒರ್ ವಿದವೆಯಡ ಪಕ್ಕ ಎಲೀಯನ ಅಯಿಚದಲ್ಲತೆ ಬೋರೆ ದಾಡ ಪಕ್ಕವು ಅಯಿಚಿತ್‌ಲ್ಲೆ.

²⁷ಇದ್‍ಲ್ಲತೆ ಎಲೀಷ ಎಣ್ಣುವ ಪ್ರವಾದಿರ ಕಾಲತ್‍ಲ್ ಇಸ್ರಾಯೇಲ್‌ಲ್ ಎಚ್ಚಕೋ ಕುಷ್ಟರೋಗಿಯ ಇಂಜತ್. ಆಚೇಂಗಿ ಸಿರಿಯ ದೇಶಕಾರನಾನ ನಾಮಾನ್ ಅಲ್ಲತೆ ಬೋರೆ ದಾರ್‌ಕು ವಾಸಿಯಾಪಕ್ ಕಯಿಂಜತಿಲ್ಲೆಲ್ಲಾಂದ್ ನೇರಾಯಿತು ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

²⁸ಸಬಾಮಂದಿರತ್‍ಲ್ ಇಂಜ ಎಲ್ಲಾ ಜನಕ್ ಇದ್‍ನ ಕ್‍ೕಪಕ ದುಂಬ ಚೆಡಿ ಬಾತ್.

²⁹ಯೇಸುನ ಬಲಿಪಂಜಿ ಕುಂದ್‌ರ ಕೊಡಿಲ್ ಕೆಟ್ಟಿತ್ಂಜ ಊರ್‌ಕ್ ಎಡ್‌ತ ಪೋಯಿತ್ ಅಂವೊನ ಚಾಡ್‌ವಕ್ ನೋಟಿಯಂಡ್ ಇಂಜತ್.

³⁰ಆಚೇಂಗಿ ಜನಕ್ ಅಂವೊನ ಒಂದು ಮಾಡಕಯ್ಯತೆ ಯೇಸು ಅಯಿಂಗಡ ಮದ್ಯತ್ಂಜ ನಡ್ಂದ್ ಪೋಯಿರ್‌ತ್.

³¹ಪಿಂಞ ಯೇಸು ಕಪೆರ್ನೌಮ್ ಎಣ್ಣುವ ಒರ್ ಪಟ್ಟಣಕ್ ಪೋಯಿತ್, ಅಲ್ಲಿ ಅಂವೊ ಸಬ್ಬತ್ ದಿವಸವೆಲ್ಲಾ, ಜನಕ್ ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ.

³²ಅಂವೊಂಡ ಬೋದನೆ ಅದಿಕಾರ ಉಳ್ಳದಾಯಿತ್ಂಜಗುಂಡ್ ಅಲ್ಲಿಯತ್‍ರ ಜನಯೆಲ್ಲ ಆಶ್ಚರ್ಯ ಪಟ್ಟತ್.

³³ಒಮ್ಮ ಸಬಾಮಂದಿರತ್‍ಲ್ ಒರ್ ಕೂಳಿ ಪುಡ್‌ಚ ಮನುಷ್ಯ ಇಂಜತ್.

³⁴ಆ ಮನುಷ್ಯ ಯೇಸುನ ಕಾಂಬಕ: ಅಯ್ಯೋ! ನಜರೇತ್‌ರ ಯೇಸುವೇ, ನೀಕ್ ನಂಗಡಗುಂಡ್ ಎಂತ ಆಂಡು? ನಂಗಳ ಪಾಳ್ ಮಾಡ್‌ವಕಾಯಿತ್ ಬಂದಿತುಳ್ಳಿಯ? ನೀನ್ ದಾರ್‍ೕಂದ್ ನಾಕ್ ಗೊತ್ತುಂಡ್. ನೀನ್ ದೇವಡ ಪವಿತ್ರವಾನಂವೋಂದ್ ಜೋರಾಯಿತ್ ಕೂತ್ ಕೊಡ್‍ತತ್.

³⁵ಅದ್ಂಗ್ ಯೇಸು: ನೀನ್ ಮುಂಡತೆ ಇರ್! ಈ ಮನುಷ್ಯನ ಬುಟ್ಟಿತ್ ಪೋಂದ್ ಜೋರ್ ಮಾಡ್‍ಚಿ. ಅಕ್ಕ, ಆ ಕೂಳಿ ಆ ಮನಷ್ಯನ ಎಲ್ಲಾಡ ಮಿಂಞತ್‍ಲ್ ಅಡಿಕ್ ಚಾಡ್‍ವಂಜಿ ಅಂವೊಂಗ್ ಒಂದು ತೊಂದರೆ ಆಕತನೆಕೆ ಆ ಮನುಷ್ಯನ ಬುಟ್ಟಿತ್ ಪೋಯಿರ್‌ತ್.

³⁶ಅಲ್ಲಿ ಇಂಜ ಎಲ್ಲಾ ಜನಳು ಆಶ್ಚರ್ಯಪಟ್ಟಿತ್, ಇದ್ ಏದ್ ತರತ್‍ರ ತಕ್ಕ್! ಅದಿಕಾರತ್‍ಲ್ ಪಿಂಞ ಶಕ್ತಿಲ್ ಕೂಳಿಯಳ ಪೊರಮೆ ಪೋಪಕ್ ಆಜ್ಞೆ ಮಾಡ್‌ವ, ಕೂಳಿಯಳು ಪೊರಮೆ ಪೋಪಲ್ಲಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದಂಡ್ ಇಂಜತ್.

³⁷ಈ ಕ್‍ೕಳಿ ಸುತ್ತ್‌ಮುತ್ತ್‌ಲ್ ಉಳ್ಳ ಎಲ್ಲಾ ಜಾಗಕು ಪ್ರಸಿದ್ಧಿ ಆಚಿ.

³⁸ಪಿಂಞ ಯೇಸು ಸಬಾಮಂದಿರತ್‌ನ ಬುಟ್ಟಿತ್ ಸೀಮೋನಂಡ ಮನೆಕ್ ಪೋಚಿ. ಸೀಮೋನಂಡ ಮಾಂವಿಕ್ ಜೋರ್ ಪನಿ ಬಂದಿತ್ಂಜತ್. ಇವಡ ವಿಷಯತ್‍ನ ಅಯಿಂಗ ಯೇಸುಕ್ ಎಣ್ಣ್‌ಚಿ.

³⁹ಯೇಸು ಅವ ಬುದ್ದಂಡ್ ಉಳ್ಳಲ್ಲಿಕ್ ಪೋಯಿತ್ ಅವಡ ಮೇಲ್‌ಲ್ ಉಳ್ಳ ಪನಿನ ಬುಟ್ಟಿತ್ ಪೋಪಕ್ ಆಜ್ಞೆ ಮಾಡ್‍ಚಿ. ಪನಿ ಅವಳ ಬುಟ್ಟಿತ್ ಪೋಚಿ, ಅಕ್ಕಣೆ ಅವ ಎದ್ದಿತ್ ಅಯಿಂಗಕ್ ಸೇವೆ ಮಾಡ್‍ಚಿ.

⁴⁰ಸೂರ್ಯ ಮುಳ್‌ಗ್‌ನ ಪಿಂಞ ಜನಯೆಲ್ಲ ನಾನಾತರ ಕಾಯಿಲೆ ಉಳ್ಳ ಜನಳ ಕಾಕಿಯಂಡ್ ಬಾತ್. ಯೇಸು ಎಲ್ಲಾಡ ಮೇಲೆ ಕೈ ಬೆಚ್ಚಿತ್ ಅಯಿಂಗಳ ವಾಸಿ ಮಾಡ್‍ಚಿ.

⁴¹ಕೂಳಿಯಂಗ ನೀನ್ ನೇರಾಯಿತು ದೇವಡ ಮೋಂವೋಂದ್ ಕೂತ್ ಕೊಡ್‌ತಂಡ್ ದುಂಬ ಜನಳ ಬುಟ್ಟಿತ್ ಪೋಚಿ. ಆ ಕೂಳಿಯಂಗಕೆಲ್ಲ ಅಂವೊ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್[14] ಗೊತ್ತ್ಂಜಗುಂಡ್ ಅಂವೊ ಅಯಿಂಗಳ ಒರ್ ತಕ್ಕು ಪರಿವಕ್ಕಾಗಾಂದ್ ಆಜ್ಞೆ ಮಾಡ್‍ಚಿ.

⁴²ಬೊಪ್ಪ್ ಇಪ್ಪಕಾಪಕಲೇ ಆ ಊರ್‌ನ ಬುಟ್ಟಿತ್ ದಾರೂ ಇಲ್ಲತ ಮಣಬೂಮಿಕ್ ಪೋಚಿ. ಜನ ಎಲ್ಲಾರು ಯೇಸುನ ತ್‍ೕಡಿಯಂಡ್ ಅಂವೊಂಡ ಪಕ್ಕ ಬಂತ್ ಅಯಿಂಗಳ ಬುಟ್ಟಿತ್ ಎಲ್ಲಿಕು ಪೋಪಕ್ಕಾಗಾಂದ್ ನಿಪ್ಪ್‌ಚಿಟ್ಟತ್.

⁴³ಆಚೇಂಗಿ ಯೇಸು; ನಾನ್ ದೇವಡ ರಾಜ್ಯತ್‍ರ ನಲ್ಲ ಸುದ್ದಿನ ಬೋರೆ ಎಲ್ಲಾ ಊರ್‌ಕು ಪೋಯಿತ್ ಪ್ರಚಾರ ಮಾಡಂಡು, ಇದ್ಂಗಾಯಿತೇ ದೇವ ನನ್ನ ಅಯಿಚತ್‍ೕಂದ್ ಎಣ್ಣ್‌ಚಿ.

⁴⁴ಅನ್ನನೆ ಗಲಿಲಾಯ ನಾಡ್‍ಲೆಲ್ಲಾ ಉಳ್ಳ ಸಬಾಮಂದಿರಂಗಕ್ ಪೋಯಿತ್ ಬೋದನೆ ಮಾಡಿಯಂಡಿಂಜತ್.