Read Kodava ಲೂಕ 5 Bible Online

ಲೂಕ 5 - Kodava bible

ಲೂಕ 5

¹ಒರ್ ದಿವಸ ಯೇಸು ಗೆನೆಜರೇತ್[15] ಕೆರೆರ ಪಕ್ಕತ್‍ಲ್ ನಿಂದಂಡಿಪ್ಪಕ, ದೇವಡ ವಾಕ್ಯ ಕ್‍ೕಪಕಾಯಿತ್ ದುಂಬ ಜನ ಯೇಸುರ ಪಕ್ಕ ನೂಕಿಯಂಡ್ ಬಾತ್.

²ಅಕ್ಕ ದಂಡ್ ದೋಣಿ ಕಡಕರೆಲ್ ನಿಂದಂಡಿಂಜಾನ ಕಂಡತ್. ಅಲ್ಲಿ ಬೆಸ್ತಂಗ ಅದ್‍ನ ಬುಟ್ಟಿತ್ ಬಲೆನ ಕತ್ತಿಯಂಡ್ ಇಂಜತ್.

³ಅಲ್ಲಿ ಇಂಜ ದಂಡ್ ದೋಣಿಲ್, ಒರ್ ದೋಣಿ ಸೀಮೋನಂಡದಾಯಿತ್ಂಜತ್. ಆ ದೋಣಿಲ್ ಯೇಸು ಪತ್ತಿತ್, ಅದ್‍ನ ಕರೆಯಿಂಜ ಚೆನ್ನ ದೂರ ಉಂದ್‍ೕಂದ್ ಎಣ್ಣ್‌ಚಿ. ಯೇಸು ದೋಣಿಲ್ ಅಳ್‌ಪಂಜಿ ಜನಕ್ ಬೋದನೆ ಮಾಡ್‍ಚಿ.

⁴ಜನಕ್ ಬೋದನೆ ಮಾಡ್‍ನ ಪಿಂಞ ಚೆನ್ನ ಆಳವಾಯಿತುಳ್ಳ ಜಾಗಕ್ ದೋಣಿನ ಉಂದಿತ್ ಬಲೆನ ಬೀಚ್‍ೕಂದ್ ಸೀಮೋನಂಗ್ ಎಣ್ಣ್‌ಚಿ.

⁵ಅದ್ಂಗ್ ಸೀಮೋನ: ಒಡೆಯನೇ, ನಂಗ ಬೈಟ್ ಪೂರ್ತಿ ಬಲೆನ ಬೀಚಿತ್ ನೋಟ್‌ಚಿ, ನಂಗಕ್ ಒಂದು ಕ್‍ಟ್ಟಿತ್‌ಲ್ಲೆ, ಆಚೇಂಗಿಯು, ಇಕ್ಕ ನೀನ್ ಎಣ್ಣ್‌ವಗುಂಡ್ ಬಲೆನ ಬೀಜುವೀಂದ್ ಎಣ್ಣ್‌ಚಿ.

⁶ಅನ್ನನೆ ಅಯಿಂಗ ಬಲೆನ ಬೀಜ್‌ವಕ ಬಲೆ ಕೀತಿಪೋಪಚ್ಚಕ್ ದುಂಬ ಮೀನ್ ಬಲೇಕ್ ಬುದ್ದತ್.

⁷ಅಕ್ಕ, ಪಕ್ಕತ್ ದೋಣಿಲ್ ಇಂಜ ಕೂಟಾಳಿಯಂಗಕ್ ಸನ್ನೆ ಮಾಡಿತ್ ಸಹಾಯ ಮಾಡ್‌ವಕ್ ಕಾಕ್‍ಚಿ. ಅಯಿಂಗ ಎಲ್ಲಾರು ಬಂತ್ ದಂಡ್ ದೋಣಿ ಮುಳ್‌ಗ್‌ವನೆಕೆ ದುಂಬ ಮೀನ್‌ನ ದುಂಬ್‍ಚಿಟ್ಟತ್.

⁸ಸೀಮೋನ ಪೇತ್ರ ಇದ್‍ನೆಲ್ಲಾ ನೋಟಿತ್, ಸ್ವಾಮೀ! ನಾನ್ ಬಲ್ಯ ಪಾಪ ಮಾಡ್‍ನಂವೊ, ನೀನ್ ಇಲ್ಲಿಂಜ ಪೋಯಿರ್‍ೕಂದ್, ಯೇಸುರ ಕಾಲ್‌ಕ್ ಬುದ್ದತ್.

⁹ದುಂಬ ಮೀನ್ ಪುಡ್‌ಚಗುಂಡ್, ಅಂವೊ ಪಿಂಞ ಅಂವೊಂಡ ಕೂಟ್‌ಕಾರಂಗ ಎಲ್ಲಾರ್‌ಕು ದುಂಬ ಆಶ್ಚರ್ಯ ಆಯಿತ್ ಅನ್ನನೆ ಎಣ್ಣ್‌ಚಿ.

¹⁰ಜೆಬೆದಾಯಂಡ ಕ್‌ಣ್ಣ ಮಕ್ಕಳಾನ ಸೀಮೋನಂಡ ಕೂಟ್‍ಕಾರ ಯೋಹಾನ ಪಿಂಞ ಯಾಕೋಬಂಗ್ ಸಹ ಇನ್ನನೆ ಆಶ್ಚರ್ಯ ಆಚಿ. ಅಕ್ಕ ಯೇಸು ಸೀಮೋನನ ನೋಟಿತ್, ಬೊತ್ತತೆ! ಇಂಞು ಮಿಂಞಕ್ ನೀನ್ ಮೀನ್ ಪುಡಿಪಕ್ ಬದ್‍ಲಾಯಿತ್ ಮನುಷ್ಯಂಗಳ ನಾಡ ಪಕ್ಕ ಕೊಂಡ್ ಬಪ್ಪಂವೊನಾಯಿತ್‌ಪ್ಪಿಯಾಂದ್ ಎಣ್ಣ್‌ಚಿ.

¹¹ಅಯಿಂಗ ದೋಣಿಯಳ ಕಡಕರೆಲ್ ನಿಪ್ಪ್‌ಚಿಟ್ಟಿತ್, ಎಲ್ಲಾನ ಬುಟ್ಟಿತ್ ಯೇಸುರ ಕೂಡೆ ಪೋಚಿ.

¹²ಯೇಸು ಒರ್ ಪಟ್ಟಣತ್‍ಲ್ ಇಪ್ಪಕ, ಕುಷ್ಟರೋಗ ದುಂಬಿತ್ಂಜ ಒರ್ ಮನುಷ್ಯ ಯೇಸುನ ಕಂಡದು ನೆಲಕ್ ಬುದ್ದಿತ್: ಒಡೆಯನೇ, ನೀಕ್ ಕುಶಿ ಉಂಡೇಂಗಿ ನನ್ನ ಶುದ್ದ ಮಾಡ್‌ವಕ್ ನೀಕ್ ಕಯ್ಯೂಂದ್ ಬೋಡಿಯಂಡತ್.

¹³ಯೇಸು ಅಂವೊಂಡ ಕೈಯಿನ ನೀಟುವಂಜಿ: ಅಂವೊನ ಮುಟ್ಟಿತ್, ನಾಕ್ ಕುಶಿ ಉಂಡ್, ನೀಡ ಕುಷ್ಟರೋಗ ಶುದ್ದ ಆಡ್‍ೕಂದ್ ಎಣ್ಣ್‌ಚಿ. ಅಚ್ಚಕ್ ಬೆರಿಯ ಅಂವೊಂಡ ಕುಷ್ಟರೋಗ ಶುದ್ದ ಆಚಿ.

¹⁴ಈ ವಿಷಯತ್‍ನ ದಾರ್‌ಕು ಎಣ್ಣತೆ. ನೀನ್ ಯಾಜಕಂಡ ಪಕ್ಕ ಪೋಯಿತ್ ನಿನ್ನ ಕಾಂಬ್‍ಚಿಡ್; ನೀನ್ ವಾಸಿ ಆಯಿತುಳ್ಳಾಂಗ್ ಎಲ್ಲಾರ್‌ಕು ಸಾಕ್ಷಿಯಾಯಿತ್ ನ್ಯಾಯಪ್ರಮಾಣತ್‍ಲ್ ಎಣ್ಣಿತ್ತುಳ್ಳ ಕಾಣಿಕೆನ ಕೊಡ್‍ೕಂದ್ ಹುಕುಮ್ ಕೊಡ್‍ತತ್.

¹⁵ಆಚೇಂಗಿಯು ಯೇಸುರ ಕೀರ್ತಿ ಇಂಞು ದುಂಬ ಪ್ರಸಿದ್ಧಿಯಾಚಿ. ಆನಗುಂಡ್ ಜನಡ ಕೂಟ ಯೇಸುರ ಬೋದನೆನ ಕ್‍ೕಪಕು, ಅಯಿಂಗಡ ಕಾಯಿಲೆ ವಾಸಿ ಆಪಕು ಅಂವೊಂಡ ಪಕ್ಕ ಬಾತ್.

¹⁶ಆಚೇಂಗಿಯು, ಯೇಸು ಅಕ್ಕಕ್ಕ, ಜನ ದಾರೂ ಇಲ್ಲತ ಜಾಗಕ್ ಪೋಯಿತ್ ಪ್ರಾರ್ಥನೆ ಮಾಡ್‌ವಯಿಂಜತ್.

¹⁷ಒರ್ ದಿವಸ ಯೇಸು ಬೋದನೆ ಮಾಡಿಯಂಡಿಪ್ಪಕ, ಗಲಿಲಾಯ, ಯೂದಾಯ ನಾಡ್‍ರ ಎಲ್ಲಾ ಗ್ರಾಮತ್ಂಜ ಪಿಂಞ ಯೆರೂಸಲೇಮ್ ಪಟ್ಟಣತ್ಂಜ ಬಂದ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಂಗ ಅಲ್ಲಿ ಅಳ್‌ತಡಿಂಜತ್. ಆ ಸಮಯತ್‍ಲ್ ಕಾಯಿಲೆಕಾರಳ ವಾಸಿ ಮಾಡ್‌ವಕ್ ದೇವಡ ಶಕ್ತಿ ಯೇಸುರ ಮೇಲೆ ಇಂಜತ್.

¹⁸ಅಕ್ಕಣೆಕೆ ಚೆನ್ನ ಜನ, ಪಾರ್ಶ್ವವಾಯುಲ್ ನರಳಿಯಂಡಿಂಜ ಒರ್ ಮನುಷ್ಯನ ಕಟ್ಟ್‌ಲ್ ಇಟ್ಟಿತ್ ಯೇಸುರ ಪಕ್ಕ ಕೊಂಡ್‌ಬಂತ್, ಒಳ್‍ಕ್ ಪೋಪಕು, ಯೇಸುರ ಮಿಂಞ ಇಡ್‌ವಕು ನೋಟ್‌ಚಿ.

¹⁹ದುಂಬ ಜನ ಇಂಜಗುಂಡ್ ಆ ಮನುಷ್ಯನ ಯೇಸುರ ಪಕ್ಕ ಎಡ್‌ತ ಪೋಪಕ್ ಕಯ್ಯತೆಗುಂಡ್, ಅಯಿಂಗ ಮೋಂದಾಯತ್‌ನ ತೂತ ಮಾಡಿತ್, ಆ ಮನುಷ್ಯ ಬುದ್ದಡಿಂಜ ಮೆತ್ತೆನ ಅಡಿಕ್ ಇಳ್‌ಪಿತ್ ಯೇಸುರ ಮಿಂಞಕ್ ಇಟ್ಟತ್.

²⁰ಯೇಸು ಅಯಿಂಗಡ ನಂಬಿಕೇನ ಕಂಡಿತ್, ಆ ಮನುಷ್ಯಂಗ್: ನಾಡ ಸ್ನೇಹಿತನೇ, ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ಚಿ.

²¹ಅಲ್ಲಿ ಇಂಜ ಚೆನ್ನ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ: ದೇವ ದೂಷಣೆ ಎಣ್ಣುವ ಈ ಮನುಷ್ಯ ದಾರ್? ದೇವ ಒಬ್ಬನ ಬುಟ್ಟಿತ್ ಬೋರೆ ದಾರ್‌ಕ್ ಪಾಪತ್‍ನ ಮನ್ನಿಪ್ಪಕ್ ಕಯ್ಯೂಂದ್ ಅಯಿಂಗಯಿಂಗಳೇ ಗೇನ ಮಾಡಿಯಂಡಿಂಜತ್.

²²ಅಕ್ಕಣೆಕೆ ಯೇಸುಕ್ ಈ ಮನುಷ್ಯಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾಯಿತ್, ಅಯಿಂಗಳ ನೋಟಿತ್: ನಿಂಗಡ ಹೃದಯತ್‍ಲ್ ಎನ್ನಂಗ್ ಇಂತದೆಲ್ಲ ಗೇನ ಮಾಡ್‌ವಿರಾಂದ್ ಕ್‍ೕಟತ್.

²³ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ವದ್ ಸುಲಬವ ಅಥವ ನೀಕ್ ವಾಸಿ ಆಚಿ, ಎದ್ದಿತ್ ನಡೇಂದ್ ಎಣ್ಣುವದ್ ಸುಲಬವ?

²⁴ಮನುಷ್ಯಂಗಡ ಪಾಪತ್‍ನ ಮನ್ನಿಚಿಡ್‌ವಕ್ ಮನುಷ್ಯಕುಮಾರಂಗ್ ಈ ಬೂಮಿಲ್ ಅದಿಕಾರ ಉಂಡ್‍ೕಂದ್ ನಾನ್ ನಿಂಗಕ್ ಕಾಟಿತಪ್ಪೀಂದ್ ಎಣ್ಣಿತ್, ಯೇಸು ಕಾಯಿಲೆಲ್ ಇಂಜ ಮನುಷ್ಯನ ನೋಟಿತ್: ಏಳ್, ನೀಡ ಕಡ್‌ಕೆನ ಎಡ್‍ತಂಡ್, ನೀಡ ಮನೆಕ್ ಪೋಂದ್ ಎಣ್ಣ್‌ಚಿ.

²⁵ಅಕ್ಕಣೆಕ್, ಆ ಮನುಷ್ಯ ಎದ್ದಿತ್, ತಾಂಡ ಕಡ್‌ಕೆನ ಸುತ್ತಿಯಂಡ್ ದೇವನ ತುದಿಚಂಡ್ ತಾಂಡ ಮನೆಕ್ ಪೋಚಿ.

²⁶ಅಕ್ಕ ಅಲ್ಲಿ ಉಳ್ಳ ಜನ ಎಲ್ಲಾರ್‌ಕು ಆಶ್ಚರ್ಯವು ಆಯಿತ್, ಪೋಡಿಯು ಆಯಿತ್, ಇಂತ ಒರ್ ಅದ್ಬುತ ಕಾರ್ಯತ್‍ನ ನಂಗ ಕಂಡಿತೇ ಇಲ್ಲೇಂದ್ ಎಣ್ಣಿತ್, ದೇವನ ತುದಿಪಕ್ ಸುರು ಮಾಡ್‍ಚಿ.

²⁷ಇದಾನ ಪಿಂಞ ಯೇಸು ಪೊರಮೆ ಪೋಯಂಡಿಪ್ಪಕ ಕಂದಾಯ ಎಡ್‌ಪ ಲೇವಿ ಎಣ್ಣ್‌ವಂವೊ ಅಂವೊಂಡ ಕಛೇರಿಲ್ ಅಳ್‌ತಂಡಿಪ್ಪದ್‍ನ ಕಂಡತ್. ಯೇಸು ಅಂವೊನ ಕಂಡದು: ನಾಡ ಬಯ್ಯ ಬಾಂದ್ ಎಣ್ಣ್‌ಚಿ.

²⁸ಅಕ್ಕ ಅಂವೊ ಎದ್ದಿತ್ ಅಂವೊಂಡ ಬಯ್ಯಕ್ ಪೋಚಿ.

²⁹ಬಯ್ಯಂಜಿ ಯೇಸುಕ್ ಲೇವಿರ ಮನೆಲ್ ಗದ್ದಾಳ ಇಂಜತ್. ಲೇವಿರ ಮನೆಲ್ ದುಂಬ ಕಂದಾಯ ಎಡ್‌ಪ ಜನ ಪಿಂಞ ಬೋರೆ ಜನ ಇಂಜತ್.

³⁰ಚೆನ್ನ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ, ಯೇಸುರ ಶಿಷ್ಯಂಗಡ ಪಕ್ಕ ಬಂತ್: ನಿಂಗ ಎನ್ನಂಗ್ ಕಂದಾಯ ಎಡ್‍ಪಯಿಂಗ ಪಿಂಞ ಸಮಾಜ ಪಾಪಿಯಿಂಗಾಂದ್ ಎಣ್ಣುವ ಜನಡ ಕೂಡೆ ಉಂಡಂಡ್ ಕುಡಿಚಂಡ್ ಉಂಡ್‍ೕಂದ್ ಕ್‍ೕಟತ್.

³¹ಅದ್ಂಗ್ ಯೇಸು: ದಾರ್ ಸೌಕ್ಯತ್‌ಲ್ ಉಂಡೋ ಅಯಿಂಗಕ್ ವೈದ್ಯ ಬೋಂಡ, ದಾರ್‌ಕ್ ಸೌಕ್ಯ ಇಲ್ಲತೆ ಉಂಡೋ ಅಯಿಂಗಕ್ ಮಾತ್ರ ವೈದ್ಯ ಬೋಂಡಿಯೆ.

³²ನೀತಿವಂತಯಿಂಗಳ ಅಲ್ಲ, ಆಚೇಂಗಿ ಪಾಪಿಯಂಗ ಪಾಪತ್ಂಜ ಪಶ್ಚಾತಾಪ ಪಡ್‌ವಕಾಯಿತೇ ನಾನ್ ಬಂದಿಯೇಂದ್ ಎಣ್ಣ್‌ಚಿ.

³³ಯೋಹಾನಂಡ ಶಿಷ್ಯಂಗ ಅಕ್ಕಕ್ಕ ಪಟ್ಟಣಿ ನಿಂದಂಡ್ ಪ್ರಾರ್ಥನೆ ಮಾಡಿಯಂಡುಂಡ್. ಅನ್ನನೆ ಫರಿಸಾಯಂಗಡ ಶಿಷ್ಯಂಗಳು ಪಟ್ಟಣಿ ನಿಪ್ಪಂಜಿ ಪ್ರಾರ್ಥನೆ ಮಾಡಿಯಂಡುಂಡ್. ಆಚೇಂಗಿ ನೀಡ ಶಿಷ್ಯಂಗ ಉಂಡಂಡ್ ಕುಡಿಚಂಡ್ ಉಂಡಲ್ಲಾಂದ್ ಅಯಿಂಗ ಅಂವೊನ ಕ್‍ೕಟತ್.

³⁴ಅದ್ಂಗ್ ಅಂವೊ: ಮಂಗಲಕಾರ ಇಕ್ಕಣಕೆ ಮಂಗಲಕಾರಂಡ ಚಂಙಾದಿಯಳ ನಿಂಗ ಪಟ್ಟಣಿ ನಿಪ್ಪಕ್ ಮಾಡ್‍ಚಿಡ್‌ವಕ್ ಕಯ್ಯುವ?

³⁵ಮಂಗಲಕಾರನ ಅಯಿಂಗಡ ಕೂಟ್‌ಂಜ ಕಾಕಿಯಂಡ್ ಪೋಪ ಸಮಯ ಬಪ್ಪ, ಅಕ್ಕ ಅಯಿಂಗ ಉಪವಾಸ ಮಾಡ್‌ವಾಂದ್ ಎಣ್ಣ್‌ಚಿ.

³⁶ಪಿಂಞ ಯೇಸು ಇಂಞೊರ್ ಕಥೇರ ರೂಪತ್‍ನ ಅಯಿಂಗಕ್ ಎಣ್ಣ್‌ಚಿ. ದಾರೂ ಪುದಿಯ ಕೋಟ್‍ನ ಕೀತಿತ್ ಪಳೆಯ ಕೋಟ್‌ಕ್ ಅಡ್ಡಬೆಚ್ಚಿತ್ ಪೊಲ್ಲ್‌ಚಿಡುಲೆ. ಅನ್ನೆನೆ ಮಾಡ್‍ಚೇಂಗಿ ಪುದಿಯ ಕೋಟ್‌ರ ಬಟ್ಟೆ ಪಳೆಯ ಕೋಟ್‌ಕ್ ಸರಿ ಬಬ್ಬ್‌ಲೆ, ಪುದಿಯದ್ ಪಳೆಯದ್‌ನ ಕೀತಿರ್‍ವ.

³⁷ದಾರೂ ಪುದಿಯದಾಯಿತ್ ಮಾಡ್‍ನ ದ್ರಾಕ್ಷಿರಸತ್‍ನ ಪಳೆಯ ಚರ್ಮತ್‌ರ ಚೀಲಕ್ ಬೂಕ್‌ಲೆ, ಅನ್ನನೆ ಮಾಡ್‍ಚೇಂಗಿ ಚರ್ಮತ್‌ರ ಚೀಲ ಒಡಂದ್ ಪೋಪ. ಚೀಲ ಒಡಂದ್ ಪೋಯಿತ್ ದ್ರಾಕ್ಷಿರಸವು ಚೆಲ್ಲಿಪೋಪ.

³⁸ಆಂಡ ಬದ್‍ಲ್ ಪುದಿಯ ದ್ರಾಕ್ಷಿರಸತ್‍ನ ಪುದಿಯ ಚೀಲಕ್ ಬೂಕಂಡು. ಅಕ್ಕ ದಂಡು ಚಾಯಿಪ್ಪ.

³⁹ಪಳೆಯ ದ್ರಾಕ್ಷಿರಸತ್‍ನ ಕುಡ್‌ಚ ಪಿಂಞ ದಾರ್‌ಕು ಪುದಿಯ ದ್ರಾಕ್ಷಿರಸ ಬೋಂಡೂಂದ್ ಆಪುಲೆ. ಪಳೆಯದೇ ಚಾಯಿತೆ ಉಂಡ್‍ೕಂದ್ ಎಣ್ಣುವಾಂದ್ ಯೇಸು ಎಣ್ಣ್‌ಚಿ.