Read Kodava ಲೂಕ 7 Bible Online

ಲೂಕ 7 - Kodava bible

ಲೂಕ 7

¹ಯೇಸು ಅಂವೊಂಡ ವಾಕ್ಯತ್‍ನ ಜನಕ್ ಬೋದನೆ ಮಾಡ್‍ನ ಪಿಂಞ ಕಪೆರ್ನೌಮ್‍ಕ್ ಪೋಚಿ.

²ಅಲ್ಲಿ ನೂರ್ ಸಿಪಾಯಿಯಂಗಕ್ ಅದಿಕಾರಿಯಾಯಿತ್ಂಜ ರೋಮ್ ರಾಜ್ಯತ್‍ರ ಒರ್ ಅದಿಕಾರಿಕ್ ಕುಶಿಯುಳ್ಳ ಒರ್ ಆಳ್‍ಕ್ ದುಂಬ ಕಾಯಿಲೆ ಬಂದಿತ್ ಚಾವನೆಕೆ ಇಂಜತ್.

³ಈ ಅದಿಕಾರಿಕ್ ಯೇಸು ಬಂದದ್ ಗೊತ್ತಾನಗುಂಡ್, ಅಂವೊ, ಬಂದಿತ್ ತಾಂಡ ಆಳ್‌ನ ವಾಸಿ ಮಾಡಂಡೂಂದ್ ಬೋಡ್‍ವಕ್ ಯೆಹೂದ್ಯ ಮುಕ್ಯಸ್ತಂಗಳ ಅಂವೊಂಡ ಪಕ್ಕ ಅಯಿಚತ್.

⁴ಅಯಿಂಗ ಬಂದಿತ್: ನೀನ್ ಕನಿಕರ ಕಾಟ್‍ವಕ್ ಈ ಮನುಷ್ಯ ಯೋಗ್ಯನಾಯಿತುಂಡ್.

⁵ಅಂವೊಂಗ್ ನಂಗಡ ಜನಳ ದುಂಬ ಕುಶಿ ಉಂಡ್, ಅಂವೊ ನಂಗಕ್ ಒರು ಸಬಾಮಂದಿರತ್‌ನ ಸಹ ಕೆಟ್ಟ್‌ಚೀಂದ್ ಎಣ್ಣಿತ್, ಯೇಸುರ ಪಕ್ಕ ಬೋಡ್‍ಚಿ.

⁶ಅಕ್ಕ ಯೇಸು, ಅಯಿಂಗಡ ಕೂಡೆ ಪೋಚಿ. ಯೇಸು ಅಂವೊಂಡ ಮನೆರ ಪಕ್ಕ ಎತ್ತ್‌ವಕ, ನೂರ್ ಸಿಪಾಯಿಯರ ಅದಿಕಾರಿ ತಾಂಡ ಸ್ನೇಹಿತಯಂಗಳ ನೋಟಿತ್: ನಿಂಗ ಯೇಸುರ ಪಕ್ಕ ಪೋಯಿತ್, ಒಡೆಯನೇ, ನೀನ್ ಅಲ್ಲಿಕ್ ಬಪ್ಪಕ್ ತೊಂದರೆ ಎಡ್‍ಕತೆ, ನೀನ್ ನಾಡ ಮನೆಕ್ ಬಪ್ಪಕ್ ನಾನ್ ಯೋಗ್ಯನಲ್ಲ;

⁷ನಾನ್ ನೀಡ ಪಕ್ಕ ಬಪ್ಪಕೂ ನನ್ನ ಯೋಗ್ಯನಾಯಿತ್ ಗೇನ ಮಾಡುಲೆ; ನೀನ್ ಒರ್ ತಕ್ಕ್ ಮಾತ್ರ ಎಣ್ಣ್, ಅಕ್ಕ ನಾಡ ಆಳ್ ವಾಸಿಯಾಪ.

⁸ನಾನ್ ಬೋರೆಯಿಂಗಡ ಅದಿಕಾರತ್‍ರ ಅಡಿಲ್ ಉಂಡೇಂಗಿಯು, ನಾಡ ಅದಿಕಾರತ್‍ಲ್ ಸಹ ಸಿಪಾಯಿಯಂಗ ಉಂಡ್; ನಾನ್ ಒಬ್ಬನ ಪೋಂದ್ ಎಣ್ಣ್‌ಚೇಂಗಿ ಅಂವೊ ಪೋಪ, ಬೋರೆ ಒಬ್ಬನ ಬಾಂದ್ ಎಣ್ಣ್‌ಚೇಂಗಿ ಅಂವೊ ಬಪ್ಪ; ಇನ್ನನೆ ಮಾಡ್‍ೕಂದ್ ಒಬ್ಬಂಗ್ ಎಣ್ಣುವಕ, ಅಂವೊ ಅನ್ನನೆ ಮಾಡ್‌ವಾಂದ್ ನಾನ್ ಎಣ್ಣಿಯೇಂದ್ ಯೇಸುಕ್ ಎಣ್ಣುವಕ್ ಅಯಿಂಗಳ ಅಯಿಚತ್.

⁹ಯೇಸು ಇದ್‍ನ ಕ್‍ೕಟಿತ್ ಆಶ್ಚರ್ಯ ಪಟ್ಟತ್. ಅಲ್ಲಿ ಉಳ್ಳ ಜನಳೆಲ್ಲ ನೋಟ್‌ವಂಜಿ: ಇಸ್ರಾಯೇಲ್ ಜನತ್‍ಲ್ ಸಹ ಇನ್ನತ ಒರ್ ನಂಬಿಕೇನ ನಾನ್ ಕಂಡಿತ್‌ಲ್ಲೇಂದ್ ಎಣ್ಣ್‌ಚಿ.

¹⁰ಈ ಸುದ್ದಿನ ಎಡ್‍ತಂಡ್ ಪೋನ ಜನ, ಅದಿಕಾರಿಯಡ ಮನೆಕ್ ಬಪ್ಪಕ, ಆ ಆಳ್‍ರ ಕಾಯಿಲೆ ವಾಸಿ ಆಯಿತ್ಂಜಾನ ಕಂಡತ್.

¹¹ಇದ್ ಆನ ಪಿಂಞ, ಯೇಸು ಅಲ್ಲಿಂಜ ನಾಯಿನ್ ಎಣ್ಣುವ ಊರ್‌ಕ್ ಪೋಚಿ; ಅಂವೊಂಡ ಕೂಡೆ ಅಂವೊಂಡ ಶಿಷ್ಯಂಗ ಪಿಂಞ ದುಂಬ ಜನಳು ಪೋಚಿ.

¹²ಯೇಸು, ಊರ್‌ರ ಪಡಿರ ಪಕ್ಕ ಬಪ್ಪಕಾಪಕ, ಜನ ಒರ್ ಚಾವ್ ತಡೀನ ಪೂಪಕ್ ಎಡ್‍ತಂಡ್ ಬಂದಂಡಿಂಜತ್. ಚತ್ತ್ ಪೋನಂವೊ ಅಂವೊಂಡ ಅವ್ವಕ್ ಒರೇ ಮೋಂವೊನಾಯಿತ್ಂಜತ್. ಅವಳೂ ವಿದವೆಯಾಯಿತ್ಂಜತ್. ಆ ಪೊಣ್ಣಾಳ್‍ರ ಕೂಡೆ ದುಂಬ ಜನ ಬಂದಂಡಿಂಜತ್.

¹³ಒಡೆಯ ಅವಳ ಕಂಡದು, ಕನಿಕರ ಪಟ್ಟಿತ್: ಮೊರಡತೆ ಎಣ್ಣಿಯಂಡ್,

¹⁴ಚಾವ್ ತಡೀನ ಎಡ್‍ತಂಡ್ ಪೋಯಂಡಿಂಜ ಪೊಟ್ಟಿರ ಪಕ್ಕ ಪೋಯಿತ್ ಅದ್‍ನ ಮುಟ್ಟ್‌ಚಿ; ಚಾವ್ ತಡೀನ ಪೊರ್‌ತಂಡಿಂಜಯಿಂಗ ನಿಂದತ್; ಅಕ್ಕ ಅಂವೊ, ಬಾಲೆಕಾರನೇ, ಏಳ್ಂದ್ ನಾನ್ ನೀಕ್ ಎಣ್ಣುವೀಂದ್ ಎಣ್ಣ್‌ಚಿ.

¹⁵ಚತ್ತಂವೊ ಎದ್ದಿತ್ ಅಳ್‌ತಂಡ್ ತಕ್ಕ್‌ಪರಿವಕ್ ಸುರು ಮಾಡ್‍ಚಿ. ಯೇಸು ಅಂವೊನ ಅಂವೊಂಡ ಅವ್ವಂಗ್ ಒಪ್ಪ್‌ಚಿಟ್ಟತ್.

¹⁶ಅಲ್ಲಿ ಉಳ್ಳಯಿಂಗಕೆಲ್ಲಾ ಪೋಡಿ ಆಯಿತ್, ನಂಗಡ ಕೂಟ್‌ಲ್ ಒರ್ ಬಲ್ಯ ಪ್ರವಾದಿ ಎದ್ದಿತುಂಡ್; ದೇವ ತಾಂಡ ಜನಳ ಕಾಪಾಡ್‌ವಕ್ ಬಾತ್‍ೕಂದ್ ದೇವನ ತುದಿಪಕ್ ಸುರು ಮಾಡ್‍ಚಿ.

¹⁷ಯೇಸುರ ಈ ಸುದ್ದಿ ಯೂದಾಯ ನಾಡ್ ಪಿಂಞ ಅದ್ಂಡ ಸುತ್ತ್‌ಲ್ ಉಳ್ಳ ಎಲ್ಲಾ ನಾಡ್‍ಕೂ ಹರಡಿಪೋಚಿ.

¹⁸ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಈ ಎಲ್ಲಾ ಸುದ್ದಿನ ಅಂವೊಂಗ್ ಎಣ್ಣ್‌ಚಿ. ಅದ್‍ನ ಕ್‍ೕಪದು, ತಾಂಡ ಶಿಷ್ಯಂಗಡಡೆಲ್ ದಂಡ್ ಶಿಷ್ಯಂಗಳ ಕಾಕಿತ್,

¹⁹ನಿಂಗ ಯೇಸುರ ಪಕ್ಕ ಪೋಯಿತ್: ಬಪ್ಪಕಿಂಜಂವೊ ನೀನಾ? ಅಥವ ಬೋರೆ ಒಬ್ಬ ಬಪ್ಪಕ್ ಪಾರಕಾಕಂಡುವಾಂದ್ ಕ್‍ೕಳೀಂದ್ ಎಣ್ಣಿತ್ ಅಯಿಚತ್.

²⁰ಅನ್ನನೆ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಯೇಸುರ ಪಕ್ಕ ಬಂದಿತ್: ಬಪ್ಪಕಿಂಜಂವೊ ನೀನಾ? ಅಥವ ಬೋರೆ ಒಬ್ಬ ಬಪ್ಪಕ್ ಪಾರಕಾಕಂಡುವಾಂದ್ ಕ್‍ೕಪಕಾಯಿತ್ ಯೋಹಾನ ನಂಗಳ ನೀಡ ಪಕ್ಕ ಅಯಿಚತ್‍ೕಂದ್ ಎಣ್ಣ್‌ಚಿ.

²¹ಆ ಸಮಯತ್‍ಲ್ ಯೇಸು ದುಂಬ ಕಾಯಿಲೆಸ್ತಂಗಳ, ರೋಗಿಯಳ, ಕೂಳಿ ಪುಡ್‌ಚಯಿಂಗಳ ವಾಸಿ ಮಾಡಿತ್, ದುಂಬ ಕುರ್‌ಡಂಗಕ್ ಕಣ್ಣ್ ಕಾಂಬನೆಕೆ ಮಾಡಿಯಂಡಿಂಜತ್.

²²ಯೇಸು ಯೋಹಾನಂಡ ಶಿಷ್ಯಂಗಕ್: ನಿಂಗ ಇಲ್ಲಿ ಎಂತೆಲ್ಲಾ ಕಂಡಿರೋ, ಕ್‍ೕಟಿರೊ ಅದ್‍ನ ಯೋಹಾನಂಗ್ ಎಣ್ಣಿ. ಕುರ್‌ಡಂಗ ಕಂಡಂಡುಂಡ್, ಕುಂಟಂಗ ನಡ್ಂದಂಡುಂಡ್, ಕುಷ್ಟರೋಗಿಯಂಗ ವಾಸಿ ಆಯಂಡುಂಡ್, ಕಿವ್‍ಡಂಗ್ ಕ್‍ೕಟಂಡು, ಚತ್ತಯಿಂಗ ಎದ್ದಡುಂಡ್, ಗರೀಬಂಗಕ್ ನಲ್ಲ ಸುದ್ದಿ ಪ್ರಚಾರ ಆಯಂಡುಂಡ್.

²³ನಾಡ ಮೇಲೆ ಅನುಮಾನ ಇಲ್ಲತಂವೊ ಆಶೀರ್ವಾದ ಪಡ್ಂದವೋಂದ್ ಅಯಿಂಗಕ್ ಎಣ್ಣ್‌ಚಿ.

²⁴ಯೋಹಾನಂಡ ಶಿಷ್ಯಂಗ ಪೋನ ಪಿಂಞ ಯೇಸು ಯೋಹಾನಂಡ ವಿಷಯತ್‍ನ ಜನಡ ಕೂಡೆ ತಕ್ಕ್ ಪರ್ಂದತ್. ಎಂತದ್‍ನ ಕಾಂಬಕಾಯಿತ್ ನಿಂಗ ಮಣಬೂಮಿಕ್ ಪೋಯಿತ್ಂಜಿರ? ಗಾಳಿಯಿಂಜ ಅಲ್ಲಾಡುವ ಪಿಲ್ಲ್‌ನ ನೋಟ್‌ವಕಾಯಿತಾ?

²⁵ಇಲ್ಲತಪೋಚೇಂಗಿ, ಎಂತದ್‍ನ ನಿಂಗ ಕಾಂಬಕ್ ಪೋಯಿತ್ಂಜಿರ? ನಲ್ಲ ಚಾಯುಳ್ಳ ಬಟ್ಟೇನ ಇಟ್ಟಂಡುಳ್ಳ ಒರ್ ಮನುಷ್ಯನ ಕಾಂಬಕ್ ಪೋಯಿರ? ಅಲಂಕಾರತ್‍ರ ಬಟ್ಟೆ ಇಟ್ಟಿತ್ ಆಡಂಬರತ್‌ಲ್ ಬದ್‍ಕ್‍ವ ಜನಯೆಲ್ಲ ಅರಮನೇಲ್ ಉಂಡಲ್ಲ.

²⁶ಪಿಂಞ ಎಂತದ್‍ನ ಕಾಂಬಕ್ ಪೋಯಿರ? ಪ್ರವಾದಿನ ನೋಟ್‍ವಕ್ ಪೋಯಿರ? ಅಕ್ಕು, ಅಂವೊ ಪ್ರವಾದಿಕಿಂಜಲು ಬಲ್ಯಂವೋಂದ್ ನಾನ್ ನಿಂಗಕ್ ಎಣ್ಣ್‌ವಿ.

²⁷ನೋಟಿ, ನಾನ್ ನಾಡ ದೂತನ ನಿಂಗಕ್ಂಜ ಮಿಂಞ ಅಯಿಪಿ; ಅಂವೊ ನೀಕ್ ಮಿಂಞ ಪೋಯಿತ್, ನೀಡ ಬಟ್ಟೇನ ತಯಾರ್ ಮಾಡ್‌ವಾಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳದ್ ಇಂವೊಂಡ ವಿಷಯವೇ.[19]

²⁸ಈ ಲೋಕತ್‍ಲ್ ಪುಟ್ಟ್‌ನಯಿಂಗಡಡೆಲ್ ಯೋಹಾನಕಿಂಜ ಬಲ್ಯ ಪ್ರವಾದಿ ದಾರೂ ಇಲ್ಲೆ. ಆಚೇಂಗಿಯು ದೇವಡ ರಾಜ್ಯತ್‍ಲ್ ಚೆರಿಯಂವೊನಾಯಿತುಳ್ಳಂವೊ ಅಂವೊಗಿಂಜ ಬಲ್ಯಂವೊನಾಯಿತುಂಡ್‍ೕಂದ್ ನಾನ್ ನಿಂಗಕ್ ಎಣ್ಣ್‌ವಿ.

²⁹ಎಲ್ಲಾರು ಯೋಹಾನಂಡ ಬೋದನೆನ ಕ್‍ೕಟತ್. ಮುಕ್ಯವಾಯಿತ್ ಕಂದಾಯ ಎಡ್‌ಪ ಜನಳು ಯೋಹಾನಂಡ ಉಪದೇಶತ್‍ನ ಕ್‍ೕಟಿತ್, ದೀಕ್ಷಾಸ್ನಾನ ಎಡ್‍ತಿತ್ ದೇವ ನೀತಿಯುಳ್ಳಂವೋಂದ್ ಅರಿಕೆ ಮಾಡ್‍ಚಿ.

³⁰ಆಚೇಂಗಿ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಂಗ, ದೇವಕ್ ಬಗ್ಗಿತ್ ನಡ್‍ಪಕ್ ಒತ್ತತೆ, ಯೋಹಾನನಗುಂಡ್ ದೀಕ್ಷಾಸ್ನಾನ ಎಡ್‌ಪ ಆಲೋಚನೆನ ಅಲ್ಲಗೆಳೆದ್‌ಚಿ.

³¹ಇಂಞು, ಯೇಸು: ನಾನ್ ಈ ಸಂತಾನತ್‍ರ ಜನಳ ಎಂತಾಂಗ್ ಹೋಲಿಕೆ ಮಾಡಡ್? ನಿಂಗ ಎಂತ ಮನುಷ್ಯಂಗ?

³²ಈಂಗ ಗುಂಪ್ ಗುಂಪಾಯಿತ್ ಅಳ್‌ತಿತ್, ಅಯಿಂಗಳಯಿಂಗಳ ನೋಟಿತ್: ನಂಗ ನಿಂಗಕಾಯಿತ್ ಪಾಂಗೊಳ ಊದ್‍ಚಿ, ಆಚೇಂಗಿ ನಿಂಗ ಆಡಿತ್‌ಲ್ಲೆ. ನಂಗ ಚಾವ್ ಪಾಟ್ ಪಾಡ್‌ಚಿ, ನಿಂಗ ಮೊರಟಿತ್‌ಲ್ಲೇಂದ್ ಎಣ್ಣುವ ಮಕ್ಕಕ್ ಸಮವಾಯಿತುಳ್ಳಿರ.

³³ಎನ್ನಂಗೆಣ್ಣ್‌ಚೇಂಗಿ, ದೀಕ್ಷಾಸ್ನಾನ ತಪ್ಪ ಯೋಹಾನ ಒಟ್ಟಿ ತಿಂಗತಂವೊನಾಯಿತ್ ದ್ರಾಕ್ಷಿರಸ ಕುಡಿಕತಂವೊನಾಯಿತ್ ಬಾತ್, ಆಚೇಂಗಿ ನಿಂಗ ಅಂವೊಂಗ್ ಕೂಳಿ ಪುಡ್‌ಚಿತುಂಡ್‍ೕಂದ್ ಎಣ್ಣಿರ.

³⁴ಮನುಷ್ಯಕುಮಾರ ತಿಂದಂಡ್ ಕುಡಿಚಂಡಿಂಜತ್, ಅದ್ಂಗ್ ನಿಂಗ: ಅಂವೊ ತೀನಿಮಾರಿಯು, ಕುಡುಕನು, ಕಂದಾಯ ಎಡ್‌ಪಯಿಂಗಡ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣುವ ಜನಡ ಸ್ನೇಹಿತಾಂದ್ ಎಣ್ಣಿರ.

³⁵ಆಚೇಂಗಿ, ದೇವಡ ಜ್ಞಾನ, ಅಂವೊನ ನಂಬುವಯಿಂಗ ಮಾಡ್‌ವ ಕ್ರಿಯೆರ ಮೂಲಕ ಸತ್ಯವಾಪಾಂದ್ ಎಣ್ಣ್‌ಚಿ.

³⁶ಒರ್ ಫರಿಸಾಯ ಯೇಸುನ ತಾಂಡಕೂಡೆ ಉಂಗಂಡೂಂದ್ ಬೋಡಿಯಂಡತ್. ಯೇಸು ಪೋಯಿತ್ ಉಂಬಕ್ ಅಳ್‌ತತ್.

³⁷ಅಕ್ಕ ಆ ಊರ್‌ಲ್ ಪಾಪತ್‍ಲ್ ಬದ್‍ಕಿಯಂಡಿಂಜ ಒರ್ ಪೊಣ್ಣಾಳ್‌ಕ್, ಯೇಸು ಫರಿಸಾಯಂಡ ಮನೆಕ್ ಉಂಬಕ್ ಬಂದಿತುಂಡ್‍ೕಂದ್ ಗೊತ್ತಾಚಿ. ಅವ ದುಂಬ ಬೆಲೆಯುಳ್ಳ ಅಲಬಸ್ಟರ್ ಎಣ್ಣುವ ಸುಗಂದ ತೈಲತ್‌ನ[20] ಕೊಂಡ್ ಬಾತ್.

³⁸ಯೇಸುರ ಬಯ್ಯ ನಿಂದಿತ್, ದುಂಬ ಮೊರಟಿತ್, ಅವಡ ಕಣ್ಣೀರ್‌ಲ್ ಯೇಸುರ ಕಾಲ್‌ನ ನಲಪಿತ್, ಆ ನೀರ್‌ನ ಅವಡ ಮಂಡೆರ ತಲ್‌ಮಿಯಿಂಜ ತ್‍ೕಟಿತ್, ಕಾಲ್‌ಕ್ ಮುತ್ತ್ ಕೊಡ್‌ತಿತ್, ಅಂವೊಂಡ ಕಾಲ್‌ಕ್ ಸುಗಂದ ತೈಲತ್‌ನ ಬೂಕ್‍ಚಿ.

³⁹ಯೇಸುನ ಮನೆಕ್ ಕಾಕ್‍ನ ಫರಿಸಾಯ, ಇದ‌ನ್ನೆಲ್ಲ ನೋಟಿತ್, ಈ ಮನುಷ್ಯ ಒರ್ ಪ್ರವಾದಿಯಾಯಿತ್ಂಜತೇಂಗಿ, ತಾಂಡ ಕಾಲ್‌ನ ಮುಟ್ಟುವ ಈ ಪೊಣ್ಣಾಳ್ ದಾರ್‍ೕಂದ್ ಗೊತ್ತಾಪಕಿಂಜತ್; ಎನ್ನಂಗೆಣ್ಣ್‌ಚೇಂಗಿ, ಇವ ಒರ್ ಪಾಪೀಂದ್ ಅಂವೊಂಡೊಳ್‌ಲೇ ಗೇನ ಮಾಡ್‍ಚಿ.

⁴⁰ಯೇಸು ಸೀಮೋನನ ಕಾಕುವಂಜಿ: ನಾನ್ ನೀಕ್ ಒರ್ ವಿಷಯ ಎಣ್ಣಂಡೂಂದ್ ಎಣ್ಣ್‌ಚಿ. ಅದ್ಂಗ್ ಅಂವೊ: ಉಪಾದ್ಯನೇ, ಎಣ್ಣ್‍ೕಂದ್ ಎಣ್ಣ್‌ಚಿ.

⁴¹ಅಕ್ಕ ಯೇಸು: ಒರ್ ಮನುಷ್ಯಡಿಂಜ ದಂಡ್ ಜನ ಸಾಲ ಎಡ್‍ತಂಡತ್. ಒಬ್ಬ ಅಂಞೂರ್ ಬೊಳ್ಳಿರ ಪಣ, ಇಂಞೊಬ್ಬ ಐಂಬದ್ ಬೊಳ್ಳಿರ ಪಣ.

⁴²ದಂಡಾಳ್‍ಕು ಸಾಲ ತ್‍ೕಪಕ್ ಕಯಿಂಜಿತ್‌ಲ್ಲೆ. ಸಾಲ ಕೊಡ್‍ತಂವೊ ಅಯಿಂಗ ದಂಡಾಳು ಸಾಲತ್‍ನ ಕೊಡ್‍ಪದ್ ಬೋಂಡಾಂದ್ ಮನ್ನಿಚಿಟ್ಟಿತ್ ಬುಟ್ಟ್‌ರ್‌ತ್. ಇನ್ನನೆ ಇಪ್ಪಕ, ಆ ದಂಡಾಳ್‌ಲ್ ದಾರ್‌ಕ್ ಅಂವೊಂಡ ಮೇಲೆ ದುಂಬ ಪ್ರೀತಿ ಇಪ್ಪಾಂದ್ ಎಣ್ಣೀಂದ್ ಯೇಸು ಕ್‍ೕಟತ್.

⁴³ಅದ್ಂಗ್ ಸೀಮೋನ: ದಾರ್‌ಕ್ ದುಂಬ ಸಾಲತ್‍ನ ಬುಟ್ಟಿತ್ ಮನ್ನಿಚಿಟ್ಟತೋ ಅಂವೊನೇ ದುಂಬ ಪ್ರೀತಿ ಮಾಡ್‌ವಾಂದ್ ಎಣ್ಣ್‌ಚಿ. ಅದ್ಂಗ್ ಯೇಸು: ನೀನ್ ಸರಿಯಾಯಿತ್ ಎಣ್ಣಿಯಾಂದ್ ಎಣ್ಣ್‌ಚಿ.

⁴⁴ಪಿಂಞ ಯೇಸು ಆ ಪೊಣ್ಣಾಳ್‍ರ ಪಕ್ಕ ತಿರಿತ್ ಸೀಮೋನನ ನೋಟಿತ್: ನೀನ್ ಈ ಪೊಣ್ಣಾಳ್‍ನ ನೋಟ್‍ವಿಯ? ನಾನ್ ನೀಡ ಮನೆಕ್ ಬಪ್ಪಕ, ನೀನ್ ನಾಡ ಕಾಲ್ ಕತ್ತ್‌ವಕ್ ನೀರ್ ತಂದಿತ್‌ಲ್ಲೆ. ಆಚೇಂಗಿ ಈ ಪೊಣ್ಣಾಳ್ ಅವಡ ಕಣ್ಣೀರ್‌ಲ್ ನಾಡ ಕಾಲ್‌ನ ಕತ್ತಿತ್, ಅವಡ ತಲ್‌ಮಿಲ್ ನಾಡ ಕಾಲ್‌ನ ತ್‍ೕಟ್‍ಚಿ.

⁴⁵ನೀನ್ ನಾಕ್ ಮುತ್ತ್ ತಂತ್‍ಲೆ, ಆಚೇಂಗಿ ಇವ ನಾನ್ ಒಳ್‍ಕ್ ಬಂದ ಸಮಯತ್ಂಜ ನಾಡ ಕಾಲ್‌ಕ್ ಮುತ್ತ್ ತಂದಂಡೇ ಉಂಡ್.

⁴⁶ನೀನ್ ನಾಡ ಮಂಡೆಕ್ ಇಡ್‌ವಕ್ ಎಣ್ಣೆ ತಂತ್‍ಲೆ. ಇವ ಸುಗಂದ ವಾಸನೆ ಉಳ್ಳ ತೈಲತ್‌ನ ನಾಡ ಕಾಲ್‌ಕ್ ಬೂಕ್‍ಚಿ.

⁴⁷ಆನಗುಂಡ್ ನಾನ್ ನೀಕ್ ಎಣ್ಣ್‌ವಿ: ಇವ ಮಾಡ್‍ನ ಪಾಪಕೆಲ್ಲ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಇವ ಕಾಂಬ್‍ಚಿಟ್ಟ ಪ್ರೀತಿಯಿಂಜ ಗೊತ್ತಾಪ. ದಾರ್‍ಕೆಲ್ಲ ಚೆನ್ನ ಮನ್ನಿಪ್ಪ್ ಕ್‍ಟ್ಟ್‌ಚೋ, ಅಯಿಂಗೆಲ್ಲ ಚೆನ್ನ ಮಾತ್ರ ಪ್ರೀತಿ ಮಾಡ್‌ವಾಂದ್ ಎಣ್ಣ್‌ಚಿ.

⁴⁸ಪಿಂಞ ಯೇಸು ಆ ಪೊಣ್ಣಾಳ್‍ನ ನೋಟಿತ್, ನೀನ್ ಮಾಡ್‍ನ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ಚಿ.

⁴⁹ಉಂಬಕ್ ಅಳ್‌ತಿತ್ಂಜ ಜನ: ಪಾಪತ್‍ನ ಮನ್ನಿಪ್ಪಕ್ ಈ ಮನುಷ್ಯ ದಾರ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

⁵⁰ಆ ಪೊಣ್ಣಾಳ್‌ಕ್: ನೀಡ ನಂಬಿಕೆ ನಿನ್ನ ರಕ್ಷಣೆ ಮಾಡ್‍ಚಿ, ಶಾಂತಿಲ್ ಪೋಂದ್ ಯೇಸು ಎಣ್ಣ್‌ಚಿ.