Read Kodava ಲೂಕ 9 Bible Online

ಲೂಕ 9 - Kodava bible

ಲೂಕ 9

¹ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕಿತ್, ಕೂಳಿ ಪುಡ್‍ಚಯಿಂಗಡ ಮೇಲ್ಂಜ ಎಲ್ಲಾ ಕೂಳಿಯಳ ಬುಡ್‌ತ್‌ವಕು ಪಿಂಞ ರೋಗಿಯಳ ವಾಸಿ ಮಾಡ್‌ವಕು ಬೋಂಡಿತಾನ ಶಕ್ತಿ ಪಿಂಞ ಅದಿಕಾರತ್‍ನ ಅಯಿಂಗಕ್ ಕೊಡ್‌ತಿತ್,

²ದೇವಡ ರಾಜ್ಯತ್‍ರ ವಿಷಯತ್‍ನ ಬೋದನೆ ಮಾಡ್‌ವಕು ಕಾಯಿಲಸ್ತಂಗಳ ವಾಸಿ ಮಾಡ್‌ವಕು ಅಯಿಂಗಳ ಅಯಿಚತ್.

³ಯೇಸು ಅಯಿಂಗಳ ನೋಟಿತ್: ನಿಂಗ ಪೋಪಕ ಕೋಲ್, ಚೀಲ, ಉಂಬಕ್ ಒಟ್ಟಿ, ದುಡ್ಡ್ ಒಂದು ಎಡ್‍ತಂಡ್ ಪೋಕತಿ. ದಂಡ್ ಬಟ್ಟೇನ ಸಹ ಎಡ್‍ತಂಡ್ ಪೋಕತೀಂದ್ ಎಣ್ಣ್‌ಚಿ.

⁴ಏದ್ ಮನೆಲ್ ನಿಂಗಳ ಸ್ವಾಗತ ಮಾಡ್‌ವ ಅಲ್ಲಿಯೇ ಆ ಮನೆಲ್ ನಿಂಗ ಪೋಕಣೆಕ್ ಇರಿ.

⁵ದಾರ್ ನಿಂಗಳ ಸ್ವಾಗತ ಮಾಡ್‌ಲೆಯೋ, ಅಯಿಂಗಡ ಊರ್‌ನ ಬುಟ್ಟಿತ್ ನಿಂಗ ಬಪ್ಪಕ, ಅಯಿಂಗಕ್ ಎಚ್ಚರಿಕೆಯಾಯಿತ್ ನಿಂಗಡ ಕಾಲ್‌ಲ್ ಉಳ್ಳ ದೂಳ್‍ನ ಕೊಡ್‍ಕಿತ್ ಬಾರಿ[23].

⁶ಯೇಸುರ ಶಿಷ್ಯಂಗ ಒರ್ ಊರಿಂಜ ಇಂಞೊರ್ ಊರ್‌ಕ್ ಪೋಯಿತ್, ಎಲ್ಲಾ ಜಾಗತ್‍ಲ್ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡಿತ್, ಕಾಯಿಲಸ್ತಂಗಳ ವಾಸಿ ಮಾಡ್‍ಚಿ.

⁷ಗಲಿಲಾಯತ್‍ಲ್ ಹೆರೋದ ಅಂತಿಪ ರಾಜನಾಯಿತ್ಂಜತ್. ಅಂವೊ ಇದ್‍ನೆಲ್ಲ ಕ್‍ೕಪಕ ಗಲಿಬಿಲಿ ಆಚಿ, ಎನ್ನಂಗೆಣ್ಣ್‌ಚೇಂಗಿ ಚೆನ್ನ ಜನ, ಇಂವೊ ಚತ್ತ್‌ಪೋನ ಯೋಹಾನ, ಚಾವ್‍ಯಿಂಜ ಬದ್‌ಕಿತ್ ಬಾತ್‍ೕಂದ್ ಎಣ್ಣ್‌ಚಿ.

⁸ಚೆನ್ನ ಜನ ಎಲೀಯ ಬಾತ್ ಕಾಂಬಾಂದ್ ಎಣ್ಣ್‌ಚಿ, ಬೋರೆ ಚೆನ್ನ ಜನ ಪಂಡತ ಪ್ರವಾದಿ ಒಬ್ಬ ಬದ್‌ಕಿತ್ ಬಾತ್ ಕಾಂಬಾಂದ್ ಎಣ್ಣ್‌ನಗುಂಡ್ ಅಂವೊಂಗ್ ದುಂಬ ಗಾಬರಿ ಆಚಿ.

⁹ನಾನ್ ಯೋಹಾನಂಡ ಮಂಡೆನ ಕೆತ್ತಿತುಳ್ಳ, ಆಚೇಂಗಿ ನಾನ್ ಕ್‍ೕಟಂಡುಂಡಳ್ಳ ಈ ಮನುಷ್ಯ ದಾರಾಯಿತಿಕ್ಕೂಂದ್ ಎಣ್ಣಿಯಂಡ್ ಯೇಸುನ ಕಾಂಬಕ್ ಪಾರಕಾತಂಡ್ ಇಂಜತ್.

¹⁰ಅಪೊಸ್ತಲಂಗ ವಾಪಸ್ ಬಂದಿತ್, ಅಯಿಂಗ ಮಾಡ್‍ನ ಎಲ್ಲಾ ವಿಷಯತ್‍ನ ವಿವರಿಚಿಟ್ಟತ್. ಅಕ್ಕ ಯೇಸು, ಅಂವೊಂಡ ಶಿಷ್ಯಂಗಳ ಕಾಕಿಯಂಡ್, ಒಂಟಿಯಾಯಿತ್‌ಪ್ಪಕ್ ಬೇತ್ಸಾಯಿದ ಎಣ್ಣುವ ಪಟ್ಟಣತ್‍ರ ಪಕ್ಕ ಉಳ್ಳ ಮಣಬೂಮಿಕ್ ಪೋಚಿ.

¹¹ಇದ್ ಜನಕ್ ಗೊತ್ತಾನಗುಂಡ್, ಜನಯೆಲ್ಲ ಯೇಸುರ ಬಯ್ಯ ಪೋಚಿ. ಯೇಸು ಅಯಿಂಗಳ ಸ್ವೀಕಾರ ಮಾಡಿತ್, ದೇವಡ ರಾಜ್ಯತ್‍ರ ವಿಷಯತ್‍ನ ಪರ್ಂದಿತ್, ವಾಸಿಯಾಂಡೂಂದ್ ಇಂಜಯಿಂಗಳ ವಾಸಿ ಮಾಡ್‍ಚಿ.

¹²ಸೂರ್ಯ ಮುಳ್‌ಗಿಯಂಡ್ ಬಪ್ಪಕಾಪಕ, ಪನ್ನೆರಂಡ್ ಶಿಷ್ಯಯಂಗಳು ಒಮ್ಮಕೆ ಅಂವೊಂಡ ಪಕ್ಕ ಬಂದಿತ್, ಇದ್ ಮಣಬೂಮಿ, ಆನಗುಂಡ್, ಈ ಜನಳ ಬಯ್ಯಕ್ ಅಯಿಚಿರ್, ಅಯಿಂಗ ಸುತ್ತ್‌ಮುತ್ತ್‌ಲ್ ಉಳ್ಳ ಊರ್‌ಕ್ ಪೋಯಿತ್ ಉಂಬಕು ಪಿಂಞ ಇಪ್ಪಕ್ ಜಾಗವು ಅಯಿಂಗಳೇ ಏರ್ಪಾಡ್ ಮಾಡಡ್‍ೕಂದ್ ಎಣ್ಣ್‌ಚಿ.

¹³ಅದ್ಂಗ್ ಯೇಸು: ನಿಂಗಳೇ ಅಯಿಂಗಕ್ ಉಂಬಕ್ ಕೊಡೀಂದ್ ಎಣ್ಣ್‌ಚಿ. ಅದ್ಂಗ್ ಶಿಷ್ಯಂಗ: ನಂಗಡ ಪಕ್ಕ ಅಂಜ್ ಒಟ್ಟಿ ದಂಡ್ ಮೀನು ಮಾತ್ರ ಉಂಡ್. ಈ ಜನಕೆಲ್ಲ ಉಂಬಕ್ ಕೊಡ್‍ಕಂಡೂಂದ್ ಎಣ್ಣ್‌ಚೇಂಗಿ, ನಂಗ ಪೋಯಿತ್ ಎಡ್‌ತ ಬರಡೂಂದ್ ಎಣ್ಣ್‌ಚಿ.

¹⁴ಆಣಾಳ್ ಮಾತ್ರ ಸುಮಾರ್ ಅಂಜ್ ಆಯಿರ ಇಂಜತ್. ಈ ಜನಯೆಲ್ಲ ಗುಂಪಾಯಿತ್ ಸುಮಾರ್ ಐಂಬದಯಿಂಬದ್ ಜನಳಾಯಿತ್ ಅಳ್‌ಪಕ್ ಎಣ್ಣೀಂದ್ ಯೇಸು ಶಿಷ್ಯಂಗಕ್ ಎಣ್ಣ್‌ಚಿ.

¹⁵ಆ ಜನ ನೂರ್ ನೂರ್ ಪಿಂಞ ಐಂಬದ್ ಐಂಬದ್ ಜನಳಾಯಿತ್ ಅಳ್‌ತತ್. ಶಿಷ್ಯಂಗ ಯೇಸು ಎಣ್ಣ್‌ನ ಪ್ರಕಾರ ಅಳ್‍ಪಚಿಟ್ಟ ಪಿಂಞ,

¹⁶ಯೇಸು, ಅಂಜ್ ಒಟ್ಟಿ ಪಿಂಞ ದಂಡ್ ಮೀನ್‌ನ ಎಡ್‍ತಿತ್, ಕೊಡಿಕ್ ಪರಲೋಕತ್‌ನ ನೋಟುವಂಜಿ ದೇವಕ್ ವಂದನೆ ಮಾಡಿತ್, ಒಟ್ಟಿನ ಮುರಿಪಂಜಿ ಅಂವೊಂಡ ಶಿಷ್ಯಂಗಕ್ ಕೊಡ್‌ತಿತ್, ಜನಕೆಲ್ಲ ಕೊಡೀಂದ್ ಎಣ್ಣ್‌ಚಿ.

¹⁷ಜನಯೆಲ್ಲ ಕೆಲ ದುಂಬ ತಿಂದಿತ್ ತೃಪ್ತಿಯಾನ ಪಿಂಞ, ಶಿಷ್ಯಂಗ ಪನ್ನೆರಂಡ್ ಕುಕ್ಕೆರಚ್ಚಕ್ ಒಟ್ಟಿಯು ಮೀನು ಬಾಕಿ ಆನದ್‍ನ ಒಟ್ಟ್ ಕೂಟ್‌ಚಿ.

¹⁸ಒರ್ ದಿವಸ ಯೇಸು ಒಬ್ಬನೇ ಪ್ರಾರ್ಥನೆ ಮಾಡಿಯಂಡಿಪ್ಪಕ, ಅಂವೊಂಡ ಶಿಷ್ಯಂಗ ಯೇಸುರ ಕೂಡೆ ಇಂಜತ್. ಯೇಸು: ನಾನ್ ದಾರ್‍ೕಂದ್ ಈ ಜನ ಎಣ್ಣುವ? ಎಣ್ಣಿಯಂಡ್ ಶಿಷ್ಯಂಗಳ ಕ್‍ೕಟತ್.

¹⁹ಅದ್ಂಗ್: ಚೆನ್ನ ಜನ ನೀನ್ ದೀಕ್ಷಾಸ್ನಾನ ತಪ್ಪ ಯೋಹಾನಾಂದೂ, ಚೆನ್ನ ಜನ ನೀನ್ ಎಲೀಯಾಂದೂ, ಇಂಞು ಚೆನ್ನ ಜನ ನೀನ್ ದಾರೋ ಒರು ಪೂರ್ವ ಕಾಲತ್‍ರ ಪ್ರವಾದೀಂದೂ ಎಣ್ಣಿಯಂಡುಂಡ್‍ೕಂದ್ ಅಯಿಂಗ ಜವಾಬ್ ಕೊಡ್‍ತತ್.

²⁰ಪಿಂಞ ಯೇಸು ಅಯಿಂಗಳ ನೋಟಿತ್: ಆಚೇಂಗಿ ನಿಂಗ ನನ್ನ ದಾರ್‍ೕಂದ್ ಎಣ್ಣುವಿರಾಂದ್ ಕ್‍ೕಟತ್. ಅದ್ಂಗ್ ಪೇತ್ರ: ನೀನ್ ದೇವ ಗೊತ್ತ್ ಮಾಡಿತ್ ಅಯಿಚ ದೇವಡ ಕ್ರಿಸ್ತಾಂದ್[24] ಎಣ್ಣ್‌ಚಿ.

²¹ನಾನ್ ದಾರ್‍ಂದ್ ನಿಂಗ ದಾರ್‌ಕು ಎಣ್ಣತೀಂದ್ ಅಯಿಂಗಕ್ ಆಜ್ಞೆ ಮಾಡ್‍ಚಿ.

²²ಅದಲ್ಲತೆ, ಮನುಷ್ಯಕುಮಾರ ದುಂಬ ಕಷ್ಟಪಡಂಡು, ಪೆರಿಯಯಿಂಗಡ, ಮುಕ್ಯ ಯಾಜಕಂಗಡ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಮಿಂಞತ್‍ಲ್ ತ್‍ಕ್ಕಾರ ಆಕಂಡು ಪಿಂಞ ಅಂವೊನ ಕೊಂದ್‌ರ್‌ವ ಆಚೇಂಗಿ ಮೂಂದ್ ದಿವಸ ಆನ ಪಿಂಞ ಚಾವ್‍ಯಿಂಜ ಅಂವೊ ಜೀವವಾಯಿತ್ ಏವಂಡೂಂದ್ ಎಣ್ಣ್‌ಚಿ.

²³ದಾರೇಂಗಿ ನಾಡ ಶಿಷ್ಯನಾಯಿತ್ ಇಪ್ಪಕ್ ಕುಶಿ ಇಂಜತೇಂಗಿ, ಅಂವೊ ಅಂವೊಂಡ ಆಸೆನೆಲ್ಲಾ ಬುಟ್ಟಿತ್, ದಿನಾಲು ತಾಂಡ ಶಿಲುಬೇನ ನೇತಿಯಂಡ್ ನಾಡ ಬೆಂಬರತ್ ಬರಡ್.

²⁴ದಾರ್‌ಕ್ ತಾಂಡ ಜೀವತ್‍ನ ಕಾಪಾಡ್‌ವಕ್ ಆಸೆ ಉಂಡೋ ಅಂವೊ ಅದ್‍ನ ಕಳೆಯುವ. ಆಚೇಂಗಿ ದಾರ್ ನಾಕಾಯಿತ್ ಅಂವೊಂಡ ಬದ್‍ಕ್‍ನ ಕಳೆಯುವ ಅಂವೊ ಅದ್‍ನ ಕಾಪಾಡ್‌ವ.

²⁵ಮನುಷ್ಯ ಈ ಲೋಕತ್‍ಲ್ ಉಳ್ಳಾನೆಲ್ಲಾ ತಾಂಗ್ ಸ್ವಂತವಾಯಿತ್ ಮಾಡ್‍ಚೇಂಗಿಯು, ತಾಂಡ ಜೀವನತ್‌ನ ಪಾಳ್ ಮಾಡ್‍ಚೇಂಗಿ, ಅಂವೊಂಗ್ ಎಂತ ಪ್ರಯೋಜನ?

²⁶ದಾರ್ ನಾಕಾಯಿತ್ ನಾಡ ಬೋದನೆಕಾಯಿತ್ ಞಾಣ ಪಡ್‍ವ, ಮನುಷ್ಯಕುಮಾರನು ಅಂವೊಂಡ ಮಹಿಮೆಲ್, ಅಂವೊಂಡ ಅಪ್ಪಂಡ ಕೀರ್ತಿಲ್ ಪಿಂಞ ಅಂವೊಂಡ ಪವಿತ್ರ ದೂತಂಗಡ ಕೀರ್ತಿಲ್ ಬಪ್ಪಕ ಇನ್ನತಂವೊಂಡ ವಿಷಯತ್ ಞಾಣ ಪಡ್‌ಪಾಂದ್ ಎಣ್ಣ್‌ಚಿ.

²⁷ಇಲ್ಲಿ ಉಳ್ಳ ಚೆನ್ನ ಜನ ದೇವಡ ರಾಜ್ಯತ್‍ನ ಕಾಂಗತೆ ಚಾವ್‍ಲೇಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣ್‌ವೀಂದ್ ಎಣ್ಣ್‌ಚಿ.

²⁸ಈ ತಕ್ಕ್‌ನ ಎಣ್ಣಿ ಸುಮಾರ್ ಎಟ್ಟ್ ದಿನ ಕಯಿಂಜ ಪಿಂಞ ಪೇತ್ರ, ಯೋಹಾನ ಪಿಂಞ ಯಾಕೋಬನ ಯೇಸು ಕುಂದ್‌ರ ಕೊಡಿಕ್ ಪ್ರಾರ್ಥನೆ ಮಾಡ್‌ವಕ್ ಕಾಕಿಯಂಡ್ ಪೋಚಿ.

²⁹ಯೇಸು ಪ್ರಾರ್ಥನೆ ಮಾಡಿಯಂಡ್ ಇಪ್ಪಕ ಅಂವೊಂಡ ಮೂಡ್‌ರ ರೂಪ ಬದ್‍ಲಾಚಿ, ಅಂವೊ ಇಟ್ಟ ಬಟ್ಟೆ ಬೊಳ್‌ತಿತ್ ಮಿನ್ನುವಕ್ ಸುರು ಆಚಿ.

³⁰ಅದಲ್ಲತೆ ಮೋಶೆ ಪಿಂಞ ಎಲೀಯ ಎಣ್ಣುವ ದಂಡ್ ಮನುಷ್ಯಂಗ ದುಂಬ್‍ನ ಮಹಿಮೆಲ್ ಪಿಂಞ ಕೀರ್ತಿಲ್ ಕಾಂಬ್‌ಚಿಟ್ಟಿತ್, ಯೇಸುರ ಕೂಡೆ ತಕ್ಕ್ ಪರ್‌ದಂಡ್,

³¹ಅಂವೊ ಯೆರೂಸಲೇಮ್‍ಲ್ ಪೂರ್ತಿ ಮಾಡ್‌ವ ಅಂವೊಂಡ ಚಾವ್‍ರ ವಿಷಯತ್‍ನ ತಕ್ಕ್ ಪರ್ಂದಂಡಿಂಜತ್.

³²ಪೇತ್ರ ಪಿಂಞ ಅಂವೊಂಡ ಕೂಡೆ ಬಂದಯಿಂಗ ವರೀರ್‌ತ್ಂಜತ್, ಆಚೇಂಗಿಯು ಅಯಿಂಗ ಎದ್ದಿತ್ ಅಂವೊಂಡ ಮಹಿಮೆನ ಪಿಂಞ ಅಂವೊಂಡ ಕೂಡೆ ಇಂಜ ದಂಡ್ ಮನುಷ್ಯಂಗ ನಿಂದಂಡುಳ್ಳದ್‍ನ ಕಂಡತ್.

³³ಆ ದಂಡ್ ಮನುಷ್ಯಂಗ ಅಲ್ಲಿಂಜ ಪೋಯಂಡಿಪ್ಪಕ, ಪೇತ್ರ: ಉಪಾದ್ಯನೇ, ನಂಗ ಇಲ್ಲಿ ಇಪ್ಪದ್ ನಲ್ಲದ್, ಇಲ್ಲಿ ನೀಕ್ ಒರ್ ಗುಡಾರ, ಎಲೀಯಂಗ್ ಒರ್ ಗುಡಾರ, ಮೋಶೇಕ್ ಒರ್ ಗುಡಾರಾಂದ್ ಮೂಂದ್ ಗುಡಾರ ಮಾಡನಾಂದ್ ಎಣ್ಣ್‌ಚಿ. ಆಚೇಂಗಿ ಪೇತ್ರ ಎಂತ ತಕ್ಕ್ ಪರ್ಂದಂಡುಂಡ್‍ೕಂದ್ ಗೊತ್ತಿಲ್ಲತೆ ಇನ್ನನೆ ಎಣ್ಣ್‌ಚಿ.

³⁴ಅಂವೊ ಅನ್ನನೆ ತಕ್ಕ್ ಪರ್‌ದಂಡ್ ಇಪ್ಪಕ ಮೋಡ ಬಂದಿತ್, ಅದ್ಂಡ ನೆಳಳ್‍ಲ್ ಅಯಿಂಗಳ ಆವರಿಚಿಟ್ಟತ್. ಮೋಡ ಅಯಿಂಗಡ ಮೇಲೆ ಬಪ್ಪಕ ಶಿಷ್ಯಂಗಕ್ ದುಂಬ ಪೋಡಿ ಆಚಿ.

³⁵ಅಕ್ಕ: ಇಂವೊ ನಾನ್ ಗೊತ್ತ್ ಮಾಡ್‍ನ ನಾಡ ಕೊದಿರ ಮೋಂವೊ, ಇಂವೊ ಎಣ್ಣುವಾನ ನಿಂಗ ಕ್‍ೕಳೀಂದ್ ಒರ್ ವಾಣಿ ಮೋಡತ್‍ರ ಒಳ್‌ಳಿಂಜ ತಕ್ಕ್ ಪರ್ಂದತ್.

³⁶ಆ ವಾಣಿ ಕ್‍ೕಟ ಪಿಂಞ, ಪೇತ್ರ, ಯೋಹಾನ ಪಿಂಞ ಯಾಕೋಬ ಯೇಸು ಒಬ್ಬನೇ ಅಲ್ಲಿ ಇಂಜಾನ ಕಂಡತ್. ಯೇಸುರ ಶಿಷ್ಯಂಗ ಅಯಿಂಗ ಎಂತ ಕಂಡಿಯೆ ಎಂತ ಕ್‍ೕಟಿಯೇಂದ್ ದಾರ್‌ಕು ಒಂದು ಎಣ್ಣತೆ ಮುಂಡತೆ ಇಂಜತ್.

³⁷ಪಿತ್ಯಾಂದ್ ಯೇಸು ಕುಂದ್ಂಜ ಅಡಿಕ್ ಬಾತ್, ದುಂಬ ಜನ ಯೇಸುನ ಕಾಂಬಕ್ ಬಂದಿತ್ಂಜತ್.

³⁸ಆ ಜನಡ ಗುಂಪ್‍ಯಿಂಜ ಒರ್ ಮನುಷ್ಯ ಕೂತ್ ಕೊಡ್‍ತತ್: ನಾಡ ಮೋಂವೊನ ಕಾಪಾಡ್, ನಾಕ್ ಅಂವೊ ಒರೇ ಮೋಂವೊ.

³⁹ಒರ್ ಕೂಳಿ ಅಂವೊನ ಪುಡಿಪ, ಅಕ್ಕ ಅಂವೊ ಕೆಟ್ಟ ಕೂತ್ ಕೊಡ್‍ಪ, ಅದ್ ಅಂವೊನ ತೊಂದರೆ ಮಾಡಿತ್ ಅಡಿಕ್ ತಳ್ಳ್‌ವ, ಅಂವೊಂಡ ಬಾಯಿಲ್ ನೊರೆ ಬಂದಿತ್ ಅಂವೊನ ದುಂಬ ನೊಂಬಲ ಮಾಡ್‍ಚೇಂಗಿಯು ಅಂವೊನ ಬುಟ್ಟಿತ್ ಪೋಪದ್ ದುಂಬ ಕಷ್ಟ.

⁴⁰ನಾನ್ ನೀಡ ಶಿಷ್ಯಂಗಕ್ ಎಣ್ಣಿಯೆ, ಆಚೇಂಗಿ ಅಯಿಂಗಕ್ ಆ ಕೂಳಿನ ಬುಡ್‌ತುವಕ್ ಕಯಿಂಜಿತ್‌ಲ್ಲೇಂದ್ ಎಣ್ಣ್‌ಚಿ.

⁴¹ಯೇಸು ಶಿಷ್ಯಂಗಕ್: ನಂಬಿಕೆ ಇಲ್ಲತ ಮೋಸವಾನ ಸಂತಾನಕಾರಳೇ, ನಿಂಗಡ ಕೂಡೆ ಎಚ್ಚಕ್ ಕಾಲ ನಾನ್ ತಾಳ್ಮೆಯಾಯಿತ್ ಇಪ್ಪಕ್ ಕಯ್ಯು? ನೀಡ ಮೋಂವೊನ ಇಲ್ಲಿ ಕಾಕಿಯಂಡ್ ಬಾಂದ್ ಆ ಕ್‍ಣ್ಣಂಡ ಅಪ್ಪಂಗ್ ಎಣ್ಣ್‌ಚಿ.

⁴²ಆ ಕ್‌ಣ್ಣನ ಕಾಕಿಯಂಡ್ ಬಪ್ಪಕ, ಅಂವೊಂಡ ಮೇಲ್‌ಲ್ ಉಳ್ಳ ಕೂಳಿ ಅಂವೊನ ಅಡಿಕ್ ತಳ್ಳಿತ್ ಅಂವೊನ ದುಂಬ ಕುಲ್‌ಕ್‍ಚಿ. ಯೇಸು ಕೂಳಿನ ಚೂಕಿತ್, ಕುಂಞಿನ ವಾಸಿ ಮಾಡಿತ್ ಅಂವೊಂಡ ಅಪ್ಪಂಡ ಪಕ್ಕ ಅಯಿಚತ್.

⁴³ಅಕ್ಕ ಎಲ್ಲಾ ಜನಳು ದೇವಡ ಮಹತ್ವತ್‌ನ ಕಂಡಿತ್ ಆಶ್ಚರ್ಯ ಪಟ್ಟತ್. ಯೇಸು ಮಾಡ್‍ನ ಎಲ್ಲಾ ಅದ್ಬುತತ್‌ನ ಕಂಡ ಜನ ಎಲ್ಲಾ ಆಶ್ಚರ್ಯ ಪಟ್ಟಂಡಿಪ್ಪಕ, ಯೇಸು ಅಂವೊಂಡ ಶಿಷ್ಯಂಗಕ್:

⁴⁴ಈ ತಕ್ಕ್‌ನ ಚಾಯಿತೆ ಕ್‍ೕಳಿ; ಮನುಷ್ಯಕುಮಾರನ ಪುಡ್‌ಚಿತ್ ಮನುಷ್ಯಂಗಡ ಕೈಕ್ ಕೊಡ್‍ಪಾಂದ್ ಎಣ್ಣ್‌ಚಿ.

⁴⁵ಶಿಷ್ಯಂಗಕ್ ಯೇಸು ಎಂತ ಎಣ್ಣಿಯಂಡುಂಡ್‍ೕಂದ್ ಗೊತ್ತಾಯಿತ್‌ಲ್ಲೆ; ಅದ್ ಅಯಿಂಗಕ್ ಒರು ಗುಟ್ಟಾಯುತ್ಂಜತ್, ಎಂತ ವಿಷಯ ಎಣ್ಣಿಯಾಂದ್ ಯೇಸುನ ಕ್‍ೕಪಕು ಅಯಿಂಗಕ್ ಪೋಡಿ ಆಚಿ.

⁴⁶ಪಿಂಞ ದಾರ್ ಬಲ್ಯಂವೊ ಎಣ್ಣಿಯಂಡ್ ಅಯಿಂಗಯಿಂಗಳೇ ತರ್ಕ ಮಾಡ್‌ವಕ್ ಸುರು ಮಾಡ್‍ಚಿ.

⁴⁷ಯೇಸುಕ್ ಶಿಷ್ಯಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾನಗುಂಡ್, ಒರ್ ಕುಂಞಿನ ತಾಂಡ ಪಕ್ಕ ಕಾಕುವಂಜಿ ಅಂವೊಂಡ ಪಕ್ಕ ನಿಪ್ಪ್‌ಚಿಟ್ಟಿತ್,

⁴⁸ದಾರ್ ಈ ಕುಂಞಿನ ನಾಡ ಪೆದತ್‍ಲ್ ಸ್ವೀಕಾರ ಮಾಡ್‌ವ ಅಯಿಂಗ ನನ್ನ ಸ್ವೀಕಾರ ಮಾಡ್‌ವ. ನನ್ನ ಸ್ವೀಕಾರ ಮಾಡ್‌ವಂವೊ ನನ್ನ ಮಾತ್ರ ಅಲ್ಲ, ನನ್ನ ಅಯಿಚಂವೊನ ಸ್ವೀಕಾರ ಮಾಡ್‌ವಾಂದ್ ಎಣ್ಣ್‌ಚಿ. ನಿಂಗಡಲ್ಲಿ ದಾರ್ ಚೆರಿಯಂವೊನಾಯಿತಿಪ್ಪ ಅಂವೊ ನಿಂಗಕೆಲ್ಲಾ ಬಲ್ಯಂವೊನಾಯಿತಿಪ್ಪಾಂದ್ ಎಣ್ಣ್‌ಚಿ.

⁴⁹ಉಪಾದ್ಯನೇ, ನೀಡ ಪೆದ ಎಣ್ಣಿಯಂಡ್ ಒಬ್ಬ ಕೂಳಿ ಬುಡ್‍ತಿಯಂಡಿಂಜದ್‍ನ ನಂಗ ಕಂಡತ್, ಆಚೇಂಗಿ ಅಂವೊ ನಂಗಡ ಗುಂಪ್‌ಲ್ ಇಲ್ಲತಗುಂಡ್ ನಂಗ ಅಂವೊನ ನಿಪ್ಪ್‌ಚಿಟ್ಟತ್‍ೕಂದ್ ಯೋಹಾನ ಎಣ್ಣ್‌ಚಿ.

⁵⁰ಅದ್ಂಗ್ ಯೇಸು: ಅಂವೊನ ನಿಪ್ಪ್‌ಚಿಡಂಡ; ನಿಂಗಕ್ ವಿರೋದವಾಯಿತಲ್ಲತಂವೊ ನಿಂಗಡ ಗುಂಪ್‌ಕ್ ಕೂಡ್‍ನಂವೊನೇಂದ್ ಎಣ್ಣ್‌ಚಿ.

⁵¹ಪರಲೋಕಕ್ ಅಂವೊನ ಎಡ್‌ತ ಪೋಪಕ್ ಸಮಯ ಪಕ್ಕ ಬಂದಂಡಿಪ್ಪಕ, ಯೇಸು ಯೆರೂಸಲೇಮ್‌ಕ್ ಪೋಪಕ್ ಗೇನ ಮಾಡ್‍ಚಿ.

⁵²ಯೇಸು ತಾಂಡ ಮಿಂಞಕ್ ವರ್ತಮಾನ ಎಡ್‌ತ ಪೋಪಯಿಂಗಳ ಅಯಿಚತ್. ಅಯಿಂಗ ಪೋಯಿತ್, ಅಂವೊಂಗ್ ಜಾಗತ್‍ನ ತಯಾರ್ ಮಾಡ್‌ವಕ್ ಸಮಾರ್ಯ ನಾಡ್‍ರ ಒರು ಊರ್‌ಕ್ ಪೋಚಿ.

⁵³ಆಚೇಂಗಿ ಯೇಸು ಯೆರೂಸಲೇಮ್‌ಕ್ ಪೋಪಕ್ ತೀರ್ಮಾನ ಮಾಡ್‍ಚೀಂದ್ ಅಲ್ಲಿಯತ್‍ರ ಜನಕ್ ಗೊತ್ತಾನಗುಂಡ್ ಅಂವೊನ ಸತ್ಕಾರ ಮಾಡಿತ್‌ಲ್ಲೆ.

⁵⁴ಯಾಕೋಬ ಪಿಂಞ ಯೋಹಾನ ಇದ್‍ನ ಕಂಡದು: ಸ್ವಾಮೀ, ಅಯಿಂಗಳ ಪಾಳ್ ಮಾಡ್‌ವಕ್ ನಂಗ ಪರಲೋಕತ್ಂಜ ತಿತ್ತ್‌ನ ಅಡಿಕ್ ಕೊಂಡ್‍ಬರಂಡುವಾಂದ್ ಯೇಸುನ ಕ್‍ೕಟತ್.

⁵⁵ಯೇಸು ಅಯಿಂಗಳ ತಿರಿತ್ ನೋಟಿತ್ ಅಯಿಂಗಳ ಚೂಕ್‌ಚಿ.

⁵⁶ಮನುಷ್ಯಕುಮಾರ ಮನುಷ್ಯಂಗಡ ಜೀವತ್‍ನ ಪಾಳ್ ಮಾಡ್‌ವಕ್ ಅಲ್ಲ, ರಕ್ಷಣೆ ಮಾಡ್‌ವಕ್ ಬಾತ್‍ೕಂದ್ ಎಣ್ಣ್‌ಚಿ. ಅಲ್ಲಿಂಜ ಬೋರೆ ಊರ್‌ಕ್ ಅಯಿಂಗ ಪೋಚಿ.

⁵⁷ಅಯಿಂಗ ಪೋಯಂಡಿಪ್ಪಕ ಒಬ್ಬ: ಸ್ವಾವಿ ನೀನ್ ಎಲ್ಲಿ ಪೋಚೇಂಗಿಯು ನಾನ್ ನೀಡ ಕೂಡೆ ಬಪ್ಪೀಂದ್ ಎಣ್ಣ್‌ಚಿ.

⁵⁸ಅದ್ಂಗ್ ಯೇಸು: ಕುರ್‌ಕಂಗ ವಾಸ ಮಾಡ್‌ವಕ್ ತೂತ ಉಂಡ್, ಬಾನತ್‍ರ ಪಕ್ಷಿಯಕ್ ಗೂಡ್ ಉಂಡ್, ಆಚೇಂಗಿ ಮನುಷ್ಯಕುಮಾರಂಗ್ ಮಂಡೆ ಬೆಪ್ಪಕ್ ಜಾಗ ಇಲ್ಲೇಂದ್ ಎಣ್ಣ್‌ಚಿ.

⁵⁹ಇಂಞೊರ್ ಮನುಷ್ಯಂಗ್: ನಾಡ ಬಯ್ಯ ಬಾಂದ್ ಎಣ್ಣ್‌ಚಿ. ಅದ್ಂಗ್ ಅಂವೊ: ಒಡೆಯನೇ, ನಾನ್ ಮಿಂಞ ಪೋಯಿತ್ ನಾಡ ಅಪ್ಪನ ಪೂತಿತ್ ಬಪ್ಪೀಂದ್ ಎಣ್ಣ್‌ಚಿ.

⁶⁰ಅದ್ಂಗ್ ಯೇಸು: ಚತ್ತಯಿಂಗ ಚತ್ತಯಿಂಗಳ ಪೂತಡ್; ನೀನ್ ಪೋಯಿತ್ ದೇವಡ ರಾಜ್ಯತ್‍ರ ವಿಷಯತ್‍ನ ಪ್ರಚಾರ ಮಾಡ್‍ೕಂದ್ ಎಣ್ಣ್‌ಚಿ.

⁶¹ಬೋರೆ ಒರ್ ಮನುಷ್ಯ: ನಾನ್ ನೀಡ ಬಯ್ಯ ಬಪ್ಪಿ, ಆಚೇಂಗಿ ಅದ್ಂಗಿಂಜ ಮಿಂಞ ನಾನ್ ಪೋಯಿತ್ ನಾಡ ಮನೆಕಾರಕ್ ಎಣ್ಣಿತ್ ಬಪ್ಪೀಂದ್ ಎಣ್ಣ್‌ಚಿ.

⁶²ಅದ್ಂಗ್ ಯೇಸು: ದಾರ್ ನೇಂಗಿಲ್ ಕೈ ಇಟ್ಟ ಪಿಂಞ ಬಯ್ಯಕ್ ತಿರಿತ್ ನೋಟಿಯಂಡ್ ಇಪ್ಪ ಅಂವೊ ದೇವಡ ರಾಜ್ಯತ್‍ರ ಸೇವೇಕ್ ಯೋಗ್ಯನಾಯಿತ್‌ಪ್ಪುಲೇಂದ್ ಎಣ್ಣ್‌ಚಿ.