Read Kodava ಯೋಹಾನ 10 Bible Online

ಯೋಹಾನ 10 - Kodava bible

ಯೋಹಾನ 10

¹ನಾನ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣ್‌ವಿ; ಕೊರಿಕೊಟ್ಟ್‌ರ ಪಡಿನ ಬುಟ್ಟಿತ್, ಬೋರೆ ಮಾರ್ಗವಾಯಿತ್ ಒಳ್‍ಕ್ ಬಪ್ಪಂವೊ ಕಳ್ಳನಾಯಿತು ಲೂಟಿಕಾರನಾಯಿತೇ ಇಪ್ಪ.

²ಆಚೇಂಗಿ, ಕೊರಿಕೊಟ್ಟ್‌ರ ಪಡಿರ ಮೂಲಕ ಒಳ್‍ಕ್ ಬಪ್ಪಂವೊ ಆ ಕೊರಿಯಳ ಕಾಪಂವೊನಾಯಿತ್‌ಪ್ಪ.

³ಕೊರಿಕೊಟ್ಟ್‌ರ ಪಡಿಕಾರ ಅಂವೊಂಗ್ ಪಡಿನ ತೊರ್‌ಪ; ಕೊರಿಯಳು ಅಂವೊಂಡ ಸದ್ದ್‌ನ ಗೊತ್ತ್ ಮಾಡ್‌ವ. ಅಂವೊ ತಾಂಡ ಕೊರಿಯಳ ಪೆದ ಎಣ್ಣಿತ್ ಕಾಕಿತ್, ಅಯಿಂಗಳ ಪೊರಮೆ ನಡ್‍ತಿಯಂಡ್ ಪೋಪ.

⁴ಅಂವೊ ತಾಂಡ ಕೊರಿಯಳ ಪೊರಮೆ ಬುಟ್ಟ ಪಿಂಞ, ಅಯಿಂಗಡ ಮಿಂಞತ್ ನಡ್ಂದ್ ಪೋಯಂಡಿಪ್ಪ. ಕೊರಿಯಂಗಕ್ ಅಂವೊಂಡ ಸದ್ದ್ ಗೊತ್ತುಳ್ಳಗುಂಡ್, ಅಂವೊಂಡ ಬಯ್ಯಕ್ ಪೋಪ.

⁵ಕೊರಿಯಂಗಕ್ ಅನ್ಯ ಜನತ್‍ರ ಸದ್ದ್ ಗೊತ್ತಿಲತಗುಂಡ್, ಅಯಿಂಗಡ ಬಯ್ಯಕ್ ಪೋಕತೆ, ಅಯಿಂಗಳ ಬುಟ್ಟಿತ್ ಚದ್‌ರಿತ್ ಓಡಿ ಪೋಪ.

⁶ಯೇಸು ಈ ಕಥೇನ ಅಯಿಂಗಕ್ ಎಣ್ಣ್‌ಚಿ, ಆಚೇಂಗಿ ಅಯಿಂಗಕ್ ಅಂವೊ ಎಣ್ಣ್‌ನದ್ಂಡ ಅರ್ಥ ಗೊತ್ತಾಯಿತ್‌ಲ್ಲೆ.

⁷ಆನಗುಂಡ್, ಯೇಸು ಪುನಃ ಅಯಿಂಗಳ ನೋಟಿತ್: ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ, ನಾನೇ ಕೊರಿಯಂಗಕ್ ಪಡಿಯಾಯಿತುಂಡ್.

⁸ನಾಕ್ ಮಿಂಞ ಬಂದಯಿಂಗ ಎಲ್ಲಾರು, ಕಳ್ಳಂಗಳು ಲೂಟಿ ಮಾಡ್‌ವಯಿಂಗಳಾಯಿತ್ ಇಂಜತ್; ಆಚೇಂಗಿ, ಕೊರಿಯ ಅಯಿಂಗಡ ಬೋದನೆಕ್ ಕೆಮಿ ಕೊಡ್‍ತಿತ್‌ಲ್ಲೆ.

⁹ನಾನೇ ಪಡಿ. ಒಬ್ಬ ನಾಡ ಮೂಲಕ ಬಾತೇಂಗಿ ಬಚಾವಾಪ. ಅಂವೊ ಒಳ್‍ಕ್ ಬಂದಿತ್ ಪೊರಮೆ ಪೋಯಿತ್ ಪಚ್ಚೆ ಪಿಲ್ಲ್ ಜಾಗತ್‍ನ ಕಂಡ್‍ಪುಡಿಪ.

¹⁰ಕಳ್ಳ, ಬರಿ ಕಟ್ಟಂಡ್ ಪೋಪಕಾಯಿತು, ಕೊಲೆ ಮಾಡ್‌ವಕಾಯಿತು, ಪಾಳ್ ಮಾಡ್‌ವಕಾಯಿತು ಮಾತ್ರ ಬಪ್ಪ. ಆಚೇಂಗಿ, ನಾನ್ ಅಯಿಂಗಕ್ ನಿತ್ಯ ಜೀವ ಕ್‍ಟ್ಟ್‌ವಕು, ಆ ಜೀವತ್‍ನ ಅಯಿಂಗ ಪೂರ್ತಿಯಾಯಿತ್ ಅನುಬವಿಚಿಡುವಕು ಬಂದಿಯೆ.

¹¹ನಾನೇ ನಲ್ಲ ಕೊರಿ ಕಾಪಂವೊ; ನಲ್ಲ ಕೊರಿ ಕಾಪಂವೊ, ತಾಂಡ ಕೊರಿನ ಕಾಪಾಡ್‌ವಕಾಯಿತ್ ತಾಂಡ ಜೀವತ್‍ನ ಸಹ ತಪ್ಪ.

¹²ಕೊರಿಕಾಪಂವೊನಲ್ಲತಂವೊ ಪಿಂಞ ಕೊರಿಡ ಎಜಮಾನ ಅಲ್ಲತಂವೊ, ತೋಳ ಬಪ್ಪದ್‍ನ ಕಾಂಬಕ, ಅಂವೊ ಕೊರಿಯಳ ಬುಟ್ಟಿತ್ ಓಡಿ ಪೋಪ; ಅಕ್ಕ ತೋಳ ಕೊರಿಯಳ ಪುಡ್‌ಚಿತ್ ಅಯಿಂಗಳ ಚದ್‍ರಿಚಿಡುವ.

¹³ಆಳ್‍ವ ಬರಿ ಕೂಲಿಕ್ ಬಂದಿತ್ ಕೊರಿಯಳ ನೋಟ್‌ವಗುಂಡ್, ಓಡಿ ಪೋಪ, ಕೊರಿಯಕ್ ಎಂತಾಪಾಂದ್ ಅಂವೊ ಬೇಜಾರ್ ಮಾಡುಲೆ.

¹⁴ನಾನೇ ನಲ್ಲ ಕೊರಿ ಕಾಪಂವೊ; ನಾಡ ಅಪ್ಪಂಗ್ ನನ್ನ ಚಾಯಿತೆ ಗೊತ್ತುಳ್ಳನೆಕೆ ಪಿಂಞ ನಾಕ್ ನಾಡ ಅಪ್ಪನ ಚಾಯಿತೆ ಗೊತ್ತುಳ್ಳನೆಕೆ, ನಾಕ್ ನಾಡ ಕೊರಿಯಳ ಚಾಯಿ ಗೊತ್ತುಂಡ್, ನಾಡ ಕೊರಿಯಕೂ ನನ್ನ ಚಾಯಿತೆ ಗೊತ್ತುಂಡ್.

¹⁵ಅನ್ನನೆ, ನಾನ್ ನಾಡ ಕೊರಿಯಂಗಕಾಯಿತ್ ನಾಡ ಜೀವತ್‍ನ ಕೊಡ್‌ಪಕು ತಯಾರಾಯಿತ್ ಉಳ್ಳ.

¹⁶ಈ ಕೊರಿಕೊಟ್ಟ್‌ರ ಕೊರಿಯ ಅಲ್ಲತೆ, ಬೋರೆ ಕೊರಿಯಳು ನಾಕ್ ಉಂಡ್; ಅಯಿಂಗಳ ಸಹ ನಾನ್ ಕೂಟಿಯಂಡ್ ಬರಂಡು; ಆ ಕೊರಿಯ ನಾಡ ತಕ್ಕ್‌ನ ಕ್‍ೕಪ, ಅಕ್ಕ ಈಂಗ ದಂಡಾಳು ಒರೇ ಗುಂಪಾಯಿತ್, ಒರೇ ಕೊರಿಕಾಪಂವೊಂಡ ಅಡಿಕ್ ಬಪ್ಪ.

¹⁷ನಾನ್ ನಾಡ ಜೀವತ್‍ನ ಪುನಃ ಪಡೆಯುವಕಾಯಿತ್, ನಾನ್ ನಾಡ ಜೀವತ್‍ನ ಕೊಡ್‍ಪಗುಂಡ್ ನಾಡ ಅಪ್ಪ ನನ್ನ ದುಂಬ ಪ್ರೀತಿ ಮಾಡ್‌ವ.

¹⁸ನಾಡ ಜೀವತ್‍ನ ನನ್ನಿಂಜ ದಾರೂ ಎಡ್‌ತೊಲೆ; ನಾಕ್ ಮಾತ್ರ ನಾಡ ಜೀವತ್‍ನ ಕೊಡ್‍ಪಕ್ ಅದಿಕಾರ ಉಂಡ್, ಅದ್‍ನ ಬಯ್ಯಕ್ ಎಡ್‍ಪಕು ನಾಕ್ ಎಲ್ಲಾ ಅದಿಕಾರವು ಉಂಡ್. ಈ ಆಜ್ಞೆ ನಾಕ್ ನಾಡ ಅಪ್ಪಂಡಿಂಜ ಕ್‍ಟ್ಟ್‌ಚಿ.

¹⁹ಈ ತಕ್ಕ್‌ನ ಕ್‍ೕಪದು ಪುನಃ ಯೆಹೂದ್ಯ ಜನ ದಂಡ್ ಗುಂಪಾಯಿತ್ ಆಚಿ.

²⁰ಸುಮಾರ್ ಜನ: ಇಂವೊಂಗ್ ಕೂಳಿ ಪುಡ್‌ಚಿತುಂಡ್, ಪುಚ್ಚ್ ಪುಡ್‌ಚಂವೊ, ನಿಂಗ ಎನ್ನಂಗ್ ಅಂವೊಂಡ ತಕ್ಕ್‌ನ ಕ್‍ೕಪಿರಾಂದ್ ಎಣ್ಣ್‌ಚಿ.

²¹ಬೋರೆ ಚೆನ್ನ ಜನ: ಇಂವೊಂಗ್ ಕೂಳಿ ಒಂದು ಪುಡ್‌ಚಿತ್ತ್‌ಲ್ಲೆ, ಅನ್ನನೆ ಉಂಡೇಂಗಿ ಇಂವೊ ಇನ್ನನೆ ತಕ್ಕ್ ಪರಿಯುವಕ್ ಕಯ್ಯುಲೆ. ಎನ್ನನೆ ಕೂಳಿ ಪುಡ್‌ಚಂವೊ ಒರ್ ಕುರ್‌ಡಂಡ ಕಣ್ಣ್‌ನ ಕಾಂಬನೆಕೆ ಮಾಡ್‌ವಾಂದ್ ಎಣ್ಣ್‌ಚಿ.

²²ಪಿಂಞ ಯೆರೂಸಲೇಮ್‍ಲ್ ಯೇಸು ಇಪ್ಪಕ ದೇವಾಲಯತ್‍ರ ಅರ್ಪಣ ನಮ್ಮೆ[13] ಬಾತ್. ಅಕ್ಕ ಕುಳ್‌ರ್ ಕಾಲವಾಯಿತ್ಂಜತ್.

²³ಯೇಸು ದೇವಾಲಯತ್‍ಲ್ ಉಳ್ಳ ಸೊಲೊಮೋನಂಡ ಮಂಟಪತ್‌ಲ್ ಅಪ್ಪರ ಇಪ್ಪರ ನಡ್‌ದಂಡ್ ಇಂಜತ್.

²⁴ಚೆನ್ನ ಜನ ಒಟ್ಟ್ ಕೂಡಿತ್: ನಂಗಳ ಎಚ್ಚಕ್ ಕಾಲ ನೀನ್ ಇನ್ನನೆ ಅನುಮಾನತ್‍ಲ್ ಬೆಪ್ಪಿಯಾ? ನೀನ್ ನೇರಾನ ಕ್ರಿಸ್ತನಾಚೇಂಗಿ[14] ಸತ್ಯವಾಯಿತ್ ಎಣ್ಣ್‍ೕಂದ್ ಎಣ್ಣ್‌ಚಿ.

²⁵ಯೇಸು ಅಯಿಂಗಳ ನೋಟಿತ್: ನಾನ್ ನಿಂಗಕ್ ಮಿಂಞಲೇ ಎಣ್ಣಿಯೆ, ಆಚೇಂಗಿ ನಿಂಗ ನನ್ನ ನಂಬಿತ್‌ಲ್ಲೆ; ನಾನ್ ನಾಡ ಅಪ್ಪಂಡ ಪೆದತ್‍ಲ್ ಮಾಡಿಯಂಡ್ ಉಳ್ಳ ಅದ್ಬುತ ಕಾರ್ಯವೇ ನಾನ್ ದಾರ್‍ೕಂದ್ ಸಾಕ್ಷಿ ಕೊಡ್‍ಪ.

²⁶ನಿಂಗ ನಾಡ ಕೊರಿ ಕೂಟ್ಟ್‌ರ ಕೊರಿಯಳಾಯಿತ್ ಇಲ್ಲತಗುಂಡ್, ನಿಂಗ ನನ್ನ ನಂಬುಲೆ.

²⁷ನಾಡ ಕೊರಿಯ ನಾಡ ಸದ್ದ್‌ನ ಕ್‍ೕಪ; ನಾಕ್ ಅಯಿಂಗಳ ಗೊತ್ತುಂಡ್, ಅಯಿಂಗ ನಾಡ ಬಯ್ಯ ಬಪ್ಪ.

²⁸ನಾನ್ ಅಯಿಂಗಕ್ ನಿತ್ಯ ಜೀವತ್‍ನ ತಪ್ಪಿ; ಅಯಿಂಗ ನಾಶ ಆಪದೇ ಇಲ್ಲೆ, ನಾಡ ಕೈಯಿಂಜ ದಾರ್ ಒಬ್ಬಂಗು ಅಯಿಂಗಳ ಬಲ್‍ಚಿತ್ ಎಡ್‌ತವಕ್ ಕಯ್ಯುಲೆ.

²⁹ಅಯಿಂಗಳ ನಾಕ್ ಕೊಡ್‍ತ ಅಪ್ಪ ಎಲ್ಲಾರ್ಕಿಂಜ ಬಲ್ಯಂವೊ; ಅಯಿಂಗಳ ನಾಡ ಅಪ್ಪಂಡ ಕೈಯಿಂಜ ದಾರ್‌ಕು ಬಲಿಪಕ್ ಕಯ್ಯುಲೆ.

³⁰ನಾನು ನಾಡ ಅಪ್ಪನು ಒಂದ್‍ೕಂದ್ ಅಯಿಂಗಕ್ ಎಣ್ಣ್‌ಚಿ.

³¹ಜನ ಎಲ್ಲಾ ಇದ್‍ನ ಕ್‍ೕಪಕ: ಪುನಃ ಕಲ್ಲ್ ಕನಿಪಕ್ ನೋಟ್‌ಚಿ.

³²ಅಕ್ಕ ಯೇಸು ಅಯಿಂಗಳ ನೋಟಿತ್: ನಾನ್ ನಾಡ ಅಪ್ಪ ಎಣ್ಣ್‌ನನೆಕೆ ದುಂಬ ಅದ್ಬುತ ಕಾರ್ಯ ಮಾಡಿಯೆ, ಅದ್‍ಲ್ ಏದ್ ವಿಷಯತ್‍ಲ್ ನಾಡ ಮೇಲೆ ಕಲ್ಲ್ ಕನಿಪಕ್ ನೋಟ್‌ವಿರಾಂದ್ ಕ್‍ೕಟತ್.

³³ಅಂವೊಂಗ್ ಯೆಹೂದ್ಯಂಗ: ನೀನ್ ಮಾಡ್‍ನ ನಲ್ಲ ಕಾರ್ಯತ್‍ನ ಕಂಡಿತ್ ನಂಗ ನೀಕ್ ಕಲ್ಲ್ ಕನಿಪಕ್ ನೋಟಿಯಂಡ್ ಇಲ್ಲೆ, ನೀನ್ ಮನುಷ್ಯನಾಯಿತ್ ಉಳ್ಳಿಯ, ಆಚೇಂಗಿ ನೀನ್ ನಿನ್ನ ದೇವಾಂದ್ ಎಣ್ಣಿಯಂಡ್ ಮಾಡಿಯಂಡ್ ಉಳ್ಳಿಯ. ಇನ್ನನೆ ದೇವ ದೂಷಣೆ ಪರ್ಂದಂಡ್ ಉಳ್ಳಗುಂಡ್ ನೀಡ ಮೇಲೆ ಕಲ್ಲ್ ಕನಿಪಕ್ ನೋಟಿಯಂಡುಂಡ್‍ೕಂದ್ ಎಣ್ಣ್‌ಚಿ.

³⁴ಅಕ್ಕ ಯೇಸು: ನಿಂಗ ದೇವನಾಯಿತ್ ಉಂಡ್‍ೕಂದ್ ದೇವ ಎಣ್ಣ್‌ನದ್‍ನ ನ್ಯಾಯಪ್ರಮಾಣತ್‍ಲ್ ನಿಂಗ ಓದಿತ್‌ಲ್ಲೆಯಾ?[15]

³⁵ದೇವಡ ವಾಕ್ಯ ಕ್‍ಟ್ಟನಯಿಂಗಳ ದೇವಾಂದ್ ಎಣ್ಣಿತುಂಡ್, ದೇವಡ ವಾಕ್ಯವು ಅದ್‍ನ ನೇರ್‍ೕಂದ್ ಎಣ್ಣಿಯಂಡುಂಡ್.

³⁶ಅಪ್ಪನಾನ ದೇವ ನನ್ನ ಪವಿತ್ರ ಮಾಡಿತ್, ಈ ಲೋಕಕ್ ಅಯಿಚಿತಿಪ್ಪಕ, ನಾನ್ ನನ್ನ ದೇವಡ ಮೋಂವೋಂದ್ ಎಣ್ಣ್‌ನಾಂಗ್, ನೀನ್ ದೇವ ದೂಷಣೆ ಪರ್ಂದಂಡ್ ಉಳ್ಳಿಯಾಂದ್ ಎಣ್ಣಿಯಂಡುಳ್ಳಿರ?

³⁷ನಾನ್ ನಾಡ ಅಪ್ಪಂಡ ಕ್ರಿಯೆ ಮಾಡತ ಪೋನಕ ನಾಡ ತಕ್ಕ್‌ನ ನಿಂಗ ನಂಬತೆ ಇರಿ.

³⁸ನಾನ್ ನಾಡ ಅಪ್ಪಂಡ ಕ್ರಿಯೇನ ಮಾಡ್‍ಚೇಂಗಿ, ನಿಂಗ ನನ್ನ ನಂಬತ ಇಂಜತೇಂಗಿಯು, ನಾನ್ ಅದ್‍ನ ಮಾಡ್‌ವಿ. ನಾನ್ ನಾಡ ಅಪ್ಪಂಡ ಕೂಡೆ, ನಾಡ ಅಪ್ಪ ನಾಡ ಕೂಡೆ ಉಂಡ್‍ೕಂದ್ ಸಾಕ್ಷಿಯಾಯಿತ್ ನಾನ್ ಮಾಡ್‌ವ ಅದ್ಬುತ ಕಾರ್ಯತ್‍ನ ನೋಟಿತ್ ಅದ್‍ನ ನಂಬುವಿರಾಂದ್ ಎಣ್ಣ್‌ಚಿ.

³⁹ಇನ್ನನೆ ಯೇಸು ಎಣ್ಣ್‌ನಗುಂಡ್, ಅಯಿಂಗ ಯೇಸುನ ಪುನಃ ಪುಡಿಪಕ್ ನೋಟ್‌ಚಿ, ಆಚೇಂಗಿ, ಅಯಿಂಗಡ ಕೈಯಿಂಜ ಯೇಸು ತಪ್ಪ್‌ಚಿಟ್ಟಂಡತ್.

⁴⁰ಪುನಃ ಯೇಸು ಯೊರ್ದನ್ ಕೆರೆರ ಆಬರಿಕ್ ಪೋಯಿತ್, ಅಲ್ಲಿ ಇಂಜತ್. ಈ ಜಾಗತ್‍ಲ್ ಯೋಹಾನ ಜನಕ್, ದೀಕ್ಷಾಸ್ನಾನ ಕೊಡ್‍ತಂಡಿಂಜತ್.

⁴¹ದುಂಬ ಜನ ಅಲ್ಲಿಕ್ ಬಾತ್, ಅಯಿಂಗ: ಯೋಹಾನ ಒರ್ ಅದ್ಬುತ ಕಾರ್ಯತ್‍ನ ಸಹ ಮಾಡಿತ್ತ್‌ಲ್ಲೆ. ಆಚೇಂಗಿ ಯೋಹಾನ ಇಂವೊಂಡ ವಿಷಯತ್‍ಲ್ ಎಣ್ಣ್‌ನದ್ ಎಲ್ಲಾ ನೇರಾಯಿತ್ ಉಂಡ್‍ೕಂದ್ ಎಣ್ಣ್‌ಚಿ.

⁴²ಅಲ್ಲಿ ದುಂಬ ಜನ ಯೇಸುರ ಮೇಲೆ ನಂಬಿಕೆ ಇಟ್ಟತ್.