Read Kodava ಯೋಹಾನ 11 Bible Online

ಯೋಹಾನ 11 - Kodava bible

ಯೋಹಾನ 11

¹ಬೇಥಾನ್ಯ ಎಣ್ಣುವ ಊರ್‌ಲ್ ಲಾಜರ ಎಣ್ಣುವ ಒಬ್ಬಂಗ್ ಕಾಯಿಲೆ ಇಂಜತ್. ಈ ಬೇಥಾನ್ಯ ಊರ್, ಮರಿಯ ಪಿಂಞ ಅವಡ ಅಕ್ಕ ಮಾರ್ಥ ಎಣ್ಣ್‌ವಯಿಂಗ ಇಂಜ ಊರಾಯಿತ್ಂಜತ್.

²ಈ ಮರಿಯ ಎಣ್ಣುವವ ದುಂಬ ಬೆಲೆಯುಳ್ಳ ಸುಗಂದ ತೈಲತ್‌ನ ಯೇಸುರ ಕಾಲ್‌ಕ್ ಬೂಕ್‌ವಂಜಿ ಅವಡ ತೆಲ್‌ಮಿಲ್ ಅಂವೊಂಡ ಕಾಲ್‌ನ ತ್‍ೕಟ್‌ನವಳಾಯಿತ್ಂಜತ್. ದುಂಬ ಕಾಯಿಲೆಲ್ ಇಂಜ ಲಾಜರ ಇವಡ ತಮ್ಮಣನಾಯಿತ್ಂಜತ್.

³ಅಕ್ಕ ಮಾರ್ಥ ಮರಿಯ ದಂಡಾಳು ಯೇಸುರ ಪಕ್ಕ ಆಳ್‌ನ ಅಯಿಚಿತ್ ಒಡೆಯನೇ, ನೀಡ ಪ್ರೀತಿರ ಸ್ನೇಹಿತ ಕಾಯಿಲೆಲ್ ಉಂಡ್‍ೕಂದ್ ಎಣ್ಣುವಕ್ ಎಣ್ಣ್‌ಚಿ.

⁴ಯೇಸು ಇದ್‍ನ ಕ್‍ೕಟದು: ಇದ್ ಲಾಜರ ಚತ್ತ್ ಪೋಪಕುಳ್ಳ ಕಾಯಿಲೆ ಅಲ್ಲ, ಇದ್ಂಡ ಮೂಲಕ ದೇವಡ ಪೆದಕ್ ಮಹಿಮೆ ಕ್‍ಟ್ಟುವ, ಅದ್ಂಡ ಮೂಲಕ ದೇವಡ ಮೋಂವೊನಾನ ನಾಕ್ ಮಹಿಮೆ ಕ್‌ಟ್ಟುವಾಂದ್ ಎಣ್ಣ್‌ಚಿ.

⁵ಮಾರ್ಥ, ಅವಡ ತಂಗೆ ಪಿಂಞ ಲಾಜರನ ಯೇಸು ದುಂಬ ಪ್ರೀತಿಚಿಡ್‌ವಕಿಂಜತ್.

⁶ಲಾಜರ ಕಾಯಿಲೆಲ್ ಉಂಡ್‍ೕಂದ್ ಉಳ್ಳ ಈ ಸುದ್ದಿ ಕ್‍ೕಟ ಪಿಂಞ ಸಹ ಯೇಸು ಎಲ್ಲಿ ಇಂಜತೋ ಅಲ್ಲಿಯೇ ಇಂಞು ದಂಡ್ ದಿವಸ ಇಂಜತ್.

⁷ದಂಡ್ ದಿವಸ ಆನ ಪಿಂಞ, ನಂಗ ಯೆಹೂದ್ಯ ಪ್ರಾಂತ್ಯಕ್ ಪುನಃ ಪೋಕನಾಂದ್ ಶಿಷ್ಯಂಗಕ್ ಯೇಸು ಎಣ್ಣ್‌ಚಿ.

⁸ಅಂವೊಂಗ್ ಶಿಷ್ಯಂಗ: ಉಪಾದ್ಯನೇ, ಚೆನ್ನ ದಿವಸಕ್ ಬಯ್ಯ, ಅಲ್ಲಿ ಉಳ್ಳ ಜನ ನೀಡ ಮೇಲೆ ಕಲ್ಲ್ ಕನಿಪಕ್ ನೋಟಿಯಂಡಿಂಜತಲ್ಲಾ? ಅನ್ನನೆ ಇಪ್ಪಕ, ಪುನಃ ನೀನ್ ಅಲ್ಲಿಕ್ ಪೋಂಡುವಾಂದ್ ಕ್‍ೕಟತ್.

⁹ಯೇಸು ಅಯಿಂಗಕ್: ಒರ್ ಪೋಲ್‍ಲ್ ಪನ್ನೆರಂಡ್ ಗಂಟೆ ಉಂಡಲ್ಲಾ? ದಾರ್ ಒಬ್ಬ ಪೋಲ್ ನೇರತ್‍ಲ್ ನಡ್ಂದತೇಂಗಿ, ಬೊಳಿ ಉಳ್ಳಗುಂಡ್ ಅಂವೊ ಬೂವುಲೆ. ಎನ್ನಂಗೆಣ್ಣ್‌ಚೇಂಗಿ, ಅಂವೊ ಈ ಲೋಕತ್‍ರ ಬೊಳಿನ ಕಂಡಂಡುಂಡ್.

¹⁰ದಾರ್ ಒಬ್ಬ ಇರ್‌ಟ್‌ಲ್ ನಡ್‍ಪ, ಅಯಿಂಗಕ್ ಬೊಳಿ ಇಲ್ಲತಗುಂಡ್, ಅಯಿಂಗ ಬೂವಾಂದ್ ಎಣ್ಣ್‌ಚಿ.

¹¹ಇನ್ನನೆ ಯೇಸು ಎಣ್ಣಿತಾನ ಪಿಂಞ, ಅಯಿಂಗಳ ನೋಟಿತ್: ನಂಗಡ ಸ್ನೇಹಿತ ಲಾಜರ ವರಿಯಂಡ್ ಉಂಡ್, ಆಚೇಂಗಿ, ನಾನ್ ಅಲ್ಲಿಕ್ ಪೋಯಿತ್ ಅಂವೊನ ಎಪ್ಪ್‌ಚಿಡ್‌ವೀಂದ್ ಎಣ್ಣ್‌ಚಿ.

¹²ಅಕ್ಕ ಶಿಷ್ಯಂಗ: ಒಡೆಯನೇ, ಅಂವೊ ವರಿಯಂಡ್ ಉಂಡೇಂಗಿ ಚಾಯಾಪಾಂದ್ ಎಣ್ಣ್‌ಚಿ.

¹³ಯೇಸು ಲಾಜರ ಚತ್ತ್ ಪೋನದ್‍ನ ಇನ್ನನೆ ಎಣ್ಣ್‌ಚಿ; ಆಚೇಂಗಿ, ಅಂವೊಂಡ ಶಿಷ್ಯಂಗ ಅಂವೊ ವರಿಯಂಡ್ ಆರಾಮ್‍ಲ್ ಉಂಡ್‍ೕಂದ್ ಅರ್ಥ ಮಾಡಿಯಂಡ್ ಇಂಜತ್.

¹⁴ಆನಗುಂಡ್ ಯೇಸು: ಲಾಜರ ಚತ್ತ್ ಪೋಚೀಂದ್ ಅಯಿಂಗಕ್ ಅರ್ಥ ಆಪನೆಕೆ ಎಣ್ಣ್‌ಚಿ.

¹⁵ನಾನ್ ನಿಂಗಕಾಯಿತ್ ಇಕ್ಕ ಅಲ್ಲಿ ಇಂಜಿತ್‌ಲ್ಲೇಂದ್ ಕುಶಿಪಡ್‌ವಿ. ನಿಂಗಕ್ ನಾಡ ಮೇಲೆ ನಂಬಿಕೆ ಬಪ್ಪ; ಬಾರಿ ನಂಗ ಅಲ್ಲಿಕ್ ಪೋಕನಾಂದ್ ಯೇಸು ಎಣ್ಣ್‌ಚಿ.

¹⁶ಅಕ್ಕ ದಿದುಮ ಎಣ್ಣುವ ತೋಮ, ಶಿಷ್ಯಂಗಕ್: ಬಾರಿ ಯೇಸುರ ಕೂಡೆ ಪೋಯಿತ್ ನಂಗಳು ಚಾವನಾಂದ್ ಎಣ್ಣ್‌ಚಿ.

¹⁷ಯೇಸು ಬೇಥಾನ್ಯ ಊರ್‌ಕ್ ಬಪ್ಪಕ: ಲಾಜರಂಡ ಚಾವ್ ತಡೀನ ಗೋರಿಲ್ ಇಟ್ಟಿತ್ ನಾಲ್ ದಿವಸ ಆಯಿತ್ಂಜತ್‍ೕಂದ್ ಯೇಸುಕ್ ಗೊತ್ತಾಚಿ.

¹⁸ಯೆರೂಸಲೇಮ್ಂಜ ಬೇಥಾನ್ಯಕ್ ಸುಮಾರ್ ಮೂಂದ್ ಕಿಲೊ ಮೀಟರ್ ದೂರ ಇಂಜತ್.

¹⁹ದುಂಬ ಯೆಹೂದ್ಯಂಗ ಮಾರ್ಥ ಪಿಂಞ ಮರಿಯಡ ಕೂಡೆ ಅಯಿಂಗಡ ತಮ್ಮಣಂಡ ವಿಷಯತತ್‌ಲ್ ತಕ್ಕ್ ಪರಿಚಿಟ್ಟಿತ್, ಸಮಾದಾನ ಮಾಡ್‌ವಕ್ ಬಂದಿತ್ಂಜತ್.

²⁰ಯೇಸು ಬಂದಂಡ್ ಉಂಡ್‍ೕಂದ್ ಮಾರ್ಥಕ್ ಗೊತ್ತಾಚಿ. ಅಕ್ಕ ಯೇಸುನ ಕಾಂಬಕ್ ಪೋಚಿ. ಮರಿಯ ಮನೆಲ್ಲೇ ಇಂಜತ್.

²¹ಮಾರ್ಥ ಯೇಸುಕ್: ಒಡೆಯನೇ, ನೀನ್ ಇಲ್ಲಿಯೇ ಇಂಜಿತ್ಂಜತೇಂಗಿ ನಂಗಡ ತಮ್ಮಣ ಚಾವಕಿಂಜಿಲೇಂದ್ ಎಣ್ಣ್‌ಚಿ.

²²ಆಚೇಂಗಿಯು, ಇಕ್ಕ ಸಹ, ನೀನ್ ದೇವನ ಎಂತ ಕ್‍ೕಪಿಯ, ಅದ್‍ನ ತಪ್ಪಾಂದ್ ನಾಕ್ ಗೊತ್ತುಂಡ್‍ೕಂದ್ ಎಣ್ಣ್‌ಚಿ.

²³ಯೇಸು ಅವಕ್: ನೀಡ ತಮ್ಮಣ ಚಾವ್‍ಯಿಂಜ ಬದ್‌ಕಿತ್ ಬಪ್ಪಾಂದ್ ಯೇಸು ಎಣ್ಣ್‌ಚಿ.

²⁴ಅದ್ಂಗ್ ಮಾರ್ಥ: ಕಡೆ ದಿವಸತ್‍ಲ್ ಎಲ್ಲಾರು ಜೀವತ್‍ಲ್ ಎದ್ದಿತ್ ಬಪ್ಪಕ ಇಂವೊನು ಎದ್ದಿತ್ ಬಪ್ಪಾಂದ್ ನಾಕ್ ಗೊತ್ತುಂಡ್‍ೕಂದ್ ಎಣ್ಣ್‌ಚಿ.

²⁵ಯೇಸು ಅವಳ ನೋಟಿತ್: ನಾನೇ ಚತ್ತ್ ಪೋನಯಿಂಗಳ ಪುನಃ ಜೀವವಾಯಿತ್ ಎಪ್ಪ್‌ಚಿಡ್‌ವಕ್ ಶಕ್ತಿಯುಳ್ಳಂವೊನು, ನಾನೇ ನಿತ್ಯ ಜೀವತ್‍ನ ತಪ್ಪಂವೊನೂ ಆಯಿತುಂಡ್. ನಾಡ ಮೇಲೆ ನಂಬಿಕೆ ಇಡ್‌ವಯಿಂಗ ಚತ್ತ್ ಪೋಚೇಂಗಿಯು ಪುನಃ ಬದ್‍ಕ್‍ವ.

²⁶ನನ್ನಗುಂಡ್ ಬದ್‍ಕಿಯಂಡ್ ನಾಡ ಮೇಲೆ ನಂಬಿಕೆ ಬೆಪ್ಪಯಿಂಗ, ಚಾವ್‍ನ ಕಾಂಬದೇ ಇಲ್ಲೆ, ಇದ್‍ನ ನೀನ್ ನಂಬಿತುಳ್ಳಿಯಾಂದ್ ಕ್‍ೕಟತ್.

²⁷ಅದ್ಂಗ್ ಅವ: ಅಕ್ಕು ಒಡೆಯನೇ, ನೀನೇ ಕ್ರಿಸ್ತಾಂದ್ ನಂಬುವಿ, ನೀನೇ ಈ ಲೋಕಕ್ ಬಪ್ಪಕುಳ್ಳ ದೇವಡ ಮೋಂವೋಂದ್ ಎಣ್ಣ್‌ಚಿ.

²⁸ಮಾರ್ಥ ಇದ್‍ನೆಲ್ಲಾ ಎಣ್ಣಿತಾನ ಪಿಂಞ ಪುನಃ ಪೋಯಿತ್ ಮರಿಯಳ ಬೋರೆಯಾಯಿತ್ ಕಾಕುವಂಜಿ, ಉಪಾದ್ಯ ಇಲ್ಲಿ ಬಂದಿತುಂಡ್, ನಿನ್ನ ಕಾಕಿಯಂಡುಂಡ್‍ೕಂದ್ ಎಣ್ಣ್‌ಚಿ.

²⁹ಮರಿಯ ಇದ್‍ನ ಕ್‍ೕಟದು, ಯೇಸುನ ಕಾಂಬಕ್ ಬೆರಿಯ ಬೆರಿಯ ಪೋಚಿ.

³⁰ಯೇಸು ಇಂಞು ಊರ್‌ರ ಒಳ್‍ಕ್ ಬಂದಿತ್‌ಲ್ಲೆ, ಮಾರ್ಥ ಎಲ್ಲಿ ಅಂವೊನ ಕಂಡಿತ್ ತಕ್ಕ್ ಪರ್ಂದತೋ, ಅಲ್ಲಿಯೇ ಅಂವೊ ಇಂಜತ್.

³¹ಮರಿಯಕ್ ಸಮಾದಾನ ತಕ್ಕ್ ಪರಿಯುವಕ್ ಅವಡ ಮನೆಕ್ ಬಂದಿತ್ಂಜ ಜನ, ಮರಿಯ ಎದ್ದಿತ್ ಬೆರಿಯ ಪೋಪದ್‌ನ ಕಂಡಿತ್, ಅವಡ ಬಯ್ಯಕ್ ಪೋಚಿ. ಮರಿಯ ಗೋರಿಕ್ ಮೊರಡ್‍ವಕ್ ಪೋಯಂಡುಂಡ್‍ೕಂದ್ ಗೇನ ಮಾಡಿಯಂಡಿಂಜತ್.

³²ಯೇಸು ಇಂಜ ಜಾಗಕ್ ಮರಿಯ ಬಪ್ಪಂಜಿ, ಅಂವೊನ ಕಾಂಬಕ, ಅಂವೊಂಡ ಕಾಲ್‌ಕ್ ಬೂವಂಜಿ, ಒಡೆಯನೇ, ನೀನ್ ಇಲ್ಲಿ ಇಂಜಿತ್ಂಜತೇಂಗಿ, ನಂಗಡ ತಮ್ಮಣ ಚಾವಕಿಂಜಿಲೇಂದ್ ಎಣ್ಣ್‌ಚಿ.

³³ಅವ ಮೊರಟಂಡ್ ಉಳ್ಳದ್‍ನ ಪಿಂಞ ಅವಡ ಕೂಡೆ ಉಳ್ಳಯಿಂಗ ಮೊರಟಂಡ್ ಉಳ್ಳದ್‍ನ ಯೇಸು ಕಾಂಬಕ, ಅಂವೊಂಡ ಆತ್ಮತ್‍ಲ್ ದುಂಬ ವ್ಯಸನಪಟ್ಟಿತ್, ಅಂವೊಂಗ್ ದುಂಬ ದುಃಖ ಆಯಿಪೋಚಿ:

³⁴ಅಂವೊ: ನಿಂಗ ಅಂವೊನ ಎಲ್ಲಿ ಇಟ್ಟಿತುಳ್ಳಿರಾಂದ್ ಕ್‍ೕಟತ್? ಅದ್ಂಗ್: ಬಂದಿತ್ ನೋಟ್ ಒಡೆಯನೇಂದ್ ಅಯಿಂಗ ಎಣ್ಣ್‌ಚಿ.

³⁵ಅಲ್ಲಿ ಯೇಸು ಮೊರಟತ್.

³⁶ಅಕ್ಕ, ಅಲ್ಲಿ ಇಂಜ ಜನ: ಯೇಸುಕ್ ಅಂವೊಂಡ ಮೇಲೆ ಎಚ್ಚಕ್ ಪ್ರೀತಿ ಇಂಜತ್‍ೕಂದ್ ಎಣ್ಣ್‌ಚಿ.

³⁷ಪಿಂಞ, ಚೆನ್ನ ಜನ: ಇಂವೊ ಕುರ್‌ಡಂಗಕ್ ಕಣ್ಣ್ ಕಾಂಬನೆಕೆ ಮಾಡ್‍ಚಿ. ಅಂವೊಂಡ ಸ್ನೇಹಿತನ ಚಾವತನೆಕೆ ಮಾಡ್‌ವಕ್ ಕಯ್ಯುವ್‌ಕಿಂಜಿಲೆಯಾಂದ್ ಎಣ್ಣ್‌ಚಿ.

³⁸ಯೇಸು ಇಂಞು ದುಂಬ ದುಃಖತ್‍ಲ್, ಗೋರಿರ ಪಕ್ಕ ಪೋಚಿ, ಅದ್ ಒರ್ ಗುವೆ ಆಯಿತ್ಂಜತ್. ಅದ್ಂಡ ಬಾಯಿನ ಒರ್ ಕಲ್ಲ್ ಬೆಚ್ಚಿತ್ ಮುಚ್ಚಿತ್ಂಜತ್.

³⁹ಆ ಕಲ್ಲ್‌ನ ಎಡೀಂದ್ ಯೇಸು ಅಲ್ಲಿ ಉಳ್ಳಯಿಂಗಕ್ ಎಣ್ಣ್‌ಚಿ. ಅಕ್ಕ ಚತ್ತ್ ಪೋಯಿತ್ಂಜಂವೊಂಡ ಅಕ್ಕ ಮಾರ್ಥ: ನಾತ ಬಪ್ಪಾಂದ್ ಎಣ್ಣ್‌ಚಿ.

⁴⁰ಅಕ್ಕ ಯೇಸು ಅವಳ ನೋಟಿತ್: ನೀಕ್ ನಾಡ ಮೇಲೆ ನಂಬಿಕೆ ಇಂಜತೇಂಗಿ ದೇವಡ ಮಹಿಮೆನ ಕಾಂಬಿಯಾಂದ್ ನಾನ್ ನೀಕ್ ಎಣ್ಣಿತಿಲ್ಲೆಯಾಂದ್ ಎಣ್ಣ್‌ಚಿ.

⁴¹ಪಿಂಞ, ಅಯಿಂಗ ಆ ಬಂಡೆ ಕಲ್ಲ್‌ನ ಎಡ್‍ತತ್. ಅಕ್ಕ ಯೇಸು ಕೊಡಿಕ್ ನೋಟುವಂಜಿ: ಅಪ್ಪ, ನೀನ್ ನಾಡ ಪ್ರಾರ್ಥನೆನ ಎಕ್ಕಾಲು ಕ್‍ೕಪಂಗಾಯಿತ್ ನೀಕ್ ವಂದನೆ.

⁴²ನೀನ್ ನಾಡ ಪ್ರಾರ್ಥನೆನ ಎಕ್ಕಾಲು ಕ್‍ೕಪಿಯಾಂದ್ ನಾಕ್ ಗೊತ್ತುಂಡ್; ಆಚೇಂಗಿಯು, ನೀನ್ ನನ್ನ ಈ ಲೋಕಕ್ ಅಯಿಚದ್‍ನ ಇಲ್ಲಿ ಕೂಡಿ ಬಂದಿತುಳ್ಳ ಜನ ನಂಬುವಕಾಯಿತ್ ಇನ್ನನೆ ನಾನ್ ಎಣ್ಣಿಯೇಂದ್ ಎಣ್ಣ್‌ಚಿ.

⁴³ಅಲ್ಲಿಂಜ ಯೇಸು: ಜೋರಾಯಿತ್ ಲಾಜರನೇ, ನೀನ್ ಪೊರಮೆ ಬಾಂದ್ ಕಾಕ್‍ಚಿ.

⁴⁴ಅಕ್ಕ, ಚತ್ತ ಮನುಷ್ಯ ಎದ್ದಿತ್ ಬಾತ್. ಅಂವೊಂಡ ಕೈಕಾಲ್ ಮೂಡ್‌ನೆಲ್ಲಾ ಬಟ್ಟೇಲ್ ಕೆಟ್ಟಿತ್ಂಜತ್, ಯೇಸು ಅಲ್ಲಿ ಇಂಜಯಿಂಗಕ್: ಇದ್‍ನೆಲ್ಲಾ ಉತ್ತಿತ್ ಅಂವೊನ ಪೊರಮೆ ಬುಡೀಂದ್ ಎಣ್ಣ್‌ಚಿ.

⁴⁵ಅಲ್ಲಿ ಮರಿಯಡ ಕೂಡೆ ಬಂದಿತ್ಂಜ ಜನ ಪಿಂಞ ಯೇಸು ಮಾಡ್‍ನದ್‍ನ ಕಂಡ ದುಂಬ ಯೆಹೂದ್ಯ ಜನ ಯೇಸುನ ನಂಬ್‍ಚಿ.

⁴⁶ಆಚೇಂಗಿ ಚೆನ್ನ ಜನ ಫರಿಸಾಯಂಗಡ ಪಕ್ಕ ಪೋಪಂಜಿ ಯೇಸು ಎಂತ ಮಡ್‌ಚೀಂದ್ ಎಣ್ಣಿ ಕೊಡ್‍ತತ್.

⁴⁷ಅಕ್ಕ ಮುಕ್ಯ ಯಾಜಕಂಗಳು, ಫರಿಸಾಯಂಗಳು, ಯೆಹೂದ್ಯಂಗಡ ಆಲೋಚನೆ ಸಬೇನೆ ಕಾಕುವಂಜಿ: ಇಂವೊನ ನಂಗ ಎಂತ ಮಾಡನಾಂದ್ ತಕ್ಕ್ ಪರ್ಂದತ್. ನೋಟಿ ಅಂವೊ ದುಂಬ ಅದ್ಬುತ ಕಾರ್ಯತ್‍ನ ಮಾಡಿಯಂಡ್ ಉಂಡ್,

⁴⁸ಇಂವೊನ ನಂಗ ಇನ್ನನೆ ಬುಟ್ಟತೇಂಗಿ, ಎಲ್ಲಾರು ಅಂವೊನ ನಂಬುವ; ಅಕ್ಕ ರೋಮ್ ರಾಜ್ಯತ್‍ರ ಜನ ನಂಗಡ ದೇವಾಲಯತ್‍ನ, ನಂಗಡ ಜಾಗತ್‍ನ ಒತ್ತಾಯ ಮಾಡಿತ್ ಎಡ್‌ತ್‌ರ್‍ವಾಂದ್ ಎಣ್ಣಿಯಂಡ್ ಇಂಜತ್.

⁴⁹ಅಕ್ಕ, ಅಯಿಂಗಡ ಸಬೇಲ್ ಅಂಗವಾಯಿತ್ಂಜ ಕಾಯಫ ಎಣ್ಣುವ ಒಬ್ಬ ಇಂಜತ್. ಅಂವೊ ಆ ಕಾಲಕ್ ಮಾಹಾ ಯಾಜಕನಾಯಿತ್ಂಜತ್. ಅಂವೊ ಅಯಿಂಗಳ ನೋಟಿತ್: ನಿಂಗಕ್ ನೇರಾಯಿತು ಒಂದು ಗೊತ್ತ್‌ಲ್ಲೆ.

⁵⁰ನಂಗಡ ಜನ ನಾಶ ಆಕತನೆಕೆ ಇಪ್ಪಕಾಯಿತ್, ಒರೇ ಮನುಷ್ಯ ಚಾವದ್ ಎಚ್ಚಕ್ ನಲ್ಲದ್‍ೕಂದ್ ನಿಂಗ ಎನ್ನಂಗ್ ಗೇನಮಾಡಿಯಂಡಿಲ್ಲೇಂದ್ ಕ್‍ೕಟತ್.

⁵¹ಇದ್‍ನ ಅಂವೊ ಅಂವೊಂಡ ಸ್ವಂತ ಬುದ್ದಿಲ್ ಎಣ್ಣತೆ, ಆ ಕಾಲಕ್ ಮಹಾ ಯಾಜಕನಾಯಿತ್ ಇಂಜಗುಂಡ್, ಯೇಸು ಯೆಹೂದ್ಯ ಜನಕಾಯಿತ್ ಚಾವಾಂದು,

⁵²ಯೆಹೂದ್ಯ ಜನಕಾಯಿತ್ ಮಾತ್ರ ಅಲ್ಲ, ಚದ್‌ರಿ ಪೋನ ದೇವಡ ಮಕ್ಕಳ ಒಟ್ಟ್ ಕೂಟಿತ್ ಒಂದಾಯಿತ್ ಮಾಡ್‌ವಕಾಯಿತ್ ಚಾವಾಂದು ಪ್ರವಾದನೆಯಾಯಿತ್ ಎಣ್ಣ್‌ಚಿ.

⁵³ಆ ದಿವಸತ್ಂಜ ಅಯಿಂಗ ಯೇಸುನ ಕೊಲ್ಲ್‌ವಕ್ ಆಲೋಚನೆ ಮಾಡಿಯಂಡ್ ಇಂಜತ್.

⁵⁴ಆನಗುಂಡ್, ಅಲ್ಲಿಯಿಂಜ ಯೇಸು, ಯೆಹೂದ್ಯಂಗಡ ಮದ್ಯತ್‍ಲ್ ಪ್ರಯಾಣ ಮಾಡತೆ, ಅಲ್ಲಿ ಬುಟ್ಟಿತ್, ಮಣಬೂಮಿರ ಪಕ್ಕತ್‍ಲ್ ಇಂಜ ಎಫ್ರಾಯಿಮ್ ಎಣ್ಣುವ ಊರ್‌ಕ್ ಪೋಯಿತ್, ಅಲ್ಲಿ ಅಂವೊಂಡ ಶಿಷ್ಯಂಗಡ ಕೂಡೆ ಇಂಜತ್.

⁵⁵ಪಿಂಞ, ಯೆಹೂದ್ಯಂಗಡ ಪಸ್ಕ[16] ಎಣ್ಣುವ ನಮ್ಮೆ ಪಕ್ಕಪಕ್ಕ ಬಾತ್. ಅಕ್ಕ, ಊರ್ ಊರ್‍ಂಜ ದುಂಬ ಜನ ಯೆರೂಸಲೇಮ್‌ಕ್ ಬಂದಿತ್, ಯೆಹೂದ್ಯಂಗಡ ಪದ್ದತಿರ ಪ್ರಕಾರ ಅಯಿಂಗಳ ಪಸ್ಕ ನಮ್ಮೆಕ್ ಮಿಂಞ ಶುದ್ದ ಮಾಡ್‌ವಯಿಂಜತ್.

⁵⁶ಅಯಿಂಗ ಎಲ್ಲಾರು ದೇವಾಲಯತ್‍ಲ್ ಕೂಡಿತ್, ಯೇಸು ಎಲ್ಲಿಯಾಂದ್ ನೋಟಿಯಂಡ್ ಇಂಜತ್. ಪಿಂಞ ಅಯಿಂಗ: ನಿಂಗ ಎಂತ ಎಣ್ಣ್‌ವಿರಾ? ಅಂವೊ ನೇರಾಯಿತು ಈ ನಮ್ಮೆಕ್ ಬಪ್ಪ್‌ಲೇಂದ್ ತಕ್ಕ್ ಪರ್ಂದಂಡ್ ಇಂಜತ್.

⁵⁷ದಾರೇಂಗಿಯು ಯೇಸುನ ಕಂಡಕ, ಅಂವೊ ಎಲ್ಲಿ ಉಂಡ್‍ೕಂದ್ ಗೊತ್ತಾನಕ, ನಂಗಕ್ ನಿಂಗ ಎಣ್ಣಂಡೂಂದ್ ಮುಕ್ಯ ಯಾಜಕಂಗ ಪಿಂಞ ಫರಿಸಾಯಂಗ ಹುಕುಮ್ ಕೊಡ್‌ತಿತ್ಂಜತ್.