Read Kodava ಯೋಹಾನ 12 Bible Online

ಯೋಹಾನ 12 - Kodava bible

ಯೋಹಾನ 12

¹ಪಸ್ಕ ಎಣ್ಣುವ ನಮ್ಮೆಕ್ ಇಂಞು ಆರ್ ದಿವಸ ಮಾತ್ರ ಇಪ್ಪಕ, ಯೇಸು ಬೇಥಾನ್ಯ ಊರ್‌ಕ್ ಪೋಚಿ. ಈ ಬೇಥಾನ್ಯ ಊರ್, ಚತ್ತ್ ಪೋಯಿತ್ಂಜ ಲಾಜರನ ಯೇಸು ಪುನಃ ಎಪ್ಪ್‌ಚಿಟ್ಟ ಊರಾಯಿತ್ಂಜತ್.

²ಅಲ್ಲಿ ಲಾಜರಂಡ ಮನೆಲ್ ಯೇಸುಕ್ ಬಯಿಟ್ ಗದ್ದಾಳ ತಯಾರ್ ಮಾಡಿತ್ಂಜತ್. ಮಾರ್ಥ ಎಲ್ಲಾರ್‌ಕು ಉಪಚಾರ ಮಾಡ್‍ಚಿ. ಯೇಸುರ ಕೂಡೆ ಬಯಿಟ್ ಉಂಬಕ್ ಅಳ್‌ತಂಡಿಂಜಯಿಂಗಡಲ್ಲಿ ಲಾಜರ ಸಹ ಅಳ್‌ತಿತ್ಂಜತ್.

³ಅಕ್ಕ, ಮರಿಯ ಒರ್ ಬಲ್ಯ ಕುಪ್ಪಿಲ್ ದುಂಬ ಬೆಲೆಯುಳ್ಳ ಸುಗಂದ ತೈಲತ್‌ನ[17] ಕೊಂಡ್ ಬಾತ್. ಅದ್‍ನ ಯೇಸುರ ಕಾಲ್‌ಕ್ ಬೂಕ್‌ವಂಜಿ, ತಾಂಡ ತೆಲ್‌ಮಿಲ್ ಯೇಸುರ ಕಾಲ್‌ನ ತ್‍ೕಟ್‍ಚಿ. ಆ ತೈಲತ್‌ರ ವಾಸನೆ ಮನೆಯೆಲ್ಲಾ ಪಬ್ಬ್‌ಚಿ.

⁴ಬಯ್ಯಕ್ ಯೇಸುನ ಕೊಲ್ಲ್‌ವಕಾಯಿತ್ ಪುಡ್‌ಚಿತ್ ಕೊಡ್‍ಪ ಅಂವೊಂಡ ಶಿಷ್ಯನಾನ ಯೂದ ಇಸ್ಕರಿಯೋತ,

⁵ಇದ್‍ನ ನೋಟಿತ್: ಈ ತೈಲತ್‌ನ ಒರ್ ಕಾಲತ್‍ರ ಸಂಬಳತ್‍ರ ಉರ್‍ಪಿಯಕ್ ಮಾರ್‍ವಕ್ ಕಯಿಂಜಿತ್‌ಲ್ಲೆಯಾ? ಮಾರಿತ್ ಆ ದುಡ್ಡ್‌ನ ಗರೀಬಂಗಕ್ ಕೊಡ್‍ಪಕ್ ಕಯಿಂಜಿತಿಲ್ಲೆಯಾಂದ್ ಎಣ್ಣ್‌ಚಿ.

⁶ಅಂವೊ, ನೇರಾಯಿತು ಗರೀಬಂಗಡ ಮೇಲೆ ಕನಿಕರ ಇಂಜಗುಂಡ್ ಅನ್ನನೆ ಎಣ್ಣಿತ್‌ಲ್ಲೆ. ಅಂವೊ ಕಳ್ಳನಾಯಿತ್ ಇಂಜತ್. ದುಡ್ಡ್‌ರ ಚೀಲ ಅಂವೊಂಡ ಪಕ್ಕ ಇಂಜತ್, ಅಲ್ಲಿಂಜ ಅಂವೊ ಎಡ್‍ಪಕಿಂಜತ್.

⁷ಅಕ್ಕ ಯೇಸು: ಅವಳ ಬುಡ್, ಅವ ಇದ್‍ನ ನಾಡ ಚಾವ್ ತಡೀನ ಗೋರಿಲ್ ಬೆಪ್ಪಕ್ ಮಿಂಞ ಇಡ್‌ವಕಾಯಿತ್ ಇಚ್ಚಕ್ ದಿನ ಬೆಚ್ಚಿತ್ಂಜತ್.

⁸ಗರೀಬಂಗ ಎಕ್ಕಾಲು ನಿಂಗಡ ಕೂಡೆ ಇಪ್ಪ, ಆಚೇಂಗಿ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪುಲೇಂದ್ ಎಣ್ಣ್‌ಚಿ.

⁹ಯೇಸು ಬೇಥಾನ್ಯ ಊರ್‌ಲ್ ಉಂಡ್‍ೕಂದ್ ಅಲ್ಲಿ ಇಂಜ ದುಂಬ ಜನಕ್ ಗೊತ್ತಾಚಿ. ಆನಗುಂಡ್ ಎಲ್ಲಾರು ಅಲ್ಲಿಕ್ ಪೋಚಿ. ಯೇಸುನ ನೋಟ್‍ವಕ್ ಮಾತ್ರ ಅಲ್ಲ, ಅಂವೊ ಎಪ್ಪ್‌ಚಿಟ್ಟ ಲಾಜರನ ಸಹ ನೋಟ್‍ವಕಾಯಿತ್ ಪೋಚಿ.

¹⁰ಅಕ್ಕ, ಮುಕ್ಯ ಯಾಜಕಂಗ ಲಾಜರನ ಸಹ ಕೊಲ್ಲಂಡೂಂದ್ ತೀರ್ಮಾನ ಮಾಡಿತ್ ನೋಟಿಯಂಡ್ ಇಂಜತ್.

¹¹ಎನ್ನಂಗೆಣ್ಣ್‌ಚೇಂಗಿ, ಲಾಜರ‌ನಗುಂಡ್ ದುಂಬ ಯೆಹೂದ್ಯಂಗ ಅಯಿಂಗಳ ಬುಟ್ಟಿತ್ ಯೇಸುನ ನಂಬ್‍ವಕ್ ಸುರು ಮಾಡ್‍ಚಿ.

¹²ಪಿತ್ಯಾಂದ್ ಯೇಸು ಪಸ್ಕ ನಮ್ಮೆಕ್ ಯೆರೂಸಲೇಮ್‌ಕ್ ಬಪ್ಪಾಂದ್ ನಮ್ಮೆಕ್ ಬಂದಿತ್ಂಜ ದುಂಬ ಜನಕ್ ಗೊತ್ತಾಚಿ.

¹³ಆನಗುಂಡ್, ಅಯಿಂಗ ಎಲ್ಲಾರು ಖರ್ಜೂರ ಪಣ್ಣ್ ಮರತ್‍ರ ಕೊಂಬ್‍ನ ಎಡ್‍ತಂಡ್ ಯೇಸುನ ಕಾಂಬಕಾಯಿತ್ ಪಟ್ಟಣತ್‍ರ ಪೊರಮೆ ಪೋಚಿ. ಪಿಂಞ ಅಯಿಂಗ: ಹೊಸನ್ನ![18] ಒಡೆಯನಾನ ದೇವಡ ಪೆದತ್‍ಲ್ ಬಂದಂಡುಳ್ಳ ರಾಜ ಆಶೀರ್ವಾದ ಪಡ್ಂದಂವೊ. ಇಸ್ರಾಯೇಲ್ ಜನತ್‍ರ ರಾಜ ಆಶೀರ್ವಾದ ಪಡ್ಂದವೋಂದ್ ಜನಯೆಲ್ಲಾ ಜೋರಾಯಿತ್ ಕೂತ್ ಕೊಡ್‍ತಂಡಿಂಜತ್.[19]

¹⁴ಯೇಸು ಒರ್ ಕತ್ತೆ ಕುಟ್ಟಿನ ಕಂಡಿತ್, ಅದ್ಂಡಮೇಲೆ ಅಳ್‌ತಂಡ್ ಬಾತ್.

¹⁵ಓ ಚೀಯೋನ್‍ರ ಮಕ್ಕಳೇ,[20] ಬೊತ್ತತೆ, ನೋಟಿ, ನೀಡ ರಾಜ ಬಂದಂಡುಂಡ್, ನೀಡ ರಾಜ ಕತ್ತೆ ಕುಟ್ಟಿರ ಮೇಲೆ ಅಳ್‌ತಂಡ್ ಬಂದಂಡುಂಡ್‍ೕಂದ್ ಪ್ರವಾದಿಯಂಗಡ ಪುಸ್ತಕತ್‍ಲ್ ಒಳ್‌ದ್‌ನನೆಕೆ ಎಲ್ಲಾ ಆಚಿ.

¹⁶ಅಂವೊಂಡ ಶಿಷ್ಯಂಗಕ್ ಅಕ್ಕ ಇದ್ ಅರ್ಥ ಆಯಿತ್‌ಲ್ಲೆ; ಆಚೇಂಗಿ ಯೇಸು ಮಹಿಮೆಲ್ ಪ್ರವೇಶ ಮಾಡ್‍ನ ಪಿಂಞ, ದೇವಡ ವಾಕ್ಯತ್‍ಲ್ ಇಂವೊಂಗ್ ಇನ್ನನೆ ಆಪಾಂದು ಪಿಂಞ ಅದ್ಂಗಾಯಿತೇ ಅಯಿಂಗ ಅಂವೊಂಗ್ ಇನ್ನನೆಲ್ಲಾ ಮಾಡ್‌ಚೀಂದು ಗೇನ ಮಾಡ್‍ಚಿ.

¹⁷ಲಾಜರ ಚತ್ತ್ ಪೋಯಿತ್ ಗೋರಿಲ್ ಇಪ್ಪಕ, ಯೇಸು ಲಾಜರನ ಜೀವವಾಯಿತ್ ಪೊರಮೆ ಬಪ್ಪಕ್ ಎಣ್ಣ್‌ವಕ, ಅಂವೊಂಡ ಕೂಡೆ ಇಂಜ ಜನ ಅಕ್ಕ ಅಲ್ಲಿ ಇಂಜತ್. ಅಯಿಂಗ ಅದ್‍ನ ವಿವರಿಚಿಟ್ಟತ್.

¹⁸ಯೇಸು ಇನ್ನನೆ ಅದ್ಬುತ ಕಾರ್ಯ ಮಾಡ್‌ನಾಂಗ್, ಯೇಸುನ ಕಾಂಬಕ್ ಜನಡ ಗುಂಪ್ ಪೋಯಂಡಿಂಜತ್.

¹⁹ಅಕ್ಕ, ಫರಿಸಾಯಂಗ: ನಿಂಗ ನೋಟಿರ, ನಿಂಗಡ ಪ್ರಯತ್ನ ಎಲ್ಲಾ ಒಂದಾಂಗು ಪ್ರಯೋಜನ ಇಲ್ಲೇಂದ್ ಗೊತ್ತ್‌ಲ್ಲೆಯಾ? ಈ ಲೋಕವೇ ಯೇಸುರ ಬಯ್ಯಕ್ ಪೋಯಂಡುಂಡ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್‌ದಂಡ್ ಇಂಜತ್.

²⁰ಆ ನಮ್ಮೆರ ಸಮಯತ್‍ಲ್ ಯೆರೂಸಲೇಮ್ ದೇವಾಲಯತ್‍ಲ್ ಆರಾದನೆ ಮಾಡ್‌ವಕ್ ಬಂದಿತ್ಂಜ ಚೆನ್ನ ಗ್ರೀಕ್ ತಕ್ಕ್ ಪರಿಯುವ ಜನ ಇಂಜತ್.

²¹ಅಯಿಂಗ, ಗಲಿಲಾಯತ್‍ಲ್ ಉಳ್ಳ ಬೇತ್ಸಾಯಿದ ಊರ್‌ರ ಫಿಲಿಪ್ಪಂಡ ಪಕ್ಕ ಬಂದಿತ್: ನಂಗ ಯೇಸುನ ಕಾಂಗಂಡೂಂದ್ ಎಣ್ಣ್‌ಚಿ.

²²ಫಿಲಿಪ್ಪ ಪೋಯಿತ್ ಅಂದ್ರೆಯಂಗ್ ಎಣ್ಣ್‌ಚಿ. ಪಿಂಞ ಅಯಿಂಗ ದಂಡಾಳು ಪೋಯಿತ್ ಯೇಸುಕ್ ಅದ್‍ನ ಎಣ್ಣ್‌ಚಿ.

²³ಅಯಿಂಗಕ್ ಯೇಸು: ಮನುಷ್ಯಕುಮಾರಂಗ್ ಮಹಿಮೆ[21] ಕ್‍ಟ್ಟ್‌ವಕುಳ್ಳ ಸಮಯ ಬಾತ್.

²⁴ನಾನ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣ್‌ವಿ: ಒರ್ ಗೋದಿರ ಕಾಳ್ ನೆಲಕ್ ಬುದ್ದಿತ್ ಚಾವತೆ ಪೋಚೇಂಗಿ ಅದ್ ಒರ್ ಕಾಳಾ‍ಯಿತ್ ಮಾತ್ರ ಇಪ್ಪ, ಆಚೇಂಗಿ ಅದ್ ಚತ್ತತೇಂಗಿ, ದುಂಬ ಫಲತ್‍ನ ತಪ್ಪ.

²⁵ತಾಂಡ ಜೀವತ್‍ರ ಮೇಲೆ ದಾರ್ ದುಂಬ ಆಸೆ ಬೆಚ್ಚಿತ್‌ಪ್ಪ, ಅಯಿಂಗಕ್ ಅಯಿಂಗಡ ಜೀವ ನಾಶ ಆಯಿಪೋಪ; ಈ ಲೋಕತ್‍ಲ್ ದಾರ್ ತಾಂಡ ಜೀವತ್‍ನ ದ್ವೇಶ ಮಾಡ್‌ವ, ಅಯಿಂಗ ಅಯಿಂಗಡ ಜೀವತ್‍ನ ನಿತ್ಯ ಜೀವಕಾಯಿತ್ ಕಾಪಾಡ್‌ವ.

²⁶ನಾಕ್ ಸೇವೆ ಮಾಡ್‌ವಕ್ ಕುಶಿಪಡ್‌ವಯಿಂಗ ನಾನ್ ಮಾಡ್‌ವನೆಕೆ ಮಾಡಿತ್ ನಾಡ ಬಯ್ಯಕ್ ಬರಂಡು; ನಾನ್ ಎಲ್ಲಿ ಇಪ್ಪಿ ಅಲ್ಲಿ ಅಂವೊನು ಇಪ್ಪ; ನಾಕ್ ಒಬ್ಬ ಸೇವೆ ಮಾಡ್‍ಚೇಂಗಿ ಅಪ್ಪನಾನ ದೇವ ಅಂವೊನ ಗನಪಡುತುವಾಂದ್ ಎಣ್ಣ್‌ಚಿ.

²⁷ಇಕ್ಕ ನಾನ್ ಎಂತ ಎಣ್ಣಡ್? ನಾಡ ಆತ್ಮ ನೊಂಬಲತ್‍ಲ್ ಉಂಡ್. ಅಪ್ಪ! ನನ್ನ ಈ ಕಷ್ಟತ್‍ರ ಸಮಯತ್ಂಜ ಕಾಪಾಡ್‍ೕಂದ್ ಕ್‍ೕಪದಾ? ಆಚೇಂಗಿ, ಇದ್ಂಗಾಯಿತೇ ನಾನ್ ಬಂದಿಯೆ.

²⁸ಅಪ್ಪ, ನೀಡ ಪೆದಕ್ ಮಹಿಮೆ ಕ್‍ಟ್ಟುವನೆಕೆ ಮಾಡ್‍ೕಂದ್ ಎಣ್ಣ್‌ಚಿ. ಇನ್ನನೆ ಯೇಸು ಎಣ್ಣ್‌ವಕ, ಪರಲೋಕತ್ಂಜ ಒರ್ ವಾಣಿ: ನಾಕ್ ಮಹಿಮೆ ಕ್‍ಟ್ಟ್‌ಚಿ, ಇಂಞು ಮಹಿಮೆ ಕ್‍ಟ್ಟುವನೆಕೆ ಮಾಡ್‌ವೀಂದ್ ಎಣ್ಣ್‌ಚಿ.

²⁹ಅಲ್ಲಿ ನಿಂದಂಡಿಂಜ ಜನ ಇದ್‍ನ ಕ್‍ೕಪಕ, ಚೆನ್ನ ಜನ ಗುಡ್‌ಗ್‍ೕಂದ್ ಎಣ್ಣ್‌ಚಿ. ಬೋರೆ ಚೆನ್ನ ಜನ ಇಲ್ಲೆ, ಒರ್ ದೇವದೂತ ಇಂವೊಂಡ ಕೂಡೆ ತಕ್ಕ್ ಪರ್ಂದತ್‍ೕಂದ್ ಎಣ್ಣ್‌ಚಿ.

³⁰ಯೇಸು ಅಯಿಂಗಳ ನೋಟಿತ್: ಈ ವಾಣಿ ನಿಂಗಕಾಯಿತೇ ಬಾತ್, ನಾಕಾಯಿತ್ ಬಂದದಲ್ಲ.

³¹ದೇವ ಈ ಲೋಕಕ್ ನ್ಯಾಯತೀರ್ಪ್ ಮಾಡ್‌ವ ಸಮಯ ಇಕ್ಕಲೆ ಬಾತ್. ಈ ಲೋಕತ್‍ರ ಅದಿಪತಿನ ಇಕ್ಕಲೆ ದೇವ ಪೊರಮೆ ಚಾಡಿರ್‍ವ.

³²ನನ್ನ ಕೊಡಿಕ್ ನೇತುವಕ, ಎಲ್ಲಾರ್‌ನ ನಾನ್ ನಾಡ ಪಕ್ಕ ಬಲ್‍ಚಿರುವೀಂದ್ ಎಣ್ಣ್‌ಚಿ.

³³ಅಂವೊಂಗ್ ಏದ್ ತರತ್‍ರ ಚಾವ್ ಕ್‌ಟ್ಟುವಾಂದ್ ಗೊತ್ತುಮಾಡ್‌ಚಿಡುವಕಾಯಿತೇ ಇನ್ನನೆ ಎಣ್ಣ್‌ಚಿ.

³⁴ಅಕ್ಕ ಅಲ್ಲಿ ಇಂಜ ಜನಡ ಗುಂಪ್: ಕ್ರಿಸ್ತ ಎಕ್ಕಾಲು ಬದ್‍ಕಿಯಂಡ್ ಇಪ್ಪಾಂದ್ ನಂಗಡ ನ್ಯಾಯಪ್ರಮಾಣ ನಂಗಕ್ ಎಣ್ಣುವ. ಅನ್ನನೆ ಇಪ್ಪಕ, ಮನುಷ್ಯಕುಮಾರನ ಕೊಡಿಕ್ ನೇತುವಾಂದ್ ನಿಂಗ ಎನ್ನನೆ ಎಣ್ಣುವಿರ? ಅಕ್ಕ, ದಾರ್ ಈ ಮನುಷ್ಯಕುಮಾರಾಂದ್ ಕ್‍ೕಟತ್.[22]

³⁵ಯೇಸು ಅಯಿಂಗಕ್: ಈ ಬೊಳಿ ಇಂಞು ಚೆನ್ನ ನೇರ ಮಾತ್ರ ನಿಂಗಡ ಕೂಡೆ ಇಪ್ಪ, ಇರ್‌ಟ್‌ಲ್ ಚಿಕ್ಕತನೆಕೆ, ಈ ಬೊಳಿಲ್ ಎಕ್ಕಾಲು ನಿಂಗ ಇರಿ, ಇರ್‌ಟ್‌ಲ್ ಇಪ್ಪಂವೊ ಅಂವೊ ಎಲ್ಲಿಕ್ ಪೋಯಂಡುಂಡ್‍ೕಂದ್ ಅಂವೊಂಗ್ ಗೊತ್ತಾಪುಲೆ.

³⁶ಬೊಳಿ ನಿಂಗಡ ಕೂಡೆ ಇಪ್ಪಕಾಪಲೆ ಬೊಳಿನ ನಂಬಿ. ಅಕ್ಕ ನಿಂಗ ಬೊಳಿರ ಮಕ್ಕಳಾಯಿತ್‌ಪ್ಪಿರಾಂದ್ ಎಣ್ಣ್‌ಚಿ. ಯೇಸು ಇದ್‍ನೆಲ್ಲಾ ಎಣ್ಣ್‌ನ ಪಿಂಞ ಅಯಿಂಗಕ್ ಕಾಂಗತನೆಕೆ ಒಳ್‌ಚಂಡತ್.

³⁷ಯೇಸು ಇಚ್ಚಕೆಲ್ಲಾ ಅದ್ಬುತ ಕಾರ್ಯ ಈಂಗಡ ಮಿಂಞತ್‍ಲ್ ಮಾಡಿತಿಂಜತೇಂಗಿಯು, ಜನ ಅಂವೊನ ನಂಬುವಕಿಂಜಿಲೆ.

³⁸ನಂಗಡ ಮೂಲಕ ಕ್‍ೕಟದ್‍ನ ನಂಬ್‍ನಯಿಂಗ ದಾರ್? ನೀನ್ ಕಾಂಬ್‌ಚಿಡುವ ಶಕ್ತಿ ಅಯಿಂಗಕ್ ಗೊತ್ತಾಯಂಡಿಲ್ಲೇಂದ್[23] ಯೆಶಾಯ ಪ್ರವಾದಿ ಎಣ್ಣ್‌ನದ್ ನೆರೆವೇರುವನೆಕೆ ಇನ್ನನೆ ಆಚಿ.

³⁹ಆನಗುಂಡ್ ಅಯಿಂಗ ನಂಬುವಕ್ ಕಯಿಂಜಿತ್‌ಲ್ಲೆ; ಯೆಶಾಯ ಪ್ರವಾದಿ ಇಂಞೊಮ್ಮ:

⁴⁰ದೇವ, ಅಯಿಂಗಡ ಕಣ್ಣ್ ಕಾಂಗತನೆಕೆ ಮಾಡ್‍ನಗುಂಡ್ ಅಯಿಂಗ ಕಾಂಬುಲೆ, ದೇವ ಅಯಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡ್‍ನಗುಂಡ್ ಅಯಿಂಗಕ್ ಅರ್ಥ ಆಪುಲೆ. ಅಯಿಂಗಡ ಮನಸ್ಸ್‌ನ ತಿರಿಗಿತ್ ದೇವಡ ಪಕ್ಕ ಬರತನೆಕೆ, ದೇವ ಅಯಿಂಗಳ ವಾಸಿ ಮಾಡತನೆಕೆ ಮಾಡಿರ್‌ತ್. ಅದ್ಂಗಾಯಿತೇ ಅಯಿಂಗ ನಂಬುಲೇಂದ್ ಎಣ್ಣ್‌ಚಿ.[24]

⁴¹ಯೆಶಾಯ, ಯೇಸು ಎನ್ನನೆ ಇಪ್ಪಾಂದ್ ಪಿಂಞ ಅಂವೊಂಡ ಮಹಿಮೆನ ಗೊತ್ತಾನಗುಂಡ್ ಇನ್ನನೆ ಎಣ್ಣಿತ್ಂಜತ್.

⁴²ಆಚೇಂಗಿಯು ಸಹ, ಯೆಹೂದ್ಯ ಜನತ್‍ರ ದುಂಬ ಅದಿಕಾರಿಯಂಗ ಯೇಸುನ ನಂಬಿತ್ಂಜತ್. ಆಚೇಂಗಿ, ಅಯಿಂಗಳ ಸಬಾಮಂದಿರಕ್ ಪೊರಮೆ ಇಡತನೆಕೆ, ಫರಿಸಾಯಂಗಕಾಯಿತ್, ಎಲ್ಲಾಡ ಮಿಂಞತ್ ಅಯಿಂಗ ಯೇಸುನ ನಂಬುವಯಿಂಗಾಂದ್ ಅರಿಕೆ ಮಾಡಿತ್‌ಲ್ಲೆ.

⁴³ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ದೇವಡ ಕಡೇಯಿಂಜ ಕ್‍ಟ್ಟುವ ಮರ್ಯಾದೆಕಿಂಜ ಮನುಷ್ಯಂಗ ತಪ್ಪ ಮರ್ಯಾದೆಲ್ ದುಂಬ ಕುಶಿಪಟ್ಟತ್.

⁴⁴ಆ ಸಮಯತ್‍ಲ್ ಯೇಸು ಜೋರಾಯಿತ್: ನನ್ನ ನಂಬುವಂವೊ, ನಾಡ ಮೇಲೆ ಅಲ್ಲ, ನನ್ನ ಅಯಿಚಂವೊಂಡ ಮೇಲೆ ನಂಬಿಕೆ ಇಟ್ಟಂಡುಂಡ್.

⁴⁵ನನ್ನ ದಾರ್ ಕಂಡಂಡುಂಡೋ ಅಂವೊ ನನ್ನ ಅಯಿಚಂವೊನ ಕಂಡಂಡುಂಡ್.

⁴⁶ನಾಡ ಮೇಲೆ ನಂಬಿಕೇಲ್ ಉಳ್ಳಯಿಂಗ ದಾರೂ ಇರ್‌ಟ್‌ಲ್ ಇಕ್ಕತನೆಕೆ, ನಾನ್ ಈ ಲೋಕಕ್ ಬೊಳಿಯಾಯಿತ್ ಬಂದಿಯೆ.

⁴⁷ಒಬ್ಬ ನಾಡ ತಕ್ಕ್‌ನ ಕ್‍ೕಟಿತ್ ಅದ್‍ನ ನಂಬತೆ ಪೋನಕ, ಅಂವೊನ ನಾನ್ ನ್ಯಾಯತೀರ್ಪ್ ಮಾಡುಲೆ, ನಾನ್ ಈ ಲೋಕಕ್ ನ್ಯಾಯತೀರ್ಪ್ ಕೊಡ್‍ಪಕಾಯಿತ್ ಬಂದಿತ್‌ಲ್ಲೆ, ಅದ್‍ನ ಕಾಪಾಡ್‌ವಕಾಯಿತೇ ಬಂದಿಯೆ.

⁴⁸ನನ್ನ ಅಲ್ಲಗೆಳೆದಿತ್, ನಾಡ ವಾಕ್ಯತ್‍ನ ಸ್ವೀಕಾರ ಮಾಡತಯಿಂಗಳ ನಾನ್ ನ್ಯಾಯತೀರ್ಪ್ ಮಾಡುಲೆ, ನಾನ್ ಎಣ್ಣ್‌ನ ದೇವಡ ವಾಕ್ಯವೇ ಆಕೀರ್ ದಿವಸತ್‍ಲ್ ಅಂವೊನ ನ್ಯಾಯತೀರ್ಪ್ ಮಾಡ್‌ವ.

⁴⁹ನಾನ್ ನಾಡ ಇಷ್ಟತ್‍ರ ಪ್ರಕಾರ ಇನ್ನನೆ ತಕ್ಕ್ ಪರ್‌ಂದಂಡಿಲ್ಲೆ. ನಾನ್ ಎಂತ ತಕ್ಕ್ ಪರಿಯಂಡು, ಎಂತ ಬೋದನೆ ಮಾಡಂಡೂಂದ್ ನನ್ನ ಅಯಿಚ ದೇವ ನಾಕ್ ಹುಕುಮ್ ಕೊಡ್‌ತಿತುಂಡ್.

⁵⁰ಅಂವೊಂಡ ಆಜ್ಞೆ ನಿತ್ಯ ಜೀವತ್‍ನ ತಪ್ಪಾಂದ್ ನಾಕ್ ಗೊತ್ತುಂಡ್. ಆನಗುಂಡ್, ನಾಡ ಅಪ್ಪ ನಾಕ್ ಎಣ್ಣ್‌ನನೆಕೆ ನಾನ್ ತಕ್ಕ್ ಪರ್ಂದಂಡುಂಡ್‍ೕಂದ್ ಎಣ್ಣ್‌ಚಿ.