Read Kodava ಯೋಹಾನ 13 Bible Online

ಯೋಹಾನ 13 - Kodava bible

ಯೋಹಾನ 13

¹ಇಕ್ಕ, ಪಸ್ಕ ನಮ್ಮೆ ಪಕ್ಕಪಕ್ಕ ಬಾತ್. ಯೇಸುಕ್: ನಾನ್ ಈ ಲೋಕತ್‍ನ ಬುಟ್ಟಿತ್ ನಾಡ ಅಪ್ಪಂಡ ಪಕ್ಕ ಪೋಪೀಂದ್ ಗೊತ್ತಾಚಿ. ಆನಗುಂಡ್, ಅಂವೊ ಈ ಲೋಕತ್‍ಲ್ ಇಂಜ ಅಂವೊಂಡಯಿಂಗಳ ಎಚ್ಚಕ್ ಪ್ರೀತಿ ಮಾಡಿತ್ಂಜತೋ ಅನ್ನನೆ ಆಕೀರ್‍ಕತ್ತನೆ ಪ್ರೀತಿ ಮಾಡ್‍ಚಿ.

²ಆ ಬಯಿಟ್ ಅಯಿಂಗೆಲ್ಲಾರು ಉಂಡಂಡಿಂಜತ್, ಸೀಮೋನಂಡ ಮೋಂವೊನಾನ ಯೂದ ಇಸ್ಕರಿಯೋತಂಗ್, ಯೇಸುನ ಪುಡ್‌ಚಿತ್ ಕೊಡ್‍ಕಂಡೂಂದ್ ಉಳ್ಳ ಗೇನತ್‍ನ ಸೈತಾನ ಅಂವೊಂಡ ಮನಸ್ಸ್‌ಲ್ ಮಿಂಞಲೇ ಇಟ್ಟಿತ್ಂಜತ್.

³ಯೇಸುಕ್: ತಾಂಡ ಅಪ್ಪನಾನ ದೇವ ಎಲ್ಲಾನ ಮಾಡ್‌ವಕುಳ್ಳ ಶಕ್ತಿನ ಕೊಡ್‌ತಿತ್ ಉಂಡ್‍ೕಂದು, ತಾನ್ ದೇವಡಯಿಂಜ ಬಾತ್‍ೕಂದು, ದೇವಡ ಪಕ್ಕ ಪೋಯಂಡುಂಡ್‍ೕಂದು ಗೊತ್ತಾನಗುಂಡ್:

⁴ಅಂವೊ ಉಂಬದ್‌ನ ಬುಟ್ಟಿತ್ ಎದ್ದಿತ್, ಅಂವೊಂಡ ಮೇಲೆ ಉಳ್ಳ ಬಟ್ಟೇನ ಉತ್ತಿತ್, ಒರ್ ತೋರ್ತ್‌ನ ಅರೆಕ್ ಕೆಟ್ಟ್‌ಚಿ.

⁵ಪಿಂಞ ಒರ್ ಪಾತ್ರತ್‍ಲ್ ಚೆನ್ನ ನೀರ್ ಬೂಕಿತ್, ಅಂವೊಂಡ ಶಿಷ್ಯಂಗ ಒಬ್ಬೊಬ್ಬಂಗಡ ಕಾಲ್‌ನ ಕತ್ತ್‌ವಂಜಿ ತೋರ್ತ್‌ಲ್ ತ್‍ೕಟ್‍ಚಿ.

⁶ಅನ್ನನೆ ಯೇಸು ಸೀಮೋನ ಪೇತ್ರಂಡ ಪಕ್ಕ ಬಾತ್. ಪೇತ್ರ ಯೇಸುಕ್: ಒಡೆಯನೇ! ನೀನ್ ನಾಡ ಕಾಲ್‌ನ ಕತ್ತ್‌ವಿಯಾ? ಅನ್ನನೆ ಮಾಡ್‌ವಕ್ಕಾಗಾಂದ್ ಎಣ್ಣ್‌ಚಿ.

⁷ಅಂವೊಂಗ್ ಯೇಸು: ನಾನ್ ಎಂತ ಮಾಡಿಯಂಡುಳ್ಳ್‌ಂದ್ ನೀಕ್ ಇಕ್ಕ ಅರ್ಥ ಆಪುಲೆ, ಆಚೇಂಗಿ ಬಯ್ಯ ನೀಕ್ ಗೊತ್ತಾಪಾಂದ್ ಉತ್ತರ ಕೊಡ್‍ತತ್.

⁸ಅಕ್ಕ ಪೇತ್ರ: ನೀನ್ ನಾಡ ಕಾಲ್‌ನ ಕತ್ತ್‌ವಕ್ ನಾನ್ ಬುಡ್‍ಲೇಂದ್ ಎಣ್ಣ್‌ಚಿ. ಅಂವೊಂಗ್ ಯೇಸು: ನಾನ್ ನೀಡ ಕಾಲ್‌ನ ಕತ್ತತೆ ಪೋನಕ ನೀಕ್ ನಾಡಲ್ಲಿ ಬಾದ್ಯತೆ ಇಲ್ಲೇಂದ್ ಎಣ್ಣ್‌ಚಿ.

⁹ಅಕ್ಕ ಅಂವೊ: ಒಡೆಯನೇ, ನೀನ್ ನಾಡ ಕಾಲ್‌ನ ಮಾತ್ರ ಅಲ್ಲ, ನಾಡ ಮಂಡೆನ, ಕೈಯಿನ ಸಹ ಕತ್ತ್‍ೕಂದ್ ಪೇತ್ರ ಎಣ್ಣ್‌ಚಿ.

¹⁰ಯೇಸು ಅಂವೊನ ನೋಟಿತ್: ದಾರ್ ಚಾಯಿತೆ ಕುಳ್‌ಚಿತ್ ಶುದ್ದವಾಯಿತುಂಡೊ, ಅಯಿಂಗ ಬರಿ ಅಯಿಂಗಡ ಕಾಲ್‌ನ ಕತ್ತ್‌ಚೇಂಗಿ ಮದಿ. ಒಬ್ಬನ ಬುಟ್ಟಿತ್, ನಿಂಗ ಎಲ್ಲಾರು ಶುದ್ದವಾಯಿತ್ ಉಳ್ಳಿರಾಂದ್ ಎಣ್ಣ್‌ಚಿ.

¹¹(ಯೇಸುಕ್ ಅಂವೊನ ದಾರ್ ಪುಡ್‌ಚಿತ್ ಕೊಡ್‍ಪಾಂದ್ ಗೊತ್ತ್ಂಜಗುಂಡ್, ಒಬ್ಬನ ಬುಟ್ಟಿತ್ ಎಲ್ಲಾರು ಶುದ್ದ ಆಯಿತುಳ್ಳಿರಾಂದ್ ಎಣ್ಣ್‌ಚಿ).

¹²ಯೇಸು ಅಯಿಂಗಡ ಕಾಲ್‌ನ ಕತ್ತಿತ್ ಆನ ಪಿಂಞ ಅಂವೊಂಡ ಬಟ್ಟೇನ ಇಟ್ಟಂಡ್ ಅಂವೊಂಡ ಜಾಗಕ್ ಬಾತ್. ನಾನ್ ನಿಂಗಕ್ ಎಂತ ಮಾಡಿಯೇಂದ್ ನಿಂಗಕ್ ಗೊತ್ತಾಚಾಂದ್ ಕ್‍ೕಟತ್.

¹³ನಿಂಗ ನನ್ನ ಉಪಾದ್ಯಾಂದ್, ಒಡೆಯನೇಂದ್ ಕಾಕ್‍ವಿರ, ಅಕ್ಕು ನಿಂಗ ಕಾಕ್‌ವದ್ ನೇರ್. ನಾನ್ ನೇರಾಯಿತ್ ಒಡೆಯನಾಯಿತು ಉಪಾದ್ಯನಾಯಿತು ಉಳ್ಳ.

¹⁴ಒಡೆಯನು, ಉಪಾದ್ಯನು ಆನ ನಾನ್ ಇನ್ನನೆ ನಿಂಗಡ ಕಾಲ್‌ನ ಕತ್ತಿತುಂಡೇಂಗಿ, ನಿಂಗಳು ಸಹ ಒಬ್ಬೊಬ್ಬಂಗಡ ಕಾಲ್‌ನ ಕತ್ತಂಡು.

¹⁵ನಾನ್ ನಿಂಗಕ್ ಮಾಡ್‍ನನೆಕೆ, ನಿಂಗಳು ಮಾಡ್‌ವಕಾಯಿತ್ ನಾನ್ ನಿಂಗಕ್ ಕಾಟಿ ತಂದಿಯೆ.

¹⁶ನಾನ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣ್‌ವಿ: ಎಜಮಾನಗಿಂಜ ಆಳ್ ಬಲ್ಯಂವೊನಾಯಿತ್‌ಪ್ಪುಲೆ. ಸುದ್ದಿ ಎಡ್‌ತ ಪೋಪಂವೊ, ಅಂವೊನ ಅಯಿಚಂವೊಗಿಂಜ ಬಲ್ಯಂವೊನಾಯಿಯತ್‌ಪ್ಪುಲೆ.

¹⁷ನಿಂಗಕ್ ಈ ಸತ್ಯ ಇಕ್ಕ ಗೊತ್ತಾಚಿ. ನಿಂಗ ಇದ್‍ನ ಉಪಯೋಗ ಮಾಡ್‍ಚೇಂಗಿ ನಿಂಗ ಎಚ್ಚಕ್ ಆಶೀರ್ವಾದ ಪಡ್ಂದಯಿಂಗಾಂದ್ ಗೊತ್ತುಂಡಾ?

¹⁸ನಿಂಗೆಲ್ಲಾಡ ವಿಷಯತ್‍ನ ನಾನ್ ಎಣ್ಣಿತ್‌ಲ್ಲೆ, ನಾನ್ ಗೊತ್ತ್ ಮಾಡ್‍ನಯಿಂಗಳ ನಾಕ್ ಗೊತ್ತುಂಡ್; ಆಚೇಂಗಿಯು, ನಾಡ ಕೂಡೆ ಕೂಳ್ ತಿಂದಂವೊನೇ, ನಾಡ ಮೇಲೆ ಅಂವೊಂಡ ಕಾಲ್‍ರ ಮುಡಿನ ನೇತ್‍ಚೀಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳನೆಕೆ ಇದ್ ಆಚಿ.[25]

¹⁹ಅದ್ ಅನ್ನನೆ ನಡ್‌ಪಕಾಪಕ, ನಾಡ ಮೇಲೆ ಉಳ್ಳ ನಂಬಿಕೇಲ್ ನಿಂಗ ನಿಂದಿತ್, ನಾನೇ ಅಂವೋಂದ್ ನಿಂಗಕ್ ಗೊತ್ತಾಪನೆಕೆ, ಇಕ್ಕಲೆ ನಿಂಗಕ್ ಎಣ್ಣ್‌ವಿ.

²⁰ನಾನ್ ಅಯಿಚಂವೊನ ಸತ್ಕಾರ ಮಾಡ್‌ವಯಿಂಗ ನನ್ನ ಸಹ ಸತ್ಕಾರ ಮಾಡ್‍ನನೆಕೆ. ನನ್ನ ಸತ್ಕಾರ ಮಾಡ್‌ವಯಿಂಗ ನನ್ನ ಅಯಿಚಂವೊನ ಸತ್ಕಾರ ಮಾಡ್‍ನನೆಕೆ, ಇದ್‍ನ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

²¹ಇನ್ನನೆಲ್ಲಾ ಯೇಸು ಎಣ್ಣಿತಾನ ಪಿಂಞ, ಯೇಸು ಆತ್ಮತ್‍ಲ್ ದುಂಬ ವ್ಯಸನಪಟ್ಟಿತ್: ನಿಂಗಡ ಕೂಟ್‌ಲ್ ಒಬ್ಬ ನನ್ನ ಪುಡ್‌ಚಿತ್ ಕೊಡ್‍ಪಾಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

²²ಅಕ್ಕ, ಯೇಸು ದಾಡ ವಿಷಯತ್‍ನ ಇನ್ನನೆ ಎಣ್ಣಿಯಂಡ್ ಉಂಡ್‍ೕಂದ್ ಶಿಷ್ಯಂಗಕ್ ಗೊತ್ತಿಲ್ಲತೆ ಒಬ್ಬೊಬ್ಬಂಡ ಮೂಡ್‍ನ ನೋಟ್‍ವಕಿಂಜತ್.

²³ಅಕ್ಕ, ಅಂವೊಂಡ ಶಿಷ್ಯಂಗಡ ಕೂಟ್‌ಲ್ ಯೇಸುರ ಮೇಲೆ ದುಂಬ ಪ್ರೀತಿ ಬೆಚ್ಚಿತ್ಂಜ ಒರ್ ಶಿಷ್ಯ ಯೇಸುರ ಎದೆರ ಪಕ್ಕ ಅಳ್‍ತಂಡಿಂಜತ್.

²⁴ಸೀಮೋನ ಪೇತ್ರ ಅಂವೊನ ನೋಟಿತ್: ದಾಡ ವಿಷಯತ್ ಯೇಸು ತಕ್ಕ್ ಪರಿಯುವಾಂದ್ ಸನ್ನೆ ಕಾಟ್‍ಚಿ.

²⁵ಅಕ್ಕ ಆ ಶಿಷ್ಯ ಯೇಸುರ ಎದೆರ ಪಕ್ಕತ್‍ಲ್ ಇಂಜಂಡ್, ದಾರ್ ಒಡೆಯನೇಂದ್ ಕ್‍ೕಟತ್.

²⁶ಯೇಸು ಅಂವೊಂಗ್: ನಾನ್ ಈ ಒಟ್ಟಿನ ಮುಕ್ಕಿತ್ ದಾರ್‌ಕ್ ಕೊಡ್‍ಪಿ, ಅಂವೊನೇಂದ್ ಎಣ್ಣಿತ್, ಚೂರ್ ಒಟ್ಟಿನ ರಸತ್‍ಲ್ ಮುಕ್ಕುವಂಜಿ ಸೀಮೋನಂಡ ಮೋಂವೊನಾನ ಯೂದ ಇಸ್ಕರಿಯೋತಂಗ್ ಕೊಡ್‍ತತ್.

²⁷ಯೂದ ಈ ಒಟ್ಟಿನ ಎಡ್‌ತ ಪಿಂಞ, ಅಕ್ಕಣೆ ಸೈತಾನ ಅಂವೊಂಡ ಒಳ್‍ಕ್ ಕೂಡ್‌ಚಿ. ಅಕ್ಕ ಯೇಸು ಅಂವೊನ ನೋಟಿತ್: ನೀನ್ ಎಂತ ಮಾಡಂಡೂಂದ್ ಉಳ್ಳಿಯ ಅದ್‍ನ ಬೆರಿಯ ಮಾಡ್‍ೕಂದ್ ಎಣ್ಣ್‌ಚಿ.

²⁸ಅಲ್ಲಿ ಉಂಬಕ್ ಇಂಜಯಿಂಗ ದಾರ್‌ಕು, ಯೇಸು ಎನ್ನಂಗ್ ಇನ್ನನೆ ಎಣ್ಣ್‌ಚೀಂದ್ ಅರ್ಥ ಆಯಿತ್‌ಲ್ಲೆ.

²⁹ಯೂದಂಡ ಕೈಯಿಲ್ ಪಣತ್‍ರ ಚೀಲ ಇಂಜಗುಂಡ್, ಅಂವೊ ಪೋಯಿತ್ ನಮ್ಮೆಕ್ ಎಂತಾಚು ಎಡ್‍ತಂಡ್ ಬಪ್ಪಕಾಯಿತ್, ಇಲ್ಲೇಂಗಿ, ಗರೀಬಂಗಕ್ ಎಂತಾಚು ಕೊಡ್‍ಪಕ್ ಯೇಸು ಪರ್ಂದಿತ್ ಇಕ್ಕೂಂದ್ ಯೇಸುರ ಶಿಷ್ಯಂಗ ಗೇನ ಮಾಡ್‍ಚಿ.

³⁰ಯೂದ ಒಟ್ಟಿನ ಎಡ್‍ತಂಡ್ ಅಕ್ಕಲೆ ಪೊರಮೆ ಪೋಚಿ. ಅಕ್ಕ ಬಯಿಟ್ ಆಯಿತ್ಂಜತ್.

³¹ಯೂದ ಅಲ್ಲಿಂಜ ಪೋನ ಪಿಂಞ, ಯೇಸು ಅಯಿಂಗಳ ನೋಟಿತ್: ಮನುಷ್ಯಕುಮಾರ ಅಂವೊಂಡ ಮಹಿಮೆಲ್ ಪೋಪಕ್ ಸಮಯ ಬಾತ್. ಅಂವೊನಗುಂಡ್ ದೇವಕ್ ಸಹ ಮಹಿಮೆ ಕ್‍ಟ್ಟುವ.

³²ಅಂವೊಂಡ ಮೂಲಕ ದೇವಕ್ ಮಹಿಮೆ ಕ್‍ಟ್ಟ್‌ಚೇಂಗಿ, ದೇವ ಅಂವೊಂಡ ಮೂಲಕ ತಾಂಡ ಒಳ್‌ಲ್‌ ಅಂವೊಂಗ್ ಮಹಿಮೆ ಕ್‍ಟ್ಟುವನೆಕೆ ಮಾಡುವ, ಇಕ್ಕಲೆ ಒಮ್ಮಕೆ ಮಹಿಮೆನ ಕ್‍ಟ್ಟುವನೆಕೆ ಮಾಡುವ.

³³ನಾಡ ಚೆರಿಯ ಮಕ್ಕಳೇ, ನಾನ್ ನಿಂಗಡ ಕೂಡೆ ಚೆನ್ನಂಗೇ ಸಮಯ ಇಪ್ಪಿ; ನನ್ನ ನಿಂಗ ತ್‍ೕಡ್‌ವಿರ. ನಾನ್ ಪೋಪ ಜಾಗಕ್ ನಿಂಗಕ್ ಬಪ್ಪಕ್ ಕಯ್ಯುಲೇಂದ್ ನಾನ್ ಯೆಹೂದ್ಯಂಗಕ್ ಎಣ್ಣ್‌ನನೆಕೆ, ಇಕ್ಕ ನಾನ್ ನಿಂಗಕ್ ಸಹ ಎಣ್ಣ್‌ವಿ.

³⁴ಇಕ್ಕ ನಾನ್ ನಿಂಗಕ್ ಒರ್ ಪುದಿಯ ಹುಕುಮ್ ತಪ್ಪಿ. ಅದ್ ಎಂತ ಎಣ್ಣ್‌ಚೇಂಗಿ, ನಿಂಗ ಒಬ್ಬೊಬ್ಬಂಡ ಮೇಲೆ ಪ್ರೀತಿಲ್ ಇರಂಡು; ನಾನ್ ನಿಂಗಳ ಪ್ರೀತಿ ಮಾಡ್‍ನನೆಕೆ, ನಿಂಗಳು ಒಬ್ಬೊಬ್ಬಂಡ ಮೇಲೆ ಪ್ರೀತಿ ಮಾಡಂಡು.

³⁵ನಿಂಗಡಲ್ಲಿ ಒಬ್ಬೊಬ್ಬಂಗ್ ಪ್ರೀತಿ ಉಂಡೇಂಗಿ, ನಿಂಗ ನಾಡ ಶಿಷ್ಯಂಗಾಂದ್ ಎಲ್ಲಾ ಜನಕ್ ಗೊತ್ತಾಪಾಂದ್ ಎಣ್ಣ್‌ಚಿ.

³⁶ಸೀಮೋನ ಪೇತ್ರ ಯೇಸುನ ನೋಟಿತ್: ಒಡೆಯನೇ, ನೀನ್ ಎಲ್ಲಿಕ್ ಪೋಪಿಯಾಂದ್ ಕ್‍ೕಟತ್. ಯೇಸು ಅಂವೊಂಗ್: ನಾನ್ ಪೋಪ ಜಾಗಕ್ ಇಕ್ಕ ನೀಕ್ ಬಪ್ಪಕ್ ಆಪುಲೆ, ಬಯ್ಯಕ್ ಬಪ್ಪಿಯಾಂದ್ ಎಣ್ಣ್‌ಚಿ.

³⁷ಪೇತ್ರ ಅಂವೊನ ನೋಟಿತ್: ಒಡೆಯನೇ, ಎನ್ನಂಗ್ ನಾನ್ ಇಕ್ಕ ನೀಡ ಬಯ್ಯ ಬಪ್ಪಕಯ್ಯುಲೆ? ನೀಕಾಯಿತ್ ನಾನ್ ನಾಡ ಪ್ರಾಣತ್‍ನ ಸಹ ತಪ್ಪಕ್ ತಯಾರಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ.

³⁸ಯೇಸು ಅಂವೊನ ನೋಟಿತ್: ನೀನ್ ನೇರಾಯಿತು ನಾಕಾಯಿತ್ ಚಾವಕ್ ತಯಾರಾಯಿತುಳ್ಳಿಯಾ? ಇಂದ್ ಮಲ್ಲಂಗೋಳಿ ಕೂವಾಂಗ್ ಮಿಂಞ ನನ್ನ ನೀಕ್ ಗೊತ್ತ್‌ಲೇಂದ್ ಮೂಂದ್ ಕುರಿ ನೀನ್ ಎಣ್ಣುವಿಯಾಂದ್ ನೇರಾಯಿತು ನೇರಾಯಿತು ನಾನ್ ನೀಕ್ ಎಣ್ಣುವೀಂದ್ ಎಣ್ಣ್‌ಚಿ.