Read Kodava ಯೋಹಾನ 15 Bible Online

ಯೋಹಾನ 15 - Kodava bible

ಯೋಹಾನ 15

¹ನಾನೇ ನೇರಾನ ದ್ರಾಕ್ಷಿ ಬಳ್ಳಿ, ನಾಡ ಅಪ್ಪ ತೋಟಕಾರ.

²ನಾಡಲ್ಲಿ ಇಂಜಂಡ್ ಫಲ ಕೊಡ್‍ಕತ ಕೊಂಬ್‌ನೆಲ್ಲ ಅಂವೊ ಮುರಿಚಿತ್ ಇಡ್‌ವ; ಫಲ ತಪ್ಪ ಕೊಂಬ್‍ನ ಇಂಞು ದುಂಬ ಫಲ ತಪ್ಪನೆಕೆ ಕಪಾತ್ ಮಾಡ್‌ವ.

³ನಾನ್ ನಿಂಗಕ್ ಎಣ್ಣ್‌ನ ವಾಕ್ಯತ್‍ರಗುಂಡ್ ನಿಂಗ ಇಕ್ಕಲೆ ಶುದ್ದ ಆಯಿತುಳ್ಳಿರ.

⁴ನಿಂಗ ನಾಡಲ್ಲಿ ಸ್ತಿರವಾಯಿತಿರಿ, ನಾನ್ ನಿಂಗಡಲ್ಲಿ ಸ್ತಿರವಾಯಿತ್ ಇಪ್ಪಿ; ಕೊಂಬ್ ಬಳ್ಳಿಲ್ ಸ್ತಿರವಾಯಿತ್ ಇಲ್ಲತಪೋನಕ ಎನ್ನನೆ ತಾನಾಯಿತೇ ಫಲ ತಪ್ಪ್‌ಲೆಯೊ ಅನ್ನನೆ ನಿಂಗ ನಾಡಲ್ಲಿ ಸ್ತಿರವಾಯಿತ್ ಇಕ್ಕತೆ ಪೋನಕ ಫಲ ತಪ್ಪುಲೆ.

⁵ನಾನೇ ದ್ರಾಕ್ಷಿ ಬಳ್ಳಿ, ನಿಂಗ ಕೊಂಬ್. ಒಬ್ಬ ನಾಡಲ್ಲಿ, ನಾನ್ ಅಂವೊಂಡಲ್ಲಿ ಸ್ತಿರವಾಯಿತ್ ಇಂಜತೇಂಗಿ ದುಂಬ ಫಲ ತಪ್ಪ; ನಿಂಗಕ್ ನನ್ನ ಬುಟ್ಟಿತ್ ಒಂದು ಮಾಡ್‌ವಕ್ ಕಯ್ಯುಲೆ.

⁶ದಾರ್ ನಾಡಲ್ಲಿ ಸ್ತಿರವಾಯಿತ್ ಇಲ್ಲೆ, ಅಂವೊ ಪೊರಮೆ ಚಾಡ್‌ನ ಕೊಂಬ್‌ರನೆಕೆ ಇಪ್ಪ. ಆ ಕೊಂಬ್ ಒಣಂಗಿ ಪೋಪ; ಅನ್ನನೆ ಚಾಡ್‌ನ ಕೊಂಬ್‍ನ ಕೂಟಿತ್ ತಿತ್ತ್‌ಕ್ ಇಡ್‌ವ. ಅನ್ನನೆ ಅದ್ ಚುಟ್ಟ್ ಪೋಪ.

⁷ನಿಂಗ ನಾಡಲ್ಲಿಯು, ನಾಡ ವಾಕ್ಯ ನಿಂಗಡಲ್ಲಿಯು ಸ್ತಿರವಾಯಿತ್ಂಜತೇಂಗಿ, ನಿಂಗ ಎಂತ ಬೋಡ್‍ವಿರ, ಅದ್ ನಿಂಗಕ್ ಕ್‍ಟ್ಟ್‌ವ.

⁸ನಿಂಗ ದುಂಬ ಫಲ ತಪ್ಪಯಿಂಗಳಾಯಿತ್ ಇಂಜತೇಂಗಿ, ನಾಡ ಅಪ್ಪಂಗ್ ಮಹಿಮೆ ಕ್‍ಟ್ಟುವ, ನಾಕ್ ಸಹ ನಿಂಗ ಶಿಷ್ಯಂಗಳಾಯಿತ್‌ಪ್ಪಿರ.

⁹ಅಪ್ಪ ನನ್ನ ಪ್ರೀತಿ ಮಾಡ್‌ವನೆಕೆ, ನಾನು ನಿಂಗಳ ಪ್ರೀತಿ ಮಾಡ್‌ವಿ; ನಾಡ ಪ್ರೀತಿಲ್ ನಿಂಗ ಸ್ತಿರವಾಯಿತ್ ಇರಿ.

¹⁰ನಾನ್ ನಾಡ ಅಪ್ಪಂಡ ಆಜ್ಞೆರ ಪ್ರಕಾರ ನಡ್ಂದಂಡ್ ಅಂವೊಂಡ ಪ್ರೀತಿಲ್ ಸ್ತಿರವಾಯಿತ್ ಇಪ್ಪನೆಕೆ ನಿಂಗಳು ನಾಡ ಆಜ್ಞೆರ ಪ್ರಕಾರ ನಡ್‌ದಂಡ್ ಇಂಜತೇಂಗಿ ನಾಡ ಪ್ರೀತಿಲ್ ನಿಂಗ ಸ್ತಿರವಾಯಿತ್ ಇಪ್ಪಿರ.

¹¹ನಾಡ ಕುಶಿ ನಿಂಗಡಲ್ಲಿ ಎಕ್ಕಾಲು ಇರಂಡೂಂದು, ನಿಂಗಡ ಕುಶಿ ಪೂರ್ತಿಯಾಯಿತ್ ಇರಂಡೂಂದ್ ಇದ್‍ನೆಲ್ಲಾ ನಾನ್ ನಿಂಗಕ್ ಎಣ್ಣಿಯೆ.

¹²ನಾನ್ ನಿಂಗಳ ಪ್ರೀತಿ ಮಾಡ್‌ವನೆಕೆ ನಿಂಗಳು ಒಬ್ಬೊಬ್ಬನ ಪ್ರೀತಿ ಮಾಡಂಡು, ಇದ್ ನಾಡ ಆಜ್ಞೆ.

¹³ಒಬ್ಬ ತಾಂಡ ಸ್ನೇಹಿತಂ‌ಗಾಯಿತ್ ಪ್ರಾಣತ್‍ನ ಕೊಡ್‍ಪ ಪ್ರೀತಿಗಿಂಜ ಬಲ್ಯ ಪ್ರೀತಿ ಬೋರೆ ಒಂದು ಇಲ್ಲೆ.

¹⁴ನಾನ್ ನಿಂಗಕ್ ಎಣ್ಣ್‌ನ ಆಜ್ಞೆರ ಪ್ರಕಾರ ನಡ್‌ದಂಡ್ ಇಂಜತೇಂಗಿ ನಿಂಗ ನಾಡ ಸ್ನೇಹಿತಂಗಳಾಯಿತಿಪ್ಪಿರ.

¹⁵ಇಂಞು ಮಿಂಞಕ್ ನಾನ್ ನಿಂಗಳ ನಾಡ ಪಣಿಕಾರಂಗಾಂದ್ ಕಾಕುಲೆ. ಎಜಮಾನ ಮಾಡ್‍ವದ್ ಪಣಿಕಾರಂಗಕ್ ಗೊತ್ತಿಪ್ಪುಲೆ. ನಿಂಗಳ ನಾಡ ಸ್ನೇಹಿತಂಗಾಂದ್ ನಾನ್ ಎಣ್ಣಿಯೆ. ಎನ್ನಂಗೆಣ್ಣ್‌ಚೇಂಗಿ, ನಾಡ ಅಪ್ಪಂಡಿಂಜ ನಾನ್ ಕ್‍ೕಟಾನೆಲ್ಲಾ ನಿಂಗಕ್ ನಾನ್ ಎಣ್ಣಿಯೆ.

¹⁶ನಿಂಗ ನನ್ನ ಗೊತ್ತ್ ಮಾಡಿತ್‌ಲ್ಲೆ. ನಾನ್ ನಿಂಗಳ ಗೊತ್ತ್ ಮಾಡಿಯೆ; ನಿಂಗ ಪೋಯಿತ್ ಫಲ ತಪ್ಪನೆಕೆಯು, ನಿಂಗಡ ಫಲ ಸದಾ ನಿಕ್ಕಂಡೂಂದು ನಿಂಗಳ ನೇಮಿಚಿಟ್ಟಿಯೆ. ಆನಗುಂಡ್, ನಾಡ ಪೆದತ್‍ಲ್ ಅಪ್ಪನ ನಿಂಗ ಎಂತ ಕ್‍ೕಪಿರೋ, ಅದ್‍ನ ಅಂವೊ ನಿಂಗಕ್ ತಪ್ಪ.

¹⁷ನಿಂಗ ಒಬ್ಬೊಬ್ಬನ ಪ್ರೀತಿ ಮಾಡಂಡು, ಇದ್ ನಾನ್ ನಿಂಗಕ್ ಪಡಿಪ್‍ಚಿಡುವ ಆಜ್ಞೆ.

¹⁸ಈ ಲೋಕತ್‍ರ ಜನ ನಿಂಗಳ ವಿರೋದ ಮಾಡ್‍ಚೇಂಗಿ, ಅಯಿಂಗ ನಿಂಗಕ್ ಮಿಂಞ ನನ್ನ ವಿರೋದ ಮಾಡ್‍ಚೀಂದ್ ನಿಂಗ ಗೇನ ಮಾಡಿಯೊಳಿ.

¹⁹ನಿಂಗ ಈ ಲೋಕತ್‍ರ ಜನತ್‍ರನೆಕೆ ಇಂಜತೇಂಗಿ, ಈ ಲೋಕ ನಿಂಗಳ ಅಯಿಂಗಡ ಜನಾಂದ್ ಪ್ರೀತಿ ಮಾಡ್‌ವಕಿಂಜತ್; ಆಚೇಂಗಿ ನಿಂಗ ಈ ಲೋಕತ್‍ರ ಜನತ್‍ರನೆಕೆ ಇಲ್ಲತಗುಂಡ್ ಪಿಂಞ ನಾನ್ ನಿಂಗಳ ಈ ಲೋಕತ್ಂಜ ಗೊತ್ತ್ ಮಾಡಿತುಳ್ಳಗುಂಡ್ ಈ ಲೋಕ ನಿಂಗಳ ವಿರೋದಿಚಿಡುವ.

²⁰ಒರ್ ಎಜಮಾನಗಿಂಜ ಆಳ್ ಬಲ್ಯಂವೊನಾಯಿತ್‌ಪ್ಪುಲೇಂದ್ ನಾನ್ ನಿಂಗಕ್ ಎಣ್ಣ್‌ನ ತಕ್ಕ್‌ನ ನಿಂಗ ಗೇನ ಮಾಡಿಯೊಳಿ. ಅಯಿಂಗ ನಾಕ್ ಹಿಂಸೆ ತಂದಕ ನಿಂಗಕು ಹಿಂಸೆ ತಪ್ಪ; ಅಯಿಂಗ ನಾಡ ತಕ್ಕ್‌ರ ಪ್ರಕಾರ ನಡ್ಂದತೇಂಗಿ, ನಿಂಗಡ ತಕ್ಕ್‌ರ ಪ್ರಕಾರ ಸಹ ನಡ್‍ಪ.

²¹ಆಚೇಂಗಿ ನನ್ನ ದಾರ್ ಅಯಿಚತೋ ಅಂವೊನ ಗೊತ್ತಿಲ್ಲತಗುಂಡ್, ನಾಡಗುಂಡ್ ನಿಂಗಕ್ ಇನ್ನನೆ ಮಾಡ್‌ವ.

²²ನಾನ್ ಬಂದಿತ್ ಅಯಿಂಗಡ ಕೂಡೆ ತಕ್ಕ್ ಪರಿಯತೆ ಪೋಯಿತ್ಂಜತೇಂಗಿ, ಅಯಿಂಗಕ್ ಪಾಪ ಇಪ್ಪಕಿಂಜಿಲೆ. ಆಚೇಂಗಿ ಇಕ್ಕ ಅಯಿಂಗಕ್ ಅಯಿಂಗಡ ಪಾಪತ್ಂಜ ತಪ್ಪಿಚಿಡ್‌ವಕ್ ಬಟ್ಟೆ ಇಲ್ಲೆ.

²³ನನ್ನ ವಿರೋದಿಚಿಡ್‌ವಯಿಂಗ ನಾಡ ಅಪ್ಪನ ಸಹ ವಿರೋದಿಚಿಡುವ.

²⁴ದಾರೂ ಮಾಡತ ಕ್ರಿಯೇನ ನಾನ್ ಅಯಿಂಗಡ ಮದ್ಯತ್‍ಲ್ ಮಾಡತೆ ಪೋಯಿತ್ಂಜತೇಂಗಿ, ಅಯಿಂಗಕ್ ಪಾಪ ಇಪ್ಪಕಿಂಜಿಲೆ; ಇಕ್ಕ ಅಯಿಂಗ ನಾಡ ಕ್ರಿಯೇನ ನೋಟಿತ್‌ಂಜತೇಂಗಿಯು ಸಹ, ನನ್ನ ಪಿಂಞ ನಾಡ ಅಪ್ಪನ ವಿರೋದಿಚಿಟ್ಟಂಡುಂಡ್.

²⁵ಅಯಿಂಗ ನನ್ನ ಒರ್ ಕಾರಣವು ಇಲ್ಲತೆ ವಿರೋದಿಚಿಡುವಾಂದ್ ಅಯಿಂಗಡ ನ್ಯಾಯಪ್ರಮಾಣತ್‍ಲ್ ಒಳ್‍ದ್‍ನ ತಕ್ಕ್ ಆಪನೆಕೆ ಆಚಿ.[27]

²⁶ನಾಡ ಅಪ್ಪಂಡ ಕಡೇಯಿಂಜ ನಾನ್ ನಿಂಗಕ್ ಅಯಿಪಂವೊನು, ಅಪ್ಪಂಡ ಕಡೇಯಿಂಜ ಪೊರಟಿತ್ ಬಪ್ಪಂವೊನು ಆಯಿತುಳ್ಳ ಸತ್ಯತ್‍ರ ಆತ್ಮವಾಯಿತುಳ್ಳ ಆಲೋಚನೆಕಾರ ಬಪ್ಪಕ, ನಾಡ ವಿಷಯತ್ ಸಾಕ್ಷಿ ತಪ್ಪ.

²⁷ನಿಂಗಳು ಸಹ ನಾಡ ಕೂಡೆ ಸುರುಯಿಂಜಲೇ ಇಂಜಯಿಂಗ. ಆನಗುಂಡ್ ನಿಂಗಳು ನಾಕ್ ಸಾಕ್ಷಿ ಆಯಿತಿಪ್ಪಿರ.