Read Kodava ಯೋಹಾನ 18 Bible Online

ಯೋಹಾನ 18 - Kodava bible

ಯೋಹಾನ 18

¹ಯೇಸು ಇದ್‍ನೆಲ್ಲಾ ಎಣ್ಣಿತಾನ ಪಿಂಞ ಅಂವೊಂಡ ಶಿಷ್ಯಂಗಳ ಕಾಕಿಯಂಡ್ ಕೆದ್ರೋನ್ ಎಣ್ಣುವ ಯಾರೇನ ದಾಟಿತ್ ಪೋಚಿ; ಅಲ್ಲಿ ಒರ್ ತೋಟ ಇಂಜತ್. ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಅದ್ಂಡ ಒಳ್‍ಕ್ ಪೋಚಿ.

²ಅಲ್ಲಿಕ್ ಯೇಸು ಅಂವೊಂಡ ಶಿಷ್ಯಂಗಡ ಕೂಡೆ ಅಕ್ಕಕ್ಕ ಪೋಪಕಿಂಜತ್. ಆನಗುಂಡ್ ಯೇಸುನ ಪುಡ್‌ಚಿತ್ ಕೊಡ್‌ಪಕಿಂಜ ಯೂದಂಗ್ ಸಹ ಆ ಜಾಗ ಗೊತ್ತ್ಂಜತ್.

³ಆ ಸಮಯತ್‍ಲ್, ಯೂದ ರೋಮ್ ರಾಜ್ಯತ್‍ರ ಸಿಪಾಯಿಯಂಗಳ, ಮುಕ್ಯ ಯಾಜಕಂಗ ಪಿಂಞ ಫರಿಸಾಯಂಗ ಅಯಿಚಿತ್ಂಜ ದೇವಾಲಯತ್‍ರ ಸಿಪಾಯಿಯಂಗಳ ಕಾಕಿಯಂಡ್ ಅಲ್ಲಿಕ್ ಬಾತ್. ಅಯಿಂಗಡ ಕೈಯಿಲ್ ಬೊಳ್‍ಚ, ತೂಡ್ ಪಿಂಞ ಆಯುದತ್‍ನ ಎಡ್‍ತಂಡ್ ಬಾತ್.

⁴ಯೇಸು ಅಂವೊಂಗ್ ಎಂತೆಲ್ಲಾ ಆಪಾಂದ್ ಗೊತ್ತಾಯಿತ್, ಅಯಿಂಗಡ ಮಿಂಞಕ್ ಪೋಯಿತ್, ನಿಂಗ ದಾರ್‌ನ ನೋಟಿಯಂಡ್ ಉಳ್ಳಿರಾಂದ್ ಕ್‍ೕಟತ್.

⁵ಅಯಿಂಗ ಅಂವೊಂಗ್: ನಂಗ ನಜರೇತ್‍ರ ಯೇಸುನ ತ್‍ೕಡಿಯಂಡುಂಡ್‍ೕಂದ್ ಎಣ್ಣ್‌ಚಿ. ಅಕ್ಕ: ನಾನೇ ಅಂವೋಂದ್ ಯೇಸು ಅಯಿಂಗಕ್ ಎಣ್ಣ್‌ಚಿ. ಯೇಸುನ ಪುಡ್‌ಚಿತ್ ಕೊಡ್‍ಪ ಯೂದ ಅಯಿಂಗಡ ಕೂಡೆ ಅಲ್ಲಿ ನಿಂದಂಡಿಂಜತ್.

⁶ನಾನೇ ಯೇಸೂಂದ್ ಎಣ್ಣುವಕಾಪಕ, ಅಯಿಂಗ ಬಯ್ಯಕ್ ಕಾಲ್ ಬೆಚ್ಚಿತ್ ನೆಲಕ್ ಬುದ್ದ್ ಪೋಚಿ.

⁷ಯೇಸು ಇಂಞ್ಞೊರ್ ಕುರಿ ಅಯಿಂಗಳ ನೋಟಿತ್: ನಿಂಗ ದಾರ್‌ನ ನೋಟಿಯಂಡ್ ಉಳ್ಳಿರಾಂದ್ ಕ್‍ೕಟತ್. ಅಯಿಂಗ: ನಜರೇತ್‍ರ ಯೇಸುನ ತ್‍ೕಡಿಯಂಡುಂಡ್‍ೕಂದ್ ಎಣ್ಣ್‌ಚಿ.

⁸ಯೇಸು ಅಯಿಂಗಕ್: ನಾನ್ ನಿಂಗಕ್ ಮಿಂಞಲೇ ಎಣ್ಣಿಯೆ, ನಾನೇ ಅಂವೋಂದ್; ನಿಂಗ ನನ್ನ ತ್‍ೕಡಿಯಂಡ್ ಉಂಡೇಂಗಿ, ಈಂಗೆಲ್ಲಾ ಇಲ್ಲಿಂಜ ಪೋಪಕ್ ಬುಡೀಂದ್ ಎಣ್ಣ್‌ಚಿ.

⁹ನೀನ್ ನಾಕ್ ಕೊಡ್‍ತಯಿಂಗಡ ಕೂಟ್‌ಲ್ ನಾನ್ ಒಬ್ಬನ ಸಹ ಕಳೆಂದ್ ಪೋಪುಲೇಂದ್ ದೇವ ಎಣ್ಣಿತ್ಂಜ ವಾಕ್ಯ ನೆರೆವೇರ್‌ವಕಾಯಿತ್ ಇನ್ನನೆ ಆಚಿ.

¹⁰ಅಕ್ಕ, ಸೀಮೋನ ಪೇತ್ರಂಡ ಪಕ್ಕ ಒರ್ ಬಾಳ್ ಇಂಜತ್. ಅದ್‍ನ ಎಡ್‌ಪಂಜಿ ಮಹಾ ಯಜಕಂಡ ಆಳ್‍ರ ಕೆಮಿನ ಕೆತ್ತಿರ್‌ತ್; ಆ ಆಳ್‍ರ ಪೆದ ಮಲ್ಕ.

¹¹ಅಕ್ಕ, ಯೇಸು ಪೇತ್ರಂಗ್: ನೀಡ ಬಾಳ್‍ನ ಅದ್ಂಡ ಕೊತ್ತೆಲ್ ಇಡ್; ನಾಡ ಅಪ್ಪ ನಾಕ್ ತಂದ ಕಷ್ಟತ್‍ರ ಪಾತ್ರತ್‍ಲ್ ನಾನ್ ಕುಡಿಪಕ್ ಆಪುಲೆಯಾಂದ್ ಎಣ್ಣ್‌ಚಿ.

¹²ಅಕ್ಕ, ಪಟಾಲಕಾರಳೂ, ಆಯಿರ ಸಿಪಾಯಿಯಂಗಡ ಅದಿಕಾರಿಯು, ಯೆಹೂದ್ಯ ಸಿಪಾಯಿಯಳು ಯೇಸುನ ಪುಡ್‌ಚಿತ್, ಕೇರ್‌ಲ್ ಅಂವೊಂಡ ಕೈಯಿನ ಕೆಟ್ಟ್‌ಚಿ.

¹³ಅಲ್ಲಿಯಿಂಜ ಅಂವೊನ, ಅನ್ನಾ ಎಣ್ಣ್‌ವಂವೊಂಡ ಪಕ್ಕ ಕಾಕಿಯಂಡ್ ಪೋಚಿ. ಇಂವೊ ಆ ಕಾಲತ್‍ರ ಮಹಾ ಯಾಜಕನಾಯಿತ್ಂಜ ಕಾಯಫನಂಡ ಮಾಂವನಾಯಿತ್ಂಜತ್.

¹⁴ಈ ಕಾಯಫನೇ ಮಿಂಞ ಯೆಹೂದ್ಯ ಅದಿಕಾರಿಯಂಗಳ ನೋಟಿತ್: ಎಲ್ಲಾ ಜನಕಾಯಿತ್ ಒರೇ ಮನುಷ್ಯ ಚಾವದ್ ನಲ್ಲದ್‍ೕಂದ್ ಆಲೋಚನೆ ಕೊಡ್‍ತಂವೊ.

¹⁵ಸೀಮೋನ ಪೇತ್ರ ಪಿಂಞ ಬೋರೆ ಒರ್ ಶಿಷ್ಯ, ಯೇಸುರ ಬಯ್ಯಕ್ ಪೋಚಿ. ಆ ಶಿಷ್ಯ ಮಹಾ ಯಾಜಕಂಗ್ ಗೊತ್ತುಳ್ಳಾಂಗ್, ಯೇಸುರ ಕೂಡೆ ಅರಮನೆರ ಒಳ್‍ಕ್ ಪೋಚಿ.

¹⁶ಪೇತ್ರ ಪಡಿರ ಪೊರಮೆ ನಿಂದಂಡಿಂಜತ್. ಅಕ್ಕ ಮಹಾ ಯಾಜಕಂಗ್ ಗೊತ್ತಾಯಿತ್ಂಜ ಬೋರೆ ಶಿಷ್ಯ, ಬಯ್ಯಕ್ ಪೋಯಿತ್ ಪಡಿನ ಕಾತಂಡ್ ಇಂಜ ಮೂಡಿರ ಕೂಡೆ ತಕ್ಕ್ ಪರ್ಂದತ್. ಪಿಂಞ ಅಂವೊ ಪೇತ್ರನ ಒಳ್‍ಕ್ ಕಾಕಿಯಂಡ್ ಪೋಚಿ.

¹⁷ಅಕ್ಕ, ಪಡಿನ ಕಾತಂಡ್ ಇಂಜ ಮೂಡಿ: ನೀನ್ ಸಹ ಆ ಮನುಷ್ಯಂಡ ಶಿಷ್ಯಂಗಡಲ್ಲಿ ಒಬ್ಬನಲ್ಲಾಂದ್ ಪೇತ್ರನ ಕ್‍ೕಟತ್. ಅದ್ಂಗ್: ನಾನ್ ಅಲ್ಲಾಂದ್ ಪೇತ್ರ ಎಣ್ಣ್‌ಚಿ.

¹⁸ಅಕ್ಕ ಕುಳ್‌ರ್ ಕಾಲವಾಯಿತ್ಂಜತ್. ಮಸಿಕಂಡೆಲ್ ತಿತ್ತ್‌ರ ಗುಡ್ಡೆ ಮಾಡಿತ್ ಅದಿಕಾರಿಯಂಗಡ ಆಳ್‍ವ ತಿತ್ತ್ ಗುಡ್ಡೆರ ಸುತ್ತ್‌ಲ್ ನಿಂದಂಡ್ ಕುಳ್‌ರ್ ಕಾಂಜಂಡ್ ಇಂಜತ್. ಪೇತ್ರನು ಅಲ್ಲಿ ಪೋಯಿತ್ ನಿಂದಂಡ್ ಕುಳ್‌ರ್ ಕಾಂಜಂಡ್ ಇಂಜತ್.

¹⁹ಈ ಸಮಯತ್‍ಲ್, ಮಹಾ ಯಾಜಕ ಯೇಸುನ ಅಂವೊಂಡ ಶಿಷ್ಯಂಗಡ ವಿಷಯತ್ ಪಿಂಞ ಯೇಸುರ ಬೋದನೆರ ವಿಷಯತ್ ಪ್ರಶ್ನೆ ಕ್‍ೕಟಂಡಿಂಜತ್.

²⁰ಯೇಸು ಅಂವೊಂಗ್: ನಾನ್ ಎಲ್ಲಾಡ ಕೂಡೆ ಒಂದು ಒಳ್‌ಪ್‌ಚಿಡತೆ ಲೋಕತ್‍ರ ಎದ್‍ಕೆ ತಕ್ಕ್ ಪರ್ಂದಿಯೆ. ಸಬಾಮಂದಿರತ್‍ಲ್ ಪಿಂಞ ಯೆಹೂದ್ಯಂಗ ಕೂಡುವ ದೇವಾಲಯತ್‍ಲ್ ಎಕ್ಕಾಲು ಬೋದನೆ ಮಾಡಿಯಂಡ್ ಇಂಜ್; ಗುಟ್ಟಾಯಿತ್ ಒಂದು ತಕ್ಕ್ ಪರ್‍ಂದ್‍ತ್‌ಲ್ಲೆ.

²¹ನನ್ನ ಎನ್ನಂಗ್ ನಿಂಗ ಪ್ರಶ್ನೆ ಕ್‍ೕಟಂಡ್ ಉಳ್ಳಿರಾ? ಜನಳ ಕ್‍ೕಳಿ ನಾನ್ ಎಂತ ಅಯಿಂಗಕ್ ಬೋದನೆ ಮಾಡಿಯೇಂದು, ನಾನ್ ಎಂತ ಎಣ್ಣಿಯೇಂದು ಅಯಿಂಗಕ್ ಗೊತ್ತುಂಡ್‍ೕಂದ್ ಯೇಸು ಅಂವೊಂಗ್ ಎಣ್ಣ್‌ಚಿ.

²²ಇನ್ನನೆ ಯೇಸು ಎಣ್ಣುವಕ, ಅಂವೊಂಡ ಪಕ್ಕ ನಿಂದಂಡಿಂಜ ಸಿಪಾಯಿ ಒಬ್ಬ: ಮಹಾ ಯಾಜಕಂಡ ಪಕ್ಕ ಇನ್ನನೆ ಉತ್ತರ ಕೊಡ್‍ಪಿಯಾಂದ್ ಎಣ್ಣಿತ್, ಯೇಸುರ ದವಡೆಕ್ ಪೊಜ್ಜತ್.

²³ಅಕ್ಕ ಯೇಸು ಅಂವೊನ ನೋಟಿತ್: ನಾನ್ ಎಂತೇಂಗಿ ತಪ್ಪ್ ಪರ್ಂದಿತ್ ಉಂಡೇಂಗಿ ಅದ್ ಎಂತದ್‍ೕಂದ್ ಎಲ್ಲಾರ್‌ಕು ಎಣ್ಣ್; ನಾನ್ ಸರಿಯಾಯಿತ್ ತಕ್ಕ್ ಪರ್ಂದಿತುಂಡೇಂಗಿ ಎನ್ನಂಗ್ ನನ್ನ ಪೊಯ್ಯುವಿಯಾಂದ್ ಯೇಸು ಕ್‍ೕಟತ್.

²⁴ಪಿಂಞ ಅನ್ನಾ ಯೇಸುರ ಕೈಯಿರ ಕೆಟ್ಟ್‌ನ ಎಡ್‍ಕತೆ ಅನ್ನನೆ ಮಾಹಾ ಯಾಜಕನಾನ ಕಾಯಫಂಡ ಪಕ್ಕ ಅಯಿಚತ್.

²⁵ಸೀಮೋನ ಪೇತ್ರ ತಿತ್ತ್‌ರ ಪಕ್ಕ ನಿಂದಂಡ್ ಕುಳ್‌ರ್ ಕಾಂಜಂಡಿಂಜತ್. ಅಕ್ಕ, ನೀನ್ ಸಹ ಅಂವೊಂಡ ಶಿಷ್ಯಂಗಡ ಕೂಟ್‌ಲ್ ಒಬ್ಬನಲ್ಲಾಂದ್ ಅಲ್ಲಿಯಿಂಜ ಚೆನ್ನ ಜನ ಕ್‍ೕಟತ್. ಪೇತ್ರ: ಅಯಿಂಗಕ್ ಒತ್ತತೆ, ನಾನ್ ಅಲ್ಲಾಂದ್ ಎಣ್ಣ್‌ಚಿ.

²⁶ಪಿಂಞ ಅಲ್ಲಿ ಒರ್ ಆಳ್ ಇಂಜತ್. ಅಂವೊ ದಾರ್ ಎಣ್ಣ್‌ಚೇಂಗಿ, ಮಹಾ ಯಾಜಕಂಡ ಆಳ್‍ರ ಕೂಟ್‌ಲ್ ಇಂಜಂವೊ. ಇಂವೊಂಡ ಬೆಂದ್‌ಕಡ ಕೆಮಿನ ಪೇತ್ರ ತೋಟತ್‍ಲ್ ಕೆತ್ತಿತ್ಂಜತ್. ಅಂವೊ ಪೇತ್ರನ ನೋಟಿತ್: ನಾನ್ ನಿನ್ನ ತೋಟತ್‍ಲ್ ಯೇಸುರ ಕೂಡೆ ಕಂಡಿತುಳ್ಳಲ್ಲಾಂದ್ ಕ್‍ೕಟತ್.

²⁷ಪೇತ್ರ ಅಯಿಂಗಕ್ ಒತ್ತತೆ, ಇಲ್ಲೇಂದ್ ಪುನಃ ಎಣ್ಣ್‌ಚಿ. ಅಕ್ಕಲೆ ಮಲ್ಲಂಗೋಳಿ ಕೂಂದತ್.

²⁸ಪಿಂಞ ಅಯಿಂಗ, ಕಾಯಫಂಡಿಂಜ ದೇಶಾದಿಪತಿರ ಅರಮನೆಕ್ ಕಾಕಿಯಂಡ್ ಪೋಚಿ. ಅಕ್ಕ ಪೊಲಾಕ ನೇರತೆ ಆಯಿತ್ಂಜತ್. ಯೆಹೂದ್ಯ ಜನ ಅಯಿಂಗಡ ಪದ್ದತಿರ ಪ್ರಕಾರ ಅಶುದ್ದ ಆಕತೆ, ಪಸ್ಕ ನಮ್ಮೆರ ಪುಳಿಯಿಲ್ಲತ ಒಟ್ಟಿನ ತಿಂಬನೆಕೆ, ಅಯಿಂಗ ಅರಮನೆರ ಒಳ್‍ಕ್ ಪೋಕತೆ ಪಾರಕಾತಂಡಿಂಜತ್.

²⁹ಆನಗುಂಡ್ ದೇಶಾತಿಪತಿಯಾಯಿತ್ಂಜ ಪಿಲಾತ, ಪೊರಮೆ ಬಪ್ಪಂಜಿ, ಈ ಮನುಷ್ಯಂಡ ಮೇಲೆ ಎಂತ ಕುತ್ತತ್‍ನ ನಿಂಗ ಎಡ್‌ತ ಬಂದಿತುಳ್ಳಿರಾಂದ್ ಕ್‍ೕಟತ್.

³⁰ಅಕ್ಕ ಅಯಿಂಗ: ಇಂವೊ ಒರ್ ತಪ್ಪು ಮಾಡತೆ ಇಂಜತೇಂಗಿ ಎನ್ನಂಗ್ ನೀಡ ಪಕ್ಕ ಒಪ್ಪ್‌ಚಿಡುವಕ್ ಕೊಂಡ್ ಬರಂಡೂಂದ್ ಎಣ್ಣ್‌ಚಿ.

³¹ಅಕ್ಕ ಪಿಲಾತ ಅಯಿಂಗಕ್: ನಿಂಗಳೇ ಇಂವೊನ ಕಾಕಿಯಂಡ್ ಪೋಯಿರಿ. ನಿಂಗಡ ನ್ಯಾಪ್ರಮಾಣತ್‍ರನೆಕೆ ತೀರ್ಪ್ ಮಾಡೀಂದ್ ಎಣ್ಣ್‌ಚಿ. ಅದ್ಂಗ್ ಯೆಹೂದ್ಯ ಅದಿಕಾರಿಯಂಗ ಪಿಲಾತನ ನೋಟಿತ್: ದಾರ್‌ಕು ಮರಣ ತಂಡನೆ ಕೊಡ್‍ಪಕ್ ನಂಗಕ್ ಅದಿಕಾರ ಇಲ್ಲೇಂದ್ ಎಣ್ಣ್‌ಚಿ.

³²ನಾಕ್ ಏದ್ ತರತ್‍ರ ಚಾವ್ ಕ್‍ಟ್ಟ್‌ವಾಂದ್ ಯೇಸು ಮಿಂಞಲೇ ಎಣ್ಣಿತ್ಂಜ ತಕ್ಕ್ ನೆರವೇರುವನೆಕೆ, ಅಯಿಂಗ ಇನ್ನನೆ ಎಣ್ಣ್‌ಚಿ.

³³ಅಕ್ಕ ಪಿಲಾತ ಪುನಃ ಅರಮನೆರ ಒಳ್‍ಕ್ ಪೋಪಂಜಿ, ಯೇಸುನ ಕಾಕಿತ್: ನೀನ್ ಯೆಹೂದ್ಯಂಗಡ ರಾಜನಾಂದ್ ಕ್‍ೕಟತ್.

³⁴ಯೇಸು ಪಿಲಾತಂಗ್: ನೀನಾಯಿತೇ ಈ ತಕ್ಕ್‌ನ ಎಣ್ಣಿಯಂಡ್ ಉಳ್ಳಿಯಾ? ಅಥವ, ನಾಡ ವಿಷಯತ್‍ನ ಬೋರೆ ಜನ ನೀಕ್ ಇನ್ನನೆ ಎಣ್ಣ್‌ಚಾಂದ್ ಕ್‍ೕಟತ್.

³⁵ಪಿಲಾತ ಯೇಸುಕ್: ನಾನ್ ದಾರ್‍ೕಂದ್ ಗೇನ ಮಾಡ್‌ವಿಯಾ? ನಾನ್ ಯೆಹೂದ್ಯನಾ? ನೀಡ ಸ್ವಂತ ಜನ, ಮುಕ್ಯ ಯಾಜಕಂಗ ನ್ಯಾಯ ಕ್‍ಟ್ಟುವಕಾಯಿತ್ ನಿನ್ನ ನಾಡ ಪಕ್ಕ ಒಪ್ಪ್‌ಚಿಟ್ಟತ್. ನೀನ್ ಎಂತ ಮಾಡಿತುಳ್ಳಿಯಾಂದ್ ಕ್‍ೕಟತ್.

³⁶ಯೇಸು ಅಂವೊಂಗ್: ನಾಡ ರಾಜ್ಯ ಈ ಲೋಕತ್‍ರದಲ್ಲ, ನಾಡ ರಾಜ್ಯ ಈ ಲೋಕತ್‍ರದಾಯಿತ್ ಇಂಜತೇಂಗಿ, ನಾಡ ಶಿಷ್ಯಂಗ ನನ್ನ ಯೆಹೂದ್ಯ ಅದಿಕಾರಿಯಂಗಕ್ ಪುಡ್‍ಚಿ ಕೊಡ್‍ಕತನೆಕೆ ತಡ್‍ಪಕ್ ಇಂಜತ್; ಆನಗುಂಡ್ ನಾಡ ರಾಜ್ಯ ಈ ಲೋಕತ್‍ರದಲ್ಲಾಂದ್ ಎಣ್ಣ್‌ಚಿ.

³⁷ಅಕ್ಕ ಪಿಲಾತ: ಅಕ್ಕ ನೀನ್ ರಾಜನಾಂದ್ ಕ್‍ೕಟತ್. ನಾನ್ ರಾಜನೇಂದ್ ನೀನ್ ಸರಿಯಾಯಿತ್ ಎಣ್ಣಿಯ. ಸತ್ಯತ್‍ರ ವಿಷಯತ್‍ನ ಜನಕ್ ಸಾಕ್ಷಿ ಕೊಡ್‍ಪಕಾಯಿತ್ ನಾನ್ ಈ ಲೋಕತ್‍ಲ್ ಪುಟ್ಟಿಯೆ, ಅದ್ಂಗಾಯಿತೇ ಈ ಬೂಲೋಕಕ್ ಬಂದಿಯೆ, ಸತ್ಯತ್‍ನ ಕ್‍ೕಪಕ್ ಕುಶಿ ಉಳ್ಳಯಿಂಗ ನಾಡ ಬೋದನೆನ ಕ್‍ೕಪಾಂದ್ ಯೇಸು ಅಂವೊಂಗ್ ಎಣ್ಣ್‌ಚಿ.

³⁸ಅಕ್ಕ ಪಿಲಾತ ಯೇಸುನ ನೋಟಿತ್: ಅನ್ನನಾಚೇಂಗಿ ಸತ್ಯ ಎಣ್ಣುವದ್ ಎಂತ್‍ೕಂದ್ ಕ್‍ೕಟತ್. ಇನ್ನನೆ ಎಣ್ಣಿತಾನ ಪಿಂಞ ಪಿಲಾತ, ಪೊರಮೆ ನಿಂದಂಡಿಂಜ ಯೆಹೂದ್ಯ ಅದಿಕಾರಿಯಂಗಡ ಪಕ್ಕ ಬಂದಿತ್: ನಾನ್ ಅಂವೊಂಡ ಪಕ್ಕ ಒರ್ ತಪ್ಪು ಕಾಂಬ್‌ಲೇಂದ್‌ ಎಣ್ಣ್‌ಚಿ.

³⁹ಪಿಲಾತ ಪುನಃ ಅಯಿಂಗಳ ನೋಟಿತ್: ಆಚೇಂಗಿ, ಪಸ್ಕ ನಮ್ಮೆರ ಸಮಯತ್‍ಲ್, ನಾನ್ ಒರ್ ಕೈದಿನ ನಿಂಗಕಾಯಿತ್ ಬುಡುಗಡೆ ಮಾಡ್‌ವ ಪದ್ದತಿ ಉಂಡಲ್ಲಾ? ಆನಗುಂಡ್ ಯೆಹೂದ್ಯಂಗಡ ರಾಜನ ನಾನ್ ನಿಂಗಕಾಯಿತ್ ಬುಡುಗಡೆ ಮಾಡ್‌ವಕ್ ನಿಂಗಕ್ ಕುಶಿಯುಂಡಾಂದ್ ಕ್‍ೕಟತ್.

⁴⁰ಅದ್ಂಗ್ ಅಯಿಂಗೆಲ್ಲಾ: ಪುನಃ ಕೂತ್ ಕೊಡ್‌ತಂಡ್ ಇಂವೊನ ಅಲ್ಲ, ಬರಬ್ಬನ ಬುಡ್‍ೕಂದ್ ಎಣ್ಣ್‌ಚಿ. ಈ ಬರಬ್ಬ ಎಣ್ಣ್‌ವಂವೊ ಒರ್ ಬಲ್ಯ ಕಳ್ಳನಾಯಿತ್ಂಜತ್.