Read Kodava ಯೋಹಾನ 2 Bible Online

ಯೋಹಾನ 2 - Kodava bible

ಯೋಹಾನ 2

¹ಮೂಂದನೆ ದಿವಸತ್‍ಲ್, ಗಲಿಲಾಯ ಪ್ರಾಂತ್ಯತ್‍ರ ಕಾನಾ ಎಣ್ಣುವ ಊರ್‌ಲ್ ಒರ್ ಮಂಗಲ ಇಂಜತ್. ಯೇಸುರ ಅವ್ವಳು ಅಲ್ಲಿ ಬಂದಿತ್ಂಜತ್.

²ಯೇಸು ಪಿಂಞ ಅಂವೊಂಡ ಶಿಷ್ಯಂಗಳ ಸಹ ಆ ಮಂಗಲಕ್ ಕಾ‌ಕಿತ್ಂಜತ್.

³ಮಂಗಲತ್‍ಲ್ ದ್ರಾಕ್ಷಿರಸ ತ್‍ೕಂದ್ ಪೋಯಿತಿಪ್ಪಕ, ದ್ರಾಕ್ಷಿರಸ ತ್‍ೕಂದ್ ಪೋಚೀಂದ್ ಯೇಸುರ ಅವ್ವ ಅಂವೊಂಗ್ ಎಣ್ಣ್‌ಚಿ.

⁴ಯೇಸು ಅವಕ್: ಅವ್ವ, ನಾನ್ ಎಂತ ಮಾಡಂಡೂಂದ್ ನೀನ್ ಎನ್ನಂಗ್ ನಾಕ್ ಎಣ್ಣ್‌ವಿಯಾ? ನಾಡ ಸಮಯ ಇಂಞು ಬಂದಿತ್‌ಲ್ಲೇಂದ್ ಎಣ್ಣ್‌ಚಿ.

⁵ಅಕ್ಕ ಯೇಸುರ ಅವ್ವ ಆಳ್‍ವಕ್: ಅಂವೊ ಎಂತ ಎಣ್ಣುವ, ಅದ್‍ನ ಮಾಡೀಂದ್ ಎಣ್ಣ್‌ಚಿ.

⁶ಆ ಜಾಗತ್‍ಲ್, ಯೆಹೂದ್ಯಂಗ ತಂಗಡ ಪದ್ದತಿರ ಪ್ರಕಾರ ಅಯಿಂಗಳ ಶುದ್ದ ಮಾಡ್‌ವಕಾಯಿತ್ ನೀರ್ ಬೆಪ್ಪಕುಳ್ಳ ಆರ್ ಕಲ್ಲ್‌ರ ಬರಣಿ ಇಂಜತ್. ಓರೋರ್ ಬರಣಿಯು ದಂಡ್ ಅಲ್ಲ ಮೂಂದ್ ಬಿಂದಿಗೆ ನೀರ್ ದುಂಬ್‌ವಚ್ಚಕ್ ಬಲ್ಯದಾಯಿತ್ಂಜತ್.

⁷ಯೇಸು ಆಳ್‍ವಳ ನೋಟಿತ್: ಆ ಬರಣಿಲೆಲ್ಲ ನೀರ್ ದುಂಬ್‌ಚಿಡೀಂದ್ ಎಣ್ಣ್‌ಚಿ. ಅಯಿಂಗ ಬರಣಿರ ಬಾಯಿಕತ್ತನೆ ದುಂಬ್‍ಚಿಟ್ಟತ್.

⁸ಪಿಂಞ ಯೇಸು ಅಯಿಂಗಳ ನೋಟಿತ್: ಇಕ್ಕ ನಿಂಗ, ಈ ನೀರ್‌ನ ಎಡ್‌ಪಂಜಿ ಗದ್ದಾಳತ್‍ರ ಕಾರ್ಯಕಾರಂಡ ಪಕ್ಕ ಕೊಡೀಂದ್ ಎಣ್ಣ್‌ಚಿ. ಅಯಿಂಗ ಅಂವೊ ಎಣ್ಣ್‌ನನೆಕೆ ಮಾಡ್‍ಚಿ.

⁹ಗದ್ದಾಳತ್‍ರ ಕಾರ್ಯಕಾರ, ದ್ರಾಕ್ಷಿರಸವಾಯಿತ್ ಬದ್‍ಲಾನ ನೀರ್‌ರ ರಸ ನೋಟ್‌ಚಿ. ಇದ್ ಎಲ್ಲಿಂಜ ಬಾತ್‍ೕಂದ್ ಅಂವೊಂಗ್ ಗೊತ್ತ್‌ಂಜತ್‌ಲ್ಲೆ. ಆಚೇಂಗಿ ಆಳ್‍ವಕ್ ಆ ದ್ರಾಕ್ಷಿರಸ ಎಲ್ಲೀಂದ್ ಬಾತ್‍ೕಂದ್ ಗೊತ್ತ್ಂಜತ್. ಅಕ್ಕ ಅಂವೊ ಮಂಗಲಕಾರನ ಕಾಕುವಂಜಿ:

¹⁰ಏದ್ ಒಬ್ಬನು, ಚಾಯಿ ದ್ರಾಕ್ಷಿರಸತ್‍ನ ಆದ್ಯ ಕೊಡ್‌ತಿತ್, ಎಲ್ಲಾರು ಕುಡಿಚಿತ್ತಾನ ಪಿಂಞ, ರುಚಿ ಕಮ್ಮಿ ಉಳ್ಳದ್‍ನ ಬಯ್ಯ ಕೊಡ್‍ಪ. ಆಚೇಂಗಿ, ನೀನ್ ಚಾಯಿ ದ್ರಾಕ್ಷಿರಸತ್‍ನ ಇಲ್ಲಿಕತ್ತನೆ ಬೆಚ್ಚಿತುಳ್ಳಿಯಲ್ಲಾಂದ್ ಎಣ್ಣ್‌ಚಿ.

¹¹ಇನ್ನನೆ, ಯೇಸು ತಾಂಡ ಆದ್ಯ ಅದ್ಬುತ ಕಾರ್ಯತ್‍ನ ಗಲಿಲಾಯ ಪ್ರಾಂತ್ಯತ್‍ರ ಕಾನಾ ಎಣ್ಣುವ ಊರ್‌ಲ್ ಮಾಡಿತ್, ತಾಂಡ ಮಹಿಮೆನ ಕಾಂಬ್‍ಚಿಟ್ಟತ್. ಅಂವೊಂಡ ಶಿಷ್ಯಂಗ ಯೇಸುನ ನಂಬ್‍ಚಿ.

¹²ಇದಾನ ಪಿಂಞ ಯೇಸು, ಅಂವೊಂಡ ಅವ್ವ, ಅಂವೊಂಡ ತಮ್ಮಣಂಗ ಪಿಂಞ ಅಂವೊಂಡ ಶಿಷ್ಯಂಗ ಎಲ್ಲಾರು ಕಪೆರ್ನೌಮ್ ಪಟ್ಟಣಕ್ ಪೋಯಿತ್, ಅಲ್ಲಿ ಚೆನ್ನ ದಿವಸ ಒಳಿಂಜತ್.

¹³ಪಿಂಞ ಯೆಹೂದ್ಯಂಗಡ ಪಸ್ಕ[6] ನಮ್ಮೆಕ್ ಇಂಞು ಚೆನ್ನ ದಿವಸ ಮಾತ್ರ ಇಂಜಗುಂಡ್, ಯೇಸು ಯೆರೂಸಲೇಮ್‌ಕ್ ಪೋಚಿ.

¹⁴ಅಲ್ಲಿ ದೇವಾಲಯತ್‍ಲ್, ಆಡ್, ಎತ್ತ್, ಪಾರಿವಾಳ ಇನ್ನತಾನದೆಲ್ಲಾ ಮಾರ್‌ವಯಿಂಗಳ ಪಿಂಞ ದುಡ್ಡ್‌ಕ್ ಚಿಲ್ಲರೆ ಬದ್‍ಲ್ ಮಾಡ್‌ವಯಿಂಗಳ ಕಂಡತ್.

¹⁵ಅಕ್ಕ ಯೇಸು ಕೇರ್‌ಲ್ ಒರ್ ಕೊರಡ್ ಮಾಡ್‌ವಂಜಿ ಅಲ್ಲಿ ಇಂಜಯಿಂಗಳ ಪಿಂಞ ಆಡ್, ಎತ್ತ್‌ನೆಲ್ಲಾ ದೇವಾಲಯತ್ಂಜ ದೌತ್‌ಚಿ. ದುಡ್ಡ್‌ನ ಬದ್‍ಲ್ ಮಾಡಿಯಂಡಿಂಜಯಿಂಗಡ ದುಡ್ಡ್‌ನ ಚಿಲ್ಲಾಪಿಲ್ಲಿ ಮಾಡಿತ್, ಅಯಿಂಗಡ ಮೇಜಿನ ತಿರ್‍ಕ್‍ಚಿ.

¹⁶ಪಾರಿವಾಳ ಮಾರ್‌ವಯಿಂಗಳ ನೋಟಿತ್: ಇದ್‍ನೆಲ್ಲ ಇಲ್ಲಿಂಜ ಎಡ್‍ತಂಡ್ ಪೋಯಿರಿ, ನಾಡ ಅಪ್ಪಂಡ ಮನೆನ ಚತ್ತೆರನೆಕೆ ಮಾಡಂಡಾಂದ್ ಎಣ್ಣ್‌ಚಿ.

¹⁷ಯೇಸು ಇನ್ನನೆ ಮಾಡ್‍ನದ್‍ನ ನೋಟಿತ್: ನೀಡ ಮನೆರ ಮೇಲೆ ಉಳ್ಳ ನಾಡ ವೈರಾಗ್ಯ, ನನ್ನ ಕತ್ತಿಚಿಡುವಾಂದ್[7] ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳದ್‍ನ ಅಂವೊಂಡ ಶಿಷ್ಯಂಗ ಗೇನ ಮಾಡ್‍ಚಿ.

¹⁸ಅಕ್ಕ ಯೆಹೂದ್ಯ ಅದಿಕಾರಿಯಂಗ ಯೇಸುಕ್: ನೀನ್ ಏದ್ ಗುರ್‍ತ್‍ನ ಕಾಟಿತ್, ಇನ್ನನೆ ಮಾಡ್‌ವಕುಳ್ಳ ಅದಿಕಾರ ನೀಕ್ ಉಂಡ್‍ೕಂದ್ ನಂಗಕ್ ಕಾಟ್‌ವಿಯಾಂದ್ ಕ್‍ೕಟತ್.

¹⁹ಅದ್ಂಗ್ ಯೇಸು: ಈ ದೇವಾಲಯತ್‍ನ ನಿಂಗ ಪೊಳಿರಿ, ನಾನ್ ಇದ್‍ನ ಮೂಂದ್ ದಿವಸತ್‍ಲ್ ಎಪ್ಪ್‌ಚಿಡ್‌ವೀಂದ್ ಎಣ್ಣ್‌ಚಿ.

²⁰ಅಕ್ಕ ಯೆಹೂದ್ಯಂಗ: ಈ ದೇವಾಲಯತ್‍ನ ಕೆಟ್ಟ್‌ವಕ್ ನಾಪತಾರ್ ಕಾಲ ಆಚಿ, ನೀನ್ ಇದ್‍ನ ಮೂಂದ್ ದಿವಸತ್‍ಲ್ ಎಪ್ಪ್‌ಚಿಡುವಿಯಾಂದ್ ಕ್‍ೕಟತ್.

²¹ಆಚೇಂಗಿ, ಯೇಸು ಈ ದೇವಾಲಯಾಂದ್ ಎಣ್ಣುವಕ ತಾಂಡ ತಡಿಯಾನ ದೇವಾಲಯತ್‍ರ ವಿಷಯತ್‍ನ ಎಣ್ಣ್‌ಚಿ.

²²ಯೇಸು ಚತ್ತಿತ್ ಜೀವವಾಯಿತ್ ಎದ್ದಿತ್ ಬಂದ ಪಿಂಞ, ಅಂವೊಂಡ ಶಿಷ್ಯಂಗ ಅಂವೊ ಎಣ್ಣ್‌ನದ್‍ನ ಗೇನ ಮಾಡ್‍ಚಿ. ಅಕ್ಕ ಅಯಿಂಗ ದೇವಡ ವಾಕ್ಯತ್‍ನ ಪಿಂಞ ಯೇಸು ಪರ್ಂದ ತಕ್ಕ್‌ನ ನಂಬ್‍ಚಿ.

²³ಪಸ್ಕ ನಮ್ಮೆರ ಸಮಯತ್‍ಲ್ ಯೇಸು ಯೆರೂಸಲೇಮ್‍ಲ್ ಇಪ್ಪಕಾಪಕ, ಅಂವೊ ಮಾಡ್‍ನ ಅದ್ಬುತ ಕಾರ್ಯತ್‍ನೆಲ್ಲ ನೋಟಿತ್, ದುಂಬ ಜನ ಅಂವೊಂಡ ಪೆದತ್‍ರ ಮೇಲೆ ನಂಬಿಕೆ ಬೆಚ್ಚತ್.

²⁴ಆಚೇಂಗಿಯು, ಯೇಸು ಎಲ್ಲಾಡ ಹೃದಯತ್‍ನ ಅರಿಂಜಗುಂಡ್, ಅಂವೊಂಡ ಮೇಲೆ ಅಯಿಂಗಕ್ ಇಂಜ ನಂಬಿಕೇಕ್ ಅಂವೊ ಕೆಮಿ ಕೊಡ್‍ತಿತ್‌ಲ್ಲೆ.

²⁵ಮನುಷ್ಯಂಗಡ ಹೃದಯತ್‍ಲ್ ಉಳ್ಳದ್ ಅಂವೊಂಗ್ ಗೊತ್ತುಳ್ಳಗುಂಡ್, ಮನುಷ್ಯಂಗಡ ವಿಷಯತ್ ದಾರೂ ಅಂವೊಂಗ್ ಸಾಕ್ಷಿ ಕೊಡ್‍ಪಕ್ ಅವಸ್ಯ ಇಂಜಿತ್‌ಲ್ಲೆ.