Read Kodava ಯೋಹಾನ 20 Bible Online

ಯೋಹಾನ 20 - Kodava bible

ಯೋಹಾನ 20

¹ವಾರತ್‍ರ ಆದ್ಯ ನಾಳಾನ ನಾರಾಚೆ ಪೊಲಾಕ ನೇರತೆ, ಸೂರ್ಯ ಉದಿಪಕ್ ಮಿಂಞಲೇ, ಮಗ್ದಲ ಮರಿಯ ಗೋರಿರ ಪಕ್ಕ ಬಪ್ಪಂಜಿ, ಗೋರಿನ ಮುಚ್ಚಿತ್‌ಂಜ ಕಲ್ಲ್, ಗೋರಿರ ಪಡಿಯಿಂಜ ಎಡ್‌ತಿತಿಪ್ಪಾನ ಕಂಡತ್.

²ಅಕ್ಕ ಅವ ಸೀಮೋನ ಪೇತ್ರ ಪಿಂಞ ಯೇಸು ದುಂಬ ಪ್ರೀತಿ ಬೆಚ್ಚಿತ್ಂಜ ಶಿಷ್ಯಂಗಡ ಪಕ್ಕ ಓಡಿ ಪೋಯಿತ್ ನಂಗಡ ಒಡೆಯನ ಗೋರಿಯಿಂಜ ದಾರೋ ಎಡ್‍ತಂಡ್ ಪೋಯಿರ್‌ತ್. ಅಂವೊನ ಎಲ್ಲಿ ಬೆಚ್ಚತ್‍ೕಂದ್ ನಂಗಕ್ ಗೊತ್ತ್‌ಲ್ಲೇಂದ್ ಎಣ್ಣ್‌ಚಿ.

³ಅಕ್ಕ, ಪೇತ್ರ ಪಿಂಞ ಆ ಬೋರೆ ಶಿಷ್ಯ ಗೋರಿಕ್ ಪೋಪಕ್ ಪೊರಟತ್. ದಂಡಾಳು ಒಕ್ಕಚೆ ಓಡ್‍ಚಿ.

⁴ಪೇತ್ರಕಿಂಜ ಆ ಬೋರೆ ಶಿಷ್ಯ ಜೋರಾಯಿತ್ ಓಡಿತ್, ಅಂವೊಂಗ್ ಮಿಂಞಲೇ ಗೋರಿಕ್ ಎತ್ತ್‌ಚಿ.

⁵ಆ ಶಿಷ್ಯ ಗೋರಿರ ಒಳ್‍ಕ್ ಬಗ್ಗಿತ್ ನೋಟ್‍ವಕ, ಅಲ್ಲಿ ಬರಿ ಯೇಸುನ ಸುತ್ತ್‌ನ ಬೊಳ್‍ತ ಬಟ್ಟೆ ಮಾತ್ರ ಇಪ್ಪದ್‍ನ ಕಂಡತ್; ಆಚೇಂಗಿಯು ಅದ್ಂಡ ಒಳ್‍ಕ್ ಪೋಯಿತ್‌ಲ್ಲೆ.

⁶ಸೀಮೋನ ಪೇತ್ರ ಅಂವೊಂಡ ಬಯ್ಯಕ್ ಬಾತ್. ಅಂವೊ ನೇರೆ ಗೋರಿರ ಒಳ್‍ಕ್ ಪೋಚಿ. ಅಲ್ಲಿ ಅಂವೊ ಯೇಸುರ ಮೇಲೆ ಇಟ್ಟಿತ್ಂಜ ನಾರ್ ಬಟ್ಟೆ ಅಲ್ಲಿ ಇಪ್ಪಾನ ಕಂಡತ್.

⁷ಅಂವೊ ಯೇಸುನ ಸುತ್ತ್‌ನ ಬಟ್ಟೆ ಅಲ್ಲಿ ಇಂಜದ್‍ನ ಪಿಂಞ ಯೇಸುರ ಮಂಡೆಕ್ ಸುತ್ತ್‌ನ ಬಟ್ಟೇನ ಬೋರೆ ಬಟ್ಟೆಯಿಂಜ ಬೋರೆ ಮಾಡಿತ್ ಅಲ್ಲಿ ಸುತ್ತಿತ್ ಇಂಜಾನ ಕಂಡತ್.

⁸ಮಿಂಞಕ್ ಬಂದ ಶಿಷ್ಯ ಸಹ ಇಕ್ಕ ಒಳ್‍ಕ್ ಪೋಯಿತ್, ಇದ್‍ನೆಲ್ಲ ಕಂಡಿತ್ ನಂಬ್‍ಚಿ.

⁹ಯೇಸು ಚತ್ತಯಿಂಗ ಮದ್ಯತ್ಂಜ ಪುನಃ ಜೀವವಾಯಿತ್ ಬರಂಡೂಂದ್ ಉಳ್ಳ ದೇವಡ ವಾಕ್ಯ ಇಲ್ಲಿಕತ್ತನೆ ಗೇನಬಂದಿತ್‌ಲ್ಲೆ.

¹⁰ಪಿಂಞ ಆ ದಂಡ್ ಶಿಷ್ಯಂಗಳು ಅಯಿಂಗಡ ಜಾಗಕ್ ಪೋಚಿ.

¹¹ಇಕ್ಕ, ಮರಿಯ ಗೋರಿರ ಪೊರಮೆ ಮೊರಟಂಡ್ ಇಂಜತ್; ಅನ್ನನೆ ಅವ ಮೊರಟಂಡ್ ಇಪ್ಪಕಾಪಕ ಅವ ಬಗ್ಗಿತ್ ಗೋರಿರ ಒಳ್‍ಲ್ ನೋಟ್‌ಚಿ.

¹²ಅಕ್ಕ, ಯೇಸುರ ತಡೀನ ಬೆಚ್ಚಿತ್ಂಜ ಜಾಗತ್‍ಲ್, ಬೊಳ್‍ತ ಬಟ್ಟೆ ಇಟ್ಟಿತ್ಂಜ ದಂಡ್ ದೇವದೂತಂಗ ಅಳ್‌ತಿತ್‌ಪ್ಪದ್‍ನ ಕಂಡತ್. ಒಬ್ಬ ಯೇಸುರ ಮಂಡೆ ಬೆಚ್ಚಿತ್ಂಜ ಜಾಗತ್‍ಲ್, ಇಂಞೊಬ್ಬ ಯೇಸುರ ಕಾಲ್ ಇಂಜ ಜಾಗತ್‍ಲ್ ಅಳ್‍ತಂಡಿಂಜತ್.

¹³ಅಯಿಂಗ ಅವಳ ನೋಟಿತ್: ಅವ್ವ, ನೀನ್ ಎನ್ನಂಗ್ ಮೊರಟಂಡ್ ಉಳ್ಳಿಯಾಂದ್ ಕ್‍ೕಟತ್. ಅಯಿಂಗಕ್ ಅವ: ನಾಡ ಒಡೆಯನ ದಾರೋ ಎಡ್‍ತಂಡ್ ಪೋಯಿರ್‌ತ್, ಅಯಿಂಗ ಎಲ್ಲಿ ಇಟ್ಟತೋ ನಾಕ್ ಗೊತ್ತಿಲ್ಲೇಂದ್ ಅವ ಎಣ್ಣ್‌ಚಿ.

¹⁴ಇನ್ನನೆ ಎಣ್ಣಿತ್ ಅವ ತಿರಿತ್ ನೋಟ್‌ವಕಾಪಕ, ಯೇಸು ನಿಂದಿತ್ಂಜಾನ ಕಂಡತ್. ಆಚೇಂಗಿ ಅವಕ್ ಅಂವೊ ಯೇಸೂಂದ್ ಗೊತ್ತಾಯಿತ್‌ಲ್ಲೆ.

¹⁵ಯೇಸು ಅವಳ ನೋಟಿತ್: ಅವ್ವ, ನೀನ್ ಎನ್ನಂಗ್ ಮೊರಟಂಡ್ ಉಳ್ಳಿಯಾ? ನೀನ್ ದಾರ್‌ನ ತ್‍ೕಡಿಯಂಡ್ ಉಳ್ಳಿಯಾಂದ್ ಕ್‍ೕಟತ್. ಅಕ್ಕ ಅವ, ಯೇಸುನ ಆ ತೋಟಕಾರಾಂದ್ ಗೇನ ಮಾಡಿತ್: ಸ್ವಾಮೀ, ನೀನ್ ಅಂವೊನ ಎಡ್‍ತಿತ್ ಉಂಡೇಂಗಿ, ಅಂವೊನ ಎಲ್ಲಿ ಬೆಚ್ಚಿತುಳ್ಳಿಯಾಂದ್ ನಾಕ್ ಎಣ್ಣ್, ನಾನ್ ಪೋಯಿತ್ ಅಂವೊನ ಎಡ್‌ತ ಬಪ್ಪೀಂದ್ ಎಣ್ಣ್‌ಚಿ.

¹⁶ಯೇಸು ಅವಳ ನೋಟಿತ್: ಮರಿಯಾಂದ್ ಕಾಕ್‍ಚಿ. ಅವ ಅಂವೊನ ತಿರಿತ್ ನೋಟುವಂಜಿ: ರಬ್ಬೂನೀಂದ್ ಎಣ್ಣ್‌ಚಿ. ಅದ್ಂಡ ಅರ್ಥ ಅರಾಮಿಯ ತಕ್ಕ್‌ಲ್ ಉಪಾದ್ಯನೇಂದ್ ಆಪ.

¹⁷ಯೇಸು ಅವಳ ನೋಟಿತ್: ನೀನ್ ನನ್ನ ಮುಟ್ಟತೆ, ಎನ್ನಂಗೆಣ್ಣ್‌ಚೇಂಗಿ, ನಾನ್ ನಾಡ ಅಪ್ಪಂಡ ಪಕ್ಕ ಇಂಞು ಪೋಯಿತ್‌ಲ್ಲೆ; ನೀನ್ ನಾಡ ತಮ್ಮಣಂಗಡ ಪಕ್ಕ ಪೋಯಿತ್, ನಾನ್ ನಾಡ ಅಪ್ಪಂಡ ಪಕ್ಕವು ನಿಂಗಡ ಅಪ್ಪಂಡ ಪಕ್ಕವು, ನಾಡ ದೇವಡ ಪಕ್ಕವು, ನಿಂಗಡ ದೇವಡ ಪಕ್ಕವು ಪೋಯಂಡುಳ್ಳ್‌ಂದ್ ಎಣ್ಣ್‍ೕಂದ್ ಎಣ್ಣ್‌ಚಿ.

¹⁸ಮಗ್ದಲ ಮರಿಯ, ಶಿಷ್ಯಂಗಡ ಪಕ್ಕ ಪೋಯಿತ್ ಅವ ಒಡೆಯನ ನೋಟ್‍ಚೀಂದ್ ಪಿಂಞ ಅಂವೊ ತಾಂಡ ಪಕ್ಕ ಎಣ್ಣ್‌ನಾನ ಎಣ್ಣ್‌ಚಿ.

¹⁹ಆ ದಿವಸ ವಾರತ್‍ರ ಆದ್ಯ ನಾಳಾನ ನಾರಾಚೆ ಆಯಿತ್ಂಜತ್. ಅಂದ್ ಬೈಟಾಪಕ, ಯೇಸುರ ಶಿಷ್ಯಂಗ ಒಟ್ಟ್ ಕೂಡಿತ್ ಇಂಜ ಜಾಗತ್‍ಲ್, ಯೆಹೂದ್ಯಂಗಕ್ ಬೊತ್ತಿಯಂಡಿಂಜಗುಂಡ್, ಪಡಿ ಇಟ್ಟಿತ್ ಒಳ್‍ಲ್ ಇಂಜತ್. ಅಕ್ಕ ಯೇಸು ಅಲ್ಲಿಕ್ ಬಪ್ಪಂಜಿ ಅಯಿಂಗಡ ಮದ್ಯತ್‍ಲ್ ನಿಂದಂಡ್: ನಿಂಗಕ್ ಸಮಾದಾನಾಂದ್ ಎಣ್ಣ್‌ಚಿ.

²⁰ಅಂವೊ ಇನ್ನನೆ ಎಣ್ಣ್‌ನ ಪಿಂಞ ಅಂವೊಂಡ ಕೈಯಿನ ಪಿಂಞ ಬಗ್ಗ್‌ರೀನ ಅಯಿಂಗಕ್ ಕಾಟ್‍ಚಿ. ಅಂವೊನ ಕಂಡಾಂಗ್ ಶಿಷ್ಯಂಗಕೆಲ್ಲ ಬಾರಿ ಕುಶಿ ಆಯಿಪೋಚಿ.

²¹ಯೇಸು ಇಂಞೊರ್ ಕುರಿ ನಿಂಗಕ್ ಸಮಾದಾನ ಆಡ್; ನಾಡ ಅಪ್ಪ ನನ್ನ ಅಯಿಚನೆಕೆ ನಿಂಗಳ ನಾನು ಅಯಿಚಂಡುಳ್ಳ್‌ಂದ್ ಎಣ್ಣಿತ್,

²²ಅಯಿಂಗಡ ಮೇಲೆ ಊದಿತ್: ಪವಿತ್ರಾತ್ಮ ನಿಂಗಕ್ ಕ್‍ಟ್ಟಡ್,

²³ನಿಂಗ ದಾಡ ಪಾಪತ್‍ನ ಮನ್ನಿಚಿಡ್‌ವಿರ, ಆ ಪಾಪತ್ಂಜ ಅಯಿಂಗಕ್ ಮನ್ನಿಪ್ ಕ್‍ಟ್ಟುವ, ದಾಡ ಪಾಪತ್‍ನ ಮನ್ನಿಚಿಡುಲೆ ಅಯಿಂಗಕ್ ಆ ಪಾಪತ್ಂಜ ಮನ್ನಿಪ್ ಕ್‍ಟ್ಟ್‌ಲೇಂದ್ ಎಣ್ಣ್‌ಚಿ.

²⁴ಯೇಸು ಬಂದಿತ್‌ಪ್ಪಕ, ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಇಂಜ ದಿದುಮ ಎಣ್ಣುವ ತೋಮ ಎಣ್ಣ್‌ವಂವೊ ಅಯಿಂಗಡ ಕೂಡೆ ಇಂಜಿತ್‌ಲ್ಲೆ.

²⁵ಬೋರೆ ಶಿಷ್ಯಂಗ: ತೋಮ ಬಂದ ಪಿಂಞ, ನಂಗ ಒಡೆಯನ ಕಂಡತ್‍ೕಂದ್ ಎಣ್ಣ್‌ಚಿ. ಅಕ್ಕ ಅಂವೊ: ನಾನ್ ಅಂವೊಂಡ ಆಣಿ ಅಡಿಚಿತ್ ತೂತ ಆನ ಕೈಯಿನ ನೋಟಿತ್, ಆ ಗಾಯತ್‍ನ ನಾನ್ ಮುಟ್ಟಿತ್, ನಾಡ ಕೈಯಿನ ಅಂವೊಂಡ ಬಗ್ಗ್‌ರೀಲ್ ಇಟ್ಟಿತ್ ನೋಟ್‍ಚೇಂಗಿ ಮಾತ್ರ ನಾನ್ ನಿಂಗ ಎಣ್ಣ್‌ನಾನ ನಂಬುವಿ ಇಲ್ಲತಪೋನಕ ನಾನ್ ನಂಬುಲೇಂದ್ ಎಣ್ಣ್‌ಚಿ.

²⁶ಪುನಃ ಎಟ್ಟ್ ದಿವಸ ಆನ ಪಿಂಞ, ಯೇಸುರ ಶಿಷ್ಯಂಗ ಪಡಿ ಇಟ್ಟಂಡ್ ಒಳ್‍ಲ್ ಇಂಜತ್. ಅಯಿಂಗಡ ಕೂಡೆ ಇಕ್ಕ ತೋಮ ಸಹ ಇಂಜತ್. ಎಲ್ಲಾ ಪಡಿಕ್ ಬೀಗ ಇಟ್ಟಿತ್ಂಜತ್. ಅಕ್ಕ ಯೇಸು ಅಯಿಂಗಡ ಮದ್ಯತ್‍ಲ್ ಬಪ್ಪಂಜಿ, ನಿಂಗಕ್ ಸಮಾದಾನ ಇಕ್ಕಡ್‍ೕಂದ್ ಎಣ್ಣ್‌ಚಿ.

²⁷ಪಿಂಞ ಯೇಸು ತೋಮನ ಕಾಕಿತ್: ನೀಡ ಕೈ ಬೆರತ್‌ನ ಇಲ್ಲಿ ನ್‍ೕಟಿತ್ ನಾಡ ಕೈಯಿನ ನೋಟ್, ನೀಡ ಕೈಯಿನ ನೀಟುವಂಜಿ ನಾಡ ಬಗ್ಗ್‌ರೀಲ್ ಇಡ್. ನೀಡ ಅಪನಂಬಿಕೇನ ಬುಡ್, ನನ್ನ ನಂಬ್‍ೕಂದ್ ಯೇಸು ಎಣ್ಣ್‌ಚಿ.

²⁸ಅಕ್ಕ ತೋಮ: ನಾಡ ಒಡೆಯನೇ ನಾಡ ದೇವನೇಂದ್ ಎಣ್ಣ್‌ಚಿ.

²⁹ಯೇಸು ಅಂವೊಂಗ್: ನೀನ್ ನನ್ನ ನೋಟ್‍ನಗುಂಡ್ ನಂಬುವಿಯ, ನನ್ನ ಕಾಂಗತೆ ನಂಬುವಯಿಂಗ ಆಶೀರ್ವಾದ ಪಡ್ಂದಯಿಂಗಾಂದ್ ಎಣ್ಣ್‌ಚಿ.

³⁰ಈ ಪುಸ್ತಕತ್‍ಲ್ ಒಳ್‍ದ್‍ನದ್ ಅಲ್ಲತೆ, ಇಂಞು ದುಂಬ ಅದ್ಬುತ ಕಾರ್ಯತ್‍ನ ತಾಂಡ ಶಿಷ್ಯಂಗಡ ಮಿಂಞತ್‍ಲ್ ಮಾಡಿತ್ಂಜತ್.

³¹ಯೇಸು ದೇವಡ ಮೋಂವೊನಾನ ಕ್ರಿಸ್ತಾಂದ್ ನಿಂಗ ನಂಬುವಕಾಯಿತ್ ಪಿಂಞ ಅಂವೊನ ನಂಬುವಗುಂಡ್, ಅಂವೊಂಡ ಪೆದತ್‍ಲ್ ನಿಂಗಕ್ ನಿತ್ಯ ಜೀವ ಕ್‍ಟ್ಟುವಕಾಯಿತ್ ಇದ್‍ನೆಲ್ಲ ಒಳ್‍ದಿತುಂಡ್.