Read Kodava ಯೋಹಾನ 21 Bible Online

ಯೋಹಾನ 21 - Kodava bible

ಯೋಹಾನ 21

¹ಇಂಞು ಚೆನ್ನ ದಿವಸ ಆನ ಪಿಂಞ, ಯೇಸು ತಿಬೇರಿಯ ಕೆರೆರ ಪಕ್ಕ ಅಯಿಂಗಕ್ ಪುನಃ ಅಂವೊನ ಕಾಂಬ್‌ಚಿಟ್ಟಂಡತ್.

²ಅದ್ ಎನ್ನನೆ ಎಣ್ಣ್‌ಚೇಂಗಿ: ಸೀಮೋನ ಪೇತ್ರ, ದಿದುಮಾಂದ್ ಜನ ಕಾಕುವ ತೋಮ, ಗಲಿಲಾಯತ್‍ರ ಕಾನಾ ಊರ್‌ರ ನತಾನಯೇಲ, ಜೆಬೆದಾಯಂಡ ದಂಡ್ ಮೋನಿಯಂಗ, ಪಿಂಞ ಯೇಸುರ ಇಂಞು ದಂಡ್ ಶಿಷ್ಯಂಗ ಕೂಡಿ ಬಂದಿತ್ಂಜತ್.

³ಆ ಸಮಯತ್‍ಲ್, ಸೀಮೋನ ಪೇತ್ರ: ನಾನ್ ಮೀನ್ ಪುಡಿಪಕ್ ಪೋಪೀಂದ್ ಎಣ್ಣ್‌ಚಿ. ಅಕ್ಕ ನಂಗಳು ನೀಡ ಕೂಡೆ ಬಪ್ಪಾಂದ್ ಎಣ್ಣ್‌ಚಿ. ಅನ್ನನೆ ಅಯಿಂಗೆಲ್ಲಾ, ದೋಣಿಲ್ ಪೋಚಿ. ಬಯಿಟ್ ಆಕಣೆಕ್ ಅಯಿಂಗಕ್ ಒರ್ ಮೀನು ಕ್‍ಟ್ಟಿತ್‌ಲ್ಲೆ.

⁴ಪೊಲಾಕ ಯೇಸು ಕರೆಲ್ ನಿಂದಂಡಿಂಜತ್. ಆಚೇಂಗಿಯು ಶಿಷ್ಯಂಗಕ್ ಅಂವೊ ಯೇಸೂಂದ್ ಗೊತ್ತಾಯಿತ್ಂಜ್‍ತ್‌ಲ್ಲೆ.

⁵ಯೇಸು ಅಯಿಂಗಳ ನೋಟಿತ್: ಮಕ್ಕಳೇ! ಮೀನ್ ಒಂದು ಕ್‍ಟ್ಟಿತ್‌ಲ್ಲೆಯಾಂದ್ ಕ್‍ೕಟತ್. ಅಂವೊಂಗ್ ಅಯಿಂಗ: ಒಂದು ಕ್‌ಟ್ಟಿತ್‌ಲ್ಲೇಂದ್ ಎಣ್ಣ್‌ಚಿ.

⁶ಅಯಿಂಗಕ್ ಅಂವೊ: ನಿಂಗಡ ಬಲೆನ ನಿಂಗಡ ದೋಣಿರ ಬಲ್‌ತೆ ಬರಿಕ್ ಇಡಿ, ಅಕ್ಕ ನಿಂಗಕ್ ಮೀನ್ ಕ್‌ಟ್ಟುವಾಂದ್ ಯೇಸು ಎಣ್ಣ್‌ಚಿ. ಅಂವೊ ಎಣ್ಣ್‌ನನೆಕೆ ಅಯಿಂಗ ಬಲೆನ ಬೀಜಿತ್, ದುಂಬ ಮೀನ್ ಚಿಕ್ಕ್‌ನಗುಂಡ್, ಅಯಿಂಗಡ ಬಲೆನ ಬಲಿಪಕ್ ಕಯಿಂಜಿತ್‌ಲ್ಲೆ.

⁷ಅಕ್ಕ, ಯೇಸುರ ಮೇಲೆ ದುಂಬ ಪ್ರೀತಿ ಬೆಚ್ಚಿತ್ಂಜ ಶಿಷ್ಯ ಪೇತ್ರನ ನೋಟಿತ್, ಅಂವೊ ಒಡೆಯಾಂದ್ ಎಣ್ಣ್‌ಚಿ. ಆ ಶಿಷ್ಯ ಅದ್ ಒಡೆಯಾಂದ್ ಎಣ್ಣುವಾನ ಕ್‍ೕಪಕ, ಪೇತ್ರ ಅಂವೊಂಡ ಪೊರಮೆ ಇಡ್‌ವ ಬಟ್ಟೇನ ಇಟ್ಟಂಡ್ ನೀರ್‌ಕ್ ಪಾರ್‌ಚಿ. (ಎನ್ನಂಗೆಣ್ಣ್‌ಚೇಂಗಿ, ಕೆಲಸ ಮಾಡ್‌ವಕಾಯಿತ್ ಅಂವೊ ಬಟ್ಟೆ ಇಟ್ಟಂಡಿಲ್ಲೆ).

⁸ಬೋರೆ ಶಿಷ್ಯಂಗ ಕೆರೆಕ್ ಇಂಞು ಮುನ್ನೂರ್ ಅಡಿ ದೂರತ್‍ಲ್ ಇಂಜತ್, ಆನಗುಂಡ್ ದೋಣಿಲ್ ಇಂಜಂಡೇ ಮೀನ್‌ರ ಬಲೆನ ಕರೆಕ್ ಬಲ್‍ಚಂಡ್ ಬಾತ್.

⁹ಅಯಿಂಗ ಕರೆಲ್ ಇಳಿಯುವಕ, ಮಸಿಕಂಡೆರ ತಿತ್ತ್ ಇಟ್ಟಿತುಳ್ಳದ್‍ನ, ಆಂಡ ಮೇಲೆ ಮೀನ್ ಪಿಂಞ ಒಟ್ಟಿ ಇಂಜಾನ ಕಂಡತ್.

¹⁰ಯೇಸು ಅಯಿಂಗಳ ನೋಟಿತ್: ನಿಂಗ ಇಕ್ಕ ಪುಡ್‌ಚ ಮೀನ್‌ನ ಕೊಂಡ್‌ಬಾರೀಂದ್ ಎಣ್ಣ್‌ಚಿ.

¹¹ಅಕ್ಕ, ಸೀಮೋನ ಪೇತ್ರ ನೂಯಿಟೈಂಬತ್ ಮೂಂದ್ ಬಲ್ಯ ಮೀನ್ ಇಂಜ ಬಲೆನ ಕರೆಕ್ ಬಲ್‍ಚಂಡ್ ಬಾತ್. ಇಚ್ಚಕ್ ಮೀನ್ ಇಂಜತೇಂಗಿಯು ಸಹ ಆ ಬಲೆ ಕೀತಿ ಪೋಯಿತ್‌ಲ್ಲೆ.

¹²ಪಿಂಞ ಯೇಸು ಅಯಿಂಗಳ ಕಾಕಿತ್: ಬಾರಿ, ನಿಂಗೆಲ್ಲಾರು ಊಟ ಮಾಡೀಂದ್ ಎಣ್ಣ್‌ಚಿ. ಅಂವೊ ಒಡೆಯಾಂದ್ ಅಯಿಂಗಕ್ ಗೊತ್ತಾನಗುಂಡ್, ನೀನ್ ದಾರ್‍ೕಂದ್ ಕ್‍ೕಪಕ್ ಒಬ್ಬಂಗು ದೈರ್ಯ ಇಂಜಿತ್‌ಲ್ಲೆ.

¹³ಅಕ್ಕ ಯೇಸು: ಒಟ್ಟಿನ ಪಿಂಞ ಮೀನ್‌ನ ಎಡ್‍ತಿತ್ ಅಯಿಂಗಕ್ ಕೊಡ್‍ತತ್.

¹⁴ಯೇಸು ಚತ್ತಿತ್ ಎದ್ದ ಪಿಂಞ ಶಿಷ್ಯಂಗಕ್ ಅಂವೊನ ಕಾಂಬ್‍ಚಿಡುವದ್ ಇದ್ ಮೂಂದನೆ ಕುರಿ.

¹⁵ಅಯಿಂಗೆಲ್ಲಾ ಉಂಡಿತಾನ ಪಿಂಞ ಯೇಸು ಸೀಮೋನ ಪೇತ್ರನ ನೋಟಿತ್: ಯೋಹಾನಂಡ ಮೋಂವೊನಾನ ಸೀಮೋನನೇ, ಈಂಗ ಎಲ್ಲಾಕಿಂಜ ನೀನ್ ನಾಡ ಮೇಲೆ ದುಂಬ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಕ್‍ೕಟತ್. ಅಂವೊಂಗ್ ಪೇತ್ರ: ಅಕ್ಕು ಒಡೆಯನೇ, ನಾನ್ ಪ್ರೀತಿಚಿಡ್‌ವೀಂದ್ ನೀಕ್ ಗೊತ್ತುಂಡ್‍ೕಂದ್ ಎಣ್ಣ್‌ಚಿ. ಯೇಸು ಅಂವೊಂಗ್: ನೀನ್ ನಾಡ ಕೊರಿಕುಟ್ಟಿಯಳ ಮೇಯಿಸೂಂದ್ ಎಣ್ಣ್‌ಚಿ.

¹⁶ದಂಡನೆ ಕುರಿ ಯೇಸು ಅಂವೊನ ನೋಟಿತ್: ಯೋಹಾನಂಡ ಮೋಂವೊನಾನ ಸೀಮೋನನೇ, ನೀನ್ ನಾಡ ಮೇಲೆ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಕ್‍ೕಟತ್. ಅದ್ಂಗ್ ಅಂವೊ: ಅಕ್ಕು ದೇವ, ನಾನ್ ಪ್ರೀತಿಚಿಡ್‌ವೀಂದ್ ನೀಕ್ ಗೊತ್ತುಂಡ್‍ೕಂದ್ ಎಣ್ಣ್‌ಚಿ. ಅಕ್ಕ ಯೇಸು: ನಾಡ ಕೊರಿಯಳ ನೀನ್ ಮೇಯಿಸೂಂದ್ ಎಣ್ಣ್‌ಚಿ.

¹⁷ಮೂಂದನೆ ಕುರಿ ಯೇಸು ಅಂವೊನ ನೋಟಿತ್: ಯೋಹಾನಂಡ ಮೋಂವೊನಾನ ಸೀಮೋನನೇ, ನೀನ್ ನಾಡ ಮೇಲೆ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಕ್‍ೕಟತ್. ನೀನ್ ನಾಡ ಮೇಲೆ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಮೂಂದನೆ ಕುರಿ ಯೇಸು ಕ್‍ೕಪಕ, ಪೇತ್ರಂಗ್ ದುಂಬ ಬೇಜಾರ್ ಆಚಿ, ಅಕ್ಕ ಅಂವೊ ಒಡೆಯನೇ: ನೀಕ್ ಎಲ್ಲಾನ ಗೊತ್ತುಂಡ್, ನಾಕ್ ನೀಡ ಮೇಲೆ ಉಳ್ಳ ಪ್ರೀತಿಯು ಗೊತ್ತುಂಡ್‍ೕಂದ್ ಎಣ್ಣ್‌ಚಿ. ಅಂವೊಂಗ್ ಯೇಸು: ನಾಡ ಕೊರಿಯಳ ಮೇಯಿಸೂಂದ್ ಎಣ್ಣ್‌ಚಿ.

¹⁸ನೀನ್ ಚೆರಿಯಂವೊನಾಯಿತ್‌ಪ್ಪಕ ನೀನ್ ನೀಡ ಬಟ್ಟೇನೆ ಇಟ್ಟಂಡ್, ನೀಕ್ ಕುಶಿಯುಳ್ಳ ಜಾಗಕ್ ನೀನ್ ಪೋಪಕಿಂಜತ್. ಆಚೇಂಗಿ, ನೀಕ್ ವಯಸಾಪಕ; ನೀನ್ ನೀಡ ಕೈಯಿನ ನೀಟ್‌ವಿಯಾ, ಇಂಞೊಬ್ಬ ನೀಕ್ ನೀಡ ಬಟ್ಟೇನ ಇಟ್ಟಿತ್ ನೀಕ್ ಕುಶಿ ಇಲ್ಲತ ಜಾಗಕ್ ನಿನ್ನ ಕಾಕಿಯಂಡ್ ಪೋಪಾಂದ್ ನೇರಾಯಿತು ನೇರಾಯಿತು ನಾನ್ ನೀಕ್ ಎಣ್ಣುವೀಂದ್ ಯೇಸು ಎಣ್ಣ್‌ಚಿ.

¹⁹ಪೇತ್ರ ಏದ್ ತರತ್‍ಲ್ ಚಾವಾ, ಎನ್ನನೆ ದೇವಡ ಪೆದತ್‍ನ ಮಹಿಮೆ ಪಡ್‌ತ್‌ವಾಂದ್ ಗೊತ್ತಾಪಕಾಯಿತ್ ಯೇಸು ಇನ್ನನೆ ಎಣ್ಣ್‌ಚಿ. ಪಿಂಞ ಅಂವೊನ ನೋಟಿತ್: ನಾಡ ಬಯ್ಯಕ್ ಬಾಂದ್ ಹುಕುಮ್ ಕೊಡ್‍ತತ್.

²⁰ಪೇತ್ರ ತಿರಿತ್ ನೋಟ್‍ವಕ, ಯೇಸುರ ಮೇಲೆ ದುಂಬ ಪ್ರೀತಿ ಬೆಚ್ಚಿತ್ಂಜ, ಆಕೀರ್ ಗದ್ದಾಳತ್‍ಲ್ ಯೇಸುರ ಪಕ್ಕ ಅಳ್‌ತಂಡ್, ದೇವಾ ನಿನ್ನ ಪುಡ್‌ಚಿತ್ ಕೊಡ್‍ಪ ಶಿಷ್ಯ ದಾರ್‍ೕಂದ್ ಕ್‍ೕಟ ಶಿಷ್ಯ ಬಪ್ಪಾನ ಕಂಡತ್.

²¹ಪೇತ್ರ ಅಂವೊನ ನೋಟ್‍ವಕ: ಇಂವೊಂಡ ವಿಷಯ ಎಂತ್‍ೕಂದ್ ಯೇಸುನ ಕ್‍ೕಟತ್.

²²ಯೇಸು ಪೇತ್ರಂಗ್: ನಾನ್ ಪುನಃ ಬಪ್ಪಕತ್ತನೆ ಇಂವೊ ಬದ್‌ಕಿತ್ ಇಪ್ಪಕ್ ನಾಕ್ ಕುಶಿ ಉಂಡೇಂಗಿ, ನೀಕ್ ಎಂತ? ನೀನ್ ನಾಡ ಬಯ್ಯ ಬಾಂದ್ ಯೇಸು ಎಣ್ಣ್‌ಚಿ.

²³ಯೇಸು ಇನ್ನನೆ ಎಣ್ಣ್‌ನ ವಿಷಯ ಎಲ್ಲಾರ್‌ಕು ಪಬ್ಬ್‌ವಕ, ಈ ಶಿಷ್ಯ ಚಾವ್‍ಲೇಂದ್ ಯೇಸುನ ನಂಬ್‍ನ ಜನ ಗೇನ ಮಾಡ್‍ಚಿ. ಆಚೇಂಗಿ, ಯೇಸು ಈ ಶಿಷ್ಯ ಚಾವ್‍ಲೇಂದ್ ಎಣ್ಣಿತ್‌ಲ್ಲೆ, ನಾನ್ ಬಪ್ಪಕತ್ತನೆ ಇಂವೊ ಬದ್‌ಕಿತ್ ಇಪ್ಪಕ್ ನಾಕ್ ಕುಶಿ ಉಂಡೇಂಗಿ, ನೀಕ್ ಎಂ‍ತಾಂದ್ ಮಾತ್ರ ಎಣ್ಣಿತ್ಂಜತ್.

²⁴ಈ ಶಿಷ್ಯನೇ, ಇದ್‍ನೆಲ್ಲಾ ಸಾಕ್ಷಿ ಕೊಡ್‌ತಂಡ್, ಇದ್‍ನೆಲ್ಲಾ ಒಳ್‍ದಿಯತ್. ಅಂವೊ ಒಳ್‍ದ್‍ನೆದೆಲ್ಲಾ ಸತ್ಯಾಂದ್ ನಂಗಕ್ ಗೊತ್ತುಂಡ್.

²⁵ಯೇಸು ಇಂಞು ದುಂಬ ವಿಷಯ ಮಾಡಿತ್ಂಜತ್, ಅದ್‍ನೆಲ್ಲಾ ಒಂದೊಂದಾಯಿತ್ ಒಳ್‍ದ್‍ವಕ್ ಪೋಚೇಂಗಿ, ಈ ಲೋಕತ್‍ಲ್ ಅಂವೊಂಡ ವಿಷಯತ್‍ನ ಒಳ್‍ದ್‍ವ ಪುಸ್ತಕತ್‍ನ ಬೆಪ್ಪಕ್ ಜಾಗ ಇಪ್ಪುಲೇಂದ್ ನಾನ್ ಗೇನ ಮಾಡ್‌ವಿ. ಆಮೆನ್.