Read Kodava ಯೋಹಾನ 3 Bible Online

ಯೋಹಾನ 3 - Kodava bible

ಯೋಹಾನ 3

¹ಅಲ್ಲಿಯತ್‍ರ ಫರಿಸಾಯಂಗಡ ಕೂಟ್‌ಲ್, ನಿಕೊದೇಮ ಎಣ್ಣುವ ಒರ್ ಯೆಹೂದ್ಯ ಅದಿಕಾರಿ ಇಂಜತ್.

²ಅಂವೊ, ಒರ್ ಬಯಿಟ್ ಯೇಸುರ ಪಕ್ಕ ಪೋಯಿತ್: ಉಪಾದ್ಯನೇ, ನೀನ್ ದೇವ ಅಯಿಚಿತುಳ್ಳ ಉಪಾದ್ಯಾಂದ್ ನಂಗಕ್ ಗೊತ್ತುಂಡ್. ಎನ್ನಂಗೆಣ್ಣ್‌ಚೇಂಗಿ, ದಾರ್ ಒಬ್ಬಂಡ ಕೂಡೆ ದೇವ ಉಂಡೋ ಅಂವೊಂಗ್ ಮಾತ್ರ ನೀನ್ ಮಾಡ್‌ವನೆಕೆ ಇನ್ನತಾನ ಅದ್ಬುತ ಕಾರ್ಯತ್‍ನ ಮಾಡ್‌ವಕ್ ಕಯ್ಯೂಂದ್ ಎಣ್ಣ್‌ಚಿ.

³ಅಂವೊಂಗ್ ಯೇಸು: ಒಬ್ಬ ಪುನಃ ಪುಟ್ಟತೆ ಪೋನಕ ಅಂವೊ ದೇವಡ ರಾಜ್ಯತ್‍ನ ಕಾಂಬಕ್ ಕಯ್ಯುಲೇಂದ್ ನೇರಾಯಿತು ನೇರಾಯಿತು ನಾನ್ ನೀಕ್ ಎಣ್ಣುವೀಂದ್ ಉತ್ತರ ಕೊಡ್‍ತತ್.

⁴ಅದ್ಂಗ್ ನಿಕೊದೇಮ: ವಯಸ್ಸಾನ ಒರ್ ಮನುಷ್ಯ ಎನ್ನನೆ ಪುನಃ ಪುಟ್ಟ್‌ವಕ್ ಕಯ್ಯು? ಅಂವೊ ಎನ್ನನೆ ಅಂವೊಂಡ ಅವ್ವಂಡ ಕೆಲತ್‍ರ ಒಳ್‍ಕ್ ಪೋಯಿತ್ ದಂಡನೆ ಕುರಿ ಪುಟ್ಟ್‌ವಕ್ ಕಯ್ಯೂಂದ್ ಕ್‍ೕಟತ್.

⁵ಯೇಸು ಅಂವೊಂಗ್: ಒಬ್ಬ, ನೀರ್ಂಜಲು ಪವಿತ್ರಾತ್ಮತ್‌ಂಜಲು ಪುಟ್ಟತೆ ಪೋಚೇಂಗಿ ದೇವಡ ರಾಜ್ಯಕ್ ಪೋಪಕ್ ಕಯ್ಯುಲೇಂದ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

⁶ತಡೀರ ಮೂಲಕ ಪುಟ್ಟ್‌ವದ್ ತಡೀರ ಜೀವವಾಯಿತ್‌ಪ್ಪ, ಆಚೇಂಗಿ, ಪವಿತ್ರಾತ್ಮತ್‍ರ ಮೂಲಕ ಪುಟ್ಟ್‌ವದ್ ದೇವಡ ಆತ್ಮವಾಯಿತಿಪ್ಪ.

⁷ಆನಗುಂಡ್, ನೀನ್ ಪುನಃ ಪುಟ್ಟಂಡೂಂದ್ ನಾನ್ ನೀಕ್ ಎಣ್ಣ್‌ನ ವಿಷಯತ್‍ಲ್ ಆಶ್ಚರ್ಯ ಪಡತೆ.

⁸ಗಾಳಿ, ಅದ್ಂಡ ಇಷ್ಟ ಪ್ರಕಾರ ಎಲ್ಲಿ ಬೋಂಡ್‍ಚೇಂಗಿಯು ಬೀಜುವ; ಅದ್ಂಡ ಸದ್ದ್‌ನ ನಿಂಗ ಕ್‍ೕಪಿರ, ಆಚೇಂಗಿ ಅದ್ ಎಲ್ಲಿಂಜ ಬಾತ್‍ೕಂದು, ಎಲ್ಲಿಕ್ ಪೋಪಾಂದು ನಿಂಗಕ್ ಗೊತ್ತಿಪ್ಪುಲೆ; ಅನ್ನನೆ ಪವಿತ್ರಾತ್ಮತ್‍ರ ಮೂಲಕ ಪುಟ್ಟ್‌ನ ಒಬ್ಬೊಬ್ಬನು ಇಪ್ಪಾಂದ್ ಎಣ್ಣ್‌ಚಿ.

⁹ಅದ್ಂಗ್ ನಿಕೊದೇಮ: ಇದ್ ಎನ್ನನೆ ಆಪಾಂದ್ ಕ್‍ೕಟತ್.

¹⁰ನೀನ್ ಇಸ್ರಾಯೇಲ್‍ರ ಒರ್ ಉಪಾದ್ಯನಾಯಿತ್ಂಜತೇಂಗಿಯು ಈ ವಿಷಯವೆಲ್ಲ ನೀಕ್ ಗೊತ್ತ್‌ಲ್ಲೆಯಾಂದ್ ಯೇಸು ಅಂವೊಂಗ್ ಜವಾಬ್ ಕೊಡ್‍ತತ್.

¹¹ನೇರಾಯಿತು ನೇರಾಯಿತು ನಾನ್ ನೀಕ್ ಎಣ್ಣ್‌ವಿ, ನಂಗಕ್ ಎಂತ ಗೊತ್ತುಂಡೋ ಅದ್‍ನ ಎಣ್ಣುವ, ನಂಗ ಕಂಡದ್‍ನ ಎಣ್ಣಿ ಕೊಡ್‍ಪ; ಆಚೇಂಗಿ ನಂಗಡ ಸಾಕ್ಷಿನ ನಿಂಗ ಅಂಗಿಕಾರ ಮಾಡಿತ್‌ಲ್ಲೆ.

¹²ಈ ಲೋಕತ್‍ರ ವಿಷಯತ್‍ನ ಎಣ್ಣುವಕ ನಿಂಗ ನನ್ನ ನಂಬತೆ ಪೋಚೇಂಗಿ, ಪರಲೋಕತ್‍ರ ವಿಷಯತ್‍ನ ಎಣ್ಣ್‌ಚೇಂಗಿ ಎನ್ನನೆ ನಂಬುವಿರ?

¹³ಮನುಷ್ಯಕುಮಾರನಲ್ಲತೆ ಬೋರೆ ದಾರೂ ಪರಲೋಕಕ್ ಪೋಯಿತ್‌ಲ್ಲೆ, ಅಂವೊನಲ್ಲತೆ ದಾರೂ ಪರಲೋಕತ್ಂಜ ಈ ಲೋಕಕ್ ಬಂದಿತೂ ಇಲ್ಲೆ.

¹⁴ಮೋಶೆ ಮಣಬೂಮಿಲ್ ಎನ್ನನೆ ಒರ್ ಕಚ್ಚಿ ಪಾಂಬ್‍ನ ನೇತ್‍ಚೋ ಅನ್ನನೆ ಮನುಷ್ಯಕುಮಾರನ ಸಹ ಕೊಡಿಕ್ ನೇತಂಡು.

¹⁵ಅನ್ನನೆ ದಾರೆಲ್ಲ ಅಂವೊನ ನಂಬುವ, ಅಯಿಂಗಕೆಲ್ಲ ನಿತ್ಯ ಜೀವ ಕ್‍ಟ್ಟುವ.

¹⁶ದೇವ ಈ ಲೋಕತ್‍ರ ಜನಳ ಎಚ್ಚಕೋ ಪ್ರೀತಿ ಮಾಡಿತ್, ಅಂವೊಂಡ ಒರೇ ಮೋಂವೊನ ಕೊಡ್‍ತತ್; ದಾರೆಲ್ಲ ಅಂವೊನ ನಂಬುವ ಅಯಿಂಗೆಲ್ಲಾ ಪಾಳಾಕತೆ ನಿತ್ಯ ಜೀವತ್‍ನ ಪಡೆಯುವ.

¹⁷ಈ ಲೋಕತ್‍ಲ್ ಉಳ್ಳ ಜನಳ ತೀರ್ಪ್ ಮಾಡ್‌ವಕಾಯಿತ್ ದೇವ ತಾಂಡ ಮೋಂವೊನ ಅಯಿಚಿತ್ತ್‌ಲ್ಲೆ, ಆಚೇಂಗಿ ಅಂವೊಂಡ ಮೂಲಕ ಲೋಕತ್‍ಲ್ ಉಳ್ಳ ಜನಳ ರಕ್ಷಣೆ ಮಾಡ್‌ವಕಾಯಿತೇ ಅಯಿಚತ್.

¹⁸ದೇವಡ ಮೋಂವೊನ ನಂಬುವಯಿಂಗಕ್ ದೇವಡ ಶಿಕ್ಷೇರ ತೀರ್ಪ್ ಇಲ್ಲೆ; ಆಚೇಂಗಿ ಅಂವೊನ ನಂಬತಯಿಂಗಕ್ ದೇವಡ ತೀರ್ಪ್ ಅಕ್ಕಲೆ ಕ್‌ಟ್ಟಿಪೋಚಿ. ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ದೇವಡ ಒರೇ ಮೋಂವೊಂಡ ಪೆದತ್‍ನ ನಂಬಿತ್‌ಲ್ಲೆ.

¹⁹ಅಯಿಂಗಕ್ ಶಿಕ್ಷೇರ ತೀರ್ಪ್ ಕ್‍ಟ್ಟುವಕ್ ಕಾರಣ ಎಂತ ಎಣ್ಣ್‌ಚೇಂಗಿ: ಅಂವೊ ಈ ಲೋಕಕ್ ಬೊಳಿಯಾಯಿತ್ ಬಾತ್, ಆಚೇಂಗಿ ಜನಡ ಕ್ರಿಯೆ ಕೆಟ್ಟದಾಯಿತ್ಂಜಗುಂಡ್, ಅಯಿಂಗ ಆ ಬೊಳಿಕಿಂಜ ಇರ್‌ಟ್‌ನ ಪ್ರೀತಿ ಮಾಡ್‍ಚಿ.

²⁰ಕೆಟ್ಟ ಕೆಲಸ ಮಾಡ್‌ವ ಎಲ್ಲಾರು ಬೊಳಿನ ದ್ವೇಶ ಮಾಡ್‌ವ, ಅಯಿಂಗ ಮಾಡ್‌ವ ಕ್ರಿಯೇಯೆಲ್ಲಾ ಗೊತ್ತಾಪಾಂದ್ ಬೊಳಿರ ಪಕ್ಕ ಬಪ್ಪ್‌ಲೆ.

²¹ಆಚೇಂಗಿ, ಸತ್ಯತ್‍ರ ಪ್ರಕಾರ ಬದ್‍ಕ್‍ವಯಿಂಗ ಬೊಳಿರ ಪಕ್ಕ ಬಂದ್‍ರ್‍ವ. ಅಕ್ಕ, ಅಯಿಂಗ ಮಾಡ್‍ನದೆಲ್ಲಾ ದೇವಕ್ ಬಗ್ಗಿತ್ ಮಾಡ್‌ನದ್‍ೕಂದ್ ಎಲ್ಲಾರ್‌ಕು ಗೊತ್ತಾಪ.

²²ಚೆನ್ನ ಸಮಯ ಕಯಿಂಜ ಪಿಂಞ, ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಯೆರೂಸಲೇಮ್ ಪಟ್ಟಣತ್‍ನ ಬುಟ್ಟಿತ್ ಯೂದಾಯ ನಾಡ್‍ರ ಪಕ್ಕ ಪೋಚಿ. ಅಲ್ಲಿ ಅಂವೊ ತಾಂಡ ಶಿಷ್ಯಂಗಡ ಕೂಡೆ ಚೆನ್ನ ಕಾಲ ಇಂಜಂಡ್ ಜನಕ್ ದೀಕ್ಷಾಸ್ನಾನ ಕೊಡ್‍ತಂಡಿಂಜತ್.

²³ಅದೇ ಸಮಯತ್‍ಲ್, ಸಲೀಮ ಎಣ್ಣುವ ಪಟ್ಟಣತ್‍ರ ಪಕ್ಕ ಉಳ್ಳ ಐನೋನ್ ಎಣ್ಣುವ ಊರ್‌ಲ್ ದುಂಬ ನೀರ್ ಇಂಜಗುಂಡ್ ಯೋಹಾನ ಸಹ ಜನಕ್ ದೀಕ್ಷಾಸ್ನಾನ ಕೊಡ್‍ತಂಡಿಂಜತ್. ಜನ ಅಂವೊಂಡ ಪಕ್ಕ ಬಂದಿತ್ ದೀಕ್ಷಾಸ್ನಾನ ಎಡ್‍ತಂಡತ್.

²⁴ಈ ಘಟನೆಯೆಲ್ಲ ಯೋಹಾನನ ಜೈಲ್‌ಕ್ ಇಡ್‌ವಕ್ ಮಿಂಞ ಆನದ್.

²⁵ಅಕ್ಕ ಯೋಹಾನಂಡ ಶಿಷ್ಯಂಗಕು ಯೆಹೂದ್ಯ ಒಬ್ಬಂಗು ಅಯಿಂಗಡ ಪದ್ದತಿರ ಪ್ರಕಾರ ಶುದ್ದವಾಯಿತ್ ಇಪ್ಪ ವಿಷಯತ್‍ಲ್ ವಾದ ಸುರು ಆಚಿ.

²⁶ಅಯಿಂಗ ಯೋಹಾನಂಡ ಪಕ್ಕ ಪೋಪಂಜಿ: ಉಪಾದ್ಯನೇ, ಯೊರ್ದನ್ ಕೆರೆರ ಆಬರಿಲ್ ನೀಡ ಕೂಡೆ ಒಬ್ಬ ಇಂಜತಲ್ಲ, ನೀನ್ ಸಹ ಅಂವೊಂಡ ವಿಷಯತ್ ಸಾಕ್ಷಿ ಕೊಡ್‍ತಿಯಲ್ಲ? ಇಕ್ಕ ನೋಟಿ, ಅಂವೊ ದೀಕ್ಷಾಸ್ನಾನ ಕೊಡ್‍ತಂಡುಂಡ್, ಜನ ಎಲ್ಲಾರು ಅಂವೊಂಡ ಪಕ್ಕ ಪೋಯಂಡುಂಡ್‍ೕಂದ್ ಎಣ್ಣ್‌ಚಿ.

²⁷ಅದ್ಂಗ್ ಯೋಹಾನ: ದೇವ, ಒಬ್ಬಂಗ್ ಪರಲೋಕತ್ಂಜ ಏದ್‍ನ ಅನುಗ್ರಹ ಮಾಡಿತುಂಡೋ ಅದ್‍ನ ಮಾತ್ರ ಪಡೆಯುವಕ್ ಕಯ್ಯು.

²⁸ನಾನ್ ಕ್ರಿಸ್ತ ಅಲ್ಲ, ಅಂವೊಂಗ್ ಮಿಂಞ ಪೋಪಕ್, ದೇವ ಅಯಿಚಂವೋಂದ್ ನಾನ್ ಎಣ್ಣ್‌ನಾಂಗ್ ನಿಂಗಳೇ ಸಾಕ್ಷಿ.

²⁹ಮಂಗಲಕರ್ತಿ ಉಳ್ಳಂವೊನೇ ಮಂಗಲಕಾರ ಆಪ. ಆಚೇಂಗಿ ಮಂಗಲಕಾರಂಡ ಕೂಟ್‍ಕಾರ ಮಂಗಲಕಾರಂಡ ಪಕ್ಕತ್‍ಲ್ ನಿಂದಿತ್ ಅಂವೊಂಡ ತಕ್ಕ್‌ನ ಕ್‍ೕಪ, ಮಂಗಲಕಾರಂಡ ದ್ವನಿ ಕ್‍ೕಟಿತ್ ದುಂಬ ಕುಶಿ ಪಡುವ. ಅನ್ನನೆ ನಾಕ್ ಆ ಕುಶಿ ಕ್‍ಟ್ಟಿತ್, ನಾಡ ಕುಶಿ ಪೂರ್ತಿ ಆಚಿ.

³⁰ಅಂವೊ ಬಲ್ಯದಾಂಡು, ನಾನ್ ಇಂಞು ಕಮ್ಮಿ ಆಂಡೂಂದ್ ಅಯಿಂಗಕ್ ಎಣ್ಣ್‌ಚಿ.

³¹ಕ್ರಿಸ್ತ ಪರಲೋಕತ್ಂಜ ಬಂದಂವೊ, ಅಂವೊ ಎಲ್ಲಾರ್ಕಿಂಜ ಬಲ್ಯಂವೊ. ಬೂಲೋಕತ್ಂಜ ಬಂದಯಿಂಗ, ಈ ಲೋಕತ್‍ರ ತಕ್ಕ್ ಪರಿಯುವ. ಆಚೇಂಗಿ, ಅಂವೊ ಪರಲೋಕತ್ಂಜ ಬಂದಂವೊ, ಆನಗುಂಡ್ ಅಂವೊ ಎಲ್ಲಾರ್ಕಿಂಜ ಬಲ್ಯಂವೊನಾಯಿತುಂಡ್.

³²ಅಂವೊ ಎಂತದ್‍ನ ಕಂಡತೋ, ಎಂತದ್‍ನ ಕ್‍ೕಟತೋ ಅದ್ಂಡ ವಿಷಯತ್ ಸಾಕ್ಷಿ ಕೊಡ್‍ಪ. ಆಚೇಂಗಿಯು, ಅಂವೊಂಡ ಸಾಕ್ಷಿನ ದಾರೂ ಸ್ವೀಕಾರ ಮಾಡುಲೆ.

³³ಅಂವೊಂಡ ಸಾಕ್ಷಿನ ತಕ್ಕಾರ ಮಾಡ್‌ವಂವೊ, ದೇವ ಎಣ್ಣ್‌ನದ್ ಸತ್ಯಾಂದ್ ಉಳ್ಳ ವಿಷಯತ್‍ನ ಮುದ್ರೆ ಇಟ್ಟಿತ್ ದೃಡಪಡ್‌ತಿಯಂಡುಂಡ್.

³⁴ಅಂವೊನ ದೇವ ಅಯಿಚತ್, ಆನಗುಂಡ್‌ ದೇಡಡ ತಕ್ಕ್ ಪರಂದಂಡುಂಡ್. ದೇವ ಅಂವೊಂಗ್ ತಾಂಡ ಆತ್ಮತ್‌ನ ಅಳ್‌ಪಕ್ ಕಯ್ಯತಚ್ಚಕ್ ಕೊಡ್‌ತಿತುಂಡ್.

³⁵ಅಪ್ಪನಾನ ದೇವ ತಾಂಡ ಮೋಂವೊನ ಪ್ರೀತಿ ಮಾಡಿತ್, ತಾಂಡ ಮೋಂವೊಂಡ ಕೈಕ್ ಎಲ್ಲಾನ ಒಪ್ಪ್‌ಚಿಟ್ಟತ್.

³⁶ದೇವಡ ಮೋಂವೊನ ನಂಬುವಯಿಂಗಕ್ ನಿತ್ಯ ಜೀವ ಉಂಡ್; ಅಂವೊನ ನಂಬತಯಿಂಗಕ್ ನಿತ್ಯ ಜೀವ ಕ್‍ಟ್ಟುಲೆ. ಅದ್ಂಡ ಬದ್‍ಲ್, ದೇವಡ ನ್ಯಾಯತೀರ್ಪ್ ಪಿಂಞ ಬಲ್ಯ ಚೆಡಿ ಅಯಿಂಗಡ ಮೇಲೆ ಎಕ್ಕಾಲು ಇಪ್ಪಾಂದ್ ಎಣ್ಣ್‌ಚಿ.