Read Kodava ಯೋಹಾನ 4 Bible Online

ಯೋಹಾನ 4 - Kodava bible

ಯೋಹಾನ 4

¹ಯೇಸು ಯೋಹಾನಕಿಂಜ ದುಂಬ ಶಿಷ್ಯಂಗಳ ಮಾಡಿಯಂಡ್, ದೀಕ್ಷಾಸ್ನಾನ ಕೊಡ್‍ತಂಡುಂಡ್‍ೕಂದ್ ಫರಿಸಾಯಂಗಕ್ ಗೊತ್ತಾಚೀಂದ್ ಯೇಸುಕ್ ಗೊತ್ತಾಚಿ.

²(ಯೇಸು ತಾನೆ ದೀಕ್ಷಾಸ್ನಾನ ಕೊಡ್‍ತಿತ್ತ್‌ಲ್ಲೆ, ಆಚೇಂಗಿ ಅಂವೊಂಡ ಶಿಷ್ಯಂಗ ಕೊಡ್‍ತಂಡಿಂಜತ್).

³ಆನಗುಂಡ್, ಯೇಸು ಯೂದಾಯ ಪ್ರಾಂತ್ಯತ್‍ನ ಬುಟ್ಟಿತ್ ಗಲಿಲಾಯ ಪ್ರಾಂತ್ಯಕ್ ಪುನಃ ಪೋಚಿ.

⁴ಅನ್ನನೆ ಪೋಪಕ ಅಯಿಂಗ ಸಮಾರ್ಯ ಪ್ರಾಂತ್ಯತ್‍ರ ಬಟ್ಟೇಲ್ ಪೋಪಕಾಚಿ.

⁵ಅನ್ನನೆ, ಸಮಾರ್ಯತ್‍ಲ್ ಸುಖರ್ ಎಣ್ಣುವ ಪಟ್ಟಣಕ್ ಬಾತ್. ಆ ಜಾಗ, ಯಾಕೋಬ ಅಂವೊಂಡ ಮೋಂವೊ ಯೋಸೇಫಂಗ್ ಕೊಡ್‍ತ ನೆಲವಾಯಿತ್ಂಜತ್.

⁶ಯಾಕೋಬಂಡ ಕಣತರೆ ಅಲ್ಲಿ ಇಂಜತ್; ಯೇಸು ಪ್ರಯಾಣತ್‍ರಗುಂಡ್ ದುಂಬ ತಳ್ಂದ್ ಪೋಯಿತ್ಂಜತ್, ಆನಗುಂಡ್, ಆ ಕಣತರೆರ ಪಕ್ಕ ಅಂವೊ ಅಳ್‌ತತ್. ಅಕ್ಕ ಮಜ್ಜಣ ಪನ್ನೆರಂಡ್ ಗಂಟೆ ಆಯಿತ್ಂಜತ್.

⁷ಆ ಸಮಯತ್‍ಲ್, ಸಮಾರ್ಯ ಪಟ್ಟಣಕ್ ಕೂಡ್‍ನ ಒರ್ ಪೊಣ್ಣಾಳ್, ನೀರ್ ಎಡ್‌ತ ಪೋಪಕಾಯಿತ್ ಅಲ್ಲಿಕ್ ಬಾತ್. ಅವಡ ಪಕ್ಕ ಯೇಸು: ನಾಕ್ ಕುಡಿಪಕ್ ನೀರ್ ತಾಂದ್ ಕ್‍ೕಟತ್.

⁸ಅಂವೊಂಡ ಶಿಷ್ಯಂಗ ಆ ಸಮಯತ್‍ಲ್ ಕೂಳ್ ಎಡ್‌ತ ಬಪ್ಪಕ್ ಊರ್‌ರ ಒಳ್‍ಲ್ ಪೋಯಿತ್ಂಜತ್.

⁹ನಾನ್ ಸಮಾರ್ಯ[8] ಪೊಣ್ಣಾಳ್, ನೀನ್ ಯೆಹೂದ್ಯ ಮನುಷ್ಯ, ಅನ್ನನೆ ಇಪ್ಪಕ, ನೀನ್ ಎನ್ನನೆ ನಾಡ ಪಕ್ಕ ನೀರ್ ತಾಂದ್ ಕ್‍ೕಪಿಯಾಂದ್ ಅವ ಕ್‍ೕಟತ್. ಎನ್ನಂಗೆಣ್ಣ್‌ಚೇಂಗಿ, ಯೆಹೂದ್ಯಂಗ ಸಮಾರ್ಯಂಗಡ ಕೂಡೆ ಏದ್ ವಿಷಯತ್‍ಲು ಸಂಬಂದ ಬೆಪ್ಪುಲೆ.

¹⁰ಅಕ್ಕ ಯೇಸು ಅವಕ್: ದೇವಡ ದಾನ ನೀಕ್ ಗೊತ್ತಾಯಿತ್, ನಾಕ್ ಕುಡಿಪಕ್ ನೀರ್ ತಾಂದ್ ಕ್‍ೕಟಂವೊ ದಾರ್‍ೕಂದ್ ನೀಕ್ ಗೊತ್ತ್‌ಂಜತೇಂಗಿ, ನೀನೇ ಅಂವೊಂಡ ಪಕ್ಕ ಕ್‍ೕಟಿತ್‌ಪ್ಪಿಯ, ಅಂವೊ ನೀಕ್ ಜೀವತ್‍ರ ನೀರ್‌ನ ಕೊಡ್‍ತಿತ್‌ಪ್ಪಾಂದ್ ಎಣ್ಣ್‌ಚಿ.

¹¹ಅದ್ಂಗ್ ಆ ಪೊಣ್ಣಾಳ್: ಒಡೆಯನೇ, ನೀರ್ ಬಲಿಪಕ್ ನೀಡ ಪಕ್ಕ ಒಂದು ಇಲ್ಲೆ, ಕಣತೆರೆಯು ದುಂಬ ಆಳವಾಯಿತ್ ಉಂಡಲ್ಲ, ಪಿಂಞ ಎಲ್ಲಿಂಜ, ನೀಕ್ ಜೀವತ್‍ರ ನೀರ್ ಕ್‍ಟ್ಟುವ?

¹²ಈ ಕಣತರೆನ ನಂಗಕ್ ದಾನಮಾಡ್‍ನ ನಂಗಡ ಮುತ್ತಜ್ಜನಾನ ಯಾಕೋಬಕಿಂಜ ನೀನ್ ಬಲ್ಯಂವೊನಾ? ಅಂವೊ, ಅಂವೊಂಡ ಮಕ್ಕ, ಅಂವೊ ಚಾಕಿಯಂಡ್ ಇಂಜ ಪ್ರಾಣಿಯ ಎಲ್ಲಾ ಇದೇ ಕಣತರೆರ ನೀರ್‌ನ ಕುಡಿಚತ್‍ೕಂದ್ ಎಣ್ಣ್‌ಚಿ.

¹³ಅಕ್ಕ ಯೇಸು: ಈ ನೀರ್‌ನ ಕುಡಿಪಯಿಂಗಕ್ ಪುನಃ ಬಾಯರಿಕೆ ಆಪ.

¹⁴ಆಚೇಂಗಿ, ನಾನ್ ತಪ್ಪ ನೀರ್‌ನ ಕುಡಿಪಯಿಂಗಕ್ ಒರ್‌ಕಾಲು ಬಾಯಾರಿಕೆ ಆಪುಲೆ; ನಾನ್ ಅಯಿಂಗಕ್ ಕೊಡ್‍ಪ ನೀರ್ ಅಯಿಂಗಡ ಹೃದಯತ್‍ಲ್ ನಿತ್ಯ ಜೀವಕಾಯಿತ್ ಉಕ್ಕಿ ಬಂದಂಡಿಪ್ಪ ಜಲವಾಯಿತ್‌ಪ್ಪಾಂದ್ ಎಣ್ಣ್‌ಚಿ.

¹⁵ಅಕ್ಕ ಆ ಪೊಣ್ಣಾಳ್: ಒಡೆಯನೇ, ನಾಕ್ ಬಾಯರಿಕೆ ಆಕತನೆಕೆ, ನೀರ್ ಎಡ್‌ತ ಪೋಪಕ್ ಇಚ್ಚಕ್ ದೂರ ಬರತನೆಕೆ, ಆ ನೀರ್‌ನ ನಾಕ್ ತರಂಡೂಂದ್ ಎಣ್ಣ್‌ಚಿ.

¹⁶ಅಕ್ಕ ಯೇಸು: ನೀಡ ವಡಿಯನ ಇಲ್ಲಿಕ್ ಕಾಕಿಯಂಡ್ ಬಾಂದ್ ಎಣ್ಣ್‌ಚಿ.

¹⁷ಅದ್ಂಗ್ ಅವ: ನಾಕ್ ವಡಿಯ ಇಲ್ಲೇಂದ್ ಎಣ್ಣ್‌ಚಿ. ಅಕ್ಕ ಯೇಸು: ನೀಕ್ ವಡಿಯ ಇಲ್ಲೇಂದ್ ನಾಡ ಪಕ್ಕ ಎಣ್ಣ್‌ನದ್ ನೇರೇ.

¹⁸ಎನ್ನಂಗೆಣ್ಣ್‌ಚೇಂಗಿ, ನೀಕ್ ಅಂಜ್ ವಡಿಯಂಗ ಇಂಜತ್, ಆಚೇಂಗಿ ಇಕ್ಕ ನೀಡ ಕೂಡೆ ಉಳ್ಳಂವೊ ನೀಡ ವಡಿಯನಲ್ಲ, ನೀನ್ ಇಕ್ಕ ಸರಿಯಾಯಿತ್ ಎಣ್ಣಿಯಾಂದ್ ಎಣ್ಣ್‌ಚಿ.

¹⁹ಒಡೆಯನೇ, ನೀನ್ ಒರ್ ಪ್ರವಾದೀಂದ್ ನಾಕ್ ಗೊತ್ತಾಯಂಡುಂಡ್‍ೕಂದ್ ಆ ಪೊಣ್ಣಾಳ್ ಎಣ್ಣ್‌ಚಿ.

²⁰ನಂಗಡ ಮುತ್ತಜ್ಜಂಗ ಇಲ್ಲಿ ಈ ಕುಂದ್‍ಲ್ ದೇವನ ಆರಾದನೆ ಮಾಡಿಯಂಡಿಂಜತ್. ಆಚೇಂಗಿ, ಯೆಹೂದ್ಯಂಗಳಾನ ನಿಂಗ ದೇವನ ಆರಾದನೆ ಮಾಡ್‌ವಕ್ ಯೆರೂಸಲೇಮ್ ಮಾತ್ರ ಸರಿಯಾನ ಜಾಗಾಂದ್ ಎಣ್ಣ್‌ವಿರಲ್ಲಾಂದ್ ಎಣ್ಣ್‌ಚಿ.

²¹ಅಕ್ಕ ಯೇಸು: ಅವ್ವ, ನಾಡ ತಕ್ಕ್‌ನ ನೀನ್ ನಂಬ್. ನಿಂಗ ದೇವನ ಆರಾದನೆ ಮಾಡ್‌ವಕ್ ಈ ಕುಂದ್‌ಕ್ ಪೋಪದ್ ಬೋಂಡ, ಯೆರೂಸಲೇಮ್‌ಕ್ ಪೋಪದು ಬೋಂಡ. ಆಚೇಂಗಿ ಅಪ್ಪನಾನ ದೇವನ ಎಲ್ಲಾ ಜಾಗತ್‍ಲು ಆರಾದನೆ ಮಾಡ್‌ವ ಕಾಲ ಬಂದಂಡುಂಡ್.

²²ಸಮಾರ್ಯ ಜನಳಾನ ನಿಂಗ ಗೊತ್ತಿಲ್ಲತದ್‍ನ ಆರಾದನೆ ಮಾಡ್‌ವಿರ; ಯೆಹೂದ್ಯಂಗಳಾನ ನಂಗ ಗೊತ್ತುಳ್ಳದ್‍ನ ಆರಾದನೆ ಮಾಡಿಯಂಡುಂಡ್. ಎನ್ನಂಗೆಣ್ಣ್‌ಚೇಂಗಿ, ದೇವಡ ರಕ್ಷಣೆ ಯೆಹೂದ್ಯಂಗಡ ಮೂಲಕ ಬಪ್ಪ.

²³ನೇರಾಯಿತ್ ಆರಾದನೆ ಮಾಡ್‌ವಯಿಂಗ, ಅಪ್ಪನಾನ ದೇವನ ಆತ್ಮತ್‍ಲು ಸತ್ಯತ್‍ಲು ಆರಾದನೆ ಮಾಡ್‌ವ ಕಾಲ ಬಪ್ಪ, ಅದ್ ಇಕ್ಕಲೆ ಬಂದ್‌ರ್‌ತ್. ಅನ್ನನೆ ಆರಾದನೆ ಮಾಡ್‌ವಯಿಂಗಳ ದೇವ ತ್‍ೕಡಿಯಂಡುಂಡ್.

²⁴ದೇವ ಆತ್ಮವಾಯಿತುಂಡ್, ಅಂವೊನ ಆರಾದನೆ ಮಾಡ್‌ವಯಿಂಗ ಅಂವೊನ ಆತ್ಮತ್‍ಲು ಸತ್ಯತ್‍ಲು ಆರಾದನೆ ಮಾಡಂಡೂಂದ್ ಎಣ್ಣ್‌ಚಿ.

²⁵ಪಿಂಞ ಆ ಪೊಣ್ಣಾಳ್: ಕ್ರಿಸ್ತ ಎಣ್ಣುವ ಮೆಸ್ಸಿಯ ಬಪ್ಪಾಂದ್ ನಾಕ್ ಗೊತ್ತುಂಡ್. ಅಂವೊ ಬಪ್ಪಕ, ನಂಗಕ್ ಎಲ್ಲಾನ ಪಡಿಪ್‍ಚಿಡುವಾಂದ್ ಎಣ್ಣ್‌ಚಿ.

²⁶ಅವಕ್ ಯೇಸು: ನೀಡ ಕೂಡೆ ತಕ್ಕ್ ಪರ್ಂದಂಡುಳ್ಳ ನಾನೇ ಅಂವೋಂದ್ ಎಣ್ಣ್‌ಚಿ.

²⁷ಆ ಸಮಯತ್‍ಲ್ ಯೇಸುರ ಶಿಷ್ಯಂಗ ಬಾತ್. ಯೇಸು ಒರ್ ಪೊಣ್ಣಾಳ್‍ರ ಕೂಡೆ ತಕ್ಕ್ ಪರ್‌ದಂಡ್ ಉಳ್ಳದ್‍ನ ಕಂಡಿತ್ ಆಶ್ಚರ್ಯ ಪಟ್ಟತ್. ಆಚೇಂಗಿಯು, ದಾರೂ ಅಂವೊಂಡ ಪಕ್ಕ, ನೀಕ್ ಎಂತ ಬೋಂಡೂಂದ್, ಎನ್ನಂಗ್ ಒರ್ ಪೊಣ್ಣಾಳ್‍ರ ಕೂಡೆ ತಕ್ಕ್ ಪರ್‌ದಂಡ್ ಉಳ್ಳಿಯಾಂದು ಕ್‍ೕಟಿತ್‌ಲ್ಲೆ.

²⁸ಅಕ್ಕ ಆ ಪೊಣ್ಣಾಲ್, ಅವಡ ಕುಡಿಕೆನ ಅಲ್ಲೇ ಬುಟ್ಟಿತ್ ಊರ್‌ರ ಒಳ್‍ಕ್ ಓಡಿ ಪೋಯಿತ್, ಅಲ್ಲಿಯತ್‍ರ ಜನಳ ನೋಟಿತ್:

²⁹ಬಾರಿ, ಇಲ್ಲಿಕತ್ತನೆ ನಾನ್ ಮಾಡ್‌ನದ್‍ನೆಲ್ಲಾ ಒಬ್ಬ ನಾಕ್ ಎಣ್ಣ್‌ಚಿ. ನಿಂಗೆಲ್ಲಾರು ಬಂದಿತ್ ನೋಟಿ. ಇಂವೊ ಕ್ರಿಸ್ತನಾಯೀತಿಕ್ಕುವೋಂದ್ ಎಣ್ಣ್‌ಚಿ.

³⁰ಅಕ್ಕ ಉರ್‍ೕಂಜ ಜನ ಎಲ್ಲಾರು ಯೇಸುನ ನೋಟ್‍ವಕ್ ಬಾತ್.

³¹ಇದ್ಂಡ ಮದ್ಯತ್‍ಲ್, ಅಂವೊಂಡ ಶಿಷ್ಯಂಗ: ಉಪಾದ್ಯನೇ, ನೀನ್ ಉಣ್ಣ್‌ಂದ್ ಅಂವೊನ ಬೋಡಿಯಂಡತ್.

³²ಆಚೇಂಗಿ ಯೇಸು: ನಾನ್ ತಿಂಬಕ್, ನಿಂಗಕ್ ಗೊತ್ತಿಲ್ಲತ ಆಹಾರ ನಾಡ ಪಕ್ಕ ಉಂಡ್‍ೕಂದ್ ಎಣ್ಣ್‌ಚಿ.

³³ಅಕ್ಕ, ಅಂವೊಂಡ ಶಿಷ್ಯಂಗ ಒಬ್ಬನ ಒಬ್ಬ ನೋಟಿತ್: ಇಂವೊಂಗ್ ದಾರೇಂಗಿ ಉಂಬಕ್ ಕೂಳ್ ಎಡ್‌ತ ಬಂತ್ ಕೊಡ್‌ತತಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

³⁴ಅಯಿಂಗಕ್ ಯೇಸು: ನನ್ನ ಅಯಿಚಂವೊಂಡ ಚಿತ್ತತ್‍ರನೆಕೆ ಮಾಡಿತ್, ಅಂವೊಂಡ ಕ್ರಿಯೇನ ನೆರೆವೇರಿಚಿಡುವದೇ ನಾಡ ಆಹಾರಾಂದ್ ಎಣ್ಣ್‌ಚಿ.

³⁵ಕೊಯ್ಯುವ ಸಮಯ ಇಂಞು ನಾಲ್ ತಿಂಗತ್‌ಲ್ ಬಪ್ಪಾಂದ್ ನಿಂಗ ಎಣ್ಣುವಿರಲ್ಲ? ಆಚೇಂಗಿ ಇಕ್ಕಲೆ ಬೇಲ್‌ಲ್ ಬೊಳೆ ಕೊಯ್ಯುವಕ್ ತಯಾರಾಯಿತುಂಡ್‍ೕಂದ್ ಉಳ್ಳಾನ ಚಾಯಿತೆ ನೋಟೀಂದ್ ನಾನ್ ನಿಂಗಕ್ ಎಣ್ಣ್‌ವಿ.

³⁶ಕೊಯ್ಯುವಂವೊ ಇಕ್ಕಲೆ ಅಂವೊಂಡ ಕೂಲಿನ ಎಡ್‍ತಂಡ್ ನಿತ್ಯ ಜೀವಕಾಯಿತ್ ಬೊಳೆನ ಇಕ್ಕಲೆ ಕೂಟ್‌ವ; ಅನ್ನನೆ ಕುರು ಬಿತ್ತ್‌ವಂವೊನು ಬೊಳೆನ ಕೊಯ್ಯುವಂವೊನು ಒಂದಾಯಿತ್ ಕುಶಿ ಪಡುವ.

³⁷ಒಬ್ಬ ಕುರು ಬಿತ್ತುವ, ಇಂಞೊಬ್ಬ ಬೊಳೆನ ಕೊಯ್ಯುವಾಂದ್ ಉಳ್ಳದ್ ಸತ್ಯವಾನ ಸಂಗತಿ.

³⁸ನಿಂಗ ಕಷ್ಟಪಟ್ಟಿತ್ ಕೆಲಸ ಮಾಡತೆ, ಬೊಳೆನ ಕೊಯ್ಯುವಕ್ ನಾನ್ ನಿಂಗಳ ಅಯಿಚಿಯೆ, ಬೋರೆಯಿಂಗ ಕೆಲಸ ಮಾಡ್‍ಚಿ, ಅಯಿಂಗಡ ಕೆಲಸತ್‌ರ ಫಲ ನಿಂಗಕ್ ಕ್‍ಟ್ಟ್‌ಚಿ.

³⁹ನಾನ್ ಇಲ್ಲಿಕತ್ತನೆ ಮಾಡ್‌ನದ್‍ನೆಲ್ಲಾ ಅಂವೊ ಎಣ್ಣ್‌ಚೀಂದ್ ಆ ಪೊಣ್ಣಾಳ್ ಎಣ್ಣ್‌ನಗುಂಡ್ ಸಮಾರ್ಯ ಪಟ್ಟಣತ್‍ರ ದುಂಬ ಜನ ಯೇಸುನ ನಂಬ್‍ಚಿ.

⁴⁰ಆನಗುಂಡ್, ಸಮಾರ್ಯ ಪಟ್ಟಣತ್‍ರ ಜನ, ಯೇಸುರ ಪಕ್ಕ ಬಂದಿತ್, ನಂಗಡ ಕೂಡೆ ಇಕ್ಕಂಡೂಂದ್ ಬೋಡಿಯಂಡತ್, ಅಕ್ಕ ಯೇಸು ಅಲ್ಲಿ ದಂಡ್ ದಿನ ಒಳಿಂಜತ್.

⁴¹ಅಲ್ಲಿ ಅಂವೊ ಇಪ್ಪಕ, ಅಂವೊ ಮಾಡ್‍ನ ಬೋದನೆರ ಮೂಲಕ ಇಂಞು ದುಂಬ ಜನ ನಂಬಿಕೆ ಬೆಚ್ಚತ್.

⁴²ಅಯಿಂಗ ಆ ಪೊಣ್ಣಾಳ್‌ಕ್, ಇಕ್ಕ ನಂಗ ನೀಡ ತಕ್ಕ್‌ನ ಕ್‍ೕಟಿತ್ ಇಂವೊನ ನಂಬಿತ್‌ಲ್ಲೆ, ನಂಗಳೇ ಅಂವೊಂಡ ತಕ್ಕ್‌ನ ಕ್‍ೕಟಿತ್, ನೇರಾಯಿತು ಇಂವೊನೇ ಈ ಲೋಕತ್‍ನ ಕಾಪಾಡ್‌ವ ರಕ್ಷಕನಾನ ಕ್ರಿಸ್ತಾಂದ್ ಗೊತ್ತಾನಗುಂಡ್ ನಂಬುವಾಂದ್ ಎಣ್ಣ್‌ಚಿ.

⁴³ದಂಡ್ ದಿವಸ ಕಯಿಂಜ ಪಿಂಞ ಯೇಸು ಅಲ್ಲಿಂಜ ಗಲಿಲಾಯಕ್ ಪೋಚಿ.

⁴⁴ಏದ್ ಪ್ರವಾದಿಕು, ಅಂವೊಂಡ ಸ್ವಂತ ಊರ್‌ಲ್ ಮರ್ಯಾದೆ ಕ್‍ಟ್ಟ್‌ಲೇಂದ್ ಯೇಸು ಮಿಂಞಲೇ ಎಣ್ಣಿತ್ಂಜತ್.

⁴⁵ಅಂವೊ ಗಲಿಲಾಯಕ್ ಬಪ್ಪಕ, ಯೆರೂಸಲೇಮ್ ನಮ್ಮೆಲ್ ಅಂವೊ ಮಾಡ್‍ನ ಎಲ್ಲಾ ಕಾರ್ಯತ್‍ನ ನೋಟಿತ್ಂಜ, ಗಲಿಲಾಯತ್‍ರ ಜನ ಅಂವೊನ ಚಾಯಿತೆ ಸ್ವೀಕಾರ ಮಾಡ್‍ಚಿ. ಅಯಿಂಗಳು ನಮ್ಮೆಕ್ ಪೋಯಿತ್ಂಜತ್.

⁴⁶ಪಿಂಞ ಯೇಸು ನೀರ್‌ನ ದ್ರಾಕ್ಷಿ ರಸವಾಯಿತ್ ಬದ್‍ಲ್ ಮಾಡ್‍ನ ಗಲಿಲಾಯತ್‍ಲ್ ಉಳ್ಳ ಕಾನಾ ಊರ್‌ಕ್ ಪುನಃ ಬಾತ್. ಅಕ್ಕ ಕಪೆರ್ನೌಮ್ ಪಟ್ಟಣತ್‍ಲ್ ಉಳ್ಳ ರಾಜಂಡ ಒರ್ ಬಲ್ಯ ಅದಿಕಾರಿಯಡ ಮೋಂವೊ ಕಾಯಿಲೆಲ್ ಇಂಜತ್.

⁴⁷ಯೇಸು ಯೂದಾಯ ಪ್ರಾಂತ್ಯತ್ಂಜ ಗಲಿಲಾಯಕ್ ಬಾತ್‍ೕಂದ್ ಕ್‍ೕಟಿತ್, ಅಂವೊ, ಯೇಸುರ ಪಕ್ಕ ಬಂದಿತ್, ಚಾವನೆಕೆ ಉಳ್ಳ ನಾಡ ಮೋಂವೊನ ನೀನ್ ಬಂದಿತ್ ವಾಸಿ ಮಾಡಂಡೂಂದ್ ಕ್‍ೕಟಂಡತ್.

⁴⁸ಅಕ್ಕ ಯೇಸು: ನಿಂಗ ಗುರ್‌ತ್ ಪಿಂಞ ಆಶ್ಚರ್ಯ ಕಾರ್ಯತ್‍ನ ಕಾಂಗತೆ ಪೋಚೇಂಗಿ ನಿಂಗ ದಾರೂ ನನ್ನ ನಂಬುಲೇಂದ್ ಎಣ್ಣ್‌ಚಿ.

⁴⁹ಒಡೆಯನೇ, ನಾಡ ಕುಂಞಿ ಚಾವಕ್ ಮಿಂಞ ನಾಡ ಕೂಡೆ ಬಾಂದ್ ಆ ಅದಿಕಾರಿ ದುಂಬ ಬೋಡಿಯಂಡತ್.

⁵⁰ಅದ್ಂಗ್ ಯೇಸು: ನೀನ್ ಪೋ, ನೀಡ ಮೋಂವೊ ಬದ್‌ಕ್‌ವಾಂದ್ ಎಣ್ಣ್‌ಚಿ. ಆ ಮನುಷ್ಯ ಯೇಸು ಎಣ್ಣ್‌ನದ್‍ನ ಅನ್ನನೆ ನಂಬಿತ್, ವಾಪಸ್ ಪೋಚಿ.

⁵¹ಅಂವೊ ಪೋಯಂಡ್ ಇಪ್ಪಕ, ಅಂವೊಂಡ ಆಳ್‍ವ ಅಂವೊನ ಕಂಡಿತ್: ನೀಡ ಮೋಂವೊ ಬದ್‌ಕ್‍ಚೀಂದ್ ಎಣ್ಣ್‌ಚಿ.

⁵²ಏದ್ ಸಮಯತ್‍ಲ್ ಕುಂಞಿ ಚಾಯಾಚೀಂದ್ ಅಯಿಂಗಳ ಕ್‍ೕಟತ್. ಅದ್ಂಗ್ ಅಯಿಂಗ: ನಿನ್ನಾಂದ್ ಒರ್ ಗಂಟೆಕ್ ಪನಿ ಬುಟ್ಟತ್‍ೕಂದ್ ಎಣ್ಣ್‌ಚಿ.

⁵³ಅಕ್ಕ, ನೀಡ ಮೋಂವೊ ಚಾಯಾಪಾಂದ್ ಯೇಸು ಎಣ್ಣ್‌ನದ್ ಅದೇ ಸಮಯವಾಯಿತ್ಂಜತ್‍ೕಂದ್ ಗೊತ್ತಾಯಿತ್ ಅಂವೊನು ಪಿಂಞ ಅಂವೊಂಡ ಮನೆಕಾರಂಗಳು ಯೇಸುನ ನಂಬ್‍ಚಿ.

⁵⁴ಯೂದಾಯತ್ಂಜ ಗಲಿಲಾಯಕ್ ಬಂದ ಪಿಂಞ ಇದ್ ಯೇಸು ಮಾಡ್‍ನ ದಂಡನೆ ಅದ್ಬುತ ಕಾರ್ಯವಾಯಿತ್ಂಜತ್.