Read Kodava ಯೋಹಾನ 5 Bible Online

ಯೋಹಾನ 5 - Kodava bible

ಯೋಹಾನ 5

¹ಇದಾನ ಪಿಂಞ ಯೆಹೂದ್ಯಂಗಡ ಒರ್ ನಮ್ಮೆ ಬಪ್ಪಕ, ಯೇಸು ಯೆರೂಸಲೇಮ್‌ಕ್ ಪೋಚಿ.

²ಪಟ್ಟಣತ್‍ರ ಒಳ್‍ಲ್, ಕೊರಿಯಡ ಪಡಿ ಎಣ್ಣುವ ಒರ್ ಪಡಿ ಉಂಡ್. ಅದ್ಂಡ ಪಕ್ಕತ್‍ಲ್ ಅರಾಮಿಯ ತಕ್ಕ್‌ಲ್ ಬೇತ್ಸಥಾಂದ್ ಕಾಕ್‌ವಕಿಂಜ ಒರ್ ಗುಂಡಿ ಇಂಜತ್. ಅದ್ಂಡ ಸುತ್ತ್‌ಲ್ ಅಂಜ್ ಅಟ್ಟ ಇಂಜತ್.

³ಈ ಅಟ್ಟತ್‍ರ ಅಡಿಲ್, ಕುರ್‌ಡಂಗ, ಕುಂಟಂಗ, ಪಾರ್ಶ್ವವಾಯು ಕಾಯಿಲೆಲ್ ಉಳ್ಳಯಿಂಗಾಂದ್ ದುಂಬ ಕಾಯಿಲೆ ಉಳ್ಳಯಿಂಗ ಬುದ್ದಂಡ್ ನೀರ್ ಎಕ್ಕ ಕಲ್‌ಂಗ್‌ವಾಂದ್ ಪಾರಕಾತಂಡಿಪ್ಪ.

⁴ಓರೊಮ್ಮ, ದೇವದೂತ ಒಬ್ಬ ಬಂದಿತ್, ಆ ಗುಂಡಿಲ್ ಇಳಿಂಜಿತ್, ನೀರ್‌ನ ಕಲಕುವ; ಅನ್ನನೆ ನೀರ್ ಕಲ್‌ಂಗ್‍ನ ಪಿಂಞ, ದಾರ್ ಆದ್ಯವಾಯಿತ್ ಇಳಿಯುವ, ಅಯಿಂಗಕ್ ಏದ್ ತರ ಕಾಯಿಲೆ ಇಂಜತೇಂಗಿಯು ಅದ್ ವಾಸಿ ಆಪಕಿಂಜತ್[9].

⁵ನುಪ್ಪತೆಟ್ಟ್ ಕಾಲ ಕಾಯಿಲೆಲ್ ಇಂಜ ಒಬ್ಬ ಅಲ್ಲಿ ಇಂಜತ್.

⁶ಆ ಮನುಷ್ಯನ ಯೇಸು ಕಾಂಬಕ: ಅಂವೊ, ದುಂಬ ಕಾಲ ಕಾಯಿಲೆಲ್ ನರಳಿಯಂಡ್ ಉಂಡ್‍ೕಂದ್ ಗೊತ್ತಾಚಿ. ಯೇಸು ಅಂವೊನ ನೋಟಿತ್: ನೀಕ್ ನೀಡ ಕಾಯಿಲೆ ವಾಸಿ ಆಂಡುವಾಂದ್ ಕ್‍ೕಟತ್.

⁷ಆ ಕಾಯಿಲೆಕಾರ ಯೇಸುಕ್: ಎಜಮಾನನೇ, ನೀರ್ ಕಲಂಗುವಕ, ನನ್ನ ಗುಂಡಿಲ್ ಕೊಂಡ್ ಪೋಪಕ್ ದಾರೂ ಇಲ್ಲೆ. ನಾನ್ ಅಲ್ಲಿ ಪೋಪಕ್ ಮಿಂಞ ಇಂಞೊಬ್ಬ ಬಂತ್ ಇಳಿಂಜಿರುವಾಂದ್ ಎಣ್ಣ್‌ಚಿ.

⁸ಅಕ್ಕ ಯೇಸು ಅಂವೊನ ನೋಟಿತ್: ಏಳ್, ನೀಡ ಪಲಂಬ್‌ನ ಎಡ್‍ತಂಡ್ ನಡೇಂದ್ ಎಣ್ಣ್‌ಚಿ.

⁹ಅಕ್ಕಲೆ ಅಂವೊ ವಾಸಿಯಾಯಿತ್, ಅಂವೊಂಡ ಪಲಂಬ್‌ನ ಎಡ್‍ತಂಡ್ ನಡ್‍ಪಕ್ ಸುರು ಮಾಡ್‍ಚಿ. ಆ ದಿವಸ ಸಬ್ಬತ್ ದಿವಸವಾಯಿತ್ಂಜತ್.

¹⁰ಆನಗುಂಡ್, ಯೆಹೂದ್ಯ ಅದಿಕಾರಿಯಂಗ: ಇಂದ್ ಸಬ್ಬತ್ ದಿನ, ನೀಡ ಪಲಂಬ್‌ನ ಎಡ್‍ತಂಡ್ ಪೋಪ ಕೆಲಸತ್‍ನ ಮಾಡ್‌ವಕ್ ನಂಗಡ ನ್ಯಾಯಪ್ರಮಾಣ ಅನುಮತಿ ತಂದಿತ್‌ಲ್ಲೇಂದ್ ವಾಸಿಯಾನ ಮನುಷ್ಯಂಗ್ ಎಣ್ಣ್‌ಚಿ.

¹¹ಆಚೇಂಗಿ ಆ ಮನುಷ್ಯ ಅಯಿಂಗಕ್: ನನ್ನ ವಾಸಿ ಮಾಡ್‍ನಂವೊ ನೀಡ ಪಲಂಬ್‌ನ ಎಡ್‍ತಂಡ್ ನಡೇಂದ್ ಎಣ್ಣ್‌ಚೀಂದ್ ಎಣ್ಣ್‌ಚಿ.

¹²ಅದ್ಂಗ್ ಅಯಿಂಗ: ನೀಡ ಪಲಂಬ್‌ನ ಎಡ್‍ತಂಡ್ ನಡೇಂದ್ ನೀಕ್ ಎಣ್ಣ್‌ನ ಮನುಷ್ಯ ದಾರ್‍ೕಂದ್ ಕ್‍ೕಪಕ,

¹³ವಾಸಿ ಆನ ಮನುಷ್ಯಂಗ್ ಯೇಸು ದಾರ್‍ೕಂದ್ ಗೊತ್ತ್‌ಂಜಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ, ಆ ಜಾಗತ್‍ಲ್ ಜನಡ ಗುಂಪ್ ದುಂಬ ಇಂಜಗುಂಡ್, ಯೇಸು ಅಲ್ಲಿಂಜ ದೂರ ಪೋಯಿತ್ಂಜತ್.

¹⁴ಚೆನ್ನ ಸಮಯ ಕಯಿಂಜ ಪಿಂಞ, ಯೇಸು ಆ ಮನುಷ್ಯನ ದೇವಾಲಯತ್‍ಲ್ ಕಂಡತ್: ನೋಟ್, ನೀನ್ ಇಕ್ಕ ವಾಸಿ ಆಯಿತುಳ್ಳಿಯ, ಇಂಞು ನೀನ್ ಪಾಪ ಮಾಡತನೆಕೆ ಇರ್, ಇಲ್ಲತಪೋಚೇಂಗಿ ಇದ್‌ಂಗಿಂಜ ಬಲ್ಯ ಕಾಯಿಲೆ ನೀಕ್ ಬಪ್ಪಾಂದ್ ಯೇಸು ಎಣ್ಣ್‌ಚಿ.

¹⁵ಅಕ್ಕ, ವಾಸಿಯಾನ ಆ ಮನುಷ್ಯ ಯೆಹೂದ್ಯಂಗಡ ಅದಿಕಾರಿಯಂಗಕ್ ಪೋಯಿತ್, ನನ್ನ ವಾಸಿ ಮಾಡ್‍ನಂವೊ ಯೇಸೂಂದ್ ಎಣ್ಣ್‌ಚಿ.

¹⁶ಯೇಸು ಸಬ್ಬತ್ ದಿವಸತ್‍ಲ್ ಇನ್ನನೆ ಮಾಡ್‍ನಗುಂಡ್, ಅಂವೊನ ಹಿಂಸೆಪಡ್‍ತ್‌ವಕ್ ಸುರು ಮಾಡಿತ್, ಅಂವೊನ ಕೊಲ್ಲಂಡೂಂದ್ ಯೆಹೂದ್ಯ ಅದಿಕಾರಿಯಂಗ ನೋಟಿಯಂಡಿಂಜತ್.

¹⁷ಯೇಸು ಅಯಿಂಗಕ್: ನಾಡ ಅಪ್ಪ ಇಲ್ಲಿಕತ್ತನೆ ಕ್ರಿಯೆ ಮಾಡಿಯಂಡುಂಡ್, ಅದ್ಂಗಾಯಿತ್ ನಾನ್ ಸಹ ಕ್ರಿಯೆ ಮಾಡಿಯಂಡ್ ಉಳ್ಳ್‌ಂದ್ ಎಣ್ಣ್‌ಚಿ.

¹⁸ಯೇಸು ಸಬ್ಬತ್ ದಿವಸತ್‍ಲ್ ಮಾಡ್‌ವಕಯ್ಯತದ್‍ನ ಮಾಡ್‍ನದ್ ಅಲ್ಲತೆ, ದೇವನ ತಾಂಡ ಸ್ವಂತ ಅಪ್ಪಾಂದ್ ಕಾಕಿತ್, ಅಂವೊನ ದೇವಕ್ ಸಮವಾಯಿತ್ ಮಾಡ್‍ನಗುಂಡ್, ಯೆಹೂದ್ಯ ಅದಿಕಾರಿಯಂಗ ಅಂವೊನ ಕೊಲ್ಲಂಡೂಂದ್ ಇಂಞು ದುಂಬ ಆಲೋಚನೆ ಮಾಡಿಯಂಡಿಂಜತ್.

¹⁹ಅಕ್ಕ ಯೇಸು ಅಯಿಂಗಕ್ ಇನ್ನನೆ ವಿವರಿಚಿಟ್ಟತ್: ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ, ಅಪ್ಪನಾನ ದೇವ ಮಾಡ್‌ವಾನ ಕಾಂಬದ್‍ನ ಬುಟ್ಟಿತ್, ಮೋಂವೊ ಬೋರೆ ಏದು ತಾಂಡ ಸ್ವಂತವಾಯಿತ್ ಮಾಡುಲೆ. ಎನ್ನಂಗೆಣ್ಣ್‌ಚೇಂಗಿ, ಅಪ್ಪನಾನ ದೇವ ಎಂತ ಮಾಡ್‌ವೋ, ಅದ್‍ನ ಮೋಂವೊನು ಅನ್ನನೆ ಮಾಡ್‌ವ.

²⁰ಅಪ್ಪ ಮೋಂವೊನ ದುಂಬ ಪ್ರೀತಿ ಮಾಡಿತ್, ಅಂವೊ ಮಾಡ್‌ವಾನೆಲ್ಲಾ ಮೋಂವೊಂಗ್ ಕಾಟಿ ಕೊಡ್‍ಪ; ನಿಂಗ ಆಶ್ಚರ್ಯ ಪಡುವನೆಕೆ ಇದ್‌ಂಗಿಂಜ ಬಲ್ಯ ಬಲ್ಯ ಕಾರ್ಯತ್‍ನ ಮೋಂವೊಂಗ್ ಕಾಟಿತಪ್ಪ.

²¹ಅಪ್ಪ, ಚತ್ತ್ ಪೋನಯಿಂಗಳ ಜೀವವಾಯಿತ್ ಎಪ್ಪಿತ್ ಬದ್‍ಕ್‍ಚಿಡ್‌ವನೆಕೆ, ಮೋಂವೊನು ಸಹ ಅಂವೊಂಗ್ ಕುಶಿಯುಳ್ಳಯಿಂಗಳ ಜೀವವಾಯಿತ್ ಎಪ್ಪಿತ್ ಬದ್‍ಕ್‍ಚಿಡ್‌ವ.

²²ಇದ್‍ಲ್ಲತೆ, ಅಪ್ಪನ ಗನಪಡುತ್‌ವನೆಕೆ ಎಲ್ಲಾರು ಮೋಂವೊನ ಸಹ ಗನಪಡುತಂಡೂಂದ್, ಅಪ್ಪ ದಾರ್‌ನು ತೀರ್ಪ್ ಮಾಡತೆ, ತೀರ್ಪ್ ಮಾಡ್‌ವಕುಳ್ಳ ಪೂರ್ತಿ ಅದಿಕಾರತ್‍ನ ಮೋಂವೊಂಗ್ ಕೊಡ್‌ತಿತುಂಡ್.

²³ಮೋಂವೊನ ಗನ ಪಡ್‍ತತಯಿಂಗ, ಅಂವೊನ ಅಯಿಚ ಅಪ್ಪನ ಸಹ ಗನ ಪಡ್‍ತತಯಿಂಗಳಾಯಿತುಂಡ್.

²⁴ದಾರ್ ನಾಡ ತಕ್ಕ್‌ನ ಕ್‍ೕಟಿತ್, ನನ್ನ ಅಯಿಚಂವೊನ ನಂಬುವ, ಅಯಿಂಗಕ್ ನಿತ್ಯ ಜೀವ ಉಂಡ್, ಅಯಿಂಗಕ್ ಕ್‍ಟ್ಟುವ ಶಿಕ್ಷೇರ ತೀರ್ಪ್‌ಯಿಂಜ ಅಯಿಂಗ ಬಚಾವ್ ಆಪ. ಅನ್ನನೆ ಅಯಿಂಗಕ್ ಬಪ್ಪ ಚಾವ್‍ಯಿಂಜಲು, ಬದ್‌ಕಿತ್ ಜೀವವಾಯಿತ್ ಬಪ್ಪಾಂದ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣ್‌ವಿ.

²⁵ಚತ್ತಯಿಂಗ ದೇವಡ ಮೋಂವೊಂಡ ಸ್ವರ ಕ್‍ೕಪ ಕಾಲ ಬಪ್ಪ, ಆ ಸಮಯ ಇಕ್ಕಲೆ ಬಂದಿತುಂಡ್. ಸ್ವರತ್‍ನ ಕ್‍ೕಪಯಿಂಗ ಜೀವವಾಯಿತ್ ಬಪ್ಪಾಂದ್ ನೇರಾಯಿತು ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

²⁶ಎನ್ನಂಗೆಣ್ಣ್‌ಚೇಂಗಿ, ಅಪ್ಪಂಗ್ ಎನ್ನನೆ ಸ್ವಂತವಾಯಿತ್ ಜೀವ ಉಂಡೋ, ಅನ್ನನೆ ಮೋಂವೊಂಗ್ ಸಹ ಸ್ವಂತವಾಯಿತ್ ಜೀವ ಉಳ್ಳನೆಕೆ ಅಂವೊ ಮಾಡಿರ್‌ತ್.

²⁷ಅಂವೊ ಮನುಷ್ಯಕುಮಾರನಾಯಿತ್ ಉಳ್ಳಗುಂಡ್, ನ್ಯಾಯತೀರ್ಪ್ ಮಾಡ್‌ವ ಅದಿಕಾರತ್‍ನ ಸಹ ದೇವ ಕೊಡ್‌ತಿತುಂಡ್.

²⁸ಇದ್ಂಗ್ ಆಶ್ಚರ್ಯ ಪಡಂಡ; ಎನ್ನಂಗೆಣ್ಣ್‌ಚೇಂಗಿ, ಚತ್ತಿತ್ ತೂಟ್‌ಂಗಳತ್‌ಲ್ ಉಳ್ಳಯಿಂಗ ಎಲ್ಲಾರು ಮೋಂವೊಂಡ ಸ್ವರತ್‍ನ ಕ್‍ೕಪ ಕಾಲ ಬಪ್ಪ.

²⁹ಅಕ್ಕ, ನಲ್ಲದ್ ಮಾಡ್‍ನಯಿಂಗ ಎದ್ದಿತ್ ನಿತ್ಯ ಜೀವತ್‍ನ ಪಡೆಯುವಕಾಯಿತು, ಕೆಟ್ಟದ್ ಮಾಡ್‍ನಯಿಂಗ ಶಿಕ್ಷೇರ ತೀರ್ಪ್‍ಕಾಯಿತು ಎದ್ದಿತ್ ಬಪ್ಪ.

³⁰ನಾನ್ ನಾನಾಯಿತೇ ಒಂದು ಮಾಡುಲೆ. ದೇವ ಎಣ್ಣುವನೆಕೆ ನಾನ್ ತೀರ್ಪ್ ಮಾಡ್‌ವಿ. ನಾನ್ ನಾಡ ಇಷ್ಟತ್‍ರ ಪ್ರಕಾರ ಮಾಡ್‌ವಕ್ ಕುಶಿ ಪಡತೆ, ನನ್ನ ಅಯಿಚಂವೊಂಡ ಚಿತ್ತತ್‍ರನೆಕೆ ಮಾಡ್‌ವಕ್ ಕುಶಿಪಟ್ಟಿತ್ ಮಾಡ್‌ವಗುಂಡ್ ನಾಡ ತೀರ್ಪ್ ನೀತಿವಂತದಾಯಿತುಂಡ್.

³¹ನಾಡ ವಿಷಯತ್‍ಲ್ ನಾನೇ ಸಾಕ್ಷಿ ಕೊಡ್‍ತತೇಂಗಿ ಅದ್ ಸತ್ಯ ಆಪುಲೆ.

³²ನಾಡ ವಿಷಯತ್‍ಲ್ ಬೋರೆ ಒಬ್ಬ ಸಾಕ್ಷಿ ತಪ್ಪ, ಅಂವೊ ನಾಡ ವಿಷಯತ್ ತಪ್ಪ ಸಾಕ್ಷಿ ಸತ್ಯಾಂದ್ ನಾಕ್ ಗೊತ್ತುಂಡ್.

³³ನಿಂಗ ಯೋಹಾನಂಡ ಪಕ್ಕ ಆಳ್‍ವಳ ಅಯಿಚಿರ; ಅಂವೊ ನಾಡ ವಿಷಯತ್ ಸತ್ಯ ತಕ್ಕ್ ಪರ್ಂದತ್.

³⁴ನಾಕ್ ಮನುಷ್ಯಂಗಡಿಂಜ ಸಾಕ್ಷಿ ಬೋಂಡ. ಆಚೇಂಗಿ, ನಿಂಗಕ್ ರಕ್ಷಣೆ ಕ್‍ಟ್ಟುವಕಾಯಿತೇ ನಾನ್ ಈ ತಕ್ಕ್ ಪರ್ಂದಂಡುಂಡ್.

³⁵ಯೋಹಾನ ಕತ್ತಿಯಂಡ್ ಮಿನ್ನುವ ಬೊಳ್‍ಕ್‍ರನೆಕೆ ಇಂಜತ್; ನಿಂಗ ಸಹ ಚೆನ್ನ ಕಾಲ ಆ ಬೊಳಿರ ಬೋದನೆಲ್ ಕುಶಿ ಪಟ್ಟಂಡಿಂಜಿರ.

³⁶ಆಚೇಂಗಿ, ಅಂವೊಂಡ ಸಾಕ್ಷಿಕಿಂಜ ನಾಡ ಸಾಕ್ಷಿ ಬಲ್ಯದಾಯಿತುಂಡ್. ಅದ್ ಎಂತ ಎಣ್ಣ್‌ಚೇಂಗಿ, ನಾನ್ ನೆರೆವೇರಿಚಿಡಂಡೂಂದ್ ಅಪ್ಪನಾನ ದೇವ ನಾಕ್ ಎಣ್ಣಿ ಕೊಡ್‍ತ ವಿಷಯ ಪಿಂಞ ನಾನ್ ಮಾಡಿಯಂಡುಳ್ಳ ಕ್ರಿಯೆವೇ ಅಪ್ಪನಾನ ದೇವ ನನ್ನ ಅಯಿಚತ್‍ೕಂದ್ ನಾಡ ವಿಷಯತ್ ಸಾಕ್ಷಿ ಕೊಡ್‍ತಂಡುಂಡ್.

³⁷ನನ್ನ ಅಯಿಚ ಅಪ್ಪನೇ ನಾಕ್ ಸಾಕ್ಷಿ ಕೊಡ್‌ತಿತುಂಡ್; ನಿಂಗ ದಾರೂ ಅಪ್ಪನಾನ ದೇವಡ ಸ್ವರತ್‍ನ ಕ್‍ೕಟಿತು ಇಲ್ಲೆ, ಅಂವೊಂಡ ರೂಪತ್‍ನ ಕಂಡಿತು ಇಲ್ಲೆ.

³⁸ಅಂವೊ ಅಯಿಚಂವೊನ ನಿಂಗ ನಂಬತಗುಂಡ್, ಅಂವೊಂಡ ವಾಕ್ಯ ನಿಂಗಡಲ್ಲಿ ನಿಂದಂಡಿಲ್ಲೆ.

³⁹ನಿಂಗ ದೇವಡ ವಾಕ್ಯತ್‍ನ ಚಾಯಿ ಪಡಿಚಿತ್ ನೋಟಿ; ಅದ್‍ನಗುಂಡ್ ನಿಂಗಕ್ ನಿತ್ಯ ಜೀವ ಉಂಡ್‍ೕಂದ್ ನಿಂಗ ಗೇನಮಾಡಿಯಂಡುಳ್ಳಿರಲ್ಲ! ಅದೇ ನಾಡ ವಿಷಯತ್ ಸಾಕ್ಷಿ ಕೊಡ್‍ತಂಡುಂಡ್.

⁴⁰ಅನ್ನನೆ ಇಂಜತೇಂಗಿಯು, ನಿಂಗಕ್ ನಿತ್ಯ ಜೀವ ಉಂಟಾಪಕ್ ನಾಡ ಪಕ್ಕ ಬಪ್ಪಕ್ ನಿಂಗಕ್ ಮನಸ್ಸಿಲ್ಲೆ.

⁴¹ನಾನ್ ಮನುಷ್ಯಂಗ ಹೊಗಳುವದ್‍ನ ಸ್ವೀಕಾರ ಮಾಡುಲೆ.

⁴²ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ಹೃದಯತ್‍ಲ್ ದೇವಡ ಪ್ರೀತಿ ಇಲ್ಲೇಂದ್ ನಾಕ್ ಗೊತ್ತುಂಡ್.

⁴³ನಾನ್ ನಾಡ ಅಪ್ಪನಾನ ದೇವಡ ಪೆದತ್‍ಲ್ ಬಂದಿತ್ಂಜತೇಂಗಿಯು, ನಿಂಗ ನನ್ನ ಸ್ವೀಕಾರ ಮಾಡಿತ್‌ಲ್ಲೆ, ಬೋರೆ ಒಬ್ಬ ಅಂವೊಂಡ ಇಷ್ಟ ಪ್ರಕಾರ ಬಪ್ಪಕ ಅಂವೊನ ಸ್ವೀಕಾರ ಮಾಡ್‌ವಿರ.

⁴⁴ದೇವಡಯಿಂಜ ಮಾತ್ರ ಬಪ್ಪ ಮರ್ಯಾದೆನ ನಿಂಗ ತ್‍ೕಡತೆ, ಒಬ್ಬಂಗೊಬ್ಬ ಕೊಡ್‍ಪ ಮರ್ಯಾದೆನ ಸ್ವೀಕಾರ ಮಾಡ್‌ವ ನಿಂಗ, ನನ್ನ ಎನ್ನನೆ ನಂಬುವಕಯ್ಯು?

⁴⁵ಅಪ್ಪನಾನ ದೇವಡ ಮಿಂಞತ್‍ಲ್ ನಿಂಗಡ ವಿಷಯತ್ ನಾನ್ ಕುತ್ತ ಪರಿಯುವೀಂದ್ ಗೇನ ಮಾಡತಿ; ನಿಂಗ ನಂಬುವ ಮೋಶೆನೇ ನಿಂಗಡ ಮೇಲೆ ಕುತ್ತ ಪರಿಯುವ.

⁴⁶ನಿಂಗ ಮೋಶೇನ ನಂಬಿತ್ಂಜತೇಂಗಿ, ನನ್ನ ಸಹ ನಂಬುವಿರ; ಎನ್ನಂಗೆಣ್ಣ್‌ಚೇಂಗಿ, ಅಂವೊ ನಾಡ ವಿಷಯತ್‍ನ ಒಳ್‍ದಿತುಂಡಲ್ಲ!

⁴⁷ಅಂವೊ ಒಳ್‌ದ್‍ನದ್‍ನ ನಿಂಗ ನಂಬತೆ ಪೋನಕ, ನಾನ್ ಎಣ್ಣುವಾನ ನಿಂಗ ಎನ್ನನೆ ನಂಬುವಿರಾಂದ್ ಯೇಸು ಎಣ್ಣ್‌ಚಿ.