Read Kodava ಯೋಹಾನ 7 Bible Online

ಯೋಹಾನ 7 - Kodava bible

ಯೋಹಾನ 7

¹ಇದೆಲ್ಲಾ ಆನ ಪಿಂಞ, ಯೆಹೂದ್ಯಂಗ ಯೇಸುನ ಕೊಲ್ಲ್‌ವಕ್ ಬಟ್ಟೆ ನೋಟಿಯಂಡ್ ಇಂಜಗುಂಡ್, ಅಂವೊ ಯೆಹೂದ್ಯ ಪ್ರಾಂತ್ಯತ್‍ಲ್ ಇಕ್ಕತೆ ಗಲಿಲಾಯ ಪ್ರಾಂತ್ಯಾತ್‍ಲ್ ಒಳಿಂಜತ್.

²ಆ ಸಮಯ ಯೆಹೂದ್ಯಂಗಡ ಗುಡಾರ ನಮ್ಮೆ ಪಕ್ಕ ಬಂದಂಡಿಂಜಗುಂಡ್,

³ಯೇಸುರ ತಮ್ಮಣಂಗ ಅಂವೊಂಗ್: ನೀನ್ ಈ ಜಾಗತ್‍ನ ಬುಟ್ಟಿತ್ ಯೆಹೂದ್ಯ ಪ್ರಾಂತ್ಯಕ್ ಪೋ, ಅಕ್ಕ ನೀಡ ಶಿಷ್ಯಂಗ ಸಹ ನೀನ್ ಮಾಡ್‌ವ ಅದ್ಬುತ ಕಾರ್ಯತ್‍ನ ಕಾಂಬಕಾಪ.

⁴ತಾಂಡ ಪೆದ ಬಲ್ಯದಾಂಡೂಂದ್ ಗೇನ ಮಾಡ್‌ವ ದಾರೂ, ಅಯಿಂಗಡ ಕ್ರಿಯೇನ ದಾರ್‌ಕು ಗೊತ್ತಿಲ್ಲತೆ ಮಾಡುಲೆ, ನೀನ್ ಸಹ ಅನ್ನನೆ ಎಲ್ಲಾಡ ಮಿಂಞತ್ ಮಾಡ್‍ಚೇಂಗಿ, ನೀನ್ ದಾರ್‍ೕಂದ್ ಎಲ್ಲಾರ್‌ಕು ಗೊತ್ತಾಪಾಂದ್ ಎಣ್ಣ್‌ಚಿ.

⁵ಅಂವೊಂಡ ತಮ್ಮಣಂಗ ಸಹ ಅಂವೊನ ನಂಬಿತ್‌ಲ್ಲೆ.

⁶ಯೇಸು ಅಯಿಂಗಳ ನೋಟಿತ್: ನಾನ್ ಪೋಪಕುಳ್ಳ ಸಮಯ ಇಂಞು ಬಂದಿತ್‌ಲ್ಲೆ, ಆಚೇಂಗಿ ನಿಂಗಕ್ ಸಮಯ ಎಕ್ಕಾಲು ತಯಾರಾಯಿತುಂಡ್.

⁷ಈ ಲೋಕತ್‍ರ ಜನ ನಿಂಗಳ ವಿರೋದಿಚಿಡುಲೆ, ಅಯಿಂಗ ಮಾಡ್‌ವ ಕಾರ್ಯವೆಲ್ಲಾ ಕೆಟ್ಟದ್‍ೕಂದ್ ನಾನ್ ಸಾಕ್ಷಿ ಎಣ್ಣಿಯಂಡುಳ್ಳಗುಂಡ್, ನನ್ನ ವಿರೋದಿಚಿಡುವ.

⁸ನಿಂಗ ಈ ನಮ್ಮೆಕ್ ಪೋಯಿರಿ, ನಾಡ ಸಮಯ ಬಂದಿತ್‌ಲ್ಲೆ, ಆನಗುಂಡ್ ನಾನ್ ಇಕ್ಕ ಪೋಪುಲೇಂದ್ ಎಣ್ಣ್‌ಚಿ.

⁹ಇನ್ನನೆ ಯೇಸು ಎಣ್ಣಿತ್, ಗಲಿಲಾಯ ಪ್ರಾಂತ್ಯತ್‍ಲ್ ಇಂಜತ್.

¹⁰ಯೇಸುರ ತಮ್ಮಣಂಗ ನಮ್ಮೆಕ್ ಪೋನ ಪಿಂಞ, ಯೇಸು ಸಹ, ಎಲ್ಲಾರ್‌ಕು ಗೊತ್ತಾಪನೆಕೆ ಪೋಕತೆ, ಗುಟ್ಟಾಯಿತ್ ಪೋಚಿ.

¹¹ಯೆಹೂದ್ಯ ಅದಿಕಾರಿಯಂಗ ಯೇಸುನ ತ್‍ೕಡಿಯಂಡ್, ಅಂವೊ ಎಲ್ಲಿ ಉಂಡ್‍ೕಂದ್ ಜನಳ ಕ್‍ೕಟತ್.

¹²ಯೇಸುರ ವಿಷಯತ್‍ಲ್ ಜನಾಂಗ ಗೊಣಗಿಯಂಡ್ ಇಂಜತ್. ಚೆನ್ನ ಜನ: ಅಂವೊ ನಲ್ಲಂವೋಂದ್ ಎಣ್ಣ್‌ಚಿ; ಚೆನ್ನ ಜನ: ಅನ್ನನೆ ಅಲ್ಲ, ಅಂವೊ ಜನಳ ಮೋಸಮಾಡಿಯಂಡುಂಡ್‍ೕಂದ್ ಎಣ್ಣಿಯಂಡಿಂಜತ್.

¹³ಆಚೇಂಗಿಯು, ಅಯಿಂಗಕ್ ಯೆಹೂದ್ಯಂಗಡ ಅದಿಕಾರಿಯಂಗಡ ಮೇಲೆ ಪೋಡಿ ಇಂಜಗುಂಡ್, ದಾರೂ ಅಂವೊಂಡ ವಿಷಯತ್‍ನ ದೈರ್ಯವಾಯಿತ್ ಎಣ್ಣ್‌ವಕಿಂಜಿಲೆ.

¹⁴ನಮ್ಮೆರ ಮದ್ಯತ್‍ಲ್ ಯೇಸು ದೇವಾಲಯತ್‍ರ ಒಳ್‍ಕ್ ಪೋಪಂಜಿ ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ.

¹⁵ಯೇಸು ಬೋದನೆ ಮಾಡ್‌ವಾನ ಕ್‍ೕಟಿತ್, ಇಂವೊ ಪಡಿಚಿತ್‌ಲ್ಲೆ, ಆಚೇಂಗಿಯು, ದೇವಡ ವಾಕ್ಯತ್‍ನ ಇಚ್ಚಕ್ ಚಾಯಿತೆ ಎನ್ನನೆ ಬೋದನೆ ಮಾಡ್‌ವಾಂದ್ ಯೆಹೂದ್ಯಂಗಡ ಅದಿಕಾರಿಯಂಗ ದುಂಬ ಆಶ್ಚರ್ಯತ್‍ಲ್ ಕ್‍ೕಟತ್.

¹⁶ಯೇಸು ಅಯಿಂಗಕ್: ನಾನ್ ಮಾಡ್‌ವ ಬೋದನೆ ನಾಡ ಸ್ವಂತ ಬೋದನೆ ಅಲ್ಲ, ನನ್ನ ಅಯಿಚಂವೊಂಡ ಬೋದನೆ.

¹⁷ದೇವಡ ಚಿತ್ತತ್‍ರನೆಕೆ ಮಾಡ್‌ವಕ್ ಕುಶಿ ಉಳ್ಳಂವೊಂಗ್, ನಾನ್ ಮಾಡ್‌ವ ಬೋದನೆ ದೇವಡಯಿಂಜ ಬಪ್ಪ ಬೋದನೆಯಾ, ಅಥವ ನಾಡ ಸ್ವಂತ ಬೋದನೆಯಾಂದ್ ಗೊತ್ತಾಪಾಂದ್ ಜವಾಬ್ ಕೊಡ್‍ತತ್.

¹⁸ತಾಂಡ ಸ್ವಂತ ಬೋದನೆ ಮಾಡ್‌ವಯಿಂಗ, ಅಯಿಂಗಕ್ ಮಹಿಮೆ ಕ್‍ಟ್ಟಂಡೂಂದ್ ಮಾಡ್‌ವ, ಆಚೇಂಗಿ, ಅಂವೊನ ಅಯಿಚಂವೊಂಗ್ ಮಹಿಮೆ ಕ್‍ಟ್ಟುವಕಾಯಿತ್ ಬೋದನೆ ಮಾಡ್‌ವಂವೊ ಸತ್ಯವಂತಂವೊನಾಯಿತ್ ಉಂಡ್, ಅಂವೊಂಡಲ್ಲಿ ಪೊಟ್ಟ್ ಇಲ್ಲೆ.

¹⁹ಮೋಶೆ ನಿಂಗಕ್ ನ್ಯಾಯಪ್ರಮಾಣತ್‍ನ ತಂದಿತ್‌ಲ್ಲೆಯಾ? ಆಚೇಂಗಿಯು, ದಾರೂ ಅಂವೊಂಡ ನ್ಯಾಯಪ್ರಮಾಣ ಎಣ್ಣುವನೆಕೆ ಮಾಡುಲೆ; ಪಿಂಞ, ನಿಂಗ ಎನ್ನಂಗಾಯಿತ್ ನನ್ನ ಕೊಲ್ಲ್‌ವಕ್ ಪೇಚಾಡ್‌ವಿರಾಂದ್ ಕ್‍ೕಟತ್.

²⁰ಅಕ್ಕ, ಜನ ಯೇಸುನ ನೋಟಿತ್: ನೀಕ್ ಕೂಳಿ ಪುಡ್‌ಚಿತ್ ಉಂಡ್, ದಾರ್ ನಿನ್ನ ಕೊಲ್ಲ್‌ವಕ್ ತ್‍ೕಡಿಯಂಡ್ ಉಂಡ್‍ೕಂದ್ ಕ್‍ೕಟತ್.

²¹ನಾನ್ ನಿಂಗಕ್ ಒರ್ ಅದ್ಬುತ ಕಾರ್ಯ ಮಾಡಿತ್ ಕಾಟಿಯೆ, ಅಕ್ಕ ನಿಂಗಕೆಲ್ಲಾ ಆಶ್ಚರ್ಯ ಆಚಿ.

²²ಮೋಶೆ ಸುನ್ನತಿ ಮಾಡ್‌ವ ಪದ್ದತಿನ ಸುರು ಮಾಡಿತ್‌ಲ್ಲೆ, ಅದ್ ನಿಂಗಡ ಮುತ್ತಜ್ಜಂಗಡ ಕಾಲತ್‍ಲ್ ಸುರು ಆನದ್. ಆಚೇಂಗಿ, ಅಂವೊ ಅದ್‍ನ ನಿಂಗಕ್ ನೇಮಿಚಿಟ್ಟತ್. ಅನ್ನನೆ ಇಪ್ಪಕ, ನಿಂಗ ಸಬ್ಬತ್ ದಿವಸತ್‍ಲ್ ಸಹ ಅದ್‍ನ ಮಾಡ್‌ವಿರ.

²³ಮೋಶೇರ ನ್ಯಾಯಪ್ರಮಾಣತ್‍ನ ಮೀರ್‌ವಕ್ಕಾಗಾಂದ್ ಸಬ್ಬತ್ ದಿವಸತ್‍ಲ್ ನಿಂಗ ಸುನ್ನತಿ ಮಾಡ್‌ವಿರ. ಅನ್ನನೆ ಇಪ್ಪಕ, ನಾನ್ ಒರ್ ಮನುಷ್ಯನ ಸಬ್ಬತ್ ದಿವಸತ್‍ಲ್ ಪೂರ್ತಿಯಾಯಿತ್ ವಾಸಿ ಮಾಡ್‍ಚೇಂಗಿ, ನಾಡ ಮೇಲೆ ನಿಂಗಕ್ ಎನ್ನಂಗ್ ಚೆಡಿ ಬಪ್ಪ.

²⁴ಪೊರಮೆ ಉಳ್ಳದ್‍ನ ಕಂಡಿತ್ ನ್ಯಾಯತೀರ್ಪ್ ಮಾಡತಿ. ನೀತಿಯಾಯಿತ್ ನ್ಯಾಯತೀರ್ಪ್ ಮಾಡೀಂದ್ ಎಣ್ಣ್‌ಚಿ.

²⁵ಅಕ್ಕ ಯೆರೂಸಲೇಮ್ ಪಟ್ಟಣತ್‍ರ ಚೆನ್ನ ಜನ: ಇಂವೊನತಾನೇ ಅಯಿಂಗ ಕೊಲ್ಲ್‌ವಕ್ ನೋಟಿಯಂಡ್ ಉಂಡ್?

²⁶ಆಚೇಂಗಿ, ಇಂವೊ ಎಲ್ಲಾಡ ಎದ್‍ಕೆ ತಕ್ಕ್ ಪರ್‌ದಂಡ್ ಉಂಡ್. ಅಯಿಂಗ ಅಂವೊಂಗ್ ಏದು ಎಣ್ಣಿಯಂಡಿಲ್ಲೆ! ಅನ್ನನಾಚೇಂಗಿ, ಯೆಹೂದ್ಯಂಗಡ ಅದಿಕಾರಿಯಂಗಕ್, ಇಂವೊನೇ ಕ್ರಿಸ್ತಾಂದ್ ಗೊತ್ತಾಚಾ?

²⁷ಇಂವೊ ಎಲ್ಲಿಂಜ ಬಾತ್‍ೕಂದ್ ನಂಗಕ್ ಗೊತ್ತುಂಡ್, ಆಚೇಂಗಿ, ಕ್ರಿಸ್ತ ಬಪ್ಪಕ, ಅಂವೊ ಎಲ್ಲಿಂಜ ಬಪ್ಪಾಂದ್ ದಾರ್‌ಕು ಗೊತ್ತಾಪುಲೇಂದ್ ಎಣ್ಣ್‌ಚಿ.

²⁸ಅನ್ನನೆ, ಯೇಸು ದೇವಾಲಯತ್‍ಲ್ ಬೋದನೆ ಮಾಡಿಯಂಡಿಪ್ಪಕ: ನಿಂಗಕ್ ನಾನ್ ದಾರ್‍ೕಂದ್ ಗೊತ್ತುಂಡ್, ನಾನ್ ಎಲ್ಲಿಂಜ ಬಾತ್‍ೕಂದು ಗೊತ್ತುಂಡ್; ನಾನ್ ನಾಡ ಸ್ವಂತವಾಯಿತ್ ಬಂದಿತ್‌ಲ್ಲೆ, ನನ್ನ ಅಯಿಚಂವೊ ಸತ್ಯವಂತಂವೊ, ಅಂವೊನ ನಿಂಗಕ್ ಗೊತ್ತ್‌ಲ್ಲೆ.

²⁹ನಾನ್ ಅಂವೊನಗುಂಡ್ ಬಂದಿಯೆ, ಅಂವೊ ನನ್ನ ಅಯಿಚತ್, ಆನಗುಂಡ್ ನಾಕ್ ಅಂವೊನ ಗೊತ್ತುಂಡ್‍ೕಂದ್ ಜೋರಾಯಿತ್ ಎಣ್ಣ್‌ಚಿ.

³⁰ಯೇಸು ಇನ್ನನೆ ಎಣ್ಣುವಕ, ಅಯಿಂಗ ಅಂವೊನ ಪುಡಿಪಕ್ ನೋಟ್‌ಚಿ, ಆಚೇಂಗಿ ಅಂವೊಂಡ ಸಮಯ ಬರತಗುಂಡ್ ಅಂವೊಂಡ ಮೇಲೆ ದಾರೂ ಕೈ ಬಿಚ್ಚಿತ್‌ಲ್ಲೆ.

³¹ಅಲ್ಲಿ ಇಂಜ ದುಂಬ ಜನ ಅಂವೊನ ನಂಬಿತ್: ಕ್ರಿಸ್ತ ಬಪ್ಪಕ ಇಂವೊ ಮಾಡ್‌ವ ಅದ್ಬುತ ಕಾರ್ಯಕಿಂಜ ಜಾಸ್ತಿ ಮಾಡ್‌ವೋ ಎಂತೋಂದ್ ಎಣ್ಣಿಯಂಡ್ ಇಂಜತ್.

³²ಜನ ಯೇಸುರ ವಿಷಯತ್ ಇನ್ನನೆ ಗೊಣಗಿಯಂಡ್ ಇಪ್ಪದ್‍ನ ಫರಿಸಾಯಂಗ ಕ್‍ೕಟತ್. ಅಕ್ಕ, ಯೇಸುನ ಪುಡ್‌ಚಿತ್ ಬಪ್ಪಕಾಯಿತ್, ಮುಕ್ಯ ಯಾಜಕಂಗಳು, ಫರಿಸಾಯಂಗಳು ದೇವಾಲಯತ್‍ರ ಸಿಪಾಯಿಯಳ ಅಯಿಚತ್.

³³ಯೇಸು ಅಯಿಂಗಳ ನೋಟಿತ್: ನಾನ್ ನಿಂಗಡ ಕೂಡೆ ಇಂಞು ಚೆನ್ನ ಕಾಲ ಇಪ್ಪಿ, ಅಲ್ಲಿಂಜ ನನ್ನ ದಾರ್ ಅಯಿಚತೋ, ಅಂವೊಂಡ ಪಕ್ಕ ಪೋಪಿ.

³⁴ನಿಂಗ ನನ್ನ ತ್‍ೕಡ್‌ವಿರ, ಆಚೇಂಗಿ ನನ್ನ ಕಾಂಬ್‍ಲೆ, ನಾನ್ ಇಪ್ಪ ಜಾಗಕ್ ನಿಂಗ ಬಪ್ಪಕ್ ಕಯ್ಯುಲೇಂದ್ ಎಣ್ಣ್‌ಚಿ.

³⁵ಯೆಹೂದ್ಯ ಅದಿಕಾರಿಯಂಗ ಇದ್‍ನ ಕ್‍ೕಪಕ: ಇಂವೊ ನಂಗ ಕಾಂಗತನೆಕೆ ಎಲ್ಲಿಕ್ ಪೋಪ? ಗ್ರೀಕ್ ರಾಜ್ಯತ್‍ಲ್ ಚದ್‌ರಿ ಪೋಯಿತುಳ್ಳ ನಂಗಡ ಜನತ್‍ರ ಪಕ್ಕ ಪೋಯಿತ್ ಅಲ್ಲಿ ಉಳ್ಳ ಯೆಹೂದ್ಯ ಅಲ್ಲತಯಿಂಗಕ್ ಬೋದನೆ ಮಾಡ್‌ವೋ?

³⁶ನಿಂಗ ನನ್ನ ತ್‍ೕಡ್‌ವಿರ, ಆಚೇಂಗಿ ನನ್ನ ಕಾಂಬ್‍ಲೆ, ನಾನ್ ಇಪ್ಪ ಜಾಗಕು ನಿಂಗ ಬಪ್ಪಕ್ ಕಯ್ಯುಲೇಂದ್ ಇಂವೊ ಎಣ್ಣ್‌ನ ಇದ್ಂಡ ಅರ್ಥ ಎಂತ್‍ೕಂದ್ ಅಯಿಂಗಯಿಂಗಳೇ ಎಣ್ಣಿಯಂಡಿಂಜತ್.

³⁷ಆ ನಮ್ಮೆರ ಮುಕ್ಯ ದಿವಸವಾನ ಕಡೆ ದಿವಸತ್, ಯೇಸು ನಿಪ್ಪಂಜಿ ಜೋರಾಯಿತ್: ದಾರ್‌ಕ್ ಬಾಯರಿಕೆಯಾಯಿತ್ ಉಂಡೋ ಅಂವೊ ನಾಡ ಪಕ್ಕ ಬಂತ್ ಕುಡಿಕಡ್.

³⁸ದೇವಡ ವಾಕ್ಯ ಎಣ್ಣ್‌ವನೆಕೆ, ನಾಡ ಮೇಲೆ ನಂಬಿಕೆ ಬೆಪ್ಪ್ಂವೊಂಗ್, ಅಂವೊಂಡ ಹೃದಯತ್ಂಜ ಜೀವ ತಪ್ಪ ನೀರ್ ಉಳ್ಳ ಪೊಳೆ ಉಕ್ಕ್‌ವಾಂದ್ ಎಣ್ಣ್‌ಚಿ.

³⁹ಅಂವೊಂಡ ಮೇಲೆ ನಂಬಿಕೆ ಇಡ್‌ವ ಜನಕ್ ಕ್‍ಟ್ಟುವ ಪವಿತ್ರಾತ್ಮಂಡ ವಿಷಯತ್ ಯೇಸು ಇನ್ನನೆ ಎಣ್ಣ್‌ಚಿ. ಯೇಸು ಇಂಞು ಕೊಡಿಕ್ ಪೋಯಿತ್ ಮಹಿಮೆ ಪಡತೆ ಇಂಜಗುಂಡ್, ಪವಿತ್ರಾತ್ಮನ ಇಲ್ಲಿಕತ್ತನೆ ಕೊಡ್‍ತಿತ್‌ಲ್ಲೆ.

⁴⁰ಅಲ್ಲಿ ಇಂಜ ಜನಡ ಗುಂಪ್‍ಯಿಂಜ ದುಂಬ ಜನ ಯೇಸು ಎಣ್ಣ್‌ನ ತಕ್ಕ್‌ನ ಕ್‍ೕಟಿತ್: ಇಂವೊ ನೇರಾಯಿತು ಒರ್ ಪ್ರವಾದೀಂದ್ ಎಣ್ಣ್‌ಚಿ.

⁴¹ಇಂಞು ಚೆನ್ನ ಜನ: ಇಂವೊ ಕ್ರಿಸ್ತಾಂದ್ ಎಣ್ಣ್‌ಚಿ. ಇಂಞು ಚೆನ್ನ ಜನ: ಕ್ರಿಸ್ತ ಗಲಿಲಾಯತ್ಂಜ ಬಪ್ಪಕಯ್ಯುವಾಂದ್ ಎಣ್ಣ್‌ಚಿ.

⁴²ಕ್ರಿಸ್ತ, ದಾವೀದ ರಾಜಂಡ ಸಂತಾನತ್ಂಜಲೂ, ದಾವೀದಂಡ ಊರಾನ ಬೇತ್ಲೆಹೇಮಿಂಜಲೂ ಬಪ್ಪಾಂದ್ ದೇವಡ ವಾಕ್ಯತ್‍ಲ್ ಉಂಡಲ್ಲಾಂದ್ ಎಣ್ಣ್‌ಚಿ.

⁴³ಇನ್ನನೆ ಅಂವೊನಗುಂಡ್ ಜನಾಂಗ ದಂಡ್ ಗುಂಪಾಯಿತ್ ಆಚಿ.

⁴⁴ಚೆನ್ನ ಜನ ಅಂವೊನ ಪುಡ್‌ಚಿತ್ ಕೊಡ್‍ಪಕ್ ನೋಟ್‌ಚಿ, ಆಚೇಂಗಿ ದಾರೂ ಅಂವೊಂಡ ಮೇಲೆ ಕೈ ಇಟ್ಟಿತ್‌ಲ್ಲೆ.

⁴⁵ದೇವಾಲಯತ್‍ರ ಸಿಪಾಯಿಯಂಗ ಯೇಸುನ ಪುಡಿಕತೆ ಬಯ್ಯಕ್ ಪೋಚಿ. ಅಕ್ಕ ಫರಿಸಾಯಂಗ ಪಿಂಞ ಮುಕ್ಯ ಯಾಜಕಂಗ, ಅಯಿಂಗಳ ನೋಟಿತ್: ನಿಂಗ ಎನ್ನಂಗ್ ಅಂವೊನ ಕಾಕಿಯಂಡ್ ಬಂದಿತ್‌ಲ್ಲೇಂದ್ ಕ್‍ೕಟತ್.

⁴⁶ಅದ್ಂಗ್ ಸಿಪಾಯಿಯಂಗ: ಆ ಮನುಷ್ಯ ತಕ್ಕ್ ಪರಿಯುವನೆಕೆ ದಾರೂ ಇಲ್ಲಿಕತ್ತನೆ ತಕ್ಕ್ ಪರ್‌ಂದಿತ್‌ಲ್ಲೇಂದ್ ಎಣ್ಣ್‌ಚಿ.

⁴⁷ಅಕ್ಕ ಫರಿಸಾಯಂಗ: ನಿಂಗಳ ಸಹ ಅಂವೊ ವಂಚನೆ ಮಾಡಿರ್‍ತಾಂದ್ ಕ್‍ೕಟತ್.

⁴⁸ಫರಿಸಾಯಂಗ ಅಥವ ಅದಿಕಾರಿಯಂಗ ದಾರೇಂಗಿ ಅಂವೊನ ನಂಬಿತುಂಡಾ?

⁴⁹ನ್ಯಾಯಪ್ರಮಾಣತ್‍ನ ಗೊತ್ತಿಲ್ಲತ ಈಂಗ ಶಾಪತ್‍ಲ್ ಉಂಡ್‍ೕಂದ್ ಎಣ್ಣ್‌ಚಿ.

⁵⁰ಫರಿಸಾಯಂಗಡ ಕೂಟ್‌ಲ್ ನಿಕೊದೇಮ ಎಣ್ಣುವ ಒಬ್ಬ ಇಂಜತ್. (ಇಂವೊ ಒರ್ ದಿನ ಬಯಿಟ್ ಯೇಸುನ ಕಾಂಬಕ್ ಪೋಯಿತ್ಂಜತ್).

⁵¹ಅಂವೊ: ನಂಗಡ ನ್ಯಾಯಪ್ರಮಾಣತ್‍ರ ಪ್ರಕಾರ ಒರ್ ಮನುಷ್ಯನ ತೀರ್ಪ್ ಮಾಡ್‌ವಕ್ ಮಿಂಞ, ಅಂವೊ ಎಂತ ಮಾಡ್‍ಚೀಂದ್ ಅಂವೊಂಡ ತಕ್ಕ್‌ನ ಕ್‍ೕಕಂಡೂಂದ್ ನಂಗಡ ಕಾನೂನ್‌ಲ್ ಉಂಡಲ್ಲಾಂದ್ ಕ್‍ೕಟತ್.

⁵²ಅಕ್ಕ ಅಯಿಂಗ: ನೀನ್ ಸಹ ಗಲಿಲಾಯತ್ಂಜ ಬಂದಂವೊನಾ? ಗಲಿಲಾಯತ್ಂಜ ಒರ್ ಪ್ರವಾದಿಯು ಬಪ್ಪ್‌ಲೇಂದ್ ದೇವಡ ಪುಸ್ತಕತ್‍ಲ್ ಚಾಯಿ ನೋಟ್‍ೕಂದ್ ಎಣ್ಣ್‌ಚಿ.

⁵³ಪಿಂಞ ಎಲ್ಲಾರು ಅಯಿಂಗಯಿಂಗಡ ಮನೆಕ್ ಪೋಚಿ.