Read Kodava ಅಪೊಸ್ತಲ 1 Bible Online

ಅಪೊಸ್ತಲ 1 - Kodava bible

ಅಪೊಸ್ತಲ 1

¹ಓ ಥೆಯೊಫಿಲನೇ, ಯೇಸು, ಅಂವೊ ಗೊತ್ತ್ ಮಾಡ್‍ನ ಅಪೊಸ್ತಲಂಗಕ್ ಪವಿತ್ರಾತ್ಮತ್ಂಜ ಆಜ್ಞೆ ಮಾಡ್‍ನ ಪಿಂಞ,

²ಅಂವೊ ಸೇವೆ ಸುರು ಮಾಡ್‍ನ ದಿವಸತ್ಂಜ ಅಂವೊ ಪರಲೋಕಕ್ ಪೋನ ಸಮಯಕತ್ತನೆ ಮಾಡ್‍ನ ಎಲ್ಲಾ ಸೇವೇನ ಪಿಂಞ ಬೋದನೆನ ನಾಡ ಆದ್ಯ ಪುಸ್ತಕತ್‍ಲ್ ಒಳ್‍ದಿ ಬೆಚ್ಚಿಯೆ.

³ಅಂವೊ ಶಿಲುಬೇಲ್ ಕಷ್ಟಪಟ್ಟಿತ್ ಚತ್ತ್‌ಪೋನ ಪಿಂಞ, ಅಂವೊ ಜೀವವಾಯಿತ್ ಉಂಡ್‍ೕಂದ್ ನಾಪದ್ ದಿವಸ, ಅಪೊಸ್ತಲಂಗಕ್ ದುಂಬ ಕುರಿ ದೃಡ ಸಾಕ್ಷಿಯಾಯಿತ್ ಅಂವೊನ ಕಾಂಬ್‌ಚಿಟ್ಟಂಡತ್. ಅನ್ನನೆ ದೇವಡ ರಾಜ್ಯತ್‍ರ ವಿಷಯತ್‍ನ ಪರ್ಂದಂಡ್, ಜೀವ ಉಳ್ಳಂವೊನಾಯಿತ್, ಕಾಂಬ್‌ಚಿಟ್ಟಂಡ್ ಇಂಜತ್.

⁴ಒರ್ ಕುರಿ ಅಯಿಂಗ ಕೂಡಿ ಬಂದಿತ್‌ಪ್ಪಕ, ಯೇಸು ಅಯಿಂಗಳ ನೋಟಿತ್:

⁵ಯೋಹಾನ ನಿಂಗಕ್ ನೀರ್‌ಲ್ ದೀಕ್ಷಾಸ್ನಾನ ಕೊಡ್‍ತತ್, ಆಚೇಂಗಿ ಇಂಞು ಚೆನ್ನ ದಿವಸತ್‍ಲ್ ನಿಂಗಳ ಪವಿತ್ರಾತ್ಮತ್‍ಲ್ ದೀಕ್ಷಾಸ್ನಾನ ಮಾಡ್‌ವ. ಆನಗುಂಡ್ ನಿಂಗ ಯೆರೂಸಲೇಮ್‍ನ ಬುಟ್ಟಿತ್ ಪೋಕತೆ, ನಾನ್ ನಿಂಗಕ್ ಎಣ್ಣ್‌ನ ನಾಡ ಅಪ್ಪಂಡ ವಾಗ್ದಾನತ್‍ರ ವರ ನಿಂಗಡಲ್ಲಿ ನೆರವೇರ್‍ವಕತ್ತನೆ ಪಾರಕಾತಂಡಿರೀಂದ್ ಆಜ್ಞೆ ಕೊಡ್‍ತತ್.

⁶ಪಿಂಞ ಅಲ್ಲಿಕ್ ಬಂದಯಿಂಗ ಯೇಸುನ ನೋಟಿತ್; ಒಡೆಯನೇ, ಇಸ್ರಾಯೇಲ್ ದೇಶತ್‍ನ ಅಯಿಂಗಡ ವಿರೋದಿಯಂಗಡ ಕೈಯಿಂಜ ಬುಡ್‍ಗಡೆ ಮಾಡಿತ್, ಇಸ್ರಾಯೇಲ್ ಜನಕ್ ಪುನಃ ಕೊಡ್‍ಪ ಕಾಲ ಬಾತಾಂದ್ ಕ್‍ೕಟತ್.

⁷ಅಕ್ಕ ಯೇಸು: ನಾಡ ಅಪ್ಪ, ಅಂವೊಂಡ ಅದಿಕಾರತ್‍ಲ್ ಗೊತ್ತ್ ಮಾಡಿತುಳ್ಳ ಸಮಯವು ದಿನವು ಗೊತ್ತಾಪಕ್ ನಿಂಗಕ್ ಅನುಮತಿ ಇಲ್ಲೆ.

⁸ಆಚೇಂಗಿ ಪವಿತ್ರಾತ್ಮ ನಿಂಗಡ ಮೇಲೆ ಬಪ್ಪಕ, ನಿಂಗ ಶಕ್ತಿವಂತಯಂಗಳಾಯಿತ್ ಯೆರೂಸಲೇಮ್ ಪಟ್ಟಣತ್‍ಲ್, ಯೂದಾಯ ಪ್ರಾಂತ್ಯತ್‍ಲ್, ಸಮಾರ್ಯ ಜಾಗತ್‍ಲ್ ಪಿಂಞ ಬೂಮಿರ ಕಡೇಕತ್ತನೆ ನಾಕ್ ಸಾಕ್ಷಿಯಳಾಯಿತ್‌ಪ್ಪಿರ.

⁹ಇನ್ನನೆ ಎಣ್ಣ್‌ನ ಪಿಂಞ ಅಯಿಂಗ ನೋಟಿಯಂಡಿಪ್ಪಕಲೆ, ಒರ್ ಮೋಡತ್‍ರ ಒಳ್‌ಲಿಂಜ ಅಂವೊನ ಕೊಡಿಕ್ ಎಡ್‍ತಂಡ್ ಪೋಚಿ. ಅಂವೊ ಅಯಿಂಗಡ ಕಣ್ಣ್‌ಕ್ ಕಾಂಬಕಿಂಜಿಲೆ.

¹⁰ಅಂವೊ ಅನ್ನನೆ ಕೊಡಿಕ್ ಪೋನದ್‍ನ ಅಯಿಂಗೆಲ್ಲ ಕಣ್ಣ್ ಎಡ್‍ಕತೆ ನೋಟಿಯಂಡ್ ಇಪ್ಪಕಲೆ, ಮಿನ್ನುವ ಬಟ್ಟೆ ಇಟ್ಟ ದಂಡ್ ಮನುಷ್ಯಂಗ ಪ್ರತ್ಯಕ್ಷ ಆಯಿತ್ ಅಯಿಂಗಡ ಪಕ್ಕ ನಿಂದಂಡಿಂಜತ್.

¹¹ಅಯಿಂಗ ಅಲ್ಲಿ ಇಂಜಯಿಂಗಳ ನೋಟಿತ್: ಗಲಿಲಾಯತ್‍ರ ಜನಳೇ, ಎನ್ನಂಗ್ ನಿಂಗ ಬಾನತ್‍ನ ನೋಟಿಯಂಡ್ ಉಳ್ಳಿರ? ನಿಂಗಡ ಕಣ್ಣ್‌ರ ಮಿಂಞ ಎನ್ನನೆ ಯೇಸು ಪರಲೋಕಕ್ ಪೋಚೋ, ಅನ್ನನೆ ಯೇಸು ಪರಲೋಕತ್ಂಜ ಬಯ್ಯ ಬಪ್ಪಾಂದ್ ಎಣ್ಣ್‌ಚಿ.

¹²ಅಕ್ಕ, ಆಲಿವ್ ಮರತ್‍ರ ಕುಂದಿಂಜ ಅಯಿಂಗ ಯೆರೂಸಲೇಮ್‌ಕ್ ಪೋಚಿ. ಈ ಜಾಗ, ಪಟ್ಟಣತ್ಂಜ ಒರ್ ಸಬ್ಬತ್ ದಿವಸತ್‍ಲ್ ನಡ್ಂದ್ ಪೋಯಿತ್ ಬಪ್ಪ ದೂರವಾನ ಒರ್ ಕಿಲೊ ಮೀಟರ್ ದೂರತ್‍ಲ್ ಇಂಜತ್.

¹³ಅಯಿಂಗ ಅಲ್ಲಿ ಬಪ್ಪಕ, ಅಯಿಂಗ ವಾಸ ಮಾಡಿಯಂಡಿಂಜ ಕೊಡಿಲ್ ಉಳ್ಳ ಕೋಂಬರೇಕ್ ಪತ್ತ್‌ಚಿ. ಅಯಿಂಗಡಲ್ಲಿ ಇಂಜಯಿಂಗ ದಾರ್ ದಾರ್‍ೕಂದ್ ಎಣ್ಣ್‌ಚೇಂಗಿ, ಪೇತ್ರ, ಯಾಕೋಬ, ಯೋಹಾನ, ಅಂದ್ರೆಯ, ಫಿಲಿಪ್ಪ, ತೋಮ, ಬಾರ್ತೊಲೊಮಾಯ, ಮತ್ತಾಯ, ಅಲ್ಫಾಯಂಡ ಮೋಂವೊನಾನ ಯಾಕೋಬ, ದೇಶ ಪ್ರೇಮಿಯಾಯಿತ್ಂಜ ಸೀಮೋನ ಪಿಂಞ ಯಾಕೋಬಂಡ ತಮ್ಮಣನಾನ ಯೂದ ಎಣ್ಣ್‌ವಯಿಂಗಳೇ.

¹⁴ಅಲ್ಲಿ ಈಂಗ ಎಲ್ಲಾರು ಒಟ್ಟ್ ಕೂಡಿತ್ ಒರೇ ಮನಸ್ಸ್‌ಲ್ ಎಕ್ಕಾಲು ಪ್ರಾರ್ಥನೆ ಮಾಡಿಯಂಡ್ ಇಂಜತ್. ಅಯಿಂಗಡ ಕೂಡೆ ಪೊಣ್ಣಾಳುವ, ಯೇಸುರ ಅವ್ವ ಮರಿಯ ಪಿಂಞ ಯೇಸುರ ತಮ್ಮಣಂಗಳು ಇಂಜತ್.

¹⁵ಇನ್ನನೆ ಇಪ್ಪಕ, ಒರು ದಿವಸ, ಅಲ್ಲಿ ಕೂಡಿ ಬಂದಿತ್ಂಜ ನೂಯಿಟ ಇರ್‌ವದ್ ಶಿಷ್ಯಂಗಡ ಮದ್ಯತ್ ಪೇತ್ರ ಎದ್ದ್ ನಿಪ್ಪಂಜಿ, ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ.

¹⁶ನಾಡ ಅಣ್ಣತಮ್ಮಣಂಗಳೇ, ಯೇಸುನ ಪುಡ್‌ಚಿತ್ ಪೋಪಯಿಂಗಕ್ ಬಟ್ಟೆ ಕಾಟಿ ಕೊಡ್‍ತ ಯೂದಂಡ ವಿಷಯತ್‍ನ ದಾವೀದಂಡ ಮೂಲಕ ಪವಿತ್ರಾತ್ಮ ಮಿಂಞಲೇ ಎಣ್ಣ್‌ನ ದೇವಡ ವಾಕ್ಯ ಒಳ್‍ದಿತುಳ್ಳದ್ ನೆರೆವೇರಂಡೂಂದ್ ಇಂಜತ್.

¹⁷ಯೂದ ನಂಗಡ ಕೂಟ್‌ಲ್ ಒಬ್ಬನಾಯಿತ್ಂಜತ್. ದೇವಡ ಸೇವೇಲ್ ಪಾಲ್‍ದಾರನಾಯಿತ್ಂಜತ್.

¹⁸ಅಂವೊ ಇನ್ನನೆ ಮೋಸ ಮಾಡ್‍ನಗುಂಡ್, ಕ್‍ಟ್ಟ್‌ನ ಪಣತ್‌ಲ್ ಒರ್ ಜಾಗ ಎಡ್‍ತಂಡತ್. ಅಲ್ಲಿ ಅಂವೊಂಡ ಮಂಡೆ ಅಡಿಕ್ ಬೂವಂಜಿ, ಅಂವೊಂಡ ಕೆಲ ಒಡಂದಿತ್ ಅದ್ಂಡ ಒಳ್‍ಲ್ ಉಳ್ಳ ಕರ್ ಎಲ್ಲಾ ಪೊರಮೆ ಬಂದಿತ್ ಚತ್ತ್ ಪೋಚಿ.

¹⁹ಇದ್ ಯೆರೂಸಲೇಮ್‍ಲ್ ಉಳ್ಳ ಜನಕೆಲ್ಲ ಗೊತ್ತಾಚಿ; ಆನಗುಂಡ್, ಆ ಜಾಗತ್‍ನ ಅಯಿಂಗಡ ತಕ್ಕ್‌ಲ್ ಅಕೆಲ್ದಮಾ ಎಣ್ಣಿಯಂಡ್ ಕಾಕ್‍ವಕಾಚಿ. ಅದ್ಂಡ ಅರ್ಥ ಎಂತ ಎಣ್ಣ್‌ಚೇಂಗಿ, ಚೋರೆರ ನೆಲ.

²⁰ದೇವಡ ಪಾಟ್ ಪುಸ್ತಕತ್‍ಲ್: ಅಂವೊಂಡ ಮನೆ ನಾಶ ಆಡ್, ಅಲ್ಲಿ ದಾರೂ ವಾಸ ಮಾಡತೆ ಇರಡ್, ಅಂವೊಂಡ ಪದವಿ ಬೋರೆ ಒಬ್ಬಂಗ್ ಕ್‍ಟ್ಟಡ್‍ೕಂದ್ ಒಳ್‍ದಿ ಬೆಚ್ಚಿತುಂಡ್[1].

²¹ಆನಗುಂಡ್, ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಕಾಲತ್ಂಜ, ಒಡೆಯನಾನ ಯೇಸು ಪರಲೋಕಕ್ ಪೋನ ದಿವಸಕತ್ತನೆ,

²²ಯೇಸು ನಂಗಡ ಮದ್ಯತ್ ಸೇವೆ ಮಾಡಿಯಂಡಿಂಜ ಕಾಲತ್‍ಲ್, ನಂಗಡ ಕೂಡೆ ಇಂಜ ಒಬ್ಬ, ಯೇಸು ಚಾವ್‍ಯಿಂಜ ಪುನಃ ಜೀವವಾಯಿತ್ ಬಾತ್‍ೕಂದ್ ಉಳ್ಳ ವಿಷಯತ್‍ನ ನಂಗಡನೆಕೆ ಸಾಕ್ಷಿಯಾಯಿತ್ ಎಣ್ಣ್‌ವಂವೊನ ನೇಮಿಚಿಡಡೂಂದ್ ಪೇತ್ರ ಎಣ್ಣ್‌ಚಿ.

²³ಅಕ್ಕ, ಅಯಿಂಗ, ಯೂಸ್ತ ಎಂದ್ ಕಾಕುವ ಬಾರ್ನಬ ಎಣ್ಣುವ ಯೋಸೇಫ ಪಿಂಞ ಮತ್ತೀಯಾಂದ್ ಎಣ್ಣ್‌ವ ದಂಡಾಳ್‌ನ ನಿಪ್ಪ್‌ಚಿಟ್ಟಿತ್:

²⁴ಅಯಿಂಗ ಇನ್ನನೆ ಪ್ರಾರ್ಥನೆ ಮಾಡ್‍ಚಿ. ದೇವ, ನೀಕ್ ಎಲ್ಲಾಡ ಹೃದಯ ಪಿಂಞ ಗೇನ ಗೊತ್ತುಂಡ್,

²⁵ಈ ದಂಡಾಳ್‌ರ ಕೂಟ್‌ಲ್ ದಾರ್‍ೕಂದ್ ಗೊತ್ತ್ ಮಾಡಿತ್ ಕಾಟ್‍ೕಂದ್ ಪ್ರಾರ್ಥನೆ ಮಾಡ್‍ಚಿ. ಎನ್ನಂಗೆಣ್ಣ್‌ಚೇಂಗಿ, ಯೂದ ಈ ಅಪೊಸ್ತಲ ಸ್ತಾನತ್ಂಜ, ಮೋಸ ಮಾಡಿತ್, ಅಂವೊಂಗ್ ತಕ್ಕ ಜಾಗಕ್ ಪೋಚಿ.

²⁶ಪಿಂಞ ಅಯಿಂಗಡ ಪೆದತ್‍ಲ್ ಚೀಟಿ ಇಟ್ಟತ್. ಚೀಟಿ ಎಡ್‍ಪಕ, ಆ ಚೀಟಿ ಮತ್ತಿಯಂಗ್ ಬಾತ್; ಅಕ್ಕ ಅಂವೊನ ಬೋರೆ ಪನ್ನಂದ್ ಅಪೊಸ್ತಲಂಗಡ ಕೂಟ್‍ಕ್ ಕೂಟಿಯಂಡತ್.