Read Kodava ಅಪೊಸ್ತಲ 13 Bible Online

ಅಪೊಸ್ತಲ 13 - Kodava bible

ಅಪೊಸ್ತಲ 13

¹ಅಂತಿಯೋಕ್ಯ ಪಟ್ಟಣತ್‍ರ ಸಬೇಲ್, ಚೆನ್ನ ಜನ ಪ್ರವಾದಿಯಂಗಳಾಯಿತು, ಚೆನ್ನ ಜನ ಬೋದನೆಕಾರಂಗಳಾಯಿತು ಇಂಜತ್. ಅಯಿಂಗ ದಾರ್ ಎಣ್ಣ್‌ಚೇಂಗಿ ಬಾರ್ನಬ, ನೀಗರ್‍ಂದ್ ಜನ ಕಾಕುವ ಸಿಮೆಯೋನ, ಕುರೇನ್ಯ ಊರ್‍ಕಾರನಾನ ಲೂಕ್ಯ, ಪಲಸ್ತೀನ ದೇಶತ್‍ಲ್ ಕಾಲ್ ಬಾಗಕ್ ಅದಿಪತಿಯಾಯಿತ್ಂಜ ಹೆರೋದ ಅಂತಿಪ ಎಣ್ಣ್‌ವಂವೊಂಡ ಕೂಡೆ ಬೊಳ್ಂದ ಮೆನಹೇನ ಪಿಂಞ ಸೌಲ ಎಣ್ಣ್‌ವಯಿಂಗಳೇ.

²ಅಯಿಂಗ ಒಡೆಯನ ಆರಾದನೆ ಮಾಡಿಯಂಡ್ ಪಟ್ಟಣಿ ನಿಂದಂಡ್ ಇಪ್ಪಕ, ಪವಿತ್ರಾತ್ಮ ಅಯಿಂಗಕ್: ನಾನ್ ಕಾಕ್‍ನ ವಿಶೇಷ ಸೇವೆಕಾಯಿತ್ ಬಾರ್ನಬ ಪಿಂಞ ಸೌಲನ, ನಿಂಗ ಬೋರೆ ಮಾಡಿತ್ ಅಯಿಂಕಂಡೂಂದ್ ಎಣ್ಣ್‌ಚಿ.

³ಬಯ್ಯ, ಅಯಿಂಗ ಪಟ್ಟಣಿ ನಿಂದಿತ್, ಪ್ರಾರ್ಥನೆ ಮಾಡಿತ್, ಅಯಿಂಗಡ ಮೇಲೆ ಕೈ ಬೆಚ್ಚಿತ್ ಅಯಿಂಗಳ ಅಯಿಚತ್.

⁴ಇನ್ನನೆ ಅಯಿಂಗಳ ಪವಿತ್ರಾತ್ಮ ಅಯಿಚ ಪಿಂಞ, ಅಯಿಂಗ ಸೆಲ್ಯೂಕ್ಯ ಪಟ್ಟಣಕ್ ಬಾತ್; ಅಲ್ಲಿಂಜ ಸಮುದ್ರ ಮಾರ್ಗವಾಯಿತ್ ಕುಪ್ರ ದ್ವೀಪಕ್ ಪೋಚಿ.

⁵ಅಯಿಂಗ ಸಲಮಿಸ್ ಪಟ್ಟಣಕ್ ಬಂದಿತ್, ಅಲ್ಲಿ ಇಂಜ ಯೆಹೂದ್ಯಂಗಡ ಸಬಾಮಂದಿರತ್‍ಲ್ ದೇವಡ ವಾಕ್ಯತ್‍ನ ಬೋದನೆ ಮಾಡ್‍ಚಿ. ಅಯಿಂಗಡ ಸೇವೇಲ್ ಸಹಾಯ ಮಾಡ್‌ವಕ್ ಯೋಹಾನ ಎಣ್ಣುವ ಮಾರ್ಕ ಅಯಿಂಗಡ ಕೂಡೆ ಇಂಜತ್.

⁶ಅಯಿಂಗ ದ್ವೀಪತ್‍ರ ಬಟ್ಟೇಲ್ ಪಾಫೋಸ್ ಎಣ್ಣುವ ಪೇಟೇಕ್ ಬಪ್ಪಕ, ಅಲ್ಲಿ ಬಾರ್‌ಯೇಸು ಎಣ್ಣುವ ಕಳ್ಳ ಪ್ರವಾದಿಯು ಮಂತ್ರವಾದಿಯು ಆಯಿತ್ಂಜ ಒರ್ ಯೆಹೂದ್ಯನ ಕಂಡತ್.

⁷ಅಂವೊ ಬುದ್ದಿವಂತ ಅದಿಪತಿಯಾನ ಸೆರ್ಗ್ಯ ಪೌಲ ಎಣ್ಣ್‌ವಂವೊಂಡ ಕೂಡೆ ಇಂಜತ್. ಆ ಅದಿಪತಿ, ಸೌಲ ಪಿಂಞ ಬಾರ್ನಬನ ಕಾಕಿತ್ ದೇವಡ ವಾಕ್ಯತ್‍ನ ಕ್‍ೕಪಕ್ ಕುಶೀಲ್ ಇಂಜತ್.

⁸ಆಚೇಂಗಿ, ಮಂತ್ರವಾದೀಂದ್ ಅರ್ಥ ಆಪ ಪೆದ ಉಳ್ಳ ಎಲುಮ, ಯೇಸುರ ಮೇಲೆ ಅದಿಪತಿ ನಂಬಿಕೆ ಇಡತನೆಕೆ, ಅಯಿಂಗಕ್ ವಿರೋದವಾಯಿತ್ ಮಾಡಿಯಂಡಿಂಜತ್.

⁹ಅಕ್ಕ ಪೌಲ ಎಣ್ಣುವ ಸೌಲ ಪವಿತ್ರಾತ್ಮಂಡ ಶಕ್ತಿಲ್ ದುಂಬಿತ್ ಅಂವೊಂಡ ಮೂಡ್‍ಕ್ ನೋಟಿತ್,

¹⁰ಎಲ್ಲಾ ದೋಷವು ಕಪಟತನವು ದುಂಬಿತುಳ್ಳ, ಸೈತಾನಂಡ ಮೋಂವೊನೇ! ದೇವಡ ನೀತಿಕ್ ವಿರೋದವಾಯಿತ್ ನಿಪ್ಪ ಮನುಷ್ಯನೇ, ಒಡೆಯಂಡ ಸರಿಯಾನ ಬಟ್ಟೇನ, ತಿರಿಗ್‍ಚಿಡುವದ್‍ನ ನೀನ್ ನಿಪ್ಪ್‌ಚಿಡುಲೆಯಾ?

¹¹ನೋಟ್ ಇಕ್ಕ, ಒಡೆಯಂಡ ಕೈ ನೀಕ್ ವಿರೋದವಾಯಿತ್ ಉಂಡ್. ಆನಗುಂಡ್ ಇಕ್ಕಲೆ ನೀನ್ ಕುರ್‌ಡನಾಯಿತ್ ಚೆನ್ನ ಕಾಲ ಸೂರ್ಯನ ಕಾಂಗತೆ ಇಪ್ಪಿಯಾಂದ್ ಎಣ್ಣ್‌ಚಿ. ಅದೇ ಕ್ಷಣತ್‍ಲ್ ಅಂವೊಂಡ ಕಣ್ಣ್‌ರ ಮೇಲೆ ಮಂಜ್ ಬಂತ್, ಕಣ್ಣ್ ಕಾಂಗತೆ ಆಚಿ. ಅಕ್ಕ, ಕೈ ಪುಡ್‌ಚಿತ್ ಸಹಾಯ ಮಾಡ್‌ವಯಿಂಗಳ ತ್‍ೕಡ್‌ಚಿ.

¹²ಇನ್ನನೆ ಆನದ್‍ನ ಆ ಅದಿಪತಿ ಕಾಂಬಕ, ದೇವಡ ಬೋದನೆರ ವಿಷಯತ್ ಆಶ್ಚರ್ಯಪಟ್ಟಿತ್ ಒಡೆಯನ ನಂಬ್‍ಚಿ.

¹³ಅಲ್ಲಿಂಜ ಪೌಲ ಪಿಂಞ ಅಂವೊಂಡ ಕೂಡೆಯಿಂಜ ಎಲ್ಲಾರು ಪಾಫೋಸ್ ಎಣ್ಣುವ ಪಟ್ಟಣತ್‍ನ ಬುಟ್ಟಿತ್ ಸಮುದ್ರ ಮಾರ್ಗವಾಯಿತ್ ಪಂಫುಲ್ಯ ಸೀಮೆಕ್ ಕೂಡ್‍ನ ಪೆರ್ಗೆ ಎಣ್ಣುವ ಪಟ್ಟಣಕ್ ಬಾತ್. ಅಲ್ಲಿಕತ್ತನೆ ಅಯಿಂಗಡ ಕೂಡೆ ಬಂದಂಡಿಂಜ ಯೋಹಾನ ಅಯಿಂಗಳ ಬುಟ್ಟಿತ್ ಪುನಃ ಯೆರೂಸಲೇಮ್‌ಕ್ ವಾಪಸ್ ಪೋಚಿ.

¹⁴ಪಿಂಞ ಅಯಿಂಗ ಪೆರ್ಗೆಯಿಂಜ ಪಿಸಿದ್ಯ ಸೀಮೆಕ್ ಕೂಡ್‍ನ ಅಂತಿಯೋಕ್ಯಕ್ ಬಾತ್. ಸಬ್ಬತ್ ದಿವಸತ್‍ಲ್ ಅಲ್ಲಿಯತ್‍ರ ಸಬಾಮಂದಿರಕ್ ಪೋಯಿತ್ ಅಳ್‌ತತ್.

¹⁵ನ್ಯಾಯಪ್ರಮಾಣ ಪಿಂಞ ಪ್ರವಾದಿಯಂಗಡ ಪುಸ್ತಕತ್‍ನ ಓದಿತಾನ ಪಿಂಞ ಸಬಾಮಂದಿರತ್‍ರ ಪೆರಿಯಯಿಂಗ, ಪೌಲ ಪಿಂಞ ಬಾರ್ನಬಂಗ್, ಅಣ್ಣತಮ್ಮಣಂಗಳೇ, ನಿಂಗ ಜನಕ್ ಬುದ್ದಿ ತಕ್ಕ್ ಎಣ್ಣ್‌ವಕ್ ಉಂಡೇಂಗಿ ಎಣ್ಣೀಂದ್ ಅಯಿಂಗಕ್ ಎಣ್ಣಿತ್ ಆಳ್‌ನ ಅಯಿಚತ್.

¹⁶ಅಕ್ಕ ಪೌಲ: ಎದ್ದಿತ್ ಅಯಿಂಗಕ್ ಕೈ ಸನ್ನೆ ಮಾಡಿತ್, ಇನ್ನನೆ ಎಣ್ಣ್‌ವಕ್ ಸುರು ಮಾಡ್‍ಚಿ. ಇಸ್ರಾಯೇಲ್ ಜನಳೇ, ದೇವನ ಆರಾದನೆ ಮಾಡ್‌ವ ಯೆಹೂದ್ಯ ಅಲ್ಲತ ಜನಳೇ, ಕ್‍ೕಳಿ.

¹⁷ಇಸ್ರಾಯೇಲ್ ಜನಾಂಗತ್‍ರ ದೇವ ನಂಗಡ ಅಜ್ಜಂಗಳ ಗೊತ್ತ್ ಮಾಡ್‍ಚಿ. ಅನ್ನನೆ ನಂಗಡ ಜನಾಂಗ ಐಗುಪ್ತ ದೇಶತ್‍ಲ್ ವಾಸಮಾಡಿಯಂಡಿಪ್ಪಕ, ಅಯಿಂಗಳ ಬಲ್ಯ ಲೆಕ್ಕತ್‍ರ ಜನವಾಯಿತ್ ಮಾಡಿತ್, ದೇವ ಅಂವೊಂಡ ಬಲ್ಯ ಶಕ್ತಿಲ್ ಐಗುಪ್ತ ದೇಶತ್ಂಜ ಪೊರಮೆ ಬಪ್ಪನೆಕೆ ಮಾಡ್‍ಚಿ.

¹⁸ಪಿಂಞ ಸುಮಾರ್ ನಾಪದ್ ಕಾಲಕತ್ತನೆ ಮಣಬೂಮಿಲ್ ಅಯಿಂಗಳ ನಡ್‍ತಿಯಂಡ್ ಅಯಿಂಗ ಮಾಡ್‍ನ ಎಲ್ಲಾನ ಸಯಿಸಿಯಂಡ್ ಇಂಜತ್.

¹⁹ಕಾನಾನ್ ದೇಶತ್‍ಲ್ ಇಂಜ ಏಳ್ ಬೋರೆ ಜಾತಿ ಜನಾಂಗಳ ನಾಶ ಮಾಡಿತ್, ಆ ಜನಡ ದೇಶತ್‍ನ ಅಂವೊಂಡ ಜನಕ್ ಸ್ವಂತವಾಯಿತ್ ಕೊಡ್‍ತತ್.

²⁰ಇನ್ನನೆ ಸುಮಾರ್ 450 ಕಾಲ ಕಯಿಂಜಿ ಪೋಚಿ. ಪಿಂಞ ಪ್ರವಾದಿಯಾನ ಸಮುವೇಲಂಡ ಕಾಲಕತ್ತನೆ ನ್ಯಾಯಾದಿಪತಿಯಳ ನೇಮಿಚಿಟ್ಟತ್.

²¹ಅಲ್ಲಿಂಜ ಅಯಿಂಗ ನಂಗಕ್ ಒರ್ ರಾಜ ಬೋಂಡೂಂದ್ ಕ್‍ೕಪಕ, ದೇವ ಅಯಿಂಗಕ್ ಬೆನ್ಯಾಮೀನಂಡ ಕುಲತ್‍ಲ್ ಕೀಷ ಎಣ್ಣ್‌ವಂವೊಂಡ ಮೋಂವೊನಾನ ಸೌಲನ ಕೊಡ್‍ತತ್. ಅಂವೊ ಅಯಿಂಗಳ ನಾಪದ್ ಕಾಲ ಆಳ್‍ಚಿ.

²²ದೇವ ಸೌಲನ ಅಲ್ಲಗೆಳೆದಿತ್, ದಾವೀದನ ಅಯಿಂಗಡ ರಾಜನಾಯಿತ್ ಮಾಡಿತ್, ಇಷಯಂಡ ಮೋಂವೊನಾನ ದಾವೀದ ನಾನ್ ಇಷ್ಟಪಟ್ಟನೆಕೆ ಉಂಡ್, ಅಂವೊ ನಾನ್ ಕುಶಿ ಪಡ್‍ವ ಎಲ್ಲಾ ಕಾರ್ಯತ್‍ನ ಮಾಡ್‌ವಾಂದ್ ಅಂವೊಂಡ ವಿಷಯತ್ ಸಾಕ್ಷಿ ಕೊಡ್‍ತತ್.

²³ಇನ್ನನೆ ದಾವೀದಂಡ ಸಂತಾನತ್ಂಜ ದೇವ ತಾಂಡ ವಾಗ್ದಾನತ್‍ರನೆಕೆ ಇಸ್ರಾಯೇಲ್ ಜನತ್‍ರ ರಕ್ಷಣೆಕಾಯಿತ್ ಯೇಸು ಎಣ್ಣ್‌ವ ರಕ್ಷಕನ ಅಯಿಚತ್.

²⁴ಯೇಸು ಈ ಲೋಕಕ್ ಬಪ್ಪಕ್ ಮಿಂಞಲೇ, ಪಶ್ಚಾತಾಪ ಪಟ್ಟಿತ್ ದೇವಡ ಕಡೇಕ್ ಮನಸ್ಸ್ ತಿರ್‌ಗ್‌ವ ದೀಕ್ಷಾಸ್ನಾನತ್‍ನ ಇಸ್ರಾಯೇಲ್ ಜನಕ್ ಯೋಹಾನ ಬೋದನೆ ಮಾಡ್‍ಚಿ.

²⁵ಈ ಯೋಹಾನ ತಾಂಡ ಸೇವೇನ ಪೂರ್ತಿಮಾಡ್‍ವಕಾಪಕ, ಜನತ್‍ನ ನೋಟಿತ್: ನಿಂಗ ನನ್ನ ದಾರ್‍ೕಂದ್ ಗೇನಮಾಡಿರ? ನಾನ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನಲ್ಲ, ಆಚೇಂಗಿ ನಾಡ ಬಯ್ಯ ಒಬ್ಬ ಬಪ್ಪ. ಅಂವೊಂಡ ಕಾಲ್‍ರ ಎಕ್ಕಡತ್‌ನ ಉತ್ತ್‌ವಕ್ ಸಹ ನಾಕ್ ಯೋಗ್ಯತೆ ಇಲ್ಲೇಂದ್ ಎಣ್ಣ್‌ಚಿ.

²⁶ಅಣ್ಣತಮ್ಮಣಂಗಳೇ, ಅಬ್ರಹಾಮಂಡ ಸಂತಾನಕಾರಳೇ, ದೇವನ ಆರಾದನೆ ಮಾಡ್‌ವ ಯೆಹೂದ್ಯ ಅಲ್ಲತ ಜನಳೇ, ಈ ರಕ್ಷಣೆರ ಬೋದನೆನ ನಂಗಕಾಯಿತೇ ಅಯಿಚತ್.

²⁷ಯೆರೂಸಲೇಮ್‍ಲ್ ವಾಸ ಮಾಡಿಯಡಿಂಜ ಜನಳು, ಅಯಿಂಗಡ ಅದಿಕಾರಿಯಳು ಯೇಸು ದಾರ್‍ೕಂದ್ ಗೊತ್ತ್‌ಮಾಡಿತ್‌ಲ್ಲೆ. ಪ್ರತಿ ವಾರ ಅಯಿಂಗಡ ಸಬಾಮಂದಿರತ್‍ಲ್ ಓದ್‍ವ ಪ್ರವಾದಿಯಂಗಡ ವಾಕ್ಯತ್‍ಲ್ ಉಳ್ಳ ಅಂವೊಂಡ ವಿಷಯಕೂಡೆ ಅಯಿಂಗಕ್ ಅರ್ಥ ಆಯಿತ್‌ಲ್ಲೆ. ಅದ್ಂಗ್ ಬದ್‍ಲ್ ಅಂವೊ ಚಾವನೆಕೆ ತೀರ್ಪ್ ಮಾಡಿತ್, ಪ್ರವಾದಿಯಂಗ ಎಣ್ಣ್‌ನ ವಾಕ್ಯತ್‍ನ ನೆರೆವೇರಿಚಿಟ್ಟತ್.

²⁸ಅಂವೊಂಗ್ ಮರಣ ಶಿಕ್ಷೆ ಕೊಡ್‍ಪಕ್ ಒರ್ ಕಾರಣ ಕ್‍ಟ್ಟತೆ ಪೋಚೇಂಗಿಯು, ಅಂವೊನ ಕೊಲ್ಲಂಡೂಂದ್ ಪಿಲಾತನ ಕ್‍ೕಟತ್.

²⁹ಅಂವೊಂಡ ವಿಷಯತ್, ಒಳ್‍ದಿತುಳ್ಳಾನೆಲ್ಲ ನೆರವೇರಿಚಿಟ್ಟ ಪಿಂಞ ಅಂವೊನ ಶಿಲುಬೆಯಿಂಜ ಇಳ್‌ಪಿತ್ ಗೋರಿಕ್ ಇಟ್ಟತ್.

³⁰ಆಚೇಂಗಿ ದೇವ ಅಂವೊನ ಚಾವ್‍ಯಿಂಜ ಜೀವವಾಯಿತ್ ಎಪ್ಪ್‌ಚಿ.

³¹ಪಿಂಞ ಅಂವೊ, ಗಲಿಲಾಯಿತ್‌ಂಜ ಯೆರೂಸಲೇಮ್‌ಕ್ ಅಂವೊಂಡ ಕೂಡೆ ಬಂದಯಿಂಗಕ್ ದುಂಬ ದಿವಸ ಅಂವೊ ಜೀವವಾಯಿತ್ ಉಳ್ಳದ್‍ನ ಕಾಂಬ್‌ಚಿಟ್ಟಂಡತ್; ಇಕ್ಕ ಅಯಿಂಗ, ನಂಗಡ ಜನಾಂಗಕ್ ಅಂವೊಂಡ ಸಾಕ್ಷಿಯಳಾಯಿತ್ ಉಂಡ್.

³²ನಂಗಡ ಅಜ್ಜಂಗಕ್ ದೇವ ವಾಗ್ದಾನ ಮಾಡ್‍ನ ನಲ್ಲ ಸುದ್ದಿನ ನಂಗ ನಿಂಗಕ್ ಪ್ರಚಾರ ಮಾಡಿಯಂಡುಂಡ್.

³³ಅದ್ ಎಂತ ಎಣ್ಣ್‌ಚೇಂಗಿ: ದೇವಡ ಪಾಟ್ ಪುಸ್ತಕತ್‍ಲ್, ದಂಡನೆ ಪಾಟ್‍ಲ್ ಒಳ್‍ದಿತುಳ್ಳನೆಕೆ: ನೀನ್ ನಾಡ ಮೋಂವೊ, ಇಂದ್ ನಾನ್ ನೀಡ ಅಪ್ಪನಾಯೇಂದ್ ಉಳ್ಳ ವಾಗ್ದಾನ, ದೇವಡ ಮಕ್ಕಳಾನ ನಂಗಕ್, ಯೇಸುನ ಚಾವ್‍ಯಿಂಜ ಜೀವವಾಯಿತ್ ಎಪ್ಪ್‌ಚಿಟ್ಟ ಮೂಲಕ ನೆರೆವೇರಿಚಿಟ್ಟತ್.[30]

³⁴ಇದ್‍ಲ್ಲತೆ, ದೇವ ಯೇಸುನ ಚತ್ತಯಿಂಗಡ ಮದ್ಯತ್ಂಜ ಎಪ್ಪ್‌ಚಿಟ್ಟಗುಂಡ್ ಅಂವೊ ಪುನಃ ಅಂವೊಂಡ ತಡೀನ ಕೀಂಜ್ ಪೋಪಕ್ ಬುಡ್‍ಲೇಂದ್ ಉಳ್ಳ ವಿಷಯತ್: ನಾನ್ ದಾವೀದಂಗ್ ವಾಗ್ದಾನ ಮಾಡ್‍ನ ಪವಿತ್ರವಾನ ಪಿಂಞ ನೇರಾನ ಆಶೀರ್ವಾದತ್‍ನ ನಿಂಗಕ್ ತಪ್ಪೀಂದ್ ದೇವ ಎಣ್ಣ್‌ಚಿ.[31]

³⁵ದೇವಡ ಪಾಟ್ ಪುಸ್ತಕತ್‍ಲ್ ಇಂಞೊರ್ ಜಾಗತ್‍ಲ್ ನೋಟ್‍ವಕ: ನೀನ್ ನಾಡ ಆತ್ಮತ್‌ನ, ಚಾವ್‍ರ ಜಾಗಕ್ ಪೋಪಕ್ ಬುಡುಲೆ, ನೀಡ ಪವಿತ್ರವಾನಂವೊಂಡ ತಡೀನ ಕೀಂಜ್ ಪೋಪಕ್ ಬುಡ್‍ಲೇಂದ್ ಉಂಡ್.[32]

³⁶ಈ ವಾಕ್ಯ ದಾವೀದಂಡ ವಿಷಯತ್‍ನ ಎಣ್ಣಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ, ದಾವೀದ ಅಂವೊ ಬದ್‍ಕ್‍ನ ಕಾಲತ್‍ಲ್ ತಾಂಡ ಜನಾಂಗಕ್ ದೇವಡ ಚಿತ್ತತ್‍ರನೆಕೆ ಸೇವೆ ಮಾಡ್‍ನ ಪಿಂಞ ಚತ್ತ್ ಪೋಚಿ. ಪಿಂಞ ಅಜ್ಜಂಗಡ ಕೂಡೆ ಅಂವೊಂಡ ತಡೀನ ಜನ ಪೂತತ್. ಅಂವೊಂಡ ತಡಿ ಕೀಂಜಿ ಪೋಚಿ.

³⁷ಅನ್ನನಾಚೇಂಗಿ ದೇವ ಎಪ್ಪ್‌ಚಿಟ್ಟ, ತಡಿ ಕೀಂಜ್ ಪೋಕತೆ ಉಳ್ಳ ಯೇಸುರ ವಿಷಯತ್‍ನೇ ಎಣ್ಣಿಯಂಡುಂಡ್.

³⁸ಆನಗುಂಡ್ ನಾಡ ಅಣ್ಣತಮ್ಮಣಂಗಳೇ, ಈ ಯೇಸುರ ಮೂಲಕ ನಿಂಗಡ ಪಾಪಕ್ ಮನ್ನಿಪ್ ಕ್‍ಟ್ಟ್‌ವಾಂದ್ ನಿಂಗಕ್ ಗೊತ್ತ್ ಮಾಡ್‌ವಕಾಯಿತೇ ನಂಗ ಎಣ್ಣಿಯಂಡುಂಡ್.

³⁹ಮೋಶೇರ ನ್ಯಾಯಪ್ರಮಾಣತ್‍ರಗುಂಡ್ ನಿಂಗ ನೀತಿವಂತಯಿಂಗಳಾಯಿತ್ ಆಪಕ್ ಕಯ್ಯತೆ ಇಂಜಿರ. ಆಚೇಂಗಿ, ಯೇಸುರ ಮೂಲಕ, ದಾರೆಲ್ಲಾ ಅಂವೊಂಡ ಮೇಲೆ ನಂಬಿಕೆ ಇಡ್‌ವ, ಅಯಿಂಗೆಲ್ಲ ನೀತಿವಂತಯಿಂಗಳಾಯಿತ್ ಆಪಕ್ ಅಂವೊ ಮಾಡ್‍ಚಿ.

⁴⁰ಇನ್ನನೆ ಇಪ್ಪಕ, ಪ್ರವಾದಿಯಂಗಡ ಪುಸ್ತಕತ್‍ಲ್ ಎಣ್ಣಿತುಳ್ಳ ಒಂದು ನಿಂಗಡ ಮೇಲೆ ಬಕ್ಕತನೆಕೆ ನೋಟಿಯೊಳಿ. ಅದ್ ಎಂತ ಎಣ್ಣ್‌ಚೇಂಗಿ:

⁴¹ತಿರಸ್ಕಾರ ಮಾಡ್‍ವಯಿಂಗಳೇ, ನೋಟಿ, ಆಶ್ಚರ್ಯ ಪಡಿರಿ, ನಾಶವಾಯಿತ್ ಪೋಯಿರಿ. ನಿಂಗಡ ಕಾಲತ್‍ಲ್ ನಾನ್ ಒರ್ ಕಾರ್ಯತ್‍ನ ಮಾಡ್‌ವಿ; ಆ ಕಾರ್ಯತ್‍ನ ಒಬ್ಬ ನಿಂಗಕ್ ವಿವರಿಚಿಟ್ಟತೇಂಗಿಯು ನಿಂಗ ನಂಬುಲೇಂದ್ ಎಣ್ಣ್‌ವದೇ.[33]

⁴²ಪೌಲ ಪಿಂಞ ಬಾರ್ನಬ ಸಬಾಮಂದಿರತ್‌ನ ಬುಟ್ಟಿತ್ ಪೋಯಂಡಿಪ್ಪಕ, ಬಪ್ಪ ಸಬ್ಬತ್ ದಿವಸತ್‍ಲ್ ಪುನಃ ಈ ವಿಷಯತ್‍ನ ಅಯಿಂಗಕ್ ಎಣ್ಣಿತರಂಡೂಂದ್ ಕ್‍ೕಟಂಡತ್.

⁴³ಸಬಾಮಂದಿತ್‍ಲ್ ಕೂಡ್‍ನ ಜನ ಪೋನ ಪಿಂಞ, ಚೆನ್ನ ಯೆಹೂದ್ಯಂಗ ಪಿಂಞ ಯೆಹೂದ್ಯ ನಂಬಿಕೇಕ್ ಬಂದ ಬಕ್ತಿಯುಳ್ಳಯಿಂಗ, ಪೌಲ ಪಿಂಞ ಬಾರ್ನಬಂಡ ಕೂಟ್‍ಕ್ ಕೂಡ್‍ಚಿ. ಈಂಗ ಅಯಿಂಗಡ ಕೂಡೆ ತಕ್ಕ್ ಪರ್ಂದಂಡ್, ದೇವಡ ಕೃಪೇಲ್ ಸ್ತಿರವಾಯಿತ್ ನಿಪ್ಪಕ್ ಅಯಿಂಗಕ್ ಆಲೋಚನೆ ಕೊಡ್‍ತತ್.

⁴⁴ಮಿಂಞತ್ ಸಬ್ಬತ್‍ರ ದಿವಸತ್‍ಲ್ ಆ ಪಟ್ಟಣತ್‍ರ ಎಲ್ಲಾ ಜನಳು ಒಡೆಯಂಡ ವಾಕ್ಯತ್‍ನ ಕ್‍ೕಪಕ್ ಕೂಡಿ ಬಾತ್.

⁴⁵ಆಚೇಂಗಿ ಯೆಹೂದ್ಯಂಗ, ಜನ ಗುಂಪ್ ಗುಂಪಾಯಿತ್ ಬಪ್ಪಾನ ಕಂಡಿತ್, ಒಟ್ಟೆಕಿಚ್ಚ್‌ಲ್ ದುಂಬಿತ್, ಪೌಲ ಎಣ್ಣುವ ತಕ್ಕ್‌ಕ್ ವಿರೋದವಾಯಿತ್ ದೂಷಣೆ ಮಾಡಿಯಂಡಿಂಜತ್.

⁴⁶ಅಕ್ಕ ಪೌಲ ಪಿಂಞ ಬಾರ್ನಬ, ದೈರ್ಯತ್ಂಜ ತಕ್ಕ್ ಪರ್ಂದತ್. ಅಯಿಂಗಳ ನೋಟಿತ್: ದೇವಡ ವಾಕ್ಯತ್‍ನ ನಿಂಗಕೇ ಆದ್ಯವಾಯಿತ್ ಎಣ್ಣ್‌ವಕ್ ಅವಸ್ಯ ಇಂಜತ್; ಆಚೇಂಗಿ ನಿಂಗ ಅದ್‍ನ ತಳ್ಳಿತ್, ನಿಂಗಳ ನಿತ್ಯ ಜೀವಕ್ ಯೋಗ್ಯ ಇಲ್ಲತಯಿಂಗಳಾಯಿತ್ ನಿಂಗಳೇ ತೀರ್ಪ್ ಮಾಡ್‍ನಗುಂಡ್, ನೋಟಿ, ನಂಗ ನಿಂಗಳ ಬುಟ್ಟಿತ್ ಯೆಹೂದ್ಯಂಗ ಅಲ್ಲತ ಬೋರೆ ಜನಡ ಪಕ್ಕ ಪೋಪಾಂದ್ ಎಣ್ಣ್‌ಚಿ.

⁴⁷ನೀನ್ ಲೋಕತ್‍ರ ಕಡೇಕತ್ತನೆ ರಕ್ಷಕನಾಯಿತ್ ಇಪ್ಪಕ್ ನಿನ್ನ ನಾನ್ ಯೆಹೂದ್ಯ ಅಲ್ಲತಯಿಂಗಕ್ ಬೊಳಿಯಾಯಿತ್ ನೇಮಿಚಿಟ್ಟಿಯೇಂದ್ ಒಡೆಯ ನಂಗಕ್ ಅಪ್ಪಣೆ ಕೊಡ್‍ತಿತುಳ್ಳಗುಂಡ್ ನಂಗ ಇನ್ನನೆ ಮಾಡ್‌ವಾಂದ್ ಎಣ್ಣ್‌ಚಿ.[34]

⁴⁸ಅಲ್ಲಿಂಜ ಯೆಹೂದ್ಯಂಗಲ್ಲತೆ ಬೋರೆ ಬೋರೆ ಜನ ಈ ಬೋದನೆನ ಕ್‍ೕಟಿತ್ ಕುಶಿಪಟ್ಟಿತ್, ಒಡೆಯಂಡ ವಾಕ್ಯತ್‍ನ ಕೊಂಡಾಡ್‍ಚಿ. ನಿತ್ಯ ಜೀವಕಾಯಿತ್ ದೇವ ಗೊತ್ತ್ ಮಾಡ್‍ನ ಎಲ್ಲಾರು ಯೇಸುನ ನಂಬ್‍ಚಿ.

⁴⁹ಅನ್ನನೆ, ದೇವಡ ವಾಕ್ಯ ಆ ಸೀಮೆರ ಎಲ್ಲಾ ಕಡೇಕು ಪಬ್ಬ್‌ಚಿ.

⁵⁰ಆಚೇಂಗಿ ಯೆಹೂದ್ಯಂಗ, ಅಯಿಂಗಡ ನಂಬಿಕೇಕ್ ಕೂಡ್‍ನ ಬಲ್ಯ ಗನ ಉಳ್ಳ ಪೊಣ್ಣಾಳುವಳ ಪಿಂಞ ಊರ್‌ರ ಮುಕ್ಯಪಟ್ಟ ಆಣಾಳ್‍ನ ಒತ್ತಾಯ ಮಾಡಿತ್, ಪೌಲ ಪಿಂಞ ಬಾರ್ನಬಂಗ್ ದುಂಬ ತೊಂದರೆ ಕೊಡ್‌ತಿತ್, ಅಯಿಂಗಳ ತಂಗಡ ಪಟ್ಟಣತ್ಂಜ ಓಟ್‌ಚಿಟ್ಟತ್.

⁵¹ಈಂಗ ತಂಗಡ ಕಾಲ್‌ಲ್ ಉಳ್ಳ ದೂಳ್‍ನ, ಅಯಿಂಗಕ್ ವಿರೋದವಾಯಿತ್ ಕೊಡ್‍ಕಿತ್,[35] ಇಕೋನ್ಯ ಪಟ್ಟಣಕ್ ಪೋಚಿ.

⁵²ಅಂತಿಯೋಕ್ಯ ಪಟ್ಟಣತ್‍ಲ್ ಇಂಜ ಯೇಸುನ ನಂಬ್‍ನಯಿಂಗ ಕುಶೀಲ್ ಪಿಂಞ ಪವಿತ್ರಾತ್ಮತ್‍ಲ್ ದುಂಬಿತ್ ಇಂಜತ್.