Read Kodava ಅಪೊಸ್ತಲ 16 Bible Online

ಅಪೊಸ್ತಲ 16 - Kodava bible

ಅಪೊಸ್ತಲ 16

¹ಅಲ್ಲಿಂಜ ಪೌಲ ದೆರ್ಬೆ ಪಿಂಞ ಲುಸ್ತ್ರ ಎಣ್ಣ್‌ವ ಜಾಗಕ್ ಬಾತ್. ಅಲ್ಲಿ ತಿಮೊಥೆಯ ಎಣ್ಣುವ ಯೇಸುನ ನಂಬ್‍ನ ಒಬ್ಬ ಇಂಜತ್; ಅಂವೊಂಡ ಅವ್ವ ಕ್ರಿಸ್ತಂಡ ಮೇಲೆ ನಂಬಿಕೆ ಉಳ್ಳ ಒರ್ ಯೆಹೂದ್ಯ ಪೊಣ್ಣಾಳಾಯಿತ್ಂಜತ್, ಆಚೇಂಗಿ ಅಂವೊಂಡ ಅಪ್ಪ ಗ್ರೀಕ್ ಜನಕ್ ಕೂಡ್‍ನಂವೊನಾಯಿತ್ಂಜತ್.

²ಲುಸ್ತ್ರ ಪಿಂಞ ಇಕೋನ್ಯ ಪಟ್ಟಣತ್‍ರ ಯೇಸುನ ನಂಬ್‍ನ ಅಣ್ಣತಮ್ಮಣಂಗ ತಿಮೊಥೆಯಂಗ್ ನಲ್ಲ ಸಾಕ್ಷಿ ಕೊಡ್‌ತಿತ್ಂಜತ್.

³ತಿಮೊಥೆಯನ ತಾಂಡಕೂಡೆ ಕಾಕಿಯಂಡ್ ಪೋಪಕ್ ಪೌಲ ಕುಶೀಲ್ ಇಂಜತ್. ಆಚೇಂಗಿ, ಅಂವೊಂಡ ಅಪ್ಪ ಗ್ರೀಕ್ ಜನಕ್ ಕೂಡ್‍ನಂವೋಂದ್ ಅಲ್ಲಿಯತ್‍ರ ಯೆಹೂದ್ಯ ಅಲ್ಲತಯಿಂಗಕ್ ಗೊತ್ತ್ಂಜಗುಂಡ್, ಅಯಿಂಗಕಾಯಿತ್ ತಿಮೊಥೆಯಂಗ್ ಅಂವೊ ಸುನ್ನತಿ ಮಾಡ್‍ಚಿ.

⁴ಅಲ್ಲಿಂಜ ಅಯಿಂಗ ಊರೂರ್‌ಕ್ ಪೋಯಂಡ್ ಇಪ್ಪಕ, ಅಲ್ಲಿಯತ್‍ರ ದೇವಡ ಮಕ್ಕಕೆಲ್ಲ, ಯೆರೂಸಲೇಮ್‍ಲ್ ಉಳ್ಳ ಅಪೊಸ್ತಲಂಗ ಪಿಂಞ ಪೆರಿಯಯಿಂಗ ತೀರ್ಮಾನ ಮಾಡ್‍ನ ಆಜ್ಞೆಕ್ ಒಳಪಟ್ಟಿತಿರಂಡೂಂದ್ ಅಯಿಂಗಕ್ ಬುದ್ದಿ ಎಣ್ಣಿ ಕೊಡ್‌ತಂಡ್ ಪೋಚಿ.

⁵ಆನಗುಂಡ್, ಅಲ್ಲಿಯತ್‍ರ ಸಬೇಯೆಲ್ಲ ಕ್ರಿಸ್ತಂಡ ನಂಬಿಕೇಲ್ ದೃಡವಾಯಿತ್ ಜನಡ ಸಂಖ್ಯೆ ದಿನದಿನಕ್ ಬಲ್ಯದಾಯಂಡ್ ಬಾತ್.

⁶ಆಸ್ಯ ಸೀಮೆಲ್ ದೇವಡ ವಾಕ್ಯತ್‍ನ ಎಣ್ಣ್‌ವಕ್ಕಾಗಾಂದ್ ಪವಿತ್ರಾತ್ಮ ಅಯಿಂಗಳ ತಡೆ ಮಾಡ್‍ನಗುಂಡ್, ಅಯಿಂಗ ಫ್ರುಗ್ಯ ಪಿಂಞ ಗಲಾತ್ಯ ಪ್ರಾಂತ್ಯತ್‍ಲ್ ಪ್ರಯಾಣ ಮಾಡಿಯಂಡಿಂಜತ್.

⁷ಅಯಿಂಗ ಮೂಸ್ಯ ಸೀಮೆರ ಪಕ್ಕ ಬಂದಿತ್ ಅಲ್ಲಿಂಜ ಬಿಥೂನ್ಯ ಎಣ್ಣುವ ಪಟ್ಟಣಕ್ ಪೋಪಕ್ ಪ್ರಯತ್ನಪಟ್ಟತ್. ಅಲ್ಲಿಯು ಸಹ ಯೇಸುರ ಆತ್ಮ ಅಯಿಂಗಳ ಪೋಪಕ್ ಬುಟ್ಟಿತ್‌ಲ್ಲೆ.

⁸ಆನಗುಂಡ್ ಅಯಿಂಗ ಮೂಸ್ಯತ್‍ನ ದಾಟಿತ್ ತ್ರೋವಕ್ ಬಾತ್.

⁹ಅಲ್ಲಿ ಅಂದ್ ಬಯಿಟ್, ಪೌಲ ಒರ್ ದರ್ಶನ ಕಂಡತ್. ಅದ್ ಎಂತ ಎಣ್ಣ್‌ಚೇಂಗಿ, ಮಕೆದೋನ್ಯ ದೇಶತ್‍ರ ಒರ್ ಮನುಷ್ಯ ನಿಂದಂಡ್: ನೀನ್ ಸಮುದ್ರತ್‍ನ ದಾಟಿತ್ ಮಕೆದೋನ್ಯಕ್ ಬಂದಿತ್ ನಂಗಕ್ ಸಹಾಯ ಮಾಡ್‍ೕಂದ್ ಅಂವೊನ ಕ್‍ೕಟಂಡತ್.

¹⁰ಅಂವೊಂಗ್ ಆ ದರ್ಶನ ಕ್‍ಟ್ಟ್‌ನ ಪಿಂಞ, ದೇವ ಆ ಸೀಮೆಲ್ ಉಳ್ಳಯಿಂಗಕ್ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ನಂಗಳ ಕಾಕ್‍ಚೀಂದ್ ನಂಗಕ್ ಕಂಡಿತವಾಯಿತ್ ಗೊತ್ತಾನಗುಂಡ್, ನಂಗ ಮಕೆದೋನ್ಯಕ್ ಪೋಪಕ್ ಪ್ರಯತ್ನಪಟ್ಟತ್.

¹¹ನಂಗ ತ್ರೋವತ್ಂಜ ಸಮುದ್ರತ್‍ರ ಮಾರ್ಗವಾಯಿತ್ ಪ್ರಯಾಣ ಮಾಡಿತ್ ನೇರೆ ಸಮೊಥ್ರಾ ದ್ವೀಪಕ್ ಬಂತ್ ಪಿತ್ಯಾಂದ್ ನೆಯಾಪೊಲಿಕ್ ಕೂಡಿತ್ ಅಲ್ಲಿಂಜ ಫಿಲಿಪ್ಪಿ ಪಟ್ಟಣಕ್ ಎತ್ತ್‌ಚಿ.

¹²ಫಿಲಿಪ್ಪಿ ಎಣ್ಣುವ ಪಟ್ಟಣ ಮಕೆದೋನ್ಯತ್‍ರ ಮುಕ್ಯಪಟ್ಟ ಪಟ್ಟಣವಾಯಿತ್ಂಜತ್, ರೋಮ್ ರಾಜ್ಯತ್‍ರ ಜನ ಅಲ್ಲಿ ಬಂದಿತ್ ವಾಸ ಮಾಡಿಯಂಡಿಂಜತ್. ಈ ಪಟ್ಟಣತ್‍ಲ್ ನಂಗ ಚೆನ್ನ ದಿವಸ ಇಂಜತ್.

¹³ಸಬ್ಬತ್ ದಿವಸತ್‍ಲ್, ಪಟ್ಟಣತ್‍ರ ಪೊರಮೆ ಪೋಯಿತ್, ಪೊಳೆರ ಕರೆಲ್, ಜನ ಎಕ್ಕಾಲು ಅಲ್ಲಿ ಪ್ರಾರ್ಥನೆ ಮಾಡ್‌ವಾಂದ್ ಗೇನ ಮಾಡಿತ್ ನಂಗ ಅಲ್ಲಿ ಅಳ್‌ತತ್. ಅಲ್ಲಿ ಕೂಡಿ ಬಂದಿತ್ಂಜ ಪೊಣ್ಣಾಳುವಕ್ ನಂಗ ಉಪದೇಶ ಮಾಡ್‍ಚಿ.

¹⁴ನಂಗ ಎಣ್ಣುವಾನ ಕ್‍ೕಟಯಿಂಗಡಡೆಲ್ ಲುದ್ಯ ಎಣ್ಣುವ ದೇವನ ಆರಾದನೆ ಮಾಡ್‌ವ ಒರ್ ಪೊಣ್ಣಾಳ್ ಇಂಜತ್. ಅವ ಧೂಮ್ರ ರಂಗ್‍ರ ಬಟ್ಟೆ ಮಾರ್‌ವಳು, ಥುವತೈ ಎಣ್ಣ್‌ವ ಊರ್‍ಂಜ ಬಂದವಳು ಆಯಿತ್ಂಜತ್. ಪೌಲಂಡ ತಕ್ಕ್‌ನ ಕ್‍ೕಪಕ್ ಒಡೆಯ ಅವಡ ಹೃದಯತ್‍ನ ತೊರ್ಂದತ್.

¹⁵ಅವ ಪಿಂಞ ಅವಡ ಮನೆಕಾರಂಗೆಲ್ಲ ದೀಕ್ಷಾಸ್ನಾನ ಎಡ್‌ತ ಪಿಂಞ, ಅವ ನಂಗಳ ನೋಟಿತ್: ನಾನ್ ಕ್ರಿಸ್ತನ ನಂಬಿತುಳ್ಳ್‌ಂದ್ ನಿಂಗ ನಂಬ್‍ಚೇಂಗಿ, ನಾಡ ಮನೆಕ್ ಬಂದಿತ್ ಒಳಿಯಂಡೂಂದ್ ಒತ್ತಾಯ ಮಾಡ್‍ಚಿ.

¹⁶ಒರ್ ಕುರಿ, ನಂಗ ಪ್ರಾರ್ಥನೆ ಮಾಡ್‌ವ ಆ ಜಾಗಕ್ ಪೋಯಂಡಿಪ್ಪಕ, ಕೂಳಿ ಪುಡ್‍ಚಿತ್ಂಜ ಒರ್ ಆಳ್ ಮೂಡಿ ನಂಗಡ ಮಿಂಞತ್ ಬಾತ್. ಅವ ಮಿಂಞಕ್ ಆಪಕುಳ್ಳ ವಿಷಯತ್‍ನ ಎಣ್ಣ್‌ವಗುಂಡ್, ಅದ್ಂಡ ಮೂಲಕ, ಅವಡ ಎಜಮಾನಂಗ್ ದುಂಬ ಆದಾಯ ಮಾಡಿ ಕೊಡ್‍ತಂಡಿಂಜತ್.

¹⁷ಆ ಕಣಿಯತಿ, ಪೌಲ ಪಿಂಞ ನಂಗಡ ಬೆಂಬರತ್ ಬಂದಿತ್: ಈ ಮನುಷ್ಯಂಗ ದೇವಾದಿ ದೇವಡ ಸೇವಕಂಗ; ರಕ್ಷಣೆರ ಬಟ್ಟೇನ ನಂಗಕ್ ಎಣ್ಣಿ ಕೊಡ್‍ಪಯಿಂಗಾಂದ್ ಕೂತ್ ಕೊಡ್‌ತಂಡ್ ಇಂಜತ್.

¹⁸ಇನ್ನನೆ ದುಂಬ ದಿವಸ ಮಾಡ್‍ನಗುಂಡ್ ಪೌಲಂಗ್ ದುಂಬ ಚೆಡಿ ಬಂತ್, ಅವಡ ಪಕ್ಕ ತಿರಿತ್ ಆ ಕೂಳಿಕ್: ನೀನ್ ಇವಳ ಬುಟ್ಟಿತ್ ಪೋಂಡೂಂದ್ ಯೇಸು ಕ್ರಿಸ್ತಂಡ ಪೆದತ್‍ಲ್ ನೀಕ್ ಆಜ್ಞೆ ಮಾಡ್‌ವೀಂದ್ ಎಣ್ಣ್‌ಚಿ. ಅದೇ ಗಳಿಗೆಲ್ ಅದ್ ಅವಳ ಬುಟ್ಟಿತ್ ಪೋಚಿ.

¹⁹ಅವಡ ಎಜಮಾನಂಗ್ ಅವಡಗುಂಡ್ ಇಂಞು ಮಿಂಞಕ್ ಆದಾಯ ಒಂದು ಕ್‍ಟ್ಟ್‌ಲೇಂದ್ ಗೊತ್ತಾನ ಪಿಂಞ, ಅಂವೊ ಪೌಲ ಪಿಂಞ ಸೀಲನ ಪುಡ್‌ಚಿತ್, ಚತ್ತೆಲ್ ಎಲ್ಲಾಡ ಮಿಂಞತ್ ಅದಿಕಾರಿಯಂಗಡ ಪಕ್ಕ ಬಲ್‍ಚಂಡ್ ಪೋಚಿ.

²⁰ಅಯಿಂಗಳ ಅದಿಕಾರಿಯಂಗಡ ಮಿಂಞಕ್ ಕೊಂಡ್ ಪೋಯಿತ್, ಅದಿಕಾರಿಯಳ ನೋಟಿತ್: ಯೆಹೂದ್ಯಂಗಳಾನ ಈ ಮನುಷ್ಯಂಗ ನಂಗಡ ಪಟ್ಟಣತ್‍ನ ದುಂಬ ಗಲಿಬಿಲಿ ಮಾಡಿಯಂಡ್ ಉಂಡ್,

²¹ರೋಮ್ ರಾಜ್ಯತ್‍ರ ಜನಳಾನ ನಂಗ ಸ್ವೀಕಾರ ಮಾಡ್‌ವಕ್ ಕಯ್ಯತ ಪಿಂಞ ನ್ಯಾಯಪ್ರಮಾಣತ್‍ರನೆಕೆ ಮಾಡ್‌ವಕ್ ಕಯ್ಯತ ಪದ್ದತಿನ ಬೋದನೆ ಮಾಡಿಯಂಡುಂಡ್‍ೕಂದ್ ಎಣ್ಣ್‌ಚಿ.

²²ಅಕ್ಕ ದುಂಬ ಜನ ಒಕ್ಕಚೆ ಕೂಡಿತ್ ಅಯಿಂಗಕ್ ವಿರೋದವಾಯಿತ್ ಎದ್ದತ್. ಅಕ್ಕ ಬಲ್ಯ ಅದಿಕಾರಿಯ ಈಂಗಡ ಬಟ್ಟೇನ ಕೀತ್‍ವಂಜಿ, ಕೋಲ್‍ಲ್ ಪೊಯ್ಯಂಡೂಂದ್ ಆಜ್ಞೆ ಕೊಡ್‍ತತ್.

²³ಅಯಿಂಗಳ ದುಂಬ ಪೊಜ್ಜಿತಾನ ಪಿಂಞ ಜೈಲ್‌ಕ್ ಇಟ್ಟಿತ್, ಅಯಿಂಗಳ ಬದ್ರವಾಯಿತ್ ಕಾತಂಡಿರಂಡೂಂದ್ ಜೈಲ್‍ರ ಅದಿಕಾರಿಕ್ ಹುಕುಮ್ ಕೊಡ್‍ತತ್.

²⁴ಜೈಲ್‍ರ ಅದಿಕಾರಿ ಇಂತ ಹುಕುಮ್‍ನ ಪಡ್ಂದಿತ್, ಅಯಿಂಗಳ ಜೈಲ್‍ರ ಒಳ್‍ಲ್ ಇಪ್ಪ ಕೋಂಬರೇಕ್ ಇಟ್ಟಿತ್, ಅಯಿಂಗಡ ಕಾಲ್‌ನ ಬಲ್ಯ ಮರಪಾರ್‌ಲ್ ಕೆಟ್ಟಿಚಿಟ್ಟತ್.

²⁵ನಡ್‍ಪಾದ್ರೆಲ್, ಪೌಲ ಪಿಂಞ ಸೀಲ, ಪ್ರಾರ್ಥನೆ ಮಾಡಿಯಂಡ್, ಪಾಟ್ ಪಾಡಿತ್ ದೇವನ ತುದಿಚಂಡಿಂಜತ್; ಜೈಲ್‍ಯಿಂಜ ಬೋರೆ ಕೈದಿಯಳು ಅದ್‍ನ ಕ್‍ೕಟಂಡ್ ಇಂಜತ್.

²⁶ಅಕ್ಕಣೆಕ್, ಬಲ್ಯದಾಯಿತ್ ನೆಲಗ್‌ಡ್‍ಗಿತ್, ಜೈಲ್‍ರ ಅಡಿಪಾಯ ಅಲ್ಲಾಡಿ ಪೋಚಿ. ಒಡನೆ ಎಲ್ಲಾ ಪಡಿಯು ತಾನಾಯಿತೇ ತೊರ್ಂದತ್. ಅಲ್ಲಿಂಜ ಎಲ್ಲಾ ಕೈದಿಯಡ ಕೆಟ್ಟ್ ಉತ್ತಿತ್ ಬುದ್ದತ್.

²⁷ಜೈಲ್‍ನ ಕಾತಂಡಿಂಜ ಸಿಪಾಯಿ ಎದ್ದಿತ್, ಜೈಲ್‍ರ ಪಡಿಯೆಲ್ಲ ತೊರ್‌ಂದಿತುಳ್ಳಾನ ಕಂಡಿತ್, ಕೈದಿಯ ತಪ್ಪಿಚಿಟ್ಟಂಡ್ ಪೋಯಿರ್‌ತ್‍ೕಂದ್ ಗೇನ ಮಾಡಿತ್, ಅಂವೊ ಕತ್ತಿನ ಎಡ್‍ತಿತ್ ತನ್ನ ತಾನೆ ಕೊಲ್ಲ್‌ವಕ್ ಇಂಜತ್.

²⁸ಆಚೇಂಗಿ ಪೌಲ: ನೀಡ ಪ್ರಾಣಕ್ ಒಂದು ಮಾಡಿಯತೆ, ನಂಗೆಲ್ಲಾರು ಇಲ್ಲೇ ಉಂಡ್‍ೕಂದ್ ಎಣ್ಣ್‌ಚಿ.

²⁹ಅಕ್ಕ ಅಂವೊ ಬೊಳ್‌ಚತ್‍ನ ಎಡ್‌ತ ಬಪ್ಪಕ್ ಎಣ್ಣಿತ್, ಒಳ್‍ಕ್ ಓಡಿ ಬಂದಿತ್ ನಡ್‍ಗಿಯಂಡ್ ಪೌಲ ಪಿಂಞ ಸೀಲಂಡ ಮಿಂಞತ್ ಅಡ್ಡ ಬುದ್ದತ್.

³⁰ಅಲ್ಲಿಂಜ ಅಯಿಂಗಳ ಅಂವೊ ಪೊರಮೆ ಕಾಕಿಯಂಡ್ ಬಂದಿತ್: ಸ್ವಾಮಿಯಳೇ, ನಂಗಕ್ ರಕ್ಷಣೆ ಕ್‍ಟ್ಟ್‌ವಕ್ ನಂಗ ಎಂತ ಮಾಡಂಡೂಂದ್ ಕ್‍ೕಟತ್.

³¹ಅದ್ಂಗ್ ಅಯಿಂಗ: ಒಡೆಯನಾನ ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಇಡಿ, ಅಕ್ಕ ನೀಕು ನೀಡ ಮನೆಕಾರಂಗಕು ರಕ್ಷಣೆ ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.

³²ಪಿಂಞ ಅಯಿಂಗ ಅಂವೊಂಗು ಅಂವೊಂಡ ಮನೆಲ್ ಇಂಜಯಿಂಗಕು ಒಡೆಯಂಡ ವಾಕ್ಯತ್‍ನ ಬೋದನೆ ಮಾಡ್‍ಚಿ.

³³ಅದಲ್ಲತೆ, ಆ ಬಯಿಟ್ ನೇರತ್‍ಲೇ, ಅಂವೊ ಅಯಿಂಗಳ ಕಾಕಿಯಂಡ್ ಪೋಯಿತ್ ಅಯಿಂಗಡ ಗಾಯತ್‍ನ ಕತ್ತ್‌ಚಿ. ಪಿಂಞ ಅಂವೊನು ಅಂವೊಂಡ ಮನೆಲ್ ಇಂಜಯಿಂಗಳು ಅಕ್ಕಣೆ ದೀಕ್ಷಾಸ್ನಾನ ಎಡ್‍ತಂಡತ್

³⁴ಅದ್ ಆನ ಪಿಂಞ ಅಯಿಂಗಳ ತಾಂಡ ಮನೆಕ್ ಕಾಕಿಯಂಡ್ ಪೋಯಿತ್ ಉಂಬ್‌ಚಿಟ್ಟತ್. ಅನ್ನನೆ ಅಂವೊ ತಾಂಡ ಮನೆಲ್ ಉಳ್ಳಯಿಂಗಡ ಕೂಡೆ ದೇವಡ ಮೇಲೆ ನಂಬಿಕೆ ಇಟ್ಟಗುಂಡ್ ಕುಶೀಲ್ ಇಂಜತ್.

³⁵ಪಿತ್ಯಾಂದ್ ಪೊಲಾಕ ರೋಮ್ ರಾಜ್ಯತ್‍ರ ಅದಿಕಾರಿಯಂಗ, ಈ ಮನುಷ್ಯಂಗಳ ಬುಡ್‍ಗಡೆ ಮಾಡೀಂದ್ ಜೈಲ್‍ರ ಅದಿಕಾರಿಕ್ ಎಣ್ಣಿತ್ ಅಯಿಂಗಡ ಅದಿಕಾರಿಯಂಗಳ ಅಯಿಚತ್.

³⁶ಜೈಲ್‍ರ ಅದಿಕಾರಿ ಪೌಲಂಗ್ ಇನ್ನನೆ ಅರಿಚಿಟ್ಟತ್. ಅದಿಕಾರಿಯಂಗ ನಿಂಗಳ ಜೈಲಿಂಜ ಬುಡುಗಡೆ ಮಾಡಂಡೂಂದ್ ಆಜ್ಞೆ ಮಾಡಿತ್ ಸಿಪಾಯಿಯಳ ಅಯಿಚಿತುಂಡ್. ಆನಗುಂಡ್ ಇಕ್ಕ ನಿಂಗ ಸಮಾದಾನತ್‍ಲ್ ಪೊರಟ್ ಪೋಯೀಂದ್ ಎಣ್ಣ್‌ಚಿ.

³⁷ಅದ್ಂಗ್ ಪೌಲ: ರೋಮ್ ರಾಜ್ಯತ್‍ರ ಪ್ರಜೆಯಳಾನ ನಂಗಳ, ಏದ್ ವಿಚಾರಣೆಯು ಮಾಡತೆ, ಎಲ್ಲಾಡ ಮಿಂಞತ್‍ಲ್ ಪೊಜ್ಜಿತ್, ಜೈಲ್‌ಕ್ ಇಟ್ಟತ್. ಇಕ್ಕ ಗುಟ್ಟಾಯಿತ್ ನಂಗಳ ಪೊರಮೆ ಅಯಿಪದಾ? ಅನ್ನನೆ ಆಪಕ್ಕಾಗ; ಅಯಿಂಗಳೇ ಬಂತ್ ನಂಗಳ ಪೊರಮೆ ಕಾಕಿಯಂಡ್ ಪೋಯಿತ್ ಅಯಿಕಂಡೂಂದ್ ಎಣ್ಣ್‌ಚಿ.

³⁸ಅದಿಕಾರಿಯಂಗ, ಅಯಿಂಗಡ ಅದಿಕಾರಿಯಂಗಕ್ ಈಂಗ ರೋಮ್ ರಾಜ್ಯತ್‍ರ ಪ್ರಜೆಯಿಂಗಾಂದ್ ಅರಿಚಿಡ್‌ವಕ ಅಯಿಂಗಕ್ ಪೋಡಿ ಆಚಿ;

³⁹ಅಕ್ಕ ಅದಿಕಾರಿಯಂಗ ಅಯಿಂಗಡ ಪಕ್ಕ ಪೋಯಿತ್ ಸಮಾದಾನತ್‍ಲ್ ತಕ್ಕ್ ಪರ್ಂದಿತ್ ಪೊರಮೆ ಕಾಕಿಯಂಡ್ ಬಾತ್. ನಿಂಗ ಈ ಊರ್‌ನ ಬುಟ್ಟಿತ್ ಪೊರಡಂಡೂಂದ್ ಬೋಡಿಯಂಡತ್.

⁴⁰ಅಕ್ಕ ಅಯಿಂಗ ಜೈಲ್‍ರ ಒಳ್‌ಳಿಂಜ ಪೊರಟಿತ್ ಲುದ್ಯ ಎಣ್ಣುವಡ ಮನೆಕ್ ಬಂತ್ ಯೇಸುನ ನಂಬ್‍ನ ಅಣ್ಣತಮ್ಮಣಂಗಳ ನೋಟಿತ್ ಅಯಿಂಗಳ ದೈರ್ಯಪಡ್‍ತಿತ್ ಅಲ್ಲಿಂಜ ಪೊರಟ್ ಪೋಚಿ.