Read Kodava ಅಪೊಸ್ತಲ 17 Bible Online

ಅಪೊಸ್ತಲ 17 - Kodava bible

ಅಪೊಸ್ತಲ 17

¹ಅಯಿಂಗ ಅಂಫಿಪೊಲಿ ಪಿಂಞ ಅಪೊಲೋನ್ಯ ಎಣ್ಣ್‌ವ ಪಟ್ಟಣತ್‍ನ ದಾಟಿತ್ ಥೆಸಲೊನೀಕ ಪಟ್ಟಣಕ್ ಬಾತ್; ಅಲ್ಲಿ ಯೆಹೂದ್ಯಂಗಕ್ ಒರ್ ಸಬಾಮಂದಿರ ಇಂಜತ್.

²ಪೌಲ, ತಾನ್ ಎಲ್ಲಾ ಜಾಗತ್‍ಲ್ ಮಾಡ್‌ವ ಪ್ರಕಾರ ಸಬಾಮಂದಿರಕ್ ಪೋಚಿ. ಅಲ್ಲಿ ಮೂಂದ್ ಸಬ್ಬತ್ ದಿವಸತ್‍ಲ್, ದೇವಡ ವಾಕ್ಯತ್ಂಜ ಅಯಿಂಗಡ ಕೂಡೆ ಕ್ರಿಸ್ತಂಡ ವಿಷಯತ್ ವಾದ ಮಾಡ್‍ಚಿ.

³ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಕಷ್ಟತ್‍ನ ಅನುಬವಿಚಿಟ್ಟಿತ್, ಚತ್ತಿತ್, ಜೀವವಾಯಿತ್ ಎದ್ದಿತ್ ಬರಂಡೂಂದ್ ಉಳ್ಳದ್‍ನ ಎಣ್ಣಿಯಂಡ್, ನಾನ್ ಇಕ್ಕ ಎಣ್ಣುವ ಯೇಸುವೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ದೃಡವಾಯಿತ್ ನಿರೂಬಿಚಿಟ್ಟತ್.

⁴ಅಕ್ಕ, ಚೆನ್ನ ಯೆಹೂದ್ಯಂಗ ಪೌಲ ಎಣ್ಣುವದ್ ನಂಬುವನೆಕೆ ಇಂಜಗುಂಡ್, ಪೌಲ ಪಿಂಞ ಸೀಲಂಡ ಕೂಡೆ ಕೂಡಿಯಂಡತ್. ಅಲ್ಲಿ ದೇವನ ಆರಾದನೆ ಮಾಡಿಯಂಡಿಂಜ ದುಂಬ ಯೆಹೂದ್ಯಂಗಲ್ಲತ ಜನಳು, ಸುಮಾರ್ ಮಕ್ಯಪಟ್ಟ ಪೊಣ್ಣಾಳುವಳು, ಪೌಲ ಪಿಂಞ ಸೀಲಂಡ ಕೂಟ್‍ಕ್ ಕೂಡಿಯಂಡತ್.

⁵ಇದ್‍ನ ನಂಬತ ಚೆನ್ನ ಯೆಹೂದ್ಯಂಗ, ಒಟ್ಟೆಕಿಚ್ಚ್ ಪಟ್ಟಿತ್ ಅಲ್ಲಿ ಚತ್ತೆಲ್ ಇಂಜ ಚೆನ್ನ ಕೆಟ್ಟ ಜನಳ ಕಾಕಿತ್, ಗುಂಪ್‍ಕೂಡಿತ್, ಪಟ್ಟಣತ್‍ಲ್ ಕಲಹ ಮಾಡಿತ್, ಪೌಲ ಪಿಂಞ ಸೀಲನ ಪಟ್ಟಣತ್‍ಲ್ ಎಲ್ಲಾಡ ಮಿಂಞತ್ ಬಲ್‍ಚಂಡ್ ಬರಂಡೂಂದ್ ತ್‍ೕಡಿಯಂಡ್ ಬಾತ್. ಅನ್ನನೆ ಪೌಲ ಪಿಂಞ ಸೀಲ ವಾಸ ಮಾಡಿಯಂಡಿಂಜ ಯಾಸೋನ ಎಣ್ಣ್‌ವಂವೊಂಡ ಮನೆಕ್ ಬಾತ್.

⁶ಅಲ್ಲಿ ಪೌಲ ಪಿಂಞ ಸೀಲನ ಕಾಂಗತಗುಂಡ್, ಆ ಜನ ಯಾಸೋನ ಪಿಂಞ ಅಲ್ಲಿ ಇಂಜ ಚೆನ್ನ ದೇವಡ ಮಕ್ಕಳ ಪಟ್ಟಣತ್‍ರ ಅದಿಕಾರಿಯಂಗಡ ಪಕ್ಕ ಬಲ್‍ಚಂಡ್ ಪೋಯಿತ್: ಲೋಕತ್‍ನ ಗಲಿಬಿಲಿ ಮಾಡ್‌ವಯಿಂಗ ಇಲ್ಲಿಕೂ ಬಂದಿತುಂಡ್,

⁷ಅಯಿಂಗಳ ಈ ಯಾಸೋನ ಅಂವೊಂಡ ಮನೆಕ್ ಕೂಟಿಯಂಡತ್. ಈಂಗೆಲ್ಲಾರು ಯೇಸು ಎಣ್ಣುವ ಬೋರೊಬ್ಬನ ರಾಜಾಂದ್ ಎಣ್ಣಿಯಂಡ್, ಕೈಸರಂಡ ಆಜ್ಞೆಕ್ ವಿರೋದವಾಯಿತ್ ನಡ್‌ಂದಂಡುಂಡ್‍ೕಂದ್ ಎಣ್ಣ್‌ಚಿ.

⁸ಪಟ್ಟಣತ್‍ರ ಜನ ಪಿಂಞ ಅದಿಕಾರಿಯಂಗ ಈ ತಕ್ಕ್‌ನೆಲ್ಲ ಕ್‍ೕಪಕ, ಅಯಿಂಗಕು ಕಲಹ ಮಾಡ್‌ವನೆಕೆ ಆಚಿ.

⁹ಅಯಿಂಗ, ಯಾಸೋನ ಪಿಂಞ ಅಂವೊಂಡ ಕೂಡೆ ಇಂಜಯಿಂಗಡಿಂಜ ಜಾಮೀನ್ ಎಡ್‍ತಂಡ್, ಬಯ್ಯ ಅಯಿಂಗಳ ಬುಟ್ಟತ್.

¹⁰ಒಡನೆ, ಯೇಸುನ ನಂಬ್‍ನ ಅಣ್ಣತಮ್ಮಣಂಗ ಬಯಿಟ್ ನೇರತೆ ಪೌಲ ಪಿಂಞ ಸೀಲನ ಬೆರೋಯ ಪಟ್ಟಣಕ್ ಅಯಿಚತ್; ಅಯಿಂಗ ಅಲ್ಲಿಕ್ ಎತ್ತಿತ್ ಯೆಹೂದ್ಯಂಗಡ ಸಬಾಮಂದಿರಕ್ ಪೋಚಿ.

¹¹ಆ ಪಟ್ಟಣತ್‍ರ ಸಬೇಲ್ ಉಳ್ಳಯಿಂಗ ತೊರ್‌ಂದ ಮನಸ್ಸ್‌ಲ್ ದೇವಡ ವಾಕ್ಯತ್‍ನ ಅಂಗಿಕಾರಮಾಡಿತ್, ಈಂಗಡ ಬೋದನೆಲ್ ಇನ್ನತೆಲ್ಲ ಸತ್ಯ ಉಂಡಾಂದ್, ದಿನಾಲು ದೇವಡ ವಾಕ್ಯತ್‍ಲ್ ತ್‍ೕಡಿಯಂಡಿಂಜಗುಂಡ್, ಥೆಸಲೊನೀಕ ಪಟ್ಟಣತ್‍ರ ದೇವಡ ಮಕ್ಕಕಿಂಜ ಚಾಯಿ ಗುಣಕಾರಂಗಳಾಯಿತ್ಂಜತ್.

¹²ಅಯಿಂಗ ಅನ್ನನೆ ಮಾಡ್‍ನ ಫಲವಾಯಿತ್, ಅಯಿಂಗಡಲ್ಲಿ ದುಂಬ ಯೆಹೂದ್ಯಂಗ ಪಿಂಞ ದುಂಬ ಯೆಹೂದ್ಯಂಗಲ್ಲತ ಜನಾಂಗತ್‍ರ ಮುಕ್ಯಪಟ್ಟ ಪೊಣ್ಣಾಳುವ ಪಿಂಞ ಆಣಾಳುವ ಕ್ರಿಸ್ತನ ನಂಬ್‍ಚಿ.

¹³ಪೌಲ ಬೆರೋಯತ್‍ಲ್ ದೇವಡ ವಾಕ್ಯತ್‍ನ ಎಣ್ಣಿಯಂಡುಂಡ್‍ೕಂದ್ ಥೆಸಲೊನೀಕತ್‍ರ ಯೆಹೂದ್ಯಂಗಕ್ ಗೊತ್ತಾಪಕ, ಅಯಿಂಗ ಅಲ್ಲಿಯು ಬಂತ್ ಜನಳ ಕೂಟಿತ್, ಕಲಹ ಮಾಡ್‍ಚಿ.

¹⁴ಅಕ್ಕಣೆಕೆ, ಅಲ್ಲಿಯತ್‍ರ ಯೇಸುನ ನಂಬ್‍ನ ಅಣ್ಣತಮ್ಮಣಂಗ, ಪೌಲನ ಸಮುದ್ರತ್‍ರ ಕರೆಕತ್ತನೆ ಅಯಿಚತ್. ಆಚೇಂಗಿ ಸೀಲ ಪಿಂಞ ತಿಮೊಥೆಯ ಅಲ್ಲಿಯೇ ಇಂಜತ್.

¹⁵ಪೌಲಂಡ ಕೂಡೆ ಪೋನಯಿಂಗ ಅಂವೊನ ಅಥೇನೆ ಪಟ್ಟಣಕತ್ತನೆ ಕಾಕಿಯಂಡ್ ಪೋಯಿತ್, ಸೀಲ ಪಿಂಞ ತಿಮೊಥೆಯ ನಾಡ ಪಕ್ಕ ಬೆರಿಯ ಬರಂಡೂಂದ್ ಉಳ್ಳ ಪೌಲಂಡ ಅಪ್ಪಣೆನ ಪಡ್ಂದಿತ್ ವಾಪಸ್ ಪೋಚಿ.

¹⁶ಪೌಲ ಅಯಿಂಗಕಾಯಿತ್ ಅಥೇನೆ ಪಟ್ಟಣತ್‍ಲ್ ಪಾರಕಾತಂಡ್ ಇಪ್ಪಕ, ಆ ಪಟ್ಟಣತ್‍ಲ್ ಎಲ್ಲಿ ನೋಟ್‍ಚೇಂಗಿಯು ವಿಗ್ರಹ ದುಂಬಿತ್ ಉಳ್ಳಾನ ಕಂಡಿತ್, ಅಂವೊಂಡ ಆತ್ಮಕ್ ಸಮಾದಾನ ಇಲ್ಲತನೆಕೆ ಬೇಜಾರ್ ಆಚಿ.

¹⁷ಆನಗುಂಡ್, ಅಂವೊ ಸಬಾಮಂದಿರಕ್ ಪೋಯಿತ್ ಅಲ್ಲಿಂಜ ಯೆಹೂದ್ಯಂಗಡ ಕೂಡೆಯು, ಯೆಹೂದ್ಯ ಅಲ್ಲತಯಿಂಗ ದೇವನ ಆರಾದನೆ ಮಾಡ್‌ವ ಜನಡ ಕೂಡೆಯು ಪಿಂಞ ದಿನಾಲು ಪೇಟೇಲ್ ಕಾಂಬಯಿಂಗಡ ಕೂಡೆಯೆಲ್ಲ ಚರ್ಚೆ ಮಾಡಿಯಂಡಿಂಜತ್.

¹⁸ಅಕ್ಕ, ಎಪಿಕೂರಿಯ ಪಿಂಞ ಸ್ತೋಯಿಕ ಎಣ್ಣುವ ತತ್ವ ಜ್ಞಾನಿಯಂಗಡ ಗುಂಪಿಂಜ ಚೆನ್ನ ಜನ, ಅಂವೊಂಡ ಕೂಡೆ ಚರ್ಚೆ ಮಾಡ್‍ಚಿ. ಅಯಿಂಗಡಲ್ಲಿ ಚೆನ್ನ ಜನ, ನಿಪ್ಪ್‌ಚಿಡತೆ ತಕ್ಕ್ ಪರಿವ ಮಾತ್‍ಮಲ್ಲ, ಇಂವೊ ಎಂತ ಎಣ್ಣ್‌ವಾಂದ್ ಕ್‍ೕಟತ್. ಪೌಲ ಯೇಸುರ ನಲ್ಲ ಸುದ್ದಿನ ಪಿಂಞ ಅಂವೊ ಚಾವ್‍ಯಿಂಜ ಜೀವವಾಯಿತ್ ಬಂದ ವಿಷಯತ್‍ನ ಪ್ರಚಾರ ಮಾಡ್‍ನಗುಂಡ್, ಚೆನ್ನ ಜನ: ಇಂವೊ ಬೋರೆ ದೇವನ ಎಣ್ಣಿಯಂಡುಂಡ್‍ೕಂದ್ ಎಣ್ಣ್‌ಚಿ.

¹⁹ಅಯಿಂಗ ಪೌಲನ ಕಾಕಿಯಂಡ್ ಆ ಪಟ್ಟಣತ್‍ರ ಅರಿಯೊಪಾಗ ಎಣ್ಣುವ ಆಲೋಚನೆ ಸಬೆರ ವೇದಿಕೆಕ್ ಕಾಕಿಯಂಡ್ ಪೋಯಿತ್: ನೀನ್ ಎಣ್ಣುವ ಈ ಪುದಿಯ ಬೋದನೆ ಎಂ‍ತಾಂದ್ ನಂಗಕ್ ಎಣ್ಣ್‍ೕಂದ್ ಕ್‍ೕಟತ್.

²⁰ನೀನ್ ನಂಗಕ್ ಗೊತ್ತಿಲ್ಲತ ಪುದಿಯ ವಿಷಯತ್‍ನ ಎಣ್ಣಿಯಂಡುಳ್ಳಿಯ, ಅದ್ಂಡ ಅರ್ಥ ಎಂತ್‍ೕಂದ್ ಅರಿಯುವಕ್ ನಂಗ ಕುಶೀಲ್ ಉಂಡ್‍ೕಂದ್ ಎಣ್ಣ್‌ಚಿ.

²¹(ಅಥೇನ ಪಟ್ಟಣಕಾರಂಗಳು, ಅಲ್ಲಿ ವಾಸ ಇಂಜ ಬೋರೆ ಜನಳು, ಇನ್ನನೆ ಪುದಿಯ ಪುದಿಯ ವಿಷಯತ್‍ನ ಎಣ್ಣ್‌ವದ್ ಪಿಂಞ ಕ್‍ೕಪದ್‍ನ ಬುಟ್ಟತೇಂಗಿ ಬೋರೆ ಒಂದಾಂಗು ಸಮಯ ಕೊಡ್‍ಪಯಿಂಜಿಲೆ).

²²ಅಕ್ಕ ಪೌಲ, ಅರಿಯೊಪಾಗ ಆಲೋಚನೆ ಸಬೆರ ಮದ್ಯತ್‍ಲ್ ನಿಂದಂಡ್ ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ: ಅಥೇನೆ ಪಟ್ಟಣತ್‍ರ ಜನಳೇ, ನಿಂಗ ಎಲ್ಲಾ ವಿಷಯತ್‍ಲು ದುಂಬ ಬಕ್ತಿವಂತಯಿಂಗಾಂದ್ ನಾಕ್ ಗೊತ್ತಾಯಡುಂಡ್.

²³ನಾನ್ ನಿಂಗಡ ಪಟ್ಟಣತ್‍ಲ್ ನಡ್ಂದ್ ಪೋಯಂಡಿಪ್ಪಕ, ನಿಂಗ ಪೂಜೆ ಮಾಡ್‌ವ ಬೋರೆ ಬೋರೆ ವಸ್ತುನ ಚಾಯಿತೆ ನೋಟಿಯಂಡಿಪ್ಪಕ, ಅರಿಯತ ದೇವಕ್‍ೕಂದ್ ಒಳ್‍ದಿತ್ಂಜ ಒರ್ ಬಲಿಪೀಠತ್‍ನ ಕಂಡಿಯೆ. ನಿಂಗ ಅರಿಯತೆ ಪೂಜೆಮಾಡಿಯಂಡುಳ್ಳಂವೊಂಡ ವಿಷಯತ್‍ನೇ ನಾನ್ ಎಣ್ಣಿಯಂಡುಳ್ಳ.

²⁴ಈ ಲೋಕತ್‍ನ ಪಿಂಞ ಅದ್‍ಲ್ ಉಳ್ಳ ಎಲ್ಲಾನ ಸೃಷ್ಟಿ ಮಾಡ್‍ನ ದೇವ, ಬೂಲೋಕಕು ಪರಲೋಕಕು ಒಡೆಯನಾನಗುಂಡ್, ಮನುಷ್ಯಂಗಡ ಕೈಯಿಂಜ ಕೆಟ್ಟ್‌ನ ದೇವಸ್ತಾನತ್‍ಲ್ ವಾಸ ಮಾಡುಲೆ.

²⁵ಅಂವೊನೇ ಎಲ್ಲಾ ಮನುಷ್ಯಂಗಕು ಜೀವ, ಉಸ್‍ರ್ ಪಿಂಞ ಬೋಂಡಿಯಾನ ಎಲ್ಲಾನ ಕೊಡ್‍ಪಂವೊನು ಆನಗುಂಡ್, ತಾಂಗ್ ಒಂದು ಕಮ್ಮಿ ಇಲ್ಲತಗುಂಡ್, ಮನುಷ್ಯಂಗಡ ಕೈಯಿಂಜ ಕೆಲಸ ಮಾಡ್‌ಚಿಡುವಂವೊನಲ್ಲ.

²⁶ದೇವ, ಒರ್ ಮನುಷ್ಯಂಡ ಮೂಲಕ ಎಲ್ಲಾ ಜನಳ ಪುಟ್ಟ್‌ಚಿಟ್ಟಿತ್ ಅಯಿಂಗಳೆಲ್ಲ ಈ ಲೋಕತ್‍ಲ್ ಬೋರೆ ಬೋರೆ ಜಾಗತ್‍ಲ್ ಬಪ್ಪ್‌ಚಿಟ್ಟತ್. ಅಯಿಂಗಡ ಕಾಲತ್‍ನ ಪಿಂಞ ವಾಸ ಮಾಡ್‌ವಂತ ಜಾಗತ್‍ನ ಮಿಂಞಲೇ ತೀರ್ಮಾನ ಮಾಡಿ ಬೆಚ್ಚತ್.

²⁷ದೇವ ಇನ್ನನೆ ಮಾಡ್‌ವಕುಳ್ಳ ಉದ್ದೇಶ ಎಂತ ಎಣ್ಣ್‌ಚೇಂಗಿ, ಅನ್ನನಾಚೇಂಗಿಯು, ಜನ ಅಂವೊನ ತ್‍ೕಡ್‌ವ, ಅಂವೊಂಡ ಕೂಡೆ ಐಕ್ಯಪಡುವಕುಳ್ಳ ಬಟ್ಟೇನ ಕಂಡ್‍ಪುಡಿಪಾಂದ್ ಮಾಡ್‍ಚಿ. ಆಚೇಂಗಿ ದೇವ ನಂಗಡಿಂಜ ದೂರ ಇಲ್ಲೆ ಅಂವೊ ನಂಗ ಒಬ್ಬೊಬ್ಬಂಗಡ ಕೂಡೆ ಉಂಡ್.

²⁸ದೇವಡ ಮೂಲಕವೇ ನಂಗ ಬದ್‍ಕಿಯಂಡ್, ಪೋಯಂಡ್ ಬಂದಂಡ್ ಉಂಡ್. ನಂಗ ದೇವಡ ಮಕ್ಕಾಂದ್ ನಿಂಗಡ ಒರ್ ಕವಿಯೇ ಒಳ್‍ದಿತುಂಡ್.

²⁹ನಂಗ ದೇವಡ ಮಕ್ಕಳಾಯಿತುಳ್ಳಗುಂಡ್, ಒರ್ ಶಿಲ್ಪಿರ ಜ್ಞಾನತ್‍ಲು, ಸಾಮರ್ತ್ಯತ್‍ಲು ಕೆತ್ತ್‌ನ ಪೊನ್ನ್ ಬೊಳ್ಳಿ ಕಲ್ಲ್‌ಲ್ ಮಾಡ್‍ನ ವಿಗ್ರಹತ್‍ರನೆಕೆ ದೇವ ಇಪ್ಪಾಂದ್ ನಂಗ ಗೇನ ಮಾಡ್‌ವಕ್ಕಾಗ.

³⁰ಜನಕ್ ನೇರಾಯಿತು ಗೊತ್ತಿಲ್ಲತ ಕಾಲತ್‍ಲ್ ಇನ್ನನೆ ಮಾಡ್‌ನಾನ ದೇವ ಲೆಕ್ಕ ಬೆಚ್ಚಿತ್‌ಲ್ಲೆ. ಆಚೇಂಗಿ ಇಕ್ಕ, ಎಲ್ಲಾ ಜಾಗತು, ಎಲ್ಲಾ ಜನಳು ಅಯಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ದೇವಡ ಪಕ್ಕ ತಿರ್‌ಗಂಡೂಂದ್ ಹುಕುಮ್ ಕೊಡ್‍ತಂಡುಂಡ್.

³¹ದೇವ ಒರ್ ದಿವಸತ್‍ನ ಗೊತ್ತ್ ಮಾಡಿತುಂಡ್; ಅಂವೊ ನೇಮಿಚಿಟ್ಟಂವೊಂಡ ಮೂಲಕ, ಈ ಲೋಕತ್‍ನ ಸರಿಯಾಯಿತ್ ನ್ಯಾಯತೀರ್ಪ್ ಮಾಡ್‌ವ; ಆ ಮನುಷ್ಯನ ಚತ್ತಯಿಂಗಡ ಮದ್ಯತ್ಂಜ ಜೀವವಾಯಿತ್ ಎಪ್ಪ್‌ನಗುಂಡ್, ಅನ್ನನೆ ಮಾಡ್‌ವಾಂದ್ ಅಂವೊ ಎಲ್ಲಾ ಜನಕು ಸಾಕ್ಷಿಯಾಯಿತ್ ಮಾಡ್‍ಚೀಂದ್ ಪೌಲ ಎಣ್ಣ್‌ಚಿ.

³²ಪೌಲ ಚತ್ತಯಿಂಗಡ ವಿಷಯತ್‍ನ ಎಣ್ಣ್‌ವಕ, ಚೆನ್ನ ಜನ ಪೌಲಂಗಿಂಜ ನಂಗಕ್ ಚಾಯಿ ಗೊತ್ತುಂಡ್‍ೕಂದ್ ತಮಾಷಿ ಮಾಡ್‍ಚಿ. ಚೆನ್ನ ಜನ, ನೀನ್ ಎಣ್ಣ್‌ವಾನ ಇಂಞೊರ್ ಕುರಿ ನಂಗ ಕ್‍ೕಪಾಂದ್ ಎಣ್ಣ್‌ಚಿ.

³³ಪಿಂಞ ಪೌಲ ಅಲ್ಲಿಂಜ ಪೋಯಿರ್‌ತ್.

³⁴ಚೆನ್ನ ಜನ ಅಂವೊ ಎಣ್ಣ್‌ನದ್‍ನ ನಂಬಿತ್ ಪೌಲಂಡ ಕೂಟ್‍ಕ್ ಕೂಡ್‍ಚಿ. ಅಯಿಂಗಡಡೆಲ್, ಅರಿಯೊಪಾಗ ಸಬೇಲ್ ಒಬ್ಬನಾನ ದಿಯೊನುಸ್ಯ, ದಾಮರಿ ಎಣ್ಣುವ ಒರ್ ಪೊಣ್ಣಾಳ್ ಪಿಂಞ ಇಂಞು ಚೆನ್ನ ಜನ ಇಂಜತ್.