Read Kodava ಅಪೊಸ್ತಲ 18 Bible Online

ಅಪೊಸ್ತಲ 18 - Kodava bible

ಅಪೊಸ್ತಲ 18

¹ಇದಾನ ಪಿಂಞ ಪೌಲ ಅಥೇನೆ ಪಟ್ಟಣತ್‍ನ ಬುಟ್ಟಿತ್ ಕೊರಿಂಥ ಪಟ್ಟಣಕ್ ಪೋಚಿ.

²ಯೆಹೂದ್ಯ ಜನಯೆಲ್ಲ ರೋಮ್ ರಾಜ್ಯತ್‍ರ ಪ್ರಾಂತ್ಯತ್‍ನ ಬುಟ್ಟಿತ್ ಬೋರೆ ಜಾಗಕ್ ಪೋಂಡೂಂದ್ ಕ್ಲೌದ್ಯ ಚಕ್ರವರ್ತಿ ಹುಕುಮ್ ಕೊಡ್‌ತಿತ್ಂಜತ್. ಆನಗುಂಡ್ ಇತಾಲ್ಯ ರಾಜ್ಯತ್ಂಜ ಬಂದಿತ್ಂಜ, ಪೊಂತ ದೇಶತ್‍ಲ್ ಪುಟ್ಟ್‌ನಂವೊನಾನ ಅಕ್ವಿಲ ಎಣ್ಣುವ ಒರ್ ಯೆಹೂದ್ಯ ಪಿಂಞ ಅಂವೊಂಡ ಪೊಣ್ಣ್ ಪ್ರಿಸ್ಕಿಲ್ಲ ಪುದಿಯದಾಯಿತ್ ಕೊರಿಂಥ ಪಟ್ಟಣಕ್ ಬಂದಿತ್ಂಜತ್. ಪೌಲಂಗ್ ಅಯಿಂಗಳ ಪರಿಚಯ ಆಚಿ.

³ಅಯಿಂಗ ಗುಡಾರ ಕೆಲಸ ಮಾಡ್‌ವಯಿಂಗಳಾಯಿತ್ಂಜತ್. ಪೌಲ ಸಹ ಗುಡಾರ ಮಾಡ್‍ಂವವೊನಾಯಿತ್ಂಜಗುಂಡ್, ಅಂವೊ ಅಯಿಂಗಡ ಪಕ್ಕ ಪೋಯಿತ್, ಕೆಲಸ ಮಾಡಿಯಂಡ್ ಅಲ್ಲಿಯೇ ವಾಸ ಮಾಡಿಯಂಡ್ ಇಂಜತ್.

⁴ಎಲ್ಲಾ ಸಬ್ಬತ್ ದಿವಸತ್‍ಲ್ ಸಬಾಮಂದಿರತ್‍ಲ್ ಚರ್ಚೆ ಮಾಡಿತ್ ಯೆಹೂದ್ಯಂಗಕು ಯೆಹೂದ್ಯ ಅಲ್ಲತಯಿಂಗಕು ಯೇಸು ಕ್ರಿಸ್ತಂಡ ವಿಷಯತ್‍ನ ದೃಡವಾಯಿತ್ ಸಾಕ್ಷಿ ಎಣ್ಣಿಯಂಡಿಂಜತ್.

⁵ಸೀಲ ಪಿಂಞ ತಿಮೊಥೆಯ ಮಕೆದೋನ್ಯತ್ಂಜ ಬಪ್ಪಕ, ಪೌಲ ದೇವಡ ವಾಕ್ಯತ್‍ನ ಬೋದನೆ ಮಾಡ್‌ವಕಾಯಿತ್ ಎಲ್ಲಾ ಕೆಲಸತ್‍ನ ಬುಟ್ಟಿತ್, ಯೇಸುವೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ಯೆಹೂದ್ಯಂಗಕ್ ಸಾಕ್ಷಿ ಕೊಡ್‍ತತ್.

⁶ಅಲ್ಲಿಯತ್‍ರ ಯೆಹೂದ್ಯಂಗ ಅಂವೊ ಎಣ್ಣ್‌ವಾನ ವಿರೋದ ಮಾಡಿತ್ ನಿಂದಂಡ್ ಕೆಟ್ಟ ತಕ್ಕ್ ಪರಿಯುವಕ, ಪೌಲ, ತಾಂಡ ಪೊರಮೆ ಇಡ್‌ವ ಬಟ್ಟೇನ ಅಯಿಂಗಕ್ ಸಾಕ್ಷಿಯಾಯಿತ್ ಕೊಡ್‍ಕಿತ್: ನಿಂಗಡ ನಾಶಕ್ ನಿಂಗಳೇ ಕಾರಣ; ನಾನ್ ಶುದ್ದ ಮನಸ್ಸ್ ಉಳ್ಳಂವೊನಾಯಿತ್ ಯೆಹೂದ್ಯಂಗಲ್ಲತ ಬೋರೆ ಜನಡ ಪಕ್ಕ ಇಕ್ಕಯಿಂಜ ಪೋಪೀಂದ್ ಎಣ್ಣ್‌ಚಿ.[40]

⁷ಪಿಂಞ ಅಂವೊ, ಆ ಜಾಗತ್‍ನ ಬುಟ್ಟಿತ್, ದೇವನ ಆರಾದನೆ ಮಾಡ್‌ವ ನೆರೆಮನೆಕಾರನಾನ ತಿತಿಯು ಯೂಸ್ತ ಎಣ್ಣ್‌ವಂವೊಂಡ ಮನೆಕ್ ಪೋಚಿ; ಅಂವೊಂಡ ಮನೆ ಸಬಾಮಂದಿರತ್‍ರ ಪಕ್ಕ ಇಂಜತ್.

⁸ಸಬಾಮಂದಿರತ್‍ರ ಅದ್ಯಕ್ಷನಾಯಿತ್ಂಜ ಕ್ರಿಸ್ಪ ಎಣ್ಣ್‌ವಂವೊ ತಾಂಡ ಮನೆಕಾರಂಗ ಎಲ್ಲಾಡ ಕೂಡೆ ಒಕ್ಕಚೆ, ಒಡೆಯಂಡ ಮೇಲೆ ನಂಬಿಕೆ ಬೆಚ್ಚತ್. ಕೊರಿಂಥ ಪಟ್ಟಣಕ್ ಕೂಡ್‍ನ ದುಂಬ ಜನಳು, ಕ್ರಿಸ್ತಂಡ ಸುದ್ದಿನ ಕ್‍ೕಟಿತ್, ನಂಬಿತ್, ದೀಕ್ಷಾಸ್ನಾನ ಎಡ್‍ತಂಡತ್.

⁹ಒರ್ ಬಯಿಟ್ ನೇರತ್ ಒಡೆಯ, ಪೌಲಂಗ್ ದರ್ಶನತ್‍ಲ್: ನೀನ್ ಬೊತ್ತತೆ, ನೀನ್ ದೈರ್ಯವಾಯಿತ್ ಜನಕ್ ಬೋದನೆ ಮಾಡಿಯಂಡಿರ್, ಮುಂಡತೆ ಇರತೆ.

¹⁰ನಾನ್ ನೀಡ ಕೂಡೆ ಇಪ್ಪಿ, ನೀಕ್ ತೊಂದರೆ ಮಾಡಿತ್, ನಿನ್ನ ದಾರೂ ಪೊಯ್ಯುಲೆ; ಎನ್ನಂಗೆಣ್ಣ್‌ಚೇಂಗಿ, ಈ ಪಟ್ಟಣತ್‍ಲ್ ನಾಕ್ ದುಂಬ ಜನ ಉಂಡ್‍ೕಂದ್ ಎಣ್ಣ್‌ಚಿ.

¹¹ಅನ್ನನೆ ಪೌಲ ಒರ್ ಕಾಲ ಆರ್ ತಿಂಗ ಅಲ್ಲೇ ಒಳಿಂಜಿತ್ ಆ ಜನಕ್ ದೇವಡ ವಾಕ್ಯತ್‍ನ ಉಪದೇಶ ಮಾಡಿಯಂಡ್ ಇಂಜತ್.

¹²ಗಲ್ಲಿಯೋನ ಎಣ್ಣ್‌ವಂವೊ ಅಖಾಯ ಪ್ರಾಂತ್ಯತ್‍ರ ಅದಿಪತಿಯಾಯಿತಿಪ್ಪಕ, ಯೆಹೂದ್ಯಂಗ ಒಕ್ಕಚೆ ಪೌಲಂಗ್ ವಿರೋದವಾಯಿತ್ ಎದ್ದಿತ್, ಗಲ್ಲಿಯೋನಂಡ ನ್ಯಾಯಸ್ತಾನತ್‍ರ ಮಿಂಞಕ್ ಪೌಲನ ಕೊಂಡ್ ಬಾತ್.

¹³ಈ ಮನುಷ್ಯ ನ್ಯಾಯಪ್ರಮಾಣಕ್ ವಿರೋದವಾಯಿತ್ ಮಾಡ್‌ವನೆಕೆ ಬೋರೆ ರೀತಿಲ್ ದೇವನ ಆರಾದನೆ ಮಾಡ್‌ವಕ್ ಒತ್ತಾಯ ಮಾಡಿಯಂಡುಂಡ್‍ೕಂದ್ ಕುತ್ತ ಪರ್ಂದತ್.

¹⁴ಪೌಲ ಪ್ರತಿವಾದ ಮಾಡ್‌ವಕ್ ಸುರು ಮಾಡ್‌ವಕ, ಗಲ್ಲಿಯೋನ ಯೆಹೂದ್ಯಂಗಳ ನೋಟಿತ್: ನಿಂಗ ಕುತ್ತ ಪರಿಯುವ ವಿಷಯ ಒರ್ ಅನ್ಯಾಯ ಕಾರ್ಯವಾಯಿತೋ ಅಥವ ನ್ಯಾಯಪ್ರಮಾಣಕ್ ವಿರೋದವಾನ ಪಾಪವಾಯಿತೋ ಇಂಜತೇಂಗಿ, ನಾನ್ ವಿಚಾರಣೆ ಮಾಡ್‍ವಕಿಂಜ್.

¹⁵ಆಚೇಂಗಿ ನಿಂಗ ಕುತ್ತ ಪರಿಯುವ ವಿಷಯ, ಬೋದನೆರ ವಿಷಯವಾಯಿತು, ಪೆದತ್‍ರ ವಿಷಯವಾಯಿತು ಪಿಂಞ ನಿಂಗಡ ಸ್ವಂತ ನ್ಯಾಯಪ್ರಮಾಣತ್‍ರ ವಿಷಯವಾಯಿತುಳ್ಳಗುಂಡ್, ಇದ್‍ನ ವಿಚಾರಣೆ ಮಾಡ್‌ವಕ್ ನಾಕ್ ಕುಶಿ ಇಲ್ಲೆ, ನಿಂಗಳೇ ಸರಿ ಮಾಡಿಯೊಳೀಂದ್ ಎಣ್ಣ್‌ಚಿ.

¹⁶ಪಿಂಞ ಅಂವೊ ಅಯಿಂಗಳ ಅಲ್ಲಿಂಜ ದೌತ್‌ಚಿ.

¹⁷ಅಕ್ಕ ಗ್ರೀಕ್ ಜನ ಎಲ್ಲಾ ಸಬಾಮಂದಿರತ್‍ರ ಅದ್ಯಕ್ಷನಾನ ಸೋಸ್ಥೆನನ ಪುಡ್‌ಚಿತ್ ನ್ಯಾಯಸ್ತಾನತ್‍ರ ಮಿಂಞತ್ ಪೊಜ್ಜತ್. ಗಲ್ಲಿಯೋನ ಅದ್ಂಗಾಯಿತ್ ಬೇಜಾರ್ ಮಾಡಿಯಂಡಿತ್‌ಲ್ಲೆ.

¹⁸ಪೌಲ ದುಂಬ ದಿವಸ ಕೊರಿಂಥ ಪಟ್ಟಣತ್‍ಲ್ ಯೇಸುನ ನಂಬ್‍ನ ಅಣ್ಣತಮ್ಮಣಂಗಡ ಕೂಡೆ ಇಂಜ ಪಿಂಞ, ದೇವಡ ಮಕ್ಕಡಯಿಂಜ ಪೊರಟತ್. ತಾಂಗ್ ಒರ್ ಪರ್‍ಕೆ ಇಂಜಗುಂಡ್ ಕೆಂಕ್ರೆಯ ಊರ್‌ಲ್ ಮಂಡೆನ ಬೋಳ್‍ಚಿಟ್ಟಂಡ್, ಸಿರಿಯ ದೇಶಕ್ ಪೋಪಕಾಯಿತ್ ಹಡಗ್‍ನ ಪತ್ತ್‌ಚಿ. ಪ್ರಿಸ್ಕಿಲ್ಲಳು ಅಕ್ವಿಲನು ಅಂವೊಂಡ ಕೂಡೆ ಪೊರಟ್ ಪೋಚಿ.

¹⁹ಪೌಲ ಎಫೆಸ ಪಟ್ಟಣಕ್ ಬಪ್ಪಕ, ಅಯಿಂಗಳ ಅಲ್ಲೇ ಬುಟ್ಟತ್. ತಾನ್ ಮಾತ್ರ ಸಬಾಮಂದಿರತ್‍ರ ಒಳ್‍ಕ್ ಪೋಯಿತ್ ಯೆಹೂದ್ಯಂಗಡ ಕೂಡೆ ವಾದ ಮಾಡ್‍ಚಿ.

²⁰ಅಯಿಂಗ ಅಂವೊನ ಇಂಞು ಚೆನ್ನ ದಿವಸ ಇರಂಡೂಂದ್ ಕ್‍ೕಪಕ ಅಂವೊ ಒತ್ತತೆ,

²¹ದೇವಡ ಚಿತ್ತವಾಚೇಂಗಿ ಪುನಃ ನಿಂಗಡ ಪಕ್ಕ ಬಪ್ಪೀಂದ್ ಎಣ್ಣಿತ್ ಅಯಿಂಗಡ ಅಪ್ಪಣೆನ ಪಡ್ಂದಿತ್ ಪೋಚಿ. ಅಲ್ಲಿಂಜ ಹಡಗ್‍ಲ್ ಪತ್ತಿತ್ ಎಫೆಸ ಪಟ್ಟಣತ್‍ನ ಬುಟ್ಟಿತ್ ಪೋಚಿ.

²²ಅನ್ನನೆ, ಕೈಸರೈಯ ಪಟ್ಟಣಕ್ ಬಾತ್. ಅಲ್ಲಿಂಜ ಯೆರೂಸಲೇಮ್‌ಕ್ ಪೋಯಿತ್ ಸಬೆರ ಜನಕ್ ವಂದನೆ ಮಾಡಿತ್ ಅಂತಿಯೋಕ್ಯಕ್ ವಾಪಸ್ ಬಾತ್.

²³ಪೌಲ ಅಂತಿಯೋಕ್ಯತ್‍ಲ್ ಚೆನ್ನ ಸಮಯ ಇಂಜಿತ್, ಅಲ್ಲಿಂಜ ಪುನಃ ಕ್ರಮವಾಯಿತ್ ಗಲಾತ್ಯ ಪಿಂಞ ಫ್ರುಗ್ಯ ಸೀಮೆಲ್ ಪ್ರಯಾಣ ಮಾಡಿತ್ ಯೇಸುನ ನಂಬ್‍ನಯಿಂಗಳ ಎಲ್ಲಾ ದೃಡಪಡ್‍ತ್‍ಚಿ.

²⁴ಆ ಸಮಯತ್‍ಲ್, ಅಲೆಕ್ಸಾಂದ್ರಿಯ ಪಟ್ಟಣತ್‍ಲ್ ಪುಟ್ಟ್‌ನ ಅಪೊಲ್ಲೋಸ ಎಣ್ಣ್‌ವ ಒರ್ ಯೆಹೂದ್ಯ ಎಫೆಸ ಪಟ್ಟಣಕ್ ಬಾತ್. ಅಂವೊ ಚಾಯಿ ಓದಿತುಳ್ಳಂವೊನಾಯಿತು, ಯೆಹೂದ್ಯಂಗಡ ದೇವಡ ವಾಕ್ಯತ್‍ನ ಚಾಯಿ ಗೊತ್ತುಳ್ಳಂವೊನಾಯಿತು ಇಂಜತ್.

²⁵ಅಂವೊಂಗ್ ಒಡೆಯಂಡ ಬೋದನೆ ಕ್‍ಟ್ಟಿತ್ಂಜತ್, ಆಚೇಂಗಿಯು ಯೋಹಾನಂಡ ಮೂಲಕ ಮಾಡ್‌ವ ದೀಕ್ಷಾಸ್ನಾನತ್‍ನ ಮಾತ್ರ ಗೊತ್ತುಳ್ಳಂವೊನಾಯಿತ್ ಇಂಜತ್. ಅಂವೊ ಯೇಸುರ ಮಾರ್ಗತ್‍ನ ಅಚ್ಚಕ್ ಚಾಯಿಲ್ ಪಿಂಞ ದುಂಬ ಕುಶೀಲ್ ಬೋದನೆ ಮಾಡಿಯಂಡ್ ಬಾತ್.

²⁶ಅಂವೊ ಸಬಾಮಂದಿರತ್‍ಲ್ ದೈರ್ಯವಾಯಿತ್ ತಕ್ಕ್ ಪರಿವಕ, ಅಂವೊಂಡ ತಕ್ಕ್‌ನ ಪ್ರಿಸ್ಕಿಲ್ಲ ಪಿಂಞ ಅಕ್ವಿಲ ಕ್‍ೕಟಿತ್, ಅಂವೊನ ತಂಗಡ ಮನೆಕ್ ಕಾಕಿಯಂಡ್ ಪೋಚಿ. ಅಲ್ಲಿ ದೇವಡ ಬಟ್ಟೇನ ಅಂವೊಂಗ್ ಇಂಞು ಚಾಯಿತೆ ಸರಿಯಾಯಿತ್ ಎಣ್ಣಿ ಕೊಡ್‍ತತ್.

²⁷ಅಲ್ಲಿಂಜ ಅಖಾಯ ಪ್ರಾಂತ್ಯಕ್ ಪೋಂಡೂಂದ್ ಅಂವೊ ಗೇನ ಮಾಡ್‌ವಕ, ಯೇಸುನ ನಂಬ್‍ನ ಅಣ್ಣತಮ್ಮಣಂಗ ಅಂವೊಂಗ್ ಪುರ್‌ಡ್ ಕೊಡ್‍ತತ್. ಈಂಗ ಅಖಾಯ ಪ್ರಾಂತ್ಯತ್‍ಲ್ ಉಳ್ಳ ಯೇಸುನ ನಂಬ್‍ನಯಿಂಗ, ಇಂವೊನ ಸ್ವೀಕಾರ ಮಾಡ್‌ವಕಾಯಿತ್, ಕಾಗದ ಒಳ್‍ದಿ ಕೊಡ್‍ತತ್. ಅನ್ನನೆ ಇಂವೊ ಅಲ್ಲಿ ಎತ್ತ್‌ನ ಪಿಂಞ, ಅಲ್ಲಿ ದೇವಡ ಕೃಪೇರಗುಂಡ್ ನಂಬ್‍ನಯಿಂಗಕ್ ದುಂಬ ಪ್ರಯೋಜನವಾಯಿತ್ಂಜತ್.

²⁸ಯೇಸುವೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್, ಅಲ್ಲಿಯತ್‍ರ ಯೆಹೂದ್ಯಂಗಕ್, ಎಲ್ಲಾಡ ಮಿಂಞತ್ ಅಯಿಂಗಕ್ ಏದು ಎಣ್ಣ್‌ವಕ್ ಕಯ್ಯತನೆಕೆ ಬಲ್ಯ ಆವೇಶತ್‍ಲ್ ದೇವಡ ವಾಕ್ಯತ್ಂಜ ಕಾಟಿಕೊಡ್‍ತತ್.