Read Kodava ಅಪೊಸ್ತಲ 19 Bible Online

ಅಪೊಸ್ತಲ 19 - Kodava bible

ಅಪೊಸ್ತಲ 19

¹ಅಪೊಲ್ಲೋಸ ಕೊರಿಂಥ ಪಟ್ಟಣತ್‍ಲ್ ಇಪ್ಪಕ, ಪೌಲ ಅಲ್ಲಿಂಜ ಮುಕ್ಯ ಬಟ್ಟೇಲ್ ಪ್ರಯಾಣ ಮಾಡತೆ, ಊರ್‌ರ ಬಟ್ಟೇಲ್ ಪ್ರಯಾಣ ಮಾಡಿತ್ ಎಫೆಸ ಪಟ್ಟಣಕ್ ಎತ್ತ್‌ಚಿ. ಅಲ್ಲಿ, ಯೇಸುನ ನಂಬ್‍ನ ಚೆನ್ನ ಜನಳ ಕಂಡತ್.

²ಪೌಲ ಅಯಿಂಗಳ ನೋಟಿತ್: ನಿಂಗ ಯೇಸುನ ನಂಬ್‌ವಕ ಪವಿತ್ರಾತ್ಮನ ಪಡ್ಂದಿರಾಂದ್ ಕ್‍ೕಟತ್. ಅದ್ಂಗ್ ಅಯಿಂಗ: ಇಲ್ಲೆ, ನಂಗ ಪಡ್ಂದಿತ್‌ಲ್ಲೆ. ಅನ್ನನೆ ಪವಿತ್ರಾತ್ಮ ಉಂಡ್‍ೕಂದ್ ಸಹ ನಂಗ ಕ್‍ೕಟಿತ್‌ಲ್ಲೇಂದ್ ಎಣ್ಣ್‌ಚಿ.

³ಅಕ್ಕ ಪೌಲ: ನಿಂಗ ಏದ್ ದೀಕ್ಷಾಸ್ನಾನ ಪಡ್ಂದಿರಾಂದ್ ಕ್‍ೕಟತ್. ಅದ್ಂಗ್ ಅಯಿಂಗ: ಯೋಹಾನಂಡ ಬೋದನೆನ ನಂಬಿತ್ ದೀಕ್ಷಾಸ್ನಾನ ಎಡ್‍ತಂಡತ್‍ೕಂದ್ ಎಣ್ಣ್‌ಚಿ.

⁴ಅದ್ಂಗ್ ಪೌಲ: ಪಶ್ಚಾತಾಪ ಪಟ್ಟಿತ್, ಬಪ್ಪಕುಳ್ಳ ಯೇಸುರ ಮೇಲೆ ಜನ ನಂಬಿಕೆ ಇಡ್‌ವಕಾಯಿತ್ ಮಾತ್ರ ಯೋಹಾನ ದೀಕ್ಷಾಸ್ನಾನ ಮಾಡ್‍ಚಲ್ಲಾಂದ್ ಎಣ್ಣ್‌ಚಿ.

⁵ಅಯಿಂಗ ಈ ತಕ್ಕ್‌ನ ಕ್‍ೕಟಿತ್ ಪಿಂಞ ಒಡೆಯನಾನ ಯೇಸುರ ಪೆದತ್‍ಲ್ ದೀಕ್ಷಾಸ್ನಾನ ಎಡ್‍ತಂಡತ್.

⁶ಪಿಂಞ, ಪೌಲ ಅಯಿಂಗಡ ಮೇಲೆ ಕೈ ಬೆಪ್ಪಕ ಪವಿತ್ರಾತ್ಮ ಅಯಿಂಗಡ ಮೇಲೆ ಬಾತ್; ಅಕ್ಕ, ಅಯಿಂಗ ನಾನಾತರ ಬಾಷೆಲ್ ತಕ್ಕ್ ಪರ್ಂದಿತ್ ಪ್ರವಾದನೆ ಎಣ್ಣ್‌ಚಿ.

⁷ಅಯಿಂಗ ಎಲ್ಲಾರು ಸುಮಾರ್ ಪನ್ನೆರಂಡ್ ಆಣಾಳುವ ಇಂಜತ್.

⁸ಪಿಂಞ, ಪೌಲ ಎಫೆಸ ಪಟ್ಟಣತ್‍ಲ್ ಇಂಜ ಸಬಾಮಂದಿರಕ್ ಪೋಯಿತ್ ಮೂಂದ್ ತಿಂಗ ದೇವಡ ರಾಜ್ಯತ್‍ರ ವಿಷಯತ್‍ನ ದೈರ್ಯತ್‍ಲ್, ನಂಬುವನೆಕೆ ಚರ್ಚೆ ಮಾಡಿಯಂಡ್ ಬೋದನೆ ಮಾಡಿಯಂಡೇ ಇಂಜತ್.

⁹ಆಚೇಂಗಿ, ಚೆನ್ನ ಜನ ತಂಗಡ ಮನಸ್ಸ್‌ನ ಕಠಿಣ ಮಾಡಿಯಂಡ್ ನಂಬುಲೇಂದ್ ಎಣ್ಣ್‌ಚಿ. ಅಯಿಂಗ, ಎಲ್ಲಾಡ ಮಿಂಞತ್ ಈ ಬಟ್ಟೇರ ಬೋದನೆಕ್ ವಿರೋದವಾಯಿತ್ ಕೆಟ್ಟ ತಕ್ಕ್ ಪರ್ಂದಂಡ್ ಇಂಜತ್. ಅಕ್ಕ ಪೌಲ ಸಬಾಮಂದಿರತ್ಂಜ ಪೋಯಿತ್, ಯೇಸುನ ನಂಬ್‍ನಯಿಂಗಳ ಅಂವೊಂಡ ಕೂಡೆ ಕಾಕಿಯಂಡ್ ಪೋಚಿ. ಬಯ್ಯ ತುರನ್ನ ಎಣ್ಣುವ ಒಬ್ಬಂಡ ಪಾಠಶಾಲೆಲ್ ಪ್ರತಿ ದಿನ ಚರ್ಚೆ ಮಾಡಿಯಂಡ್ ಬೋದನೆ ಮಾಡ್‍ಚಿ.

¹⁰ಇನ್ನನೆ ದಂಡ್ ಕಾಲಕ್ ನಡ್ಂದಗುಂಡ್ ಆಸ್ಯ ಸೀಮೆಲ್ ವಾಸ ಮಾಡಿಯಂಡಿಂಜ ಯೆಹೂದ್ಯಂಗ ಪಿಂಞ ಯೆಹೂದ್ಯಂಗ ಅಲ್ಲತ ಜನ ಎಲ್ಲಾರು ಒಡೆಯಂಡ ಬೋದನೆನ ಕ್‍ೕಟತ್.

¹¹ದೇವ ಪೌಲಂಡ ಮೂಲಕ ವಿಶೇಷವಾನ ಅದ್ಬುತ ಕಾರ್ಯತ್‍ನ ಮಾಡ್‍ಚಿ.

¹²ಅಂವೊಂಡ ತಡೀನ ಮುಟ್ಟ್‌ನ ಕೈಚೌಕ ಪಿಂಞ ಪೊರಮೆ ಇಡ್‌ವ ಬಟ್ಟೇನ ಎಡ್‍ತಂಡ್, ಕಾಯಿಲೆ ಉಳ್ಳಯಿಂಗಡ ಮೇಲೆ ಬೆಪ್ಪಕ, ಅಯಿಂಗಡ ಕಾಯಿಲೆ ವಾಸಿ ಆಚಿ, ಕೂಳಿ ಪುಡ್‍ಚಯಿಂಗಡಯಿಂಜ ಕೂಳಿಯೆಲ್ಲ ಓಡಿ ಪೋಚಿ.

¹³ಊರ್ ಊರ್‌ಕ್ ಪೋಯಿತ್ ಕೂಳಿಯಳ ಬುಡ್‌ತ್‌ವ ಯೆಹೂದ್ಯಂಗಳಾನ ಚೆನ್ನ ಜನ ಇದ್‍ನ ನೋಟಿತ್, ಒಡೆಯನಾನ ಯೇಸುರ ಪೆದತ್‍ನ ಅಯಿಂಗಳು ಎಣ್ಣ್‌ವಕ್‌ ದೈರ್ಯ ಎಡ್‍ತಂಡ್: ಅಯಿಂಗ ಕೂಳಿ ಪುಡ್‍ಚಯಿಂಗಡ ಪಕ್ಕ ಪೋಯಿತ್: ಪೌಲ ಬೋದನೆ ಮಾಡ್‌ವ ಯೇಸುರ ಪೆದತ್‍ಲ್ ನಿಂಗಕ್ ಆಜ್ಞೆ ಮಾಡ್‌ವೀಂದ್ ಎಣ್ಣ್‌ಚಿ.

¹⁴ಮಹಾ ಯಾಜಕನಾನ ಸ್ಕೇವ ಎಣ್ಣ್‌ವ ಒರ್ ಯೆಹೂದ್ಯಂಡ ಏಳ್ ಕ್‍ಣ್ಣ ಮಕ್ಕ ಇನ್ನನೆ ಮಾಡ್‍ಚಿ.

¹⁵ಒರ್ ಕುರಿ, ಅಯಿಂಗ ಅನ್ನನೆ ಯೇಸುರ ಪೆದತ್‍ಲ್ ಕೂಳಿಕ್ ಆಜ್ಞೆ ಕೊಡ್‌ಪಕ, ಆ ಕೂಳಿ ಅಯಿಂಗಳ ನೋಟಿತ್: ನಾಕ್ ಯೇಸುನ ಗೊತ್ತುಂಡ್, ಪೌಲನು ಗೊತ್ತುಂಡ್ ಆಚೇಂಗಿ ನಿಂಗ ದಾರ್‍ೕಂದ್ ಕ್‍ೕಟತ್.

¹⁶ಆ ಕೂಳಿ ಪುಡ್‌ಚ ಮನುಷ್ಯ ಅಯಿಂಗಡ ಎಲ್ಲಾಡ ಮೇಲೆ ಪಾರಿತ್, ಅಯಿಂಗಳ ಅಡಿಕ್ ಇಟ್ಟತ್. ಅಂವೊ ಅಯಿಂಗಳ ಪೊಜ್ಜಿತ್, ಅಯಿಂಗಡ ಬಟ್ಟೇನೆಲ್ಲ ಕೀತ್‌ವಕ, ಅಯಿಂಗ ಬೆತ್ತಲೆಯಾಯಿತ್ ಗಾಯಪಟ್ಟಿತ್ ಓಡಿ ಪೋಚಿ.

¹⁷ಆ ಸುದ್ದಿ ಎಫೆಸತ್‍ಲ್ ವಾಸ ಮಾಡಿಯಂಡಿಂಜ ಯೆಹೂದ್ಯಂಗಕೂ ಯೆಹೂದ್ಯ ಅಲ್ಲತಯಿಂಗಕೂ ಗೊತ್ತಾಯಿತ್ ಅಯಿಂಗಕೆಲ್ಲ ಪೋಡಿ ಆಚಿ. ಒಡೆಯನಾನ ಯೇಸುರ ಪೆದ ಗನಪಟ್ಟತ್.

¹⁸ಇಕ್ಕ ಯೇಸುನ ನಂಬ್‍ನ ದುಂಬ ಜನ, ಅಯಿಂಗ ಮಾಡ್‍ನ ಕೆಟ್ಟ ಕೆಲಸತ್‍ನ ಎಲ್ಲಾಡ ಮಿಂಞತ್ ಒತ್ತಂಡ್ ಅರಿಕೆ ಮಾಡ್‍ಚಿ.

¹⁹ಇದ್‍ಲ್ಲತೆ ಮಾಟಮಂತ್ರ ಮಾಡಿಯಂಡಿಂಜ ದುಂಬ ಜನ ತಂಗಡ ಪುಸ್ತಕತ್‍ನ ಕೊಂಡ್‌ಬಂತ್, ಗುಡ್ಡೆ ಕೂಟಿತ್ ಎಲ್ಲಾಡ ಮಿಂಞತ್ ತಿತ್ತ್‌ಕ್ ಇಟ್ಟತ್; ಅದ್ಂಡ ಕ್ರಯತ್‍ನ ಲೆಕ್ಕಮಾಡ್‍ವಕ ಸುಮಾರ್ ಐಂಬದಾಯಿರ ಬೊಳ್ಳಿ ನ್ಯಾಣ ಆಯಿತಿಕ್ಕೂಂದ್ ಗೊತ್ತಾಚಿ.

²⁰ಇನ್ನನೆ ಒಡೆಯನಾನ ಯೇಸುರ ಸುದ್ದಿ ಎಲ್ಲೆಲ್ಲಿಕೋ ಪಬ್ಬಿತ್, ಆ ಸುದ್ದಿ ದುಂಬ ಜನತ್‍ನ ದೇವಡ ಪಕ್ಕ ಕೊಂಡ್ ಬಪ್ಪನೆಕೆ ಶಕ್ತಿ ಉಳ್ಳದಾಯಿತ್ಂಜತ್.

²¹ಇನ್ನನೆಲ್ಲ ಆನ ಪಿಂಞ ಪೌಲ, ತಾನ್ ಮಕೆದೋನ್ಯಕ್ ಪೋಪಕ್ ಮಿಂಞ ಅಖಾಯ ಪಟ್ಟಣಕ್ ಪೋಯಿತ್, ಬಯ್ಯ ಯೆರೂಸಲೇಮ್‌ಕ್ ಪೋಪೀಂದ್ ಅಂವೊಂಡ ಆತ್ಮತ್‍ಲ್ ಗೇನ ಮಾಡಿತ್: ನಾನ್ ಅಲ್ಲಿಕ್ ಪೋನ ಪಿಂಞ ರೋಮ್ ಪಟ್ಟಣಕ್ ಪೋಂಡೂಂದ್ ಎಣ್ಣ್‌ಚಿ.

²²ಅಂವೊ ತಾಂಡಕೂಡೆ ಸೇವೆ ಮಾಡಿಯಂಡಿಂಜ ತಿಮೊಥೆಯ ಪಿಂಞ ಎರಸ್ತನ ಮಕೆದೋನ್ಯಕ್ ಅಯಿಚತ್; ಆಚೇಂಗಿ ಅಂವೊ ಆಸ್ಯ ಸೀಮೆಲ್ ಇಂಞು ಚೆನ್ನ ಸಮಯ ಒಳಿಂಜತ್.

²³ಆ ಕಾಲತ್‍ಲ್ ಈ ಮಾರ್ಗತ್‍ರ ವಿಷಯತ್ ದುಂಬ ಗಲಿಬಿಲಿ ಆಚಿ.

²⁴ಎನ್ನನೆ ಎಣ್ಣ್‌ಚೇಂಗಿ ದೇಮೇತ್ರಿಯ ಎಣ್ಣ್‌ವ ಒರ್ ತಟ್ಟ, ಬೊಳ್ಳಿಯಿಂಜ ಅರ್ತೆಮಿ ಎಣ್ಣುವ ಗ್ರೀಕ್ ದೇವತೆರ ದೇವಸ್ತಾನತ್‍ರನೆಕೆ ಚೆರಿಯ ಚೆರಿಯ ದೇವಸ್ತಾನತ್‍ನ ಮಾಡಿತ್ ಮಾರ್‌ವಕಿಂಜತ್. ಇದ್‍ನಗುಂಡ್ ಅಲ್ಲಿಯತ್‍ರ ತಟ್ಟಂಗಕ್ ದುಂಬ ಲಾಬ ಕ್‍ಟ್ಟಿಯಂಡಿಂಜತ್.

²⁵ದೇಮೇತ್ರಿಯ ಈ ಕೆಲಸ ಮಾಡ್‌ವಯಿಂಗಳೆಲ್ಲ ಒಕ್ಕಚೆ ಕಾಕಿತ್: ಜನಳೇ, ಈ ವ್ಯಪಾರತ್‍ರಗುಂಡ್ ನಂಗಕ್ ಐಶ್ವರ್ಯ ಕ್‍ಟ್ಟಿಯಂಡುಂಡ್‍ೕಂದ್ ನಿಂಗಕ್ ಗೊತ್ತುಂಡ್.

²⁶ಆಚೇಂಗಿ, ಕೈಯಿಂಜ ಮಾಡ್‍ನ ಮೂರ್ತಿಯೆಲ್ಲಾ ದೇವ ಅಲ್ಲಾಂದ್ ಆ ಪೌಲ ಎಣ್ಣಿತ್ ಇಲ್ಲಿ ಎಫೆಸತ್‍ಲ್ ಮಾತ್ರ ಅಲ್ಲತೆ ಆಸ್ಯ ಸೀಮೆರ ಎಲ್ಲಾ ಜಾಗತ್‍ಲು ದುಂಬ ಜನಳ ಅಂವೊಂಡ ಕಡೇಕ್ ಕೂಟಿಯಂಡತ್. ಇದ್‍ನೆಲ್ಲ ನಿಂಗ ನೋಟಿತು ಕ್‍ೕಟಿತು ಉಳ್ಳಿರ.

²⁷ಇದ್‍ನಗುಂಡ್, ನಂಗಡ ವ್ಯಾಪಾರತ್‍ರ ಪೆದ ಒಂದು ಇಲ್ಲತನೆಕೆ ಆಯಂಡುಂಡ್. ಇದ್‍ಲ್ಲತೆ, ಮಹಾ ದೇವಿ ಅರ್ತೆಮಿರ ದೇವಸ್ತಾನಕ್ ಮರ್ಯಾದೆ ಇಲ್ಲತೆ ಪೋಪ, ಆಸ್ಯ ಸೀಮೆ ಪಿಂಞ ಇಡೀ ಲೋಕ ಪೂಜೆ ಮಾಡ್‌ವ ಈ ದೇವಿರ ವೈಬವ ಇಲ್ಲತನೆಕೆ ಆಪಾಂದ್ ಎಣ್ಣ್‌ಚಿ.

²⁸ಜನ ಈ ತಕ್ಕ್‌ನ ಕ್‍ೕಟಿತ್, ಅಯಿಂಗೆಲ್ಲ ಆವೇಶ ಪಟ್ಟಿತ್ ಚೆಡಿ ಬಂದಿತ್, ಎಫೆಸ ಪಟ್ಟಣತ್‍ರ ಅರ್ತೆಮಿ ದೇವಿಯೇ ಮಾಹಾದೇವೀಂದ್ ಕೂತ್ ಕೊಡ್‍ಪಕ್ ಸುರು ಮಾಡ್‍ಚಿ.

²⁹ಅಚ್ಚಕ್ ಬೆರಿಯ ಇಡೀ ಪಟ್ಟಣತ್‍ಲ್ ಗಲಿಬಿಲಿ ಆಚಿ. ಪ್ರಯಾಣತ್‍ಲ್ ಪೌಲಂಡ ಕೂಡೆ ಪ್ರಯಾಣ ಮಾಡಿಯಂಜಯಿಂಗ ಮಕೆದೋನ್ಯತ್‍ರ ಗಾಯನ ಪಿಂಞ ಅರಿಸ್ತಾರ್ಕ ಎಣ್ಣುವಯಿಂಗಳ ಬಲ್‍ಚಂಡ್ ಒರೇ ಮನಸ್ಸ್‌ಲ್ ಜನ ಕೂಡಿತ್ ನಾಟಕ ಶಾಲೆರ ಒಳ್‍ಕ್ ನುಗ್ಗಿತ್ ಪೋಚಿ.

³⁰ಪೌಲ ಜನಡ ಗುಂಪ್‍ರ ಒಳ್‍ಕ್ ಪೋಂಡೂಂದ್ ಎಣ್ಣ್‌ವಕ, ಯೇಸುನ ನಂಬ್‍ನಯಿಂಗ ಅಂವೊನ ಪೋಪಕ್ ಬುಟ್ಟಿತ್‌ಲ್ಲೆ.

³¹ಇದ್‍ಲ್ಲತೆ ಪೌಲಂಡ ಕೂಟ್‍ಕಾರಳಾನ, ಆಸ್ಯ ಸೀಮೆರ ಚೆನ್ನ ಅದಿಕಾರಿಯಂಗ ಅಂವೊಂಡ ಪಕ್ಕ ಜನಳ ಅಯಿಚಿತ್: ನೀನ್ ಜನ ಕೂಡ್‍ನ ನಾಟಕ ಶಾಲೆರ ಒಳ್‍ಕ್ ಪೋಪದ್ ಬೋಂಡಾಂದ್ ಬೋಡಿಯಂಡತ್.

³²ಅಲ್ಲಿ ಬಲ್ಯ ಕಲಹ ಆಚಿ. ಚೆನ್ನ ಜನ ಇನ್ನನೇಂದ್ ಇಂಞು ಚೆನ್ನ ಜನ ಅನ್ನನೇಂದ್ ಕೂತ್ ಕೊಡ್‍ತಂಡಿಂಜತ್. ದುಂಬ ಜನಕ್ ಅಯಿಂಗ ಕೂಡಿ ಬಂದ ಕಾರಣ ಗೊತ್ತಿಲ್ಲತೆ ಇಂಜತ್.

³³ಚೆನ್ನ ಯೆಹೂದ್ಯಂಗ ಅಲೆಕ್ಸಾಂದ್ರ ಎಣ್ಣುವ ಒಬ್ಬನ ವೇದಿಕೆಕ್ ತಳ್ಳ್‌ಚಿ. ಅಕ್ಕ ಅಲೆಕ್ಸಾಂದ್ರ ಜನಳ ಮುಂಡತೆ ಇಪ್ಪಕ್ ಕೈ ಸನ್ನೆ ಮಾಡಿತ್, ಜನಕ್ ಉತ್ತರ ಕೊಡ್‍ಪಕ್ ಸುರು ಮಾಡ್‍ಚಿ.

³⁴ಆಚೇಂಗಿ ಅಂವೊ ಒರ್ ಯೆಹೂದ್ಯಾಂದ್ ಗೊತ್ತಾನ ಪಿಂಞ, ಎಲ್ಲಾರು ಒರೇ ಸದ್ದ್‌ಲ್ ಎಫೆಸತ್‍ರ ಅರ್ತೆಮಿ ದೇವಿಯೇ ಮಾಹಾದೇವೀಂದ್, ಸುಮಾರ್ ದಂಡ್ ಗಂಟೆಯಚ್ಚಕ್ ಕೂತ್ ಕೊಡ್‍ತಂಡಿಂಜತ್.

³⁵ಕಡೇಕ್, ಪಟ್ಟಣತ್‍ರ ಗುಮಾಸ್ತ ಜನಡ ಗುಂಪ್‍ನ ಸಮಾದಾನ ಮಾಡಿತ್; ಎಫೆಸ ಪಟ್ಟಣತ್‍ಲ್ ಉಳ್ಳ ಜನಳೇ, ಅರ್ತೆಮಿ ಮಹಾದೇವಿರ ದೇವಸ್ತಾನಕ್ ಪಿಂಞ ಬಾನತ್ಂಜ ಬುದ್ದ ಅವಡ ಮೂರ್ತಿನ ಕಾಪಾಡ್‌ವ ಜಾಗವಾಯಿತ್ ಎಫೆಸ ಪಟ್ಟಣ ಇರಂಡೂಂದ್ ಅರಿಯತ ಮನುಷ್ಯ ಉಂಡಾ?

³⁶ಆನಗುಂಡ್, ಈ ಸಂಗತಿ ಅಲ್ಲಾಂದ್ ಎಣ್ಣುವಕ್ ದಾರ್‌ಕು ಆಕತಗುಂಡ್ ನಿಂಗ ಶಾಂತಿಯಾಯಿತಿರಂಡು, ಮುಂಡತೆ ಬೆರಿಯ ದುಡ್‍ಕಿತ್ ಒಂದು ಮಾಡ್‌ವಕ್ಕಾಗ.

³⁷ನಿಂಗ ಕಾಕಿಯಂಡ್ ಬಂದ ಈ ಮನುಷ್ಯಂಗ ದೇವಸ್ತಾನತ್‍ರ ಕಳ್ಳಂಗಳು ಅಲ್ಲ, ನಂಗಡ ದೇವಿನ ದೂಷಣೆ ಮಾಡ್‌ವಯಿಂಗಳು ಅಲ್ಲ.

³⁸ಇನ್ನನೆ ಇಪ್ಪಕ, ದೇಮೇತ್ರಿಯಂಗು ಅಂವೊಂಡ ಪಕ್ಷತ್‍ರ ಪಣಿಕಾರಂಗಕು, ದಾಡ ಮೇಲಾಚೇಗಿಯೂ ವ್ಯವಹಾರ ಇಂಜತೇಂಗಿ, ನ್ಯಾಯಾಸ್ತಾನ ಉಂಡ್, ಅದಿಪತಿಯ ಉಂಡ್; ಅಲ್ಲಿ ಒಬ್ಬಂಡ ಮೇಲೋಬ್ಬನ ಕುತ್ತ ಪರಿಯಡ್.

³⁹ನಿಂಗಕ್ ಇಂಞು ದುಂಬ ವಿಚಾರಣೆ ಬೋಂಡ್‌ಚೇಂಗಿ ಅದ್‍ನ ನ್ಯಾಯವಾಯಿತ್ ಕೂಡ್‍ನ ಸಬೇಲ್ ತೀರ್ಮಾನ ಮಾಡಡ್.

⁴⁰ಇಂದ್ ಉಂಟಾನ ಕಲಹತ್‍ರ ವಿಷಯಕ್ ನ್ಯಾಯವಾನ ಕಾರಣವಿಲ್ಲತಗುಂಡ್, ನ್ಯಾಯ ವಿಚಾರಣೆ ಬಪ್ಪಕ, ನಂಗಡ ಮೇಲೆ ಬಪ್ಪಕುಳ್ಳ ಕುತ್ತಕ್ ಉತ್ತರ ಕೊಡ್‍ಪಕ್ ಆಪುಲೇಂದ್ ಎಣ್ಣ್‌ಚಿ.

⁴¹ಇನ್ನನೆ ಅಂವೊ ಎಣ್ಣಿತಾನ ಪಿಂಞ ಅಯಿಂಗಳ ಪೋಪಕ್ ಬುಟ್ಟತ್.