Read Kodava ಅಪೊಸ್ತಲ 2 Bible Online

ಅಪೊಸ್ತಲ 2 - Kodava bible

ಅಪೊಸ್ತಲ 2

¹ಐಂಬದ್ ನಾಳ್‌ರ ಪಂಚಾಶತ್ತಮ[2] ಎಣ್ಣುವ ನಮ್ಮೆರ ದಿವಸ ಬಪ್ಪಕ, ಅಯಿಂಗೆಲ್ಲಾ ಒರ್ ಜಾಗಕ್ ಬಂತ್ ಒಟ್ಟ್ ಕೂಡ್‍ಚಿ.

²ಅಕ್ಕ ಬಿರ್‌ಗಾಳಿ ಬೀಜ್‌ವನೆಕೆ ಬಾನತ್ಂಜ ಬಲ್ಯೊರ್ ಸದ್ದ್ ಬಂತ್, ಅಯಿಂಗ ಇಂಜ ಮನೆನ ದುಂಬ್‍ಚಿಟ್ಟತ್.

³ಅಕ್ಕ, ಕತ್ತಿಯಂಡುಳ್ಳ ನಾವ್‌ರನೆಕೆ ಅಯಿಂಗಕ್ ಪ್ರತ್ಯಕ್ಷ ಆಯಿತ್, ಅದ್ ಬೋರೆ ಬೋರೆ ಆಯಿತ್ ಒಬ್ಬೊಬ್ಬಂಡ ಮೇಲೆ ಬಂತ್ ಅಳ್‌ತಂಡತ್.

⁴ಅಕ್ಕ ಅಯಿಂಗೆಲ್ಲಾರು ಪವಿತ್ರಾತ್ಮತ್‍ಲ್ ದುಂಬಿತ್ ಆ ಆತ್ಮ ಒಬ್ಬೊಬ್ಬಂಗ್ ಶಕ್ತಿ ಕೊಡ್‍ತನೆಕೆ ಅಯಿಂಗಕ್ ಗೊತ್ತಿಲ್ಲತ ಬೋರೆ ಬೋರೆ ಬಾಷೆಲ್ ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ.

⁵ಆ ಸಮಯತ್‍ಲ್ ಲೋಕತ್‍ಲ್ ಉಳ್ಳ ಎಲ್ಲಾ ದೇಶತ್ಂಜ ಬಯ ಬಕ್ತಿಯುಳ್ಳ ಯೆಹೂದ್ಯಂಗ ಯೆರೂಸಲೇಮ್‌ಕ್ ಬಂದಿತ್ಂಜತ್.

⁶ಆ ಬಲ್ಯ ಸದ್ದ್ ಕ್‍ೕಪಕ ಎಲ್ಲಾ ಜನಳು ಗುಂಪ್ ಗುಂಪಾಯಿತ್ ಓಡಿ ಬಂದಿತ್ ನೋಟ್‌ಚಿ. ಅಕ್ಕ, ಅಯಿಂಗಯಿಂಗಡ ಬಾಷೆಲ್ ಜನ ತಕ್ಕ್ ಪರಿಯುವಾನ ಕ್‍ೕಟಿತ್ ಅಯಿಂಗೆಲ್ಲ ಅಲ್ಲಿ ಎಂತ ಆಯಂಡುಂಡ್‍ೕಂದ್ ಗೊತ್ತಿಲ್ಲತೆ, ಆಶ್ಚರ್ಯ ಪಟ್ಟತ್.

⁷ಎಲ್ಲಾರು ದುಂಬ ಆಶ್ಚರ್ಯತ್‍ಲ್, ಅಯಿಂಗಯಿಂಗಳ ನೋಟಿತ್ ಈಂಗ ಎಲ್ಲಾರು ಗಲಿಲಾಯತ್‍ರ ಜನ ಅಲ್ಲಾ?

⁸ಅನ್ನನೆ ಇಪ್ಪಕ ನಂಗ ಪುಟ್ಟ್‌ನ ಜಾಗತ್‍ರ ಬಾಷೆಲ್, ಈಂಗ ತಕ್ಕ್ ಪರಿವಾನ ನಂಗ ಕ್‍ೕಟಂಡುಂಡಲ್ಲಾ, ಇದ್ ಎನ್ನನೆ ಆಚಿ?

⁹ನಂಗೆಲ್ಲ ಪಾರ್ಥ್ಯಂಗ, ಮೇದ್ಯಂಗ, ಏಲಾಮ್ಯಂಗ, ಮೆಸೊಪೊತಾಮ್ಯ, ಯೂದಾಯ, ಕಪ್ಪದೋಕ್ಯ,

¹⁰ಪೊಂತ, ಆಸ್ಯ, ಫ್ರುಗ್ಯ, ಪಂಫುಲ್ಯ, ಐಗುಪ್ತ ದೇಶತ್‍ಲ್ ಉಳ್ಳಯಿಂಗಳು, ಕುರೇನೆರ ಸುತ್ತ್‌ಮುತ್ತ್‌ಲ್ ಉಳ್ಳ ಲಿಬ್ಯ ಪ್ರಾಂತ್ಯತ್‍ಲ್ ಉಳ್ಳಯಿಂಗಳು, ರೋಮ್ ಪಟ್ಟಣತ್ಂಜ ಬಂದಯಿಂಗಳು, ಯೆಹೂದ್ಯಂಗಳು, ಯೆಹೂದ್ಯ ಪದ್ದತಿಕ್ ಕೂಡ್‍ನಯಿಂಗಳು,

¹¹ಕ್ರೇತ್ಯಯಿಂಗಳೂ ಪಿಂಞ ಅರಬಿ ದೇಶತಯಿಂಗಳಾನ ನಂಗಡ ನಂಗಡ ಬಾಷೆಲ್ ಈಂಗ ದೇವ ಮಾಡ್‍ನ ಅದ್ಬುತ ಕಾರ್ಯತ್‍ನ ತಕ್ಕ್ ಪರಿವಾನ ಕ್‍ೕಟಂಡುಂಡಲ್ಲಾಂದ್ ಎಣ್ಣ್‌ಚಿ.

¹²ಎಲ್ಲಾರು ಆಶ್ಚರ್ಯತ್‍ಲ್ ಅಲ್ಲಿ ಎಂತ ಆಯಂಡುಂಡ್‍ೕಂದ್ ಗೊತ್ತಿಲ್ಲತೆ ಪೋಡಿಲ್, ಇದ್ ಎಂತಾಯಿತಿಕ್ಕೂಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

¹³ಬೋರೆ ಚೆನ್ನ ಜನ: ಈಂಗ ಕಳ್ಳ್ ಕುಡಿಚಿತ್ ಚೊಕ್ಕ್‌ನಗೊಂಡ್ ಇನ್ನನೆ ಮಾಡಿಯಂಡುಂಡ್‍ೕಂದ್ ಅಯಿಂಗಳ ತಮಾಷಿ ಮಾಡ್‍ಚಿ.

¹⁴ಅಕ್ಕ ಪೇತ್ರ, ತಾಂಡಕೂಡೆ ಇಂಜ ಪನ್ನಂದ್ ಅಪೊಸ್ತಲಂಗಡ ಕೂಡೆ ನಿಂದಿತ್, ಅಯಿಂಗಳ ನೋಟಿತ್ ಬಲ್ಯ ಸ್ವರತ್‍ಲ್: ಯೆಹೂದ್ಯಂಗಳೇ, ಯೆರೂಸಲೇಮ್‍ಲ್ ವಾಸ ಮಾಡಿಯಂಡ್ ಉಳ್ಳ ಜನಳೇ, ನಾಡ ತಕ್ಕ್‌ನ ಎಚ್ಚರತ್‍ಲ್ ಕ್‍ೕಳಿ, ಇದ್ ನಿಂಗಕ್ ಗೊತ್ತಿರಂಡು.

¹⁵ನಿಂಗ ಗೇನ ಮಾಡ್‌ವನೆಕೆ ಈಂಗ ಕಳ್ಳ್ ಕುಡ್‍ಚಯಿಂಗ ಅಲ್ಲ. ಎನ್ನಂಗೆಣ್ಣ್‌ಚೇಂಗಿ ಇಕ್ಕ ಪೊಲಾಕ ಒಯಿಂಬದ್ ಗಂಟೆ ಮಾತ್ರ ಆಯಿತುಂಡ್.

¹⁶ಆಚೇಂಗಿ ಇದ್ ಪ್ರವಾದಿಯಾನ ಯೋವೇಲ ಎಣ್ಣ್‌ನನೆಕೆ ನಡ್ಂದಂಡುಂಡ್

¹⁷ಕಡೆ ಕಾಲತ್‍ಲ್ ನಾನ್ ಎಲ್ಲಾ ಮನುಷ್ಯಂಗಡ ಮೇಲೆ ನಾಡ ಆತ್ಮತ್‌ನ ಬೂಕುವಿ. ಅಕ್ಕ ನಿಂಗಡ ಮೋನಿಯಂಗ, ಮೋಳಿಯ ಪ್ರವಾದನೆ ಎಣ್ಣುವ. ನಿಂಗಡ ಬಾಲೆಕಾರ ಮಕ್ಕ ದರ್ಶನ ಕಾಂಬ. ನಿಂಗಡ ಪೆರಿಯಯಿಂಗ ಸ್ವಪ್ನ ಕಾಂಬ.

¹⁸ಆ ದಿವಸತ್‍ಲ್ ನಾಕ್ ಸೇವೆ ಮಾಡ್‌ವ ಆಣಾಳ್ ಪಿಂಞ ಪೊಣ್ಣಾಳ್‍ರ ಮೇಲೆ ನಾಡ ಆತ್ಮತ್‌ನ ಬೂಕುವಿ. ಅಕ್ಕ ಅಯಿಂಗ ಪ್ರವಾದನೆ ಎಣ್ಣುವ.

¹⁹ಅದಲ್ಲತೆ ಬಾನತ್‍ರ ಮೇಲೆ ಆಶ್ಚರ್ಯ ಕಾರ್ಯತ್‍ನ, ಕ್‍ೕ‍ದಲ್ ಉಳ್ಳ ಬೂಮಿಲ್ ಚೋರೆ, ತಿತ್ತ್, ಪಿಂಞ ಪೊಗೆರ ಮೋಡ ಈ ತರ ಗುರ್‌ತ್ ಕಾರ್ಯತ್‍ನ ಕಾಟುವಿ.

²⁰ಒಡೆಯಂಡ ಬಲ್ಯ ಪ್ರಕಾಶವಾನ ದಿವಸ ಬಪ್ಪಕ್ ಮಿಂಞ ಸೂರ್ಯ ಇರ್‌ಟಾಯಿರ್‍ವ, ಚಂದ್ರ ಚೋರೆರನೆಕೆ ಚೋಂದ್ ಪೋಪ.

²¹ಆಚೇಂಗಿ, ಒಡೆಯಂಡ ಪೆದತ್‍ನ ಕಾಕ್‌ವಯಿಂಗೆಲ್ಲ ಬಚಾವಾಪಾಂದ್ ದೇವ ಎಣ್ಣಿತುಂಡ್. [3]

²²ಇಸ್ರಾಯೇಲ್‍ರ ಜನಳೇ, ನಾಡ ತಕ್ಕ್‌ನ ಕ್‍ೕಳಿ; ನಿಂಗಕೆಲ್ಲ ಚಾಯಿತೆ ಗೊತ್ತುಳ್ಳನೆಕೆ ನಜರೇತ್‍ರ ಯೇಸುರ ಮೂಲಕ ದೇವ ನಿಂಗಡ ಮದ್ಯತ್‍ಲ್ ಬಲ್ಯ ಅದ್ಬುತ, ಆಶ್ಚರ್ಯ ಪಿಂಞ ಗುರ್‌ತ್ ಕಾರ್ಯತ್‍ನ ಮಾಡಿತ್ ಅದ್‍ಯಿಂಜ ಅಂವೊನ ದೇವ ನೇಮಿಚಿಟ್ಟತ್‍ೕಂದ್ ನಿಂಗಕ್ ಕಾಂಬ್‍ಚಿಟ್ಟತ್.

²³ಆಚೇಂಗಿಯು, ದೇವ ತೀರ್ಮಾನ ಮಾಡ್‍ನ ಆಲೋಚನೆರನೆಕೆ ಪಿಂಞ ಮಿಂಞಕ್ ಎಂತಾಪಾಂದ್ ಗೊತ್ತುಳ್ಳ ಅಂವೊಂಡ ಗುಣತ್‍ರನೆಕೆ, ಅಂವೊನ ನಿಂಗಡ ಕೈಲ್ ದೇವ ಒಪ್ಪ್‌ಚಿಡ್‌ವಕ, ನಿಂಗ ಅಂವೊನ ಯೆಹೂದ್ಯ ಅಲ್ಲತಯಿಂಗಡ ಕೈಕ್ ಕೊಡ್‌ತಿರ. ಅಯಿಂಗ ಅಂವೊನ ಶಿಲುಬೇಕ್ ಇಟ್ಟಿತ್ ಕೊಂದತ್.

²⁴ಆಚೇಂಗಿ ದೇವ ಅಂವೊನ ಮರಣತ್‌ರ ಅದಿಕಾರತ್ಂಜ ಬಲಿಪಂಜಿ, ಚಾವ್‍ಯಿಂಜ ಎಪ್ಪ್‌ಚಿ. ಎನ್ನಂಗೆಣ್ಣ್‌ಚೇಂಗಿ ಚಾವ್‍ಕ್ ಅಂವೊನ ಪುಡ್‌ಚಿತ್ ಬೆಪ್ಪಕ್ ಕಯಿಂಜಿತ್ತ್‌ಲ್ಲೆ.

²⁵ಯೇಸುರ ವಿಷಯತ್‍ನ ದಾವೀದ ಇನ್ನನೆ ಎಣ್ಣಿತ್ಂಜತ್: ನಾನ್ ಎಕ್ಕಾಲು ನಾಡ ಮಿಂಞತ್‍ಲ್ ಒಡೆಯನ ಕಂಡಂಡ್ ಉಳ್ಳ. ಅಂವೊ ನಾಡ ಬಲ್‌ತೆ ಬರಿಲ್ ಉಂಡ್. ನಾಕ್ ಸ್ತಿರವಾಯಿತ್ ನಿಪ್ಪಕ್ ಆಪ.

²⁶ಆಂಗಾಯಿತ್ ನಾಡ ಹೃದಯಕ್ ಕುಶಿಯಾಚಿ, ನಾಡ ನಾವ್‌ಲ್ ಕೊಂಡಾಡುವ ತಕ್ಕ್‌ನ ಬಪ್ಪನೆಕೆ ಮಾಡ್‍ಚಿ; ನಾಡ ತಡಿ ಸಹ ನಿರಿಕ್ಷೇಲ್ ಎಕ್ಕಾಲು ಜೀವತ್‍ಲ್ ಇಪ್ಪ.

²⁷ನೀನ್ ನಾಡ ಆತ್ಮತ್‌ನ, ಚಾವ್‍ರ ಜಾಗಕ್ ಪೋಪಕ್ ಬುಡುಲೆ, ನೀಡ ಪವಿತ್ರವಾನಂವೊಂಡ ತಡೀನ ಕೀಂಜ್ ಪೋಪಕ್ ಬುಡ್‍ಲೆ.

²⁸ಎನ್ನಂಗೆಣ್ಣ್‌ಚೇಂಗಿ, ನೀನ್ ಜೀವತ್‍ರ ಬಟ್ಟೇನ ನಾಕ್ ಗೊತ್ತ್ ಮಾಡಿ ತಂದಿಯ; ನೀಡ ಸನ್ನಿದಾನತ್‍ಲ್, ನನ್ನ ಕುಶೀಲ್ ದುಂಬ್‍ಚಿಡ್‍ವಿಯಾಂದ್ ಎಣ್ಣ್‌ಚಿ.[4]

²⁹ಅಣ್ಣತಮ್ಮಣಂಗಳೇ, ಇದ್‍ನ ಗೇನ ಮಾಡಿಯೊಳಿ, ನಂಗಡ ಗೋತ್ರತ್‍ರ ಅಜ್ಜನಾನ ದಾವೀದ ಇದ್‍ನ ಎಣ್ಣ್‌ವಕ ಅಂವೊಂಡ ವಿಷಯತ್‍ನ ಎಣ್ಣಿತಿಲ್ಲೇ. ಎನ್ನಂಗೆಣ್ಣ್‌ಚೇಂಗಿ, ದಾವೀದ ಚತ್ತ್ ಪೋಚಿ, ಅಂವೊನ ಪೂತತ್, ಅಂವೊಂಡ ಗೋರಿ ಇಕ್ಕಲು ನಂಗಡ ಮದ್ಯತ್‍ಲ್ ಉಂಡ್‍ೕಂದ್ ನಾನ್ ದೈರ್ಯತ್‍ಲ್ ಎಣ್ಣುವಕಯ್ಯು.

³⁰ಆಚೇಂಗಿ ಅಂವೊ ಪ್ರವಾದಿಯಾಯಿತ್ಂಜತ್. ಆನಗುಂಡ್, ತಾಂಡ ಸಂತಾನತ್‍ಲ್ ಒಬ್ಬನ ಎಪ್ಪಿತ್, ತಾಂಡ ಸಿಂಹಾಸನತ್‍ಲ್ ಅಳ್‍ಪ್‍ಚಿಚುವಾಂದ್ ದೇವ ಅಂವೊಂಗ್ ವಾಗ್ದಾನವಾಯಿತ್ ಪರ್ಂದ ಸತ್ಯ ತಕ್ಕ್ ಅಂವೊಂಗ್ ಗೊತ್ತ್ಂಜತ್:[5]

³¹ಕ್ರಿಸ್ತಂಡ[6] ಆತ್ಮತ್‌ನ ದೇವ ಪಾತಾಳತ್‍ಲ್ ಬುಡ್‍ಲೇಂದು, ಅಂವೊಂಡ ತಡಿ ಕೀಂಜಿತ್ ಪೋಪ್‍ಲೇಂದು ಮಿಂಞಲೇ ಕಂಡಿತ್, ಅಂವೊ ಚಾವ್‍ಯಿಂಜ ಜೀವವಾಯಿತ್ ಏವ ವಿಷಯತ್‍ನ ಗೇನ ಮಾಡಿತ್ ಇನ್ನನೆ ಎಣ್ಣಿತ್ಂಜತ್.

³²ಈ ಯೇಸುನ ದೇವ ಚಾವ್‍ಯಿಂಜ ಎಪ್ಪ್‌ಚಿಟ್ಟತ್; ಇದ್ಂಗ್ ನಂಗ ಎಲ್ಲಾರು ಸಾಕ್ಷಿಯಾಯಿತ್ ಉಂಡ್.

³³ಅಂವೊನ ದೇವ ತಾಂಡ ಬಲ್‌ತೆ ಬರಿಲ್ ಅಳ್‍ಪ್‍ಚಿಟ್ಟಿತ್, ದೇವ ವಾಗ್ದಾನ ಮಾಡ್‍ನನೆಕೆ ಪವಿತ್ರಾತ್ಮನ ಅಯಿಪಕ್ ಅದಿಕಾರ ಕೊಡ್‍ತತ್. ನಿಂಗ ಇಕ್ಕ ನೋಟಿಯಂಡ್, ಕ್‍ೕಟಂಡ್ ಉಳ್ಳನೆಕೆ, ಅಂವೊ ನಂಗಡ ಮೇಲೆ ಪವಿತ್ರಾತ್ಮತ್‍ನ ಬೂಕಿತುಂಡ್.

³⁴ದಾವೀದ ಪರಲೋಕಕ್ ಪೋಯಿತ್‌ಲ್ಲೆ, ಆಚೇಂಗಿಯು, ನಾನ್ ನೀಡ ವಿರೋದಿಯಳ ನೀಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ,

³⁵ನಾಡ ಬಲ್‌ತೆ ಬರಿಲ್ ಅಳ್‌ತಾಂದ್ ದೇವ ನಾಡ ಒಡೆಯಂಗ್ ಎಣ್ಣ್‌ಚೀಂದ್ ಅಂವೊನೇ ಎಣ್ಣ್‌ಚಿ.[7]

³⁶ಆನಗುಂಡ್ ನಿಂಗ ಶಿಲುಬೇಕ್ ಇಟ್ಟ ಈ ಯೇಸುನ ದೇವ ಒಡೆಯನಾಯಿತು ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನಾಯಿತು ಮಾಡಿತುಂಡ್‍ೕಂದ್ ಇಸ್ರಾಯೇಲ್ ಜನಕೆಲ್ಲ ಕಂಡಿತವಾಯಿತ್ ಗೊತ್ತಿರಂಡೂಂದ್ ಎಣ್ಣ್‌ಚಿ.

³⁷ಇದ್‍ನೆಲ್ಲ ಕ್‍ೕಟಂಡಿಪ್ಪಕ, ಅಲ್ಲಿ ಇಂಜ ಜನಕ್, ಅಯಿಂಗಡ ಹೃದಯತ್‍ಲ್ ಕುತ್ತ್‌ವನೆಕೆ ಆಚಿ. ಅಕ್ಕ ಅಯಿಂಗ ಪೇತ್ರನ ಪಿಂಞ ಬಾಕಿಯುಳ್ಳ ಅಪೊಸ್ತಲಂಗಕ್, ಅಣ್ಣತಮ್ಮಣಂಗಳೇ, ನಂಗ ಎಂತ ಮಾಡಂಡೂಂದ್ ಕ್‍ೕಟತ್.

³⁸ಪೇತ್ರ ಅಯಿಂಗಕ್: ನಿಂಗಡ ಪಾಪಕ್ ಪರಿಹಾರ ಕ್‍ಟ್ಟ್‌ವಕಾಯಿತ್ ನಿಂಗ ಒಬ್ಬೊಬ್ಬನು ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್, ಯೇಸುರ ಪೆದತ್‍ಲ್ ದೀಕ್ಷಾಸ್ನಾನ ಎಡ್‌ತೊಳಿ. ಅಕ್ಕ ನಿಂಗ ಪವಿತ್ರಾತ್ಮಂಡ ವರತ್‍ನ ಪಡೆಯುವಿರ.

³⁹ಈ ದೇವಡ ವಾಗ್ದಾನ, ನಿಂಗಕು, ನಿಂಗಡ ಮಕ್ಕಕು, ನಂಗಡ ಒಡೆಯನಾನ ದೇವ ಕಾಕುವ ದೂರತ್‍ಲ್ ಉಳ್ಳ ಎಲ್ಲಾ ಜನಕು ಉಂಡ್‍ೕಂದ್ ಎಣ್ಣ್‌ಚಿ.

⁴⁰ಪೇತ್ರ ಇಂಞು ದುಂಬ ಬುದ್ದಿ ಎಣ್ಣಿತ್ ಸಾಕ್ಷಿ ಎಣ್ಣಿತ್, ಈ ಕೆಟ್ಟ ಸಂತಾನತ್ಂಜ ನಿಂಗಳ ಕಾಪಾಡಿಯೊಳೀಂದ್ ಅಯಿಂಗಳ ಬೋಡಿಯಂಡತ್.

⁴¹ಅಂವೊಂಡ ತಕ್ಕ್‌ನ ಒತ್ತಂಡಯಿಂಗ ದೀಕ್ಷಾಸ್ನಾನ ಎಡ್‍ತಂಡತ್. ಆ ದಿವಸ ಸುಮಾರ್ ಮೂಂದಾಯಿರ ಜನ ಅಯಿಂಗಡ ಕೂಡೆ ಕೂಡಿಯಂಡತ್.

⁴²ಈಂಗ ಅಪೊಸ್ತಲಂಗಡ ಬೋದನೆನ ಕ್‍ೕಪಕ್ ಅರ್ಪಿಚಿಟ್ಟಯಿಂಗಳಾಯಿತ್, ಐಕ್ಯತ್‍ಲ್, ಒಟ್ಟಿ ಪೊಳಿಪದ್‍ಲ್, ಪಿಂಞ ಪ್ರಾರ್ಥನೆಲ್, ದೃಡ ಉಳ್ಳಯಿಂಗಳಾಯಿತ್ ಇಂಜತ್.

⁴³ಜನಕೆಲ್ಲ ಪೋಡಿ ಆಪಕಿಂಜತ್, ಇದ್‍ಲ್ಲತೆ ದುಂಬ ಗುರ್‌ತ್ ಕಾರ್ಯವು ಪಿಂಞ ಆಶ್ಚರ್ಯ ಕಾರ್ಯವು ಅಪೊಸ್ತಲಂಗಡ ಕೈಯಿಂಜ ನಡ್ಂದತ್.

⁴⁴ಯೇಸುನ ನಂಬ್‍ನಯಿಂಗ ಎಲ್ಲಾರು ಒಂದಾಯಿತ್ ಅಯಿಂಗಕುಳ್ಳದೆಲ್ಲಾನ ಎಲ್ಲಾಡದಾಯಿತ್ ಅನುಬವಿಚಿಟ್ಟಂಡ್ ಇಂಜತ್.

⁴⁵ಅದಲ್ಲತೆ, ಅಯಿಂಗ ಅಯಿಂಗಡ ಆಸ್ತಿನ ಮಾರಿತ್, ಅಯಿಂಗಡಡೆಲ್ ಪ್ರತಿ ಒಬ್ಬಂಗ್ ಎಚ್ಚಕ್ ಅವಸ್ಯ ಇಂಜತೋ ಅಚ್ಚಕ್ ಪಾಲ್ ಮಾಡಿ ಕೊಡ್‍ತತ್.

⁴⁶ಅಯಿಂಗ ದಿನಾಲು ಒರೇ ಮನಸ್ಸ್‌ಲ್ ದೇವಾಲಯತ್‍ಲ್ ಕೂಡಿಯಂಡ್, ಮನೆ ಮನೆಲ್ ಒಟ್ಟಿ ಪೊಳಿಚಿತ್, ಕುಶೀಲ್ ಉಂಡಂಡ್ ಪಿಂಞ ನೇರಾನಯಿಂಗಳಾಯಿತ್ ಇಂಜತ್.

⁴⁷ದೇವನ ತುದಿಚಂಡ್, ಜನಡ ದಯೇನ ಪಡ್ಂದಯಿಂಗಳಾಯಿತ್‌ಂಜತ್. ರಕ್ಷಣೆ ಪಡ್ಂದಯಿಂಗಳ ದೇವ ದಿನಾಲು ಅಯಿಂಗಡ ಕೂಟ್‍ಕ್ ಕೂಟಿಯಂಡಿಂಜತ್.