Read Kodava ಅಪೊಸ್ತಲ 20 Bible Online

ಅಪೊಸ್ತಲ 20 - Kodava bible

ಅಪೊಸ್ತಲ 20

¹ಕಲಹ ಕಮ್ಮಿ ಆನ ಪಿಂಞ ಪೌಲ, ಯೇಸುನ ನಂಬ್‍ನಯಿಂಗಳ ಒಕ್ಕಚೆ ಕಾಕಿತ್, ಅಯಿಂಗಕ್ ಪುರ್‌ಡ್ ಕೊಡ್‍ತತ್. ಪಿಂಞ ಅಯಿಂಗಡಿಂಜ ಅಪ್ಪಣೆ ಪಡ್ಂದಂಡ್ ಮಕೆದೋನ್ಯಕ್ ಪೊರಟತ್.

²ಅಂವೊ ಆ ಸೀಮೆಕ್ ಪೋಯಿತ್ ಅಲ್ಲಿಯತ್‍ರ ಜನಕ್ ದುಂಬ ಪುರ್‌ಡ್ ಕೊಡ್‌ತಿತ್, ಆಕೀರ್‌ಕ್ ಗ್ರೀಕ್ ದೇಶಕ್ ಬಾತ್.

³ಅಲ್ಲಿ ಅಂವೊ ಮೂಂದ್ ತಿಂಗ ಇಂಜತ್. ಸಿರಿಯ ದೇಶಕ್ ಸಮುದ್ರತ್‍ರ ಮಾರ್ಗವಾಯಿತ್ ಪ್ರಯಾಣ ಮಾಡಂಡೂಂದ್ ಏರ್ಪಾಡ್ ಮಾಡಿಯಂಡ್ ಇಪ್ಪಕ, ದಾರ್‌ಕು ಗೊತ್ತಿಲ್ಲತೆ ಅಂವೊನ ಕೊಲ್ಲ್‌ವಕ್ ಯೆಹೂದ್ಯಂಗ ತೀರ್ಮಾನ ಮಾಡ್‍ಚೀಂದ್ ಗೊತ್ತಾಚಿ. ಅಕ್ಕ ಅಂವೊ ಪುನಃ ಮಕೆದೋನ್ಯತ್‍ರ ಬಟ್ಟೇಲ್ ಪೋಪಕ್ ತೀರ್ಮಾನ ಮಾಡ್‍ಚಿ.

⁴ಪೌಲಂಡ ಕೂಡೆ, ಬೆರೋಯ ಪಟ್ಟಣತ್‍ರ ಪಿರಸಂಡ ಮೋಂವೊನಾನ ಸೋಪತ್ರ ಎಣ್ಣ್‌ವಂವೊನು, ಥೆಸಲೊನೀಕ ಪಟ್ಟಣತ್‍ರ ಅರಿಸ್ತಾರ್ಕ ಪಿಂಞ ಸೆಕುಂದ ಎಣ್ಣುವಯಿಂಗಳು, ದೆರ್ಬೆ ಪಟ್ಟಣತ್‍ರ ಗಾಯನ ಪಿಂಞ ತಿಮೊಥೆಯ ಎಣ್ಣುವಯಿಂಗಳು, ಆಸ್ಯ ಸೀಮೆರ ತುಖಿಕನ ಪಿಂಞ ತ್ರೊಫಿಮ ಎಣ್ಣುವಯಿಂಗಳು ಆಸ್ಯ ಸೀಮೆಕತ್ತನೆ ಪೋಚಿ.

⁵ಈಂಗ ನಂಗಕ್ ಮಿಂಞ ಪೋಯಿತ್ ನಂಗಕಾಯಿತ್ ತ್ರೋವ ಪಟ್ಟಣತ್‍ಲ್ ಪಾರಕಾತಂಡ್ ಇಂಜತ್.

⁶ಪುಳಿಯಿಲ್ಲತ ಒಟ್ಟಿ ತಿಂಬ ನಮ್ಮೆ ಆನ ಪಿಂಞ ನಂಗ ಫಿಲಿಪ್ಪಿ ಪಟ್ಟಣತ್ಂಜ ಪೊರಟಿತ್ ಹಡಗ್ ಪತ್ತಿತ್, ಅಂಜ್ ದಿನ ಆನ ಪಿಂಞ ತ್ರೋವ ಪಟ್ಟಣಕ್ ಬಂತ್ ಎತ್ತಿಯೆ. ಅಲ್ಲಿ ನಂಗ ಅಯಿಂಗಡ ಕೂಡೆ ಏಳ್ ದಿವಸ ಒಳಿಂಜಿತ್.

⁷ವಾರತ್‍ರ ಆದ್ಯ ದಿವಸತ್‍ಲ್ ನಂಗ ಒಟ್ಟಿನ ಪೊಳಿಪ ಸಮಯಕಾಯಿತ್ ಕೂಡಿ ಬಂದಿತ್ಂಜತ್. ಅಲ್ಲಿ ಕೂಡಿ ಬಂದಿತ್ಂಜ ಜನಡ ಕೂಡೆ ಪೌಲ ಪ್ರಸಂಗ ಮಾಡಿಯಂಡಿಂಜತ್. ಪಿತ್ಯಾಂದ್ ಪೌಲ ಅಲ್ಲಿಂಜ ಪೊರಟಿತ್ ಪೋಂಡೂಂದ್ ಇಂಜಗುಂಡ್, ನಡ್‍ಪಾದ್ರೆಕತ್ತನೆ ಅಯಿಂಗಡ ಕೂಡೆ ಪೌಲ ತಕ್ಕ್ ಪರ್ಂದಂಡ್ ಪ್ರಸಂಗ ಮಾಡಿಯಂಡ್ ಇಂಜತ್.

⁸ನಂಗ ಕೂಡಿ ಬಂದಿತ್ಂಜ ಕೊಡಿರ ಕೋಂಬರೆಲ್ ದುಂಬ ಬೊಳ್‍ಚ ಇಂಜತ್.

⁹ಪೌಲ ದುಂಬ ನೇರ ತಕ್ಕ್ ಪರ್ಂದಂಡೇ ಇಪ್ಪಕ, ಯೂತಿಕ ಎಣ್ಣ್‌ವ ಒರ್ ಬಾಲೆಕಾರ ಕಿಡ್‍ಕೆಲ್ ಅಳ್‍ತಂಡಿಂಜತ್, ಅಂವೊಂಗ್ ವರ್‌ಕ್ ದುಂಬ ಬಂದಗುಂಡ್, ವರ್‌ಕ್ ತೂಂಗಿಯಂಡ್, ಅಂವೊ ಮೂಂದನೆ ಮಾಡಿಯಿಂಜ ಅಡಿಕ್ ಬುದ್ದತ್; ಅಂವೊನ ಎಡ್‍ತಿತ್ ನೋಟ್‍ವಕ ಅಂವೊ ಚತ್ತ್ ಪೋಯಿತ್ಂಜತ್.

¹⁰ಆಚೇಂಗಿ, ಪೌಲ ಇಳಿಂಜಿ ಪೋಯಿತ್ ಅಂವೊಂಡ ಮೇಲೆ ಬುದ್ದಿತ್, ಅಂವೊನ ತಬ್ಬಿಯಂಡ್: ಬೇಜಾರ್ ಮಾಡತಿ, ಅಂವೊಂಡ ಜೀವ ಅಂವೊಂಡ ಒಳ್‍ಲ್ ಉಂಡ್‍ೕಂದ್ ಎಣ್ಣ್‌ಚಿ.

¹¹ಪಿಂಞ, ಅಯಿಂಗ ಎಲ್ಲಾರು ಕೊಡಿಕ್ ಪೋಯಿತ್ ಒಟ್ಟಿ ಪೊಳ್‌ಚಿತ್ ಉಂಡಿತ್, ಪೊಲಾಕಕತ್ತನೆ ತಕ್ಕ್ ಪರ್ಂದಿತ್ ಪಿಂಞ ಪೊರಟಿತ್ ಪೋಚಿ.

¹²ಆ ಬಾಲೆಕಾರನ ಅಯಿಂಗ ಜೀವವಾಯಿತ್ ಕಾಕಿಯಂಡ್ ಬಪ್ಪಕ, ಅಯಿಂಗಕ್ ದುಂಬ ಸಮಾದಾನ ಆಚಿ.

¹³ಪೌಲ ಅಸ್ಸೊಸಿ ಪಟ್ಟಣಕತ್ತನೆ ನಡ್ಂದಂಡ್ ಪೊಪಕಿಂಜಗುಂಡ್, ನಂಗಳ ಅಂವೊಕಿಂಜ ಮಿಂಞಲೇ ಅಲ್ಲಿಕ್ ಪೋಪಕ್ ಅಪ್ಪಣೆ ಕೊಡ್‍ತತ್. ನಂಗ ಅಲ್ಲಿಂಜ ಪೌಲನ ಹಡಗ್‍ಲ್ ಪತ್ತ್‌ಚಿಟ್ಟಂಡ್ ಸಮುದ್ರತ್‍ರ ಮಾರ್ಗವಾಯಿತ್ ಪ್ರಯಾಣ ಮಾಡ್‌ವಕಿಂಜತ್.

¹⁴ಅಸ್ಸೊಸಿ ಪಟ್ಟಣತ್ಂಜ ನಂಗ ಅಂವೊನ ಹಡಗ್‍ಲ್ ಪತ್ತ್‌ಚಿಟ್ಟಂಡ್ ಮಿತಿಲೇನೆ ಪಟ್ಟಣಕ್ ಬಾತ್.

¹⁵ಅಲ್ಲಿಂಜ ಪೊರಟಿತ್ ಪಿತ್ಯಾಂದ್ ಖೀಯೊಸ್ ದ್ವೀಪಕ್ ಬಾತ್. ಅದ್ಂಡ ಪಿತ್ಯಾಂದ್ ಸಾಮೊಸಿರ ಪಕ್ಕ ಬಂತ್, ಅದ್ಂಡ ಪಿತ್ಯಾಂದ್ ಮಿಲೇತಕ್ ಕೂಡ್‍ಚಿ.

¹⁶ಕಯ್ಯುವೇಂಗಿ ಪಂಚಾಶತ್ತಮತ್‍ರ ನಮ್ಮೆಕ್ ಯೆರೂಸಲೇಮ್‍ಲ್ ಇರಂಡೂಂದ್ ಪೌಲ ಅವಸರಪಟ್ಟತ್. ಆನಗುಂಡ್ ಆಸ್ಯ ಸೀಮೆಲ್ ಕಾಲ ಕಳೆಯುವಕ್ ಮನಸ್ಸಿಲ್ಲತೆ, ಎಫೆಸ ಪಟ್ಟಣತ್‍ನ ದಾಟಿತ್ ಸಮುದ್ರತ್‍ರ ಮಾರ್ಗವಾಯಿತ್ ಪೋಂಡೂಂದ್ ತೀರ್ಮಾನ ಮಾಡಿಯಂಡತ್.

¹⁷ನಂಗ ಮಿಲೇತಕ್ ಎತ್ತ್‌ನ ಪಿಂಞ, ಪೌಲ ಎಫೆಸ ಪಟ್ಟಣತ್ ಸಬೆರ ಪೆರಿಯಯಿಂಗಳ ತಾಂಡ ಪಕ್ಕ ಬಪ್ಪಕ್ ಎಣ್ಣಿತ್ ಒಬ್ಬನ ಅಯಿಚತ್.

¹⁸ಅಯಿಂಗ ಬಂದ ಪಿಂಞ, ಪೌಲ ಅಯಿಂಗಳ ನೋಟಿತ್: ನಾನ್ ಆಸ್ಯ ಸೀಮೆಲ್ ಬಂದ ಕಾಲತ್ಂಜ ಇಲ್ಲಿಕತ್ತನೆ ನಿಂಗಡ ಮದ್ಯತ್‍ಲ್ ಎನ್ನನೆ ಇಂಜ್‍ೕಂದ್ ನಿಂಗಕ್ ಗೊತ್ತುಂಡ್.

¹⁹ನಾನ್ ದುಂಬ ತಾಳ್ಮೆಲ್, ದುಂಬ ಕನಿಕರತ್‌ಲ್ ಒಡೆಯಂಗಾಯಿತ್ ಸೇವೆ ಮಾಡಿಯೆ. ಇದ್‍ಲ್ಲತೆ ಯೆಹೂದ್ಯಂಗಡ ಮೂಲಕ ನಾಕ್ ಬಂದ ಎಲ್ಲಾ ಮೋಸವಾನ ಯೋಚನೆರ ಬಲ್ಯ ಸೋದನೆ ಇಂಜತ್‍ೕಂದ್ ನಿಂಗಕ್ ಗೊತ್ತುಂಡ್.

²⁰ನಿಂಗಕ್ ಪ್ರಯೋಜನವಾನದ್‍ನ ಒಂದು ಒಳ್‌ಪ್‍ಚೆಡತೆ, ಎಲ್ಲಾನ ಎಲ್ಲಾಡ ಮಿಂಞತ್, ಮನೆ ಮನೆಲ್ ಬೋದನೆ ಮಾಡಿತ್, ಪ್ರಸಂಗ ಮಾಡಿಯೆ.

²¹ಪಾಪತ್‍ನೆಲ್ಲ ಬುಟ್ಟಿತ್ ದೇವಡ ಪಕ್ಕ ಕಂಡಿತವಾಯಿತ್ ತಿರ್‍ಗಂಡೂಂದು, ಒಡೆಯನಾನ ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಇಡಂಡೂಂದು, ಯೆಹೂದ್ಯಂಗಕು ಯೆಹೂದ್ಯ ಅಲ್ಲತ ಜನಕು ಸಾಕ್ಷಿಯಾಯಿತ್ ಬೋದನೆ ಮಾಡ್‍ನಂವೊನಾಯಿತ್ಂಜ್.

²²ಇಕ್ಕ ನಾನ್ ಯೆರೂಸಲೇಮ್‌ಕ್ ಪೋಯಂಡುಂಡ್. ಎನ್ನಂಗೆಣ್ಣ್‌ಚೇಂಗಿ ಪವಿತ್ರ ಆತ್ಮ ಅಲ್ಲಿ ಪೋಪಕ್ ಎಣ್ಣಿಯಂಡುಂಡ್. ಅಲ್ಲಿ ನಾಕ್ ಎಂತ ಆಪಾಂದ್ ಗೊತ್ತ್‌ಲ್ಲೆ.

²³ನಾನ್ ಪೋಪ ಜಾಗತ್‍ಲೆಲ್ಲ ಜನ ನನ್ನ ಪೊಜ್ಜಿತ್ ಜೈಲ್‌ಕ್ ಇಟ್ಟಿತ್, ತೊಂದರೆ ಮಾಡ್‌ವಾಂದ್ ಪವಿತ್ರಾತ್ಮ ಎಣ್ಣಿಯಂಡುಳ್ಳದ್ ಮಾತ್ರ ನಾಕ್ ಎಲ್ಲಾ ಜಾಗತ್‍ಲು ಗೊತ್ತಾಯಂಡುಂಡ್.

²⁴ಆಚೇಂಗಿ, ಇದ್‍ನೆಲ್ಲ ನೋಟಿತ್ ನಾಕ್ ಬೇಜಾರ್ ಆಪುಲೆ, ನಾಡ ಪ್ರಾಣತ್‍ನ ಸಹ ನಾನ್ ಬಲ್ಯದಾಯಿತ್ ಗೇನ ಮಾಡುಲೆ. ನಾಡ ಓಟತ್‍ನ ಕುಶೀಲ್ ಪೂರ್ತಿಮಾಡ್‌ವಕು, ಒಡೆಯನಾನ ಯೇಸು ನಾಕ್ ಒಪ್ಪ್‌ಚಿಟ್ಟ ದೇವಡ ಕೃಪೇರ ನಲ್ಲ ಸುದ್ದಿನ ಸಾಕ್ಷಿ ಕೊಡ್‍ಪದ್‍ನ ನೆರೆವೇರಿಚಿಡುವಕು ಮಾತ್ರ ನಾನ್ ಕುಶಿ ಪಡುವಿ.

²⁵ನೋಟಿ: ಇಚ್ಚಕ್ ದಿವಸ ನಿಂಗಡ ಕೂಡೆ ವಾಸ ಮಾಡಿತ್, ದೇವಡ ರಾಜ್ಯತ್‍ರ ಸತ್ಯತ್‍ನ ಬೋದನೆ ಮಾಡ್‍ನ ನನ್ನ ಇಂಞು ಮಿಂಞಕ್ ನಿಂಗಡಲ್ಲಿ ಒಬ್ಬನು ನಾಡ ಮೂಡ್‍ನ ಕಾಂಬ್‍ಲೇಂದ್ ನಾಕ್ ಇಕ್ಕ ಗೊತ್ತುಂಡ್.

²⁶ಆನಗುಂಡ್ ಈ ದಿವಸ ನಾನ್ ನಿಂಗಕ್ ಎಣ್ಣುವ ವಿಷಯ ಎಂತ ಎಣ್ಣ್‌ಚೇಂಗಿ: ನಿಂಗಡಲ್ಲಿ ದಾರಾಚೇಂಗಿಯು ನಿತ್ಯ ನಾಶಕ್ ಪಾಲ್‍ದಾರಂಗಳಾಯಿತ್ ಪೋಚೇಂಗಿ, ಅದ್ ನಾಡ ತಪ್ಪ್‌ ಅಲ್ಲ.

²⁷ನಾನ್ ಒರ್ ವಿಷಯತ್‍ನ ಸಹ ಮುಚ್ಚಿತ್ ಬೆಕ್ಕತೆ ದೇವಡ ಚಿತ್ತತ್‍ನ ಪೂರ್ತಿಯಾಯಿತ್ ನಿಂಗಕ್ ಅರಿಚಿಟ್ಟೆಯೆ.

²⁸ಆನಗುಂಡ್, ನಿಂಗಡ ವಿಷಯತ್‍ಲ್ ಪಿಂಞ ದೇವ ತಾಂಡ ಸ್ವಂತ ಚೋರೆಯಿಂಜ ಸಂಪಾದನೆ ಮಾಡ್‍ನ, ಸಬೇನ ನಡ್‍ತುವ ವಿಷಯತ್‍ಲು ಎಚ್ಚರತ್‍ಲ್ ಇರಿ. ಪವಿತ್ರಾತ್ಮ, ಅಂವೊಂಡ ಕೊರಿರ ಗುಂಪ್‍ರನೆಕೆ ಉಳ್ಳ ಸಬೆರ ಜನಕ್ ಸಬೆರ ಪೆರಿಯಯಿಂಗಳಾಯಿತ್ ನಿಂಗಳ ನೇಮಿಚಿಟ್ಟತ್.

²⁹ನಾನ್ ಇಲ್ಲಿಂಜ ಪೋನ ಪಿಂಞ ಗೋರವಾನ ತೋಳಂಗಡನೆಕೆ ಕಳ್ಳ ಬೋದನೆಕಾರಂಗ ನಿಂಗಡ ಪಕ್ಕ ಬಪ್ಪಾಂದ್ ನಾಕ್ ಗೊತ್ತುಂಡ್; ಅಯಿಂಗ ಸಬೆರ ಜನತ್‍ನ ಪಾಳ್ ಮಾಡತೆ ಬುಡುಲೆ.

³⁰ನಿಂಗಡ ಮದ್ಯತ್ಂಜಲು ಚೆನ್ನ ಜನ ಎದ್ದಿತ್ ಸತ್ಯ ಬೋದನೆನ ತಿರಿತ್ ಯೇಸುನ ನಂಬ್‍ನಯಿಂಗಳ ಅಯಿಂಗಡ ಕಡೇಕ್ ಬಲ್‍ಚಿರುವಾಂದ್ ನಾಕ್ ಗೊತ್ತುಂಡ್.

³¹ಆನಗುಂಡ್, ನಾನ್ ಮೂಂದ್ ಕಾಲ ಪೊಲಾಕ ಬಯಿಟ್ ಕಣ್ಣೀರ್ ಇಟ್ಟಂಡ್ ಎಡೆಬುಡತೆ ಪ್ರತಿಯೊಬ್ಬಂಗ್ ಬುದ್ದಿ ಎಣ್ಣಿಯಂಡ್ ಇಂಜದ್‍ನ ನಿಂಗ ಗೇನ ಬೆಚ್ಚಂಡ್ ಎಚ್ಚಾರವಾಯಿತಿರಿ.

³²ನಾನ್ ಇಕ್ಕ ನಿಂಗಳ ದೇವಂಗೂ ಅಂವೊಂಡ ಕೃಪೇರ ವಾಕ್ಯ‌ಕೂ ಒಪ್ಪ್‌ಚಿಟ್ಟಿತ್ ಪೋಪಿ. ಈ ಕೃಪೇರ ವಾಕ್ಯ ನಿಂಗಡ ಬಕ್ತಿ ಬೊಳಿವಕು, ಅಂವೊಂಗಾಯಿತ್ ಬೋರೆ ಮಾಡಿತುಳ್ಳ ಪವಿತ್ರವಾನ ಜನಕ್ ಬೆಚ್ಚಿತುಳ್ಳ ಬಾದ್ಯತ್‌ಲ್ ನಿಂಗಕು ಕ್‍ಟ್ಟ್‌ವನೆಕೆ ಮಾಡ್‌ವ.

³³ನಿಂಗಡ ಬೊಳ್ಳಿ, ಪೊನ್ನ್, ಅಥವ ಉಡ್‍ಪ್ ತೊಡ್‍ಪ್‍ೕಂದ್ ಏದ್ ವಿಷಯತ್‍ಲು ನಾನ್ ಆಸೆ ಪಟ್ಟಿತ್‌ಲ್ಲೆ.

³⁴ನಿಂಗಕ್ ಗೊತ್ತುಳ್ಳನೆಕೆ, ನಾಕ್ ಪಿಂಞ ನಾಡ ಕೂಡೆ ಇಂಜಯಿಂಗಕ್ ಬೋಂಡಿಯಾನದ್‍ನೆಲ್ಲ ಎಡ್‍ಪಕ್ ನಾಡ ಸ್ವಂತ ಕೈಯಿಂಜಲೇ ಕೆಲಸ ಮಾಡಿಯೆ.

³⁵ಇನ್ನನೆ ಕಷ್ಟಪಟ್ಟಿತ್, ಇಲ್ಲತಯಿಂಗಕ್ ಸಹಾಯ ಮಾಡ್‌ವಕು, ಪಿಂಞ ಎಡ್‍ಪಕಿಂಜ ಕೊಡ್‌ಪದೇ ಬಲ್ಯ ಆಶೀರ್ವಾದಾಂದ್ ಒಡೆಯನಾನ ಯೇಸು ಎಣ್ಣ್‌ನನೆಕೆ, ಗೇನಮಾಡಂಡೂಂದ್ ಎಲ್ಲಾ ವಿಷಯತ್‍ಲ್ ನಾನ್ ನಿಂಗಕ್ ಉದರಾಣೆಯಾಯಿತ್ ಇಂಜ.

³⁶ಇದ್‍ನೆಲ್ಲ ಎಣ್ಣ್‌ನ ಪಿಂಞ ಮೊಣಕಾಲ್ ಇಟ್ಟಿತ್ ಅಯಿಂಗೆಲ್ಲಾಡೆ ಕೂಡೆ ಪ್ರಾರ್ಥನೆ ಮಾಡ್‍ಚಿ.

³⁷ಅಕ್ಕ ಅಯಿಂಗೆಲ್ಲಾರು ಮೊರಟಿತ್, ಅಂವೊನ ತಬ್ಬಿಯಂಡ್ ಮುತ್ತ್ ಕೊಡ್‍ತತ್[41]

³⁸ನಿಂಗ ಇಂಞು ಮಿಂಞಕ್, ನಾಡ ಮೂಡ್‍ನ ಕಾಂಬ್‍ಲೇಂದ್ ಪೌಲ ಎಣ್ಣ್‌ನ ತಕ್ಕ್ ಮಾತ್ರ ಅಯಿಂಗಳ ದುಂಬ ಬೇಜಾರ್ ಮಾಡ್‍ಚಿ. ಪಿಂಞ ಅಯಿಂಗ ಎಲ್ಲಾರು ಅಂವೊನ ಅಯಿಪಕ್ ಅಂವೊಂಡ ಕೂಡೆ ಹಡಗ್‍ಕತ್ತನೆ ಪೋಚಿ.