Read Kodava ಅಪೊಸ್ತಲ 21 Bible Online

ಅಪೊಸ್ತಲ 21 - Kodava bible

ಅಪೊಸ್ತಲ 21

¹ನಂಗ ಅಯಿಂಗಳ ಬುಟ್ಟಿತ್ ಹಡಗ್ ಪತ್ತ್‌ನ ಪಿಂಞ, ನೇರೆ ಕೋಸ್ ದ್ವೀಪಕ್ ಕೂಡ್‍ಚಿ. ಪಿತ್ಯಾಂದ್ ರೋದ ದ್ವೀಪಕ್ ಪೋಯಿತ್ ಅಲ್ಲಿಂಜ ಪತರ ಎಣ್ಣ್‌ವ ಪಟ್ಟಣಕ್ ಬಾತ್.

²ಅಲ್ಲಿ ಫೊಯಿನಿಕೆ ದೇಶಕ್ ಪೋಪ ಹಡಗ್‍ನ ಕಂಡಿತ್ ಆ ಹಡಗ್‍ಕ್ ಪತ್ತಿತ್ ಪ್ರಯಾಣ ಮಾಡ್‍ಚಿ.

³ಮಿಂಞಕ್ ಕುಪ್ರ ದ್ವೀಪತ್‍ನ ಕಂಡಿತ್ ಅದ್ಂಡ ತೆಕ್ಕ್ ದಿಕ್ಕ್‌ಲ್ ಬುಟ್ಟಿತ್ ಸಿರಿಯ ದೇಶತ್‍ರ ಬರಿಕ್ ಪೋಯಿತ್ ತೀರ್ ಪಟ್ಟಣಕ್ ಬಂತ್ ಅಲ್ಲಿ ಇಳ್ಂಜಿತ್; ಎನ್ನಂಗೆಣ್ಣ್‌ಚೇಂಗಿ ಅಲ್ಲಿ ಹಡಗ್‍ರ ಸಮಾನತ್‍ನ ಉಳ್‍ಪಕಿಂಜತ್.

⁴ಅಲ್ಲಿ ಇಂಜ ಯೇಸುನ ನಂಬ್‍ನಯಿಂಗಳ ತ್‍ೕಡಿ ಕಂಡ್‍ಪುಡ್‌ಚಿತ್ ನಂಗ ಅಯಿಂಗಡ ಕೂಡೆ ಒರ್ ವಾರ ಒಳಿಂಜಿತ್. ಅಯಿಂಗ ಪೌಲನ ನೋಟಿತ್: ನೀನ್ ಯೆರೂಸಲೇಮ್‌ಕ್ ಪೋಪದ್ ಬೋಂಡಾಂದ್ ಪವಿತ್ರಾತ್ಮತ್‍ರ ಪ್ರೇರಣೆಯಿಂಜ ಎಣ್ಣ್‌ಚಿ.

⁵ಆಚೇಂಗಿ, ಹಡಗ್ ಅಲ್ಲಿಂಜ ಪೊರಡ್‌ವ ಸಮಯ ಬಪ್ಪಕ, ಅಯಿಂಗೆಲ್ಲಾರು ಪೊಣ್ಣ್ ಮಕ್ಕಡ ಕೂಡೆ ಪಟ್ಟಣತ್‍ರ ಕಡೇಕತ್ತನೆ ನಂಗಡ ಕೂಡೆ ಬಾತ್. ನಂಗ ಕಡಕರೆಲ್ ಮೊಣಕಾಲ್ ಇಟ್ಟಿತ್ ಪ್ರಾರ್ಥನೆ ಮಾಡ್‍ಚಿ.

⁶ಅಯಿಂಗಕೆಲ್ಲ ನಂಗ ವಂದನೆ ಎಣ್ಣಿತ್ ಹಡಗ್‍ಲ್ ಪತ್ತ್‌ನ ಪಿಂಞ ಅಯಿಂಗೆಲ್ಲಾರು ಅಯಿಂಗಡ ಮನೆಕ್ ಪೋಚಿ.

⁷ನಂಗ ತೀರ್ ಪಟ್ಟಣತ್ಂಜ ಪೊರಟಿತ್ ಪ್ತೊಲೆಮಾಯ ಪಟ್ಟಣಕ್ ಬಂತ್ ಸಮುದ್ರತ್‍ರ ಪ್ರಯಾಣತ್‍ನ ತ್‍ೕತಿತ್, ಅಲ್ಲಿಂಜ ಯೇಸುನ ನಂಬ್‍ನ ಅಣ್ಣತಮ್ಮಣಂಗಡ ಪಕ್ಕ ಪೋಯಿತ್, ಒರ್ ದಿವಸ ಅಯಿಂಗಡ ಕೂಡೆ ಒಳಿಂಜತ್.

⁸ಪಿತ್ಯಾಂದ್ ಅಲ್ಲಿಂಜ ಪೊರಟಿತ್, ಕೈಸರೈಯಕ್ ಬಂದಿತ್ ದೇವಡ ನಲ್ಲ ಸುದ್ದಿನ ಬೋದನೆ ಮಾಡ್‌ವ ಫಿಲಿಪ್ಪಂಡ ಮನೆಕ್ ಪೋಯಿತ್ ಅಂವೊಂಡ ಮನೆಲ್ ಇಂಜತ್. ಈ ಫಿಲಿಪ್ಪ, ಯೆರೂಸಲೇಮ್‍ಲ್ ಉಳ್ಳ ಸಬೇಲ್ ಕೂಳ್ ಪಾಲ್‌ಮಾಡ್‌ವಕಾಯಿತ್ ಅಪೊಸ್ತಲಂಗ ಗೊತ್ತ್ ಮಾಡ್‍ನ ಏಳ್ ಸೇವಕಂಗಡಲ್ಲಿ ಒಬ್ಬನಾಯಿತ್ಂಜತ್.

⁹ಅಂವೊಂಗ್, ಮಂಗಲ ಆಕತ ನಾಲ್ ಮೂಡಿ ಮಕ್ಕ ಇಂಜತ್; ಅಯಿಂಗ ಪ್ರವಾದನೆ ಎಣ್ಣ್‌ವಯಿಂಗಳಾಯಿತ್ ಇಂಜತ್.

¹⁰ನಂಗ ಅಯಿಂಗಡ ಮನೆಲ್ ದುಂಬ ದಿವಸ ಇಂಜತ್. ಆ ಸಮಯತ್‍ಲ್ ಅಗಬ ಎಣ್ಣುವ ಒರ್ ಪ್ರವಾದಿ ಯೂದಾಯತ್ಂಜ ನಂಗಡ ಪಕ್ಕ ಬಾತ್.

¹¹ಅಂವೊ ನಂಗಡ ಪಕ್ಕ ಬಂದಿತ್, ಪೌಲಂಡ ಅರೆಪಟ್ಟಿನ ಎಡ್‍ತಿತ್ ಅಂವೊಂಡ ಕಾಲ್‌ಕೈಯಿನ ಆ ಪಟ್ಟಿಲ್ ಕೆಟ್ಟಿಯಂಡತ್. ಅಂವೊ ನಂಗಳ ನೋಟಿತ್: ಈ ಅರೆ ಪಟ್ಟಿ ದಾಡದೋ, ಅಂವೊನ ಯೆರೂಸಲೇಮ್‍ರ ಯೆಹೂದ್ಯಂಗ ಇನ್ನನೆ ಕೆಟ್ಟಿತ್ ಅಲ್ಲಿಯತ್‍ರ ಯೆಹೂದ್ಯ ಅಲ್ಲತಯಿಂಗಡ ಕೈಕ್ ಒಪ್ಪ್‌ಚಿಡುವಾಂದ್ ಪವಿತ್ರಾತ್ಮ ಎಣ್ಣಿಯಂಡ್ ಉಂಡ್‍ೕಂದ್ ಎಣ್ಣ್‌ಚಿ.

¹²ಆ ತಕ್ಕ್‌ನ ಕ್‍ೕಟ ನಂಗ ಪಿಂಞ ಅಲ್ಲಿ ಇಂಜ ಜನ, ಪೌಲನ ನೋಟಿತ್, ನೀನ್ ಯೆರೂಸಲೇಮ್‌ಕ್ ಪೋಪದ್ ಬೋಂಡಾಂದ್ ಬೋಡಿಯಂಡತ್.

¹³ಆಚೇಂಗಿ ಪೌಲ: ನಿಂಗ ಎನ್ನಂಗ್ ಇನ್ನನೆ ಮೊರಟಂಡ್, ನಾಡ ಹೃದಯ ತಳ್ಂದ್ ಪೋಪನೆಕೆ ಮಾಡ್‌ವಿರ? ನಾನ್ ಒಡೆಯನಾನ ಯೇಸುರ ಪೆದಕಾಯಿತ್ ಯೆರೂಸಲೇಮ್‍ಲ್ ಜೈಲ್‌ಕ್ ಪೋಪಕ್ ಮಾತ್ರ ಅಲ್ಲ, ಚಾವಕು ತಯಾರಾಯಿತ್ ಉಳ್ಳ್‌ೕಂದ್ ಎಣ್ಣ್‌ಚಿ.

¹⁴ಅಂವೊ ನಂಗ ಎಣ್ಣ್‌ವಾನ ಒತ್ತತೆಗುಂಡ್, ಒಡೆಯಂಡ ಚಿತ್ತತ್‍ರನೆಕೆ ಆಡ್‍ೕಂದ್ ಎಣ್ಣಿತ್ ನಂಗ ಮುಂಡತೆ ಇಂಜತ್.

¹⁵ಇಲ್ಲಿಂಜ ಚೆನ್ನ ದಿನ ಆನ ಪಿಂಞ ನಂಗ ಪ್ರಯಾಣ ಮಾಡ್‌ವಕುಳ್ಳ ಸಾಮಾನತ್‍ನ ಎಲ್ಲಾ ಎಡ್‍ತಂಡ್ ಯೆರೂಸಲೇಮ್‌ಕ್ ಪೊರಟತ್.

¹⁶ಕೈಸರೈತ್ಂಜ ಚೆನ್ನ ಯೇಸುನ ನಂಬ್‍ನಯಿಂಗ ನಂಗಡ ಕೂಡೆ ಬಾತ್. ಅಯಿಂಗ ಮ್ನಾಸೋನ ಎಣ್ಣ್‌ವಂವೊಂಡ ಮನೆಲ್ ನಂಗ ಇಪ್ಪಕ್ ಜಾಗ ಇಂಜಗುಂಡ್ ಅಲ್ಲಿಕ್ ಕಾಕಿಯಂಡ್ ಬಾತ್. ಇಂವೊ ಕುಪ್ರ ದೇಶತ್ಂಜ ಬಂದಂವೊನು, ಯೇಸುರ ಮೇಲೆ ಮಿಂಞಲೇ ನಂಬಿಕೆ ಇಟ್ಟಂವೊನು ಆಯಿತ್ಂಜತ್.

¹⁷ನಂಗ ಯೆರೂಸಲೇಮ್‌ಕ್ ಬಪ್ಪಕ ಯೇಸುನ ನಂಬ್‍ನ ಅಲ್ಲಿಯತ್‍ರ ಅಣ್ಣತಮ್ಮಣಂಗ ನಂಗಳ ಕುಶೀಲ್ ಕೂಟಿಯಂಡತ್.

¹⁸ಪಿತ್ಯಾಂದ್ ಪೌಲ ನಂಗಳ ಕಾಕಿಯಂಡ್ ಯಾಕೋಬಂಡ ಪಕ್ಕ ಪೋಚಿ; ಸಬೆರ ಪೆರಿಯಯಿಂಗೆಲ್ಲಾ ಅಲ್ಲಿ ಬಂದಿತ್ಂಜತ್.

¹⁹ಪೌಲ ಅಯಿಂಗಕೆಲ್ಲ ವಂದನೆ ಎಣ್ಣಿತ್, ತಾಂಡ ಸೇವೇನಗುಂಡ್ ದೇವ ಯೆಹೂದ್ಯಂಗಲ್ಲತ ಬೋರೆ ಜನಡ ಮದ್ಯತ್‍ಲ್ ಮಾಡ್‍ನ ಕಾರ್ಯತ್‍ನ ಒಂದೊಂದಾಯಿತ್ ವಿವರಿಚಿಟ್ಟತ್.

²⁰ಇದ್‍ನೆಲ್ಲ ಅಯಿಂಗ ಕ್‍ೕಪಕ, ಅಯಿಂಗ ದೇವನ ತುದಿಚತ್. ಅಕ್ಕ ಅಯಿಂಗ ಅಂವೊನ ನೋಟಿತ್: ಪ್ರೀತಿರ ಪೌಲನೇ, ಯೆಹೂದ್ಯಂಗಡಡೆ‍ಲ್ ಯೇಸುನ ನಂಬ್‍ನಯಿಂಗ ಎಚ್ಚಕ್ ಆಯಿರ ಜನ ಉಂಡ್‍ೕಂದ್ ನೀನ್ ನೋಟಿಯಂಡುಳ್ಳಿಯಲ್ಲ. ಅಯಿಂಗೆಲ್ಲಾರು ನ್ಯಾಯಪ್ರಮಾಣಕ್ ತಗ್ಗಿತ್ ನಡ್ಂದಂಡ್, ಅಚ್ಚಕ್ ವೈರಾಗ್ಯತ್‍ಲ್ ಉಂಡ್.

²¹ಯೆಹೂದ್ಯಂಗ ಅಲ್ಲತೆ ಬೋರೆ ಜನಾಂಗಡಡೆಲ್ ವಾಸ ಮಾಡಿಯಂಡುಳ್ಳ ಯೆಹೂದ್ಯಂಗೆಲ್ಲಾ ಅಯಿಂಗಡ ಮಕ್ಕಕ್ ಸುನ್ನತಿ ಮಾಡ್‌ವದು, ನಂಗಡ ಪದ್ದತಿರ ಪ್ರಕಾರ ನಡ್‍ಪದೂ ಬೋಂಡಾಂದ್ ನೀನ್ ಎಣ್ಣಿತ್, ನ್ಯಾಯಪ್ರಮಾಣತ್‍ನ ಬುಟ್ಟಿತ್ ಪೋಯೀಂದ್ ನೀನ್ ಬೋದನೆ ಮಾಡಿಯಂಡುಳ್ಳದ್‍ನ ಅಯಿಂಗ ಅರಿಂಜಿ ಬಂದಿತುಂಡ್.

²²ಇಕ್ಕ ಎಂತ ಮಾಡನ? ನೀನ್ ಇಲ್ಲಿ ಬಂದಿತುಳ್ಳಿಯಾಂದ್ ಕಂಡಿತವಾಯಿತ್ ಅಯಿಂಗಕ್ ಗೊತ್ತಾಪ.

²³ಆನಗುಂಡ್ ನಂಗ ಎಣ್ಣುವಾನ ನೀನ್ ಕ್‍ೕಳ್. ನಂಗಡ ಪಕ್ಕ ದೇವಕ್ ಪರ್‍ಕೆ ಮಾಡ್‍ನ ನಾಲ್ ಜನ ಉಂಡ್.

²⁴ನೀನ್ ಅಯಿಂಗಳ ಕೂಟಿಯಂಡ್ ಪೋಯಿತ್ ಅಯಿಂಗಡ ಕೂಡೆ ನಿನ್ನ ಶುದ್ದ ಮಾಡ್‌ವ ಆಚಾರತ್‍ಲ್ ಅಯಿಂಗ ತಂಗಡ ತೆಲ್‍ಮಿನ ಬೋಳ್‍ಚಿಡ್‌ವಕ್ ಆಪಂತ ಪಣತ್‍ನ ಕರ್ಚ್‌ಮಾಡ್: ಇನ್ನನೆ ಮಾಡ್‍ಚೇಂಗಿ ನಿಂಗಡ ವಿಷಯತ್ ಕ್‍ೕಟ ತಕ್ಕ್ ನೇರಲ್ಲಾಂದು, ನಿಂಗಳು ಸಹ ನ್ಯಾಯಪ್ರಮಾಣತ್‍ರ ಪ್ರಕಾರ ನಡ್ಂದಂಡುಂಡ್‍ೕಂದು ಎಲ್ಲಾ ಜನಕು ಗೊತ್ತಾಪ.

²⁵ಯೆಹೂದ್ಯಂಗ ಅಲ್ಲತ ಯೇಸುನ ನಂಬ್‍ನಯಿಂಗ: ವಿಗ್ರಹಕ್ ಅರ್ಪಿಚಿಟ್ಟ ಕೂಳ್‍ಕ್, ಚೋರೆ ತಿಂಬಕ್, ನೆರ್‌ಕಿತ್ ಚತ್ತ್‌ಪೋನ ಪ್ರಾಣಿಯಡ ಯರ್ಚಿಕ್ ಪಿಂಞ ಲೈಂಗಿಕ ಪಾಪಕ್ ದೂರವಾಯಿತ್ ಇರಂಡೂಂದ್ ನಂಗ ತೀರ್ಮಾನ ಮಾಡಿತ್ ಒಳ್‍ದಿಯೇಂದ್ ಎಣ್ಣ್‌ಚಿ.

²⁶ಅಕ್ಕ, ಪಿತ್ಯಾಂದ್ ಪೌಲ ಆ ಮನುಷ್ಯಂಗಳ ಕಾಕಿಯಂಡ್ ಅಯಿಂಗಡ ಕೂಡೆ ತಾನು ಶುದ್ದಮಾಡಿಯಂಡ್ ದೇವಾಲಯತ್‍ರ ಒಳ್‍ಕ್ ಪೋಯಿತ್, ಅಯಿಂಗ ಒಬ್ಬೊಬ್ಬಂಗಕಾಯಿತ್ ಬಲಿ ಕೊಡ್‌ತಿತ್ ಪೂರೈಚಿಡ್‌ವಕತ್ತನೆ ಶುದ್ದ ಮಾಡ್‌ವ ಆಕೀರ್ ದಿವಸತ್‍ನ ನೆರೆವೇರಿಚಿಡುವೀಂದ್ ಎಣ್ಣ್‌ಚಿ.

²⁷ಅನ್ನನೆ ಶುದ್ದ ಮಾಡ್‌ವ ಏಳ್ ದಿವಸ ನೆರವೇರುವಕ್ ಪಕ್ಕ ಆಪಕ, ಆಸ್ಯ ಸೀಮೆಯಿಂಜ ಬಂದಿತ್ಂಜ ಯೆಹೂದ್ಯಂಗ ಪೌಲನ ದೇವಾಲಯತ್‍ಲ್ ಕಂಡತ್. ಅಯಿಂಗ ಬಲ್ಯ ಗಲಾಟೆ ಮಾಡಿತ್ ಗುಂಪು ಕೂಟಿತ್ ಅಂವೊನ ಪುಡ್‌ಚಿರ್‌ತ್.

²⁸ಅಯಿಂಗ ಬಲ್ಯ ಸ್ವರತ್‍ಲ್: ಇಸ್ರಾಯೇಲ್ ಜನಳೇ, ಸಹಾಯ ಮಾಡಿ, ನಂಗಡ ಜನಾಂಗಕು ನ್ಯಾಯಪ್ರಮಾಣಕು ಈ ದೇವಾಲಯಕು ವಿರೋದವಾಯಿತ್ ಎಲ್ಲಾ ಜಾಗತ್‍ಲ್ ಪಿಂಞ ಎಲ್ಲಾ ಜನಕ್ ಬೋದನೆ ಮಾಡ್‌ವ ಮನುಷ್ಯ ಇಂವೊನೇ; ಇದ್‍ಲ್ಲತೆ, ಇಂವೊ ಯೆಹೂದ್ಯ ಅಲ್ಲತ ಜನತ್‍ನ ದೇವಾಲಯತ್‍ರ ಒಳ್‍ಕ್ ಕೂಟಿಯಂಡ್ ಬಂದಿತ್, ಈ ಪವಿತ್ರವಾನ ದೇವಾಲಯತ್‍ನ ಅಶುದ್ದ ಮಾಡ್‍ಚೀಂದ್ ಕೂತ್ ಕೊಡ್‍ತತ್.

²⁹ಅಯಿಂಗ ಇನ್ನನೆ ಎಣ್ಣುವಕ್ ಕಾರಣ ಎಂತ ಎಣ್ಣ್‌ಚೇಂಗಿ: ಮಿಂಞತ್‍ರ ದಿವಸತ್‍ಲ್ ಎಫೆಸ ಪಟ್ಟಣತ್ಂಜ ಬಂದಿತ್ಂಜ ತ್ರೊಫಿಮ ಎಣ್ಣುವ ಒಬ್ಬನ ಪೌಲಂಡ ಕೂಡೆ ಪಟ್ಟಣತ್‍ಲ್ ಕಂಡಿತ್ಂಜತ್, ಅಂವೊ ಗ್ರೀಕ್ ತಕ್ಕ್ ಪರಿಯುಂವೊನಾಯಿತ್ಂಜತ್. ಆನಗುಂಡ್ ಪೌಲ ಅಂವೊನ ದೇವಾಲಯತ್‍ರ ಒಳ್‍ಕ್ ಕಾಕಿಯಂಡ್ ಬಂದಿತ್‌ಪ್ಪಾಂದ್ ಅಯಿಂಗ ಅನುಮಾನ ಪಟ್ಟತ್.

³⁰ಅಕ್ಕ ಪಟ್ಟಣತ್‍ಲ್ ಬಲ್ಯ ಗಲಾಟೆ ಆಚೀಂದ್ ಪಟ್ಟಣತ್‍ಲ್ ಇಂಜ ಜನಕೆಲ್ಲ ಗೊತ್ತಾಯಿತ್ ಓಡಿ ಬಂತ್ ಕೂಡ್‍ಚಿ. ಪಿಂಞ ಪೌಲನ ಪುಡ್‌ಚಿತ್ ದೇವಾಲಯತ್‍ರ ಪೊರಮೆ ಬಲ್‍ಚಂಡ್ ಬಾತ್. ಅಕ್ಕಣೆಕ್ ದೇವಾಲಯತ್‍ರ ಪಡಿನ ಅಯಿಂಗ ಮುಚ್ಚಿರ್‌ತ್.

³¹ಅಯಿಂಗ ಅಂವೊನ ಕೊಲ್ಲ್‌ವಕ್ ಪ್ರಯತ್ನಪಡ್‍ವಕ, ಯೆರೂಸಲೇಮ್‍ಲ್ ಬಲ್ಯ ಗಲಿಬಿಲಿ ಆಯಂಡುಂಡ್‍ೕಂದ್ ರೋಮ್ ರಾಜ್ಯತ್‍ರ ಸೇನೆರ ಅದಿಪತಿಕ್ ಸುದ್ದಿ ಬಾತ್.

³²ಅಕ್ಕಣೆ, ಅಂವೊ ಸಿಪಾಯಿಯಂಗಳ ಪಿಂಞ ಅದಿಕಾರಿಯಳ ಕೂಟಿಯಂಡ್, ಅಯಿಂಗಡ ಪಕ್ಕ ಬೆರಿಯ ಬಾತ್. ಜನ, ಸೇನೆರ ಅದಿಪತಿನ ಪಿಂಞ ಸಿಪಾಯಿಯಂಗಳ ಕಾಂಬಕ ಪೌಲನ ಪೊಯ್ಯುವಾನ ನಿಪ್ಪ್‌ಚಿಟ್ಟತ್.

³³ಅಕ್ಕ ಸೇನೆರ ಅದಿಪತಿ ಪೌಲಂಡ ಪಕ್ಕ ಬಂದಿತ್ ಅಂವೊನ ಪುಡ್‌ಚಿತ್, ಅಂವೊನ ದಂಡ್ ಸರ್ಪಣಿಲ್ ಕೆಟ್ಟ್‌ವಕ್ ಆಜ್ಞೆ ಕೊಡ್‍ತತ್. ಪಿಂಞ ಸೇನೆರ ಅದಿಪತಿ, ಇಂವೊ ದಾರ್? ಇಂವೊ ಎಂತ ಮಾಡ್‍ಚೀಂದ್ ಕ್‍ೕಟತ್.

³⁴ಅದ್ಂಗ್ ಚೆನ್ನ ಜನ ಒರ್ ವಿಷಯತ್‍ನ, ಇಂಞು ಚೆನ್ನ ಜನ ಬೋರೆ ಒರ್ ವಿಷಯತ್‍ನ ಬಲ್ಯ ಸ್ವರತ್‍ಲ್ ಎಣ್ಣಿಯಂಡ್ ಇಂಜತ್. ಜನ ಜೋರಾಯಿತ್ ಕೂತ್ ಕೊಡ್‍ತಂಡಿಂಜಗುಂಡ್ ಅಯಿಂಗ ಎಂತ ಎಣ್ಣಿಯಂಡುಂಡ್‍ೕಂದ್ ಆ ಅದಿಪತಿಕ್ ಗೊತ್ತ್‌ಮಾಡ್‍ವಕ್ ಕಯಿಂಜಿತ್‌ಲ್ಲೆ. ಆನಗುಂಡ್ ಅಂವೊನ, ಕೋಟೆರ ಒಳ್‍ಕ್ ಕಾಕಿಯಂಡ್ ಪೋಪಕ್ ಆಜ್ಞೆ ಕೊಡ್‍ತತ್.

³⁵ಪೌಲ ಕೊಡಿಕ್ ಬಪ್ಪಕ, ಜನ ದುಂಬ ನೂಕಿಯಂಡಿಂಜಗುಂಡ್, ಸಿಪಾಯಿಯಂಗ ಅಂವೊನ ಪೊರ್‍ತಂಡ್ ಪೋಪನೆಕೆ ಆಚಿ.

³⁶ಅಂವೊಂಡ ಬಯ್ಯಕ್ ನುಗ್ಗಿಯಂಡ್ ಪೋಯಂಡಿಂಜ ಜನ, ಅಂವೊನ ಕೊಲ್ಲಿ, ಕೊಲ್ಲೀಂದ್ ಕೂತ್ ಕೊಡ್‌ಪಯಿಂಜತ್.

³⁷ಪೌಲನ ಕೋಟೆರ ಒಳ್‍ಕ್ ಕೊಂಡ್ ಪೋಪಕ್ ಮಿಂಞ, ಅಂವೊ ಸೇನೆರ ಅದಿಪತಿನ ನೋಟಿತ್: ನಾನ್ ನಿಂಗಡ ಕೂಡೆ ತಕ್ಕ್ ಪರಿಯುವಕ್ ಕಯ್ಯುವಾಂದ್ ಕ್‍ೕಟತ್. ಅದ್ಂಗ್ ಅಂವೊ: ಪೌಲನ ನೋಟಿತ್ ನೀಕ್ ಗ್ರೀಕ್ ತಕ್ಕ್ ಪರಿಯುವಕ್ ಗೊತ್ತುಂಡಾ?

³⁸ಚೆನ್ನ ದಿವಸತ್‍ರ ಮಿಂಞ ಸರ್ಕಾರಕ್ ವಿರೋದವಾಯಿತ್ ಗಲಾಟೆ ಮಾಡಿತ್ ಮುಕ್ಯಪಟ್ಟಯಿಂಗಳ ಕೊಲ್ಲ್‌ವಂತ ನಾಲಾಯಿರ ಉಗ್ರವಾದಿಯಳ ಮಣಬೂಮಿಕ್ ಕಾಕಿಯಂಡ್ ಪೋನ ಐಗುಪ್ತ ದೇಶತ್‍ರ ಮನುಷ್ಯ ನೀನ್ ತಾನೇಂದ್ ಕ್‍ೕಟತ್.

³⁹ಅದ್ಂಗ್ ಪೌಲ, ನಾನ್ ಒರ್ ಯೆಹೂದ್ಯ ಮನುಷ್ಯ, ಕಿಲಿಕ್ಯ ಪ್ರಾಂತ್ಯತ್‍ರ ಮುಕ್ಯಪಟ್ಟ ಪಟ್ಟಣವಾನ ತಾರ್ಸ ಪಟ್ಟಣತ್‍ರ ಪ್ರಜೆ. ಈ ಜನಡ ಕೂಡೆ ಚೆನ್ನ ತಕ್ಕ್ ಪರಿಯುವಕ್ ನಾಕ್ ಅಪ್ಪಣೆ ತರಂಡೂಂದ್ ಕ್‍ೕಟತ್.

⁴⁰ಅಪ್ಪಣೆ ಕೊಡ್‌ಪಕ ಪೌಲ, ಮೊಟ್ಟ್‌ರ ಮೇಲೆ ನಿಂದಿತ್: ಜನಳ ನೋಟಿತ್, ಅಯಿಂಗ ಮುಂಡತೆ ಇಪ್ಪಕ್ ಕೈ ಸನ್ನೆ ಮಾಡ್‍ಚಿ. ಅಯಿಂಗ ಶಾಂತಿ ಆಪಕ, ಅಯಿಂಗಡ ಕೂಡೆ ಅರಾಮಿಯ ಬಾಷೆಲ್ ತಕ್ಕ್ ಪರಿಯುವಕ್ ಸುರ್ ಮಾಡ್‍ಚಿ.