Read Kodava ಅಪೊಸ್ತಲ 24 Bible Online

ಅಪೊಸ್ತಲ 24 - Kodava bible

ಅಪೊಸ್ತಲ 24

¹ಅಂಜ್ ದಿವಸ ಆನ ಪಿಂಞ ಮಹಾ ಯಾಜಕನಾನ ಅನನೀಯ ಆಲೋಚನೆ ಸಬೆರ ಪೆರಿಯಯಿಂಗ ಪಿಂಞ ತೆರ್ತುಲ್ಲ ಎಣ್ಣ್‌ವ ಒರ್ ವಕೀಲನ ಕಾಕಿಯಂಡ್, ಕೈಸರೈ ಪಟ್ಟಣತ್‍ಲ್ ಇಂಜ ದೇಶಾದಿಪತಿರ ಪಕ್ಕ ಪೋಯಿತ್, ಪೌಲಂಗ್ ವಿರೋದವಾಯಿತ್ ಪುಕಾರ್ ಕೊಡ್‍ಪಕ್ ತೀರ್ಮಾನ ಮಾಡ್‍ಚಿ.

²ಪೌಲನ ಅಯಿಂಗಡ ಮಿಂಞ ನಿಪ್ಪ್‌ಚಿಟ್ಟ ಪಿಂಞ: ತೆರ್ತುಲ್ಲ ಅಂವೊಂಡ ವಾದತ್‍ನ ಸುರು ಮಾಡ್‍ಚಿ. ಬಲ್ಯ ಗೌರವವುಳ್ಳ ಫೇಲಿಕ್ಸನೇ, ನೀಡಗುಂಡ್ ನಂಗಕ್ ದುಂಬ ಕಾಲತ್ಂಜ ಸಮಾದಾನ ಉಂಡ್. ನೀನ್ ಈ ದೇಶತ್‍ನ ನೀಡ ಚಾಯಿ ಕೆಲಸತ್‍ರಗುಂಡ್ ಅಬಿವೃದಿ ಮಾಡಿಯಂಡುಂಡ್.

³ಇದ್‍ನ ನಂಗ ಎಲ್ಲಾ ಜಾಗತ್‍ಲು, ಎಕ್ಕಾಲು ಗೇನ ಮಾಡಿಯಂಡುಂಡ್, ನಿಂಗಡ ವಿಷಯತ್‍ಲ್ ನಂಗ ದುಂಬ ಕುಶಿಪಟ್ಟಂಡ್ ವಂದನೆ ಎಣ್ಣಿಯಂಡುಂಡ್.

⁴ದುಂಬ ವಿಷಯತ್‍ನ ಎಣ್ಣಿತ್ ನಿಂಗಳ ಬೇಜಾರ್ ಮಾಡ್‌ವಕ್ ನಾಕ್ ಮನಸ್ಸ್ ಇಲ್ಲೆ. ಆಚೇಂಗಿ, ನಾನ್ ಎಣ್ಣ್‌ವ ತಕ್ಕ್‌ನ ದಯಬೆಚ್ಚಿತ್ ಕ್‍ೕಕಂಡೂಂದ್ ಬೋಡ್‍ವಿ.

⁵ಅದ್ ಎಂತ ಎಣ್ಣ್‌ಚೇಂಗಿ: ಈ ಮನುಷ್ಯ ಲೋಕತ್‍ರ ಎಲ್ಲಾ ಜಾಗತ್‍ಲ್ ವಾಸ ಉಳ್ಳ ಯೆಹೂದ್ಯಂಗಡ ಮದ್ಯತ್‍ಲ್ ಕಲಹ ಮಾಡ್‍ವಂವೊನಾಯಿತು, ಜಗಳ ಆಪಕ್ ಕಾರಣವಾಯಿತು ಉಂಡ್. ಇದ್‍ಲ್ಲತೆ ನಜರೇತ್‍ರ ಮಾರ್ಗಕ್ ತಲೆಯೆನಾಯಿತು ಉಂಡ್‍ೕಂದ್ ನಂಗಕ್ ಗೊತ್ತಾಚಿ.

⁶ಇಂವೊ ಯೆರೂಸಲೇಮ್‍ರ ದೇವಾಲಯತ್‍ನ ಅಶುದ್ದ ಮಾಡ್‌ವಕ್ ಪ್ರಯತ್ನಪಟ್ಟತ್; ಆನಗುಂಡ್ ನಂಗ ಇಂವೊನ ಪುಡ್‌ಚಿತ್, ನ್ಯಾಯಪ್ರಮಾಣತ್‍ರನೆಕೆ ವಿಚಾರಣೆ ಮಾಡ್‌ವಕ್ ಇಂಜತ್.

⁷ಆಚೇಂಗಿ ಸೇನೆರ ಅದಿಕಾರಿಯಾನ ಲೂಸ್ಯನು ಬಂದಿತ್, ಒತ್ತಾಯ ಮಾಡಿತ್ ಅಂವೊನ ನಂಗಡಿಂಜ ಬಲ್‍ಚಂಡ್ ಪೋಯಿರ್‌ತ್.

⁸ಇಂವೊಂಡ ಮೇಲೆ ಕುತ್ತ ಪರಿಯುವಯಿಂಗ ನಿಂಗಡ ಪಕ್ಕ ಬಪ್ಪಕ್ ಹುಕುಮ್ ಕೊಡ್‍ತತ್.[44] ನಿಂಗ ಇಂವೊನ ಚಾಯಿತೆ ವಿಚಾರಣೆ ಮಾಡ್‍ಚೇಂಗಿ, ನಂಗ ಇಂವೊಂಡ ಮೇಲೆ ಎಣ್ಣುವ ಕುತ್ತ ಎಲ್ಲಾ ನೇರ್‍ೕಂದ್ ನಿಂಗಕೇ ಗೊತ್ತಾಪಾಂದ್ ಎಣ್ಣ್‌ಚಿ.

⁹ತೆರ್ತುಲ್ಲ ಎಣ್ಣ್‌ನದೆಲ್ಲ ಸತ್ಯಾಂದ್ ಎಲ್ಲಾ ಯೆಹೂದ್ಯಂಗಳು ಎಣ್ಣ್‌ಚಿ.

¹⁰ಪೌಲ ತಕ್ಕ್ ಪರಿಯುಲೂಂದ್ ದೇಶಾದಿಪತಿ ಸನ್ನೆ ಮಾಡ್‌ವಕ ಪೌಲ: ನಿಂಗ ದುಂಬ ಕಾಲತ್ಂಜ ಈ ದೇಶತ್‍ರ ಜನಕ್ ನ್ಯಾಯಾದಿಪತಿಯಾಯಿತುಳ್ಳಿರಾಂದ್ ಅರ್ಂಜಿತ್ ನಾನ್ ದೈರ್ಯವಾಯಿತ್ ಕುಶೀಲ್ ನಾಕಾಯಿತ್ ವಾದ ಮಾಡ್‌ವಿ.

¹¹ನಾನ್ ಆರಾದನೆ ಮಾಡ್‌ವಕಾಯಿತ್, ಯೆರೂಸಲೇಮ್‌ಕ್ ಪೋಯಿತ್ ಪನ್ನೆರಂಡ್ ದಿವಸ ಮಾತ್ರ ಆಚೀಂದ್ ನಿಂಗಕ್ ಬೆರಿಯ ಗೊತ್ತಾಪ.

¹²ದೇವಾಲಯತ್‍ಲ್ ನಾನ್ ಒಬ್ಬಂಡ ಕೂಡೆಯಾಚೇಂಗಿಯು ವಾದ ಮಾಡ್‍ನದಾಡ್, ಸಬಾಮಂದಿರತ್‍ಲ್ ಪಿಂಞ ಪಟ್ಟಣತ್‍ರ ಏದ್ ಜಾಗತ್‌ಲು ನಾನ್ ಜನಳ ಗುಂಪು ಕೂಟಿತ್ ಕಲಹ ಮಾಡ್‍ನದಾಡ್ ಈಂಗ ಕಂಡಿತ್‌ಲ್ಲೆ.

¹³ಇದ್‍ಲ್ಲತೆ, ಇಕ್ಕ ನಾಡ ಮೇಲೆ ಪರಿಯುವ ಕುತ್ತನೆಲ್ಲ ಸತ್ಯಾಂದ್ ಈಂಗ ನಿರೂಬಿಚಿಡುವಕ್ ಕಯ್ಯುಲೆ.

¹⁴ಒರ್ ವಿಷಯತ್‍ನ ಮಾತ್ರ ನಾನ್ ನಿಂಗಡ ಮಿಂಞತ್‍ಲ್ ಒತ್ತೊವಿ. ಅದ್ ಎಂತ ಎಣ್ಣ್‌ಚೇಂಗಿ: ಈಂಗ ಕಳ್ಳ ಬೋದನೇಂದ್ ಎಣ್ಣ್‌ವ ಈ ಮಾರ್ಗತ್‍ರನೆಕೆ, ನಾನ್ ನಂಗಡ ಅಜ್ಜಂಗಡ ದೇವನ ಆರಾದನೆ ಮಾಡಿಯಂಡ್, ಮೋಶೇರ ನ್ಯಾಯಪ್ರಮಾಣತ್‍ಲ್ ಪಿಂಞ ಪ್ರವಾದಿಯಂಗಡ ಪುಸ್ತಕತ್‍ಲ್ ಒಳ್‍ದಿತುಳ್ಳ ವಿಷಯನೆಲ್ಲ ನಂಬಿಯಂಡುಂಡ್.

¹⁵ಇದ್‍ಲ್ಲತೆ ನೀತಿವಂತಯಿಂಗಳು, ಅನೀತಿವಂತಯಿಂಗಳು ಚತ್ತ ಪಿಂಞ ಜೀವವಾಯಿತ್ ಏವಾಂದ್ ಈಂಗ ದೇವಡ ಮೇಲೆ ನಂಬಿಕೆ ಬೆಚ್ಚಿತುಳ್ಳನೆಕೆ, ನಾನ್ ಸಹ ನಿರೀಕ್ಷೆ ಬೆಚ್ಚಿತುಳ್ಳ.

¹⁶ಇದ್‍ನಗುಂಡ್, ದೇವಡ ವಿಷಯತ್‍ಲು ಮನುಷ್ಯಂಗಡ ವಿಷಯತ್‍ಲು ನಾನ್ ಕುತ್ತ ಇಲ್ಲತ ಮನಸಾಕ್ಷಿಲ್ ಇಪ್ಪಕ್ ಪ್ರಯತ್ನಪಟ್ಟಂಡುಳ್ಳ.

¹⁷ದುಂಬ ಕಾಲ ಕಯಿಂಜ ಪಿಂಞ ನಾನ್ ಯೆರೂಸಲೇಮ್‌ಕ್ ಬಂದಿಯೆ. ಅಲ್ಲಿ ಕಷ್ಟಪಟ್ಟಂಡುಳ್ಳ ನಾಡ ಜನಕ್ ದಾನ ಪಣತ್‍ನ ಕೊಡ್‌ಪಕು, ಕಾಣಿಕೆನ ಒಪ್ಪ್‌ಚಿಡ್‍ವಕು ನಾನ್ ಬಂದಿಯೆ.

¹⁸ದೇವಾಲಯತ್‍ಲ್ ಜನಡ ಗುಂಪ್ ಪಿಂಞ ಗಲಾಟೆರ ಗುಂಪ್ ಏದು ನಾಡ ಕೂಡೆ ಇಲ್ಲತಿಪ್ಪಕ, ನಾನ್ ದೇವಾಲಯತ್‍ಲ್ ಶುದ್ದ ಮಾಡ್‌ವ ಆಚಾರತ್‍ನ ಪೂರ್ತಿ ಮಾಡಿಯಂಡಿಂಜ, ಅಕ್ಕ ಆಸ್ಯ ದೇಶತ್ಂಜ ಬಂದ ಚೆನ್ನ ಯೆಹೂದ್ಯಂಗ ನನ್ನ ಕಂಡತ್.

¹⁹ನನ್ನ ಕಂಡಯಿಂಗಕ್ ನಾಡ ಮೇಲೆ ವಿರೋದ ಇಂಜತೇಂಗಿ, ಅಯಿಂಗಳೇ ಇಲ್ಲಿ ಬಂದಿತ್, ನಿಂಗಡ ಮಿಂಞತ್ ನಾಡ ಮೇಲೆ ಕುತ್ತ ಪರಿಯಡ್.

²⁰ಇಲ್ಲತೆಪೋಚೇಂಗಿ, ಯೆಹೂದ್ಯಂಗಡ ಆಲೋಚನೆ ಸಬೆರ ಪೆರಿಯಯಿಂಗಡ ಮಿಂಞತ್ ನಾನ್ ನಿಂದಿತ್ ಇಪ್ಪಕ, ನಾಡ ಮೇಲೆ ಎಂತಾಚು ತಪ್ಪ್ ಕಂಡ್‍ತ್ಂಜತೇಂಗಿ, ಈಂಗಳೇ ಅದ್‍ನ ಎಣ್ಣಡ್.

²¹ನಾನ್ ಈಂಗಡ ಮದ್ಯತ್‍ಲ್ ನಿಂದಂಡಿಪ್ಪಕ, ಚತ್ತಯಿಂಗ ಜೀವವಾಯಿತ್ ಎದ್ದಿತ್ ಬಪ್ಪಾಂದ್ ಉಳ್ಳ ವಿಷಯತ್‍ರ ಕಾರಣತ್ಂಜ, ಇಕ್ಕ ನಿಂಗ ನನ್ನ ವಿಚಾರಣೆ ಮಾಡ್‌ವನೆಕೆ ಆಚೀಂದ್ ಕೂತ್ ಕೊಡ್‌ತದ್ ಅಲ್ಲತೆ ಬೋರೊಂದು ಅಯಿಂಗ ಎಣ್ಣ್‌ವಕ್ ಕಯ್ಯುಲೇಂದ್ ಎಣ್ಣ್‌ಚಿ.

²²ಫೇಲಿಕ್ಸ ಕ್ರಿಸ್ತಂಡ ಮಾರ್ಗತ್‍ನ ಚಾಯಿತೆ ಅರಿಂಜಂವೊನಾನಗುಂಡ್, ಇದ್‍ನೆಲ್ಲ ಕ್‍ೕಪಕ, ಅಂವೊ ಅಯಿಂಗಳ ನೋಟಿತ್: ಸೇನೆರ ಅದಿಕಾರಿಯಾನ ಲೂಸ್ಯ ಬಪ್ಪಕ, ಈ ಕಾರ್ಯತ್‍ನ ತೀರ್ಮಾನ ಮಾಡ್‌ವೀಂದ್ ಎಣ್ಣಿತ್ ವಿಚಾರಣೆನ ನಿಪ್ಪ್‌ಚಿಟ್ಟತ್.

²³ಪಿಂಞ ಅಂವೊ, ನೂರ್ ಸಿಪಾಯಿಯಂಗಡ ಅದಿಕಾರಿನ ನೋಟಿತ್: ಪೌಲನ ಜೈಲ್‌ಕ್ ಕಾಕಿಯಂಡ್ ಪೋಪಕ್ ಎಣ್ಣ್‌ಚಿ. ಆಚೇಂಗಿ, ಪೌಲನ ಒರ್ ಕೈದಿರನೆಕೆ ನಡ್‍ತ್‍ವಕಾಪಾಂದು, ಅಂವೊಂಗ್ ಸೇವೆ ಮಾಡ್‌ವಕ್ ಬಪ್ಪ ಅಂವೊಂಡ ಸ್ನೇಹಿತಂಗಳ ತಡೆ ಮಾಡ್‌ವಕ್ಕಾಗಾಂದು ಹುಕುಮ್ ಕೊಡ್‍ತತ್.

²⁴ಚೆನ್ನ ದಿನ ಆನ ಪಿಂಞ ಫೇಲಿಕ್ಸ, ಯೆಹೂದ್ಯಳಾನ ದ್ರೂಸಿಲ್ಲ ಎಣ್ಣುವ ಅಂವೊಂಡ ಪೊಣ್ಣ್‌ರ ಕೂಡೆ ಬಾತ್. ಅಂವೊ ಪೌಲನ ಕಾಕಿತ್, ಯೇಸು ಕ್ರಿಸ್ತನ ನಂಬುವ ವಿಷಯತ್‍ಲ್ ಅಂವೊ ಎಣ್ಣ್‌ನ ತಕ್ಕ್‌ನ ಕ್‍ೕಟತ್.

²⁵ಪೌಲ, ಅಯಿಂಗಕ್ ದೇವಡ ನೀತಿನ, ತನ್ನಡಕತ್‍ನ ಪಿಂಞ ಇಂಞು ಮಿಂಞಕ್ ದೇವ ಮಾಡ್‌ವಕುಳ್ಳ ನ್ಯಾಯತೀರ್ಪ್‌ನ ಎಣ್ಣ್‌ವಕ, ಫೇಲಿಕ್ಸಂಗ್ ದುಂಬ ಪೋಡಿಯಾಚಿ. ಅಕ್ಕ ಅಂವೊ ಪೌಲಂಗ್, ಇಕ್ಕ ಇಚ್ಚಕ್ ಮದಿ, ನೀನ್ ಪೋ, ನಾಕ್ ಸಮಯ ಕ್‍ಟ್ಟ್‌ವಕ ನಿನ್ನ ಕಾಕ್‌ಚಿಡುವೀಂದ್ ಎಣ್ಣ್‌ಚಿ.

²⁶ಇದ್‍ಲ್ಲತೆ ತಾಂಗ್ ಪೌಲಂಡ ಕೈಯಿಂಜ ಪಣ ಕ್‍ಟ್ಟ್‌ವಾಂದ್ ಗೇನ ಮಾಡಿತ್, ಅಂವೊಂಡ ಪಕ್ಕ ದುಂಬ ಕುರಿ ಅಂವೊನ ಕಾಕಿತ್ ತಕ್ಕ್ ಪರ್ಂದಂಡಿಂಜತ್.

²⁷ಇನ್ನನೆ ದಂಡ್ ಕಾಲ ಕಯಿಂಜಿರ್‌ತ್. ಫೇಲಿಕ್ಸಂಡ ಸ್ತಾನಕ್ ಪೋರ್ಕಿಯ ಫೆಸ್ತ ಎಣ್ಣ್‌ವಂವೊ ಬಾತ್; ಅಕ್ಕ, ಫೇಲಿಕ್ಸ ಯೆಹೂದ್ಯಂಗಡ ದಯೇನ, ಸಂಪಾದನೆ ಮಾಡ್‌ವಕಾಯಿತ್, ಪೌಲನ ಅನ್ನನೆ ಜೈಲ್‍ಲ್ಲೆ ಬುಟ್ಟಿತ್ ಪೋಚಿ.