Read Kodava ಅಪೊಸ್ತಲ 26 Bible Online

ಅಪೊಸ್ತಲ 26 - Kodava bible

ಅಪೊಸ್ತಲ 26

¹ಅಕ್ಕ ಅಗ್ರಿಪ್ಪ ಪೌಲಂಗ್: ನೀನ್ ನೀಕಾಯಿತ್ ತಕ್ಕ್ ಪರೀಂದ್ ಎಣ್ಣ್‌ಚಿ. ಅಕ್ಕ ಪೌಲ: ಕೈ ನ್‍ೕಟಿತ್ ಅಂವೊಂಗಾಯಿತ್ ವಾದ ಮಾಡ್‌ವಕ್ ಸುರು ಮಾಡ್‍ಚಿ.

²ಅಗ್ರಿಪ್ಪ ರಾಜನೇ, ಯೆಹೂದ್ಯಂಗ ನಾಡ ಮೇಲೆ ಪರಿಯುವ ಎಲ್ಲಾ ಕುತ್ತಕ್, ನಾನ್ ಈ ದಿವಸ ನಿಂಗಡ ಮಿಂಞತ್‍ಲ್ ನಾಕಾಯಿತ್ ಉತ್ತರ ಕೊಡ್‍ಪಕುಳ್ಳಗುಂಡ್, ನನ್ನ ಆಶೀರ್ವಾದ ಪಡ್ಂದವೋಂದ್ ನಾನ್ ಗೇನ ಮಾಡ್‌ವಿ.

³ಮುಕ್ಯವಾಯಿತ್ ಯೆಹೂದ್ಯಂಗಡ ಎಲ್ಲಾ ಪದ್ದತಿರ ಆಚಾರ ವಿಚಾರ ಪಿಂಞ ತಕ್‌ರಾರ್‍ನ ನಿಂಗಕ್ ಚಾಯಿತೆ ಗೊತ್ತುಳ್ಳಗುಂಡ್ ನಾನ್ ಅನ್ನನೆ ಗೇನ ಮಾಡ್‌ವಿ. ಆನಗುಂಡ್ ನಾನ್ ಎಣ್ಣ್‌ವಾನೆಲ್ಲ ತಾಳ್ಮೆಯಿಂಜ ಕ್‍ೕಕಂಡೂಂದ್ ಬೋಡ್‍ವಿ.

⁴ನಾನ್ ಚೆರಿಯಂವೊನಾಯಿತಿಪ್ಪಕಲೇ ನಾಡ ಜನಡ ಮದ್ಯತ್ ಪಿಂಞ ಯೆರೂಸಲೇಮ್‍ಲ್ ನಾನ್ ಎನ್ನನೆ ಪಂಡಿಂಜೇ ಇಂಜಿಯೇಂದ್ ಎಲ್ಲಾ ಯೆಹೂದ್ಯಂಗಕೂ ಗೊತ್ತುಂಡ್.

⁵ನಂಗಡ ನ್ಯಾಯಪ್ರಮಾಣತ್‍ರ ವಿಷಯತ್‍ಲ್ ದುಂಬ ಕಂಡಿತವಾಯಿತುಳ್ಳ ಮಾರ್ಗವಾನ ಫರಿಸಾಯಂಗಡ ಪದ್ದತಿರ ಪ್ರಕಾರ ಒರ್ ಫರಿಸಾಯನಾಯಿತ್ ನಡ್ಂದಿಯೇಂದ್ ಅಯಿಂಗಕ್ ಎಣ್ಣುವಕ್ ಮನಸ್ಸ್ ಉಂಡೇಂಗಿ ಸಾಕ್ಷಿ ಕೊಡ್‌ಕಡ್.

⁶ಇಕ್ಕಲು, ದೇವ ನಂಗಡ ಅಜ್ಜಂಗಕ್ ಮಾಡ್‍ನ ಒಪ್ಪಂದತ್‍ನ ಪೂರ್ತಿ ಮಾಡಂಡೂಂದ್ ಉಳ್ಳ ನಿರೀಕ್ಷೆಕಾಯಿತ್ ನಾನ್ ವಿಚಾರಣೆಕ್ ಒಳಪಟ್ಟಿತುಳ್ಳ.

⁷ಇಂಞು ಎಣ್ಣಂಡು ಎಣ್ಣ್‌ಚೇಂಗಿ, ಆ ವಾಗ್ದಾನ ನೆರವೇರ್‌ವಾಂದ್ ನಿರಿಕ್ಷೇಲ್ ನಂಬಿಯಂಡುಳ್ಳ ಕಾರಣಕಾಯಿತ್ ನಂಗಡ ಪನ್ನೆರಂಡ್ ಕುಲತ್‍ರ ಜನವು, ಬಯಿಟ್ ಪೋಲ್ ನೇರಾಯಿತು ಆರಾದನೆ ಮಾಡಿಯಂಡುಂಡ್. ಅಗ್ರಿಪ್ಪ ರಾಜಾನೇ, ಈ ನಿರಿಕ್ಷೇರ ನಂಬಿಕೆಕಾಯಿತೇ ಯೆಹೂದ್ಯಂಗ ನಾಡ ಮೇಲೆ ಕುತ್ತ ಎಣ್ಣಿತುಂಡ್.

⁸ಚತ್ತಯಿಂಗಳ ಪುನಃ ಜೀವವಾಯಿತ್ ಎಪ್ಪ್‌ವಕ್ ದೇವಕ್ ಕಯ್ಯೂಂದ್ ನಿಂಗಡಲ್ಲಿ ನಂಬ್‍ವಕ್ ಎಂತ ತಡೆ?

⁹ನಜರೇತ್‍ರ ಯೇಸುರ ಪೆದಕ್ ವಿರೋದವಾಯಿತ್ ಎಂತೆಲ್ಲಾ ನಾಕ್ ಕಯ್ಯು, ಅದ್‍ನೆಲ್ಲಾ ಮಾಡಂಡೂಂದ್ ನಾನ್ ಸಹ ಗೇನ ಮಾಡ್‍ನ.

¹⁰ಅನ್ನನೆ ಯೆರೂಸಲೇಮ್‍ಲು ಮಾಡಿಯೆ. ಮುಕ್ಯ ಯಾಜಕಂಗಯಿಂಜ ಅದಿಕಾರತ್‍ನ ಪಡ್ಂದಿತ್, ಯೇಸುನ ನಂಬ್‍ನ ದುಂಬ ದೇವಡ ಮಕ್ಕಳ ಜೈಲ್‌ಕ್ ಇಟ್ಟಿತ್, ಅದಲ್ಲತೆ ಅಯಿಂಗಕ್ ಮರಣ ಶಿಕ್ಷೇರ ತೀರ್ಪ್ ಕ್‍ಟ್ಟ್‌ವಕ, ನಾಡ ಒತ್ತಾಸೆನೆ ಸಹ ಕೊಡ್‌ತಿಯೆ.

¹¹ಒರ್ ಸಬಾಮಂದಿರತ್ಂಜ ಇನ್ನೊಂದ್ ಸಬಾಮಂದಿರಾಂದ್ ಎಲ್ಲಾ ಸಬಾಮಂದಿರಕ್ ಪೋಯಿತ್, ನಾನ್ ಸುಮಾರ್ ಕುರಿ ಅಯಿಂಗಳ ಪೊಜ್ಜಿತ್, ದೇವ ದೂಷಣೆ ಎಣ್ಣ್‌ವಕ್ ಒತ್ತಾಯ ಮಾಡ್‍ನ; ಇದ್‍ಲ್ಲತೆ ಅಯಿಂಗಡ ಮೇಲೆ ದುಂಬ ಚೆಡಿಯುಳ್ಳಂವೊನಾಯಿತ್, ಯೆಹೂದ್ಯಂಗ ಅಲ್ಲತ ಬೋರೆ ಜಾತಿಯಂಗಡ ಪಟ್ಟಣಕತ್ತನೆ ಅಯಿಂಗಕ್ ತೊಂದರೆ ಕೊಡ್‌ತಿಯೆ.

¹²ಈ ಉದ್ದೇಶತ್‍ಲ್, ನಾನ್ ಮುಕ್ಯ ಯಾಜಕಂಗಡ ಅದಿಕಾರತ್‍ನ ಪಿಂಞ ಹುಕುಮ್‍ನ ಪಡ್ಂದಿತ್ ನಾನ್ ದಮಸ್ಕ ಪಟ್ಟಣತ್‍ರ ಬಟ್ಟೇಲ್ ಪೋಯಂಡಿಪ್ಪಕ,

¹³ಓ ರಾಜನೇ, ಮಜ್ಜಣ ನೇರತ್‍ಲ್ ನಾನ್ ಪೋಯಂಡಿಂಜ ಬಟ್ಟೇಲ್, ಪರಲೋಕತ್ಂಜ ಸೂರ್ಯಂಡ ಬೊಳಿಕಿಂಜ ಬಲ್ಯದಾಯಿತ್ ಉಳ್ಳ ಒರ್ ಬೊಳಿ ನಾಡ ಸುತ್ತ್‌ಲ್ ಪಿಂಞ ನಾಡ ಕೂಡೆ ಪ್ರಯಾಣ ಮಾಡ್‍ನಯಿಂಗಡ ಸುತ್ತ್‌ಲ್ ಮಿನ್ನುವದ್‍ನ ನಾನ್ ಕಂಡಿಯೆ.

¹⁴ನಂಗೆಲ್ಲಾರು ನೆಲಕ್ ಬೂವಕ: ಸೌಲ, ಸೌಲ, ನನ್ನ ಎನ್ನಂಗ್ ಹಿಂಸೆ ಮಾಡ್‌ವಿಯ? ಮುಳ್ಳ್ ಕೋಲ್‍ಕ್ ಎದ್‍ರಾಯಿತ್ ಚೌಟ್‌ವದ್ ನೀಕೇ ಕಷ್ಟಾಂದ್ ಅರಾಮಿಯ ಬಾಷೆಲ್ ನಾಡ ಕೂಡೆ ತಕ್ಕ್ ಪರಿವ ಒರ್‌ ವಾಣಿ ನಾಕ್ ಕ್‍ೕಟತ್.

¹⁵ಅಕ್ಕ ನಾನ್: ಒಡೆಯನೇ, ನೀನ್ ದಾರ್‍ೕಂದ್ ಕ್‍ೕಪಕ, ಒಡೆಯ: ನೀನ್ ಹಿಂಸೆ ಮಾಡಿಯಂಡುಳ್ಳ ಯೇಸು ನಾನೇ.

¹⁶ಇಕ್ಕ, ನೀನ್ ಎದ್ದಿತ್ ನಿಂದ, ನಿನ್ನ ನಾಡ ಸೇವಕನಾಯಿತು, ಸಾಕ್ಷಿಯಾಯಿತು ನೇಮಿಚಿಡುವಕಾಯಿತ್ ನಾನ್ ನೀಕ್ ಪ್ರತ್ಯಕ್ಷ ಆನ. ಇಂದ್ ನೀನ್ ನಾಡ ವಿಷಯವಾಯಿತ್ ಕಂಡಾನ, ಮಿಂಞಕ್ ನಾನ್ ನೀಕ್ ಕಾಂಬ್‍ಚಿಡುವಕುಳ್ಳಾನ ಈ ಲೋಕಕ್ ನೀನ್ ಎಣ್ಣಂಡು.

¹⁷ನಾನ್ ನಿನ್ನ, ನೀಡ ಇಸ್ರಾಯೇಲ್ ಜನಡ ಕೈಯಿಂಜ ಪಿಂಞ ಯೆಹೂದ್ಯಂಗಲ್ಲತ ಬೋರೆ ಜನಡ ಕೈಯಿಂಜ ಕಾಪಾಡ್‍ವಿ.

¹⁸ಅಯಿಂಗ ನಾಡ ಮೇಲೆ ಇಡ್‌ವ ನಂಬಿಕೇರಗುಂಡ್, ಅಯಿಂಗಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟಿತ್, ಅಂವೊಂಗಾಯಿತ್ ಬೋರೆ ಮಾಡಿತ್ ಪವಿತ್ರ ಮಾಡ್‍ನ ಜನಕ್ ಕ್‍ಟ್ಟುವ ಬಾದ್ಯತೆನ ಪಡೆಯುವನೆಕೆ, ಅಯಿಂಗ ಇರ್‍ಟಿಂಜ ಬೊಳಿಕು, ಸೈತಾನಂಡ ಅದಿಕಾರತ್ಂಜ ದೇವಡ ಕಡೇಕು ತಿರಿತ್ ಅಯಿಂಗಡ ಕಣ್ಣ್ ತೊರಕಂಡೂಂದ್ ನಿನ್ನ ನಾನ್ ಅಯಿಂಗಡ ಪಕ್ಕ ಅಯಿಪೀಂದ್ ಎಣ್ಣ್‌ಚಿ.

¹⁹ಆನಗುಂಡ್ ಅಗ್ರಿಪ್ಪ ರಾಜನೇ, ಪರಲೋಕತ್ಂಜ ನಾಕ್ ಕ್‍ಟ್ಟ್‌ನ ಆ ದರ್ಶನಕ್ ತಗ್ಗಿತ್ ನನ್ನ ಒಪ್ಪ್‌ಚಿಟ್ಟಿಯೆ.

²⁰ಅಕ್ಕ, ಆದ್ಯವಾಯಿತ್ ದಮಸ್ಕತ್‍ಲ್, ಅಲ್ಲಿಂಜ ಯೆರೂಸಲೇಮ್‍ಲ್, ಯೂದಾಯತ್‍ಲ್ ಎಲ್ಲಾ ಸೀಮೆಲ್ ಪಿಂಞ ಯೆಹೂದ್ಯಂಗಲ್ಲತಯಿಂಗಕ್ ಸಹ ಪೋಯಿತ್ ಬೋದನೆ ಮಾಡ್‍ನ. ಅಯಿಂಗ ಪಾಪತ್ಂಜ ತಿರಿತ್, ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್ ಬರಂಡೂಂದು, ಪಿಂಞ ಅಯಿಂಗ ದೇವಡ ಪಕ್ಕ ತಿರಿರ್‌ತ್‍ೕಂದ್ ಕಾಂಬ್‍ಚಿಡುವನೆಕೆ, ಯೋಗ್ಯವಾನ ಬದ್‍ಕ್ ಬದ್‍ಕಂಡೂಂದ್ ಅಯಿಂಗಕ್ ಎಣ್ಣಿಯೆ.

²¹ಈ ಕಾರಣಕಾಯಿತ್ ಯೆಹೂದ್ಯಂಗ ದೇವಾಲಯತ್‍ಲ್ ನನ್ನ ಪುಡ್‌ಚಿತ್ ಕೊಲ್ಲ್‌ವಕ್ ಪ್ರಯತ್ನಪಟ್ಟತ್.

²²ಆಚೇಂಗಿ, ನಾನ್ ದೇವಡ ಸಹಾಯತ್‍ನ ಪಡ್ಂದಿತ್ ಈ ದಿವಸಕತ್ತನೆ, ಚೆರಿಯಯಿಂಗಕು ಪೆರಿಯಯಿಂಗಕು ಸಾಕ್ಷಿ ಎಣ್ಣ್‌ವಂವೊನಾಯಿತುಳ್ಳ. ಪ್ರವಾದಿಯಂಗಳು ಮೋಶೇಯು ಎಣ್ಣ್‌ನ ವಿಷಯವಲ್ಲತೆ ಬೋರೆ ಒಂದು ಎಣ್ಣಿಯಂಡಿಲ್ಲೆ.

²³ಪ್ರವಾದಿಯಂಗಳು ಮೋಶೇಯು ಮಿಂಞಲೇ ಎಣ್ಣ್‌ನನೆಕೆ, ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಕಷ್ಟಪಟ್ಟಿತ್ ಚಾವಾಂದು, ಚತ್ತಯಿಂಗ ಪುನಃ ಜೀವವಾಯಿತ್ ಎದ್ದಿತ್ ಬಪ್ಪಯಿಂಗಡಡೆಲ್ ಇಂವೊನೇ ಆದ್ಯವಾಯಿತ್ ಇಪ್ಪಾಂದು, ಅಂವೊ ಎದ್ದಿತ್ ಅಂವೊಂಡ ಜನಕು, ಯೆಹೂದ್ಯಂಗಲ್ಲತ ಬೋರೆ ಜನಾಂಗಕು, ಬೊಳಿನ ಅರಿಚಿಡುವಾಂದು ಉಳ್ಳದ್‍ನ ಬುಟ್ಟಿತ್ ಬೋರೆ ಒಂದು ನಾನ್ ಎಣ್ಣಿಯಂಡಿಲ್ಲೇಂದ್ ಎಣ್ಣ್‌ಚಿ.

²⁴ಇನ್ನನೆ ಪೌಲ ಅಂವೊಂಗಾಯಿತ್ ವಾದಮಾಡಿಯಂಡಿಪ್ಪಕಲೆ, ಫೆಸ್ತ ಬಲ್ಯ ಸ್ವರತ್‍ಲ್: ಪೌಲನೇ, ನೀಕ್ ಪುಚ್ಚ್ ಪುಡ್‌ಚಿರ್‌ತ್. ನೀನ್ ದುಂಬ ಓದಿತುಳ್ಳಿಯ, ಅದೇ ನಿನ್ನ ಪುಚ್ಚ್ ಪುಡ್‌ಚನೆಕೆ ಮಾಡಿಯಂಡುಂಡ್‍ೕಂದ್ ಎಣ್ಣ್‌ಚಿ.

²⁵ಅದ್ಂಗ್ ಪೌಲ: ಮಹಾ ಗೌರವವುಳ್ಳ ಫೆಸ್ತನೇ, ನಾನ್ ಪುಚ್ಚ್ ಪುಡ್‍ಚಂವೊನಲ್ಲ, ಸ್ವಂತ ಬುದ್ದಿವಂತನಾಯಿತ್, ಸತ್ಯ ತಕ್ಕ್‌ನ ಎಣ್ಣಿಯಂಡುಳ್ಳ.

²⁶ಅಗ್ರಿಪ್ಪ ರಾಜಂಗ್, ಈ ಸಂಗತಿಯೆಲ್ಲ ಗೊತ್ತುಂಡ್, ಆನಗುಂಡ್, ದೈರ್ಯವಾಯಿತ್ ಅಯಿಂಗಡ ಮಿಂಞ ತಕ್ಕ್ ಪರಿವಿ. ಇದ್‍ಲ್ ಅಂವೊಂಗ್ ಗೊತ್ತಿಲ್ಲತ ವಿಷಯ ಒಂದು ಇಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಇದ್ ಒರ್ ಮೂಲೆಲ್ ನಡ್ಂದ ಸಂಗತಿಯಲ್ಲ.

²⁷ಅಗ್ರಿಪ್ಪ ರಾಜನೇ, ನಿಂಗಕ್ ಪ್ರವಾದಿಯಂಗಡ ಮೇಲೆ ನಂಬಿಕೆ ಉಂಡಾ? ಉಂಡ್‍ೕಂದ್ ನಾಕ್ ಗೊತ್ತುಂಡ್.

²⁸ಅಕ್ಕ ಅಗ್ರಿಪ್ಪ ಪೌಲನ ನೋಟಿತ್: ಅಚ್ಚಕ್ ಸುಲಬವಾಯಿತ್ ಏದ್ ಪ್ರಯತ್ನವು ಇಲ್ಲತೆ, ನೀನ್ ನನ್ನ ಕ್ರಿಸ್ತಂಡ ಮೇಲೆ ನಂಬಿಕೆ ಇಡ್‍ವನೆಕೆ ಮಾಡ್‌ವಕ್ ಕಯ್ಯುವಾಂದ್ ಎಣ್ಣ್‌ಚಿ.

²⁹ಅದ್ಂಗ್ ಪೌಲ: ಚೆನ್ನ ಪ್ರಯತ್ನನತ್ಂಜ ಆಡ್, ಅಥವ ದುಂಬ ಪ್ರಯತ್ನನತ್ಂಜ ಆಡ್, ನಿಂಗ ಮಾತ್ರ ಅಲ್ಲತೆ, ಇಂದ್ ನಾಡ ಈ ಸತ್ಯತ್‍ನ ಕ್‍ೕಪಯಿಂಗೆಲ್ಲಾರು, ನಾಡ ಮೇಲೆ ಉಳ್ಳ ಈ ಕೈದಿರ ಸರ್ಪಣಿನ ಬುಟ್ಟಿತ್, ಪೂರ್ತಿಯಾಯಿತ್ ನನ್ನನೆಕೆ ಆಂಡೂಂದ್ ದೇವಡ ಪಕ್ಕ ಪ್ರಾರ್ಥನೆ ಮಾಡ್‌ವೀಂದ್ ಎಣ್ಣ್‌ಚಿ.

³⁰ಅದ್‍ನೆಲ್ಲ ಪೌಲ ಎಣ್ಣ್‌ನ ಪಿಂಞ ಅಗ್ರಿಪ್ಪ ರಾಜನು, ದೇಶತ್‍ರ ಅದಿಪತಿಯು, ಬೆರ್ನಿಕೆಳು, ಅಯಿಂಗಡ ಕೂಡೆ ಅಳ್‍ತಂಡಿಂಜಯಿಂಗಳು ಎದ್ದಿತ್,

³¹ಅಲ್ಲಿಯಿಂಜ ಪೋಯಂಡಿಪ್ಪಕ, ಈ ಮನುಷ್ಯ ಮರಣ ಶಿಕ್ಷೆಕಾಡ್, ಜೈಲ್‍ಲ್ ಇಡ್‍ವಕಾಡ್ ತಕ್ಕಂತ ಒರ್ ಕುತ್ತವು ಮಾಡಿತ್‌ಲ್ಲೇಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

³²ಅಗ್ರಿಪ್ಪ, ಫೆಸ್ತಂಗ್: ಈ ಮನುಷ್ಯ ಕೈಸರಂಡ ಮಿಂಞ ನ್ಯಾಯ ಕ್‍ಟ್ಟಂಡೂಂದ್ ಬೋಡತೆ ಇಂಜತೇಂಗಿ ಇಂವೊನ ಬುಡ್‌ತುವಕಿಂಜತ್‍ೕಂದ್ ಎಣ್ಣ್‌ಚಿ.