Read Kodava ಅಪೊಸ್ತಲ 3 Bible Online

ಅಪೊಸ್ತಲ 3 - Kodava bible

ಅಪೊಸ್ತಲ 3

¹ಒರ್ ದಿವಸ ಪೇತ್ರ ಪಿಂಞ ಯೋಹಾನ ಮಜ್ಜಣ ಮೂಂದ್ ಗಂಟೆರ ಪ್ರಾರ್ಥನೆಕಾ‍ಯಿತ್ ದೇವಾಲಯಕ್ ಪೋಯಂಡಿಪ್ಪಕ,

²ಅಲ್ಲಿ, ಪುಟ್ಟ್‌ನಲ್ಲಿಂಜ ಕುಂಟನಾಯಿತ್ಂಜ ಒಬ್ಬನ ಚೆನ್ನ ಜನ ಕೊಂಡ್ ಬಂದಂಡಿಂಜತ್. ದೇವಾಲಯತ್‍ರ ಒಳ್‍ಕ್ ಪೋಪ ಜನಡ ಪಕ್ಕ ಬಿಕ್ಷೆ ಬೋಡ್‌ವಕಾಯಿತ್, ಅಂವೊನ ದಿನಾಲು ದೇವಾಲಯತ್‍ರ ಚಾಯಿ ಬಾಯಿಕಂಡೀಂದ್ ಕಾಕ್‍ವ ಪಡಿರ ಪಕ್ಕತ್‍ಲ್ ಅಳ್‍ಪಚಿಟ್ಟಂಡಿಂಜತ್.

³ಅಂವೊ, ದೇವಾಲಯತ್‍ರ ಒಳ್‍ಕ್ ಪೋಯಂಡ್ ಇಂಜ ಪೇತ್ರ ಪಿಂಞ ಯೋಹಾನನ ನೋಟಿತ್ ಬಿಕ್ಷೆ ಕ್‍ೕಟತ್.

⁴ಪೇತ್ರ ಪಿಂಞ ಯೋಹಾನ ದಂಡಾಳು ಅಂವೊಂಡ ಮೂಡ್‌ನೇ ನೋಟಿಯಂಡ್: ನಂಗಳ ನೋಟ್‍ೕಂದ್ ಪೇತ್ರ ಎಣ್ಣ್‌ಚಿ.

⁵ಅಕ್ಕ ಅಂವೊ, ಅಯಿಂಗಡ ಕೈಯಿಂಜ ಎಂತಾಚೇಂಗಿ ಕ್‍ಟ್ಟ್‌ವಾಂದ್ ಗೇನ ಮಾಡಿತ್ ಅಯಿಂಗಳ ನೋಟ್‌ಚಿ.

⁶ಅಕ್ಕ ಪೇತ್ರ: ನಾಡ ಪಕ್ಕ ಪೊನ್ನ್ ಬೊಳ್ಳಿ ಒಂದು ಇಲ್ಲೆ, ಆಚೇಂಗಿ ನಾಡ ಪಕ್ಕ ಉಳ್ಳದ್‍ನ ನೀಕ್ ತಪ್ಪೀಂದ್ ಎಣ್ಣಿತ್, ನಜರೇತ್‍ರ ಯೇಸು ಕ್ರಿಸ್ತಂಡ ಪೆದತ್‍ಲ್ ನೀನ್ ಎದ್ದಿತ್ ನಡೇಂದ್ ಎಣ್ಣಿತ್,

⁷ಅಂವೊಂಡ ಬಲ್‌ತೆ ಕೈಯಿನ ಪುಡ್‌ಚಿತ್ ನೇತ್‍ಚಿ. ಅಕ್ಕಲೆ ಅಂವೊಂಡ ಕಾಲ್ ಪಿಂಞ ಕಾಲ್‍ರ ಕರಡ್ ಬಲಪಟ್ಟತ್.

⁸ಅಂವೊ ತುಳ್ಳಿಯಂಡ್ ನಡ್‍ಪಕ್ ಸುರ್ ಮಾಡ್‍ಚಿ. ನಡ್ಂದ್ ಕಳಿಚಿತ್, ದೇವನ ತುದಿಚಂಡ್ ಪೇತ್ರ ಪಿಂಞ ಯೋಹಾನಂಡ ಕೂಡೆ ದೇವಾಲಯತ್‍ರ ಒಳ್‍ಕ್ ಪೋಚಿ.

⁹ಅಂವೊ ನಡ್‍ಪದ್‌ನ, ದೇವನ ತುದಿಪದ್‍ನ ಅಲ್ಲಿ ಇಂಜ ಎಲ್ಲಾ ಜನಳು ನೋಟಿತ್,

¹⁰ಇಂವೊ ದೇವಾಲಯತ್‍ರ ಚಾಯಿ ಬಾಯಿಕಂಡಿರ ಬರಿಲ್ ಅಳ್‌ತಂಡ್ ಬಿಕ್ಷೆ ಬೋಡ್‍ವಂವೋಂದ್ ಗೊತ್ತಾಯಿತ್, ಅಂವೊಂಗ್ ಇನ್ನನೆ ಆನದ್‍ನ ನೋಟಿತ್ ಅಯಿಂಗಕ್ ನಂಬುವಕ್ ಕಯ್ಯತಚ್ಚಕ್ ಆಶ್ಚರ್ಯ ಆಚಿ.

¹¹ವಾಸಿಯಾನ ಮನುಷ್ಯ, ಪೇತ್ರ ಪಿಂಞ ಯೋಹಾನನ ಬುಟ್ಟಿತ್ ಪೋಕತೆ ಅಯಿಂಗಳ ಪುಡ್‍ಚಂಡ್ ಇಂಜತ್. ಅಂವೊ ಇನ್ನನೆ ವಾಸಿಯಾನದ್‍ನ ಕ್‍ೕಟ ಜನಯೆಲ್ಲ ಆಶ್ಚರ್ಯತ್‍ಲ್, ಸೊಲೊಮೋನಂಡ ಮಂಟಪಾಂದ್ ಕಾಕ್‍ವ ಮಂಟಪಕ್, ಅಯಿಂಗಡ ಪಕ್ಕ ಓಡಿ ಬಾತ್.

¹²ಪೇತ್ರ ಇದ್‍ನ ನೋಟಿತ್, ಜನಕ್: ಇಸ್ರಾಯೇಲ್ ಜನಳೇ, ನಿಂಗ ಎನ್ನಂಗ್ ಇದ್‍ನ ನೋಟಿತ್ ಆಶ್ಚರ್ಯ ಪಡುವಿರ? ನಿಂಗ ಎನ್ನಂಗ್ ನಂಗಳ ಇನ್ನನೆ ನೋಟ್‍ವಿರ? ಇಂವೊನ ನಡ್‍ಪನೆಕೆ ಮಾಡ್‍ನದ್, ನಂಗಡ ಸ್ವಂತ ಶಕ್ತಿಯಿಂಜಲು ಅಲ್ಲ, ನಂಗಡ ಬಕ್ತಿಯಿಂಜಲು ಅಲ್ಲ.

¹³ನಂಗಡ ಅಜ್ಜಂಗಳಾನ ಅಬ್ರಹಾಮ, ಇಸಾಕ ಪಿಂಞ ಯಾಕೋಬಂಡ ದೇವ, ತಾಂಡ ಸೇವಕನಾನ ಯೇಸುನ ಮಹಿಮೆಪಡ್‍ತಿತುಂಡ್. ನಿಂಗ ಅಂವೊನ ಶಿಲುಬೇಲ್ ಇಡ್‌ವಕ್ ಒಪ್ಪ್‌ಚಿಟ್ಟಿರ; ಪಿಲಾತ ಅಂವೊನ ಬುಡ್‍ತಂಡೂಂದ್ ಎಣ್ಣ್‌ಚೇಂಗಿಯು, ನಿಂಗ, ಅಂವೊನ ಅನ್ನನೆ ಮಾಡ್‍ವದ್ ಬೋಂಡಾಂದ್ ಎಣ್ಣಿರ.

¹⁴ಪವಿತ್ರವಾನ ಪಿಂಞ ನೀತಿವಂತಂವೊನಾಯಿತ್ಂಜ ಅಂವೊನ ನಿಂಗ ಬೋಂಡಾಂದ್ ಎಣ್ಣಿತ್, ಅಂವೊಂಡ ಬದ್‍ಲ್ ಕೊಲೆಗಾರನ ಬುಡುಗಡೆ ಮಾಡ್‌ವಕ್ ಎಣ್ಣಿರ.

¹⁵ಮನುಷ್ಯಂಗಕ್ ನಿತ್ಯ ಜೀವತ್‍ನ ತಪ್ಪಕ್ ಅದಿಕಾರ ಉಳ್ಳಂವೊನ ನಿಂಗ ಕೊಂದಿರ; ಆಚೇಂಗಿ, ದೇವ ಅಂವೊನ ಚಾವ್‍ಯಿಂಜ ಜೀವವಾಯಿತ್ ಎಪ್ಪ್‌ಚಿ. ಈ ವಿಷಯಕ್ ನಂಗ ಸಾಕ್ಷಿಯಳಾಯಿತುಂಡ್.

¹⁶ನಿಂಗ ಕಂಡಿತ್, ಗೊತ್ತ್ಂಜ ಈ ಮನುಷ್ಯಂಡ ಕಾಲ್ ಬಲಪಡ್‌ವನೆಕೆ ವಾಸಿಯಾನ ಕಾರಣ, ಅಂವೊ ಯೇಸುರ ಪೆದತ್‍ರ ಮೇಲೆ ಇಟ್ಟ ನಂಬಿಕೆಯೇ. ಅಕ್ಕು, ನಿಂಗೆಲ್ಲಾ ನೋಟ್‍ವನೆಕೆ, ಈ ಮನುಷ್ಯ ಪೂರ್ತಿ ವಾಸಿಯಾನದ್, ಯೇಸುರ ಮೇಲೆ ಇಟ್ಟ ನಂಬಿಕೇರಗುಂಡ್ ಮಾತ್ರಾಂದ್ ಗೊತ್ತಿರಡ್.

¹⁷ನಾಡ ಅಣ್ಣತಮ್ಮಣಂಗಳೇ, ನಿಂಗಳು ನಿಂಗಡ ಅದಿಕಾರಿಯಳು ಗೊತ್ತಿಲ್ಲತೆ ಇನ್ನನೆ ಮಾಡಿರಾಂದ್ ನಾಕ್ ಗೊತ್ತುಂಡ್.

¹⁸ಆಚೇಂಗಿಯು, ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಇನ್ನನೆ ಕಷ್ಟಪಡಂಡೂಂದ್ ದೇವ ತಾಂಡ ಎಲ್ಲಾ ಪ್ರವಾದಿಯಂಗಡ ಮೂಲಕ ಮಿಂಞಲೇ ಎಣ್ಣ್‌ನಾನ ಪೂರೈಚಿಡ್‌ವಕ್ ಇನ್ನನೆ ಮಾಡ್‍ಚಿ.

¹⁹ಆನಗುಂಡ್, ನಿಂಗಡ ಪಾಪವೆಲ್ಲ ಅಳಸಿ ಪೋಪಕಾಯಿತ್ ಪಶ್ಚಾತಾಪ ಪಟ್ಟಿತ್, ನಿಂಗ ದೇವಡ ಪಕ್ಕ ತಿರಿಗಿ. ಪಿಂಞ ಒಡೆಯಂಡಿಂಜ, ನಿಂಗಕ್ ಆರಾಮ್‍ರ ಕಾಲ ಕ್‍ಟ್ಟ್‌ವನೆಕೆ ಮಾಡ್‌ವ.

²⁰ಅಂವೊ ನೇಮಿಚಿಟ್ಟ ಕ್ರಿಸ್ತ ಎಣ್ಣುವ ಯೇಸುನ ನಿಂಗಕಾಯಿತ್ ಪುನಃ ಅಯಿಪ.

²¹ಅಂವೊಂಡ ಪವಿತ್ರವಾನ ಪ್ರವಾದಿಯಂಗಡ ಮೂಲಕ, ಪಂಡೇ ವಾಗ್ದಾನ ಮಾಡ್‍ನನೆಕೆ, ದೇವ ಎಲ್ಲಾನ ಸರಿಮಾಡ್‍ವಾಂದ್ ಎಣ್ಣ್‌ನ ವಿಷಯನೆಲ್ಲ ನೆರೆವೇರುವ ಕಾಲಕತ್ತನೆ, ಈ ಕ್ರಿಸ್ತ, ಪರಲೋಕತ್‍ಲ್ ಇಕ್ಕಂಡು.

²²ಮೋಶೆ ನಂಗಡ ಅಜ್ಜಂಗಳ ನೋಟಿತ್: ನಿಂಗಡ ಒಡೆಯನಾನ ದೇವ ನಿಂಗಡ ಮದ್ಯತ್ಂಜ ನಾಡನೆಕೆ ಒರ್ ಪ್ರವಾದಿನ ಕೊಂಡ್ ಬಪ್ಪ, ಅಂವೊ ಎಣ್ಣ್‌ವಾನೆಲ್ಲ ನಿಂಗ ಕ್‍ೕಕಂಡು,

²³ಪಿಂಞ ಆ ಪ್ರವಾದಿರ ತಕ್ಕ್‌ನ ಕ್‍ೕಕತಂವೊ ನಿಂಗಡ ಮದ್ಯತ್ಂಜ ಪೂರ್ತಿಯಾಯಿತ್ ಪಾಳಾಯಿ ಪೋಪಾಂದ್ ಎಣ್ಣಿತುಂಡಲ್ಲ?[8]

²⁴ಸಮುವೇಲ ಎಣ್ಣುವ ಪ್ರವಾದಿರ ಕಾಲತ್ಂಜ, ಏದೆಲ್ಲಾ ಪ್ರವಾದಿಯ ಪ್ರವಾದನೆ ಎಣ್ಣ್‌ಚೋ ಅಯಿಂಗೆಲ್ಲಾ ಈ ಕಾಲತ್‍ರ ವಿಷಯತ್‍ನ ಎಣ್ಣಿತ್ಂಜತ್.

²⁵ನಿಂಗ ಈ ಪ್ರವಾದಿಯಡ ಮಕ್ಕಳಾಯಿತುಳ್ಳಿರ; ಪಿಂಞ, ನೀಡ ಸಂತಾನತ್‍ರಗುಂಡ್, ಈ ಲೋಕತ್‍ಲ್ ಉಳ್ಳ ಎಲ್ಲಾ ಜಾತಿಯಂಗಕು ಆಶೀರ್ವಾದ ಬಪ್ಪಾಂದ್ ದೇವ ಅಬ್ರಹಾಮಂಗ್ ಎಣ್ಣಿತ್, ನಂಗಡ ಅಜ್ಜಂಗಡ ಕೂಡೆ ದೇವ ಮಾಡ್‍ನ ಒಪ್ಪಂದಕ್ ಸಹ ನಿಂಗ ಮಕ್ಕಳಾಯಿತುಳ್ಳಿರ.[9]

²⁶ದೇವ ನಿಂಗಳ ನಿಂಗಡ ಕೆಟ್ಟ ಗುಣತ್ಂಜ ತಿರಿಕಿತ್ ಬಪ್ಪ್‌ಚಿಡುವಕಾಯಿತ್ ಪಿಂಞ ನಿಂಗಳ ಆಶೀರ್ವಾದ ಮಾಡ್‌ವಕಾಯಿತ್, ದೇವ ಅಂವೊಂಡ ಮೋಂವೊನಾನ ಯೇಸುನ, ನಿಂಗಡ ಕಡೆಯೇ ಆದ್ಯವಾಯಿತ್ ಕೊಂಡ್ ಬಾತ್‍ೕಂದ್ ಪೇತ್ರ ಎಣ್ಣ್‌ಚಿ.