Read Kodava ಅಪೊಸ್ತಲ 4 Bible Online

ಅಪೊಸ್ತಲ 4 - Kodava bible

ಅಪೊಸ್ತಲ 4

¹ಪೇತ್ರ ಪಿಂಞ ಯೋಹಾನ, ಜನಡ ಪಕ್ಕ ಇಂಞು ತಕ್ಕ್ ಪರ್‌ದಂಡ್ ಇಪ್ಪಕ, ಯಾಜಕಂಗ ಪಿಂಞ ದೇವಾಲಯತ್‍ರ ಸೇನೆ ಅದಿಕಾರಿಯ ಪಿಂಞ ಸದ್ದುಕಾಯಂಗ ಅಲ್ಲಿಕ್ ಬಾತ್.

²ಪೇತ್ರ ಪಿಂಞ ಯೋಹಾನ ಜನಕ್, ಯೇಸು ಚಾವ್‍ಯಿಂಜ ಜೀವವಾಯಿತ್ ಬಂದಗುಂಡ್, ಚತ್ತಯಿಂಗ ಪುನಃ ಜೀವವಾಯಿತ್ ಎದ್ದಿತ್ ಬಪ್ಪಾಂದ್ ಬೋದನೆ ಮಾಡ್‌ವಾನ ನೋಟಿತ್, ಅಯಿಂಗಕ್ ಬಾರಿ ಚೆಡಿ ಬಾತ್.

³ಅಯಿಂಗ ಪೇತ್ರ ಪಿಂಞ ಯೋಹಾನನ ಪುಡ್‌ಚಿತ್, ಬಯಿಟಾಯಿತ್ಂಜಗುಂಡ್ ಅಯಿಂಗಳ ಪಿತ್ಯಾಂದ್ ಪೊಲಾಕಕತ್ತನೆ ಜೈಲ್‌ಕ್ ಇಟ್ಟತ್.

⁴ಆಚೇಂಗಿ, ಪೇತ್ರ ಪಿಂಞ ಯೋಹಾನಂಡ ವಾಕ್ಯತ್‍ನ ಕ್‍ೕಟ ದುಂಬ ಜನ ಅದ್‍ನ ನಂಬ್‍ಚಿ. ಆಣಾಳ್‍ವ ಮಾತ್ರ ಸುಮಾರ್ ಅಂಜಾಯಿರಚ್ಚಕ್ ಇಲ್ಲಿಕತ್ತನೆ ಆಚಿ.

⁵ಪಿತ್ಯಾಂದ್ ಯೆಹೂದ್ಯಂಗಡ ಅದಿಕಾರಿಯ, ಪೆರಿಯಯಿಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಎಲ್ಲಾರು ಯೆರೂಸಲೇಮ್‍ಲ್ ಒಟ್ಟ್ ಕೂಡ್‍ಚಿ.

⁶ಅಲ್ಲಿ ಮುಕ್ಯ ಯಾಜಕನಾನ ಅನ್ನಾ, ಕಾಯಫ, ಯೋಹಾನ, ಅಲೆಕ್ಸಾಂದ್ರ ಪಿಂಞ ಮಹಾ ಯಾಜಕಂಡ ಮನೆಕಾರಳು ಇಂಜತ್.

⁷ಈಂಗ, ಪೇತ್ರ ಪಿಂಞ ಯೋಹಾನನ ಅಯಿಂಗಡ ಮದ್ಯತ್‍ಲ್ ನಿಪ್ಪ್‌ಚಿಟ್ಟಿತ್: ನಿಂಗ ಏದ್ ಶಕ್ತಿಲ್, ಅಥವ ದಾಡ ಪೆದತ್‍ಲ್ ಇನ್ನನೆ ಮಾಡಿರಾಂದ್ ಕ್‍ೕಟತ್.

⁸ಅಕ್ಕ ಪೇತ್ರ ಪವಿತ್ರಾತ್ಮತ್‍ಲ್ ದುಂಬಿತ್, ಅಯಿಂಗಳ ನೋಟಿತ್: ಜನಡ ಅದಿಕಾರಿಯಳೇ, ಇಸ್ರಾಯೇಲ್‍ರ ಪೆರಿಯಯಿಂಗಳೇ,

⁹ಇಲ್ಲಿ ಕುಂಟನಾಯಿತ್ಂಜ ಈ ಮನುಷ್ಯಂಗ್ ವಾಸಿಯಾನ ನಲ್ಲ ಕಾರ್ಯತ್‍ರ ವಿಷಯಕಾಯಿತ್ ನಿಂಗ ನಂಗಳ ವಿಚಾರಣೆ ಮಾಡ್‌ವದಾಚೇಂಗಿ,

¹⁰ನಿಂಗಕ್ ಪಿಂಞ ಇಸ್ರಾಯೇಲ್ ಜನ ಎಲ್ಲಾರ್‌ಕು ಅರಿಚಿಡುವದ್ ಎಂತ ಎಣ್ಣ್‌ಚೇಂಗಿ: ನಿಂಗಡಗುಂಡ್ ಶಿಲುಬೇಕ್ ಇಟ್ಟಿತ್ ಪಿಂಞ ದೇವ ಚತ್ತಯಿಂಗಡ ಮದ್ಯತ್ಂಜ ಎಪ್ಪ್‌ನ ನಜರೇತ್‍ರ ಯೇಸು ಕ್ರಿಸ್ತಂಡ ಪೆದತ್ಂಜಲೇ ಈ ಮನುಷ್ಯ ವಾಸಿಯಾಯಿತ್ ನಿಂಗಡ ಮಿಂಞತ್ ನಿಂದಿತುಂಡ್‍ೕಂದ್ ಎಣ್ಣುವೀಂದ್ ಎಣ್ಣ್‌ಚಿ.

¹¹ಮನೆ ಕೆಟ್ಟ್‌ವಯಿಂಗಳಾನ ನಿಂಗ, ಬೋಂಡಾಂದ್ ಚಾಡ್‌ನ ಕಲ್ಲೇ ಮನೆರ ಮೂಲೆ ಕಲ್ಲಾಚಿ.[10]

¹²ಅಂವೊನ ಬುಟ್ಟಿತ್ ಬೋರೆ ದಾರ್‌ಕು ನಂಗಳ ರಕ್ಷಣೆ ಮಾಡ್‌ವಕ್ ಕಯ್ಯುಲೆ. ಬಾನತ್‍ರ ಅಡಿಲ್, ಮನುಷ್ಯಂಗಡ ಮದ್ಯತ್‍ಲ್ ಯೇಸುರ ಪೆದತ್‍ನ ಬುಟ್ಟಿತ್ ಬೋರೆ ಒರ್ ಪೆದವು ನಂಗಡ ರಕ್ಷಣೆಕ್ ಕೊಡ್‍ತಿತ್‌ಲ್ಲೆ.

¹³ಪೇತ್ರ ಪಿಂಞ ಯೋಹಾನ ದೈರ್ಯತ್‍ಲ್ ತಕ್ಕ್ ಪರಿವಾನ ಅಯಿಂಗ ನೋಟಿತ್, ಈಂಗ ವಿದ್ಯ ಇಲ್ಲತಯಿಂಗಳು, ಸಾದಾರಣ ಮನುಷ್ಯಂಗಾಂದು ಗೊತ್ತಾಯಿತ್ ಆಶ್ಚರ್ಯಪಟ್ಟಿತ್, ಈಂಗ ಯೇಸುರ ಕೂಡೆ ಇಂಜಯಿಂಗಾಂದ್ ಅಯಿಂಗಕ್ ಗೊತ್ತಾಚಿ.

¹⁴ವಾಸಿಯಾನ ಆ ಮನುಷ್ಯ, ಪೇತ್ರ ಪಿಂಞ ಯೋಹಾನಂಡ ಪಕ್ಕ ನಿಂದಂಡಿಂಜಗುಂಡ್, ಅಯಿಂಗಕ್ ವಿರೋದವಾಯಿತ್ ಒಂದು ಎಣ್ಣ್‌ವಕ್ ಕಯ್ಯತೆ ಆಚಿ.

¹⁵ಅಕ್ಕ ಅಯಿಂಗಳ ಆ ಸಬೇಯಿಂಜ ಪೊರಮೆ ಪೋಪಕ್ ಅಪ್ಪಣೆ ಕೊಡ್‌ತಿತ್, ಅಯಿಂಗಯಿಂಗಳೇ ಆಲೋಚನೆ ಮಾಡ್‍ಚಿ.

¹⁶ಈ ಮನುಷ್ಯಂಗಳ ನಂಗ ಎಂತ ಮಾಡನ? ಯೆರೂಸಲೇಮ್‍ಲ್ ವಾಸ ಉಳ್ಳ ಎಲ್ಲಾ ಜನಕು ಗೊತ್ತಾಪನೆಕೆ ಒರ್ ಬಲ್ಯ ಅದ್ಬುತ ಕಾರ್ಯತ್‍ನ ಮಾಡಿರ್‌ತ್, ಅದ್‍ನ ಇಲ್ಲೇಂದ್ ನಂಗ ಎಣ್ಣುವಕ್ ಕಯ್ಯುಲೆ.

¹⁷ಆನಗುಂಡ್, ಅಯಿಂಗಡ ಬೋದನೆ ಇಂಞು ಪಬ್ಬತನೆಕೆ, ಯೇಸುರ ವಿಷಯತ್‍ನ ಅಯಿಂಗ ಬೋದನೆ ಮಾಡ್‌ವಕ್ಕಾಗಾಂದ್ ಎಚ್ಚರ ಮಾಡಂಡೂಂದ್ ತೀರ್ಮಾನ ಮಾಡ್‍ಚಿ.

¹⁸ಅಯಿಂಗ ಪೇತ್ರ ಪಿಂಞ ಯೋಹಾನನ ಕಾಕುವಂಜಿ: ಯೇಸುರ ಪೆದತ್‍ಲ್ ಒರ್ ತಕ್ಕು ಪರಿಯುವಕ್ಕಾಗಾಂದ್ ಆಜ್ಞೆ ಕೊಡ್‍ತತ್.

¹⁹ಆಚೇಂಗಿ ಪೇತ್ರ ಪಿಂಞ ಯೋಹಾನ ಅಯಿಂಗಕ್: ದೇವಡ ತಕ್ಕ್‌ಕ್ ಬಗ್ಗಿತ್ ನಡ್‍ಕತೆ ನಿಂಗಡ ತಕ್ಕ್‌ಕ್ ಬಗ್ಗಿತ್ ನಡ್‍ಪದ್ ದೇವಡ ಮಿಂಞತ್ ನ್ಯಾಯವಾಂದ್ ನಿಂಗಳೇ ಗೇನ ಮಾಡಿ.

²⁰ನಂಗ ಕಂಡಾನ, ಕ್‍ೕಟಾನ, ಎಣ್ಣತೆ ಇಪ್ಪಕ್ಕಾಗಾಂದ್ ಉತ್ತರ ಕೊಡ್‍ತತ್.

²¹ಅಲ್ಲಿ ಆನ ಅದ್ಬುತ ಕಾರ್ಯಕಾಯಿತ್ ಜನ ದೇವನ ತುದಿಚಂಡ್ ಇಂಜಗುಂಡ್, ಎನ್ನನೆ ಶಿಕ್ಷೆ ಕೊಡ್‍ಕಂಡೂಂದ್ ಗೊತ್ತಿಲ್ಲತೆ, ಅಯಿಂಗಳ ಇಂಞು ಬೊತ್ತಿಚಿಟ್ಟ್‌ರ್‍ವಂಜಿ ಬುಟ್ಟ್‌ರ್‌ತ್.

²²ಅದ್ಬುತವಾಯಿತ್ ವಾಸಿ ಆನ ಆ ಮನುಷ್ಯಂಗ್ ಸುಮಾರ್ ನಾಪದ್ ವಯಸ್‍ಕ್ ಮೇಲೆ ಆಯಿತ್ಂಜತ್.

²³ಈಂಗ ಬುಡ್‍ಗಡೆ ಆನ ಪಿಂಞ, ಅಯಿಂಗಡ ಸ್ವಂತ ಜನಡ ಪಕ್ಕ ಪೋಯಿತ್, ಮುಕ್ಯ ಯಾಜಕಂಗ ಪಿಂಞ ಪೆರಿಯಯಿಂಗ ಈಂಗಕ್ ಎಣ್ಣ್‌ನದೆಲ್ಲ ಅಯಿಂಗಕ್ ಎಣ್ಣ್‌ಚಿ.

²⁴ಅಯಿಂಗ ಅದ್‍ನ ಕ್‍ೕಟಿತ್, ಒರೇ ಮನಸ್ಸ್‌ಲ್ ದೇವನ ನೋಟಿತ್ ಜೋರಾಯಿತ್ ಪ್ರಾರ್ಥನೆ ಮಾಡ್‍ಚಿ. ಅಕ್ಕ ಅಯಿಂಗ: ಒಡೆಯನೇ, ಬೂಮಿ, ಬಾನ, ಸಮುದ್ರ ಪಿಂಞ ಅದ್‍ಲ್ ಉಳ್ಳ ಎಲ್ಲಾನ ಸೃಷ್ಟಿ ಮಾಡ್‍ನ ದೇವ ನೀನ್.

²⁵ನಂಗಡ ಅಜ್ಜನಾನ ದಾವೀದ ರಾಜನು ನೀಡ ಸೇವಕನುವಾನ ಅಂವೊನಗುಂಡ್ ಪವಿತ್ರಾತ್ಮತ್‍ರ ಮೂಲಕ ನೀನ್: ಯೆಹೂದ್ಯರಲ್ಲತ ಜನ ಎನ್ನಂಗ್ ಚೆಡಿಲ್ ಕಳಿಪ, ಜನ ಎನ್ನಂಗ್ ಕೆಟ್ಟದ್ ಮಾಡ್‌ವಕ್ ಮುಂಡತೆ ಆಲೋಚನೆ ಮಾಡ್‌ವ?

²⁶ಒಡೆಯಂಗ್ ವಿರೋದವಾಯಿತು, ಅಂವೊ ಅಬಿಷೇಕ ಮಾಡ್‍ನಂವೊಂಗ್ ವಿರೋದವಾಯಿತು, ಈ ಲೋಕತ್‍ರ ರಾಜಂಗ ಎದ್ದ್ ನಿಂದಿತ್, ಅದಿಕಾರಿಯಂಗಡ ಕೂಟ ಕೂಡ್‍ಚೀಂದ್ ಎಣ್ಣಿತುಳ್ಳಿಯಲ್ಲ.[11]

²⁷ನೇರಾಯಿತು, ಹೆರೋದ, ಪೊಂತ್ಯ ಪಿಲಾತ, ಯೆಹೂದ್ಯಂಗ ಅಲ್ಲತ ಜನ ಪಿಂಞ ಇಸ್ರಾಯೇಲ್‍ರ ಜನ ಎಲ್ಲಾರು ಈ ಪಟ್ಟಣತ್‍ಲ್ ಕೂಡಿತ್, ನೀನ್ ಅಬಿಷೇಕ ಮಾಡ್‍ನ ನೀಡ ಪವಿತ್ರವಾನ ಸೇವಕನಾನ ಯೇಸುಕ್ ವಿರೋದವಾಯಿತ್ ಕೆಟ್ಟ ಆಲೋಚನೆ ಮಾಡಿತ್ ಬಾತ್.

²⁸ನೀಡ ಅದಿಕಾರತ್ಂಜ, ನೀಡ ಚಿತ್ತತ್‍ರನೆಕೆ ನೀನ್ ತೀರ್ಮಾನ ಮಾಡ್‍ನನೆಕೆ ಅಯಿಂಗ ಇದ್‍ನೆಲ್ಲ ಮಾಡ್‍ಚಿ.

²⁹ಆಚೇಂಗಿ ಇಕ್ಕ ಒಡೆಯನೇ, ಅಯಿಂಗ ನಂಗಳ ಬೊತ್ತ್‌ಚಿಟ್ಟದ್‍ನ ನೀನ್ ನೋಟಿತ್, ನೀಡ ಸೇವಕಂಗಳಾನ ನಂಗಕ್ ನೀಡ ವಾಕ್ಯತ್‍ನ ಬೋದನೆ ಮಾಡ್‌ವಕ್ ದೈರ್ಯ ಕೊಡ್.

³⁰ನೀಡ ಪವಿತ್ರ ಸೇವಕನಾನ ಯೇಸುರ ಪೆದತ್‍ಲ್ ಗುರ್‍ತ್‍ನ ಮಾಡಿತ್, ಆಶ್ಚರ್ಯ ಕಾರ್ಯ ಆಪನೆಕೆ ಮಾಡಿತ್, ಪಿಂಞ ವಾಸಿ ಮಾಡ್‌ವಕಾಯಿತ್ ನೀನ್ ಶಕ್ತಿನ ಕೊಡ್‌ತಿತ್ ಅನುಗ್ರಹ ಮಾಡಂಡೂಂದ್ ಪ್ರಾರ್ಥನೆ ಮಾಡ್‍ಚಿ.

³¹ಇನ್ನನೆ ಅಯಿಂಗ ಪ್ರಾರ್ಥನೆ ಮಾಡ್‌ವಕ, ಅಯಿಂಗ ಕೂಡಿತ್ಂಜ ಜಾಗ ಅಲ್ಲಾಡ್‌ಚಿ. ಅಯಿಂಗ ಎಲ್ಲಾರು ಪವಿತ್ರಾತ್ಮತ್‍ಲ್ ದುಂಬಿತ್ ದೇವಡ ವಾಕ್ಯತ್‍ನ ದೈರ್ಯತ್‍ಲ್ ಎಣ್ಣ್‌ಚಿ.

³²ಯೇಸುನ ನಂಬ್‍ನಯಿಂಗ ಎಲ್ಲಾರು ಒರೇ ಮನಸ್ಸ್‌ಲ್ ಒರೇ ಹೃದಯತ್‍ಲ್ ಬದ್‍ಕಿಯಂಡಿಂಜತ್. ಒಬ್ಬ ಸಹ ತಾಂಡ ವಸ್ತುನ ಅಂವೊಂಗ್ ಮಾತ್ರಾಂದ್ ಎಣ್ಣಿಯಂಡಿಂಜಿಲೆ; ಅಲ್ಲಿ ಉಳ್ಳ ಎಲ್ಲಾನ ಎಲ್ಲಾರ್‌ಕು ಕೂಡನದಾಯಿತ್ಂಜತ್.

³³ಅಪೊಸ್ತಲಂಗ ಒಡೆಯನಾನ ಯೇಸು ಕ್ರಿಸ್ತ ಚಾವ್‍ಯಿಂಜ ಜೀವವಾಯಿತ್ ಬಂದ ವಿಷಯತ್‍ನ ಬಲ್ಯ ಶಕ್ತಿಲ್ ಸಾಕ್ಷಿ ಕೊಡ್‍ತಂಡಿಂಜತ್. ಅಯಿಂಗ ಎಲ್ಲಾಡ ಮೇಲೆ ದೇವಡ ಕೃಪೆ ಪೂರ್ತಿಯಾಯಿತ್ಂಜತ್.

³⁴ಅಯಿಂಗಡ ಮದ್ಯತ್ ಒಬ್ಬಂಗ್ ಸಹ ಏದು ಕಮ್ಮಿಯಾಯಿತ್ಂಜಿಲೆ. ಎನ್ನಂಗೆಣ್ಣ್‌ಚೇಂಗಿ, ಬೇಲ್ ಪಿಂಞ ಮನೆ ಇಂಜಯಿಂಗ ಬೋಂಡುವಕತ್ತನೆ ಮಾರ್‌ವಂಜಿ ಅದ್ಂಡ ಪಣತ್‍ನ ಅಕ್ಕಕ್ಕ ಕೊಂಡ್‌ಬಂತ್,

³⁵ಅದ್‍ನ ಅಪೊಸ್ತಲಂಗಡ ಕಾಲ್‍ರ ಅಡಿಕ್ ಬೆಚ್ಚತ್. ಪಿಂಞ ಅಪೊಸ್ತಲಂಗ ಅದ್‍ನ ಪ್ರತಿ ಒಬ್ಬಂಗ್ ಎಚ್ಚಕ್ ಅವಸ್ಯ ಇಂಜತೋ ಅಚ್ಚಕ್ ಪಾಲ್ ಮಾಡಿ ಕೊಡ್‍ತಂಡಿಂಜತ್.

³⁶ಇನ್ನನೆ ಮಾಡಿಯಂಡ್ ಉಳ್ಳಯಿಂಗಡಡೆ‍ಲ್ ಕುಪ್ರ ದೇಶತ್ಂಜ ಬಂದ ಲೇವಿಯ ಕುಲಕ್ ಕೂಡ್‍ನ ಒಬ್ಬನು, ಒತ್ತಾಸೆ ಮಾಡ್‌ವಂವೋಂದ್ ಅಪೊಸ್ತಲಂಗ ಕಾಕ್‍ನ ಬಾರ್ನಬ ಎಣ್ಣುವ ಪೆದ ಉಳ್ಳ ಯೋಸೇಫ,

³⁷ಅಂವೊಂಗ್ ಇಂಜ ಜಾಗತ್‍ಲ್ ಚೆನ್ನ ಮಾರಿತ್ ಅದ್ಂಡ ಪಣತ್‍ನ ಅಪೊಸ್ತಲಂಗಡ ಕಾಲ್‍ರ ಅಡಿಕ್ ಬೆಚ್ಚತ್.