Read Kodava ಅಪೊಸ್ತಲ 7 Bible Online

ಅಪೊಸ್ತಲ 7 - Kodava bible

ಅಪೊಸ್ತಲ 7

¹ಅಕ್ಕ ಮಹಾ ಯಾಜಕ ಸ್ತೆಫನನ ನೋಟಿತ್: ಈ ವಿಷಯವೆಲ್ಲ ನೇರಾಂದ್ ಕ್‍ೕಟತ್.

²ಅದ್ಂಗ್ ಸ್ತೆಫನ: ಅಣ್ಣತಮ್ಮಣಂಗಳೇ, ಪೆರಿಯಯಿಂಗಳೇ, ನಾನ್ ಎಣ್ಣ್‌ವಾನ ಕ್‍ೕಳಿ. ನಂಗಡ ಅಜ್ಜನಾನ ಅಬ್ರಹಾಮ ಖಾರಾನ ಎಣ್ಣ್‌ವ ಊರ್‌ಲ್ ಬಂದಿತ್ ವಾಸ ಮಾಡ್‌ವಕ್ ಮಿಂಞ, ಅಂವೊ ಮೆಸೊಪೊತಾಮ್ಯ ನಾಡ್‍ಲ್ ಇಪ್ಪಕಲೆ ಮಹಿಮೇರ ದೇವ ಅಂವೊಂಗ್ ಪ್ರತ್ಯಕ್ಷ ಆಚಿ.

³ದೇವ ಅಂವೊಂಗ್: ನೀನ್ ನೀಡ ಸ್ವಂತ ದೇಶತ್‍ನ ಪಿಂಞ ನೀಡ ಬೆಂದ್‍ವಳ ಬುಟ್ಟಿತ್ ನಾನ್ ಕಾಟ್‍ವ ದೇಶಕ್ ಪೊರಟಿತ್ ಪೋಂದ್ ಎಣ್ಣ್‌ಚಿ.[14]

⁴ಅಕ್ಕ, ಅಬ್ರಹಾಮ ಕಲ್ದೀಯ ಎಣ್ಣ್‌ವ ದೇಶತ್‍ನ ಬುಟ್ಟಿತ್, ಖಾರಾನ ಎಣ್ಣ್‌ವ ಊರ್‌ಲ್ ಅಂವೊಂಡ ಅಪ್ಪ ಚಾವಕತ್ತನೆ ವಾಸ ಇಂಜತ್. ಬಯ್ಯ, ದೇವ ಅಂವೊನ ಅಲ್ಲಿಂಜ, ನಿಂಗ ಇಕ್ಕ ಉಳ್ಳ ಈ ದೇಶಕ್ ಬಪ್ಪನೆಕೆ ಮಾಡ್‍ಚಿ.

⁵ಆಚೇಂಗಿ, ಅಲ್ಲಿಕತ್ತನೆ ದೇವ ಅಂವೊಂಗ್ ಕಾಲಿಡ್‍ವಚ್ಚಕ್ ಬೂಮಿನ ಸಹ ಸ್ವಂತವಾಯಿತ್ ಈ ಜಾಗತ್‍ಲ್ ಕೊಡ್‍ತಿತ್‌ಲ್ಲೆ. ಅಂವೊಂಗ್ ಮಕ್ಕ ದಾರೂ ಇಲ್ಲತಿಪ್ಪಕಲೇ: ಈ ದೇಶತ್‍ನ ನೀಕ್, ನೀಡ ಬಯ್ಯ ಬಪ್ಪಕುಳ್ಳ ನೀಡ ಸಂತಾನಕ್ ಸ್ವಂತವಾಯಿತ್ ತಪ್ಪೀಂದ್ ಅಂವೊಂಗ್ ವಾಗ್ದಾನ ಮಾಡ್‍ಚಿ.

⁶ದೇವ ಅಂವೊನ ನೋಟಿತ್: ನೀಡ ಸಂತಾನಕಾರ ಬೋರೆ ದೇಶತ್‍ಲ್ ಪರದೇಶಿಯರನೆಕೆ ವಾಸ ಮಾಡ್‌ವ. ಅಲ್ಲಿ ಅಯಿಂಗ ನಾನೂರ್ ಕಾಲ ಅಯಿಂಗಳ ಅಡಿಮೆಯಾಯಿತ್ ಕಷ್ಟಪಡ್‍ತ್‌ವ.

⁷ಆಚೇಂಗಿ, ಅಯಿಂಗಳ ಅಡಿಮೆಯಾಯಿತ್ ನಡ್‍ತ್‍ನಯಿಂಗಕ್ ನಾನ್ ಶಿಕ್ಷೆ ತಪ್ಪಿ. ಬಯ್ಯ, ಅಯಿಂಗ ಆ ದೇಶತ್ಂಜ ಪೊರಟಿತ್ ಈ ಜಾಗತ್‍ಲ್ ನನ್ನ ಆರಾದನೆ ಮಾಡ್‌ವಾಂದ್ ಎಣ್ಣ್‌ಚಿ.[15]

⁸ಇಂಞು ದೇವ ಅಂವೊಂಡ ಕೂಡೆ ಮಾಡ್‍ನ ಒಪ್ಪಂದತ್‍ರ ಗುರ್‌ತಾಯಿತ್ ಆಣಾಳ್‌ಕ್ ಸುನ್ನತಿನ ಎಣ್ಣ್‌ಚಿ. ಅನ್ನನೆ ಅಬ್ರಹಾಮ, ಇಸಾಕಂಡ ಅಪ್ಪನಾಚಿ, ಪಿಂಞ ಅಂವೊ ಪುಟ್ಟ್‌ನ ಎಟ್ಟನೆ ದಿವಸತ್‍ಲ್ ಅಂವೊಂಗ್ ಸುನ್ನತಿ ಮಾಡ್‍ಚಿ. ಇಸಾಕ ಯಾಕೋಬಂಗ್, ಯಾಕೋಬ ಇಸ್ರಾಯೇಲ್ ದೇಶತ್‍ರ ಪನ್ನೆರಂಡ್ ಗೋತ್ರತ್‍ರ ಮುತ್ತಜ್ಜಂಗಕ್ ಅನ್ನನೆ ಮಾಡ್‍ಚಿ.

⁹ಆ ಗೋತ್ರತ್‍ರ ಮುತ್ತಜ್ಜಂಗ ಅಯಿಂಗಡ ಎಳಿಯ ತಮ್ಮಣನಾನ ಯೋಸೇಫಂಡ ಮೇಲೆ ಒಟ್ಟೆಕಿಚ್ಚ್ ಪಟ್ಟಿತ್, ಯೋಸೇಫನ ಐಗುಪ್ತ ದೇಶಕ್ ಅಡಿಮೆಯಾಯಿತ್ ಮಾರಿರ್‌ತ್. ಆಚೇಂಗಿ ದೇವ ಅಂವೊಂಡ ಕೂಡೆ ಇಂಜತ್.

¹⁰ಅಂವೊಂಗ್ ಬಂದ ಕಷ್ಟತ್ಂಜ ಬುಡ್‌ತಿತ್ ಐಗುಪ್ತ ದೇಶತ್‍ರ ರಾಜನಾನ ಫರೋಹನಂಡ ಮಿಂಞ ಅಂವೊಂಗ್ ನಲ್ಲರೆಕೆಯು ಜ್ಞಾನವು ಕೊಡ್‌ತಿತ್ ಆಶೀರ್ವಾದ ಮಾಡ್‍ಚಿ. ಫರೋಹನ ಅಂವೊನ ಐಗುಪ್ತ ದೇಶಕ್ ಪಿಂಞ ತಾಂಡ ಅರಮನೆಕ್ ಅದಿಕಾರಿಯಾಯಿತ್ ನೇಮಿಚಿಟ್ಟತ್.

¹¹ಚೆನ್ನ ಕಾಲ ಆನ ಪಿಂಞ, ಐಗುಪ್ತ ಪಿಂಞ ಕಾನಾನ್ ದೇಶತ್‍ಲ್ ಬರಗಾಲ ಬಾತ್. ಅನ್ನನೆ ಬಲ್ಯ ಕಷ್ಟ ಆಯಿತ್, ನಂಗಡ ಮುತ್ತಜ್ಜಂಗಕ್ ಆಹಾರ ಕ್‍ಟ್ಟಿತ್ತ್‌ಲ್ಲೆ.

¹²ಆಚೇಂಗಿ ಐಗುಪ್ತತ್‍ಲ್ ಮಾತ್ರ ಆಹಾರ ಉಂಡ್‍ೕಂದ್ ಯಾಕೋಬಂಗ್ ಗೊತ್ತಾನಗುಂಡ್, ಅಂವೊಂಡ ಮೋನಿಯಂಗಳಾನ ನಂಗಡ ಮುತ್ತಜ್ಜಂಗಳ ಆದ್ಯವಾಯಿತ್ ಅಯಿಚತ್.

¹³ದಂಡನೆ ಕುರಿ ಅಯಿಂಗ ಪೋಪಕ, ಯೋಸೇಫ ತಾಂಡ ಅಣ್ಣತಮ್ಮಣಂಗಕ್ ಅಂವೊ ದಾರ್‍ೕಂದ್ ಕಾಂಬ್‍ಚಿಟ್ಟತ್. ಪಿಂಞ ಯೋಸೇಫಂಡ ಕುಲ ಫರೋಹನಂಗ್ ಗೊತ್ತಾಚಿ.

¹⁴ಪಿಂಞ ಯೋಸೇಫ ತಾಂಡ ಅಪ್ಪನಾನ ಯಾಕೋಬಂಗ್, ತಾಂಡ ಎಲ್ಲಾ ಬೆಂದ್‍ವಳ ಕೂಟಿತ್ ಎಳ್‍ವತಂಜಿ ಜನಳ ಐಗುಪ್ತ ದೇಶಕ್ ಕಾಕಿಯಂಡ್ ಬಪ್ಪಕ್ ಸುದ್ದಿ ಅಯಿಚತ್.

¹⁵ಅನ್ನನೆ ಯಾಕೋಬ ಐಗುಪ್ತ ದೇಶಕ್ ಪೋಚಿ. ಅಲ್ಲಿ ಅಂವೊನು ಅಂವೊಂಡ ಮೋನಿಯಂಗಳಾನ ನಂಗಡ ಮುತ್ತಜ್ಜಂಗಳು ಅಲ್ಲಿಯೇ ಚತ್ತ್ ಪೋಚಿ.

¹⁶ಅಯಿಂಗಡ ಚಾವ್ ತಡೀನ ಶೇಕೆಮ ಎಣ್ಣುವ ಊರ್‌ಕ್ ಎಡ್‌ತ ಪೋಯಿತ್, ಅಬ್ರಹಾಮ ಹಮೋರನಂಡ ಮೋನಿಯಂಗಡಿಂಜ ಬೊಳ್ಳಿರ ದುಡ್ಡ್‌ಕ್ ಎಡ್‌ತ ಗೋರಿರ ಒಳ್‍ಲ್ ಬೆಚ್ಚತ್.

¹⁷ದೇವ ಅಬ್ರಹಾಮಂಗ್ ಮಾಡ್‍ನ ವಾಗ್ದಾನ ನೆರೆವೇರುವ ಸಮಯ ಪಕ್ಕ ಬಪ್ಪಕ, ನಂಗಡ ಜನಾಂಗಡ ಸಂಖ್ಯೆ ಐಗುಪ್ತ ದೇಶತ್‍ಲ್ ದುಂಬ ಆಚಿ.

¹⁸ಯೋಸೇಫನ ಗೊತ್ತಿಲ್ಲತೆ ಒರ್ ರಾಜ ಐಗುಪ್ತ ದೇಶತ್‍ಲ್ ಬಪ್ಪಕತ್ತನೆ ಅನ್ನನೆ ಆಚಿ.

¹⁹ಈ ರಾಜ ನಂಗಡ ಜನಳ ವಂಚನೆಯಿಂಜ ನಡ್‍ತಿತ್, ನಂಗಡ ಮುತ್ತಜ್ಜಂಗಕ್ ಪುಟ್ಟ್‌ವ ಕುಂಞಿಯಳ ಜೀವವಾಯಿತ್ ಇಕ್ಕತನೆಕೆ, ಅಯಿಂಗ ಕುಂಞಿಯಳ ಚಾಡ್‌ವನೆಕೆ ಮಾಡಿತ್ ಅಯಿಂಗಳ ಕ್ರೂರವಾಯಿತ್ ನಡ್‍ತ್‍ಚಿ.

²⁰ಆ ಸಮಯತ್‍ಲ್ ಮೋಶೆ ಪುಟ್ಟ್‌ಚಿ. ಅಂವೊ ಬಾರಿ ಚಾಯಿ ಕುಂಞಿಯಾಯಿತ್‌ಂಜತ್. ಆ ಕುಂಞಿನ ಅಂವೊಂಡ ಅಪ್ಪಂಡ ಮನೆಲ್ ಬರಿ ಮೂಂದ್ ತಿಂಗ ಮಾತ್ರ ಚಾಕ್‌ವಕಿಂಜತ್.

²¹ಅಯಿಂಗ ಅಂವೊನ ಪೊರಮೆ ಇಡ್‍ವಕ, ಫರೋಹನಂಡ ಮೋವ ಅಂವೊನ ಎಡ್‍ತಿತ್ ತಾಂಡ ಮೋಂವೊನಾಯಿತ್ ಚಾಕ್‍ಚಿ.

²²ಮೋಶೇಕ್ ಐಗುಪ್ತ ದೇಶತಯಿಂಗಡ ಎಲ್ಲಾ ಜ್ಞಾನತ್‍ನ ಪಡಿಪ್‍ಚಿಟ್ಟಿತ್, ಅಂವೊ ಪರಿಯುವ ತಕ್ಕ್‌ಲ್ ಪಿಂಞ ಮಾಡ್‌ವ ಕಾರ್ಯತ್‍ಲ್ ಶಕ್ತಿವಂತಂವೊನಾಚಿ.

²³ಮೋಶೇಕ್ ನಾಪದ್ ವಯಸ್ ಆಪಕ, ತಾಂಡ ಅಣ್ಣತಮ್ಮಣಂಗಳಾನ ಇಸ್ರಾಯೇಲ್ ಜನಳ ನೋಟಂಡೂಂದ್ ಅಂವೊಂಡ ಹೃದಯತ್‍ಲ್ ಗೇನ ಬಾತ್.

²⁴ಅಕ್ಕ ಐಗುಪ್ತ ದೇಶಕ್ ಕೂಡ್‍ನ ಒಬ್ಬ ಇಸ್ರಾಯೇಲ್ ಕುಲಕ್ ಕೂಡ್‍ನ ಇಂಞೊಬ್ಬನ ಅನ್ಯಾಯವಾಯಿತ್ ನಡ್‍ತಿಯಂಡಿಪ್ಪದ್‍ನ ಮೋಶೆ ಕಾಂಬಕ, ಅಂವೊಂಗ್ ಸಹಾಯ ಮಾಡ್‌ವಕಾಯಿತ್, ಐಗುಪ್ತ ಮನುಷ್ಯನ ಕೊಂದಿತ್ ಇಸ್ರಾಯೇಲ್ ಮನುಷ್ಯಂಗ್ ನ್ಯಾಯ ಕೊಡ್‍ತತ್.

²⁵ತಾಂಡ ಮೂಲಕ ಇಸ್ರಾಯೇಲ್ ಜನಕ್ ರಕ್ಷಣೆ ಕ್‍ಟ್ಟ್‌ವಕಾಯಿತ್ ದೇವ ಅಂವೊನ ಅಯಿಚತ್‍ೕಂದ್ ಅಯಿಂಗಕ್ ಗೊತ್ತಾಪಾಂದ್ ಅಂವೊ ಗೇನ ಮಾಡ್‍ಚಿ. ಆಚೇಂಗಿ ಅಯಿಂಗಕ್ ಅದ್ ಗೊತ್ತಾಯಿತ್‌ಲ್ಲೆ.

²⁶ಪಿತ್ಯಾಂದ್ ದಂಡ್ ಇಸ್ರಾಯೇಲ್ ಮನುಷ್ಯಂಗ ಜಗಳ ಮಾಡಿಯಂಡಿಪ್ಪಾನ ಕಂಡಿತ್, ಅಯಿಂಗಳ ಸಮಾದಾನ ಮಾಡ್‌ವಕ್ ಗೇನ ಮಾಡ್‍ಚಿ. ಅಂವೊ: ಜನಳೇ, ನಿಂಗ ದಂಡಾಳು ಅಣ್ಣತಮ್ಮಣಂಗಳಾಯಿತುಳ್ಳಿರ, ಪಿಂಞ ಎನ್ನಂಗ್ ಇನ್ನನೆ ಜಗಳ ಮಾಡ್‌ವಿರಾಂದ್ ಕ್‍ೕಟತ್.

²⁷ಆಚೇಂಗಿ ತಪ್ಪ್ ಮಾಡ್‍ನಂವೊ ಮೋಶೇನ ಆಬರಿಕ್ ತಳ್ಳಿತ್: ನಿನ್ನ ನಂಗಕ್ ಅದಿಕಾರಿಯಾಯಿತು, ನ್ಯಾಯಾದಿಪತಿಯಾಯಿತು ಮಾಡ್‍ನಂವೊ ದಾರ್?

²⁸ನಿನ್ನಾಂದ್ ಆ ಐಗುಪ್ತ ಮನುಷ್ಯನ ಕೊಂದನೆಕೆ ನನ್ನ ಸಹ ಕೊಲ್ಲ್‌ವಿಯಾಂದ್ ಕ್‍ೕಟತ್.[16]

²⁹ಮೋಶೆ ಈ ತಕ್ಕ್‌ನ ಕ್‍ೕಟಿತ್ ಓಡಿ ಪೋಯಿತ್, ಮಿದ್ಯಾನ್ ಎಣ್ಣುವ ದೇಶತ್‍ಲ್ ಪರದೇಶಿಯಾಯಿತ್ ವಾಸಮಾಡ್‍ಚಿ. ಅಲ್ಲಿ ಅಂವೊಂಗ್ ಮಂಗಲ ಆಯಿತ್ ದಂಡ್ ಕ್‍ಣ್ಣ ಮಕ್ಕ ಪುಟ್ಟ್‌ಚಿ.

³⁰ನಾಪದ್ ಕಾಲ ಕಯಿಂಜ ಪಿಂಞ ಸೀನಾಯಿ ಕುಂದ್‌ರ ಪಕ್ಕ ಮಣಬೂಮಿಲ್, ಒರ್ ದೇವದೂತ, ಮೋಶೇಕ್ ಕತ್ತಿಯಂಡಿಪ್ಪ ಮುಳ್ಳ್‌ರ ಪೊದೆಲ್ ಅಂವೊನ ಕಾಂಬ್‌ಚಿಟ್ಟಂಡತ್.

³¹ಮೋಶೆ ಅದ್‍ನ ಕಂಡಿತ್ ಆಶ್ಚರ್ಯಪಟ್ಟಿತ್, ಅದ್‍ನ ಕಾಂಬಕಾಯಿತ್ ಅದ್ಂಡ ಪಕ್ಕ ಪೋಪಕಾಪಕ, ಒಡೆಯ ತಕ್ಕ್ ಪರಿವಾನ ಮೋಶೆ ಕ್‍ೕಟತ್.

³²ನಾನ್ ನೀಡ ಮುತ್ತಜ್ಜಂಗಳಾನ ಅಬ್ರಹಾಮ, ಇಸಾಕ ಪಿಂಞ ಯಾಕೋಬಂಡ ದೇವಾಂದ್ ಎಣ್ಣ್‌ಚಿ. ಅಕ್ಕ ಮೋಶೆ ಪೋಡಿಲ್ ನಡ್‍ಗಿತ್, ಆ ಪೊದೆರ ಪಕ್ಕ ಪೋಪಕ್ ದೈರ್ಯ ಇಲ್ಲತಂವೊನಾಯಿತ್‌ಂಜತ್.[17]

³³ಅಕ್ಕ ಒಡೆಯ ಅಂವೊನ ನೋಟಿತ್: ನೀಡ ಕಾಲ್‌ಲ್ ಉಳ್ಳ ಎಕ್ಕಡತ್‌ನ ಉತ್ತ್; ನೀನ್ ನಿಂದಿತುಳ್ಳ ಜಾಗ ಪವಿತ್ರವಾನ ಬೂಮಿ.

³⁴ಐಗುಪ್ತ ದೇಶತ್‍ಲ್ ಉಳ್ಳ ನಾಡ ಜನಕ್ ಆಪ ಅನ್ಯಾಯತ್‍ನ ನಾನ್ ಕಂಡಿಯೆ. ಅಯಿಂಗಡ ಗೋಳಾಟ ನಾಕ್ ಕ್‍ೕಟತ್, ಅಯಿಂಗಳ ಬುಡ್‍ಗಡೆ ಮಾಡ್‌ವಕಾಯಿತ್ ಇಳಿಂಜಿ ಬಂದಿಯೆ; ಇಕ್ಕ ನೀನ್ ಬಾ, ನಾನ್ ನಿನ್ನ ಪುನಃ ಐಗುಪ್ತ ದೇಶಕ್ ಅಯಿಪೀಂದ್ ಎಣ್ಣ್‌ಚಿ.[18]

³⁵ನಿನ್ನ ನಂಗಕ್ ಅದಿಕಾರಿಯಾಯಿತು, ನ್ಯಾಯಾದಿಪತಿಯಾಯಿತು ಮಾಡ್‍ನಂವೊ ದಾರ್‍ೕಂದ್ ಕ್‍ೕಟಿತ್, ನಂಗಕ್ ನೀನ್ ಬೋಂಡಾಂದ್ ದಾರ್ ಎಣ್ಣ್‌ಚೋ, ಅಯಿಂಗಕೇ ಈ ಮೋಶೇನ ಅಯಿಂಗಡ ಅದಿಪತಿಯಾಯಿತು, ಅಯಿಂಗಳ ಬುಡ್‍ಗಡೆ ಮಾಡ್‍ವಂವೊನಾಯಿತು, ಪೊದೆಲ್ ಪ್ರತ್ಯಕ್ಷ ಆನ ದೇವದೂತಂಡ ಮೂಲಕ ನೇಮಿಚಿಟ್ಟತ್.

³⁶ಇಂವೊನೇ ಅಯಿಂಗಳ ಐಗುಪ್ತ ದೇಶತ್ಂಜ ಪೊರಮೆ ಕಾಕಿಯಂಡ್ ಬಂದಂವೊ. ಇಂವೊ, ಐಗುಪ್ತ ದೇಶತ್‍ಲ್, ಚೋಂದ ಸಮುದ್ರತ್‍ರ ಪಕ್ಕ ಪಿಂಞ ನಾಪದ್ ಕಾಲವಾಯಿತ್ ಮಣಬೂಮಿಲ್ ಆಶ್ಚರ್ಯ ಪಿಂಞ ಗುರ್‌ತ್ ಕಾರ್ಯತ್‍ನ ಮಾಡಿತ್ ಅಯಿಂಗಳ ನಡ್‍ತಿಯಂಡ್ ಬಾತ್.

³⁷ನಿಂಗಡ ದೇವನಾನ ಒಡೆಯ ನಿಂಗಡ ಮದ್ಯತ್ಂಜ ನಾಡನೆಕೆ ಒರ್ ಪ್ರವಾದಿನ ನಿಂಗಕಾಯಿತ್ ಕೊಂಡ್ ಬಪ್ಪಾಂದ್ ಇಸ್ರಾಯೇಲ್ ಜನಕ್ ಎಣ್ಣ್‌ನ ಮೋಶೆ ಇಂವೊನೇ.[19]

³⁸ಸೀನಾಯಿ ಕುಂದ್‍ಲ್ ತಾಂಡಕೂಡೆ ತಕ್ಕ್ ಪರ್ಂದ ದೇವದೂತಂಡ ಕೂಡೆ, ಮಣಬೂಮಿಲ್ ನಂಗಡ ಮುತ್ತಜ್ಜಂಗಡ ಕೂಡೆ ಸಬೇಲ್ ಇಂಜಂವೊನು, ಜೀವತ್‍ರ ತಕ್ಕ್‌ನ ನಂಗಡ ಪಕ್ಕ ಕೊಡ್‍ಪಕ್ ಅದ್‍ನ ಪಡ್ಂದಂವೊನು ಇಂವೊನೇ.

³⁹ಆಚೇಂಗಿ ನಂಗಡ ಮುತ್ತಜ್ಜಂಗಕ್ ಇಂವೊಂಡ ತಕ್ಕ್‌ನ ಕ್‍ೕಪಕ್ ಮನಸ್ಸ್ ಇಂಜಿತ್‌ಲ್ಲೆ. ಇಂವೊನ ತಿರಸ್ಕಾರ ಮಾಡಿತ್, ಐಗುಪ್ತ ದೇಶಕ್ಕೇ ಪುನಃ ಪೋಪಕ್ ಅಯಿಂಗ ಕುಶಿಪಟ್ಟತ್.

⁴⁰ಅಯಿಂಗ ಅರೋನನ ನೋಟಿತ್: ನಂಗಳ ಐಗುಪ್ತ ದೇಶತ್ಂಜ ಕಾಕಿಯಂಡ್ ಬಂದ ಮೋಶೇಕ್ ಎಂತ ಆಚೀಂದ್ ಗೊತ್ತ್‌ಲ್ಲೆ. ಆನಗುಂಡ್ ನಂಗ ಮಿಂಞ ಪೋಪಕ್ ಬಟ್ಟೆ ಕಾಟಿತಪ್ಪಕ್ ದೇವಳ ಮಾಡಿತ್ ತಾಂದ್ ಕ್‍ೕಟತ್.[20]

⁴¹ಅಕ್ಕ ಅಯಿಂಗ ಒರ್ ಕಡ್‍ಚಿರ ವಿಗ್ರಹತ್‍ನ ಮಾಡಿತ್, ಆ ವಿಗ್ರಹಕ್ ಬಲಿ ಕೊಡ್‌ತಿತ್, ಅಯಿಂಗ ಅನ್ನನೆ ಮಾಡ್‍ನಂಗಾಯಿತ್ ಕುಶೀಲ್ ಕಳಿಚತ್.

⁴²ಅಕ್ಕ ದೇವ ಅಯಿಂಗಳ ದೂರಮಾಡಿತ್ ಬಾನತ್‍ರ ಸೂರ್ಯ ಚಂದ್ರ ನಕ್ಷತ್ರತ್‍ನ ಆರಾದನೆ ಮಾಡ್‌ವಕ್ ಅಯಿಂಗಳ ಒಪ್ಪ್‌ಚಿಟ್ಟತ್. ಆ ವಿಷಯತ್ ಪ್ರವಾದಿಯಂಗಡ ಪುಸ್ತಕತ್‍ಲ್ ಇನ್ನನೆ ಒಳ್‍ದಿ ಬೆಚ್ಚಿತ್ ಉಂಡ್: ಓ ಇಸ್ರಾಯೇಲ್ ವಂಶತ್‍ರ ಜನಳೇ, ನಿಂಗ ಮಣಬೂಮಿಲ್ ಇಂಜ ನಾಪ್ಪದ್ ಕಾಲಕತ್ತನೆ, ಕಾಣಿಕೆಯು, ಬಲಿಯು ನಾಕ್ ಅರ್ಪಿಚಿಟ್ಟಿರಾಂದ್,

⁴³ಪಿಂಞ ಆರಾದನೆ ಮಾಡ್‌ವಕಾಯಿತ್ ನಿಂಗ ಮಾಡ್‍ನ ವಿಗ್ರಹವಾನ ಮೊಲೋಖಂಡ ಗುಡಾರತ್‍ನ, ನಿಂಗಡ ದೇವಳಾನ ರೊಂಫಾ ಎಣ್ಣುವ ನಕ್ಷತ್ರ ವಿಗ್ರಹತ್‍ನ ಪೊರ್‍ತಂಡ್ ಪೋಯಿರಲ್ಲ. ಆನಗುಂಡ್ ನಾನ್ ಬಾಬೇಲ್ ಎಣ್ಣ್‌ವ ರಾಜ್ಯತ್‍ರ ಆಬರಿಕ್ ನಿಂಗಳ ದೌತ್‍ವಿ.[21]

⁴⁴ಇಂಞು, ನೀಕ್ ನಾನ್ ಕಾಂಬ್‌ಚಿಟ್ಟನೆಕೆ, ನಾಡ ಗುಡಾರತ್‍ನ ಮಾಡ್‍ೕಂದ್ ಮೋಶೇಕ್ ಎಣ್ಣ್‌ವ ದೇವಡ ಪ್ರಸನ್ನತ್‍ರ ಗುಡಾರತ್‍ನ, ನಂಗಡ ಮುತ್ತಜ್ಜಂಗ ಅಯಿಂಗಡ ಕೂಡೆ ಮಣಬೂಮಿಲ್ ಪೊರ್‍ತಂಡ್ ಪೋಚಿ.

⁴⁵ಅದಲ್ಲತೆ, ಯೆಹೋಶುವಂಡ ಕೂಡೆ ನಂಗಡ ಮುತ್ತಜ್ಜಂಗ ದೇವಡ ಸಾಕ್ಷಿ ಗುಡಾರತ್‍ನ ಪಡ್ಂದಿತ್, ದೇವ ಅಯಿಂಗಕಾಯಿತ್, ಕಾನಾನ್ ದೇಶತ್‍ಲ್ ಇಂಜ ಜನತ್‍ನ ದೌತ್‍ವಕ, ಆ ದೇಶತ್‍ನ ಅಯಿಂಗಡ ಸ್ವಂತ ದೇಶವಾಯಿತ್ ಮಾಡಿತ್, ದಾವೀದ ರಾಜಂಡ ಕಾಲಕತ್ತನೆ ಅಲ್ಲೇ ಬೆಚ್ಚಿತ್ಂಜತ್.

⁴⁶ದಾವೀದಂಗ್ ದೇವಡ ಕೃಪೆ ಕ್‍ಟ್ಟಿತ್, ಯಾಕೋಬಂಡ ದೇವಕ್ ಒರ್ ವಾಸ ಮಾಡ್‌ವ ಜಾಗತ್‍ನ ಕೆಟ್ಟ್‌ವಕ್ ದೇವಡ ಪಕ್ಕ ಬೋಡ್‍ಚಿ.

⁴⁷ಆಚೇಂಗಿ ಸೊಲೊಮೋನ ಅಂವೊಂಗ್ ಒರ್ ದೇವಾಲಯತ್‍ನ ಕೆಟ್ಟ್‌ಚಿ.

⁴⁸ಆಚೇಂಗಿಯು, ದೇವಾದಿ ದೇವ, ಮನುಷ್ಯ ಕೆಟ್ಟ್‌ನ ದೇವಾಲಯತ್‍ಲ್ ವಾಸ ಮಾಡುಲೆ.

⁴⁹ಪರಲೋಕ ನಾಡ ಸಿಂಹಾಸನ. ಬೂಮಿ ನಾಡ ಪಲೆಯ[22]. ಅನ್ನನೆ ಇಪ್ಪಕ, ನಿಂಗ ಎನ್ನನೆ ನಾಕ್ ದೇವಾಲಯತ್‍ನ ಕೆಟ್ಟ್‌ವಿರ? ಇಲ್ಲೆ, ನಾನ್ ವಾಸ ಮಾಡ್‌ವಕ್ ತಕ್ಕ ಜಾಗ ಏದ್?

⁵⁰ಇದ್‍ನೆಲ್ಲ ನಾಡ ಕೈ ಸೃಷ್ಟಿ ಮಾಡ್‍ಚಲ್ಲಾಂದ್ ಒಡೆಯ ಎಣ್ಣಿಯಂಡುಂಡ್‍ೕಂದ್ ಪ್ರವಾದಿ ಎಣ್ಣಿತುಂಡಲ್ಲ.[23]

⁵¹ಹಟಮಾರಿ ಜನಳೇ, ನಿಂಗಡ ಹೃದಯ ಎಚ್ಚಕ್ ಕಲ್ಲಾಯಿತಿಕ್ಕು! ದೇವಡ ತಕ್ಕ್‌ಕ್ ನಿಂಗ ಎಚ್ಚಕ್ ಕಿವ್‌ಡಂಗಳಾಯಿತ್ ಉಳ್ಳಿರ! ನಿಂಗಳು ನಿಂಗಡ ಅಜ್ಜಂಗಡನೆಕೆ ಪವಿತ್ರಾತ್ಮಂಗ್ ವಿರೋದವಾಯಿತ್ ಜಗಳ ಮಾಡಿಯಂಡುಳ್ಳಿರ.

⁵²ನಿಂಗಡ ಮುತ್ತಜ್ಜಂಗ ಏದ್ ಪ್ರವಾದಿಕ್ ಹಿಂಸೆ ಕೊಡ್‍ಕತೆ ಇಂಜತ್? ನೀತಿವಂತಂವೊ ಒಬ್ಬ ಬಪ್ಪಾಂದ್ ಎಣ್ಣಿಯಂಡಿಂಜ ಪ್ರವಾದಿಯಳ ಸಹ ಕೊಲೆ ಮಾಡ್‍ಚಿ. ಇಕ್ಕ, ನಿಂಗ ಅನ್ನನೆ ಬಂದಂವೊನ ಪುಡ್‌ಚಿತ್ ಕೊಲ್ಲ್‌ವಕ್ ಒಪ್ಪ್‌ಚಿಡ್‌ವಕ, ಅದ್ಂಗ್ ನಿಂಗ ಪಾಲ್‍ದಾರಂಗಳಾಯಿತುಳ್ಳಿರ.

⁵³ದೇವದೂತನಗುಂಡ್ ನಿಂಗ ನ್ಯಾಯಪ್ರಮಾಣ ಪಡ್ಂದಯಿಂಗಳಾಯಿತ್ ಇಂಜತೇಂಗಿಯು, ಅದ್ಂಡ ಪ್ರಕಾರ ಮಾಡಿಯಂಡ್ ಇಲ್ಲೇಂದ್ ಸ್ತೆಫನ ಎಣ್ಣ್‌ಚಿ.

⁵⁴ಈ ತಕ್ಕ್‌ನೆಲ್ಲಾ ಅಯಿಂಗ ಕ್‍ೕಟದು, ಅಯಿಂಗಕೆಲ್ಲ ದುಂಬ ಚೆಡಿ ಬಂತ್ ಅಂವೊನ ನೋಟಿತ್ ಅಯಿಂಗಡ ಪಲ್ಲ್‌ನ ಕಡಿಚತ್.

⁵⁵ಆಚೇಂಗಿ ಸ್ತೆಫನ ಪವಿತ್ರತ್ಮಾತ್‍ಲ್ ದುಂಬಿತ್ ಬಾನತ್‍ನ ನೋಟಿತ್ ದೇವಡ ಮಹಿಮೆನ ಪಿಂಞ ದೇವಡ ಬಲ್‌ತೆ ಬರಿಲ್ ಯೇಸು ನಿಂದಂಡುಳ್ಳಾನ ಕಂಡತ್.

⁵⁶ಅಕ್ಕ, ಅಂವೊ ಅದ, ಪರಲೋಕ ತೊರಪಾನ, ಮನುಷ್ಯಕುಮಾರ ಪರಲೋಕತ್‍ಲ್ ದೇವಡ ಬಲ್‌ತೆ ಬರಿಲ್ ನಿಂದಂಡುಳ್ಳಾನ ನಾನ್ ಕಂಡಂಡುಳ್ಳ್‌ಂದ್ ಎಣ್ಣ್‌ಚಿ.

⁵⁷ಅಕ್ಕ ಅಲ್ಲಿಂಜ ಜನ, ಅಯಿಂಗಡ ಕೆಮಿನ ಮುಚ್ಚಿತ್, ಜೋರ್‌ಲ್ ಕೂತ್ ಕೊಡ್‍ತತ್. ಒಮ್ಮಕೆ ಎಲ್ಲಾರು ಅಂವೊಂಡ ಮೇಲೆ ಪಾರಿತ್

⁵⁸ಅಂವೊನ ಊರ್‌ರ ಪೊರಮೆ ಬಲ್‍ಚಂಡ್ ಪೋಯಿತ್, ಕಲ್ಲ್ ಕನ್‍ಚತ್. ಅಂವೊಂಗ್ ವಿರೋದವಾಯಿತ್ ಸಾಕ್ಷಿ ಎಣ್ಣ್‌ನಯಿಂಗ, ಅಯಿಂಗಡ ಪೊರಮೆ ಇಡ್‌ವ ಬಟ್ಟೇನೆ ಉತ್ತಿತ್, ಸೌಲ ಎಣ್ಣ್‌ವ ಒರ್ ಬಾಲೆಕಾರಂಡ ಕಾಲ್‍ರ ಪಕ್ಕ ಬೆಚ್ಚತ್.

⁵⁹ಅಯಿಂಗ ಸ್ತೆಫನಂಡ ಮೇಲೆ ಕಲ್ಲ್ ಕನ್‍ಚಂಡಿಪ್ಪಕ, ಅಂವೊ: ಒಡೆಯನಾನ ಯೇಸು ಕ್ರಿಸ್ತನೇ, ನಾಡ ಆತ್ಮತ್‌ನ ಸ್ವೀಕಾರ ಮಾಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ.

⁶⁰ಪಿಂಞ ಮೊಣಕಾಲ್ ಇಟ್ಟಿತ್, ಒಡೆಯನೇ, ಈ ಪಾಪತ್‍ರ ಅಪರಾದತ್‍ನ ಅಯಿಂಗಡ ಮೇಲೆ ಇಡತೇಂದ್ ಎಣ್ಣಿತ್ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‌ತಿತ್ ಜೀವ ಬುಟ್ಟತ್.