Read Kodava ಅಪೊಸ್ತಲ 8 Bible Online

ಅಪೊಸ್ತಲ 8 - Kodava bible

ಅಪೊಸ್ತಲ 8

¹ಸೌಲ ಸಹ ಸ್ತೆಫನನ ಕೊಲ್ಲ್‌ವಕ್ ಒತ್ತಂಡಿಂಜತ್. ಅದೇ ದಿವಸತ್ ಯೆರೂಸಲೇಮ್‍ಲ್ ಇಂಜ ಸಬೇಕ್ ಬಲ್ಯ ಹಿಂಸೆ ಸುರ್ ಆಚಿ. ಅಪೊಸ್ತಲಂಗ ಅಲ್ಲತೆ, ಬೋರೆ ಎಲ್ಲಾ ಶಿಷ್ಯಂಗಳು ಯೂದಾಯ ಪಿಂಞ ಸಮಾರ್ಯ ಪ್ರಾಂತ್ಯತ್‍ಲ್ ಚದ್‌ರಿ ಪೋಚಿ.

²ಚೆನ್ನ ಬಕ್ತಿಯುಳ್ಳ ದೇವಡ ಮಕ್ಕ ಸ್ತೆಫನಂಡ ಚಾವ್ ತಡೀನ ಕೊಂಡ್ ಪೋಯಿತ್ ಪೂತ್ತತ್. ಅಂವೊಂಗಾಯಿತ್ ಅಯಿಂಗ ದುಂಬ ಮೊರಟಿತ್ ದುಃಖ ಪಟ್ಟತ್.

³ಇದ್‍ಲ್ಲತೆ ಸೌಲ, ಮನೆಮನೆಕ್ ಪೋಯಿತ್, ಕ್ರಿಸ್ತಂಡ ಮೇಲೆ ನಂಬಿಕೆ ಉಳ್ಳ ಆಣಾಳ್ ಪಿಂಞ ಪೊಣ್ಣಾಳ್‍ನ ಅಯಿಂಗಡ ಮನೇಯಿಂಜ ಪೊರಮೆ ಬಲ್‍ಚಿತ್, ಸೆರೆಮನೆಕ್ ಒಪ್ಪ್‌ಚಿಟ್ಟತ್. ಇನ್ನನೆ ಅಂವೊ ದೇವಡ ಸಬೇನ ಪಾಳ್ ಮಾಡಿಯಂಡಿಂಜತ್.

⁴ಚದ್‌ರಿ ಪೋನ ಚೆನ್ನ ಶಿಷ್ಯಂಗ, ಅಯಿಂಗ ಪೋನ ಎಲ್ಲಾ ಜಾಗತ್‍ಲ್ ಯೇಸುರ ಸುದ್ದಿನ ಬೋದನೆ ಮಾಡಿಯಂಡಿಂಜತ್.

⁵ಫಿಲಿಪ್ಪ ಎಣ್ಣ್‌ವಂವೊ, ಸಮಾರ್ಯ ಪ್ರಾಂತ್ಯತ್‍ರ ಒರ್ ಪಟ್ಟಣಕ್ ಪೋಯಿತ್ ಅಲ್ಲಿಯತ್‍ರ ಜನಕ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಂಡ ವಿಷಯತ್‍ನ ಬೋದನೆ ಮಾಡ್‍ಚಿ.

⁶ಫಿಲಿಪ್ಪ ಮಾಡ್‍ನ ಬೋದನೆನ ಕ್‍ೕಟಿತ್ ಪಿಂಞ ಅದ್ಬುತ ಕಾರ್ಯತ್‍ನ ಜನ ಕಾಂಬಕ, ಅಂವೊ ಎಣ್ಣ್‌ವಾನ ಎಲ್ಲಾರು ಒರೇ ಮನಸ್ಸ್‌ಲ್ ಕ್‍ೕಟಂಡಿಂಜತ್.

⁷ಎನ್ನಂಗೆಣ್ಣ್‌ಚೇಂಗಿ ದುಂಬ ಕೂಳಿಯ, ಜನಡ ಒಳ್‌ಳಿಂಜ ಜೋರಾಯಿತ್ ಕೂತ್ ಕೊಡ್‌ತಂಡ್ ಪೊರಮೆ ಬಾತ್; ಅದಲ್ಲತೆ, ಪಾರ್ಶ್ವವಾಯುಲ್ ಇಂಜ ದುಂಬ ಜನ ಪಿಂಞ ದುಂಬ ಕುಂಟಂಗ ಸಹ ವಾಸಿ ಆಚಿ.

⁸ಆನಗುಂಡ್, ಪಟ್ಟಣತ್‍ಲ್ ದುಂಬ ಕುಶಿಯಿಂಜತ್.

⁹ಆಚೇಂಗಿ, ಆ ಪಟ್ಟಣತ್‍ಲ್ ಸೀಮೋನ ಎಣ್ಣುವ ಒಬ್ಬ ಇಂಜತ್. ಅಂವೊ, ಚೆನ್ನ ಕಾಲತ್ಂಜ ಬಲ್ಯ ಬಲ್ಯ ಮಾಟಮಂತ್ರ ಮಾಡಿಯಂಡ್, ಅಲ್ಲಿಯತ್‍ರ ಜನ ಆಶ್ಚರ್ಯ ಪಡುವನೆಕೆ ಮಾಡಿತ್, ಅಂವೊ ಒರ್ ಬಲ್ಯ ಮನುಷ್ಯಾಂದ್ ಎಣ್ಣಿಯಂಡಿಂಜತ್.

¹⁰ಆ ಪಟ್ಟಣತ್‍ಲ್ ಇಂಜ ಚೆರಿಯಯಿಂಗ ಬಲ್ಯಯಿಂಗ ಎಲ್ಲಾರು ಅಂವೊ ಎಣ್ಣ್‌ವಾನ ಕ್‍ೕಟಂಡಿಂಜತ್. ಇಂವೊ ಮನುಷ್ಯಂಗಕ್ ಕಯ್ಯತದ್‍ನೆಲ್ಲ ಮಾಡಿಯಂಡುಂಡ್, ಆನಗುಂಡ್ ಇಂವೊಂಡ ಕೂಡೆ ದೇವಡ ಬಲ್ಯ ಶಕ್ತಿ ಉಂಡ್‍ೕಂದ್ ಎಣ್ಣಿಯಂಡಿಂಜತ್.

¹¹ದುಂಬ ಕಾಲತ್ಂಜ ಅಂವೊ ಮಾಟಮಂತ್ರ ಮಾಡಿತ್ ಅಲ್ಲಿ ಉಳ್ಳಯಿಂಗೆಲ್ಲ ಆಶ್ಚರ್ಯ ಆಪನೆಕೆ ಮಾಡಿಯಂಡಿಂಜಗುಂಡ್, ಅಲ್ಲಿಯತ್‍ರ ಜನ ಅಂವೊ ಎಣ್ಣ್‌ವಾಂಗ್ ದುಂಬ ಕೆಮಿ ಕೊಡ್‍ತತ್.

¹²ಆಚೇಂಗಿ ಇಕ್ಕ, ಫಿಲಿಪ್ಪ ದೇವಡ ರಾಜ್ಯತ್‍ರ ನಲ್ಲ ಸುದ್ದಿನ ಪಿಂಞ ಯೇಸು ಕ್ರಿಸ್ತಂಡ ಪೆದತ್‍ನ ಪ್ರಚಾರ ಮಾಡ್‌ವಾನ ಆ ಪಟ್ಟಣತ್‍ರ ಜನ ಕ್‍ೕಪಕ, ಅಯಿಂಗ ಅದ್‍ನ ನಂಬಿತ್, ಆಣಾಳ್ ಪಿಂಞ ಪೊಣ್ಣಾಳುವ ದೀಕ್ಷಾಸ್ನಾನ ಎಡ್‍ತತ್.

¹³ಅಕ್ಕ ಸೀಮೋನ ಸಹ, ನಂಬಿತ್, ದೀಕ್ಷಾಸ್ನಾನ ಎಡ್‍ತತ್. ಪಿಂಞ ಫಿಲಿಪ್ಪಂಡ ಕೂಡೆ ಎಕ್ಕಾಲು ಇಂಜಂಡ್, ಫಿಲಿಪ್ಪ ಮಾಡ್‍ನ ಬಲ್ಯ ಗುರ್‌ತ್ ಪಿಂಞ ಅದ್ಬುತ ಕಾರ್ಯತ್‍ನೆಲ್ಲ ಕಂಡಿತ್, ಆಶ್ಚರ್ಯ ಪಟ್ಟತ್.

¹⁴ಸಮಾರ್ಯತ್‍ರ ಜನ ದೇವಡ ವಾಕ್ಯತ್‍ನ ಸ್ವೀಕಾರ ಮಾಡ್‍ಚೀಂದ್ ಉಳ್ಳ ವಿಷಯತ್‍ನ, ಯೆರೂಸಲೇಮ್‍ಲ್ ಉಳ್ಳ ಅಪೊಸ್ತಲಂಗ ಕ್‍ೕಟಿತ್, ಪೇತ್ರ ಪಿಂಞ ಯೋಹಾನನ ಅಯಿಂಗಡ ಪಕ್ಕ ಅಯಿಚತ್.

¹⁵ಈಂಗ ಅಲ್ಲಿಕ್ ಬಂದಿತ್, ಅಯಿಂಗಕ್ ಪವಿತ್ರಾತ್ಮ ಕ್‍ಟ್ಟಂಡೂಂದ್ ಅಯಿಂಗಕಾಯಿತ್ ಪ್ರಾರ್ಥನೆ ಮಾಡ್‍ಚಿ.

¹⁶ಎನ್ನಂಗೆಣ್ಣ್‌ಚೇಂಗಿ, ಅಯಿಂಗಡಡೆಲ್ ಪವಿತ್ರಾತ್ಮ ಒಬ್ಬಂಗು ಇಲ್ಲಿಕತ್ತನೆ ಕ್‍ಟ್ಟಿತ್ತ್‌ಲ್ಲೆ. ಅಯಿಂಗ ಒಡೆಯನಾನ ಯೇಸುರ ಪೆದತ್‍ಲ್ ದೀಕ್ಷಾಸ್ನಾನ ಮಾತ್ರ ಎಡ್‍ತಿತ್ಂಜತ್.

¹⁷ಅಪೊಸ್ತಲಂಗ ಅಯಿಂಗಡ ಮೇಲೆ ಕೈ ಬೆಪ್ಪಕ ಅಯಿಂಗಕ್ ಪವಿತ್ರಾತ್ಮ ಕ್‍ಟ್ಟ್‌ಚಿ.

¹⁸ಅಪೊಸ್ತಲಂಗ ಕೈ ಬೆಪ್ಪಕ, ಅಯಿಂಗಕ್ ಪವಿತ್ರಾತ್ಮ ಕ್‍ಟ್ಟ್‌ನದ್‍ನ ಸೀಮೋನ ನೋಟಿತ್, ಅಯಿಂಗಕ್ ಪಣತ್‍ನ ಕೊಂಡ್‌ಬಂತ್ ಕೊಡ್‍ಪಕ್ ನೋಟಿತ್:

¹⁹ನಾನ್ ದಾಡ ಮೇಲೆ ಕೈ ಬೆಪ್ಪಿ, ಅಂವೊಂಗ್ ಇನ್ನನೆ ಪವಿತ್ರಾತ್ಮ ಕ್‍ಟ್ಟ್‌ವನೆಕೆ ನಾಕು ಈ ಅದಿಕಾರತ್‍ನ ತಾರೀಂದ್ ಕ್‍ೕಟತ್.

²⁰ಅದ್ಂಗ್ ಪೇತ್ರ ಅಂವೊನ ನೋಟಿತ್: ದೇವಡ ವರತ್‍ನ ದುಡ್ಡ್‌ಕ್ ಎಡ್‍ಪಕ್ ನೀನ್ ಗೇನ ಮಾಡಿಯ? ಆನಗುಂಡ್, ನೀಡ ದುಡ್ಡ್ ನೀಡ ಕೂಡೆ ನಾಶ ಆಯಿ ಪೋಡ್.

²¹ನೀಡ ಹೃದಯ ದೇವಡ ಮಿಂಞತ್ ನೇರಾಯಿತ್ ಇಲ್ಲತಗುಂಡ್ ನೀಕ್ ಈ ಸೇವೇಲ್ ಏದ್ ಒರ್ ಪಾಲೂ ಇಲ್ಲೆ ಬಾಗವು ಇಲ್ಲೆ.

²²ಆನಗುಂಡ್ ಇಕ್ಕ ನೀನ್ ಕ್‍ೕಟದ್‍ನೆಲ್ಲ ಬುಟ್ಟಿತ್ ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್ ಒಡೆಯಂಡ ಪಕ್ಕ ಪ್ರಾರ್ಥನೆ ಮಾಡ್; ನೀಡ ಹೃದಯತ್‍ರ ಗೇನತ್‍ನ ಅಂವೊ ಮನ್ನಿಚಿಡ್‌ವಕ್ ಆಪ.

²³ನೀಡ ಹೃದಯ ದುಂಬ ಕಯಿಪಾಯಿತ್ ಉಳ್ಳದ್‍ನ ಪಿಂಞ ನೀನ್ ಪಾಪತ್‍ಲ್ ಚಿಕ್ಕಿತುಳ್ಳದ್‍ನ ನಾನ್ ಕಂಡಂಡುಳ್ಳ್‌ೕಂದ್ ಎಣ್ಣ್‌ಚಿ.

²⁴ಅದ್ಂಗ್ ಸೀಮೋನ: ನಿಂಗ ಎಣ್ಣ್‌ನ ಒರ್ ವಿಷಯವು ನಾಡ ಮೇಲೆ ಬಕ್ಕತನೆಕೆ, ನಾಕಾಯಿತ್ ಒಡೆಯಂಡ ಪಕ್ಕ ಬೋಡಿಯೊಳೀಂದ್ ಎಣ್ಣ್‌ಚಿ.

²⁵ಪೇತ್ರ ಪಿಂಞ ಯೋಹಾನ ಒಡೆಯಂಡ ವಾಕ್ಯತ್‍ನ ಸಾಕ್ಷಿಯಾಯಿತ್ ಎಣ್ಣಿತಾನ ಪಿಂಞ, ಸಮಾರ್ಯ ಪ್ರಾಂತ್ಯತ್‍ರ ಊರ್ ಊರ್‌ಕ್ ಕ್ರಿಸ್ತಂಡ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್, ಯೆರೂಸಲೇಮ್‌ಕ್ ವಾಪಸ್ ಬಾತ್.

²⁶ಪಿಂಞ, ಒರ್ ದಿವಸ ಒಡೆಯಂಡ ದೂತ ಫಿಲಿಪ್ಪಂಗ್: ನೀನ್ ದಕ್ಷಿಣ ದಿಕ್ಕ್‌ಲ್, ಯೆರೂಸಲೇಮ್ಂಜ ಗಾಜ ಪಟ್ಟಣಕ್ ಪೋಪ ಮಣಬೂಮಿರ ಬಟ್ಟೇಲ್ ಪೋಂದ್ ಎಣ್ಣ್‌ಚಿ.

²⁷ಅಂವೊ ಅನ್ನನೆ ಪೊರಟಿತ್ ಪೋಚಿ. ಅಂವೊ ಆ ಬಟ್ಟೇಲ್ ಪೋಯಂಡಿಪ್ಪಕ, ಐಥಿಯೋಪ್ಯ ದೇಶಕ್ ರಾಣಿಯಾಯಿತ್ಂಜ ಕಂದಾಕೆಯ ಎಣ್ಣ್‌ವವಡ ಮುಕ್ಯಪಟ್ಟ ಅದಿಕಾರಿನ[24] ಕಂಡತ್. ಅಂವೊ ಆ ರಾಣಿರ ಖಜಾನಕೆಲ್ಲ ಅದಿಕಾರಿಯಾಯಿತ್ಂಜತ್. ಅಂವೊ ದೇವನ ಆರಾದನೆ ಮಾಡ್‌ವಕಾಯಿತ್ ಯೆರೂಸಲೇಮ್‌ಕ್ ಪೋಯಿತ್ಂಜತ್.

²⁸ಅನ್ನನೆ ಅಂವೊ ವಾಪಸ್ ಪೋಯಂಡಿಪ್ಪಕ, ತಾಂಡ ರಥತ್‍ಲ್ ಅಳ್‌ತಂಡ್ ಯೆಶಾಯ ಪ್ರವಾದಿರ ಪುಸ್ತಕತ್‍ನ ಓದಿಯಂಡ್ ಇಂಜತ್.

²⁹ಅಕ್ಕ, ಪವಿತ್ರಾತ್ಮ ಫಿಲಿಪ್ಪಂಡ ಪಕ್ಕ, ನೀನ್ ಅಂವೊಂಡ ರಥತ್‍ರ ಪಕ್ಕ ಪೋಯಿತ್ ಅದ್ಂಡಕೂಡೆ ನಡೇಂದ್ ಎಣ್ಣ್‌ಚಿ.

³⁰ಅಕ್ಕ, ಫಿಲಿಪ್ಪ ಓಡಿ ಪೋಯಿತ್ ಆ ಮನುಷ್ಯ ಯೆಶಾಯ ಪ್ರವಾದಿರ ಪುಸ್ತಕತ್‍ನ ಓದ್‍ವಾನ ಕ್‍ೕಟಿತ್, ಅಂವೊನ ನೋಟಿತ್: ನೀನ್ ಓದಿಯಂಡುಳ್ಳದ್ ನೀಕ್ ಅರ್ಥ ಆಯಂಡುಂಡಾಂದ್ ಕ್‍ೕಟತ್.

³¹ಅದ್ಂಗ್ ಅಂವೊ: ದಾರೇಂಗಿ ನಾಕ್ ಅದ್ಂಡ ಅರ್ಥತ್‍ನ ಎಣ್ಣ್‌ಚೇಂಗಿ ಮಾತ್ರ ಅದ್ ಗೊತ್ತಾಪ, ಇಲ್ಲತೆಪೋಚೇಂಗಿ ಎನ್ನನೆ ಗೊತ್ತಾಪಾಂದ್ ಕ್‍ೕಟತ್. ಆನಗುಂಡ್ ಫಿಲಿಪ್ಪನ ತಾಂಡಕೂಡೆ ಅಳ್‌ಪಕ್ ಎಣ್ಣ್‌ಚಿ.

³²ಅಂವೊ ಓದಿಯಂಡ್ ಇಂಜ ದೇವಡ ವಾಕ್ಯ ಇನ್ನನೆ ಇಂಜತ್: ಕೊಲ್ಲ್‌ವಕ್ ಕೊಂಡ್ ಪೋಪ ಒರ್ ಕೊರಿರನೆಕೆ ಅಂವೊನ ಕೊಂಡ್ ಪೋಚಿ; ಒರ್ ಕೊರಿ ಕುಟ್ಟಿರನೆಕೆ ತಾಂಡ ರೋಮತ್‍ನ ಮುರಿಪಂವೊಂಡ ಮಿಂಞತ್ ಮೌನತ್‍ಲ್ ಇಪ್ಪ, ಅನ್ನನೆ ಅಂವೊ ತಾಂಡ ಬಾಯಿನ ತೊರಕತಂವೊನಾಯಿತ್ಂಜತ್.

³³ಅಂವೊ ಅಂವೊನ ತಗ್ಗ್‌ಚಿಟ್ಟಂಡಿಪ್ಪಕ, ಅಂವೊಂಗ್ ನ್ಯಾಯ ಕ್‍ಟ್ಟಿತ್‌ಲ್ಲೆ; ಅಂವೊಂಡ ಜೀವ ಈ ಲೋಕತ್ಂಜ ಪೋಯಿರ್‌ತ್; ಅಂವೊಂಡ ಸಂತಾನತ್‍ರ ಲೆಕ್ಕತ್‍ನ ದಾರ್‌ಕ್ ವಿವರಿಚಿಡ್‌ವಕ್ ಕಯ್ಯು.[25]

³⁴ಆ ಅದಿಕಾರಿ ಫಿಲಿಪ್ಪನ ನೋಟಿತ್, ಇಲ್ಲಿ ಪ್ರವಾದಿ ದಾಡ ವಿಷಯತ್‍ನ ಎಣ್ಣಿಯಂಡುಂಡ್, ಪ್ರವಾದಿರ ವಿಷಯವ? ಅಥವ ಬೋರೆ ಒಬ್ಬಂಡ ವಿಷಯವ? ನಾಕ್ ಎಣ್ಣಿತಾಂದ್ ಕ್‍ೕಟತ್.

³⁵ಅಕ್ಕ, ಫಿಲಿಪ್ಪ, ತಕ್ಕ್ ಪರಿಯುವಕ್ ಸುರು ಮಾಡಿತ್, ಈ ದೇವಡ ವಾಕ್ಯತ್‍ರ ಮೂಲಕವೇ, ಯೇಸುರ ನಲ್ಲ ಸುದ್ದಿನೆಲ್ಲ ಎಣ್ಣ್‌ಚಿ.

³⁶ಇನ್ನನೆ ಅಯಿಂಗ ಬಟ್ಟೇಲ್ ಪೋಯಂಡಿಪ್ಪಕ, ನೀರ್ ಇಂಜ ಜಾಗಕ್ ಬಾತ್. ಅಕ್ಕ ಆ ಅದಿಕಾರಿ: ನೋಟ್, ಇಲ್ಲಿ ನೀರ್ ಉಂಡ್, ನಾಕ್ ದೀಕ್ಷಾಸ್ನಾನ ತಪ್ಪಕ್ ತಡೆ ಏದೇಂಗಿ ಉಂಡಾಂದ್ ಕ್‍ೕಟತ್.

³⁷ಅದ್ಂಗ್ ಫಿಲಿಪ್ಪ: ನೀನ್ ತ್‍ೕರ ಹೃದಯತ್‍ಲ್ ನಂಬ್‍ಚೇಂಗಿ ತಡೆ ಒಂದು ಇಲ್ಲೆ, ಅಕ್ಕ ಅಂವೊ, ಯೇಸು ಕ್ರಿಸ್ತ ದೇವಡ ಮೋಂವೋಂದ್ ನಾನ್ ನಂಬುವೀಂದ್ ಎಣ್ಣ್‌ಚಿ.[26]

³⁸ಅಂವೊ ರಥತ್‍ನ ನಿಪ್ಪ್‌ಚಿಡುವಕ್ ಎಣ್ಣಿತ್, ಪಿಂಞ ದಂಡಾಳು ನೀರ್‌ಕ್ ಇಳ್ಂಜಿತ್. ಫಿಲಿಪ್ಪ ಅಂವೊಂಗ್ ದೀಕ್ಷಾಸ್ನಾನ ಕೊಡ್‍ತತ್.

³⁹ಅಯಿಂಗ ನೀರ್‌ನ ಬುಟ್ಟಿತ್ ಕರೆಕ್ ಬಪ್ಪಕ ಒಡೆಯಂಡ ಆತ್ಮ ಫಿಲಿಪ್ಪನ ಒಮ್ಮಕೆ ಎಡ್‍ತಂಡ್ ಪೋಯಿರ್‌ತ್. ಅದಿಕಾರಿ ಬಯ್ಯ ಫಿಲಿಪ್ಪನ ಕಂಡಿತ್‌ಲ್ಲೆ. ಆಚೇಂಗಿ, ಅಂವೊ ಕುಶೀಲ್ ತಾಂಡ ಬಟ್ಟೇಲ್ ಪೋಚಿ.

⁴⁰ಪಿಂಞ ಫಿಲಿಪ್ಪಂಗ್ ತಾನ್ ಅಜೋತ ಎಣ್ಣುವ ಜಾಗತ್‍ಲ್ ಉಂಡ್‍ೕಂದ್ ಗೊತ್ತಾಚಿ. ಅಲ್ಲಿಂಜ ಕೈಸರೈ ಪಟ್ಟಣಕ್ ಬಪ್ಪಕತ್ತನೆ, ಬಟ್ಟೇಲ್ ಇಂಜ ಎಲ್ಲಾ ಪಟ್ಟಣತ್‍ಲ್ ಯೇಸುರ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್ ಪೋಚಿ.