Read Kodava ರೋಮ್ 1 Bible Online

ರೋಮ್ 1 - Kodava bible

ರೋಮ್ 1

¹ಯೇಸು ಕ್ರಿಸ್ತಂಡ ಸೇವಕನು, ಅಪೊಸ್ತಲನಾಯಿತ್‌ಪ್ಪಕ್ ದೇವ ಕಾಕ್‌ನಂವೊನು, ದೇವಡ ನಲ್ಲ ಸುದ್ದಿನ ಅರಿಚಿಡುವಕಾಯಿತ್ ದೇವ ಗೊತ್ತ್ ಮಾಡ್‍ನ ಪೌಲನಾನ ನಾನ್ ಒಳ್‍ದ್‍ವ ಕಾಗದ ಇದ್.

²ದೇವಡ ಈ ನಲ್ಲ ಸುದ್ದಿ ದೇವಡ ಪ್ರವಾದಿಯಂಗಡ ಮೂಲಕ ಪಂಡೇ ವಾಗ್ದಾನ ಮಾಡಿತ್, ಪವಿತ್ರ ವಾಕ್ಯತ್‍ಲ್ ಒಳ್‍ದಿ ಬೆಚ್ಚಿತ್ಂಜತ್.

³ಅದ್ ದೇವಡ ಮೋಂವೊನಾನ ಯೇಸುರ ನಲ್ಲ ಸುದ್ದಿರ ವಿಷಯವೇ. ಅಂವೊ ಮನುಷ್ಯನಾಯಿತ್ ನಂಗಡ ಅಜ್ಜನಾನ ದಾವೀದ ರಾಜಂಡ ಸಂತಾನತ್‍ಲ್ ಪುಟ್ಟ್‌ಚಿ.

⁴ಅಂವೊನ ದೇವ ಚತ್ತಯಿಂಗಡ ಮದ್ಯತ್ಂಜ ಪವಿತ್ರಾತ್ಮಂಡ ಶಕ್ತಿಲ್ ಜೀವವಾಯಿತ್ ಎಪ್ಪ್‌ಚಿಟ್ಟಗುಂಡ್, ಅಂವೊ ದೇವಡ ಮೋಂವೋಂದ್ ದೃಡವಾಯಿತ್ ಅರಿಚಿಟ್ಟತ್.

⁵ಅಂವೊಂಡ ಮೂಲಕ ಅಂವೊಂಡ ಪೆದಕಾಯಿತ್, ನಂಗ ಯೆಹೂದ್ಯಂಗ ಅಲ್ಲತ ಎಲ್ಲಾ ಜನಡ ಮದ್ಯತ್‍ಲ್ ಪೋಯಿತ್ ದೇವಡ ವಿಷಯತ್‍ನ ಪ್ರಚಾರ ಮಾಡ್‌ವಕ್ ಅಪೊಸ್ತಲಂಗಕಾನ ಅದಿಕಾರವು, ಬಾಗ್ಯವು ದೇವ ನಂಗಕ್ ತಂದಿತುಂಡ್. ಅದ್‍ನಗುಂಡ್ ಅಂವೊನ ನಂಬಿತ್, ಅಂವೊಂಗ್ ಬಗ್ಗಿತ್ ದೇವಕ್ ಮಹಿಮೆ ಕೊಂಡ್ ಬಪ್ಪ.

⁶ರೋಮ್ ಪಟ್ಟಣತ್‍ಲ್ ಉಳ್ಳ ನಾಡ ಪ್ರೀತಿರ ಜನಳೇ, ಎಲ್ಲಾ ಜನತ್‍ರ ಮದ್ಯತ್ಂಜ ನಿಂಗಳ ಸಹ ಯೇಸು ಕ್ರಿಸ್ತಂಡಯಿಂಗಳಾಯಿತ್ ಕಾಕಿತುಂಡ್.

⁷ದೇವ ನಿಂಗಳ ಪ್ರೀತಿ ಮಾಡಿತ್, ಪವಿತ್ರವಾನಯಿಂಗಳಾಯಿತ್ ಇಪ್ಪಕ್ ಕಾಕ್‍ಚಿ. ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್.

⁸ಆದ್ಯವಾಯಿತ್, ನಿಂಗ ದೇವಡ ಮೇಲೆ ಬೆಚ್ಚಿತುಳ್ಳ ನಂಬಿಕೆ, ಲೋಕತ್‍ರ ಎಲ್ಲಾ ಜಾಗತ್‍ಲ್ ಗೊತ್ತಾನಗುಂಡ್, ನಿಂಗ ಎಲ್ಲಾರ್‍ಕಾಯಿತ್ ನಾನ್ ಯೇಸು ಕ್ರಿಸ್ತಂಡ ಮೂಲಕ ದೇವಕ್ ವಂದನೆ ಎಣ್ಣ್‌ವಿ.

⁹ನಾನ್ ಎಕ್ಕಾಲು ನಿಂಗಕಾಯಿತ್, ಎಚ್ಚಕ್ ಪ್ರಾರ್ಥನೆ ಮಾಡಿಯಂಡುಳ್ಳ್‌ೕಂದ್ ದೇವ ನಾಕ್ ಸಾಕ್ಷಿಯಾಯಿತ್ ಉಂಡ್. ನಾನ್ ಎಣ್ಣುವದ್ ಸತ್ಯಾಂದ್, ಅಂವೊಂಡ ಮೋಂವೊಂಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಮೂಲಕ, ನಾನ್ ತ್‍ೕರ ಮನಸ್ಸ್‌ಲ್ ಸೇವೆ ಮಾಡ್‌ವ ದೇವಡ ಪೆದತ್‍ಲ್ ಎಣ್ಣ್‌ವಿ.

¹⁰ಎನ್ನನಾಚೇಂಗಿಯು ನಿಂಗಳ ಕಾಂಬಕಾಯಿತ್ ದೇವಡ ಚಿತ್ತತ್‍ರಗುಂಡ್, ನಿಂಗಡ ಪಕ್ಕ ಬಪ್ಪಕ್ ಎಕ್ಕಾಲು ಪ್ರಾರ್ಥನೆ ಮಾಡಿಯಂಡುಳ್ಳ.

¹¹ನಿಂಗಕ್ ಆತ್ಮೀಯ ವರತ್‍ನ ಪಾಲ್ ಮಾಡಿತ್, ನಿಂಗಳ ದೇವಡ ವಿಷಯತ್‍ಲ್ ಸ್ತಿರಪಡ್‌ತ್‍ವಕಾಯಿತ್, ನಿಂಗಳೆಲ್ಲ ಕಾಂಬಕ್ ನಾನ್ ದುಂಬ ಕುಶೀಲ್ ಉಳ್ಳ.

¹²ನಿಂಗ ದೇವಡ ಮೇಲೆ ಬೆಚ್ಚಿತುಳ್ಳ ನಂಬಿಕೇನ ನಾನ್ ಕಾಂಬಕ ನಾಕ್ ಪುರ್‌ಡ್ ಕ್‍ಟ್ಟುವನೆಕೆ, ನಿಂಗಕು ಸಹ ನಾನ್ ದೇವಡ ಮೇಲೆ ಬೆಚ್ಚಿತುಳ್ಳ ನಂಬಿಕೇನೆ ಕಂಡಿತ್ ಪುರ್‌ಡ್ ಕ್‍ಟ್ಟುವ. ಇನ್ನನೆ ದಂಡಾಳ್‍ಕು ಆಶೀರ್ವಾದ ಆಪ.

¹³ನಾಡ ಅಣ್ಣತಮ್ಮಣಂಗಳೇ, ಬೋರೆ ಜಾಗತ್‍ಲ್ ಉಳ್ಳ ಯೆಹೂದ್ಯ ಅಲ್ಲತಯಿಂಗಡ ಪಕ್ಕ ನಾಕ್ ಫಲ ಕ್‍ಟ್ಟ್‌ನನೆಕೆ, ನಿಂಗಡಲ್ಲಿಯು ನಾಕ್ ಫಲ ಕ್‍ಟ್ಟಂಡೂಂದ್ ನಿಂಗಡ ಪಕ್ಕ ಬಪ್ಪಕ್ ದುಂಬ ಕುರಿ ಗೇನ ಮಾಡ್‍ನ, ಆಚೇಂಗಿ ಇಲ್ಲಿಕತ್ತನೆ ಅದ್ಂಗ್ ತಡೆ ಆಯಂಡಿಂಜತ್‍ೕಂದ್ ನಿಂಗಕ್ ಗೊತ್ತಿಲ್ಲತೆ ಇಪ್ಪದ್ ನಾಕ್ ಕುಶಿಯಿಲ್ಲೆ.

¹⁴ಗ್ರೀಕ್ ಜನಕು, ಬೋರೆ ಜನಕು, ಜ್ಞಾನಿಯಂಗಕು, ಅಜ್ಞಾನಿಯಂಗಕು ಪ್ರಸಂಗ ಮಾಡ್‌ವಕ್ ನಾನ್ ಜವಾಬ್ದಾರನಾಯಿತುಳ್ಳ.

¹⁵ಆನಗುಂಡ್ ರೋಮ್ ಪಟ್ಟಣತ್‍ಲ್ ಉಳ್ಳ ನಿಂಗಕು ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕಾಯಿತ್ ನಿಂಗಡ ಪಕ್ಕ ಬಪ್ಪಕ್ ನಾಕ್ ಬಲ್ಯ ಆಸೆ ಉಂಡ್.

¹⁶ಕ್ರಿಸ್ತಂಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ನಾಕ್ ಞಾಣ ಆಪುಲೆ. ಎನ್ನಂಗೆಣ್ಣ್‌ಚೇಂಗಿ, ಆದ್ಯವಾಯಿತ್ ಯೆಹೂದ್ಯ ಜನತ್‍ಲ್ ಪಿಂಞ ಯೆಹೂದ್ಯ ಅಲ್ಲತಯಿಂಗಡ ಮದ್ಯತ್‍ಲ್ ದಾರೆಲ್ಲಾ ನಂಬುವ, ಅಯಿಂಗಕೆಲ್ಲ ರಕ್ಷಣೆ ಕ್‍ಟ್ಟುವಕ್ ಅದ್ ದೇವಡ ಶಕ್ತಿಯಾಯಿತುಂಡ್.

¹⁷ನಂಬಿಕೇರ ಮೂಲಕ ನೀತಿವಂತಯಿಂಗ ಬದ್‌ಕ್‌ವಾಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳನೆಕೆ,[1] ನಂಬಿಕೇರ ಮೂಲಕ ಕ್‍ಟ್ಟುವ ದೇವಡ ನೀತಿ, ನಂಬಿಕೆಕಾಯಿತ್, ದೇವಡ ನಲ್ಲ ಸುದ್ದಿರ ಮೂಲಕ ಕಾಂಬನೆಕೆ ಆಚಿ.

¹⁸ಸತ್ಯತ್‍ನ ಅನ್ಯಾತ್‌ಲ್‌ ಪುಡ್‌ಚಿತ್ ಬೆಪ್ಪ ಮನುಷ್ಯಂಡ ಎಲ್ಲಾ ತರ ಬಕ್ತಿಯಿಲ್ಲತ ಕಾರ್ಯಕು ಪಿಂಞ ಅನ್ಯಾಯಕು ವಿರೋದವಾಯಿತ್, ದೇವಡ ಚೆಡಿನ ಪರಲೋಕತ್ಂಜ ದೇವ ಕಾಂಬ್‍ಚಿಟ್ಟಂಡುಂಡ್.

¹⁹ದೇವಡ ವಿಷಯತ್‍ನ ಎಲ್ಲಾ ಜನಳು ಸುಲಬವಾಯಿತ್ ಗೊತ್ತಾಪನೆಕೆ ದೇವ ಮಾಡ್‍ಚಿ; ದೇವನೇ ಅಂವೊನ ಅಯಿಂಗಕ್ ಕಾಂಬ್‍ಚಿಟ್ಟಿತುಂಡ್. ಆನಗುಂಡ್ ದೇವ ಅಯಿಂಗಕ್ ಶಿಕ್ಷೆ ಕೊಡ್‍ಪ.

²⁰ದೇವ, ಈ ಲೋಕತ್‍ನ ಸೃಷ್ಟಿ ಮಾಡ್‍ನ ಕಾಲತ್ಂಜ ಕಣ್ಣ್‌ಕ್ ಕಾಂಬಕ್ ಕಯ್ಯತ, ನಿತ್ಯ ಶಕ್ತಿ ಪಿಂಞ ಅಂವೊಂಡ ಪವಿತ್ರವಾನ ಗುಣತ್‍ನ ಎಲ್ಲಾರು ಕಾಂಬನೆಕೆ ಮಾಡ್‍ಚಿ. ದೇವಡ ಸೃಷ್ಟಿನ ನೋಟ್‍ವಕ ಅದ್ ನಂಗಕ್ ಗೊತ್ತಾಪ. ಆನಗುಂಡ್ ಈಂಗಕ್ ಗೊತ್ತಿಲ್ಲೇಂದ್ ಎಣ್ಣ್‌ವಕ್ ಕಯ್ಯುಲೆ.

²¹ಅಯಿಂಗ ಎಲ್ಲಾರ್‌ಕು ದೇವ ದಾರ್‍ೕಂದ್ ಗೊತ್ತುಂಡೇಂಗಿಯು, ಅಯಿಂಗ ಅಂವೊಂಗ್ ಕೊಡ್‍ಪಕುಳ್ಳ ಮಹಿಮೆನ ಕೊಡ್‌ತಂಡು ಇಲ್ಲೆ, ಅಂವೊಂಗ್ ವಂದನೆ ಎಣ್ಣಿಯಂಡು ಇಲ್ಲೆ. ಆಂಡ ಬದ್‍ಲ್ ಅಯಿಂಗಡ ಗೇನಯೆಲ್ಲ ವ್ಯರ್ತವಾಯಿತುಂಡ್. ಅಯಿಂಗಡ ಮನಸ್ಸ್ ಇರ್‌ಟಾಯಿತ್ ಉಂಡ್.

²²ಅಯಿಂಗಳ ಅಯಿಂಗಳೇ ಬುದ್ದಿವಂತಯಿಂಗಾಂದ್ ಎಣ್ಣಿಯಂಡ್ ಇಂಜತೇಂಗಿಯು, ಅಯಿಂಗ ಮುಠಾಳಂಗ ಆಚಿ.

²³ಅಯಿಂಗ ನೇರಾನ, ಪಿಂಞ ಎಕ್ಕಾಲು ಬದ್‍ಕ್‍ವ ಮಹಿಮೇರ ದೇವನ ತುದಿಕತೆ, ಪಾಳಾಪ ಮನುಷ್ಯ, ಪ್ರಾಣಿ ಪಕ್ಷಿಯ ಪಿಂಞ ಜೀವಜಂತುಕಂಗಡ ರೂಪತ್‌ಲ್ ವಿಗ್ರಹತ್‍ನ ಪೂಜೆ ಮಾಡ್‌ವ.

²⁴ಅದ್ಂಗಾಯಿತ್ ದೇವ ಅಯಿಂಗಳ ಅಯಿಂಗಡ ಮನಸ್ಸ್‌ಕ್ ಆಸೆ ಬಂದನೆಕೆ ಅಸಹ್ಯ ಕಾರ್ಯತ್‍ನ ಮಾಡ್‌ವಕ್ ಒಪ್ಪ್‌ಚಿಟ್ಟ್‌ರ್‌ತ್. ಅನ್ನನೆ ಅಯಿಂಗ ಅಯಿಂಗಡ ತಡೀನ ಅವಮಾನಪಡುತ್‌ವನೆಕೆ ಪವಿತ್ರಯಿಲ್ಲತ ಕಾರ್ಯತ್‍ನ ಒಬ್ಬಂಗೊಬ್ಬ ಮಾಡ್‍ಚಿ.

²⁵ದೇವಡ ವಿಷಯತ್‍ಲ್ ಸತ್ಯಾಂದ್ ಅಯಿಂಗಕ್ ಗೊತ್ತುಳ್ಳದ್‍ನ ನಂಬತೆ, ಅದ್‍ನ ಪೊಟ್ಟ್‍ೕಂದ್ ದೈರ್ಯವಾಯಿತ್ ನಂಬುವಕ್ ಕುಶಿಪಟ್ಟತ್. ಆನಗುಂಡ್ ಎಕ್ಕಾಲು ತುದಿಪಕ್ ಯೋಗ್ಯವುಳ್ಳ ಸೃಷ್ಟಿ ದೇವನ ತುದಿಕತೆ ಸೃಷ್ಟಿಯಳ ಪೂಜೆ ಮಾಡಿಯಂಡುಂಡ್. ಆಮೆನ್[2].

²⁶ಇನ್ನನೆ ಮಾಡ್‌ನಾನಗುಂಡ್ ದೇವ ಅಯಿಂಗಳ ಅಸಹ್ಯ ಕಾರ್ಯಕ್ ಒಪ್ಪ್‌ಚಿಟ್ಟ್‌ರ್‌ತ್; ಪೊಣ್ಣಾಳ್‍ವ ಕೂಡೆ ಸ್ವಬಾವಿಕ ಸಂಬಂದತ್‍ನ, ಸ್ವಬಾವಕ್ ವಿರೋದವಾಯಿತ್ ಮೋಹಕ್ ಪಾಚೆಪಣೆ ಮಾಡಿರ್‌ತ್.

²⁷ಅನ್ನನೆ ಆಣಾಳು, ಪೊಣ್ಣಾಳ್‌ವಡ ಕೂಡೆ ನೇಮ ಪ್ರಕಾರ ಸಂಬಂದ ಮಾಡತ, ಅದ್ಂಗ್ ಬದ್‍ಲಾಯಿತ್ ಇಚ್ಛೆಲ್ ದುಂಬಿತ್ ಆಣಾಳುವಡ ಕೂಡೆ ಕಾಮಾಬಿಲಾಷೆಕ್ ಒಳಪಟ್ಟತ್. ಇದ್‍ನಗುಂಡ್ ಅಯಿಂಗ ಮಾಡ್‌ವ ಪಾಪಕ್ ತಕ್ಕಂತ ಶಿಕ್ಷೆನ ಅಯಿಂಗಳೇ ಬಪ್ಪಕ್ ಮಾಡಿಯಂಡತ್.

²⁸ಅಯಿಂಗಕ್ ದೇವನ ಗೊತ್ತ್ ಮಾಡ್‌ವ ಬುದ್ದಿನ ಗೇನಮಾಡ್‌ವಕ್ ಕುಶಿಯಿಲ್ಲತಗುಂಡ್, ಮಾಡ್‌ವಕ್ಕಾಗತ ಕೆಟ್ಟ ಕೆಲಸತ್‍ನ ಮಾಡ್‌ವಕುಳ್ಳ ಗೇನಕ್ ದೇವ ಅಯಿಂಗಳ ಒಪ್ಪ್‌ಚಿಟ್ಟ್‌ರ್‌ತ್.

²⁹ಅಯಿಂಗ ಎಲ್ಲಾ ವಿದವಾನ ದುಷ್ಟತನತ್‍ಲ್, ಕೇಡ್‍ಲ್, ದ್ರೋಹ ಮಾಡ್‌ವದ್‍ಲ್, ಪಣತ್‍ರ ಆಸೇಲ್, ಆಂಗಾರತ್‍ಲ್, ಕೊಲೆ ಮಾಡ್‌ವದ್‍ಲ್, ತರ್ಕ ಮಾಡ್‌ವದ್‍ಲ್, ಕೆಟ್ಟ ಆಸೇಲ್, ವಂಚನೆಲ್, ಒಟ್ಟೆಕಿಚ್ಚ್‌ಲ್ ದುಂಬಿತುಂಡ್.

³⁰ಅಯಿಂಗ ಒಬ್ಬಂಡ ಮೇಲೆ ಒಬ್ಬ ಕೆಟ್ಟದ್ ಎಣ್ಣಿಯಂಡ್, ದೇವನ ವಿರೋದಿಚಂಡ್, ಬಾರಿ ಆಂಗಾರತ್‍ಲ್ ನಡ್ಂದಂಡ್, ಬಾರಿ ಹೊಗಳ್‌ವಯಿಂಗಳಾಯಿತ್ ಉಂಡ್. ಅಯಿಂಗ ಪಾಪ ಮಾಡ್‌ವಕೇ ಆಸೆ ಪಟ್ಟಂಡುಂಡ್. ಪಿಂಞ ಅಯಿಂಗ ಅಪ್ಪವ್ವಂಗಕ್ ತಗ್ಗಿತ್ ನಡ್‍ಪುಲೆ.

³¹ಅಯಿಂಗ ಮನಸಾಕ್ಷಿ ಚತ್ತಯಿಂಗಳಾಯಿತು, ವಾಕ್‌ನ ಕಾಪಾಡತಯಿಂಗಳಾಯಿತು, ಪ್ರೀತಿ ಮಾಡತಯಿಂಗಳಾಯಿತು, ತಾಳ್ಮೆ ಇಲ್ಲತಯಿಂಗಳಾಯಿತು, ಕರುಣೆ ಇಲ್ಲತಯಿತಯಿಂಗಳಾಯಿತು ಉಂಡ್.

³²ಇನ್ನನೆ ಮಾಡ್‌ವಯಿಂಗ ಮರಣಕ್ ಯೋಗ್ಯವಾನಯಿಂಗಾಂದ್ ದೇವಡ ನ್ಯಾಯತೀರ್ಪ್ ಅಯಿಂಗಕ್ ಗೊತ್ತುಂಡೇಂಗಿಯು, ಅಯಿಂಗ ಅದ್‍ನ ಮಾಡ್‍ವದಲ್ಲತೆ, ಇನ್ನನೆ ಕೆಟ್ಟ ಕೆಲಸ ಮಾಡ್‌ವಯಿಂಗಳ ಇಂಞು ಮಾಡ್‌ವಕ್ ಒತ್ತಾಸೆ ಕೊಡ್‍ಪಯಿಂಗಳಾಯಿತುಂಡ್.