Read Kodava ರೋಮ್ 11 Bible Online

ರೋಮ್ 11 - Kodava bible

ರೋಮ್ 11

¹ಆನಗುಂಡ್, ದೇವ ತಾಂಡ ಜನತ್‍ನ ತಿರಸ್ಕಾರ ಮಾಡ್‍ಚಾಂದ್ ಕ್‍ೕಪಿ. ಅನ್ನನೆ ಮಾಡುಲೆ. ನಾನ್ ಸಹ ಅಬ್ರಹಾಮಂಡ ಸಂತಾನತ್‍ಲ್ ಬೆನ್ಯಾಮೀನಂಡ ಕುಲತ್‍ಲ್ ಪುಟ್ಟ್‌ನ ಇಸ್ರಾಯೇಲ.

²ದೇವ, ಮಿಂಞಲೇ ಗೊತ್ತ್ ಮಾಡ್‍ನ ತಾಂಡ ಜನತ್‍ನ ತಿರಸ್ಕಾರ ಮಾಡುಲೆ. ಎಲೀಯ ಪ್ರವಾದಿರ ವಿಷಯತ್‍ನ ದೇವಡ ವಾಕ್ಯ ಎಣ್ಣುವ ಜಾಗತ್‍ಲ್, ಎಂತ ಎಣ್ಣಿಯಂಡುಂಡ್‍ೕಂದ್ ಗೊತ್ತ್‌ಲ್ಲೆಯ? ಎಲೀಯ ದೇವಡ ಪಕ್ಕ:

³ಒಡೆಯನೇ, ಅಯಿಂಗ ನೀಡ ಪ್ರವಾದಿಯಳ ಕೊಲೆ ಮಾಡಿತ್, ನೀಡ ಬಲಿಪೀಠತ್‍ನೆಲ್ಲ ಪೊಳಿಚಿರ್‌ತ್; ನಾನ್ ಒಬ್ಬ ಮಾತ್ರ ಬಾಕಿ ಉಂಡ್. ನನ್ನ ಸಹ ಕೊಲ್ಲ್‌ವಕ್ ಪ್ರಯತ್ನ ಪಟ್ಟಂಡುಂಡ್‍ೕಂದ್ ಇಸ್ರಾಯೇಲ್ ಜನಕ್ ವಿರೋದವಾಯಿತ್ ಬೋಡ್‍ಚಿ.[41]

⁴ದೇವ ಅಂವೊಂಗ್ ಎಂತ ಉತ್ತರ ಕೊಡ್‌ತತ್‍ೕಂದ್ ಗೊತ್ತುಂಡಲ್ಲ? ಬಾಳಂಡ[42] ವಿಗ್ರಹಕ್ ಮೊಣಕಾಲ್ ಇಡತ ಏಳಾಯಿರ ಜನತ್‍ನ ನಾಕಾಯಿತ್ ಬಾಕಿ ಬೆಚ್ಚಿಯೇಂದ್ ಎಣ್ಣ್‌ಚಿ.[43]

⁵ಅನ್ನನೆ ಇಕ್ಕ ಸಹ, ಇಸ್ರಾಯೇಲ್ ಜನತ್‍ಲ್, ಕೃಪೇರಗುಂಡ್ ಆಯ್ಕೆ ಮಾಡ್‍ನ ಒರ್ ಚೆರಿಯ ಗುಂಪ್ ಬಾಕಿ ಉಂಡ್.

⁶ಅಂವೊ ಗೊತ್ತ್ ಮಾಡ್‍ವದ್ ಕೃಪೇರಗುಂಡ್, ಕ್ರಿಯೇರಗುಂಡ್ ಅಲ್ಲ. ದೇವ ಗೊತ್ತ್ ಮಾಡ್‍ವದ್ ಕ್ರಿಯೇರಗುಂಡ್ ಆಯಿತ್ಂಜತೇಂಗಿ, ಅಕ್ಕ ಕೃಪೇಂದ್ ಎಣ್ಣ್‌ವದ್ ನೇರಾನ ಕೃಪೆಯಾಯಿತ್ ಇಪ್ಪುಲೆ;

⁷ಆನಗುಂಡ್ ಎಂತ? ಇಸ್ರಾಯೇಲ್ ಜನ ತ್‍ೕಡ್‍ವದ್ ಅಯಿಂಗಕ್ ಕ್‌ಟ್ಟಿಯಂಡ್ ಇಲ್ಲೆ. ದೇವ ಆಯ್ಕೆ ಮಾಡ್‍ನಯಿಂಗಕ್ ಮಾತ್ರ ಅದ್ ಕ್‌ಟ್ಟಿಯಂಡುಂಡ್; ಬಾಕಿಯುಳ್ಳಯಿಂಗ ಇಲ್ಲಿಕತ್ತನೆ ಅಯಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡಿತುಂಡ್.

⁸ದೇವಡ ವಾಕ್ಯತ್‍ಲ್: ದೇವ ಅಯಿಂಗಕ್ ಕಣ್ಣ್ ತೊರ್‌ಪಕ್ ಕಯ್ಯತ ವರ್‌ಕ್‌ನ ತಂದಿತ್, ಕಾಂಬಕ್ ಕಯ್ಯತ ಕಣ್ಣ್‌ನ ಪಿಂಞ ಕ್‍ೕಪಕ್ ಕಯ್ಯತ ಕೆಮಿನ ಅಯಿಂಗಕ್ ಕೊಡ್‌ತತ್‍ೕಂದ್ ಒಳ್‍ದಿತುಳ್ಳನೆಕೆ ಆಚಿ.[44]

⁹ದಾವೀದ ಅಯಿಂಗಡ ವಿಷಯತ್‍ನ: ಅಯಿಂಗಡ ಗದ್ದಾಳ ಅಯಿಂಗ ಚಿಕ್ಕುವ ಕೆಣಿಯಾಯಿತು, ಬೂವನೆಕೆ ಮಾಡ್‌ವ ತಡ್‍ಪ ಕಲ್ಲಾಯಿತು, ಬದ್‍ಲ್ ಮಾಡ್‍ವಕ್ಕುಳ್ಳ ವಿಷಯವಾಯಿತು ಇಕ್ಕಡ್;

¹⁰ಅಯಿಂಗಡ ಕಣ್ಣ್, ಕಾಂಗತನೆಕೆ ಕುರ್‌ಡಾಯಿತ್ ಪೋಡ್, ಅಯಿಂಗಡ ಬೆನ್ನ್ ಎಕ್ಕಾಲು ಡೊಂಕಾಯಿತ್ ಪೋಡ್‍ೕಂದ್ ಎಣ್ಣ್‌ಚಿ.[45]

¹¹ಅಕ್ಕ ನಾನ್ ಇನ್ನನೆ ಕ್‍ೕಪಿ: ಅಯಿಂಗ ಬುದ್ದ್ ಪೋಪಕಾಯಿತಾ ಮೀರ್‌ಚಿ? ಅನ್ನನೆ ಅಲ್ಲ, ಅಯಿಂಗ ಮೀರ್‌ನಗುಂಡ್ ಯೆಹೂದ್ಯ ಅಲ್ಲತಯಿಂಗಕ್ ರಕ್ಷಣೆ ಕ್‍ಟ್ಟ್‌ಚಿ, ಅನ್ನನೆ ಅಯಿಂಗಕ್ ಒಟ್ಟೆಕಿಚ್ಚ್ ಬರಂಡೂಂದ್ ಇನ್ನನೆ ಮಾಡ್‍ಚಿ.

¹²ಅಯಿಂಗ ಮೀರ್‍ನಗುಂಡ್ ಲೋಕಕ್ ಐಶ್ವರ್ಯವು, ಅಯಿಂಗಡ ನಷ್ಟ ಯೆಹೂದ್ಯ ಅಲ್ಲತಯಿಂಗಕ್ ಆಶೀರ್ವಾದವು ಆಯಿತ್ಂಜತೇಂಗಿ, ಅಯಿಂಗ ಎಲ್ಲಾರು ಸ್ವೀಕಾರ ಮಾಡ್‍ಚೇಂಗಿ ಎಚ್ಚಕ್ ಬಲ್ಯದಾಯಿತಿಪ್ಪ.

¹³ಯೆಹೂದ್ಯಂಗಲ್ಲತ ನಿಂಗಡ ಕೂಡೆ ಇಕ್ಕ ನಾನ್ ತಕ್ಕ್ ಪರಿವಿ; ಯೆಹೂದ್ಯಂಗಲ್ಲತ ನಿಂಗಕಾಯಿತ್ ನಾನ್ ಅಪೊಸ್ತಲನಾಯಿತ್ ಉಳ್ಳಾಂಗ್, ನಾಡ ಸೇವೇನೆ ಬಲ್ಯದಾಯಿತ್ ಎಣ್ಣ್‌ವಿ.

¹⁴ಅನ್ನನೆ ಆಚೇಂಗಿಯು, ನಾಡ ಜನವಾಯಿತುಳ್ಳ ಯೆಹೂದ್ಯಂಗಕ್ ಒಟ್ಟೆಕಿಚ್ಚ್ ಬಪ್ಪನೆಕೆ ಮಾಡಿತ್, ಚೆನ್ನ ಜನಕ್ ರಕ್ಷಣೆ ಕ್‍ಟ್ಟ್‌ವನೆಕೆ ಆಡ್.

¹⁵ಅಯಿಂಗಳ ದೇವ ಬೋಂಡಾಂದ್ ತಿರಸ್ಕಾರ ಮಾಡ್‍ನದ್ ಮೂಲಕ, ಈ ಲೋಕತ್‍ನ ಅಂವೊಂಡ ಕೂಡೆ ಇಂಜ ವಿರೋದತ್‍ನ ಕಳೆಂಜಿತ್ ಸಮಾದಾನ ಮಾಡ್‌ವಕ್ ಅಂವೊಂಗ್ ಕುಶಿಯಾಚೇಂಗಿ, ಇಸ್ರಾಯೇಲ್ ಜನಳ ಸ್ವೀಕಾರ ಮಾಡ್‍ವದ್, ಇಂಞು ಎಚ್ಚಕ್ ಬಲ್ಯದಾಯಿತಿಪ್ಪ; ಅದ್ ಚತ್ತ್ ಪೋನಯಿಂಗ ಜೀವತ್‍ಲ್ ಬಂದನೆಕೆ ಇಪ್ಪ ಅಲ್ಲ?

¹⁶ದೇವಕ್ ಅರ್ಪಿಚಿಡುವ ಬಲಿರ ಮುದ್ದೆಲ್, ಆದ್ಯ ಬಾಗ ಪವಿತ್ರವಾಯಿತ್ ಇಂಜತೇಂಗಿ, ಬಾಕಿ ಮುದ್ದೆ ಎಲ್ಲಾ ಪವಿತ್ರವಾಯಿತ್ ಇಪ್ಪ, ಮರತ್‍ರ ಬೇರ್ ಪವಿತ್ರವಾಯಿತ್ ಇಂಜತೇಂಗಿ ಅದ್ಂಡ ಕೊಂಬ್ ಸಹ ಪವಿತ್ರವಾಯಿತ್ ಇಪ್ಪ.

¹⁷ಇಸ್ರಾಯೇಲ್ ಎಣ್ಣುವ ನಾಡ್‍ರ ಒಲಿವ ಮರತ್‍ರ ಚೆನ್ನ ಕೊಂಬ್‍ನ ಮುರ್‌ಚಿತ್, ಕಾಡ್‍ರ ಒಲಿವ ಮರವಾಯಿತುಳ್ಳ ನಿಂಗಳ ಆ ಜಾಗತ್‍ಲ್ ಅಂಟ್‍ಚಿಟ್ಟ್ ಬೆಚ್ಚತ್. ಅನ್ನನೆ ನಾಡ್‍ರ ಒಲಿವ ಮರತ್‍ರ ಬೇರ್‌ಕ್ ಪಿಂಞ ರಸಕ್ ನಿಂಗ ಪಾಲ್‍ದಾರಂಗಳಾಯಿತುಂಡ್.

¹⁸ನಿಂಗ ಆ ಕೊಂಬ್‍ಕ್ ವಿರೋದವಾಯಿತ್ ಬಡಾಯಿ ಮಾಡತಿ; ಅನ್ನನೆ ಹೊಗಳಿಚಿಡುವದಾಚೇಂಗಿ, ನಿಂಗ ಬೇರ್‌ನ ಪೊರ್‍ತಂಡಿಲ್ಲೆ, ಬೇರ್ ನಿಂಗಳ ಪೊರ್‌ತ್‌ತಂಡುಂಡ್‍ೕಂದ್ ಗೇನ ಮಾಡಿಯೊಳಿ.

¹⁹ನನ್ನ ಅಂಟ್‍ಚಿಡುವಕಾಯಿತ್ ಅಯಿಂಗಳ ಮುರಿಚಿರ್‌ತ್‍ೕಂದ್ ಎಣ್ಣುವಿರಲ್ಲ?

²⁰ಅಕ್ಕು, ಅಯಿಂಗಡ ಅಪನಂಬಿಕೇರಗುಂಡ್ ಅಯಿಂಗಳ ಮುರಿಚಿರ್‌ತ್. ನಿಂಗ ನಂಬಿಕೇರ ಮೂಲಕ ನಿಂದಂಡುಂಡ್; ಬಡಾಯಿ ಮಾಡತಿ, ಆಚೇಂಗಿ ಬೊತ್ತಿಯಂಡಿರಿ.

²¹ನಾಡ್‍ರ ಒಲಿವ ಮರತ್‍ರ ಕೊಂಬ್‍ನ ದೇವ ತಪ್ಪ್‌ಚಿಡ್‌ವಕ್ ಬುಟ್ಟಿತ್ತ್‌ಲ್ಲೆ. ಅಕ್ಕ, ನಿಂಗಳ ಸಹ ಅಂವೊ ಬುಡ್‍ಲೇಂದ್ ಎಚ್ಚರತ್‍ಲ್ ಇರಂಡು.

²²ಆನಗುಂಡ್, ದೇವಡ ದಯೇನ ಪಿಂಞ ಕಂಡಿತತ್‍ನ ನೋಟಿ; ಬುದ್ದಯಿಂಗಡ ಮೇಲೆ ಕಂಡಿತತ್‍ನ ಪಿಂಞ ನಿಂಗಡ ಮೇಲೆ ದಯೇನ ಕಾಂಬ್‍ಚಿಟ್ಟತ್; ನಿಂಗ ಆ ದಯೇಲ್ ನಿಂದಂಡಿರಂಡು, ಅದ್‍ಲ್ ನಿಂಗ ನಿಕ್ಕತೆ ಪೋಚೇಂಗಿ ನಿಂಗಳ ಸಹ ಕೆತ್ತಿರುವ.

²³ಇಸ್ರಾಯೇಲ್ ಜನ ಅಯಿಂಗಡ ಅಪನಂಬಿಕೇನ ಬುಟ್ಟ್‌ರ್‍ತೇಂಗಿ, ಅಯಿಂಗಳ ಪುನಃ ಅಂಟಿಚಿಡುವ. ಅಯಿಂಗಳ ಪುನಃ ಅಂಟ್‍ಚಿಡುವಕ್ ದೇವ ಶಕ್ತಿ ಉಳ್ಳಂವೊನಾಯಿತ್ ಉಂಡ್.

²⁴ಕಾಡ್‍ರ ಗುಣತ್‍ರ ಒಲಿವ ಮರಕ್ ಕೂಡ್‍ನ ನಿಂಗಳ ಕೆತ್ತಿತ್, ಅಂಟ್‍ಚಿಡುವಕ್ ಕಯ್ಯತ ನಾಡ್‍ರ ಒಲಿವ ಮರತ್‍ಲ್ ಅಂಟ್‍ಚಿಟ್ಟತೇಂಗಿ, ನಾಡ್‍ರ ಗುಣತ್‍ರ ಒಲಿವ ಮರತ್‍ರ ಕೊಂಬ್‍ನ, ತಾಂಡ ನಾಡ್‍ರ ಒಲಿವ ಮರತ್‍ಲ್ ಅಂಟ್‍ಚಿಡುವದ್ ಎಚ್ಚಕ್ ನಿಶ್ಚಯ.

²⁵ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ನಿಂಗಳೇ ಬುದ್ದಿವಂತಯಿಂಗಾಂದ್ ಗೇನಮಾಡತನೆಕೆ, ನಾನ್ ನಿಂಗಕ್ ಒರ್ ಗುಟ್ಟ್‌ನ ಎಣ್ಣಿ ತಪ್ಪಿ. ಅದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಂಗಲ್ಲತಯಿಂಗಡ ರಕ್ಷಣೆರ ಲೆಕ್ಕ ಪೂರ್ತಿ ಆಪಕತ್ತನೆ, ಇಸ್ರಾಯೇಲ್‍ರ ಒರ್ ಗುಂಪ್ ಕಠಿಣ ಮನಸ್ಸಾಯಿತೇ ಇಪ್ಪ.

²⁶ಇನ್ನನೆ ಇಸ್ರಾಯೇಲ್ ಜನಕ್ ರಕ್ಷಣೆ ಕ್‍ಟ್ಟುವ. ಅಯಿಂಗಳ ಬಚಾವ್ ಮಾಡ್‌ವಂವೊ ಚೀಯೋನಿಂಜ ಬಂದಿತ್, ಬಕ್ತಿಯಿಲ್ಲತ ಗುಣತ್‍ನ ಯಾಕೋಬಯಿಂಜ ದೂರ ಮಾಡ್‌ವಾಂದು,

²⁷ನಾನ್ ಅಯಿಂಗಡ ಪಾಪತ್‍ನ ದೂರ ಮಾಡ್‌ವಾಂದ್ ಉಳ್ಳದೇ, ನಾನ್ ಅಯಿಂಗಡ ಕೂಡೆ ಮಾಡ್‌ವ ಒಪ್ಪಂದಾಂದ್ ಒಳ್‍ದಿತುಂಡ್.[46]

²⁸ದೇವಡ ನಲ್ಲ ಸುದ್ದಿರ ವಿಷಯತ್ ನಿಂಗಡಗುಂಡ್ ಅಯಿಂಗ ವಿರೋದಿಯಂಗ; ಆಚೇಂಗಿ, ದೇವ ಆಯ್ಕೆ ಮಾಡ್‍ನಗುಂಡ್ ಅಯಿಂಗಡ ಮುತ್ತಜ್ಜಂಗಕಾಯಿತ್, ದೇವ ಪ್ರೀತಿಚಿಡ್‌ವಯಿಂಗಳಾಯಿತುಂಡ್.

²⁹ದೇವಡ ಕೃಪೇರ ವರವು, ಅಂವೊ ಕಾಕ್‌ನದು ಎಕ್ಕಾಲು ಬದ್‍ಲಾಪುಲೆ.

³⁰ನಿಂಗ ಪಂಡತ ಕಾಲತ್‍ಲ್ ದೇವಕ್ ಬಗ್ಗ್‌ಚಿಡತಯಿಂಗಳಾಯಿತ್ ಇಂಜಿರ, ಆಚೇಂಗಿ ಅಯಿಂಗ ಇಕ್ಕ ದೇವಕ್ ಬಗ್ಗ್‌ಚಿಡತಗುಂಡ್ ನಿಂಗಕ್ ಕನಿಕರ ಕ್‍ಟ್ಟ್‌ಚಿ.

³¹ಅಯಿಂಗ ಇಕ್ಕ ಬಗ್ಗ್‌ಚಿಡತೆ ಪೋಚೇಂಗಿಯು, ನಿಂಗಕ್ ಕ್‍ಟ್ಟ್‌ನ ಕನಿಕಾರತ್‌ಂಜ ಅಯಿಂಗಕ್ ಮಿಂಞಕ್ ಕನಿಕರ ಕ್‍ಟ್ಟುವ.

³²ಎಲ್ಲಾಡ ಮೇಲೆ ಕನಿಕರ ಕಾಂಬ್‍ಚಿಡುವನೆಕೆ, ದೇವ ಎಲ್ಲಾನ ಅಂವೊಂಗ್ ಬಗ್ಗ್‌ಚಿಡತನೆಕೆ ಮುಚ್ಚಿ ಬೆಚ್ಚಿತ್ಂಜತ್.

³³ಓ, ದೇವಡ ಜ್ಞಾನತ್‍ರ ಐಶ್ವರ್ಯ ಪಿಂಞ ಅಂವೊಂಡ ಬುದ್ದಿ ಎಚ್ಚಕ್ ಆಳವಾಯಿತುಂಡ್! ಅಂವೊಂಡ ನ್ಯಾಯತೀರ್ಪ್‌ನ ಕಂಡ್‌ಪುಡಿಪಕ್ ಕಯ್ಯುಲೆ, ಅಂವೊಂಡ ಬಟ್ಟೇನ ಪರಿಶೋದನೆ ಮಾಡ್‌ವಕ್ ಕಯ್ಯತನೆಕೆ ಉಂಡ್.

³⁴ಒಡೆಯಂಡ ಮನಸ್ಸ್‌ನ ಅರ್ಥಮಾಡ್‍ನಂವೊ ದಾರ್? ಅಂವೊಂಗ್ ಆಲೋಚನೆ ತಪ್ಪಂವೊ ದಾರ್?[47]

³⁵ನಂಗಕ್ ಬದ್‍ಲ್ ತಪ್ಪಕಾಯಿತ್, ಅಂವೊಂಗ್ ಮಿಂಞಲೇ ಎಂತಾಚು ಇನಾಮ್ ಕೊಡ್‍ತಂವೊ ದಾರ್?[48]

³⁶ಎಲ್ಲಾ ಅಂವೊನಗುಂಡ್, ಅಂವೊಂಡ ಮೂಲಕ, ಅಂವೊಂಗಾಯಿತ್ ಉಂಡ್; ಅಂವೊಂಗೇ ಎಕ್ಕಾಲು ಮಹಿಮೆ ಬರಡ್. ಆಮೆನ್.