Read Kodava ರೋಮ್ 13 Bible Online

ರೋಮ್ 13 - Kodava bible

ರೋಮ್ 13

¹ಎಲ್ಲಾರು ತಾಂಡ ಮೇಲೆ ಅದಿಕಾರತ್‍ಲ್ ಉಳ್ಳಯಿಂಗಕ್ ತಗ್ಗಿತ್ ನಡ್‌ಕಂಡು. ಎನ್ನಂಗೆಣ್ಣ್‌ಚೇಂಗಿ, ದೇವ ನೇಮಿಚಿಡತೆ, ಏದ್ ಅದಿಕಾರವು ಇಲ್ಲೆ. ನಂಗ ಕಾಂಬ ಎಲ್ಲಾ ಅದಿಕಾರವು ದೇವ ನೇಮಿಚತ್.

²ಆನಗುಂಡ್, ಅದಿಕಾರಕ್ ಎದ್‍ರ್ ನಿಪ್ಪಂವೊ ದೇವ ನೇಮಿಚಿಟ್ಟದಂಗ್ ಎದ್‍ರಾಯಿತ್ ನಿಂದಂಡ್ ಉಂಡ್. ಅನ್ನನೆ ಎದ್‍ರ್ ನಿಪ್ಪಯಿಂಗ ಅಯಿಂಗಕ್ ಅಯಿಂಗಳೇ ತೀರ್ಪ್ ಮಾಡಿಯಂಡುಂಡ್.

³ಅದಲ್ಲತೆ, ಅದಿಕಾರಿಯಂಗ ನಲ್ಲದ್ ಮಾಡ್‌ವಯಿಂಗಕ್ ಅಲ್ಲ, ಕೆಟ್ಟದ್ ಮಾಡ್‌ವಯಿಂಗಕೇ ಕ್ರೂರವಾಯಿತ್ ಇಪ್ಪ; ಆನಗುಂಡ್ ಅದಿಕಾರಿಯಂಗಕ್ ಪೋಡಿಯಿಲ್ಲತೆ ಬದ್‍ಕಂಡೂಂದ್ ನಿಂಗಕ್ ಆಸೆ ಇಂಜತೇಂಗಿ, ನಲ್ಲದ್ ಮಾಡಿ; ಅನ್ನನೆ ಮಾಡ್‌ವಗುಂಡ್ ನಿಂಗಕ್ ನಲ್ಲ ಪೆದ ಕ್‍ಟ್ಟುವ.

⁴ನೀಕ್ ನಲ್ಲದ್ ಆಂಡೂಂದ್ ಅಯಿಂಗ ದೇವಡ ಸೇವಕಂಗಳಾಯಿತ್ ಉಂಡ್. ನೀನ್ ಕೆಟ್ಟದ್ ಮಾಡ್‍ಚೇಂಗಿ ಬೊತ್ತಿಯಂಡಿರ್; ಮುಂಡತೆ ಅಯಿಂಗಕ್ ಅದಿಕಾರ[51] ಕೊಡ್‍ತಿತ್ತ್‌ಲ್ಲೆ; ಕೆಟ್ಟದ್ ಮಾಡ್‌ವಯಿಂಗಕ್ ಶಿಕ್ಷೆ ಕೊಡ್‍ಪಕಾಯಿತ್ ಅಯಿಂಗ ದೇವಡ ಸೇವಕನಾಯಿತುಂಡ್.

⁵ಆನಗುಂಡ್, ನಿಂಗಕ್ ಶಿಕ್ಷೆ ಕ್‍ಟ್ಟ್‌ವಾಂದ್ ಮಾತ್ರ ಅಲ್ಲ, ಮನಸಾಕ್ಷಿರಗುಂಡು ತಗ್ಗಿತ್ ನಡ್‌ಕಂಡು.

⁶ಇದ್ಂಗಾಯಿತೇ ನಿಂಗ ಕಂದಾಯ ಕೊಡ್‍ತಂಡುಂಡ್. ಅಯಿಂಗ ಈ ಕೆಲಸತ್‍ನ ನೋಟುವ ದೇವಡ ಸೇವಕಂಗಳಾಯಿತುಂಡ್.

⁷ಆನಗುಂಡ್, ನಿಂಗ ಎಲ್ಲಾರ್‌ಕು ಎಂತ ಕರ್ತವ್ಯತ್‍ನ ಮಾಡಂಡುವೋ ಅದ್‍ನ ಮಾಡಿ. ದಾರ್‌ಕ್ ಕಂದಾಯತ್‍ನ ಕೊಡ್‍ಕಂಡುವೊ ಅಯಿಂಗಕ್ ಕಂದಾಯತ್‍ನ ಕೊಡಿ, ದಾರ್‌ಕ್ ಸುಂಕ ಕೊಡ್‍ಕಂಡುವೊ ಅಯಿಂಗಕ್ ಸುಂಕತ್‌ನ ಕೊಡಿ; ದಾರ್‌ಕ್ ಬೊತ್ತಿತ್ ನಡ್‍ಕಂಡುವೊ ಅಯಿಂಗಕ್ ಬೊತ್ತಿತ್ ನಡ್‌ಕಂಡು, ದಾರ್‌ಕ್ ಮರ್ಯಾದೆ ಕೊಡ್‍ಕಂಡುವೊ ಅಯಿಂಗಕೆಲ್ಲ ಮರ್ಯಾದೆ ಕೊಡಿ.

⁸ಒಬ್ಬಂಡ ಕೂಡೆ ಒಬ್ಬ ಪ್ರೀತಿ ಮಾಡ್‌ವ ಸಾಲತ್‍ನ ಅಲ್ಲತೆ, ಬೋರೆ ಏದ್ ವಿಷಯತ್‍ಲು ಸಾಲ ಇಪ್ಪಕ್ಕಾಗ; ಬೋರೆಯಿಂಗಳ ಪ್ರೀತಿ ಮಾಡ್‌ವಂವೊ ನ್ಯಾಯಪ್ರಮಾಣತ್‍ನ ನೆರೆವೇರಿಚಿಟ್ಟಂಡುಂಡ್.

⁹ಎನ್ನನೆ ಎಣ್ಣ್‌ಚೇಂಗಿ: ವ್ಯಬಿಚಾರ ಮಾಡ್‌ವಕ್ಕಾಗ, ಕೊಲೆ ಮಾಡ್‌ವಕ್ಕಾಗ, ಕಪ್ಪಕ್ಕಾಗ, ಪೊಟ್ಟ್ ಸಾಕ್ಷಿ ಪರಿಯುವಕ್ಕಾಗ, ಬೋರೆಯಿಂಗಡ ವಸ್ತುರ ಮೇಲೆ ಆಸೆ ಪಡುವಕ್ಕಾಗ,[52] ಇನ್ನತಾನ ಪ್ರಮಾಣವು, ಬೋರೆ ಏದ್ ಪ್ರಮಾಣವು, ನೀನ್ ನಿನ್ನ ಪ್ರೀತಿ ಮಾಡ್‌ವನೆಕೆ, ಬೋರೆಯಿಂಗಳ ಸಹ ಪ್ರೀತಿ ಮಾಡಂಡೂಂದ್ ಉಳ್ಳ ಒರೇ ಪ್ರಮಾಣತ್‍ರ[53] ಒಳ್‍ಕ್ ಅಡಂಗಿತುಂಡ್.

¹⁰ಪ್ರೀತಿ ಬೋರೆಯಿಂಗಕ್ ಕೆಟ್ಟದ್ ಮಾಡುಲೆ, ಆನಗುಂಡ್ ಪ್ರೀತಿ, ನ್ಯಾಯಪ್ರಮಾಣತ್‍ನ ಪೂರ್ತಿ ಮಾಡ್‌ವದಾಯಿತ್ ಉಂಡ್.

¹¹ವರ್‌ಕ್‌ಯಿಂಜ ಏವ ಸಮಯ ಆಚೀಂದ್, ನಂಗ ಇಕ್ಕತ್‍ರ ಕಾಲತ್‍ನ ಅರ್ಥಮಾಡ್‍ನಯಿಂಗಳಾಯಿತ್, ಇನ್ನನೆ ಮಾಡಂಡು; ನಂಗ ಯೇಸುನ ನಂಬ್‍ನ ಆದ್ಯ ಕಾಲತ್‍ಲ್ ನಂಗಡ ಆಕೀರ್ ರಕ್ಷಣೆ ಪಕ್ಕತ್‍ಲ್ ಇಂಜಕಿಂಜ, ಇಕ್ಕ ಇಂಞು ಜಾಸ್ತಿ ನಂಗಡ ಪಕ್ಕತ್‍ಲ್ ಉಂಡ್.

¹²ಬೈಟ್ ದುಂಬ ಕಳೆಂದ್ ಪೋಚಿ, ಪೋಲ್ ಪಕ್ಕ ಬಾತ್; ಆನಗುಂಡ್ ಇರ್‌ಟ್‌ರ ಕ್ರಿಯೇನ ಬುಟ್ಟಿತ್, ಬೊಳಿರ ಆಯುದತ್‍ನ ಇಡೋನ.

¹³ಕೂಟ್‌ಕಳಿ, ಕುಡಿಪದ್, ಲೈಂಗಿಕ ಪಾಪ, ಕಾಮಾಬಿಲಾಷೆ, ತರ್ಕ, ಒಟ್ಟೆಕಿಚ್ಚ್ ಉಳ್ಳಯಿಂಗಳಾಯಿತ್ ನಡ್‍ಕತೆ, ಪೋಲ್‍ಲ್ ನಡ್‍ಪಯಿಂಗಡನೆಕೆ ಸರಿಯಾಯಿತ್ ನಡ್‌ಕಂಡು.

¹⁴ಆಚೇಂಗಿ, ತಡೀರ ಮೋಹಕಾಯಿತ್ ತಡೀನ ನೋಟತೆ, ಒಡೆಯನಾನ ಯೇಸು ಕ್ರಿಸ್ತನ ಇಟ್ಟೊಳಿ.