Read Kodava ರೋಮ್ 3 Bible Online

ರೋಮ್ 3 - Kodava bible

ರೋಮ್ 3

¹ಅನ್ನನಾಚೇಂಗಿ, ಯೆಹೂದ್ಯಂಗಳಾಯಿತ್ ಇಪ್ಪದ್‍ಲ್ ಬಲ್ಯರಿಕೆ ಎಂತ? ಸುನ್ನತಿ ಮಾಡ್‌ವಗುಂಡ್ ಅಯಿಂಗಕ್ ಎಂತ ಪ್ರಯೋಜನ?

²ಅಯಿಂಗ ಯೆಹೂದ್ಯಂಗಳಾಯಿತ್ ಉಳ್ಳಾಂಗ್ ಎಲ್ಲಾ ರೀತಿಲ್ ಅಯಿಂಗ ಬಲ್ಯಂಗಳಾಯಿತ್ ಉಂಡ್. ಎಲ್ಲಾಕಿಂಜ ಮುಕ್ಯವಾಯಿತ್ ದೇವಡ ವಾಕ್ಯ ಅಯಿಂಗಡ ಪಕ್ಕ ಒಪ್ಪ್‌ಚಿಟ್ಟಿತ್ಂಜತ್.

³ಅಯಿಂಗಡಲ್ಲಿ ಚೆನ್ನ ಜನ ನಂಬತೆ ಪೋಚೇಂಗಿಯು ಎಂತ? ಅಯಿಂಗಡ ಅಪನಂಬಿಕೆ ದೇವಡ ನಂಬಿಕಸ್ತನಾಯಿತ್‌ಪ್ಪ ಗುಣತ್‍ನ ಪಾಳ್ ಮಾಡ್‌ವಕ್ ಕಯ್ಯುವ?

⁴ಅನ್ನನೆ ಆಪುಲೆ. ನೀನ್ ಎಣ್ಣುವದ್ ಸತ್ಯಾಂದ್ ಎಲ್ಲಾರ್‌ಕು ಗೊತ್ತಾಂಡು, ಪಿಂಞ ನೀಡ ನ್ಯಾಯತ್‍ನ ವಿಚಾರಣೆ ಮಾಡ್‌ವಕ ನೀಕ್ ಜಯ ಕ್‍ಟ್ಟಂಡೂಂದ್[4] ಒಳ್‍ದಿತುಳ್ಳನೆಕೆ, ದೇವ ಮಾತ್ರ ಸತ್ಯವಂತಂವೊ, ಮನುಷ್ಯಂಗೆಲ್ಲಾ ಪೊಟ್ಟ್ ಪರಿಯುವಯಿಂಗಾಂದ್ ಆಚಿ.

⁵ನಂಗಡ ಅನೀತಿ ದೇವಡ ನೀತಿನ ಕಾಟ್‍ಚೇಂಗಿ, ನಂಗ ಎಂತ ಎಣ್ಣುವಕ್ ಕಯ್ಯು? ಶಿಕ್ಷೆ ತಪ್ಪ ದೇವ ಅನೀತಿವಂತಂವೊನ? (ನಾನ್ ಇದ್‍ನ, ಮನುಷ್ಯ ರೀತಿಲ್ ತಕ್ಕ್ ಪರ್ಂದಂಡುಳ್ಳ).

⁶ಅನ್ನನೆ ಅಲ್ಲ! ಅನ್ನನೆ ಆಚೇಂಗಿ, ದೇವ ಎನ್ನನೆ ಈ ಲೋಕತ್‍ನ ತೀರ್ಪ್ ಮಾಡ್‌ವ?

⁷ನಾನ್ ಪೊಟ್ಟ್ ಪರಿಯುವಗುಂಡ್, ದೇವಡ ಸತ್ಯ ಅಂವೊಂಗ್ ಮಹಿಮೆನ ಬಲ್ಯದ್ ಮಾಡ್‌ವದಾಚೇಂಗಿ, ನಾಕ್ ಎನ್ನಂಗ್ ಇಂಞು ಮಿಂಞಕ್ ಪಾಪೀಂದ್ ತೀರ್ಪ್ ಕ್‍ಟ್ಟಂಡು?

⁸ನಲ್ಲದ್ ಕ್‍ಟ್ಟುವಕಾಯಿತ್ ಕೆಟ್ಟದ್ ಮಾಡಂಡೂಂದ್ ಎಣ್ಣುವನೆಕೆ ಆಪ ಅಲ್ಲ? ನಂಗ ಅನ್ನನೆ ಬೋದನೆ ಮಾಡ್‌ವಯಿಂಗಾಂದ್ ಚೆನ್ನ ಜನ ನಂಗಳ ದೂಷಣೆ ಮಾಡಿಯಂಡ್ ಉಂಡ್. ಅಯಿಂಗಕ್ ಕಂಡಿತವಾಯಿತ್ ದೇವಡ ಶಿಕ್ಷೆ ಕ್‍ಟ್ಟಂಡು.

⁹ಅನ್ನನಾಚೇಂಗಿ ಎಂತ? ನಂಗ ಅಯಿಂಗಕಿಂಜ ವಿಷೇಶವಾನಯಿಂಗಳ? ಅನ್ನನೆ ಒಂದು ಇಲ್ಲೆ! ಯೆಹೂದ್ಯಂಗಳಾಚೇಂಗಿಯು ಸರಿ, ಯೆಹೂದ್ಯಂಗಲ್ಲತಯಿಂಗಳಾಚೇಂಗಿಯು ಸರಿ, ಎಲ್ಲಾರು ಪಾಪತ್‍ರ ಶಕ್ತಿರ ಅಡಿಕ್ ಒಳಪಟ್ಟಿತುಂಡ್‍ೕಂದ್ ನಾನ್ ಮಿಂಞಲೇ ದೃಡ ಪಡ್‍ತ್‍ನ.

¹⁰ಈಂಗಡ ವಿಷಯತ್‍ನ ದೇವಡ ವಾಕ್ಯತ್‍ಲ್: ನೀತಿವಂತಂವೋಂದ್ ದಾರೂ ಇಲ್ಲೆ, ಒಬ್ಬನು ಇಲ್ಲೆ,

¹¹ಅರ್ಥ ಮಾಡ್‌ವಂವೊ ಇಲ್ಲೆ, ದೇವನ ತ್‍ೕಡ್‌ವಂವೊನು ಇಲ್ಲೆ.

¹²ಎಲ್ಲಾರು ಬಟ್ಟೆ ತಪ್ಪಿ ಪೋಚಿ; ಒಮ್ಮಕೆ ಪಾಳಾಯಿ ಪೋಚಿ; ನಲ್ಲದ್ ಮಾಡ್‌ವಂವೊ ದಾರೂ ಇಲ್ಲೆ, ಒಬ್ಬನು ಇಲ್ಲೆ[5].

¹³ಅಯಿಂಗಡ ತಕ್ಕ್ ಕ್‍ೕಡ್ ದುಂಬ್‍ನದಾಯಿತ್, ಗೋರಿಯಿಂಜ ಬಪ್ಪ ನಾತತ್‍ರನೆಕೆ ಉಂಡ್, ಅಯಿಂಗಡ ನಾವ್ಂಜ ವಂಚನೆರ ಪೊಟ್ಟ್ ತಕ್ಕ್ ಬಂದಂಡುಂಡ್, ಅಯಿಂಗ ತಕ್ಕ್ ಪರ್ಂದತೇಂಗಿ ಅದ್ ಪಾಂಬ್‍ರ ವಿಷತ್‍ರನೆಕೆ ಉಂಡ್[6].

¹⁴ಅಯಿಂಗಡ ಬಾಯಿ, ಕೆಟ್ಟ ತಕ್ಕ್ ಪಿಂಞ ಶಾಪ ದುಂಬಿತ್ ಉಂಡ್[7].

¹⁵ಅಯಿಂಗಡ ಕಾಲ್ ಕೊಲ್ಲ್‌ವಕ್ ಬೆರಿಯ ಪೋಯಂಡುಂಡ್.

¹⁶ಅಯಿಂಗಡ ಬಟ್ಟೇಲ್ ನಾಶವು ಪಾಳು ಉಂಡ್.

¹⁷ಶಾಂತಿರ ಬಟ್ಟೆ ಅಯಿಂಗಕ್ ಗೊತ್ತ್‌ಲ್ಲೆ[8].

¹⁸ಅಯಿಂಗಡ ಕಣ್ಣ್‌ಕ್ ದೇವಡ ಮೇಲೆ ಪೋಡಿ ಒಂದು ಇಲ್ಲೇಂದ್ ಒಳ್‍ದಿತುಂಡಲ್ಲ?[9]

¹⁹ದೇವಡ ನ್ಯಾಯಪ್ರಮಾಣತ್‍ಲ್ ಎಣ್ಣುವ ವಿಷಯವೆಲ್ಲ, ನ್ಯಾಯಪ್ರಮಾಣಕ್ ಒಳಪಟ್ಟಯಿಂಗಕ್ ಎಣ್ಣಿಯಂಡುಂಡ್‍ೕಂದ್ ನಂಗಕ್ ಇಕ್ಕ ಗೊತ್ತುಂಡ್. ಅನ್ನನೆ ದಾರೂ ನಂಗ ಪಾಪಿ ಅಲ್ಲಾಂದ್ ಎಣ್ಣುವಕ್ ಕಯ್ಯತನೆಕೆ, ಈ ಲೋಕತ್‍ಲ್ ಉಳ್ಳ ಎಲ್ಲಾರು ಅಂವೊಂಗ್ ಲೆಕ್ಕ ಕೊಡ್‍ಪನೆಕೆ ಆಚಿ.

²⁰ಆನಗುಂಡ್, ನ್ಯಾಯಪ್ರಮಾಣತ್‍ರಗುಂಡ್ ಒರ್ ಮನುಷ್ಯನು ದೇವಡ ಮಿಂಞತ್ ನೀತಿವಂತವೊನಾಯಿತ್ ಆಪಕ್ ಕಯ್ಯುಲೆ. ಆಚೇಂಗಿ ನ್ಯಾಯಪ್ರಮಾಣತ್‍ರ ಮೂಲಕ ಪಾಪ ಎಂತ್‍ೕಂದ್ ಗೊತ್ತಾಪ.

²¹ಇನ್ನನೆ ಇಪ್ಪಕ, ನ್ಯಾಯಪ್ರಮಾಣ ಇಲ್ಲತೆ, ದೇವಡ ನೀತಿನ ಎಲ್ಲಾರು ಕಾಂಬನೆಕೆ ಮಾಡಿರ್‌ತ್; ಅದ್ಂಡ ವಿಷಯತ್ ನ್ಯಾಯಪ್ರಮಾಣವು, ಪ್ರವಾದಿಯಂಗಳು ಸಾಕ್ಷಿ ಕೊಡ್‍ತಂಡುಂಡ್.

²²ದೇವಡ ನೀತೀಂದ್ ಎಣ್ಣುವದ್, ಯೇಸು ಕ್ರಿಸ್ತಂಡಲ್ಲಿ ಇಡ್‌ವ ನಂಬಿಕೇರ ಮೂಲಕ ನಂಗಕ್ ಕ್‍ಟ್ಟ್‌ವದ್, ಅದ್ ನಂಬಿಕೆ ಇಡ್‌ವಯಿಂಗ ದಾರಾಯಿತ್ಂಜತೇಂಗಿಯು, ಅಯಿಂಗ ಎಲ್ಲಾರ್‌ಕು ಕ್‍ಟ್ಟುವ, ಏದ್ ಪಕ್ಷಪಾತವು ಇಲ್ಲೆ.

²³ಎಲ್ಲಾರು ಪಾಪ ಮಾಡಿತ್, ದೇವಡ ಮಹಿಮೆನ ಕಳೆಂದಯಿಂಗಳಾಯಿತುಂಡ್.

²⁴ಅಂವೊಂಡ ಇನಾಮ್‍ರ ಕೃಪೇರ ಮೂಲಕ, ಯೇಸು ಕ್ರಿಸ್ತಂಡ ವಿಮೋಚನತ್‍ರಗುಂಡ್ ಮಾತ್ರ ನೀತಿವಂತಯಿಂಗಳಾಯಂಡುಂಡ್.

²⁵ತಾಂಡ ಚೋರೆರ ಮೂಲಕ ನಂಬಿಕೆ ಇಡ್‌ವಯಿಂಗಡ ಪಾಪತ್‍ರ ಪರಿಹಾರವಾಯಿತ್ ಆಪನೆಕೆ ಯೇಸುನ ಎಲ್ಲಾಡ ಮಿಂಞತ್ ಅರ್ಪಣೆ ಮಾಡ್‍ಚಿ. ಇನ್ನನೆ ದೇವ ನೀತಿಯುಳ್ಳಂವೋಂದ್ ನಿರೂಬಿಚಿಟ್ಟತ್. ಎನ್ನಂಗೆಣ್ಣ್‌ಚೇಂಗಿ, ದೇವ ತಾಂಡ ಪೊರುಮೇಲ್, ಕಯಿಂಜ ಕಾಲತ್‍ಲ್ ಮಾಡ್‍ನ ಪಾಪತ್‍ನ ಕಾಂಗತನೆಕೆ ಇಂಜತ್.

²⁶ಆಚೇಂಗಿ, ಇಕ್ಕ, ಅನ್ನನೆ ಮಾಡಿತ್, ಅಂವೊಂಡ ನೀತಿನ ಕಾಂಬ್‍ಚಿಟ್ಟಂಡುಂಡ್. ಇನ್ನನೆ ಮಾಡ್‍ನಗುಂಡ್, ದೇವ ಒಬ್ಬನೇ ನೀತಿವಂತಂವೋಂದು, ಯೇಸುನ ನಂಬುವಯಿಂಗಳ ದೇವಡ ಮಿಂಞತ್ ನೀತಿವಂತಯಿಂಗಳಾಯಿತ್ ಮಾಡಿಯಂಡ್ ಉಂಡ್‍ೕಂದು ಗೊತ್ತಾಚಿ.

²⁷ಅಕ್ಕ, ಎನ್ನಂಗ್ ಹೊಗಳಿಚಿಡಂಡು? ಅನ್ನನೆ ಮಾಡ್‌ವಕ್ ಜಾಗ ಇಲ್ಲತೆ ಪೋಚಿ. ನಂಗಕ್ ಪಾಪತ್‍ರ ಶಿಕ್ಷೆ ಕ್‍ಟ್ಟತನೆಕೆ ಮಾಡ್‍ನದ್ ಏದ್ ಪ್ರಮಾಣತ್‍ರಗುಂಡ್? ಕ್ರಿಯೆರ ಪ್ರಮಾಣತ್‍ರಗುಂಡಾ? ಅಲ್ಲ, ನಂಬಿಕೇರ ಪ್ರಮಾಣತ್‍ರ ಮೂಲಕವೇ.

²⁸ಆನಗುಂಡ್, ಮನುಷ್ಯ ನ್ಯಾಯಪ್ರಮಾಣತ್‍ರ ಕ್ರಿಯೇರಗುಂಡ್ ಅಲ್ಲ, ನಂಬಿಕೇರ ಮೂಲಕವೇ ನೀತಿವಂತಂವೊನಾಪಾಂದ್ ನಂಗ ತೀರ್ಮಾನ ಮಾಡಿಯಂಡುಂಡ್.

²⁹ಯೆಹೂದ್ಯಂಗಕ್ ಮಾತ್ರ ಅಂವೊ ದೇವನಾ? ಯೆಹೂದ್ಯ ಅಲ್ಲತಯಿಂಗಕೂ ಅಂವೊ ದೇವ ತಾನೇ? ಅಕ್ಕು, ಯೆಹೂದ್ಯ ಅಲ್ಲತಯಿಂಗಕು ಅಂವೊ ದೇವ.

³⁰ಸುನ್ನತಿ ಮಾಡ್‍ನಯಿಂಗಳ ನಂಬಿಕೇರಗುಂಡ್ ಪಿಂಞ ಸುನ್ನತಿ ಇಲ್ಲತಯಿಂಗಳ ನಂಬಿಕೇರ ಮೂಲಕ ನೀತಿವಂತಯಿಂಗಳಾಯಿತ್ ಮಾಡ್‌ವ ದೇವ ಒಬ್ಬನೇ.

³¹ಅನ್ನನೆ ಆಚೇಂಗಿ, ನಂಬಿಕೇರಗುಂಡ್ ನ್ಯಾಯಪ್ರಮಾಣತ್‍ನ ನಂಗ ಅಲ್ಲಗೆಳೆಯುವದಾ? ಅನ್ನನೆ ಅಲ್ಲ, ನ್ಯಾಯಪ್ರಮಾಣತ್‍ನ ನಂಗ ಸ್ತಿರಪಡ್‌ತಿಯಂಡುಂಡ್.