Read Kodava ರೋಮ್ 4 Bible Online

ರೋಮ್ 4 - Kodava bible

ರೋಮ್ 4

¹ನಂಗಡ ಜನಾಂಗತ್‍ರ ಮುತ್ತಜ್ಜನಾನ ಅಬ್ರಹಾಮಂಡ ವಿಷಯತ್‍ಲ್ ನಂಗಕ್ ಎಂತ ಎಣ್ಣ್‌ವಕ್ ಕಯ್ಯು? ಅಂವೊ ಎನ್ನನೆ ನೀತಿವಂತವೊನಾಚಿ?

²ಅಬ್ರಹಾಮ ಅಂವೊಂಡ ಕ್ರಿಯೆರ ಮೂಲಕ ನೀತಿವಂತಂವೊನಾಯಿತ್ಂಜತೇಂಗಿ ಹೊಗಳಿಚಿಡ್‌ವಕ್ ಅಂವೊಂಗ್ ಜಾಗ ಉಂಡ್; ಆಚೇಂಗಿ ದೇವಡ ಮಿಂಞತ್ ಅನ್ನನೆ ಮಾಡ್‌ವಕ್ ಆಪುಲೆ.

³ದೇವಡ ವಾಕ್ಯ ಎಂತ ಎಣ್ಣಿಯಂಡುಂಡ್? ಅಬ್ರಹಾಮ ದೇವನ ನಂಬ್‍ಚಿ, ಅದ್‍ನ ದೇವ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಮಾಡ್‍ಚೀಂದ್ ಎಣ್ಣಿಯಂಡುಂಡ್.[10]

⁴ಕ್ರಿಯೆ ಮಾಡ್‌ವಂವೊಂಗ್ ಕ್‍ಟ್ಟುವ ಕೂಲಿನ ಕೃಪೇಂದ್ ಎಣ್ಣುಲೆ, ಆಚೇಂಗಿ ಅದ್‍ನ ಅಂವೊಂಗ್ ಕೊಡ್‌ಪಕುಳ್ಳದ್‍ೕಂದ್ ಎಣ್ಣುವ.

⁵ಒಬ್ಬ ಕ್ರಿಯೆ ಮಾಡತೆ, ಪಾಪಿಯಳ ನೀತಿವಂತಂವೊನಾಯಿತ್ ಮಾಡ್‌ವಂವೊಂಡ ಮೇಲೆ ನಂಬಿಕೆ ಇಟ್ಟತೇಂಗಿ, ಅಂವೊಂಡ ನಂಬಿಕೆಯೇ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಆಪಲ್ಲ.

⁶ಅನ್ನನೆ ಕ್ರಿಯೆ ಮಾಡತೆ, ದೇವಡಗುಂಡ್ ನೀತಿವಂತವೊನಾಪ ಮನುಷ್ಯಂಡ ಆಶೀರ್ವಾದತ್‍ನ ದಾವೀದ ಸಹ ಇನ್ನನೆ ಎಣ್ಣಿತುಂಡ್.

⁷ದಾಡ ಅಕ್ರಮಕೆಲ್ಲ ಮನ್ನಿಪ್ ಕ್‍ಟ್ಟ್‌ಚೋ, ದಾಡ ಪಾಪತ್‍ನೆಲ್ಲ ದೇವ ಮುಚ್ಚಿತೋ ಅಯಿಂಗೆಲ್ಲ ಆಶೀರ್ವಾದ ಪಡ್ಂದಯಿಂಗ.

⁸ದಾಡ ಪಾಪತ್‍ನೆಲ್ಲ ಒಡೆಯ ಲೆಕ್ಕ ಮಾಡಿತ್‌ಲ್ಲೆಯೋ ಅಂವೊ ಆಶೀರ್ವಾದ ಪಡ್ಂದಂವೊ[11].

⁹ಈ ಆಶೀರ್ವಾದ ಸುನ್ನತಿ ಮಾಡ್‍ನಯಿಂಗಕ್ ಮಾತ್ರ ಕ್‍ಟ್ಟುವಾ? ಅಥವ ಸುನ್ನತಿ ಮಾಡತಯಿಂಗಕು ಉಂಡಾ? ಅಬ್ರಹಾಮಂಡ ನಂಬಿಕೆನ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಮಾಡ್‍ಚೀಂದ್ ನಂಗ ಎಣ್ಣಿಯಂಡುಂಡಲ್ಲ?

¹⁰ಅಕ್ಕ, ಅದ್ ಅಂವೊಂಗ್ ಎಕ್ಕ ಕ್‍ಟ್ಟ್‌ಚಿ? ಅಂವೊಂಗ್ ಸುನ್ನತಿ ಮಾಡ್‌ವಕ್ ಮಿಂಞ ಕ್‍ಟ್ಟ್‌ಚಾ? ಅಥವ ಸುನ್ನತಿ ಆನ ಪಿಂಞ ಕ್‍ಟ್ಟ್‌ಚಾ? ಸುನ್ನತಿ ಆನ ಪಿಂಞ ಅಲ್ಲ, ಸುನ್ನತಿ ಆಪಕ್ ಮಿಂಞಲೇ ಕ್‍ಟ್ಟ್‌ಚಿ.

¹¹ಅದಲ್ಲತೆ, ಅಂವೊಂಗ್ ಸುನ್ನತಿ ಆಪಕ್ ಮಿಂಞ, ನಂಬಿಕೇರ ಮೂಲಕ ಅಂವೊಂಗ್ ಕ್‍ಟ್ಟ್‌ನ ನೀತಿಕ್ ಮುದ್ರೆಯಾಯಿತ್ ಸುನ್ನತಿ ಎಣ್ಣುವ ಗುರ್‍ತ್‍ನ ಅಂವೊಂಗ್ ಕೊಡ್‍ತತ್. ಆನಗುಂಡ್, ಸುನ್ನತಿ ಮಾಡತಯಿಂಗಳಾಯಿತ್ ನಂಬುವ ಎಲ್ಲಾರ್‌ಕು, ನೀತಿರ ಲೆಕ್ಕ ಕ್‍ಟ್ಟಿತ್ ಅಯಿಂಗಕ್ ಸಹ ಅಂವೊ ಅಪ್ಪನಾಯಿತ್ ಇಪ್ಪನೆಕೆ ಆಚಿ.

¹²ಅಬ್ರಹಾಮ, ಸುನ್ನತಿ ಮಾಡ್‍ನಯಿಂಗಕ್, ಅಯಿಂಗ ಸುನ್ನತಿ ಮಾಡ್‍ನಗುಂಡ್ ಮಾತ್ರ ಅಪ್ಪನಾಯಿತ್ ಅಲ್ಲತೆ, ಅಂವೊ ಸುನ್ನತಿ ಮಾಡ್‌ವಕ್ ಮಿಂಞ ಅಂವೊಂಗ್ ಇಂಜ ನಂಬಿಕೇರನೆಕೆ, ಸುನ್ನತಿ ಮಾಡ್‍ನಯಿಂಗ ನಂಬಿಕೆ ಇಡ್‍ವಕ, ಅಂವೊ ಅಯಿಂಗಕ್ ಅಪ್ಪನಾಯಿತ್ ಆಪನೆಕೆ ಆಚಿ.

¹³ಅಬ್ರಹಾಮಂಗ್ ಪಿಂಞ ಅಂವೊಂಡ ಸಂತಾನಕಾರಂಗಕ್, ಈ ಲೋಕತ್‍ರ ಹಕ್ಕ್‌ದಾರಂಗಳಾಪಿರಾಂದ್ ಕ್‍ಟ್ಟ್‌ನ ವಾಗ್ದಾನ, ನ್ಯಾಯಪ್ರಮಾಣತ್‍ರ ಮೂಲಕ ಕ್‍ಟ್ಟತೆ, ನಂಬಿಕೇರ ಮೂಲಕ ಬಪ್ಪ ನೀತಿರಗುಂಡ್ ಕ್‍ಟ್ಟ್‌ಚಿ.

¹⁴ನ್ಯಾಯಪ್ರಮಾಣತ್‍ರನೆಕೆ ಮಾಡ್‌ವಯಿಂಗ ಹಕ್ಕ್‌ದಾರಂಗಳಾಚೇಂಗಿ, ನಂಬಿಕೇಕ್ ಒರ್ ಬೆಲೆಯು ಇಪ್ಪುಲೆ, ವಾಗ್ದಾನವು ಅರ್ಥ ಇಲ್ಲತೆ ಪೋಪ.

¹⁵ನ್ಯಾಯಪ್ರಮಾಣ ದೇವಡ ಬಲ್ಯ ಚೆಡಿನ ಕೊಂಡ್ ಬಪ್ಪ, ನ್ಯಾಯಪ್ರಮಾಣ ಇಲ್ಲೇಂಗಿ ಅಪರಾದವು ಇಲ್ಲೆ.

¹⁶ಆನಗುಂಡ್, ಬಾದ್ಯತೆ ಕೃಪೆಯಿಂಜ ಬಪ್ಪನೆಕೆ ಅದ್ ನಂಬಿಕೇರ ಮೂಲಕ ಬಾತ್; ನ್ಯಾಯಪ್ರಮಾಣಕ್ ಕೂಡ್‍ನ ಸಂತಾನಕಾರಂಗಕ್ ಮಾತ್ರ ಅಲ್ಲತೆ, ನಂಗ ಎಲ್ಲಾರ್‌ಕು ಅಪ್ಪನಾನ ಅಬ್ರಹಾಮಂಡ ನಂಬಿಕೇಕ್ ಕೂಡ್‍ನ ಎಲ್ಲಾ ಸಂತಾನಕಾರಂಗಕು ಆ ವಾಗ್ದಾನ ಕಂಡಿತವಾಯಿತ್ ಬಂದಂಡುಂಡ್.

¹⁷ದುಂಬ ಜಾತಿಯಂಗಕ್ ನಿನ್ನ ಅಪ್ಪನಾಯಿತ್ ಮಾಡ್‌ವೀಂದ್ ಒಳ್‍ದಿತುಳ್ಳನೆಕೆ, ಅಂವೊ ನಂಬ್‍ನಂವೊಂಡ ಮಿಂಞತ್ ಪಿಂಞ ಚತ್ತಯಿಂಗಳ ಪುನಃ ಜೀವತ್‍ಲ್ ಕೊಂಡ್ ಬಪ್ಪಂವೊಂಡ ಮಿಂಞತ್ ಪಿಂಞ ಇಲ್ಲತದ್‍ನ ಉಳ್ಳನೆಕೆ ಕಾಕ್‍ವಂವೊನಾಯಿತ್ತುಳ್ಳ ದೇವಡ ಮಿಂಞತ್‍ಲ್ ನಂಗ ಎಲ್ಲಾರ್‌ಕು ಅಪ್ಪನಾಯಿತ್ ಆಚಿ.[12]

¹⁸ನೀಡ ಸಂತಾನಕಾರಂಗ ಇಚ್ಚಕ್ ಇಪ್ಪಾಂದ್ ಎಣ್ಣ್‌ನನೆಕೆ, ಅಂವೊ ದುಂಬ ಜಾತಿಯಂಗಕ್ ಅಪ್ಪನಾಯಿತ್ ಆಪಕ್ ಏದ್ ಸಾದ್ಯವು ಇಲ್ಲತೆ ಇಂಜತೇಂಗಿಯು, ಅದ್‍ನ ನಿರಿಕ್ಷೇಲ್ ನಂಬ್‍ಚಿ.[13]

¹⁹ಅಂವೊ ಸುಮಾರ್ ನೂರ್ ವಯಸಾಯಿತ್ ಇಪ್ಪಕ, ತಾಂಡ ತಡಿಯಿಂಜ ಒರ್ ಕುಂಞಿ ತಪ್ಪಕುಳ್ಳ ಶಕ್ತಿ ಇಲ್ಲೇಂದು, ಅಂವೊಂಡ ಪೊಣ್ಣ್ ಸಾರಳಡ ಗರ್ಬಗೂಡ್ ಚತ್ತ್ ಪೋಯಿತ್‍ೕಂದು ಗೊತ್ತ್ಂಜತ್. ಆಚೇಂಗಿಯು, ಅಂವೊಂಡ ನಂಬಿಕೆ ಕಮ್ಮಿಯಾಯಿತ್‌ಲ್ಲೆ.

²⁰ದೇವಡ ವಾಗ್ದಾನತ್‍ರ ವಿಷಯತ್ ಅಂವೊಂಗ್ ಅಪನಂಬಿಕೆ ಮಾಡತೆ, ನಂಬಿಕೇಲ್ ಸ್ತಿರಪಟ್ಟಿತ್, ದೇವಕ್ ಮಹಿಮೆ ಕೊಡ್‍ತತ್.

²¹ದೇವ ವಾಗ್ದಾನ ಮಾಡ್‍ನದ್‍ನ ನೆರೆವೇರಿಚಿಡುವಕ್ ಅಂವೊಂಗ್ ಶಕ್ತಿ ಉಂಡ್‍ೕಂದ್ ನಿಶ್ಚಯವಾಯಿತ್ ನಂಬ್‍ಚಿ.

²²ಆನಗುಂಡ್, ದೇವ ಅಂವೊನ ನೀತಿವಂತಂವೋಂದ್ ಲೆಕ್ಕ ಮಾಡ್‍ಚಿ.[14]

²³ಅದ್ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಆಚೀಂದ್ ಎಣ್ಣುವದ್ ಅಂವೊಂಗ್ ಮಾತ್ರ ಅಲ್ಲ, ನಂಗಕಾಯಿತ್ ಸಹ ಒಳ್‍ದಿ ಬೆಚ್ಚಿತುಂಡ್.

²⁴ನಂಗಡ ಒಡೆಯನಾನ ಯೇಸುನ ಚಾವ್‍ಯಿಂಜ ಎಪ್ಪ್‌ಚಿಟ್ಟಂವೊನ ನಂಬುವ ನಂಗಕ್ ಅನ್ನನೆ ಲೆಕ್ಕ ಆಪ.

²⁵ನಂಗ ನೀತಿವಂತಯಿಂಗಳಾಯಿತ್ ಆಂಡೂಂದ್, ನಂಗಡ ಪಾಪಕಾಯಿತ್ ಅಂವೊನ ಚಾವ್‍ಕ್ ಒಪ್ಪ್‌ಚಿಟ್ಟಿತ್, ಅಂವೊನ ಚಾವ್‍ಯಿಂಜ ಎಪ್ಪ್‌ಚಿಟ್ಟತ್.