Read Kodava ರೋಮ್ 5 Bible Online

ರೋಮ್ 5 - Kodava bible

ರೋಮ್ 5

¹ಇನ್ನನೆ, ನಂಗ ನಂಬಿಕೆಯಿಂಜ ನೀತಿವಂಯಿಂಗಳಾನಗುಂಡ್, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ನಂಗಕ್ ದೇವಡ ಪಕ್ಕ ಸಮಾದಾನ ಕ್‍ಟ್ಟ್‌ಚಿ.

²ಇಕ್ಕ ನಂಗ ಸ್ತಿರವಾಯಿತ್ ನಿಂದಂಡುಳ್ಳ ಈ ಕೃಪೇರ ಒಳ್‍ಕ್ ಪೋಪಕುಳ್ಳ ಬಟ್ಟೇನ ನಂಬಿಕೇರ ಮೂಲ ಪಡ್ಂದಿತ್, ದೇವಡ ಮಹಿಮೆಲ್ ನಂಗ ಪಾಲ್‍ದಾರಂಗಳಾಪಾಂದ್ ಉಳ್ಳ ನಿರಿಕ್ಷೇಲ್ ಹೊಗಳಿಯಂಡುಂಡ್.

³ಅದ್ ಮಾತ್ರ ಅಲ್ಲ, ಕಷ್ಟ ತಾಳ್ಮೆನೆ, ತಾಳ್ಮೆ ಚಾಯಿ ಗುಣತ್‍ನ, ಚಾಯಿ ಗುಣ ನಿರಿಕ್ಷೇನ ಉಂಟ್ ಮಾಡ್‌ವಾಂದ್ ನಂಗಕ್ ಗೊತ್ತಾಯಿತ್,

⁴ನಂಗಕ್ ಬಪ್ಪ ಕಷ್ಟತ್‍ಲ್ ಸಹ ನಂಗ ಹೊಗಳಿಯಂಡುಂಡ್.

⁵ಈ ನಿರೀಕ್ಷೆ ನಂಗಳ ನಿರಾಶೆ ಮಾಡುಲೆ, ಎನ್ನಂಗೆಣ್ಣ್‌ಚೇಂಗಿ, ನಂಗಕ್ ತಂದಿತುಳ್ಳ ಪವಿತ್ರಾತ್ಮತ್‍ರಗುಂಡ್ ದೇವಡ ಪ್ರೀತಿ ನಂಗಡ ಹೃದಯತ್‍ಲ್ ಬೂಕಿತುಂಡ್.

⁶ನಂಗ ಶಕ್ತಿ ಇಲ್ಲತಯಿಂಗಳಾಯಿತಿಪ್ಪಕಲೇ, ನೇಮಿಚಿಟ್ಟ ಕಾಲತ್‍ಲ್, ಕ್ರಿಸ್ತ ಅಕ್ರಮಕಾರಂಗಕಾಯಿತ್ ಚತ್ತತ್.

⁷ನೀತಿವಂತಂವೊನಾನ ಒರ್ ಮನುಷ್ಯಂಗಾಯಿತ್ ಒಬ್ಬ ಚಾವದೇ ಕಷ್ಟ ಕಾರ್ಯ, ಒರ್ ನಲ್ಲ ಮನುಷ್ಯಂಗಾಯಿತ್ ಒಮ್ಮೊಮ ದಾರಾಚು ಚಾವಕ್ ಸಹ ದೈರ್ಯ ಎಡ್‍ತವ.

⁸ಆಚೇಂಗಿ, ನಂಗ ಪಾಪಿಯಳಾಯಿತ್ ಇಪ್ಪಕಲೆ ಕ್ರಿಸ್ತ ನಂಗಕಾಯಿತ್ ಚತ್ತಗುಂಡ್, ಅದ್, ದೇವ ನಂಗಡ ಮೇಲೆ ಬೆಚ್ಚಿತ್ಂಜ ಪ್ರೀತಿನ ಕಾಟುವ.

⁹ಇಕ್ಕ ಅಂವೊಂಡ ಚೋರೆರಗುಂಡ್ ನೀತಿವಂತಂಗಳಾನ ನಂಗ, ಅಂವೊಂಡ ಚೆಡಿಯಿಂಜ ನಂಗ ತಪ್ಪ್‌ಚಿಡ್‌ವದ್ ಇಂಞು ಎಚ್ಚಕ್ ಕಂಡಿತ.

¹⁰ನಂಗ ದೇವಕ್ ವಿರೋದಿಯಂಗಳಾಯಿತಿಪ್ಪಕ, ಅಂವೊಂಡ ಮೋಂವೊಂಡ ಚಾವ್‍ರಗುಂಡ್ ವಿರೋದತ್‍ನ ನೀಕಿತ್ ಸಮಾದಾನತ್‍ನ ಕೊಂಡ್ ಬಾತೇಂಗಿ, ವಿರೋದತ್‍ನ ನೀಕಿತ್ ಸಮಾದಾನ ಕ್‍ಟ್ಟ್‌ನ ಪಿಂಞ ಅಂವೊಂಡ ಜೀವತ್‍ರ ಮೂಲಕ ಬಚಾವಾಪದ್ ಎಚ್ಚಕ್ ಕಂಡಿತ.

¹¹ಅದಲ್ಲತೆ, ನಂಗಕ್ ಇಕ್ಕ ವಿರೋದತ್‍ನ ನೀಕಿತ್ ಸಮಾದಾನ ಕ್‍ಟ್ಟುವಕ್ ಮಾಡ್‍ನ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ನಂಗ ದೇವಡ ವಿಷಯತ್‍ನ ಹೊಗಳಿಯಂಡುಂಡ್.

¹²ಅನ್ನನೆ, ಒರ್ ಮುನುಷ್ಯನಗುಂಡ್ ಪಾಪವು, ಪಾಪತ್‍ರಗುಂಡ್ ಚಾವು ಈ ಲೋಕತ್‍ಲ್ ಬಾತ್. ಇನ್ನನೆ ಎಲ್ಲಾರು ಪಾಪ ಮಾಡ್‍ನಗುಂಡ್, ಚಾವ್ ಎಲ್ಲಾರ್‌ಕು ಬಾತ್.

¹³ನ್ಯಾಯಪ್ರಮಾಣ ಬಪ್ಪಕ್ ಮಿಂಞಲೇ ಪಾಪ ಈ ಲೋಕತ್‍ಲ್ ಇಂಜತ್; ನ್ಯಾಯಪ್ರಮಾಣ ಇಲ್ಲತೆಪೋಚೇಂಗಿ, ಪಾಪ ಎಂತ್‍ೕಂದ್ ಗೊತ್ತಾಪಕಿಂಜಿಲೆ.

¹⁴ಅನ್ನನೆ ಇಂಜತೇಂಗಿಯು, ಆದಾಮಯಿಂಜ ಮೋಶೆಕತ್ತನೆ, ಪಾಪ ಮಾಡತಯಿಂಗಳ ಸಹ ಚಾವ್ ಆಳಿಯಂಡಿಂಜತಲ್ಲ! ಆದಾಮ ಮಾಡ್‍ನ ಅಪರಾದತ್‍ರಚ್ಚಕ್, ಅಯಿಂಗ ಪಾಪ ಮಾಡತೆ ಇಂಜತೇಂಗಿಯು ಅಯಿಂಗಳ ಆಳಿಯಂಡಿಂಜತ್. ಈ ಆದಾಮ ಬಯ್ಯ ಬಂದ ಕ್ರಿಸ್ತಂಗ್ ಗುರ್‌ತ್ ಆಯಿತ್ಂಜತ್.

¹⁵ಆಚೇಂಗಿ, ಆದಾಮಂಡ ಪಾಪಕು, ದೇವಡ ಕೃಪೇರ ಇನಾಮ್ಂಗು ದುಂಬ ವೆತ್ಯಾಸ ಉಂಡ್. ಎನ್ನಂಗೆಣ್ಣ್‌ಚೇಂಗಿ ಆದಾಮನಾನ ಒರೇ ಮನುಷ್ಯಂಡ ಪಾಪತ್‍ರುಗುಂಡ್ ದುಂಬ ಜನ ಚತ್ತ್ ಪೋಚೇಂಗಿ, ದೇವಡ ಕೃಪೆಯು, ಯೇಸು ಕ್ರಿಸ್ತ ಎಣ್ಣುವ ಒರೇ ಮನುಷ್ಯಂಡ ಕೃಪೆಯಿಂಜ ಬಪ್ಪ ಇನಾಮ್ ಎಲ್ಲಾ ಜನಡಮೇಲೆ ಎಚ್ಚಕ್ ದುಂಬ್‍ನದಾಯಿತ್‌ಪ್ಪ.

¹⁶ಇದ್‍ಲ್ಲತೆ, ಒಬ್ಬ ಪಾಪ ಮಾಡ್‍ನಗುಂಡ್ ಕ್‍ಟ್ಟ್‌ನ ತೀರ್ಪ್, ದೇವ ತಪ್ಪ ಇನಾಮ್‍ಕ್ ಸಮವಾನದಲ್ಲ; ಆ ಒರೇ ಪಾಪಕಾಯಿತ್ ಕ್‍ಟ್ಟ್‌ನ ತೀರ್ಪ್ ನಾಶ ಆಪಕ್ ಕಾರಣ ಆಚಿ; ಆಚೇಂಗಿ ಕೃಪೇರ ಇನಾಮ್ ಬಯ್ಯ ಬಂದ ದುಂಬ ಅಪರಾದತ್‍ನ ತಳ್ಳಿತ್, ಅಪರಾದ ಇಲ್ಲೇಂದ್ ನೀತಿ ತಪ್ಪ ತೀರ್ಪ್‌ಕ್ ಕಾರಣ ಆಚಿ.

¹⁷ಒಬ್ಬಂಡ ಅಪರಾದತ್‍ರಗುಂಡ್ ಆ ಒಬ್ಬಂಡ ಮೂಲಕವೇ ಚಾವ್ ಎಲ್ಲಾರ್‌ನ ಆಳಿಯಂಡಿಂಜತೇಂಗಿ, ಕೃಪೇರ ಪಿಂಞ ನೀತಿರ ಪೂರ್ತಿ ಇನಾಮ್ ಕ್‍ಟ್ಟ್‌ವಯಿಂಗ ಯೇಸು ಕ್ರಿಸ್ತ ಎಣ್ಣುವ ಒಬ್ಬನಗುಂಡ್ ಜೀವ ಕ್‍ಟ್ಟಿತ್ ಆಳುವಾಂದ್ ಎಚ್ಚಕ್ ನಿಶ್ಚಯ.

¹⁸ಆನಗುಂಡ್, ಒರ್ ಅಪರಾದತ್‍ರಗುಂಡ್ ಎಲ್ಲಾ ಮನುಷ್ಯಂಗಕು ನಾಶ ಆಪಕುಳ್ಳ ತೀರ್ಪ್ ಕ್‍ಟ್ಟ್‌ನನೆಕೆ, ಒರೇ ನೀತಿರಗುಂಡ್ ಎಲ್ಲಾ ಮನುಷ್ಯಂಗಕು ಜೀವ ಕ್‍ಟ್ಟ್‌ವ ತೀರ್ಪ್ ಆಚಿ.

¹⁹ಒರ್ ಮನುಷ್ಯಂಡ ಅಪರಾದತ್ಂಜ ದುಂಬ ಜನ ಪಾಪಿಯಳಾನನೆಕೆ, ಒಬ್ಬ ಬಗ್ಗ್‌ನಗುಂಡ್ ದುಂಬ ಜನ ನೀತಿವಂತಯಿಂಗಳಾಯಿತ್ ಆಪ.

²⁰ಅದಲ್ಲತೆ, ಅಪರಾದ ಜಾಸ್ತಿ ಆಂಡೂಂದ್ ನ್ಯಾಯಪ್ರಮಾಣತ್‍ನ ಕೊಡ್‍ತತ್; ಆಚೇಂಗಿ, ಎಲ್ಲಿ ಪಾಪ ಜಾಸ್ತಿ ಆಚೋ, ಅಲ್ಲಿ ಕೃಪೆಯು ಇಂಞು ಜಾಸ್ತಿಯಾಚಿ.

²¹ಆನಗುಂಡ್, ಪಾಪತ್‍ರ ಮೇಲೆ ಚಾವ್‍ಕ್ ಜಯ ಕ್‍ಟ್ಟ್‌ನನೆಕೆ, ದೇವಡ ಕೃಪೆಯು ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ನಿತ್ಯ ಜೀವತ್‍ನ ತಂದಿತ್, ನೀತಿರಗುಂಡ್ ಜಯ ಕ್‍ಟ್ಟ್‌ವನೆಕೆ ಮಾಡ್‍ಚಿ.