Read Kodava ರೋಮ್ 6 Bible Online

ರೋಮ್ 6 - Kodava bible

ರೋಮ್ 6

¹ಆನಗುಂಡ್ ನಂಗ ಎಂತ ಎಣ್ಣಡ್? ದೇವಡ ಕೃಪೆ ದುಂಬ ಕ್‍ಟ್ಟಂಡೂಂದ್, ನಂಗ ಪಾಪತ್‍ಲೇ ಬದ್‍ಕಿಯಂಡಿರೊಂಡುವ?

²ಅನ್ನನೆ ಇಲ್ಲೆ! ಪಾಪಕ್ ಚತ್ತ್ ಪೋಯಿತುಳ್ಳ ನಂಗ, ಇಂಞು ಅದ್‍ಲ್ ಎನ್ನನೆ ಬದ್‍ಕ್‌ವಕಾಪ?

³ಕ್ರಿಸ್ತ ಯೇಸುಂಡಲ್ಲಿ ದೀಕ್ಷಾಸ್ನಾನ ಎಡ್‍ತಿತುಳ್ಳ ನಂಗ ಎಲ್ಲಾರು, ಅಂವೊಂಡ ಚಾವ್‍ಲ್ ಸಹ ಒಂದಾಪನೆಕೆ, ದೀಕ್ಷಾಸ್ನಾನ ಎಡ್‍ತಂಡದ್ ನಿಂಗಕ್ ಗೊತ್ತ್‌ಲ್ಲೆಯ?

⁴ಅನ್ನನೆ, ಅಪ್ಪನಾನ ದೇವಡ ಮಹಿಮೇರಗುಂಡ್, ಕ್ರಿಸ್ತನ ಚತ್ತಯಿಂಗಡ ಮದ್ಯತ್ಂಜ ಎಪ್ಪ್‌ಚಿಟ್ಟನೆಕೆ, ನಂಗಳು, ಪುದಿಯ ಜೀವ ಕ್‍ಟ್ಟ್‌ನಯಿಂಗಳಾಯಿತ್ ನಡ್‍ಕಂಡೂಂದ್, ಅಂವೊಂಡ ಚಾವ್‍ಲ್ ನಂಗ ಪಾಲದಾರಂಗಳಾಪನೆಕೆ, ದೀಕ್ಷಾಸ್ನಾನತ್‍ರ ಮೂಲಕ ಕ್ರಿಸ್ತಂಡ ಕೂಡೆ ನಂಗಳ ಪೂತ್ತತ್.

⁵ಆನಗುಂಡ್, ಅಂವೊ ಚತ್ತಿತ್ ಅಂವೊಂಡ ಚಾವ್‍ರ ಮೂಲಕ ನಂಗ ಅಂವೊಂಡ ಕೂಡೆ ಒಂದಾಯಿತ್ಂಜತೇಂಗಿ, ಅಂವೊ ಎನ್ನನೆ ಎದ್ದಿತೋ ಅನ್ನನೆ ನಂಗಳು ಚಾವ್‍ಯಿಂಜ ಎದ್ದಿತ್ ಜೀವತ್‍ಲ್ ಒಂದಾಯಿತ್‌ಪ್ಪ.

⁶ನಂಗ ಇಂಞು ಮಿಂಞಕ್ ಪಾಪಕ್ ಆಳಾಯಿತ್ ಬದ್‍ಕತೆ, ಪಾಪತ್‍ರ ತಡಿ ಪಾಳಾಯಿ ಪೋಪಕ್, ನಂಗಡ ಪಳೆಯ ಮನುಷ್ಯನ ಅಂವೊಂಡ ಕೂಡೆ ಶಿಲುಬೇಲ್ ಇಟ್ಟಿತಾಚೀಂದ್ ನಂಗಕ್ ಗೊತ್ತುಂಡ್.

⁷ಎನ್ನನೆ ಎಣ್ಣ್‌ಚೇಂಗಿ, ನಂಗ ಕ್ರಿಸ್ತಂಡ ಕೂಡೆ ಚಾವಕ, ನಂಗ ಪಾಪತ್‍ರ ಶಕ್ತಿಯಿಂಜ ಬಚಾವಾಯಿತುಂಡ್.

⁸ಆನಗುಂಡ್, ನಂಗ ಕ್ರಿಸ್ತಂಡ ಕೂಡೆ ಚತ್ತತೇಂಗಿ, ಅಂವೊಂಡ ಕೂಡೆ ನಂಗ ಸಹ ಬದ್‍ಕಾವಾಂದ್ ನಂಬಿಯಂಡುಂಡ್.

⁹ಚತ್ತಯಿಂಗಡ ಮದ್ಯತ್ಂಜ ಎದ್ದಿತ್ ಬಂದ ಕ್ರಿಸ್ತ ಇಂಞು ಮಿಂಞಕ್ ಚಾವುಲೆ; ಚಾವ್ ಅಂವೊನ ಆಳುವಕ್ ಕಯ್ಯುಲೇಂದ್ ನಂಗಕ್ ಗೊತ್ತುಂಡ್.

¹⁰ಅಂವೊ ಚತ್ತದ್, ಪಾಪಕಾಯಿತ್ ಒರೇ ಕುರಿ ಚತ್ತತ್; ಅಂವೊ ಇಕ್ಕ ಬದ್‍ಕಿಯಂಡುಳ್ಳದ್, ದೇವಕಾಯಿತ್ ಬದ್‍ಕಿಯಂಡುಂಡ್.

¹¹ಅನ್ನನೆ ನಿಂಗಳು, ನಿಂಗಳ ಪಾಪಕ್ ಚತ್ತಯಿಂಗಳಾಯಿತು, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡಲ್ಲಿ ಉಳ್ಳ ಐಕ್ಯತ್‍ಲ್ ದೇವಕಾಯಿತ್ ಬದ್‍ಕಿಯಂಡುಳ್ಳಯಿಂಗಳಾಯಿತು ಗೇನ ಮಾಡಿಯೊಳಿ.

¹²ಆನಗುಂಡ್, ನಿಂಗಡ ತಡೀರ ಇಚ್ಛೆರನೆಕೆ, ಪಾಪಕ್ ಬಗ್ಗಿತ್ ನಡ್‍ಕತೆ, ಪಿಂಞ ನಾಶ ಆಯಿಪೋಪ ನಿಂಗಡ ತಡೀಲ್ ಪಾಪ ಆಳುವಕ್ ಬುಡತಿ.

¹³ನಿಂಗ ನಿಂಗಡ ತಡೀರ ಬಾಗತ್‍ನ ಅನೀತಿರ ಆಯುದವಾಯಿತ್ ಪಾಪಕ್ ಒಪ್ಪ್‌ಚಿಡತೆ, ನಿಂಗಳ ಚತ್ತಯಿಂಗಡ ಮದ್ಯತ್ಂಜ ಜೀವತ್‍ಲ್ ಬಂದಯಿಂಗಡನೆಕೆ, ದೇವಕ್ ಒಪ್ಪ್‌ಚಿಟ್ಟಿತ್ ನಿಂಗಡ ತಡೀರ ಬಾಗತ್‍ನ ನೀತಿರ ಆಯುದವಾಯಿತ್ ದೇವಕ್ ಅರ್ಪಣೆ ಮಾಡಿ.

¹⁴ನಿಂಗ ನ್ಯಾಯಪ್ರಮಾಣತ್‍ರ ಅಡಿಕ್ ಬರತೆ, ಕೃಪೇರ ಅಡಿಕ್ ಬಂದಿತುಳ್ಳಗುಂಡ್ ಪಾಪ ನಿಂಗಳ ಆಳುವಕ್ ಕಯ್ಯುಲೆ.

¹⁵ಆನಗುಂಡ್ ಎಂತ? ನಂಗ ನ್ಯಾಯಪ್ರಮಾಣತ್‍ರ ಅಡಿಕ್ ಬರತೆ, ಕೃಪೇರ ಅಡಿಕ್ ಬಂದಗುಂಡ್ ಪಾಪ ಮಾಡಂಡುವ? ಮಾಡ್‌ವಕ್ಕಾಗ.

¹⁶ಚಾವ್‍ಕ್ ಕಾರಣವಾಯಿತುಳ್ಳ ಪಾಪವಾಚೇಂಗಿಯು, ನೀತಿ ಕ್‍ಟ್ಟುವಕ್ ಕಾರಣವಾಯುತುಳ್ಳ ಬಗ್ಗಿತ್ ನಡ್‍ಪದಾಚೇಂಗಿಯು, ಎಂತದ್ಂಗ್ ಅಡಿಯಾಳಾಯಿತ್ ಬಗ್ಗಿತ್ ನಡ್‍ಪಕ್ ನಿಂಗಳ ಒಪ್ಪ್‌ಚಿಡುವಿರೋ, ಅದ್ಂಗೇ ಬಗ್ಗುವ ಅಡಿಯಾಳಾಯಿತಿಪ್ಪಿರಾಂದ್ ಗೊತ್ತ್‌ಲ್ಲೆಯ?

¹⁷ಮಿಂಞ ನಿಂಗ ಪಾಪತ್‍ರ ಅಡಿಯಾಳಾಯಿತ್ಂಜಿರ, ಇಕ್ಕ ನಿಂಗ, ನಿಂಗಕ್ ಒಪ್ಪ್‌ಚಿಟ್ಟ ಬೋದನೆನ ಪೂರ್ತಿ ಮನಸ್ಸ್‌ಲ್ ಸ್ವೀಕಾರ ಮಾಡ್‍ನಗುಂಡ್ ದೇವಕ್ ವಂದನೆ ಎಣ್ಣಿಯಂಡುಂಡ್.

¹⁸ಇಕ್ಕ ನಿಂಗ ಪಾಪತ್ಂಜ ಬುಡುಗಡೆ ಆಯಿತ್ ನೀತಿರ ಅಡಿಯಾಳಾಯಿತುಳ್ಳಿರ.

¹⁹ನಿಂಗಕ್ ಅರ್ಥ ಮಾಡ್‌ವಕ್ ಕಷ್ಟ ಉಳ್ಳಾಂಗ್, ಮನುಷ್ಯ ರೀತಿಲ್ ನಾನ್ ನಿಂಗಕ್ ಎಣ್ಣಿ ತಪ್ಪಿ. ಮಿಂಞ ನಿಂಗ ನಿಂಗಡ ತಡೀನ ಅಶುದ್ದ ಕಾರ್ಯಕು, ದುಷ್ಟತನತ್‍ಲ್ ಇಂಞು ಅಕ್ರಮ ಮಾಡ್‌ವಕ್ ಅಡಿಯಾಳಾಯಿತ್ ಒಪ್ಪ್‌ಚಿಟ್ಟನೆಕೆ, ಇಕ್ಕ ಪವಿತ್ರ ಆಪಕಾಯಿತ್, ನಿಂಗಡ ತಡೀನ ನೀತಿಕ್ ಅಡಿಯಾಳಾಯಿತ್ ಒಪ್ಪ್‌ಚಿಡಿ.

²⁰ಪಾಪತ್‍ರ ಅಡಿಯಾಳಾಯಿತಿಪ್ಪಕ, ನೀತಿ ಕೆಲಸ ಮಾಡಂಡೂಂದ್ ಉಳ್ಳ ನೇಮಕ್ ಒಳಪಟ್ಟಯಿಂಗಳಾಯಿತ್‌ಲ್ಲೆ.

²¹ಆ ಕಾಲತ್‍ಲ್ ನಿಂಗಕ್ ಎಂತ ಲಾಬ ಕ್‍ಟ್ಟ್‌ಚಿ? ಅದ್‍ನ ಗೇನ ಮಾಡ್‌ವಕ, ಇಕ್ಕ ಅವಮಾನವಾಯಿತುಂಡ್. ಅದ್ಂಡ ಪ್ರತಿಫಲ ಚಾವ್.

²²ಇಕ್ಕ ನಿಂಗ ಪಾಪತ್ಂಜ ಬುಡುಗಡೆ ಆಯಿತ್ ದೇವಡ ಅಡಿಯಾಳಾಯಿತ್ ಉಳ್ಳಾಂಗ್, ಪವಿತ್ರವಾಯಿತ್‌ಪ್ಪದ್ ನಿಂಗಕ್ ಕ್‍ಟ್ಟ್‌ವ ಇನಾಮ್, ಅದ್ಂಡ ಪ್ರತಿಫಲ ನಿತ್ಯ ಜೀವ.

²³ಪಾಪತ್‍ರ ಸಂಬಳ ಚಾವ್; ದೇವಡ ಇನಾಮ್ ನಂಗಡ ಒಡೆಯನಾನ ಯೇಸು ಕ್ರಿಸ್ತನಗುಂಡ್ ಕ್‍ಟ್ಟ್‌ವ ನಿತ್ಯ ಜೀವ.